_وشاء الحب_
( بقلم بسمة البياتي)
_البارت الرابع عشر _
اشرف... اليشوف صفنتج يگول هموم الدنيا فوك گلبها
... هااا گاعد تحجي وياي
.... هههههه لا يابة ويا الصنم الگاعدة بسدي
وال يابة كملي نومتج
.... لايصير دمك ثگيل مانتبهت شحجيت جنت صافنة على الدرب
... جم يوم اتظلين
... ما ادري يمكن ثلاث ايام بالجثير بين ماترجع جدة
.... جدة ان شاء الله عگب باجر ترجع
.. عجل خوش رديت سكتت
دخلنا سامراء شكثر مشتاگتلها ومشتاگة الناسها
من وصلنا للبيت ماعرفتوا متغير عبالك مو هو لو ما بيوت جيرانة جان گولت أكيد متيهين
.... البيت متغير ولا عرفتوا
.. اي گبل لا اجي فلشوا وبنوا من جديد
عفت اشرف يسولف نزلت بسرعة
باب البرا مفتوح دفعتوا وطبيت اركض اريد بس اشوف ماما واحضنها
لكيتها بالمطبخ تركب منطيتني ظهرها
دكيت باب المطبخ وحجيت بصوت عالي تريدون خطار لو لا
اصيل.. اهجس روحي جفلت هذا صوت بنيتي زتيت البيدي وصديت عليها من شوگي الها رجلي ما عادت تشيلني تا تأخذني الها جت تركض الحضني لميتها بيدي اريد ادخلها بين ضلوعي اشمشم وابوس بيها ما مصدگة واكفة جدامي
.... بجيت بحضنها مشتاگتلج ماما روحي غادية نار على شوفتكم
.. يبعد امج وعافيتها يولي اشلون انطاج گلبج اطولين علية هالكثر
اشرف... احم وبالنسبة للشجرة الصارلها حزة واكفة هين ماكو سلام لو تفضل
.... هههههه يول والله مانتبهت شلونك شلون اهلك فوت عليش واگف بالباب
نعيمة... ول اصيل منو هين
هااا فيروزة گربي يمصگوعة بالحرام اشتاگيتلج
. ههههه واني مشتاگتلج شلونج جدة حضنتها وبوستها
وراها رجعت حضنت ماما
جدة فوتت أشرف جوة
تهاني.. شلونج عمري لعاش من شافج
.... هلا بيج حبي الحمدلله انتي شلونج
... بخير ودوم أسأل عنج
.. تسأل عليج العافية
اكول ماما عجل نجوى وين
اشو محد منهم مبين لا حسن ولا رغد
... بالمدرسة نجوى لو تدري بيج تجين فلا ادوم
... گليي طاك عليها
ما حبيت انطيكم خبر تا اسويلكمياها مفاجأة
.. واحلى مفاجأة يا محلى هالصباح البي شوفتج
... بابا شوكت يجي من الشغل
... بعد مو هسه وگت الغدا يردون هو وشاهر
... من گالت اسمو گلبي عصرني دحجت على تهاني مدري شگاعد اطلع من المجمدة
تفتر، براحة
تهاني... شراح تسوين تا اساعدج
... تشريب اللحم كملتوا وجاعد يفور
راح اسوي برياني ادري فيروزة تحبوا
واخابر نافع يجيب سمج مسگوف بطريقوا
... طبيت افتريت بالبيت بس الطابق الفوك ما وصلتوا رحت افتريت بالمشتمل حلو ومرتب
رجعت الغرفة نجوى بدلت
وطلعت للمطبخ
اشرف راد يروح البيت اجدادو
جدة ما قبلت حلفت لازم يتغدا
أم اشرف تصير خالة نجوى
اخت المرحومة أقبال واهلها هين بسامراء
فات عامر ابن خالة احلام سلم علية وراح گعد ويا اشرف
اصيل...جت امي تمسح دموعها بطارف الملفع
هاا يمة خير شبيج
... يولي اشرف حجالي عن حال حسنة يكول ماتگدر تمشي عمت عيني عليها المرض جاعد ياكل بيها
ومن اخابرها ماتكلي مابية شي
... ادري فيروز جانت تحجيلي
