_وشاء الحب_
( بقلم بسمة البياتي)
_البارت العشرون _
ماظل شي للأمتحانات
حاولت اركز بالدراسة تا اخلص
وابدي اتهير للخطوبة والعرس
قبل الأمتحانات بأربع ايام جة بابا
گال جدج وجدتج جانوا بالعمرة واليوم راجعين
باجر يسوون عزيمة جهزوا حالكم تا الصبح نروح
ثاني يوم ماما ما گدرت تجي رحنا بس اني وبابا وجدة
من وصلنا خالاتي وخوالي كلهم اهناك
بابا ضاج من شاف اشرف لو ما يستحي من خوالي وگرابتنا يرجعنا بحزتها للبيت
جديتي ام ماما مگعدتني بسدها وتحب بية
... يولي والله كبرتي وحلويتي عين الله التحرسج
اريد اخذج الواحد من ولد خوالج ما اريد تروحين للغريب
نعيمة... ماتروح للغريب ان شاء الله
قادر طلبها وانطيناها وبالعطلة العرس
... مامقبولة منكم تخلون السالفة سكتة
هاي حفيدتي مثل ماهي حفيدتج
شوكت جنتوا ناويين تكولوللنة بيوم العرس حالنة حال المعازيم
اني وجدها هم النة حگ بيها ولازم تاخذون شورنا
... السالفة بعدها بس حجي لسان
اكيد قبل المشية شاهر يبلغكم تا تحضرون
قادر انتوا تعرفونوا ماتلكي احسن منو
... ونعم منو بس القهرني متفقين ومحد انطانة خبر
..عجل هساع مو بلغتكم
ومثل ما گوتلج السالفة بعدها بس حجي وبوگت الي تخلص امتحانات تنفتح السبرة والكل يعرفون
.. خالاتي ماعجبهن الحجي ظلن يجرن بالطول وبالعرض
جدي رادني جيت سلمت علية كال والله كبرتي وراح اشوفج عروس
خجلت منو مبين بابا مبلغهم
طبيت للمطبخ ويا البنات الكل عينهن علية ويتهامسن علاقتي بيهن مو قوية ما رتاحيت ابقى جدامهم رجعت يم جدة
ورة الغدا كمت تا اغسل ايدي
بالحمام الداخلي
واكو مغاسل وحمام ثاني برا للزلم
واكفة اغسل سمعت صوت كشت لشتي منو
صوت اكثر بشر اكره شوفتوا
عمران..شلونج يالعروس
.. الحمدلله
سديت البوري صديت تا امشي گضبني من ايدي
دفعتها وخررررر لاتگضبني
... هههههههه هالكثر خايفة مني
امشي فوتي الهاي الغرفة عندي سالفة. وياج
... لو اموت ما انجمع وياك بمكان وحدنا وخررر من طريقي
.... بنت القندرة تجين وانتي الممنونة امشششي جدامي الكلام الراح تسمعي المصلحتج
.. گضبني من ايدي وسحلني للغرفة جيت اصرخ سد حلگي تخبلت بالزايد هذا الموقف عاد علية أبشع ذكرى بحياتي
الكل ملتهين بالغدا وبس الجهال يفترون
اختنكت دفعت ايدوا وخرررر والله اصرخ والم البيت عليك اخلي بابا يخش بخطيتك
... صرخي محد يتأذى غيرج
... ترى كبرت
اني مو هذيج نجوى التتقشمر بهالكلام
... عجل اذا كبرتي ونفتحت عيونج
شلون تريدين تتزوجين وما خايفة
.... وعليش اخاف
... ها يعني بيوم العرس عادي تنذبحين وتنزتين بالبلوعة
... دحجت علية بخوف يحجي بمكر وحقارة
.. شنو قصدك؟!
