_وشاء الحب_
( بقلم بسمة البياتي)
_البارت الرابع و العشرون _
صار حس صياح قوي برا وصوت مراكض
عفنا الغرفة وطلعنا نركض تا نشوف شكو گبل لا نصل للمطبخ
سمعنا حس طلقة عبالك بنص البيت وزاد المصايح
الخوف الخفنا بحزتها ماينوصف
دحجنا من باب المطبخ
الكل بالحوش ملمومين والولد مجتفين زلمة مايبين منو غير ظهروا
وبالجهة الأخرى شاهر يريد يهد
والشباب گاضبينوا
نجوى... يولي هذولة مو ولد خوالي شجابهم بهالحزة وشعدهم يتكاونون
عالية... اي هما وهذا الگاضبينوا اشرف
.... من سمعت اسم اشرف جيت أكع من طولي
دخت گضبت السنك ارتجيت علية
حسهم عالي ما نگدر نفهم شي
جة نزار فوت البنات للمطبخ وسد الباب وراح
اصيل... گاعدين نتعلل جة حسن يركض گال اشرف برا ويصيح وين شاهر خلي يطلع
شاهر حفز من مكانوا وطلع بسرعة والولد لحكوا
طلعنا وراهم
اشرف من شاف شاهر طلع مسدس لو ما ولد خوالو يگضبون ايدوا جان جت الطلقة بشاهر
أشرف.. ول نذل دريت من الأول عينك منها طلگتها مني تا تأخذها شگولت الحالك من طمعت بيها وهي بكبر بنتك مسوي روحك ماكو منك وانت اقذر من الزبالة
نافع هووو هذا المامن بي وعندك استعداد تخسر الدنيا وما تخسروا
لو منك اطم حالي ضحك عليك وخلى عينوا على اهل بيتك حرامات محسوبين على الزلم
شاهر... سكران وتطوطح وتحجي بالرجولة ول مداسي يشرفك
ماكو زبالة غيرك يا خسيس اكدر هساع اعلمك المراجل على اصولها بس للأسف جاي بنص عقل
حتى الحجي ضايع وياك
كفخة مابيك
اخذوا من هين گبل لا تطبگ عندي واخليكم تشيلوا وهو جنازة
اصيل.... اشرف سكران ما يدري بحالوا خربط جثير بالحجي شاهر ماتحمل هجم علية وضربوا بالگزة الولد فكوا من ايدوا
واخذوا تجرجر للسيارة
الحد مافضت المشكلة قطرة دم ماظلت بينا الجيران طلعوا على حس الطلقة والصياح وجوي يسالون شصاير
زوج ابتسام گاللهم ماكو شي شباب بينهم تكاونوا
فيروز.. فضت الكونة الكل فاتوا من باب الأستقبال
ماما وخالة ابتسام فاتن للمطبخ
وشاهر وفادر جوي وراهم
من خوفي ختلت بظهر ماما
خفت. يطلع قهروا بية
غادي نار من العصبية وكف يغسل وجهوا على السنك كمل ورجع للربعة
أصيل... عليش ختلتي وخايفة
... هاا لا ماخايفة مابية شي
ابتسام.. ماكو شي لاتخافون هذا سكران ومايدري بحالو
هساع خابروا ابو وتخبل
گال اني اتصرف وظل يعتذر من سواية ابنوا
... خشيت للغرفة افرك بيدي بكل خطوبة لأزم تصير كونة الظاهر صدك اني منحوسة
ما اعرف شلون گدرت انام من الخوف والكوابيس
ثاني يوم بيتنا من گبل الظهر امتلى ناس
رنا... لاتظلين تتصفنين ماظل وكت كومي نرتبج
.. والله ولا الي خلك اهجس جسمي متكسر
... بطلي دلع وگومي
.... كعدت جوة ايدهن مكيجني مكياج خفيف ماما ماتقبل طوخ
وشعري لان طويل مايرهملوا شي بقى مفتوح بس من جدام شالوليا
ولبست فستان مناسبات
ونعاد نفس سيناريو ذيج الخطبة طلعت گعدت بس هالنوبة كل اثنين جاعدات سوة يتهامسن ويدحجن من طرف عينهن
جثير ناس الهساع مامستوعبين الگاعد يصير اني وشاهر ننخطب شي مامعقول ومامتقبلينوا
جدة الدنيا ماسايعتها حسها راح من الهلاهل
نجوى.... بابا من گعد الصبح متعصب ويزكح بعد الهساعوا ضايج من سواية اشرف مدري هاليوم شلون راح يخلص
من نزل مبدل العيون علية هيبة وكشخة صح لآبس زي عربي دشداشة بس زايدتوا وسامة
دحجت أيات عينها امتلت دموع تحاول بالگوة اداريهن عن الناس
... كلشي تم بسرعة عقدنا وصرت على ذمتو
شاهر حلمي المستحبل صار زلمتي