... عجل عليش ما گولتيلي
... ماردت أخوفج ادري بيج من تنقهرين يرتفع ضغطج
... يمة تهاني روحي ارتاحي
... هساع بس اكمل البيدي واصعد لان ريحة الدجاج ثبرتني
فيروز... رفعت حاجبي هاي جدة بعدها على سوالفها القديمة فلا تتغير
تهاني غسلت وصعدت
اكول ماما عليش ما خليتها تساعدج وظليتي ساكتة
... البنية مامقصرة وهالآيام النساوة متعبتها الله يعينها
... هاا خوش وكفت اساعد ماما بالأكدر علية
لان بالطبخ صفر
ما اعرف شي غير السلك والتگلا وهم نوبات احرگهن
حسن... هاي شنو فيروزة هين
.. ههههه اخذتوا الحضني ول كبران وطولان
... اي صرت زلمة وبعد جم يوم اخطب
اصيل. فان حظك محد مطلع عينك غير امي يالزلمة امشي بدل وسلم على الخطار
... ظلي سكتيني الحمدلله يمة موجودة ما احتاجلكم
فيروز. كفختوا يول شو صاير لسان
... عوفي يحجي من يجون نافع وشاهر اخلي سوالفوا بيدهم
.... گاعد اشاقى وياج عليش بسرعة تصدگين يلا رايح ابدل
... جت رغد كيفت من شافتني
ووكفت تسولفلي نقلتلي اخبار، العشيرة بخمس دقايق
اخير شي ماما تعصبت وزگحت بيها هههههه
ماظل شي الجيت نجوى
ماما رايحة انجضع بفراش نجوى واذا جت لاتكوليلها اني هين كولي هاي رنا
.. شناوية تسوي
.. ماسوي شي بس افاجئها
.... ولو ادري سوالفج مو قانونية بس يلا ميخالف
... طبيت للغرفة وانجضعت بالفراش وتغطيت
نجوى..... هلوووو اني جيت ريحة البرياني شميتها من الباب يلا جوعانة شوكت تصبين
... فان حظج خطار هين نصي حسج
... هااا منو اي صح اكو سيارة بالباب
.... صديق عامر يلا امشي بدلي تا تساعديني
.... ماشي
. رنا نايمة بغرفتج لاطرجعين يم راسها
... شعجب هين ونايمة
.. جت. ساعدتني ومن كملت خشت ترتاح ( من وره ام الفواين جذبت)
.... خشيت للغرفة امشي على كيف طلعت ملابس وكفت ابدل نزعت بس ظل القميص جاعد افتح الدكم
.... مسويتلي فتحة زغيرة وادحج عليها گاعد تبدل ظالة بطرگ القميص كشفت رأسي وصحت بصوت عالي ببببببببخ
... ملتهية افتح الدكم ما احس غير البطانية اندفرت واحد صرخ من الخوف
اني هم صرخت فتحت باب الغرفة وطلعت اركض
... ههههههههه طلعت وراها لزمتها يولي وين مولية بدون هدوم ههههههههه
اشو هاي صفنت بوجهي گضبتها من ايدها فوتتها للغرفة وحضنتها
..... يولي هاي انتي فيروووووزة عااااا انتي هين مگاعد احلم
.... هين وجدامج يبعد روح فيروز
... حضنتها وابجي من كثر شوگي الها يولي والله بلياج اليوم يعادل الف يوم
.... ياروحي ولج اني التايهة بدونج
سمعت حس بابا گلبي نط من مكانوا
رايحة اسلم على بابا وانتي بدلي
... ماشي
.. طلعت اركض لكيتوا بالمطبخ ويا ماما وحسن شايل علاليگ ويفوتهن من برا
من شافني ضحك وفتحلي تك ايد والأيد الثانية گاضب العكازة
خشيت بحضنوا
نافع... شلونج ياروح نافع
.... هساع صرت زينة بشوفتكم
اصيل.... جبتولوا كرسي تا يگعد خليتهم يسولفون وانداريت اكمل الأكل
.... گوم تا تغسل وترتاح
... ماشي