.... شنو نسيتي الصار گبل هههههه اذا ناسية عادي ارجع اذكرج
ياحلوة انتي ما عدتي تصلحين تتزوجين
الا اذا حابة الفضيحة والموت
دام هالكثر عاجبج الزواج يلا ميخالف اخذج فوك حرمتي
.....اهجس انكطع الهوا وراح اكع من طولي
..... صيري عاقلة وانفذي بريشج گبل الفاس مايگع بالرأس وهاي ريحت ضميري ونبهتج حتى لاتكولين علية مو خوش
وها للعلم اني مخايف على حالي خايف عليج
محد ينضر بهالزواجة غيرج
اذا اتكوليلهم عمران سوة بية هيج محد يصدكج راح يگولولج عليش ماحجيتي بوكتها
.... كلمة وحدة ما اكدر انطق البية مايتسولف لا الأنس ولا الجن
ضيمي وناري مايعلم بيهن غير الخلقني
عمران النجس من سمع حس النسوان عافني وطلع
رجلي انشلت گعدت بالگاع هساع شسوي وين انطي وجهي المنو اسولف منو راح يصدگني سنين واني ساكتة وأحاول انسى الجرالي
بطفولتي
كفيت دموعي وطلعت امشي بدون وعي جيت يم جدة همست
جدة كافي خلي نرجع
.. يولي شبلاج شبي حسج بالگوة يطلع
... دخت من الهوسة ويمكن تمرضت
... دكيلي على شاهر تا يرجعنا اني هم انسطرت
.. يابا كال يلا اطلعوا انتظركم يم السيارة سلمنا وطلعنا
وصلت للبيت الكل يحجي وياي وما اكدر اجاوب
عفتهم وخشيت بالفراش جت فيروز
كوتلها تعبانة أريد انام عافتني وطلعت
تغطيت وبجيت من ضمير
اني نجوى شاهر حالي مايفرق شي عن فيروز
يتيمة ام مثلها ربتني ماما اصيل
الفرق البيني وبينها
اني كتومة وما اطلع البداخلي ولا اكدر اخذ حقي من اليأذوني
طفولتي مو عادية مثل باقي البنات
الصار بية ابشع شي ممكن يصير الطفل بعمر الست سنوات
صغر سني ما منع الذيب من افتراسي
ابن خالي المراهق باليلة سودة طمع بجسمي الزغير وشبع رغباتوا بية بالتهديد والترهيب
كبرت بس عمر هاليوم ما راح من بالي ما اذكر التفاصيل كل الأذكروا الخوف العشتوا والالم الصابني
من وعيت ظنيت الصابني مجرد تحرش وما يأثر
الآذية ظلت تلاحكني دوم اسمع يحجون على امي وياشرون علية
هاي امها اتتحرت لان موزينة هاي امها خانت ابوها
وغيروا جثير اشكال الكلام
اسمع واسكت ماعندي رد
بيوم الجيت افرح وانسى واحب واتزوج حالي حال باقي البنات
وكعت ووكعن احلامي من سابع سما
شراح اسوي ما ادري
كل المشتهيتوا هساع گبر انام بي گبل لا انفضح وانزل رأس اهلي
فيروز... نجوى من رجعت من العزيمة مو على بعضها نامت والهساع ما گاعدة
جدة كالت يمكن مريضة
جيت عليها كشفت راسها الوجه احمر وحار
فتحت عينها بالگوة.
