_وشاء الحب_
( بقلم بسمة البياتي)
_البارت الخامس و العشرون _
وكت الزفة خالة أمنة وعالية ورنا أخذوني للغرفة
اول ما طبيت گضبتني الراجفة منظر الغرفة والفرشة والزينة البيها
شبلاني وشصابني ما ادري
امنة... عليش واكفتي جدام الباب سمي بسم الله وفوتي
.. هااا اي جيت
رنا.... يبوووو فيروزة الوكحة خايفة
امنة...عليش تخاف قابل داخلة حرب كل بنية هذا مصيرها احنا هم مرينا بهيج يوم مثلها وعدت الحمدلله وماظلت النة غير الذكرى الحلوة
عالية.... عجل اشو ذكرتي مصخمة بيوم عرسي من الخوف الصابني هبط ضغطي وتخربطت جنت بوكتها يومين ماماكلة
... فان حظج جاعد تشجعها لو تخوفيها بالأكثر
رنا.. معليج بيها اسأليني اني يولي ماكو احلى من هاليلة
.... بسسس هساع اني طلبت رايكم شلون ورطة هاي
امنة... هههه فلا تنلام بيجن يلا كعدي هين بين مايزفون شاهر
.... گضبت ايدها وين عايفيني اگفي ساعدوني اغير البدلة وافتح شعري ام الصالون ظلت تلف بي اهجس راسي من الثگل غادي هالكبروا
عالية.. هاي شغلة خالي مو شغلتنا المسكين اشاف منج وتريدين تبدلين.
.... اهوووو والله مو وكت هالحجي ساعدوني
عجل مو شافني من گصينا صور قابل طلابة
امنة... ساعدوها منو يكدر عليها
... جابولي ثوب النوم الأبيض كزبر جلدي منو
حاولت اتهرب ما البسوا ما گدرت افلت منهن لبستو والحمدلله الروب الفوكاه مستور
فكن التسريحة وطلعن
جبت بطانية وخشيت جواها
لا ابد ما اكدر اتقبل الموضوع صعب من وصلت الشغلة الهين استصعبتها.
دموعي نزلن بغزارة
صار حس قريب من الغرفة حضنت حالي وتغطيت
فات شاهر ظل واكف بمكانو مصدوم من منظري طب وسد الباب
.. يبعد شاهر شصابج عليش جاعد تبجين
.... زدت بالبجي خو اليوم خلصتها بس بجي
جة گعد بطارف الجرباية جدامي مد ايدوا يريد يمسح دموعي دفعتها
. احجي بنيتي منو القاهرج خما احد غاثج
.... هزيت راسي بمعنى لا
... عجل عليش تبجين خايفة مني؟!
.... لو اخاف من الدنيا كلها منك ما اخاف بس...
... احجي لاتضمين شي بگلبج
... ما اكدر والله ما اكدر
.... هو شنو الماتكدرين علية
جاوبي بدون بجي
.... والله احبك بس
... هم كالت بس فيروزة دحجي علية ماتريدين أگرب منح مو؟ هو هذا المخوفج ومنزل دموعج
... هزيت راسي ودنگت
.... ترى تكدرين تفهميني بهدوء بدون هذا البجي وهالدموع النازلات مثل الشلال
... رفعت عيني علية
من حبيتك حبيت اهتمامك بية وخوفك علية
اذا اخاف اجي الحضنك اذا اسوي شي غلط اختل ورة ظهرك
ردتك الي ما اريد يجي يوم وتتغير علية
غرت وتمرمرت بيوم الصرت الغيري
شاهر بالذات اهجسو مسجل بأسمي محد الها حق بي غيرنا اني ونجوى
اعرف الزواج اكبر من گاعد احجي اني مو زغيرة وافهم شنو الأزم يصير بين المزوجين.