نجوى... ماما هاي ليش تضحكين علية تكولين رنا نايمة
.... هههههه غير سوالفها هي الگالت گولي رنا
سمعت حسج صرختي خما خوفتج
فيروز...لا شخوف منها بس هي تدلع طلعت تركض بدون ملابس
... انگص راسج يولي خما احد لجحج
.. لا محد اكو بسرعة رجعت للغرفة
.... قربت جيت شاهر اهجس گلبي صار يدك طبول من التوتر ما كدر اظل بالمطبخ رجعت للغرفة ونجوى ظلت تساعد ماما
من سمعت حسو جة عيوني متلن دموع شلون راح اكدر اشوفوا واتصرف عادي جداموا والله صعبة
.... مممم عليش خاتلة هين بعدج ماتريدين تشوفين بابا
.... هااا لا عليش ما اريد اشوفوا يظل خالي وغالي علية الصار ساعة طيش وراحت الحالها
... المصيبة ما اكدر اصدگج حتى لو گاعد تجذبين على روحج ماتكدرين تجذبين علية من عيونج أعرف البداخلج
..... ابتسمت ما ادري شگول
هساع هو وينو هم سلم على اشرف
... لا بعدوا گال اغير هدومي واغسل وافوت اسلم
.... مممممم ماشي يلا امشي نطلع نساعد ماما خما انظل هين
... يلا
... طلعنا من الغرفة الدرج صار گبالي نزلوا شاهر وتهاني سوة
اشكد اكول نسيت وبعد معلية بي اشكد اجذب على گلبي واقنعوا شاهر انتهى بس من شفتهم سوة گلبي انعصر غمضت عيني أريد اتمالك نفسي
تبسمرت بمكاني ما أكدر اتحرك صارلي أشهر ماشايفتوا وهساع من شفتوا هو وياها
... گضبت ايدها وهمست هاا يولي عليش وگفتي تريدين نرجع للغرفة
... تنفست قوي لا تعاي خلي اسلم علية
دحجتوا عينوا علينا حدر من الدرج وكف مكتف ايدوا ليورا عينوا بيها نظرة مدري شوگ مدري عتب مدري زعل
خليت عيني بعينوا
شلونك خالي
.... نحمدو على كل حال انتي شلونج شعجب ذكرتينا اليوم
.... جدة راحت واني اشتاكيت الأهلي جيت اشوفهم
... بس اهلج
... الكل بهذا البيت أهلي اختي وجدتي وخالي اخو امي
مدري منين طلع هالكلام وشلون حجيتوا
... هلا بيج بنيتي
... عافني ومشى للاستقبال
تهاني گبلنا فاتت للمطبخ
ما كدرت اروحهم يمهم رجعت للغرفة
.... يولي شبلاج عليش بجيتي
... حضنتها وشهكت نجوى كوليلي عليش مگاعد انساه انطيني حل مو تعبت
... ظلي تعاملي ويا مثل گبل كل شوية ورددي بينج وبين نفسج هذا خالج واكيد راح تنسين
بابا فتح باب الغرفة فات وطبگوا قوي جفلنا مدري شبي متعصب
... بسرعة صديت للجهة الاخرى ما اريدوا يحس بية گاعد ابجي
شاهر.... نجوى امششي ساعدي آمج
.... هااا اي رايحة
... بسرعة مسحت دموعي ردت اطلع ويا نجوى گضبني من ايدي وسد الباب
نفضتها منو
شششششبيك وخر اريد اطلع
... اليوم انعل ساس اهلج ظالة على حل شششعرج اطبين وتطلعين بكيفج ويا ولد خوالج
... خفت من عصبيتوا يحجي من بين اسنونوا بالگوة لأزم روحوا تا مايعيط
لزكت بالحياط
هااا شگاعد تحجي وين طابة طالعة
....بنت القندرة شلون تخلين ولد شاب يجيبج من الرمادي الهين وحدكم واني من سمعت عبالي احد وياكم مو بس هووووو
... رغم الخوف تعصبت منو واذا جيت ويا قابل انگلبت الدنيا اشرف مو غريب ابن خالي خلف الله علية ترك شغلوا وجابني.