ياعمري شنو اليوجعج وجهج غادي نار
.... راسي يريد يطك مگاعد أكدر افتح عيني
عطشانة اريد ماي
. هساع اجيبلج
رحت صحت ماما وجبتلها مي
اصيل. امشي جيبيلها شي تأكلوا تا انطيها علاج
.... ما نفسي تريد
.... يولي اذا تبقين هيج المرض يزيد
حتى لو بس فواكه اكلي
... جبتلها فواكه بشلعان الگلب أكلت شوية واخذت علاج رجعت نامت
لليل واني يمها
شاهر... شلون صارت بعدها مصخنة
ايات... لا شوية احسن فوت عليش واكف بالباب
نجوى. جة بابا حط ايدو على كصتي وباسني
.. بعدوا وجهج حار كومي اخذج للمستشفى ماطول بعد وگت
... لا بابا مابية شي هساع احسن من هذيج الساعة
... عينكم عليها لاتغفلون عنها
ايات... لاتوصي حريص ابطن عيني
... سالمة عيونج خيتي
فيروز...راح شاهر ماما رادت تظل يمنا ماخليتها
لان تعبانة ويا جنة تسهرها الليل عليها
ظليت متمددة بسد نجوى
ايات نامت
توها عيني شكلت بالنوم سمعت حس بجي
دحجت على نجوى غاصة بالبجي
جفلت گضبتها غادية نار وبالگوة تجر ابنفس
نجوى فتحيييي عينج شششبيج ياروح اختج بس حاجيني. ولاتيجين مووو اختنكتي
.... هجس النفس غاب عني يمكن الله استجابلي وهاي اخر ساعة الي بهالدنيا الظالمة
فيروز تحجي وياي ما اكدر ارد عليها
ايات... رايحة اصيح شاهر
... عافتنا وصعدت فوك
شوية ونزل شاهر البيت كولوا گعد
اصيل... خوية خلي ناخذها للمستشفى دخجها مگاعد تكدر تتنفس
ايات..اصيل ظلي اني اروح ويا شاهر وين تكدرين تعوفين بنتج
.... ما اظل هين جنة تبقى يم فيروز
.... شاهر وماما اخذوا نجوى للمستشفى ايات راحت وياهم
بقيت ابجي ياربي شجرالها الصبح مابيها شي
افتر بالبيت أريد بس يجون
بجت جنة وحرت بيها متعلمة على صدر ماما ماتقبل تاخذ الممة انشلع گلبي وياها الحد ما رضعت شوية ونامت
الفجر جابوا نجوى من المستشفى
سألتهم عليش هالكثر تأخرتوا وشگالولكم شبيها نجوى
شاهر.. لاتخافين مابيها شي من الحرارة مختنكة شكلولها مغذي واوكسجين وهساع احسن
اصيل... جنة خما گعدت
... شلعت گلبي ماتريد الممة.
يلا روحي ارتاحي اني يم نجوى
شاهر وماما راحوا
جبت ملابس النجوى بدلتلها وانجضعت بسدها
نجوى... فيروزة تعالي بسدي اريد انام بحضنج
.... ههههه مو تدللين
حضنتها والعب بشعرها ضمت وجها بحضني وصوت بجيها گطع گلبي
نجوى دحجي علية شبيج حبيبتي منو وياج هاي دموعج وحسرتج مو بسبب المرض
... هااا مابية شي عبالي راح اموت وبعد ما اشوفح
.. اششششش ديربالج تعيديها من عمري على عمرج اروح فدوة الطولج
...اسم الله عليج
.... ابد نجوى مو طبيعية الحسرة البگلبها والدموع وراهن سالفة
من شفتها نامت يلا گدرت انام
... الأيام تمشي بدن امتحاناتي ما اكدر اقرأ ولا الي نفس بشي العطلة الجنت اتمناها هساع ما اريدها تجي
من اسمع حس قادر اموت الف موتة ما اريد اطلع واشوفوا اتحجج بالقرآية
امتحنت ثلاث امتحانات واصلاً ما اعرف شجاوبت
اليوم العصر قررت اخلي حد للسالفة جيت گعدت جدام ماما
اريد اكولج شي بس لا تزعلين مني
.... هو منو الي يگدر ازعل منج احجي بنيتي
... نصيت راسي وهمست بقهر ماما
ما أريد اتزوج
... ششنو شگاعد تكولين نجوى عجل عليش وافقتي من البداية
... ما ادري الله عليج ماما احجي ويا بابا ما اريد اتزوج اريد التهي بدراستي
نعيمة... انجعمي لا بالنعال على حلگج مو هو لعب، جهال اريد وما اريد
وشنو ذنب الولد الگاعد ينتظر العطلة
واحلام المكيفة ومن هسة تحضر للعقد
... بجيت قووووي كافي جدة ما اريد خما كووووة ما ادري شلون من الأول وافقت وهسسساع گاعد أكولكم ما اريد ما ارررررريد
اصيل... صفنت على حالها والبجي الگاعد تبجي هسسساع شسوي
كافي لاتبجين يجي أبوج واحجي ويا والله يستر
نعيمة.... يولي اشو صفيتي وياها وطاوعتيها قابل بكيفها
تاخذوا وغصب عنها على اساس تلكي احسن منو.