بس اخ من افعالوا
رفضني بمزاجوا ويوم الرادني هم اخذني بمزاجوا
واني لازم بكل الأحوال اسكت وانفذ
اصيل... قررت اتغاضى عن كلشي واحاول افرح
المكتوب ما منو مهروب لأزم اتقبل زواجهم واتمنالهم الخير والسعادة
فكرت بالجانب الحلو من هاي الزواجة
شاهر يخاف عليها اكثر من خوفوا على حالوا وفيروز راح تظل هين جدامي وما انحرم من شوفتها
ابتسام... يولي وين صافنة مو جاعد احاجيج
... هااا هوسة ومسطورة ما سمعت
.. جاعد اكولج شاهر مايرضى يفوت يلبسها الذهب يگول انتوا لبسوها الربعة كلها نسوان وين افوت
... براحتوا لاتلحون علية
عالية... عجل علبش رتبناها غير يشوفها بالمكياج والفستان عوفوا الذهب من تخلص الحفلة خلي يلبسها
رنا... اي احسن
فيروز.... عرفت حتى الذهب مايريد يلبسنيا متت قهر اذا مو طايقني عليش اخذني
عجل بيوم خطبتوا من تهاني مو فات جدامي لبسها
نجوى... لاتظلين مبوزة دحجي النسوان عينهن عليج هساع عبالهن مغصوبة على الزواج
.... عجل جذب مو مغصوبة مو ابوج وبابا طبخوها سوة واني غصب عني بس انفذ
.. ترى احتاريت وياج عجل منو الجانت كاتلة حالها علية اذا ناسية اذكرج
.... انجعمي ولا ادوخيني
... ههههههه تخافين لا اطلع سوالفج واحطهن بيدج
... وتالييي
سكتت هههههههه
.... خلصت الحفلة نص المعازيم راحوا والنصى الاخر ظلوا يتعشون
كمت من الربعة خشيت للغرفة ردت ابدل ماخلوني
رنا. ايا محمحمة شجاعد تفينين ظلي لاتبدلين تا يجي خالي يلبسج الذهب
... ما أريد عندي ايد اني البسهن عليش ظالة على منيتوا
عالية... هههههههه هاي من هساع شدت حيلها علية وادور كوان يولي انجعمي واكعدي
الربعة جانت متروسة نسوان ما كدر يفوت
... طبت ايات ماكدرت احاوبهن سكتت
بقيت گاعدة على اعصابي
ايات.. شعجب شاهر ما فات شافج ولا لبسج الذهب
نجوى.. من يخلصون العشا يلبسها ما ادحجيها لساعها مابدلة
... من خطب تهاني فات يمها وجثير نسوان بحزتها جانن موجودات
رنا... ا خالي يريد ياخذ راحتو ويمتع نظروا بهالحسن لو فايت كبل شوي وين يگدر يدحج عليها والنسوان مثل النحل فوك راسهم
... هااا اي خوش
... دغيت نجوى يصير احجي لو عيب
.... لا يمعودة ضبي لسانج اليوم لأزم تكعدين عاقل وتصييرين خجولة
.. . واذا هي گاعد تجفص بالگلب اني شسوي
.. طنشي هاي من غيرتها
... هفف مليت واختنگت اريد ابدل واغسل
. صبري شوي لو ما روحج بالمكياج شو بس اليوم خنگج
... دحجت عليها بطرف عيني ما اجاوبج احسن
فوك الساعة واني انتظر الأمير شاهر شوكت يحن علية ويلبسني الحلقة تا ابدل وآرتاح
رنا... يلا كومي
... اجة
... اي جاعد بالصالة الفوك
... وأكيد جاية تريدين اني اصعدلوا مو
... مايحتاجلها ذكاء عجل خما نشيلج ونصعدج
.. عليشش اني من دون البنات خطوبتي عوجة ترى هو لازم يجي يلبسني الذهب مو اني اروحلوا
... وشنو الفرق امشي وكافي تنقنقين
... والله فلا اصعد وهاي كعدت اريد اشوف شلون تجبروني
نور... احسن حل اروح اصيح ماما تجي تتفاهم وياها
... روحي قابل خايفة
نجوى.... فيروزة اگصري الشر ادري بيج گاعد ادورين كونة اصعدي هي حسبة خمس دقايق دوسي بيهن على حالج خلي يلبسج الحلقة وحدري
ابتسام.... ول مصگوعة عليش ماتريدين تصعدين وجاعدة تكاونبن زياگج
... مااه ما اصعد هو يجي هين يلبسنيها ويروح الله ويا
... فاينة الحظ وين هين كووومي لا وروح ابوي ابتلي بيج
.... خالة گضبتني من ايدي وسحلتني وراها
صعدنا فوك