البداية ماحطيتها بالي وگلت اكيد شغلة عادية وأكدر اتقبلها بسهولة
ومن صار الموضوع صدك وطبيت للغرفة گلبي عصرني
اني وياك بهيج وضع لا ما أكدر بعدني الهساع اخربط بأسمك يوم اسميك شاهر ويوم خالي
الله عليك لاتفهم كلامي غلط وتفكر اني مارايدتك
بالعكس اكثر شي اريدو بهاي الدنيا هو انت
صح من طلبتني رفضتك لان الطريقة الخطبتني بيها حزت بنفسي كرهت مبدأ الغصب
بس والله والله احبك
.... من جنا بالسيارة شگتلح؟
... هااا جثير حجيت يا كلام منهم
.... گتلج حبي الج بعيد عن الشهوة والغريزة
اذا انتي مستصعبتها شوي اني مستصعبها جثير
من صعدت شايل جبل فوك جتافي
هم شكبروا
شلون اصل يمج وكل ذكرياتج جدامي
من شلت وعمرج ساعات اليومنا هذا
ربيتج ويا بنيتي
هساع اتكولين عجل عليش اتزوجتني
فيروزتي اني بشر ول يابة مو ملائكة
ببوم وليلة لگيت نفسي عاشگج أغار ومشعول شيب أهلي عليج
كفي دموعج ولاتخافين سدج امين مايصير البالج
خلنا هيج الحد ما الله يفرجها علينا ويزيل الحواجز بينا
متاكد يجي يوم اريدج وتريديني
ونكمل زواجنا واذا الله كتبلنا تصير ام جهالي
الله ما حرم علاقتنا
تزواجنا بالحلال والي يريد الحلال الله يسهل علية ويزرع الأنسجام والمودة بينا
هساع مكتفي بجودج جدامي راح اخلي راسي على المخدة واني مرتاح
ما راح افكر واكول يمكن بيوم تروح مني
، ولا افكر والوم حالي لان دموعج تنزل بسببي
... من فرحتي زتيت روحي بحضنو
... هههههه احلى شي بهالزواج أكدر احضنج براحتي وما اظل كل شوي متوضي
..... رفعت راسي اضحك هو محد فين حظي غير سوالفكم
.... ول يابة خما تندمتي
.... اتندم اذا ما حبيتك وما اتزوجتك
..اعشگج يبعد العافية والنفس
راح اخذ ملابس اسبح وابدل
وانتي غيري هالأهدوم الي لابستهم وارتاحي
..... ابتسمت بفرح شاهر
... كولي يبعد شاهر
... احبك والله
هههههه اموت عليج يولو
.. باسني من راسي وراح اخذ هدوم وطلع
كمت على السريع اخذت تراكسود لبستوا ورجعت المكاني
رجع للغرفة سابح ومبدل مد السجادة يصلي
كمل وجة انجضع بمسافة عني
.... اي احد يسآلج عن هاليلة گولي كلشي تم
.. هااا اي خوش
... يصير تجين الحضني مثل گبل من جنتي تتكاونين انتي ونجوى عليه
لو هم ماتريدين.