... يمة وال يرحم اهلج بسج عاد يجي شاهر وهو يحلها وانتي بنفسج گولتي قابل لعب جهال
ترى هذا زواج مايصير الغصب بي
... ظلي وراهن محد فين حظهن غيرج
فيروز....طبينا للغرفة
اريد اسألها عن السبب ما اكدر حالتها بس هو الله يعلم بيها
نجوى. فيروز ساعديني ما اريد اتزوج الله عليج انتي احجي ويا بابا هو يسمع منج
.... بطلي بجي وجاوبيني شنو البيج وخلاج تغيرين رايج وعليش هالكثر مقهورة ولاتكولين ماكو سبب ترى من عيونج ادري بيج تريدين قادر
... لا غلطانة ما اريدوا بالبداية جنت مستحية ومن الخجل وافقت ومن فكرت عدل ضجت اني ويني وين الزواج اريد اكمل كلية
.... والله مدري يجي ابوج وانشوف شيگول
... باليل قادر موجود ماما ما گدرت تحجي ويا شاهر
قادر...نجوى شلونها اشو ماتطلع من اني، هين معقولة ماتكدر تستراح خمس دقايق وتجي تسلم.
... هااا مو تدري بيها دودة مال كتب من تدرس تنسى حالها
.... عجل ماطلعتي مثلها بس فالحة بالفواين.
....زمن الخلاني اصير سالفة بحلگك اصبر وشوف اذا ما اصدمكم
بس خلي يحقلي الخارجي واقدم الا اطلع طب عناد بيك
.... انهجم بيت الباميا طب فد نوبة يلا شكو بيها الأحلام قابل بفلوس
امشي صيحي نجوى لا وكلام الله افوت الغرفتها جدام الكل.
. فان حظك يول مو ابوها گاعد
.... هو وينو ابوها دحجي ضارب صفنات
... هه اي يمكن عاشگ
. هههههه توج تدرين الزلمة فان حظو من زمان
صارلوا جم يوم يمشي ويغني اعزاز حفظتها من وراه
.. قادر كام يعني بصوت عالي
يا عشگهم هيل ما عبرت سنينه شما يمر بينا العمر يكثر حنينه مدللين آخ مدللين ويلوك لأحبابي الدلال وشوگهم نسمه جنوب وسيرت لأهل الشمال
شاهر ضحك بصوت عالي
... شبلاك يول
...سلامتك حبيبي تذكرت واحد مضروب على گلبوا
بس ناقصوا يمشي ويغني بمبي حلوة الدنيا بمبي تيرااااا راااااا
... أيات صارلي جم يوم اسمع اغاني ياس خضر وحبيتوا
قادر. اي خيتي حبي هو ينحب بصراحة
.... عفتهم وطبيت على نجوى صافنة وموبحال الدراسة
كومي سلمي على قادر
.. هااا لا ما أريد مو كولت الماما تحجي ويا بابا
... قادر هين ما كدرت تحاجي
امشي بس سلمي وارجعي حلف اذا ماتطلعين هو يفوت للغرفة
.... اااخ ياربي شسوي سديت الكتاب وطلعت
سلمت وكعدت بسد بابا
قادر...السادس اعدادي علمي هم مو مثلج انطي مفكة الحالج شوفي شصاير بيج جاتلة ابوج العاشگ على الدراسة
شاهر... مو عدكم بيت عليش ما تفارجنا
... على گلبك عمي الغالي
اي نجوى ارتاحي شوي
... مرتاحة الحمدلله ماعندي شي وهذا مستقبلي ما اريد اهملوا
شاهر.. يبعد ابوج كلاموا صح ارتاحي شوي انتي شاطرة وماينخاف عليج
... ان شاء الله
يلا راجعة للغرفة
ما دحجت بوجه قادر گلبي يعصرني علية
