وشاء الحب_
( بقلم بسمة البياتي)
_البارت الخامس عشر _
حسنة.. تعاي فيروزة عندي سالفة وياج
... استغربت هااا اي احجي شنو هي
... اريدج تاخذين هاي الفلوس
... شنو يا فلوس شسوي بيهن
... يولي لا تسولفين جثير وتعلين گلبي اخذيهن وانتي ساكتة
.... هساع غير تفهميني هاي فلوس شنو
... حگ امج الأكلوا خوالج وخالاتج فلوس گاع جدج
.... يا گاع اشو أول مرة اسمع بالسالفة
اشرف... اني راح احجيلج
جدي عندوا گاع من مات تقسم الورث بس محد ذكرج
.... اذا محد ذكرني عجل هاي الفلوس منين
.... حصة جدة طلعلها ١٥ مليون العشرة ضمتهن يمي تا تنطيهن الج والخمسة ظلت للدكاترة والعلاج
.... لا ما اريد ما اخذ ولا فلس جدة ترى اني مجاية اداريج الخاطر الفلوس
... اششش لاتكملين يولي هذا حگ امج فوك ما اكلوا حصتها تريدين ياخذوهن
ادري بيهم من اموت حتى حصتها وحصتي بهذا البيت هم ماراح ينطوجياهن
... عادي ما اريد شي الحمدلله ماناقصني شي والفلوس اخر همي
... هساع هاي شلون افهمها علعلت گلبي
اشرف.. فيروز اخذيهن ولاتعاندين ريحي گلب جدة
.. عليش ماتفهموني والله مگاعد اكدر
خلت بيدي وكالت اذا تحبيني لاتردين ايدي ذمة برگبتج تاخذيهن
ما كدرت ارجعن بست ايدها وراسها الله لايحرمني منج
حسج بالدنيا يساوي كنوزها
... يبعد عمري وعافيتي غديت فدوة الطولج
... اسم الله عليج اني الأفديج بعمري
... احم عجل اني اشو محد يفديني
... هااا يول بس لا غرت منها
... لا عمي شغار يمة سكتي حفيدتج تخوف هساع. تگلب الوجه
... ظلوا يشاقون واني بالي مو يمهم حرت شسوي بهالفلوس وشراح أكول البابا وماما
طلعت اتصلت على ماما وحجيتلها كالت هساع احجي ويا نافع واشوف شيكول
بابا من سمع اتصل على جدة ماقبل اخذهن
وهي ظلت تحجي علية وسكتتة
گالت هذن الفيروز مو من حگك تعترض
.
باليل جدة كالت سدي الباب وتعالي
جيت كعدت فتحت المخدة طلعت منها قماش مدري شنو بيهن
فتحتها وطلعت ذهبها
.... هاج
... جدة دخيل الله شنو سالفتج اليوم الصبح فلوس وهساع ذهب
... يولي هساع قابل شمنطيتج
شنو ماتريدين شي يبقى ذكرى من جدتج
... خليت ايدي على وجهي وبجيت صايرة بسرعة ابجي
عليش تحجين هيج وتخوفيني
... هههههه يبعد عمري لاتبجين الأعمار بيد الله ومحد يعرف شوكت يوموا
اخذيهن تزيني بيهن الذهب يلوك للذهب
اني كبرت خما اخذ زماني وزمن غيري
هذن اشتريتهن الج دحجيهن شبابيات كلما يصير عندي جم فلس جنت اروح اشتريهن ألج
.... غصيت بالبجي اشكد حنينة علية
والله وجودج جدامي يكفيني
... الله يحبني جابج يمي تا اشبع شوف منج
هساع امسحي دموعج واخذيهن ادري مو جثيرات ولو عندي اجيب وزتج ذهب
... مسحت دموعي بس بقت الشهكة بصدري
سحبت ايدي لبستني ملاوي اثنين حيل اثگال
وگلادة اية الكرسي جبيرة وتراجي ومحبس بي حجر جبير
.... هذا المحبس عقيق يماني اصلي جدج هداليا
... اذا هدية شلون تريدين اخذة
... ماكو فرف بينا ادري بيج راح تحافظين علية
.. طلعت حجل يخبل صاير مثل الطوق وبالحافة زنجيل زغير نازل منو جرس زغير ونجمة اول مرة اشوف هيج موديل
حتى الملاوي والگلادة يخبلن ومبينات مو قديمات
.... بالعافية عليج بعد جدتج انتي البينتي جمالهن وزدتيهن حلاه
... حضنتها الله لايحرمني منج يا أحن جدة بالدنيا
ما كدرت ابقى لابستهن ادري اذا حرمة خالي وبنواتها شافوهن يسولي سالفة نزعتهن وشلتهن بغراضي
نجوى.... رجعت من المدرسة ماما وحدها بالمطبخ رحت بدلت وجيت اساعدها
سالتها عجل تهاني وين
. نايمة اليوم وضعها مو تمام من كعدت مريضة وعدها وجع ابطنها.