..... ضحكت واني اتذكر من جنا نتكافش تا انام بحضنو تالي يتعصب يزگح بينا وعلمود يفض الكونة ينام بنصنا ويخلي كل وحدة على. ايد
بدون ما احجي خشيت بحضنو
اااخ اشكد مشتاگة الهذا الحضن
لمني بين ايدة ويمسح على شعري ضميت وجهي بصدرو
.... هذا گربج مني ووجود بحضني يسوة عمري الراح وعمري الجاي
... يسلملي عمرك يبعد عمري هذا مكاني وحقي من اني وزغيرة وهساع الحقوق رجعت الاصحابها
.... ههههه
... موبايلك جاعد يرن
.. تركي هاي سوالف قادر وولد عمامي
... جاوبهم
... ماشي الخاطرج
هاا يول شبلاك خبصت الدنيا
لا اتعب حالك ما احدر
يلا جفيني شرك
و بدربك گول للبنوات يجيبون العشى
هههههه اي عجل شلون لأزم اسند گلبي
.... ما أعرف شگاعد يحجون شاهر ظل يضحك بصوت عالي
سد التلفون
... جوعانة
... اي
.. هساع يجيبون الأكل
... رنا صعدت صينة العشا شاهر كام اخذها منها
حطها بالكاع وكال يلا تعالي
گعدت جدامو
ميتة من الجوع وما شاء الله الصينية متروسة تكة وكباب ومعلاك ومقبلات
كعدنا نأكل واني مثل ما متعودة لأزم لكمة الي ولكمة الو
..... من ايدج حتى الأكل الو طعم ثاني صارلي جثير محروم من دلالج
.... لاتذكرني ومنو السبب مو انت
... هههه هساع اني شحجاني اسكت احسن
... اي احسن كملنا عشا
شاهر اخذ الصينية طلعها خلاها بالصالة الجدام غرفتنا
غسلنا ورجعنا للفراش
نجوى... اني والبنوات طبينا بغرفتي تا انام گبل لا اغمض
دك تلفوني رقم مجهول
استغربت منو هذا اول نوبة يدك علية رقم ما اعرفو
غلست وما جاوبت كولت باجر انطي البابا يشوف منو
وره شوية جة مسج فتحتوا
لشتي رجفت من المكتوب
نجوى جاوبي اني عمران
لا ياربي هذا منين عرف رقمي اووووف اكيد من بيت جدي
كتبت بأيد ترجف
.. شرايد؟
... راح اتصل خلي نحجي.
.. ماكو حجي بينا فك ياخة مني
... مو بمصلحتح ما تجاوبين لاتخليني استعمل اسلوب التهديد وياج
.... الله ياخذك شرايد مني مو كافي دمرت حياتي
گاعد اكولك ما اكدر اجاوب اني مو وحدي
... عجل خوش خلي نتراسل
عليش مجاعد تجين البيت جدي
.ماعندي مجال
.. هااا
منا وغاد كل جمعة تجين تباتين فهمتي
باحلوة شگاعد احجي لو اعيد
.. وانت منو وگاعد تأمرني تا اجي
.... مو كيفج غصب عنج تجين
... ماتكولي انت شرايد مني
.. اريدج
هساع انتي مو مال زواج
اريد ادللج وادلليني
اوووف مجاعدة تطلعين من راسي
كبرانة وزايدة حلا
أريدج وانتي من كاعج الي من البداية
.... الله ياخذك يا حيوان
لو تموت ما اطخ شعرة من راسي ترى اني كبرت ماتكدر تعيد السويتو بية
... هههههه جاعد تتحديني
لا أشو اكدر برضاتج او غصب عنج
اذا تيبسين راسج الحلو افضحج
.. اي وبوكتها راح تفضح حالك
وهاي رسايلك دليل على السويتو بية
..... ههههه اي مو جاهل جدامج واتهدد الرقم مو باسمي لا انتي ولا غيرج تكدرون تثبتون شي علية
هساع برسالة مني للعريس
تصبحين بالگبر
... جفلت شنو شتريد اتكولو
... روح اخذ بنتك الطاهرة للفحص وتاكد من شرفها هههههههه
... ايا كلب يا ساقط
.. الساقط يريدج وغصب عنج كل جمعة تجين تلبين رغباتي مفهووووم
... قفلت التلفون خشيت جوة البطانية ابجي سديت حلكي بيدي تا محد يسمعني