شاهر وقادر گاعدين بالصالة يدخنون نرگيلة
شاهر گصني من قوك ليجوة
ابتسام... يلا خوية لبسها الحلقة خما تظل النص الليل بهدومها
شاهر... والله عدكم سوالف عايفينها الهساع تنتظر
تعالي هين
فيروز... فوگاها معاجبة وكلاموا مدري شلونوا
من گال تعالي فار الدم بعروگي حتى بهاي يريد اروح العندوا
فكيت ايدي من خالة وگعدت على ابعد قنفة منو
ابتسام.... شو گعدتي هين مو صاحج يولي
... والله هذا الموجود شنو نگلبت الأية وصار لأزم الحرمة هي تروح للرجال تا يعطف عليها ويخلي الحلقة بيدها
قادر... ههههههه مبين حرمة خالي طابگات فيوزاتها بس الحجتوا صح خما هي تجيك حرك رجلك ول يابة
شاهر...ههههه استغفر الله اذا مو راضية عليش جيتي
..... اسألهم لاتسألني اذا علية ما اصل عتبة الدرج
گبل بنص النسوان تفوت وتلبس بس هساع مايعجبك
قادر....هههههههههه اخ يابة والله يا خالي راح تشوف ايام تخبل
ابتسام.... هي كونة لو خطبة دكافي عاد بالحرام مرمرتوني
شاهر... خيتي اخذي البنوات وحدري عندي سالفة ويا فيروز
... براحتكم خوية يلا امشن
... شو بعدك جاعد ماسمعت شحجيت
قادر... بلي گولت اخذي البنوات وحدري ماگولت اخذي قادر وحدري
وحتى لو اتكول ما اتحرك جاعد على گلوبكم
... ول يابة بدون حجي زايد شو كوم من جدامي
.... ياخوي ما اكدر انرك هاي الفقيرة المسكينة وحدها وياك لا والمصيبة غرفة النوم قريبة والشيطان شاطر
... هههههههه خاف على خالك لاتخاف عليها ولي عاد
فيروز.... فاكة عيني عليهم شگاعد يحجون المايستحون
حدر قادر بقينا وحدنا
.... هساع تعاي هين بدون ماتفتحين ثمج ترى وصلت منج الهين
.... امداني بسرعة جريت بوش وخفت منو
كمت من مكاني رحت گعدت على نفس القنفة الگاعد عليها بينا مسافة زغيرة
.... انتي عليش هالكثر وكحة وصلفة وماتحترمبن
احمدي ربج طولت خلكي وياج جدامهم
فهميني شنو هالجسارة بالحجي
.... ماحجيت شي غلط بس البعبوا طلي يمعمع
.. مو راح اكفخج ماتريدين تصعدين محد يجبرج شكو جيتي
... هه محد جابرني اصلآ حياتي صارت كلها غصب
.... شلون يعني وبشنو بعد غصبوج
... دحجت علية
خطوبتي منك غصب انت وبابا طبختوها واني غصب عني انفذ
رجة ظهروا على القنفة جر نفس من النرگيلة ونفخ الدخان بتجاهي
.... مو هذا الجنتي تتمنينوا
... شوف انت حجيتها وگولت جنتي يعني بالماضي مو هساع
.... بالماضي وبالحاضر وبكل وكت انتي الي برضاتج او غصب عنج المهم تبقين جدامي
... اكرهك
... خوش يلا جيبي الحلقة البسجياها
..ما اريد قابل مكسرة وما أكدر، البسها
... عجل مالبستيها جوة بدل هالدوخة
... اي طبعا اني دوخة وغيري لا
... ههه منو غيرج
... بخطبتك من تهاني الفرحة ماسايعتك وطبيت بنص النسوان
.... ذكرتيني بتهاني بس صدك جانت مدللتني
.... بودي اگضبوا من رگبتوا واخنگوا شبيت نار
نترت عجل ششششجابك علية ما رحت رجعتها
... التجديد حلو تا مايصير ملل
عليش ضجتي والوجه غدة طماطة انتي مو مارايدتني وتكرهيني
.... اي اكرهك ومو طايقتك
جر ايدي
وبايدوا الأخرى فتحت علبة الذهب طلع الحلقة لبسنياها
عتيت ايدي منو وكفت تا اروح
... عجل وحلقتي ماتلبسينيها
.. عندك أيد البسها
.. يلا مايحتاج من گاعي اضوج منها تجوزت نوبتين ومالبستها مو عاد هساع اجي واحطها بيدي
... صديت علية اي طبعاً ماتريد. حتى الي تشوفك اتكول عزابي
رجعت للعلبة اخذت الحلقة سحبت ايدوا لبستهيا
والله العظيم بيوم الطلعها من اصبعك اني هم انزعها.