... قادر ضاج ترخص. وراح
گبل لا شاهر يصعد ينام ماما حجت ويا
ظل صافن
... زين ما عرفتي شنو الخلاها تغير رأيها
.. اتكول اريد اكمل دراسة واخش كلية
... اني شرطت علية تكمل ووافق
فيروز... نجوى ماتصدك اتكول كل الزلم هيج يحجون وبعدين يغيرون رايهم
... يعني هذا كلامها النهائي
... اي والله خوية جثير حجينا وياها.ونصحناها تا تغير رايها بدون فايده
نعيمة. . خلي تولي خما بكيفها احجي وياها وعقلها
.. وال يرحم اهلج يمة بلا هالحجي هذا جواز وعشرة عمر خما تريدين اجبرها
.... عجل تريد اختك تزعل منك وتخسر اخوك واحزام ظهرك. بسببها
... اختي اذا تحبني ما تزعل مني وقادر انتي كولتيها احزام ظهري ما تفرقنا هالسوالف
والحمد لله بعدنا على البر هي كلمة وانحجت لا خطوبة ولا عقد
... براحتك صوجي اني المحروك دمي عليكم ظل امشي وره الزعطوطة وانت التربح
نجوى... بابا وكف وياي مثل مامتعودة علية دوم ساندني وبظهري
انتهى كلشي گبل لايبدي والحلم الحلوة فزيت منو على كابوس ينهش بگلبي
كل ليلة گبل لا انام ادعي من كل گلبي بلكي اتكون هاي اخر ليلة الي تا ما اصبح وأذكر مصيبتي
وثاني يوم أكعد على نفس الهم ووجع الگلب
بابا بلغ بيت عمتي قراري.
جتي عمة احلام وعاتبتني
سكتت ماعندي جواب الها شريد اكول وشريد احجي
قادر من حزتها بعد مافات البيتنا
وجدة زعلانة مني
ساعات الشيطان يوسوس براسي وافكر اموت حالي نفس موتت امي
ومن اشوف بابا وماما اصيل وفيروز اتراجع
شلون اتركهم واخلي الناس تحجي عليهم بسببي
اصيل... فيروز امشي صعدي الملابس ورتبيهن بكنتور خالج
.... ماعلية خلي رغد توديهن
.. يولي كومي رغد وين تعرف واني مابية حيل اصعد الدرج
... هسساع اني شعلية بملابسوا عوفيهن نجوى تصعدهن
...نجوى تعبانة هو بس هالامتحان بقالها لاتصخرينها خلي تقرأ
... غمضت عيني بغضب ششاهر فوك شلون اصعد
شلت الملابس بعصبية محد راح يدمرني غيرهم
وصلت للصالة الگدام الغرف
باب غرفتوا مفتوحة تقربت صوت ايات ويا
أرتبكت هاي شگاعد تسوي هين
تقدمت بغضب صرت جدام الباب
شاهر واكف وايات واكفة بمسافة عنو
اثنينهم صدوا علية
ماحجيت شي طبيت وخليت الملابس على الجرباية
من الفضول وكفت اسفط بيهن
شاهر... خيتي الطلبتي مو راهم شلون تريدين احاجي ابوج بهيج سالفة
اذا ما انقلتي وقبلوا تظلين هين
البيت مثل بيت اهلج واخوج هلابيج بكل وگت
... مو ابوية معاند يگول اذا مانقلتي ماكو دوام بعد واني متعودة على مدرستي اهنا
ترى عادي اذا تحجي ويا تقنعة يعوفني براحتي هو يحبك ويحترمك
... اعذريني شرحتلج السبب مو راهمة ابد اخابر اكولوا عوف بنتك يمنا هو اذا يريد يبقيج هلا بيج
... ماشي ما اريد اضغط عليك واحرجك بلجي الكي غير حل.