.... موووو غريب موووو وعندج لسان تحجين وتجاوبين الظاهر صايرة دهن ودبس ويا واحنا يا غافلين الكم الله
... ششعليك بية امي وابوي راضين انت شكو تحاسبني
رفع ايدوا تا يضربني بسرعة خليت ايدي على راسي وخدي من شاف منظري نزلها
گضب زندي عصروا هجست جتفي راح ينخلع
... مو ابن ابوي اذا ما اعيد تربيتج من جديد الظاهر من صدك دلالي هو الفين حظج وخلاج تستهترين
... الغصة حرگت بلاعيمي
ما اكدر اسكت هي خربانة شيريد خلي يسووي
اني اكول من يجي ابنك لو بنتك ركز بتربيتهم ومعليك بية وخصوصا اذا جتك بنية ربيها عدل حتى لاتطلع مستهترة مثلي
فتح عينوا والحمدلله
الله نقذني بهالحزة انفتحت الباب وفاتت تهاني رفعت الحواجب مستغربة اني لازگة يم الحايط وهو گبالي وگاضبني
... شسوي هين واني جاعدة ادورلك سالت نجوى گالت بغرفتي
.... جاهل ودوريليييييييييييي فارجيني لا ابتلي بيج وانعل ساس اهل اليحجي كلمة
.... متت من الخوف تهاني زعلت وطلعت واني مدري شلون فكيت زندي من قبضتوا وطلعت وراها اركض
زكح وراية حسسسسابي بعدوا ما خلص وياج اني اعلمج
نجوى... يولي شبيج تركضين ووجهج غادي طماطة
... ناوشيني ماي الرجفة بعدها بجسمي
جابتلي مي شربت
... يلا احجي سمعت صوت بابا يزكح وتهاني مدري شبيها ضايجة
... اي زكح بيها
مدري شبلاه متخبل راد يضربني
.. عااا كولي والله
.. اي والله لان جيت ويا اشرف وحدنا
وتحلف بية مدري شيريد يسوي
... لا تخافين منا لشوي تروح العصبية وينسى
... وشسويلوا والله حلوة هو شعلي بية
اصيل... احسن ما واكفات بدون فايدة نگلن مواعين الأكل للربعة
.... مدينا السفرة وجبنا الأكل
الزلم گعدوا بالأستقبال واحنا بالربعة
تهاني لهساع ضايجة مارادت تتغدى جدة بالگوة خلتها تگعد
عينها علية وتخزرني هو هذا هم حظي
ماما تجيب وتخلي أكل جدامي انبشمت هههه
ورة الغدا راح أشرف
اجني خالاتي احلام وابتسام وبنواتهن
مشتاگتلهن جثير ظليت گاعدة بنصهن وأسولف
أحلام... والحرام البيت هساع رجع حسو بجيتج
... هههه يبعد عمري خالتي الحلوة
هم زين حسيتوا بقيمتي
ابتسام... يولي حتى امي اطب وتطلع اتكول البيت فارغ بلاية المصگوعة
... اي ادري بيها اشتاگت الكوناتي وياها
نعيمة... يولي هاي ياكونات اليسمع يگول يومية گاضبتني من شعري وتفرين بية البيت
... هااا شو گلبتي علية قبل حزة جنتي يامحلاج
... من هذا لسانج اليرادلوا گص
ابتسام... اگولكم تهاني شبيها من جينا بالگوة سلمت علينا وصعدت فوك
احلام.. اي صدك شو مو على بعضها
اصيل... والله مدري يمكن متكاونة ويا شاهر
عالية... هي الحامل بالشهور الأولى تصير اعصاب وتتحسس خالي خلي يطول خلك وياها لايزكح بيها
فيروز... دغيت نجوى هو اني الترزلت وراد يضربني هي شكو تزعل
... ماسمعتي يمكن الحامل تصير عصبية
رنا.. شگاعدات تتهامسن
فيروز... گاعد انگص بحرمة خالي تريدين تشاركينا
.