ياربي شوكت ارتاح من عذابي مو طلبت منك تاخذ روحي
هساع اني شسوي شلون اخلص من هذا الوحش ياريي كلشي ولا الفضيحة
استر علية تدري بية ما غضبتك ولا عصيتك الصار غصب عني استرني ياربي دخيلك استرني
فيروز ... شاهر
.. يفداج
... ما اريد تفديني شسوي بدنيا انت موبيها
فيروز ماتسوة شي بدونك
... ول يابة يواش يواش على گلبي تراني مسكين مو گد كلامج بنيتي
. هههههه اي صح جثير مسكين
ابد ماجتلني بيوم الجيتك وگوتلك أحبك ولا انت التزوجت وحليتني مفرفحة
. ههههههههه انعل ساس أهلج ماراح تنسين يولو
... لا كلما تضوجني اذكرك
.... صدك سولفيلي منين جتج الجراءة ووگفتي جدامي وحجيتها
.... غمضت عيني وغطيت وجهي بصدرو
...شو ضميتي راسج هههههه
... هههههه لاتظل تذكرني جنت مراهقة
ماواعية التصرفاتي
ما ادري بحزتها شلون حجيتها
... گبل مراهقة وهساع كبرتي وعقلتي مو ههههه
... اي شنو مو بعينك مابقى شي واخش بعمر ١٨ سنة
... بعيني وبگلبي منو يگدر يعترض على كلامج
.. شاهر شوكت حبيتني
... من جيتي للدنيا واني احبج
.. لا الله عليك احجي ادري گبل تحبني مثل بنتك
... من ظليتي بالرمادي ادارين خالة حسنة الله يرحمها
بحزتها عرفت رحتي بس شليتي حالي
فرغ مكانج من افوت للبيت اهجسو خرابة ومهجور
زاد تفكيري بيج
جاهدت تا ما أخليج ابالي تاما اغير نظرتي اتجاهج اطب واطلع استغفر
حاولت جثير بديت بحياة جديدة ردت يصيرلي جاهل بلجي التهي بي واطلعج من رأسي
حاولت وحاولت وحاولت وبالنهاية فشلت بنت نافع معشعشة بالفكر والگلب شيشيلها منو
.... زين من طلگت تهاني عليش ماببنتلي انت رايدني ليش ظليت هاملني
.... اذا ماتصيرين الي وبالحلال على گص رگبتي أأملج بشي
... جان على الأقل حجيت وياي گبل لاتخطبني
خليتني احقد عليك حسستني مالي قيمة عندك تتركني وكت اليعجبك
ووكت التريدني غصب عني اخذك
... شحجي وياج يولو اصلا من حجيت ويا ابوج وطلبتج منو جنت متوقع يرفض ويزعل بالحرام انصدمت من موافقتو
.... ههههههه مو بس اني واكعة بحبك بابا هم
..... ابوج ذهب ماعندي اخوان الله عوضني بي وبقادر
.. الله يديم خوتكم
يلا نعست خلي انام
حضني قوي واثنينا نمنا
الصبح فكيت عيني فركتها تا اركز..
شاهر واكف جدام ميز التواليت يمشط
... صباح الخير يوجه الخير
يلا كومي غسلي تا نحدر ترى خبصوني بالمكالمات يريدون نتريك وياهم
.... صباح النور
ما اريد احدر اشو مستحية
.. هههههه حگج يابة
من تگعدين وياهم يروح الخجل يلا كومي
راح احدر گبلج ومثل ما وصيتج اي وحدة تسألج شصار كولي كلشي تم
... اي خوش
كمت اخذت ملابس تا اسبح لساع مغاسلة شعري من السبري
دافوت من يمو گضب ايدي وحضني
همس قريب من اذني
... من ٣٧ سنة البارحة يلا نمت مرتاح
... ان شاء دومك مرتاح
تركني وحدر واني طبيت للحمام
سمعت حس الهلاهل ههههههه مايدرون العريس گضاها بس حضن.
سبحت وطلعت
كعدت اجفف شعري فاتن خالاتي والبنات
وهم هلهلن هههههه
وكفت مستحية والخدود حمر عايشة دور العروس.
اجني بوسني
عالية... هااا بشري شصار
.... شنو شصار
امنة... يولي لاتصيرين غبية تعرفين اشتقصد
عجل عليش هلهلتو اذا ماتعرفون الصار.