خطية عجل ليش ماتخلي بابا ياخذها للمستشفى
.. حجزت يم الدكتورة العصر تروح ويا اختها
... اي احسن
صبينا الغدا وقبل لا اكعد اخذت صينية أكل التهاني جانت نايمة ومن شكلها تعبانة.
تغدينا وكملنا جاعد اشيل المواعين حدرت تهاني تبجي وگاضبة بطنها
ماما وبابا وجدة راحوا يمها يريدومن يفهمون شبيها
كالت جاعد انزف
ماما وبابا بسرعة اخذوها للمستشفى
اصيل... اخذنا تهاني للمستشفى من فحصتها الدكتورة للاسف مسقطة الجاهل
من رجعنا امي تخبلت تهاني. وشاهر ضايجين وحگهم
العصر جوي امها وخواتها اخذوها تا ترتاح يمهم
نجوى. من راح الجاهل ورجعت تهاني من اهلها عبالك مو هي مبدلينها
سمعتها تشكي الجدة اتكول الجاهل راح من الشغل والتعب البيت جبير ويرادلوا حيل
هذا ياتعب اني وماما ايدنا ويدها بكلشي
الطبخ والخبز كولو على ماما
واني من ارجع مواعين العشا علية
من غير الزايدة والناگصة
تهاني فقيرة بس عيبها شغلة وحدة تمشي بحجي امها وخواتها
بدت تتهرب من التنظفين وزاتة كلشي برگبة ماما
وخواتها كل يومين يمنا يزبلن البيت ويروحن
حتى حفاضات جهالهن الگيهن بالكاع
وهي تگعد وياهن واني اخدمهن وهذا كله بامر جدة نجوى جيبي فلان شي وودي فلان شي
واذا اكوللها عليش تصخريني
صخري تهاني هنا مو جايات عليها
اتكول عيب شلون تعوفهم
تهاني تعلمت على الدلال
بيوم عندي امتحان وجاعد اقرأ
خواتها هين
تهاني صاحتني گالت جيبي فواكه
كوتلها عندي امتحان ما اكدر كومي انتي
رجعت للغرفة
جت جدة متعصبة
... فان حظج مگصوفة العمر يولي شلون تفشلينها جدام امها وخواتها
اذا گالت الأبوج فلا ادخل يطبج عرج
.... اختنكت وصارت غصة بگلبي
كافي جدة اني مو خدامة عدهم ودي وجيبي اني وماما مكسور ظهرنا وهي مثل الخاتون گاعدة وتتأمر
... تهاني بحسبة امج مو عيب اذا خدمتبها
.... هااا عجل وماما هم مو عيب اذا تخدمها
.... كافي وجعتي راسي ما اخذ منج لا حگ ولا باطل
... تركتني وطلعت ظليت ابجي من القهر
باليل ورة العشا بابا صاحني
تهاني گاعدة بسدوا ورافعة الحواجب
.... تعالي كعدي وسولفيلي شصاير اليوم بينج وبين تهاني
تهاني.. هاي شبيك شاهر مو حجيتلك الصار
ما مجذبة عليك واذا مو مصدكني اسال خالة
... وال يرحم أبوج سكتي مثل ما سمعتج اسمعها
سولفي بنيتي ومعليج بيها
... والله بابا ماسويت شي الظهر مواعين الغدا كلهن غسلتهن ومن خلصت عندي امتحان كعدت اقرأ صاحتني اجيب الفواكه كوتلها انتي جيبيهن عندي قرأية
... خوش يلا بنيتي روحي نامي عندج دوام من الصبح
... طلعت من الربعة ما فتت الغرفتي وكفت اسمع شراح اتكولوا
.... صدك جذب شاهر يعني عاجبك تصرفها تفشلني جدام اهلي وانت ولاتحاسبها
