رواية وشاء الحب الفصل السابع والثلاثون 37 - بقلم بسمة البياتي

_وشاء الحب_
( بقلم بسمة البياتي)
_البارت الرابع و الثلاثون   _

كلنا وأكفين جدام شباك المطبخ
جدة طلعت للباب
فاتو الزلم اخير واحد جان الشيخ من شاف جدة
اجة يسلم عليها

... شلونج ام شاهر عساج بخير ان شاء الله
... هلا بيك ابو وسام
منين يجي الخير ولمصايب نازلة مثل المطر على رأس وليدي
بروح اهلك هي هام سالفة يسون عليها گعدة

... الحجي بينا سالفتهم ماتتسولف ولوما أركان السگط هدد يسويها دم فلا اجي
ول يابة حتى اليسمع يضحك على السالفة

... شبلاهم تخبلو على رؤوسنا سنتين عاشت هين معززة مكرمة شو ما دحج عليها
يعني بيوم الي البيت مگلوب مابي محط رجل  والناس طابة طالعة تحلى بعينو ويفوت عليها بقصد حسبي الله على تفكيرهم اليهودي

... مدري شگلج السالفة من ساسها عوجة وبيها ملعوب جاعد ينحاك ضد وليدج
اخوانها الجاتلهم يگولون خيتنا انفضحت والناس الجانت هين بيوم العرس جاعد يجيبون بسيرتها
وگبل يومين ولد من گرابتهم معير اخوها وهذاك متخبل

... من سود الله وجوهم الله اكبر متقصد خما متقصد ادري شرايدين منو

... عجل ما ادحجبن قبلت اجي اريد احل الموضوع وانسدو نهائي تا ماتصير عداوات

.... الله يعديها على خير ان شاء الله
... امين

. فيروز... فات الشيخ
وكفنا قريب من باب الأستقبال نتسمع عليهم
گلبي دكاتو الف بالثانية خايفة يطلبون منو يتزوجها
يمة بلكي من صدك اموت
.بدة الشيخ يحجي بسوالف عادية ويضرب امثلة على صلة الرحم
گال الگرابة ومو لأزم يخلون الشيطان يفوت بينهم ويخرب العلاقات
بعدها صار يمدح بشاهر

حجة ابو ايات گال احنا مانريد نسوي مشاكل وجينا نحل الموضوع بهدوء
سمعة بنتي صارت سيرة بحلوگ الناس اليسوة والمايسوة يسولفون بيها
منو بيكم يرضى بنتو ينكشف سترها  على رجال محرم عليها والمشكلة البيت متروس ناس والكل شهد على هالشي

الشيخ.. شاهر ماتطلع منو العيبة والصار مو بقصد منو بينا مايخربط ويغلط
عرس والف حسبة وشغلة براسو صعد مطمن
لان الطابق الفوك خاص بي شمدري كريمتك اهناك

اخو ايات.. مع احتراماتي الكلامك شيخنا
جبناك تحكم بالحق شاهر غلط ولآزم يتحاسب
رضيعتي حلفت يمين
اتكول حس الماي يجري ومبين اكو احد اهناك عليش گبل فات ما دك الباب
لو  سأل منو اكو ماجان صار كل هذا
ترضى يا شيخنا تالي عمرنا الناس ادحج علينا وتتهامس وصلت بيهم يگولون بيكم زود روحو للي تفرج على ستر خيتكم مو جاعدين مثل النسوان

شاهر.. ينگص لسانك ولسانهم مثل ما اخاف على اهل بيتي اخاف الله بأعراض الناس الله بسامع سماه يشهد من لجحت خيالها خليت وطلعت كافي عاد خلي عدكم غيرة متعجب من هاي گعدتكم زلم خشنة جاعدين يسولفون بسالفة حتى النسوان عيب تحجي بيها

فيروز... كلمة منه وكلمة منهم گبت بينهم كونة للضالين
الشيخ زكح بيهم وسكتهم
گال فهمونا بدون زكح هساغ المطلوب من شاهر شنو