... ههههههههه عجل أشكد تكرهيني
يابنيتي الثولة المخطوبين يلبسوها باليمين مو باليسار ههههه
... فشلت احد گايلك اني خبرة مثلك
... ههههههه اي هم صح
... تركتوا ومشيت حجة وراي رجعي الشال على راسج كبل لاتحدرين
بوجهج للغرفة عدل بدلي هاي هدومج
.... ماجاوبتو حدرت جوة بدلت وغسلت اكلت شوية وبعدها نمت جفي على وجهي من التعب ودوخة الهوسة الي ابيتنا
نجوى.. الصبح گعدت گبل فيروز
نور وياي
گاعدات نتريك اني وياها
اندفعت باب المطبخ وفاتت ام تهاني واختها
انصدمنا بجيتهن شرايدات من الصبح
أصيل... ما اعرف احقد على بشر بس هاي الحرمة من صدك حقدت عليها
... صباح الخير
...السلام لله مو الهن رديت عليهن
... جاين على ام شاهر وينها
.. كومي ماما فوتيهن للربعة يم جدتج.
.. اخت تهاني گالت ظلي جاعدة كملي ريوگج
نندل الربعة قابل احنا غربة
مشن من جدامنا والسم يگطر منهن.
نور.. شرايدات جايات بس لا سمعن بخطوبة خالي وجن تا يخربنها
.. ليش بكيفهن گومي نگعد يمهن اريد اعرف عليش جايات
اصيل... كملي ريوگج ومعليج بهالسوالف
... الحمدلله شبعنا
الله عليج عوفينا خلي نشوف شنو فلمهن
بقت ماما ادردم علينا تركناها وطبينا للربعة گعدنا بعيد عنهن
نعيمة... خير ان شاء الله ولو بعد سوايتج مايجي خير منكم
ام تهاني... فايتة على الله وعليج بداعة الغوالي لاترديني وأكفي وياي
... احجي من الأخير شنو موضوعج وعليش مغبشات علينا بهالصباح
... خيتي انتي ام وتعرفين لوعة الأم المعلوگ افادها على بنتها تهاني من البارحة بالمستشفى اليوم الفجر طلعناها
....سلامتها ظلت عدها العافية
بس الهساع ما عرفت بشنو أكدر اساعدج
... احجي ويا شاهر تا يردها ندري بي يحبج ويسمع الكلمة منج تهاني لساعها عدها امل يرجعها لاتكسرون حظها وبختها بنتي فكت عينها علية وهو أول نصيبها لاتظلمونها بسالفة هي مالها دخل بيها الصوج والذنب مني اني مو منها
... اشايفة شاهر جاهل زغير ويمشي بكلامي
ام غازي عليش مخلية بنتج الهساع تتأمل ترجعلوا
البينهم انتهى من زمان الله يعوضها بقسمة زينة بدل شاهر
... ترى مو بسهولة الجاعد اتكولي تهاني حالها بالضيم
گرابتنا والمعارف أكلوا وجوهنا من يوم التطلگت لان ماكو بعشريتنا وحدة تجوزت وردت الأهلها مطلگة
... اذا هالكثر حريصة عليها وتريدلها الستر عليش لعبتي بعقلها وهجمتي بيتها كل الجرى والصار، من فواينج ماكعدتي راحة
شاهر زين وياها ومدللها عليش ما تركيها بفالها بس البيج مايخليج