.... ملاعيب النسوان وسوالف حرمة الأبو ماتمشي يمي
نجوى خط احمر بالحرام الي يغثها بكلمة اهجم البيت فوك راسو لا انتي ولا عشر جهال منج مايوصلون ربع معزتها بگلبي نجوى فقيرة وماعدها خباثة
وال تهاني جري عدل ولاتخليني اغير نظرتي عنج ادري بيج فقيرة رجعي مثل الأول احسن
... دموعي نزلن من كلاموا الحمدلله ماتغير علية
الله لايحرمني منو
بعدها بفترة حبلت تهاني مرة اخرى
وهالنوبة كلاص الماي ما عادت تشيلوا من الكاع
نايمة واحنا نخدمها.
حتى جدة الجانت ادفعلها بدت تضوج من تصرفاتها. وكل هذا لا هي ولا ماما مايقبلون يكولون البابا شي حتى لاتصير مشاكل
فيروز...الايام تمشي سمعت من نجوى تهاني حبلة مرة ثانية الموضوع ما عاد ياثر بية
ماما گالت ابوج راح يسافر يخلي طرف صناعي كيفت هاي احسن خطوة يسويها
اصيل.. شاهر طلع حاجز ومكمل كلشي بدون ماندري وسواها الو مفاجأة لان يدري لو كايل النافع ما جان قبل لان السفر والطرف يحتاجلوا مبلغ مو قليل
... همست ونعم منو دوم مفرح الكل
الله ينطي الصحة والعافية
.. امين يارب
امنة راح تجي ماتجين وياها.
.. لا وين احي، ما اكدر جدة حالها بالضيم
اكولج راح ادز الفلوس بيد خالة خلي بابا ياخذهم يصرفهم.
... انجعمي هاي فلوسج محد يصرف منهن فلس
... ماما واني شنو فرقي عنكم عجل مو عايشة من خيركم راح ادزهن لا تحجين شي
انطيت الفلوس الخالة
بعدين عرفت بابا ماقابل ياخذهن سافروا هو وشاهر
سوا رجلي صناعية ورجع
فرحت وتمنيت اشوفوا وهو واكف على طولوا
اصيل... من رجع نافع يمشي ومايحتاج عكازة الفرحة القرحتها الله اليعلم بيها
حتى هو رجعتلوا ضحكتوا وثقتوا بنفسوا
گبل جان يتحسس من كلشي
فيروز.. جاعدة افرك رجل جدة
حسنة... فيروزة ايهاب ماظل شي راح برجع حرمتوا جابت هي والطفل الحمدلله بخير
يولي اذا جة شلون راح اكدر افارجج
... اوووف جدة والله شايلة هم هذا اليوم بس شسوي لازم اروح هذا شرط بابا من يرجع خالي يجي ياخذني
.. زين اذا اكو حل حتى تظلين هين تكيفين لو لا
.. اكيد اكيف شنو هو
... اخطبج الاشرف
... عزززززا اشرف لا ما اريد
.... يولي شبلاج وشبي اشرف زلمة معدل عين الله علية وكل بنوات كرابتنا يتمننة وسارة وحدة منهن
... ادري مابي شي والف من تتمنى بس انتي تدرين البية زواج ما اريد اتزوج
... مابيج شي ومشاعرج الشاهر مو حب هذا تعلق ومن تزوجين تنسينوا
وافقي اريد تظلين جدامي اذا اخذج ناخذ بيت واعيش وياكم
..... اشرف يدري بهالكلام
.... هو الطلب احجي وياج يولي الولد واكع ومحد مسمي علية
... جدة لا تزعلين من كلامي اشرف يستاهل الاحسن مني اذا وافقت راح اظلموا واظلم نفسي ما اريد اصلح الغلط بغلط اكبر منو