ابو ايات.. يعقد عليها ماكو غير حل تا يسكت حلوك الناس

فيروز... ماما خالة نجوى كلهن صدن عليه
ماستوعبت الكلام انهد حيلي وبطني وجعتني
گعدت بالگاع

اصيل... يولي على كيفج ويا حالج هساع احنا شفهمنا وبسرعة انهبطتي لاتخافين مامعقولة شاهر يسويها

.. همست بحس مخنوك
واذا ضغطو علية وسواها شراح أسوي ووين انطي وجهي بالحرام أموووت

امنة... اسم الله عليج أبنيتي
ان شاء الله مايصير شي ذولة بوخة بس يهوسون الجلاب التهوس ماتعض لاتخافين

مثل مگال شاهر اصلا حرامات ينحسبون على الزلم فان حظهم مكيفين جاعدين يحجون بسالفة حتى بين النسوان عيب تتسولف ما عاد بنص الزلم

.. ظليت على گعدتي ورجعنا نسمع

شاهر.. ههههه استغفر الله من صدك سالفتكم تصحك
الهين وبس ما عدت اتحمل هالمهزلة
يابة شنو معتدي على حرمتكم وجاين تريدون استر عليها
ما غلطان ولابية ذرة غلط
بنتكم عاشت سنتين هين وتعرف قوانين البيت وبيوم الصعدت لا سمعت حس الماي مثل ما گالت ولا اكو اي حس
لو حريصة وخايفة على حالها جان قفلت الباب  موتدري عرس ناس طابين طالعين

اركان... مو صح ايات گالت شاهر بقى واكف جدامي  والدليل ظالة تصرخ من الخوف

....هالألاعيب ماتمشي علية
وهساع احجيها جدامكم زواج من بنتكم ماكو
الي تجذب وتألف وسترها رخيص عدها مااتشرف اخليها على ذمتي وتصير من اهل بيتي

نجوى.... صار صياح قوي جفلنا عززززا يمكن تكاونو

اركان.... بسيطة شاهر جتلك على ايدي وگول اركان گال والكل هين اشهدو على كلامي

الشيخ.... اررررركان ششششاهر بالحرام اذا مابطلتو  زكح هالنوبة احسابكم وياي
خلي يصير عدكم احترام للجاعدين وياكم

.  عجل ما سمعتو شحجة جاعد يهين شرفنا وتريدنا نظل ساكتين

شاهر... لو شرفكم يهمكم ماجان گعدتو هالگعدة

الشيخ.. وتالي
ابو ايات.. من رخصة الموجودين عندي سالفة ويا شاهر أريد نحجي الحالنة

الشيخ.. اخذو راحتكم وحلو الموضوع بالتفاهم الشغلة مو مستاهلة كل هالطلابة

فيروز... كمت من الگاع هاي شنو شيريد يگولو عليش طلعوا برا

امنة... ياخبر هساع بفلوس بعدين يصير بلاش لاتخافين شاهر مايفكر بغيرج

نجوى... بابا وابو ايات گعدوا بالحديقة

جدة المسكينة متربعة ومخلية ايدها على راسها
نعيمة...عمت عينج نعيمة راح يضيع وليدج
وينك سعد تعال دحج حال وليدك

أصيل... يمة شبلاج بيش طالبتو جاعد تنعين وتنودين علية

... لابيها ولا عليها يومية راكبة براسو سالفة ماعولنة خلصنا من مشاكل اهل عمران وعمامو
انوبة طلعوا اهل الماتتسمى ايات

.... ان شاء الله ماكو شي هساع تنحل السالفة ويرجع الوضع طبيعي

.. الله يسمع من ثمج اهجس گلبي رلح يخلص من الطلايب

نجوى... بالنص ساعة هما گاعدين بالحديقة والشيخ هم طلع يمهم
شگاعد يصير ماندري
فيروز وجدة انتهن من الخوف
وأخيراً كامو فاتو جوة
رجعنا نتسمع انصدمنا صدمة عمرنا من سمع كلام ابو أيات

گال
احنا اهل وان شاء الله نظل اهل
السالفة نحلت شاهر راح يسكت حلوك الناس ويعقد على خيتكم ويجيبها الهين
طلبها واني انطيتها