عالية. صگع يولي عوفي الحرمة بحالها
... قابل شحجيت محامياتها جثيرات
رنا.. الشاهد لله تهاني فقيرة وحبابة
... خوش سكتت
بهذا اليوم ظليت ويا اهلي والبنوات ما فارگتهن
قبل العشا جة قادر
قادر. ول يابة زعيمة العصابة هين واني اكول عليش البيت مظلم
ضرب على كصتوا قصدي منور خربطت بالكلمات
. عابت حتى سلامك مدري شلونوا
.... ههههه شلونج يولي هنا جم شهر ظليتي اهناك شو كبرانة وطولانة
شيوگلونج بالرمادي
... ههههههه تريد الصدك صح خالي وحرمتوا ماينجرعون بس الحق ينگال اهم شي بطونهم يحيرون شيسوون واني المستفادة
... عجل يراد اجي اظل اسبوع يمهم
نعيمة. اي مو هين مانطبخ موتينك جوع
.... يعني شلون مايصير واحد يشاقى نعومة ترى اني ابن بنتج مو ضرتج يواش يواش وياي
.... بالحرام الحرم ولاتعرف تحجي
فان حظك وحظ التحجي وياك
.. ظليت اتشاقى ويا قادر ومتونسة بالسوالف
جة شاهر گعد الوجه لساعوا مگلوب نزلت تهاني جت گعدت بسدوا
اووووف مصارلي ساعات هين واهجس روحي تملخت عجل لو ظالة شجان صابني
قادر... فيروزة
.. هاا
... وجعا تجين نفتر واعزمج على لفة فلافل متروسة عنبة
... عاااا انت منو مگاعد اعرفك يول خما مصخن
.... ولي موشكول عزيمة
... لا الله عليك اتشاقى اصلا صارلي جثير مطالعة بس بالبيت ويا جدة اكف اروح. أكول البابا
شاهر. وين مولين بهاليل ششنو ماكو زقنبوت هين.
قادر.... عاجبنة نزقنب برا انت عليش ضايج قابل دافع شي من جيبك
نجوى ورنا كومن ويانة
... اشو تريد تاخذهن وتطلع بدون اذن اني طرطور هين
... فيروز راحت الابوها
ورنا اختي ظلت نجوى تجي ويانة وفنك تعترض.
نجوى.. بابا سكت بسرعة بدلنا وطلعنا
رنا گعدت جدام واني فيروزة ورة
اخذنا فترينا نزل جاب لفات گص وببسي وراها جاب موطة وعلاكة حلويات
فيروز... ول قادر منين نازل عليك هالكرم
... سويتها وتندمت اكلن وانتوا ساكتات
..... ابتسمت قادر يوم بعد يوم يكبر بعيني واحسة اخوية الجبير
ادري بي سوة هيج حتى لا اظل گاعدة جدام شاهر وتهاني يمكن عيوني مفضوحة وقرأ الحزن البيهن
تونسنا ورجعنا للبيت
ثاني يوم حدرنا للسوك اني ونجوى وماما وخالة ابتسام جثير شغلات اشتريت من رجعنا
المغرب دك علية اشرف
.. شلونج فيروزة
... هلو الحمدلله
.. باجر راجع للرمادي لان جدة هم راح ترجع
... عجل باجر شوكت تمر علية
.. هو خابرت علمود هالموضوع ابوج گبل شوي خابر كال انت توكل ارجع الله وياك فيروز ماتجي
... شششنو عليش بابا هيج گالك هو يدري اني جاية يومين اظل وارجع
... ما ادري روحي افتهمي منو السالفة يمكن بعد ما يقبل تبقين يم جدة
.... هااا ماشي هساع اروح افهم السالفة
سديتوا واني اغلي هاي سوالف شاهر ماكو غيروا هو الخلى بابا يخابر اشرف
طلعت يم ماما
حجيتلها تفاجات مثلي الظاهر هي هم ماعدها علم بالسالفة
.. من يجي نافع احجي ويا وافهم منو
.. خوش. عود انطيني جواب
.. ماشي
اصيل... باليل من طبينا للغرفة گعدت جدام نافع وسألتوا
انت صدك بعد ماتقبل فيروز تظل يم جدتها
... اي صح خابرت اشرف وبلغتة يروح لاينتظرها
.. عليش سويت هيج مو تدري هي جاية تظل يومين وترد