... فكري عدل ما راح اخذ جواب هساع هو من البداية گال خلي تدخل بعمر ١٦ واروح اخطبها
... سكتت وداخلي رافض هالفكرة تمامآ
وضع جدة مازين صارت الماي بالگوة تشربوا لا علاج يفيد بيها ولا شي ظهري انكسر عليها خايفة أفقدها
خالاتي من ساءت حالتها كامن يومية وحدة تجي تبات يمها
اليوم من گعدت الصبح الوجه منور والضحكة ماتفارگها
صارلها ايام ماتخلي الأكل بحلكها عايشة على المغذي اليوم
طلبت تشريب وتريد تثرد بي
خالتي بسرعة راحت تسويلها من صبتوا الها گعدت تاكل بنهم ونفس مفتوحة
كيفنا يا الله بلكي وضعها تحسن
المغرب طلبت مني تصل على خواتها وبنواتها حجت وياهن وحدة وحدة گلبي خمشني
هجست جدة گاعد تودعهن
اخير شي طلبت تحجي كاميرا ويا خالي ايهاب
ظلت تسولف ويا وويا حرمتوا وشوفها ابنوا الزغير
خالي وعدها هاليومين ويرجع
خلصت المكالمة ظليت گاعدة بسدها بطرف الجرباية
صافنة بوجهي وگاضبة أيدي عاصرتها
... تدرين بية أشكثر راضية عليج
والله يرضى عليج من سابع سماه وينطيج على گد نيتج ويسعدج دنيا واخرة
... بعد عمري جدة اشكثر فرحني كلامج
ودعوتج
... گربي خلي احبج
... دنگت راسي وتقربت منها حضنتني وبوستني
گالت نعست راح انام
... اني وخالتي فرشنا بالگاع ونمنا
ظليت اتگلب طار، النوم من عيني شخير جدة ابد ما طبيعي يخوف
كمت تا اشوفها جسمها بارد والشفايف بيض انجنيت
عرفت متخربطة
عطت بصوت گعدت خالتي
ثواني والبيت كولو گعد
خالي وابن خالتي شالوها واخذوها للسيارة
خالتي راحت وياهم
جسمي يرجف مثل السعفة ورجلي ما عادت تشيلني
طبيت للغرفة گعدت بفراشي ابجي
رفعت راسي ودعيت ربي اتكوم بسلامة
روحي لايبة ومحد بحالي
ماعندي غير نجوى ادري الوگت متأخر وهساع نايمة بس موبيدي اذا ما احجي ويا احد اموت
دگيت عليها ظل يرن فتحت الخط وجاوبت بصوت نعسان
... الووو فيروزة
... بجيت ما كدرت ارد
... جفلت وكعدت ششبيج يولي عليش تبجين خما بيج شي احجي
.... لاتخافين مابية شي
بس جدة تخربطت واخذوها للمستشفى
... يولي كافي لاتبجين ان شاء الله مابيها شي وترجع بسلامة
... الله يسمع منج
نجوى ظلي احجي وياي اذا اظل وحدي القلق يموتني
... ياعمري بدون ماتكولين باقية وياج البين ماتطمنين على جدة
... ظليت احجي ويا والهي روحي
للفجر وما جة اي احد منهم
انفتحت الباب وطبت سارة تبجي
وتصيح لج فيروززززز بابا خابر يگول جدة ماتت
الكلمة عدتها بدماغي اكثر من نوبة ماتت ماتت جدة ماتت زتيت التلفون من ايدي وظليت اصرخ من كل گلبي
لا ياربي كلششششششششي ولا جدة ششششلون راح اتحمل فراكها