تغريد... خالة الكلام اخذ وعطا عليش سديتها بوجوهنا لو وحدة من بنواتج بطنها ماتشيل الجاهل ويگع منها تسكتين لو تظلين حايرة شتجيبين وتسوين تا تعالجينها
امي السوتوا شي عادي من خوفها على بنتها شتسمع اتسوي وحظها الفاين خلاها تصدك جارتنا وتروح للحرمة الكشافة
.... الله منطينا عقل ونگدر نميز الزين من الشين
هساع فهمنا امج غلطت وماكو بشر معصوم من الغلط بس من تتبلى على بنتي وتفضحها بين الناس هاي شتحطيلها تا اطيب
لوما ستر الله جان راحت منا اصيل احمدو ربكم الطلابة انتهت بس بالطلاك بالحرام لو صاير شي عليها ينهد البيت قوك رؤوسكم
... نعيمة بروح اهلج لاتكبريها وهي زغيرة الحمد لله اصيل مابيها شي الويل والباقي على بنيتي الفان حظها وتطلگت وصارت علج بثم الناس
... ام غازي خلي نحجي من الأخير دام اليوم بالذات جيتي معناتوا عرفتوا شاهر خطب
ول يسلمج تركي وليدي بحالو وبنتج الله يعوضها بال اخير منو ( احسن منه)
... دحجي خيتي احنا ما جايين نكسر بخت البنية دامها صار على ذمتوا الله يسعدهم
الي نريدوا يرد تهاني العصمتوا
بنيتي ما عدها اعتراض تصيرلها شرج حرمة ما تأكل حرمة
... شاهر مستحيل يقبل بهالشي لاترخصين بنتج لساعها شابة واكيد تجي قسمتها
فيروز... واكفة بسد الباب وسمعت كل كلمة حجوها من طلبت يرجعها وعادي على ضرة تخبلت ام تهاني تبجي وتتوسل بجدة
دفعت الباب وخشيت عليهن مثل السعلوة الكفشة شكبرها وهدومي مبهذلة من النوم
خير ان شاء الله صار بيها شرج وضراير
دحجي عيني اذا بنتج ترضى اني لو تنطبگ السما ويا الگاع ما اقبل وفري كلام ولا تظلين تتوسلين
ام تهاني.. انهجم بيتج بگد النعال وبيج كل البله ظليتي تحومين على الزلمة الحد ما هجمتي بيتو وخليتي يطلگ حرمتوا
نعيمة... كون نهجمن رؤوسكم الصوج بية جاعد اخذ وانطي وياجن بالحجي
فيروز... يلا اخذي بنتج وفارجينا گبل لا يطلعن جنوني عليكم.
تغريد... گلبي مفرجس منج من گبل ماتنلام تهاني من جانت تشك بيج شو تعالي خلي اطلع ضيم گلبي بيج
فيروز... جت هجمت علية واني هم ما گولت باطل تشكلت ودخلت بالمعركة ضربة الي وضربة الها بس للأسف گدرت توگعني وتستلمني دك كفخات على راشديات على كفش من الشعر
طويلة وضخمة ضعت جوة ايدها
جت امها كملت علية
نجوى...تغريد تضرب فيروز بكل قوتها وامها وياها اني ونور وجدة وماما بطلعان الروح فكيناها من ايدهن
نعيمة... دخلي يجي شاهر ويشوف حال حرمتوا يسوي الدم للركب يلا برا الله يحبنا خلصنا منج ومن بنتج
اصيل... طلعن من البيت وهنا يسبن ويغلطن جيت كومت فيروز
اثار الضرب بوجها وجسمها
يولي وحدتهن بگد البگرة شجابج عليهن.