فيروز... ههه سمعتو شگال راح يزوجها موو يولو جاوبو عليش صافنين
اني بحلم لو علم السمعتو صح موووو
شاهر راح يزوج علية

أصيل... ردت احضنها تا تهدي اشرتلي اكف تركتني وصعدت
رحت وراها ما اكدر اتركها الحالها

.... ماما بروح ابوج تركيني الحالي لاتخافين مايصير بية شي

... شلون اعوفج وانتي بهالحال
لاتخافين بالحرام اهد البيت اذا صدك سواها

...دام حجاها جدام الزلم راح يسويها
تركيني الله عليج

... تركتها وحدرت غادسة نار بس اريدهم يروحون واشوف شاهر

نجوى... اخو ايات من سمع گال من الأصول تجيب مشية وتجي تطلبها تا كل الناس تعرف

ابو ايات... وليدي مايحتاج راح نعتبر هاي مشية بوجود الشيخ  والعمام

بابا ساكت مايحجي شي بالگوة اخوانها اقتنعوا وقروأ الفاتحة

لهساع مو مستوعبين الصار
راحوا الخاطر  بابا ظل گاعد ويا ازواج عماتي وبابا نافع بعدين اجة

أصيل.. اي خوية انگول مبروك ونهلهل لو شنو

شاهر... وين فيروز
.. وبثقة جاعد تسأل على فيروز بالحرام شاهر اذا اتزوجت عليها اظفرها ما اخليك تگضبو

... ول يرحم يرحم اهلج كافي مو وكت هالحجي

... عجل شوكت وكتو من تجي الحية الهين من تكسر بنتي وتذلها وين راح حجيك بكلمتين جرو بوشك وقشمروك

... أصييييبل ضبي لسانج ولاتعلين حسج لو غيرج الحاجية هالحجي بالحرام ادوس على راسها

نافع... اصيل ماكو داعي الهذا الكلام خلي نگعد ونتفاهم

.. على شنو نتفاهم على طيحان حظ بنتي وكسرة گلبها عود انت ابوها سندها لازم انت التحجي هالحجي مو اني لازم تكف ادفعلها  مو تسكتني

... اصييييييل اذا ما سسسكتي تشوفين مني شي ميعجبج

نجوى.. بابا نافع گضب ماما من ايدها وجرها من جدام بابا اخذها للغرفة
بابا تركنا نضرب اخماس بأسداس وصعد فوك

فيروز....مرجية ظهري على تاج الجرباية ومخلية مخدة على بطني ومجتفة ايدي غرگانة بهمي دموعي تجري
مدري منين جايني هالهدوء رغم مابداخلي بركان
متعجبة على حالي شعجب گاعدة وماهديت البيت فوك رؤوسهم

فات شاهر ظليت على نفس وضعي اجة گعد جدامي راد يگضب ايدي عتيتها منو بقوة

شاهر... ياريت تظلين بنفس هذا الهدوء والفقر بين ما افهمج السالفة من الأول للأخير

... لاتعب حالك اعرفها انجبرت انحطيت بموقف صعب خجلت ترد الزلم والشيخ
اكيد راح اظل اني رقم واحد بحياتك وماكو اهم مني وايات مجبور عليها  وهي حتى لو تجي متأخذ مكاني بگلبك هه مو هذا الجنت راح اتكولو اعرفو فلا اتعب حالك وترجع تعيدو

... لا مو هذا ول يابة سمعيني بالأول عليش جاعد تحجين وتقررين الحالج

... الحجي الوحيد بينا هو الطلاگ بيوم الي تصير أيات على ذمتك نفس الحزة اطلگني واذا رفضت ورب العزة شاهر جدام عينك احرك حالي واموت مثل موتت حرمتك الأولى

.... انجعمي لاتخليني اضربج جف على ثمج
خبال ما اريد جاعد اكولج سمعيني لاتظلين تخبطين وتخربطين بالحجي

هذا يا زواج الجاعد تحجين عنو من كل عقلج اخلي هاي الس.... على ذمتي وتصير وحدة من اهل بيتي

... هههه اگولك شنو جاهلة الجدامك وگاعد تقشمرني ترى سمعت كلشي دار بينكم مو بس اني كلنا سمعنا