ابتسام... اي مو جنا خاتلات جوة الجرباية وندري شسويتو
تحجين عاد لا اكفخج
... اهنا اني رجعت خجلت ونصيت راسي
.... بالحرام هالبنية يرادلها گلب مامدشن
.... ترى مايصير هيج كولو هاي عروس ما لأزم نغثها گاعد تشوفوني خجلانة وخدودي حمر ومبتسمة يعني شنو معناها
امنة.. ههههههههههه سوالفج يتربعن بالگلب
ابتسام... يولو معقولة هاي اصيل ربتها شو ذيج فطيرة
عالية... شنو نسيتي جدة وياهم اكيد طالعة عليها
.. هم زين ظلن يضحكن ومسألني بعد شي ولا رادن النيشان
حدرت وياهن جوة تلكتني ماما اخذتني الحضنها تبوس بية
طبيت للربعة جدة وشاهر ونزار وعمو عمر وجدة صفية گاعدين سلمت عليهم. وباركولي
نعيمة... تعالي هين
... كعدت بسدها باستني وطلعت سوار لبستنيا
بست ايدها ورأسها عايشة دور الجنة هههههههه
... مصگوعة أريدج ادللين وليدي وصيري عاقلة لا دورين كوان ومشاكل شيگولج كولي حاضر
... گبل شوية جنتي يا محلاج
لأزم توصين ابنج علية مو گاعد توصيني
صفية.. . العدها لسانج مايحتاج يتوصة عليها
.... خوات نفس الدم اكيد تصفين وياها
عمر.. هههههههه اني وياج بنيتي وين اكو منج يكفي جو المرح التارسة البيت بي
... فدوة هذا الكلام الحلو
جدة شاورتني بأذني
... صيري سباعية اريد هالشهر تطلعين حبلة
... اي مو جايبلكم بزونة
اروح أكعد نجوى احسن.
طلعت وجدة ادردم وراي هههههههههه
طبيت للغرفة
نجوى لجحتني غمضت استغربت.
جريت الغطا منها
ترى دحجتج من غمضتي ادري گاعدة
.... من الخوف والقلق عيني ما شافت النوم
الكل گعدوا واني مغمضة بالجذب اسمع حسهم مالي خلك احجي وياهم
جت فيروز ماكدر اظل مغمضة فتحت عيني
صباح الخير حبيبتي
... صباح النور بعد عمري يلا گومي تا نتريك سوة
.. ما أريد مو جوعانة
؛....وضعها مو طبيعي وعيونها حمر معقولة ضاجت على ابوها
لعبت بشعرها
جوجو شبيج شو مبين ضايجة.
... لا عمري عليش اضوج
تعبانة من هوسة العرس ومشبعانة نوم
.... بداعة ماما كوليلي خما ضايجة علمود شاهر
... فان حظج على هذا التفكير يولي بالقرآن اكثر وحدة فرحانة بعرسكم هي اني مكيفة شوكت يجيني اخ لو اخت
.. ههههههه منين يجون من الهوا
..... عااا لاتكوليها يولي
.... كلشي ماصار صعبة علية وعلية جثير صعب حالنا مو مثل اي اثنين يزوجون ما نگدر بسهولة ننسى وضعنا القديم
... اي صح هم حقكم بس لشوكت
... الحد ما الله يفرجها يلا كومي عاد
... خلي اغسل واجي
من اليوم بده كابوس جديد انضاف الباقي الكوابيس الي كلهن سببهن شخص واحد
أقذر من القذارة حيوان لا حشا الحيوان منو شيطان بهيئة بشر
اتصالات ورسائل يومية وكلهن تهديد وترهيب حتى ارضخ الطلبة واصير حالي حال بنات الليل
تعبت انتهيت ادمرت مستواي الدرأسي صار زفت أكلي قليل صفناتي كثرت والي يسألني شبيج
جوابي واحد تعبانة من الدراسة
اعرف الجواب مو مقنع بالنسبة الهم لكن ما عدهم غير حل لأزم يصدگوني
قفلت تلفوني تا ما اشوف شي
المصيبة صار يجي يوكف جدام مدرستي
بابا ماجرلي ابن عمو ياخذني اني ورغد ويرجعنا
وهذا شالع گلوبنا يومية يطلع بسالفة سيارتي عطلت صارت عندي شغلة بانزين خلصان
المدرسة صح قريبة
بس بابا مايقبل نروح ونجي وحدنا
صرت بيوم المايجي السايق اظل ادعي ما اشوف عمران ونوبات ما اداوم اغيب
ايات گبل عرس فيروز وبابا راحت البيت عمها بحجة يمكم هوسة
وگبل جم يوم رجعت ابوها ما قابل تظل اهناك لان عندة ثلاث ولد عزابية
عينها تفتر وره بابا وفيروز وتتحس
ومن يجي الليل اسمع حس بجيها
نوبات استخطيها اذكر الصاب فيروز من بابا اخذ تهاني
بهالدنيا كل واحد منا همو شكل
قادر اااخ يا قادر من يجي علينا وعينو تجي بعيني وادحج الحزن البنظرتو اكره حالي
واتعذب بالأكثر ما اعرف ليش الحياة مگاعد تنصفني أبد
فيروز... حياتي ماكو احلى منها حبيبي صار الي اصبح وامسي بوجهو
متؤالمين ومتفاهمين صح زواجنا مو كامل بس مرتاحين.