حبيبتي فيروز اساعدج
.. لا شكرا
طلعت ايات راح شاهر سد الباب وجة انجضع
بسرعة كملتهن وصديت اريد اطلع
... اكفي اريدج تكوين ملابسي
.. وينهن تا اخذهن اكويهن جوة
... اكويهن هين
لاتروحين اريد اسولف وياج
... جبت الميز والأوتي
اشرلي على كومة ملابس هذا من كل عقلوا لو هي خباثة وكفت اكوي وروحي واصلة الخشمي
... ادري بيج انتي اقرب وحدة النجوى
كوليلي شبيها اهجسها مو مثل گبل اكو شي مضوجها
... ضايجة اتكول بسببي خربت علاقة بابا. وقادر وعمة احلام ما عادت تجينا مثل گبل
جدة هم زودتها اطب وتطلع ترزل بيها
... ماشي اني احجي وياها وافهمها گبل لا اسافر ما اريدها تظل تفكر بالسالفة وتنقهر
... دحجت علية ياسفر
.... رايح ويا قادر اللبنان انظل ١٥ يوم
.. هاا لبنان
اي وشعدكم اهناك
... ماعدنا شي سياحة قادر مدري منين طلع بهالسالفة وقررت اروح ويا
.... ممم اي احسن بلكي ينسى ويرجع يفوت هين البيت ضوجة بدون حسو
...انجعمي.
...شبيك وشحجيت اني
... سلامتج
... رجعت اكوي راح للكومدي طلع كارتونة
وجابها خلاها جدامي
شنو هاي
... تلفون بدال الأخذتوا منج
... ما أريدة شكرا
.. اخذي بدون حجي زايد خليتلج بي خط ما اقبل تنطينوا الأي واحد من گرابتنا عدة البنوات
النجوى هم جبت واحد مثلوا
... هه هساع تنطينا وبعد جم يوم تسحبوا مني
.. صيري ادمية واسمعي الكلام انعل ساس اهلوا اليأخذوا منج
... ماشي عود انشوف مشكور خالي
... ادللي يبعد خالج
... كملت الملابس وحدرت
ايات گاعدة وعينها علية
.
اصيل... وين ظليتي يولي لو بالگوة اصخرج لو بالگوة تحدرين
... دحجت على ايات
خالي راد اكوي ملابسوا عندوا سفر
... ياسفر اشو محد يدري
.... اي يريد يروح اللبنان ويا قادر
نعومة بعد جم يوم يجي وليدج وگاضب ايد لبنانية يگولج يمة هاي جنتج الجديدة هههههههه
....يسويها البخت
ايات... هنا وين حلوات كلهن بس. مكياج ولبس مدلع
... هههههههههههه سلامة عيونج عمري
ترى يخبلن جمال ونزاكة
... مدري كل. واحد وذوقوا
شنو هاي الكارتونة البيدج
... موبايل
... اشوفوا
.. اي گلبي تفضلي
...حلو وهساع مديلوا وغالي
...ما أكدر أكولج جدامج اخذي لان هدية من خالي
..لا شسوي بي عندي واحد جديد
... مدري ليش احجي وياها بهاي الطريقة هي تستفزني حتى ما كالت مبارك عليج لو بالعافية
نجوى...عرفت بابا وقادر راح يسافرون
ويمكن حتى هذا سفرهم بسببي
جة بابا حجة وياي
... تدرين شنو اصعب شي على ابوج
.. شنو
.. من اشوف هاي العيون الحلوة بيهن حزن
بنيتي عليش حاطة السالفة ابالج وقاهرة روحج بسببها
يولي اني من البداية ما قانع بهذا الزواج بعدج زغيرة اريدج تكملين دراسة ويوم التجي قسمتج تكونين مقتنعة بيها