.... اااخ ماما جسمي كولو يوجع
اني شعلية هي بدت وضربتني حتى اساليهم
كوموني غسلت دحجت بالمرآيا وجهي احمر على بنفسجي يخوف وشفتي مورمة
نور.. ههههههه اول نوبة فيروز تخسر المعركة يلا لاتضوجين يكفيج شرف المشاركة
... وسسسسم گاعد تضحكون واني انمسحت بكرامتي الكاع
ااااخ يولي الوجع البجسمي اهون من وجع كرامتي
نعيمة... هههههههه فان حظج غديتي مثل الكتكوت جوة ايدهن
... اي اضحكين شكو عليج كولوا من وره ابنج الأمير شاهر
... امير وسلطان غصباً عنج حيري باثار الجتلة النجتلتيها ومعليج بوليدي
... هاا نجوى ظليتي بس انتي ماحجيتي
.... لا بعد عمري ينگص لساني اذا احجي كون كسر بيدهن
... يولي اشكثر احبج يبعد النفس
اصيل... جة شاهر اول نوبة محد حجالوا شي صبينا الغدة
نافع.... فيروز وين اشو متعلمة متكعد ويانة
....تريگت فايت وگت
رغد... بابا ام تهاني واختها تكاونن ويا فيروز وگتلنها
... غمضت نسيت عدنا وكالة انباء بالبيت
شاهر.. منو جتلها احجوا شصاير هين وشبيها فيروز
نافع... شكو سكتوا احجوا
نعيمة... يمة مصار شي جني يريدن ترد تهاني حتى لو على ضرة
ومن ما قبلنا تكاونن وياها من غيرتهن
نجوى.... بابا ترك الأكل وراح على فيروز
.... طب شاهر ظل صافن علية
.. منو منهن سوت بيج هيج
... هااا عادي مصار شي انسى
.... احجي منو منهن ضربتج
اصيل... خوية كونة نسوان اترك السالفة
هنا تقصدن يضربنها تا تهد عليهم ويطلعون الغلط منك وغصب عنك ترد تهاني
... اسسسستغفر الله وانتوا وينكم من هيج جاتلاتها
... موجودين بس تدري بيهن وكحات ووحدتهن شگدها
... جة شاهر گعد جدامي راد يمد ايدوا على خدي بعدتها وخر مابية شي
.. يولي شو طلعتي بوخة بس يمي لسانج
.... يمك ويم غيرك بس شسوي الكثرة تغلب الشجاعة
... هههههههههه اي واضح كومي تغدي لاتظلين وحدج هين
... كل عقلك اطلع بهذا وجهي اصلآ انسوني البين ما اطيب تريد قادر يشوفني ويصنف علية
گاعد احجي وسمعت حسو لا يا الله هذا شجابوا
... هههههه عليش خايفة منو هالكثر
قادر. أكدر افوت لو لا.
..... لا شششششجابك
فتح الباب وضحك من كل گلبوا
سولفتلي نور ماصدكت گولت اروح ادحج بنفسي يولي شمفينات بيج عود انتي السباعية ام الجفجير
... بسسسسس حرام عليكم يلا اطلعوا
شاهر... امشششي نطلع لاتخلي قهرها بينا
... خلال هالشهر عرسي بدينا بالتجهيز ماما وخالاتي وبناتهن وياي الحد ماكملت كلشي تعبنا لان الوكت قليل ولأزم يومية نحدر للسوك
ايات من يوم النخطبت راحت ظلت بيت عمها بحجة هوسة بيتنا ماتكدر تاخذ راحتها
جت خالة امنة وجدة صفية من الرمادي
مشاعري الهساع متخربطة ساعة اتعصب من برودوا وياي
وساعة انقهر لان خطبني بهاي الطريقة
وساعة افرح لان صار الي وبعد شحدها التأخذوا مني
كطعنا مهر محكمة وكلشي كمل حتى الغرفة جابها ونصبها
بيوم الحنة من الصبح اخذني البنات للصالون حفيت وجهي كامل شعري بقى على حالو لاصبغت ولا ميشت هو اسود عليش اخربو
حنتي سويتها بيت خالة ابتسام
فرحت بيها رگصت وتونست هههه والله ساعة حتى اني احير ويا نفسي كلساع بمزاج
كملت الحنة شاهر لا شافني بالبدلة ولا بالمكياج
ما جة تا يحنيني عششتو عود مايحب هالسوالف
بقيت بيت خالة ابتسام مارجعت للبيت لان زفتي تطلع من هين مايصير اثنينا نطلع من نفس البيت.