من جت ايات
غصب عني اغار منها نظراتها وحسراتها تشببني بنار
شاهر يگولي تركيها المهم اني عيني ما ادحج على غيرج وگلبي بيتج عليش بعد تنقهرين
اقتنع بحجيو وأسكت مر شهر والوضع تمام
مابي شي مو عادي غير سوالف نعيمة
وحركاتها عفية حرمة ماتفوتها فايتة
نعيمة.. مصگوعة
...ترى أسمي فيروز
.... ادري فيوز
... عزززا منو فيوز
جيت اكولها وانتي نعامة بالگوة گضبت لساني
... البارحة من وليتي نمتي مو جنتي لابسة نفس هالملابس شو هساع هم نزلتي بيهن
... عززززا هساع شجاوبها
هااا نظيفات هنا البارحة المغرب لبستهن.
...عليش ماسبحتي من گعدتي من النوم
.... جدة هاي شكو
... جاوبي لا بالقوري على راسج
صارلج ايام وضعح مو عاجبني حالج مايشبه حال اي عروس يولي احجي خما مانعة وليدي منج
... اهجس غديت ماي من التوتر
شمانعتو جدة ترى هاي سوالف خاصة مايصير تسولفين بيهن
يمكن عندي عذر لو تعبانة لو مريضة شبلاج جاعدة تراقبيني
... شو ما جاعد أصدكج
.. خوش لاتصدگين من يجي شاهر گضبي وسألي
اصيل... هههههههه يمة حجيها صح عليش تدخلين بينهم
... معليج انتي خليج بحالج
وانتي بالحرام اذا مقصرة ويا انتف شعرج شعراية شعرية دحجي امج ابنها بطولها
ومن الصبح تجي الشعر يگطر ماي
اصيل... صخام مو هيج عاد شششبلاج اليوم
.... ههههههههههه والله يا جدة عندج خوش جهاز فحص حتى ابليس يصفن على سوالفج
هذا حالي ويا نعومة
من خوفي منها صرت كلما اصعد للغرفة ومن اريد انزل اغير هدومي ونوبات كل شوي افتح البوري على شعري وهو الجو بارد ثلج
شاهر سألني شجاعد تسوين
كوتلو لا تسألني اسأل أمك
ظل يضحك يگول انتي وياها صدك عمة وجنة
اليوم تاخر شاهر بالرجعة گاعد يتعلل ويا الولد
نعيمة... هاي عود مو صيتج تخلي يبطل السهر فان حظج طلعتي مابيج خير
.. كافي يعني شسويلو اربطو بحبل واخلي يظل هين اذا انتي امو ما كدرتي تمنعي تريدين اني امنعو
... هو هذا الفالحة بي بس طولة لسان
... صديت راسي ما اريد ادحج عليها للساعة ١٢ يلا جة
جدة اكلت گلبي صرت اعصاب
گاعدة مدلغمة وروحي بخشمي
گعد بسدي لزم خدي گرصو
دفعت ايدو
... خير ان شاء الله الليلة باينة من اولها راح اكضيها اراضي وادلل
قادر. عجل گبل شوي جدام ربعنا مو جنت الفارس الهمام
... غصباً على خشمك يول
نعيمة. . يمة بغلاتي عندك لاتتأخر هالكثر يظل بالي عليك حتى النوم يطير من عيني يلا اروح انام تصبحون على خير
... ان شاء الله يمة تدللين وانتي من اهل الخير