تعبت من البجي والصراخ جت حرمة خالي گضبتني وتبجي وياي اهجس انتهيت گلبي يريد يوكف
نجوى... سمعت سارة من كالت الفيروز جدة ماتت وصراخ فيروز ترس البيت
مدري شسوي فتحت باب الغرفة وصعدت اركض الغرفة بابا
تهاني يم اهلها ما دكيت الباب فتحتوا وطبيت اركض
دغيت بابا تا يگعد
فتح عينوا مستغرب من منظري بسرعة كعد يريد يشوف شبية
.... شبيج بنيتي عليش تبجين
... بابا جنت احجي ويا فيروز وسارة كالت جدة ماتت وفيروز تصرخ
... يولي منووووو مات احجي عدل شبيها فيروز
... جدة حسنة ماتت
بابا كام لحيلو
.. لا أله الا الله
يولي تحجين صدك منو گالح
... بلي بابا صدك وهساع فيروز وحدها وگاعد تبجي
... حدري جوة ولاتحجين شي الأمي مفهوم
... بابا لبس ونزل دك الباب على ماما وبابا نافع
اصيل... فتحت الباب شاهر جدامي شكلو مخنوك مبين بي شي انگصيت من النص حتى خفت اسألوا شبيك
... خيتي تهيري تا نطلع للرمادي وشوفي نافع يجي ويانة
... بروح ابوك لاتكول بنيتي بيها شي هساع اكع واموت
.. خالة حسنة انطتج عمرها وفيروز متخبلة خابري امنة خلي تروح يمها
...ردت اصرخ شاهر سد ثمي بجيت قوي
... يولي امي لاتسمع خلي من نوصل يلا تعرف خاف تكع علينا ومنا ورانا طريق
يلا تهيروا واني رايح ابلغ البقية
... راح شاهر خشيت للغرفة ابجي نافع يريد يكوم مايكدر كوتلوا خالة ماتت
.. انا لله وانا اليه راجعون
الله يرحمها ويصبركم خوش مرة وماشفت منها غير الخير
اصيل.. خابرت امنة كوتلها روحي يم فيروز
تهيرنا وامي تلوب اتكول ما اصدك بس متخربطة جاعد تجذبون علية حسنة بيها شي
ومن شافت خواتي وعمومتنا كلهم بهالفجرية التموا تايجون ويانة تربعت بالگاع وكعدت تلطم
خفنا عليها شاهر حلف اذا ماتگضب روحها مايأخذها
بطلت لطم بس الدموع تجري وحقها اختها الجبيرة الحنية الماكو مثل گلبها كل الناس تحبها
حتى الجيران من سمعوا قرروا يجون الفاتحتها لان الكل يعرفها من جان بيتهم هين
نجوى. . خلي اجي وياكم ما اريد اظل هين واترك فيروز وحدها
شاهر... عندج امتحانات ظلي يم اخوانج
هساع عالية والبنات وعامر يجون يظلون يمكم
اصيل... طلعنا للرمادي شاهر يسوق سريع يريد يصل قبل الدفنة امي حلفتهم مايغسلوها گبل لاتجي تريد هي تغسلها
فيروز... ظليت مگرفصة وگاعدة روحي تريد تطلع جت خالة امنة حضنتها ورجعت اصرخ الحد ما صوتي طمس وما عاد يطلع
امنة. بروح الغالية لاتصرخين لايصيبج شي الصراخ ياذيها ادعيلها
.... لاتكوووووولين بروحها جدة عايشششة هساع تجيييييييي
امنة... ميخالف ما اكول بس اهدي
... فيروز ظليت بحضن خالتي واشهك
البيت انگلب الگرايب والجيران كلهم جوي
خالاتي گلبن البيت بالصراخ