و لو يعز علية فراگج
لاتضوجين يبعد ابوج كلشي قسمة وعمتج وقادر ماكو اطيب منهم مايزعلون منج
اشتاگيت الضحكتج الحلوة لاتحرمين أبوج منها
... ابتسمت بغصة وبنفس الوگت دموعي جرن حضنت بابا وشهكت بالبجي اه يا بابا لو تدري بحال بنتك
.... كفي دموعج ولاتزعليني منج من اليوم اعتبري قادر ما طلبج وما صار كل هذا
... مسحت دموعي ان شاء الله بابا
حاولت اضم قهري بگلبي وجدامهم أتصرف عادي صح صعب بس مجبورة
خلصت امتحاناتي وسافروا بابا وقادر
ايات رجعت الأهلها لان عطلة
فيروز... ماما وجدة وضعهن مو عاجبني جثير يتبسبسن
وجدة يومية اسمعها تحجي بالتلفون ويا خالي ايهاب
اليوم گاعدين كلنا خالة احلام وابتسام ويانة
نعيمة. ول فيروزة تگلطي عندي سالفة وياج.
...اي جدة گولي
... خوالج كلساع يخابرون يريدونج الأشرف.
...يووو بعدهم الهساع مانسوا مو انسدت السيرة من زمان
ابتسام... فيروز انتي تريدنوا لو لا
.. تنهدت لا ما اريد واصلاً خالي وبابا ما يقبلون
نعيمة.. معليج بيهم عوفي السالفة علية
اصيل... يمة والله خايفة من افكارج بعدين اتعم علية
... انجعمي يالفاهية تركي الموضوع ماعليج بي نافع وشاهر دواهم عندي
احلام.. بشنو تفكرين
...اشرف خوش زلمة ومايتعوض وادري شاهر لان تكاون ويا مايرضى ينطيها لو خاطبها بغير حزة ينطي وهو مغمض
فيروز... شگاعد تحجون انسو السالفة زواج ما اريد وخلص
عفتهم وطبيت للغرفة عقلي گاعد يتكاون
ساعة افكر اوافق وساعة أكول لا ما اريد اظلم حالي واظلم اشرف وياي
جدة ظلت تزن برأسي تا تقنعني لان خالي ايهاب طالبني الاشرف منها وهي گايلتوا يجرالكم
نجوى... اشو اهجسج راح توافقين
.... تريدين الصدوك اي گاعد افكر اوافق
وبابا
... شبي أبوج
.. عجل مو تحبي
... واذا احبوا شنو يعني هو ما يريدني داسني برجلوا عرف بمشاعري وراح تزوج
عاش واني دافني وبس يتأمر علية
... بس هساع هو مطلگ وتصرفاتوا تبين هو مهتم بيج
.... من گبل ابوج مهتم بية
اسمعيني عدل حتى لو يجي ويگولي اريدج ما اقبل بي.
.. أكيد تشاقين
.... بروح جدة ما أتشاقى بگد الحب الي احبوا حاقدة علية ما انسى العذاب العشتوا بسببوا
ولا انسى شوفتوا وياها جدامي
ابوج لو ما المشكلة الصارت جان تهاني لساع حرمتوا اني ولا شي بالنسبة الو
... حقج والله يساعدج
.... ايام وجدة تقرأ براسي والحد هساع ما اعرف شنو البالها وشلون راح تخلي بابا وشاهر يوافقون
شاهر من سافر مايتصل جثير باليوم نوبة وحدة
هه الظاهر مشغول
والزاد الطين بله من سمعت جدة تريد تقنعوا
تا يأخذ ايات
انسحنت من القهر مدري شلون نطقتها وگولت موافقة.....
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!