..كافي صارلها اشهر اهناك
خالة حسنة بناتها يهتمن بيها هنا اقرب وكلهن عدهن بنات وولدها هم عدهم
... محد بحالها كلمن لاهي بروحوا نافع خليها ترجع يمها بين مايجي ايهاب خالة وضعها مازين وماتكدر تمشي
اكثر وكت محتاجة بي فيروز هو هساع لان تعودت عليها
.... اصيل ليش مجاي تفهمين علية فيروز مو صغيرة شلون أأمن أخليها وحدها اهناك وهي بهذا العمر اصلا قبل مدري شلون قبلت تبقى
بنتنا كبرت وبهذا السن تحتاج متابعة مو مال نهملها
دشوفيها صايرة بطولج اليشوفها يگول بنت ١٨ مو ١٥ سنة
والعلمج شاهر هم ميقبل بعد تروح اصلآ هو نبهني
... وياك بكل كلمة جاعد تحجيها بس الكاسر خاطري خالة حسنة تبهذلت بهذا عمرها
... لاتخافين ولدها وبناتها من يشوفون ماكو احد يمها غصب عنهم يداروها
... ماشي براحتك الصبح ان شاء الله ابلغ قرارك الفيروز
. ظلت انتظر ماما ما جتي تالي اخذتني النومة
اول ما گعدت الصبح جيت عليها
هااا ماما بشري حجيتي ويا بابا
.... اي وقافل يگول بعد ماكو روحة
.. لا عفية لاتكوليها شلون اترك جدة وهي هساع محتاجتني اكثر من گبل.
.. والله شسوي حجيت ويا جثير بدون فايدة وحتى لو هو قبل شاهر مايقبل
وتدرين ابوج موكل امرج الشاهر وكلمتوا تمشي عليج گبل كلمة ابوج
... غمضت عيني بعصبية والله جنت ادري هاي سوالف شاهر
نعيمة...معليج اني احجي وياهم شبيهم تخبلوا حسنة تعبانة شلون تتركيها
... اي الله عليج جدة احجي وياهم
ظليت گاعدة على اعصابي
من جوي جدة حجت وماكو فايدة
توسلت بابا وبجيت وهم ماقبل
نجوى... احجي ويا بابا بلكي يوافق وهو يقنع ابوج
... هو ساس البلة شحجي ويا
... جربي ما خسرانة شي
. ماشي من يجي احجي ولو تهاني من تشوفني تلزك بي مدري شبيها
باليل اهلي وجدة ناموا تهاني صعدت الغرفتها
ظليت گاعدة انتظروا من جةوكفت جدموا
اكف اريد احجي وياك
... اذا حجي ماصخ ومابي فايدة نصيحة روحي نامي ولا تعبين نفسج
.... اكف وين رايح
... ادري شتريدين تكولين روحة للرمادي ماكو انسي
... عليش هالكثر تغيرت علية وصاير تكرهني
خالي الله عليك خلي اروح الخاطر جدة والله تعبانة ومحد بحالها
.. هساع صرت خالج هه
...يعني راح تظل دوم تذكرني
ترى هذاك الكلام حجيتوا بساعة طيش جنت غيرانة خفت تتزوج وتتغير علينا وتخربطت مشاعري
اني ويني وين الحب
...والله تغرفين تسولفين وتغيرين بالكلام
ماشي بنيتي واني مصدگج
ولان اني خالج وبحسبة ابوج راح اكلج انسي روحة ماكو
... كاعد يستفزني غديت نار
مشى يريد يصعد صحت وراه
يكون بعلمك بهاي نصرفاتك من صدك گاعد تخليني اضوج منك واحقد عليك
الگلب محمل من افعالك ويجي يوم اردهن الك
واكف يدحج وهو مبتسم استفزني بالزايد
... اذا خلصتي بنيتي روحي تغطي زين ونامي تصبحين على خير
... خشيت للغرفة شبعت بجي ونجوى تصبر بية
اني شورطني وجيت لو ظالة هناك احسن
الصبح خابرت جدة حسنة ابجي شكيتلها من تصرفات شاهر
كالت معليج اني احجي ويا لاتبجين
الظهر من رجع ضايج ومايتحاجى ماقبل يتغدا صعد نام
جدة حسنة خابرت على بابا عاتبتوا خلتوا يسكت مايعرف شيحجي
ورة العشا بابا كال الشاهر.