طولوا يلا جابوها للبيت تركت حضن خالة وخشيت من بين خالاتي نمت على صدرها وحضنتها
جدة كوووووووومي الله عليج فتحي عيونج ردي علية لاتركينييييييي تعودت على حضنج صرتي امي واختي وصديقتي ششششلون بعد ما اسمع حسج شلون بعد ما اصبح بهذا وجهج اليشع نور جدة حاجينيييي
اهز بيها وابجي النسوان بالگوة كوموني منها وطلعوني برا الربعة
صديت صارت ماما جدامي ظليت اكمز واعيط ماما جدة راحت وعافتني
.... اشكد جنت متوقعة فيروز راح تنهاز بس ماتوقعت بهالكثر حضنتني ومن الصراخ والتعب غدت جنازة لا ايد ولا رجل اخذناها للغرفة صحت وظلت تون
احتاريت ما ادري شسوي منا امي التخربطت ومنا فيروز
غسلوا خالة واخذوها دفنوها فيروز صوتها ماعاد يطلع لليل وهي بحضني والدموع مانشفن حتى الماي ماتقبل تشربوا
نافع راد يشوفها بس ما كدر يفوت البيت مليان نسوان
الثاني يوم وهي نفس الحال
فيروز بنيتي ابوج يريد يشوفج بيج حيل تطلعيلوا. للحوش ما يكدر يخش هين
... هزيت راسي بالقبول سندتني وطلعت وياها بالگوة امشي الدوخة جتلتني
شفت بابا واكف على طولوا وبدون عكازة جنت اتمنى اشوفوا بهذا منظروا بغير وكت تا افرح بشوفتوا حضنتوا وبجيت
ليش بابا تريدين تاذيني وتاذين امج ماتفكرين بينا اذا صارلج شي لا سامح الله شنسوي الخاطري بنتي اكلي حتى لاتتخربطين خالة لو موجودة مجان قبلت بهذا وضعج
.. غصيت بالبجي والله موبيدي راح يصيرلي بالسنة وياها مايوم فارگتها اصبح وامسي بوجها شلون راح اتحمل ما اشوفها
... كلنا على هالدرب محد يدوم الاحد اذا تحبينها وتريدها ترتاح اقريلها قرآن وادعيلها راح تفرح بيهن مو بالبجي والصراخ
... هزيت راسي بالموافقة طبيت جوة جابولي اكل بالگوة أكلت شوية
اصيل.. ايهاب من سمع تخبل رايح حاجز واليوم موعد جيتوا من وصل للباب نزل من السيارة وكعد باب الحوش يدك على راسو
يكول فوك السنة ماشتايفها
وتالي ماتت وظلت شوفتها حسرة بگلبي
بالكوة الزلم مفوتينوا جوة
خلصت الفاتحة وتهيرنا تا نرجع وفيروز ويانة
... لملمت غراضي تا ارجع السامراء
فتت للربعة تا اسلم على خالاتي
تفاجأت بخالتي الوسطانية
من وكفت وكالت
.. اكلج فيروز انتي صارلج جثير ويا امي الله يرحمها واكيد تعرفين كلشي عنها
عدها فلوس ماتندلين وين ضامتهن
... حرت شجاوب كوتلها يا فلوس قصدج
... ورثها من الگاع ١٥ مليون قابل خما صرفتهن وهي لا اطب ولاتطلع
... تعجبت من كلامها جدة مصارلها جم يوم من ماتت وهي واكفة ادور فلوس
حجيت بغضب اي وهساع انتي شرايدة
.... مو جاهل جدامج تا اسالج مثل الأوادم جاوبي.
... حرمة خالي هادي كالت اكيد يمها ماتشوفيها تعصبت
.... اي يمي جدة انطتنياهن يلا شوفوني شراح تسوون.