قادر... اكوم اروح وانت خوية باجر اذا تأخرت ما حدرت من فوك من وكت اطلبلك الأسعاف
.... فارجي لا بالحرام اعلگك بالعمود
... ههههههه فيروزة ما اوصيح هلله هلله بي
.... عفتهم وصعدت فوك
انجضعت بطارف الجرباية
.... هساع غير افهم عليش زعلانة
... ماحاوبت جريت البطانية وتغطيت
وكف يبدل وراح غسل وجة
... تگلطي بنيتي مو راح تگعين
. معليك بية وديربالج تجي الطرفي
... هههههه واذا اجيت شراح تسوين.
.. انزل انام بغرفة نجوى
حضني وقيد جسمي
.. يلا اريد اشوف شلون تروحين
. وخررر شاهر مگاعد اشاقى
... ولا اني
بنيتي بطلي سوالف الجهال وسولفيلي شنو المضوجج
... يعني متاخر للساعة ١٢ واتكول شنو المضوجج بسببك جدة شبعتني رزايل
..... من الأول كولي هيج هذا تعلوم امي اووووف ولا تگعد راحة
صدي علية خلي احاجيج
.. مااا
... بنيتي الزعل واسلوب النتر والتأمر مايجيب نتيجة وياي صدي خلي نتفاهم
... صديت علية
... احبج اي روحي بيج أكيد اعشك انفاسج شي منتهين منه
بس تجين تقللين من قيمتي وتريدين تمشيني على هواج لا الهين وتگفين مو شاهر اليمشي بأمر حرمة گبل ما سويتها ما اجي هساع أسويها
....يعني اذا اريدك ترجع گبل هالوكت ونتعشى سوة گاعد اتأمر عليك
.. گوليلي شاهر لا تتأخر جثير أريد اتعشى وياك
انعل امة وابو المايجي من وكت
مو زعلانة واحجي وياج ماتجاوبين
فيروز وياج كل الأسوي مو ضعف ولا خوف منج
الأسوي من حبي الج
تذكرين گبل من اتأخر الگيج جاعدة باب المطبخ تنتظريني
ومن حزتها صرت افوت للبيت من وكت الخاطرج
زين هذا حب لو خوف منج؟
..... تحبني لان تعرف اذا تأخرت راح انام بدون عشا
لا تتأخر والله اخاف عليك
... صار من عيوني
... ولا تتعشى برا
... تدللين
... يحجي ويبوس بيدي هالأيام لمساتة على جسمي صايرة اكثر جراءة بس ابد مايجاوز الحدود المتفقين عليها
.... ادري بيج مامتعشية جبتلج أكل العلاگة ظلت بالمطبخ روحي جيبيها واكلي
... ابتسمت حافظني
نزلت جبت الأكل گبل الأصعد مديت راسي بغرفة نجوى لكيتها نايمة
اوووف ما ادري شبيها راح تخبلني
تعشيت ونمت
ثاني يوم وكت رجعة الطلاب من المدرسة اني وماما بالمطبخ
فاتت رغد تركض وتصرخ
دحجنا ردانات قميصها كلهن دم
اصيل... بسم الله يولي بس سكتي منو ضربج وششششنو هالدم
رغد..... مو مني ماما نجوى
فيروز... گلبي يريد يوكف گضبتها قوي وصرخت احجي شششبيها نجوى
.... هذا دمها.......
. يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!