.. اليوم خالة حسنة حجت وياي وعاتبتني والله استحيت ما عرفت شجاوبها
اتكول فيروز بنت الغالية ومحد يخاف عليها بكدي
شاهر... اني هم حجت وياي نفس الحجي
... خليها تروح
...ماشي لوما انطيت كلمة الخالة بالحرام الباب الحوش ما اخليها تصل
من يجي ايهاب ثاني يوم ترجعين فتهمتي
ومممنوع الاختلاط بولد خوالج
... فرحت وافقت على كل كلاموا حتى لايتراجع
... باجر اني اوديج تهيري
... غابت ضحكتي لا هذا جثير على گلبي اروح وحدي ويا ما اكدر اتحمل
تهاني. . وانت شكو ماخذها خلي جديتها ادز احد يأخذها مو عندك شغل
نجوى.. ادحج على فيروز وتهاني اثنينهن ضاجن
بابا خزر تهاني من الخوف سكتت
طبينا للغرفة
اوووف هم راح تعوفيني
. اتحملي هو بس يجي خالي ارجع
اكولج ما اريد اروح ويا ابوج شسوي فهميني وما اكدر اعتراض خاف يمنعني من الروحة
وجدامج مرتوا هم ضاجت
.... شسوين تحملي بين ماتصلين اهناك
... رايحة الم غراضي
... راحت فيروز
سمعت صوت عالي طلعت
امن الغرفة صوت تهاني تبجي
نعيمة... يولي نجوى شگاعد يصير فوك بس لا الجاهل بي شي
. والله مدري
نزلت تهاني تبجي ختلت ورة جدة
... خالة شاهر يريد يضربني
... نزل بابا متعصب جدة وكفت بالنص
... سايمة عليك الله ورسولوا لاتضربها يول حبلة لايصير بيها
... عجل خلي تگضب لسسسسسانها لا اهد البيت فوك راسها مو التالي عمري تحاسسسسبني حرمة اطلع اطب بكيفي واذا ما عاجبها بيت اهلها موجود
... اهدي وليدي واصعد الغرفتك هساع اني احجي وياها واعقلها
... صعد بابا كعدنا بالربعة تهاني مفرفحة من البجي جبتلها ماي انطيتها
نعيمة.. هساع فهميني شصاير
... گلب الدنيا لان گوتلوا لاتروح للرمادي اذا رحت اروح الأهلي وبعد ماتشوفني
...فان حظج يا مگصوفة الرگبة جاعد تهددينوا وتكولين ماسويت شي
يولي اني جم نوبة حجيت وياج وفهمتج
شاهر يتخبل من الحرمة التغار گلبوا ملجوم من هالسالفة بسبب المرحومة اقبال
واذا راح للرمادي شكو بيها ترى شاهر ماعندوا سوالف مكسرة خلي عقلج براسج وبطلي خبال
تعالي نامي بغرفتي لاتصعدين فوك ادري بي من يتعصب بعد محد يگدر يحاجي
نجوى.. . راحت اقبال نامت بغرفة جدة
جت فيروز ماحجبتلها شي حتى لاتضوج
.. الصبح ودعت اهلي وصعدت بالسيارة
شايلة هم شكبروا شراح يخلص الطريق
شلون راح اتحمل قربوا هالكثر مني وعطروا الترس خشمي
صديت على الشباك ادحج على الطريق الهي روحي المتعذبة
هساع اني مراهقة والله غاضب علية هو شنو عذروا عليش مايرضى يعوفني بحالي
طلعنا من سامراء والحد هساع محد بينا حجة
شاهر فتح الجام وظل يدخن جكارة ورة الاخرى ماتكع من ايدوا
ماتحملت زگحت بي
ترى جمدتني من البرد شنو يتورط على عمروا اليصعد وياك
... هه أستغفر الله
صار وهاي الشباك سديتوا وراح اشعلج تدفئ بعد اكو اوامر ثانية
.. سكتت ما رديت خليت راسي على الشباك وغمضت لوبيدي انام تا ما احس بهذا الوجع البداخلي
سمعت طكطكة فتحت عيني دحجت علية يدور، بالاقراص شغل المسجل وظل يگلب بالاغاني
رجعت غمضت
خلى على اغنية ياس خضر
حن وانا احن
اهجس گلبي دكاتوا زادت وظل يرجف
المطرب يجر، بالكلام.