.... يمه منج هلكدوتج وبيج كل البله ظليتي يمها حتى تضحكين عليها وتاخذين فلوسها
اصيل... لا عاد الهين وگضبي لسانج صارلي ساعة ساكتة واكول اكصر الشر ما ادخل
بنتي مو حرامية ولا دارتها بطمع مثل غيرها
خالة حلفتها يمين تا تاخذهم واني ونافع بالگوة قبلنا
واذا عينكم عليهن بعدهن موجودات باجر نجيبهن ونزتهن بوجوهكم
... صارت عركة بين خالاتي وماما
وخالة احلام وابتسام وجدة صارن ويا ماما الصوت عالي سمعوا الزلم وجوي للربعة
خالي معن سال كال شصاير عليش حسكم عالي
خالتي جاوبت فيروز ما اخذة فلوس امي وتريد تقنعنا اتكول هي انطتهن الها
شاهر.. ينكص لسان اليكول غير هالكلام مو فيروز التمد ايدها على شي مو الها بنتنا بنت خير مو عينها فارغة مثل غيرها
نافع. اني من البداية ما قبلت والفلوس باجر ادزهن الله لايحوج احد عليكم
... خالاتي وخوالي هادي و بلال يريدون الفلوس عبالك ما اخذها ١٠٠ مليون مو عشرة
زكح بيهم خالي ايهاب كال من كل عقلكم تحجون امي گبرها بعدوا اخضر وگاعدين تتكاونون على فلوس
اشرف.... الفلوس جانن يمي وجدة جدامي توسلت بفيروز تا تاخذهن وخلت امانة برگبتها ما ترجعهن
جان استحيتوا من واكفين تحاسبون بنت اختكم على. جم فلس وانتوا بالأصل ماكلين حگها.
معن. يول شو ماتحترم لاتدخل معليك انت
لا اشو علية ونص ويكون بعلمكم من مات جدي وقسمتوا هذا البيت جدة تنازلتلي عن حصتها وطلبت مني من ينباع البيت انطي الفلوس نص الفيروز ونص الخالي ايهاب
. . صفنت انوب منين طلع بهاي السالفة خالاتي وخوالي نجنوا
لان الببت جبير وبسدو گاع تابعة للبيت
نافع. فلس منريد منكم وحتى العشرة مليون ارجعها الكم
اشرف... بروح جدة اذا رجعتهن جدام الكل احرگهن فلس احمر مايرجع هذا حگها ما بايكة من احد
... خالي ايهاب وخالي معن جوي باسوني وراضوا بابا
قبل لا نطلع وكفت ويا اشرف وصحت خالي ايهاب
اكولك اشرف سالفة البيت صدك لو منك انت حجيتها
... اكيد صدك قابل اجذب بهيج سالفة
... لا حشاك عجل اسمعني هاي الحصة اريدك تتنازل منها الخالي ايهاب
ايهاب... لا بنتي هذا حگج ومال يتيم شلون اقبلوا علية وعلى اهل بيتي
... اني برضاتي تا اتنازل ما اريد شي كافي الفلوس النطتنياهن جدة
اخذهن بالعافية عليك
حضني خالي وبجة
ادري بوضعوا المادي ما زين وجثير صرف على حمل مرتوا وخالي فقير متاكدة اذا يبيعون البيت يظل بالشارع
راح خالي
اشرف... هذا البيت بعد ماينطب بي بدونج وبدون جدة
الله يرحمها اشكرك على وكفتك وياي كفيت ووفيت ابن خالي ونعم منك
... شنو هالحجي ترى حجيت الحگ
ديربالج على نفسج ولاتكطعين بينا خلينا دوم نسمع اخبارج
... ان شاء الله انت هم تعال زورنا
شاهر. مووووووو نريد نوووووولي راح تظلين واكفة هييييييين
اشرف... شاهر شبي شو اهجسوا مو طايقني
... اكيد ضايج من المشكلة الصارت يلا مع سلامة
مشيت للسيارة شاهر واكف وعينوا اتزت شرار ماهتميت صعدت بسد ماما خليت راسي على جتفها وغمضت راح ارجع للضيم والقهر الله اليعلم شمنتظرني اهناك...
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!