الصبح اخذوني للصالون ومثل كل عروس بدلة وتسريحة ومكياج
نجوى.. يولي طلعتي تخبلين
.. بعد روحي مو مثل حلاتج
... تدرين فيروزة هذا العرس معتبرتوا عرس اختي مو عرس بابا
... ذكرتيني هساع اني حرمة ابوج منا وغاد لأزم تحترميني
... فان حظج مو گاعد اصبغ بيج عليش تخربين للحظة
..... حضنتها انتي مو بس اختي توأم روحي وصديقة عمري
... كافي ترى راح ابجي
عالية... عيني وفري هذا الحضن لليل هساع خلي نرجع تاخرنا
... رجعنا للبيت وره شوية جت الزفة فات شاهررفعت الكاب ودحجت علية لأبس قاط خايفة علية حتى من عيني لاتحسدوا كلشي بي حلو رجعت نصيت راسي
جة كعد بسدي مامبين مني شي الكاب نازل على وجهي.
اخذ ايد وكمنا امشي مثل العميان
صعدنا بالسيارة هو يسوق
ما اعرف وين رايحين ادري بي مايحب سالفة المصور يمكن نفتر شوي ونرد للبيت
السيارات تمشي بسدنا ويدكون هورن ويحجون ويا
سد الجامة وشغل المسجل لحن الإغنية مو غريب علية اي هاي نفسها الشغلها بيوم السافرت للرمادي رفعت الكاب ودحجت علية
.... ههههههه يولي غطي وجهج الشباب عينهم على السيارة
نزلتة وظليت اسمع رجعلي تفس الحساس الحسيتوا بيوم السافرت دموعي غصب عني نزلن.
من وصل مقطع
بالأغنية غنى وياها
.
وصفولي عنك
وردة من قداح ريش جناح
زاهي بالسحر
وصفولي عنك
شال منك غيظ بستان الورد
والنرجس الرايج سكر
حنو طواريز ولحن ...
و حنو حمامات السجن
حنة إلي ...
و حنة الك
والي يعجبة خلي يحن
حن بوية حن حن عمي حن
ماتحملت بجيت بصوت عالي
... اووووف محد شاعل شيب اهلي غير هالدموع بجيج بيومها الهساعوا بأذني
اذا جنتي تتعذبين ضعف اني عذابي اضعاف
امانة يولي انتي امانة شلون افكر بيج شلون ادحج عليج واني الربيتج ويا بنتي
بكل صلاة وبكل ركعة ادعي الله بلجي يشفيني منج لان صرتي مثل المرض الملازمني ويمشي ويا دمي
تخبلت لا عقل ولا دين ظل براسي راهقت بيوم الگلبي نبض بيج اريد اضمج من عيون الدنيا
صار اكبر همي ما اخليج تصيرين الطير البشر
تدرين شنو اصعب شي صابني
اريدج تظلين جدامي ومن المح خيالج اصد عنج خاف اخون الأمانة بنظرتي الج
فيروز حبي الج مثل الماي الصافي
مايوم عيني طمعت بتفاصيلج ومفاتنج عشگي الج بعيد عن الشهوة والغريزة
حبيتج بروح طفل عيونوا مايشوفن من الحب غير البراءة والنقاء
.. يحجي واني اناشغ مثل الجاهل اريد احجيلوا عن حالي والصابني بسببوا ما أكدر
كسرت سيارة وكفت جدامنا هم زين ماسوة خادث
اجة قادر دك الجام.
....انعل ساس اهلك ردت أگلب السيارة
ول شبلاك وكفت مثل سكت ابليس جدامي
... لا والك عين تحجي بشرفك دحج وين جايبنا ندري عاشگ ومنعول اهل اهلك الي هما اجدادي
زين احنا شنو ذنبنا جايبنا على الطريق السريع احد گايلك نريد نسافر
.. هههههههههه وهساع مذكر وجيت تنبهي
... والله ياحضرت العريس اندك هورن ونخابر وانت ضارب الدنيا جلاق
.... ولي من جدامي تا نرجع
... شاهر دار السيارة بعد كل هذا البجي گضبتني الضحكة
... ههههههه اضحكي شبلاج اني الوكعت بيها شراح يخلصني من ربعي اليوم تلكيهم صوروا الطريق تا يگضبوها علية
... هههههههه شعلية هو اني الأسوق لو أنت
كملنا فرة ورجعنا للبيت الكل خربانين ضحك مو عرس صار مسرحية
ماما موصية قادر يجيب مصور للبيت تا ناخذ صور
من اعترفلي شاهر بحبو نسيت الزعل اهجس روحي ترفرف من الفرح
خلص العرس وجت وكت الزفة....
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!