وبصوت عذب يگولها
حن .... وآنه حن
مرخوص بس كت الدمع شرط الدمع حد الجفن
عصرت عيني قوي واني مغمضة تا امنع الدمعة ما أريدها تنزل
الگاعد يصير بية حتى الله مايرضى لوبيدي افتح باب السيارة وازت روحي وهي تمشي.
رجعت اسمع
جفنك جنح فراشة غض وحجارة جفني وما غمض
يالتمشي بيه ويه النبض روحي على روحك تنسحن
حن وانا احن
لا عاد الهين وما كدرت اتحمل صديت على الجام ونزلن دموعي.
منو التغمض عينو ومرتاح
مو تزوجت وجدامي اشوفك وياها
بلاعيمي نجرحن من الغصة
اسمعوا يتحسر مدري شبلاه
ماتحملت اكمل الاغنية ومتاكدة حس بية گاعد ابجي
مديت ايدي وطفيتها
... عليش طفيتها حلوة اسمعيها
.. ما اريد اسمع لاتشغلها
.. شبي صوتج صدي علية يابة
.. كوتلك ما اريد
سكتنا شوية شو رجع هو يدندن بكلمات الأغنية حافظها كلها
عيونك زرازير البراري بكل مرحها
بكل نشاط جناحها بعالي السحر
والروح مني عوسج اخضر
ما وصل ليه الندى ولا جاسها بگطرة مطر
وصفولي عنك بالنبع تفيض
وتعنيت ليله ويه الگمر
وصفولي عنك كل مسامة تفيض ياقداح
من عندك عطر
جفنك جنح فراشة اغض وحجارة جفني وماغمض
يالتمشي بيه ويالنبض
روحي على روحك تنسحن
حن عيني حن
عضيت طارف الشال تا مايسمع شهكتي وصوت البجي
جر حسرة طويلة وگال عليش جاعد تبجين
.... جاوبت بصوت مخنوك مگاعد ابجي نعست وتعبت
... محد يعرفج بكدي ربيتج على ايدي اليوجعج يوجع گلبي اااخ يافيروز شلعبتي بحالج وبحالي
... اكرهك شاهر وحاقدة عليك بكبر اللوعة البگلبي
... ياريت لو تگدرين تكرهيني بلجي ترتاحين
.. تتمنى اكرهك؟!
... اذا من تكرهيني ترتاحين راضي لان مايهمني شي بالدنيا غير راحتج
... عجل ابشرك اني من صدك بديت اكرهك
سكتنا وبالف قل هو الله أحد خلص الطريق
وصلت البيت جدة من شفتها زتيت روحي بحضنها ابجي
هي ونجوى الوحيدات يفهمني ويحسن بالگاعد يصير بية
حسنة. اسم الله عليج بنتي شصاير بحالج لو ادري فلا اروح واعوفج
ابجي الحد ماترتاحين
ظليت بحضنها من فات شاهر يسلم عليها وخرت وطلعت من الغرفة
طل گاعد يمها شوية وراح
رجعت النفس حياتي بس الفرق هالنوبة الوجع البگلبي زاد
أشرف... ول يابة ظنيت معد يخلوج تجين
البيت فرغ بدونج
... هم زين جدة حجت وياهم وقبلوا
... الحمدلله بعد لاتروحين تا مايجلبون بيج
.... من يرجع خالي غصب عني لازم اروح
... انا خوك ابد مو خوش سالفة
...جدة تنتظرك فوت
.. رايح
... شوية وصاحوني
حسنة.. تعاي فيروزة عندي سالفة وياج
... استغربت هااا اي احجي شنو هي
... اريدج تاخذين...........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!