... اي صح السمعتو ومجاعد انكرو بس الحجي الأصلي مو هذا

   هااا اي بله وشنو هو الكلام الأصلي

... يولي مو گوتلح ابوها طلي لا والله وديوث بعد ماعندو غيرة على. عرضو وللنسوان شيقرن برأسو ينفذ

اخذني برا ظل يتوسل بية تا اعقد عليها من دحج مابية أمل گال
.
ايات الي تريدو تنلم السالفة واخوانها يسكتون تا ماتصير عداوة

سمعني عدل ولاتفهمني غلط اني اب وخايف على ولدي لايضيعون مني وبنفس الحزة خايف على بنتي لايظل الصار وصمة عار تلحگها
الي طالبو منك تجي ايات هالسنة تظل هين وجدام اخوانها والناس گول انت عقدت عليها ومن تخلص السنة گولو صار خلاف بينكم ونفصلتو

.... هههههههه شلون فلم هندي اي واني الثولة لازم اصدك مو

... مو شاهر الي يسوي افلام
بالحرام الحرم هذا الگالو ابوها مامزيد ولا منقص بكلمة

.... لاتخبلني وين صايرة هالمهزلة

... يگول مثل ماظلت هذيج السنتين خلي تظل هالسنة هم
بس الفرق راح انگول جدام الناس انت عاقد عليها

.... فرضاً صدكت يعني هم راح أسمك جدام الناس يرتبط بيها وتنحسب عليك حرمة

....مايهموني الناس المهم حالي اعرف بنفسي اني شنو وما اخلي هاي الخيسة تصير على ذمتي

.... مامصدكة ولا راح اصدك
... وداعتج هذا الجرى والصار

... لا تحلف بوداعتي
. هههههه ماشي ما احلف
.. خلى ايدة على بطني وگال

.. وداعة هاي الروح البداخلج وداعة بنيتي الوحيدة صادك بكل كلمة حجيتها
هساع اقتنعتي لو لا

.... بجيت بغصة انهاريت ما اكدر شاهر ما اريد اشوفها هين
ايات وحرمة ابوها وراهن لعبة اكبر من هاي عليش فكرن هالتفكير ويريدن بس ترجع الهين

... شتگدر تسوي اي لعبة منها هي وابوها الطلي يتخزون
اطمئني ولاتغثين حالج مايصير شي لاتخافين

نجوى... من صعد بابا عمو عمر گال شاهر من طلعوا گاللنة ابوها العار سوة هالفلم حتى يسكت ولدو لا اكو زواج ولا شي راح تجي تظل هين سنة وترجع الأهلها بس جدام الناس واخوانها يگولون عقد عليها
ول يابة راح اتخبل عقل ماظل براسي اكو اب يرخص بنتو هيج

نعيمة... راضين المهم تنسد ااسالفة كفيلكم الله افادي ورم من الطلايب على حزة أگع واموت

... عمرج طويل

امنة... الأب وبنتو الحرگ قليل بحقهم شو ذولة زايحين المستحى وماعدهم ذرة شرف

نعيمة... يمة الدنيا تغيرت والناس تبدلت ما عادت مثل الأول

اصيل.. نافع فهمني السالفة بس الهساع گلبي مامرتاح ايات تخوف والله يحمينا من مكايدها وشرها صدك لو گالو بالوجه مرآيا وبالگفة سلايا

فيروز... شاهر طلب من نجوى تترك الغرفة الجوة الأيات وتاخذ غرفة فوك ما يريدها تختلط بيها

ابو ايات النذل مفهم ولدو عود شاهر رايح البغداد وگاطعين مهر
استغربت على قابلية الجذب العندو
بعدها طلب من شاهر  يجي ويا جدة وخواتو ياخذون ايات عود منظر جدام الناس

شاهر رفض گال ماتحرك منا الهين
مثل ماعرفتو تخططون الكلشي الگولكم خطة وجيبوها
ابوها يتوسل وشاهر قافل تالي جدة گالت اني وخواتك احلام وابتسام نروح نجيبها

كلشي گاعد يصير على اعصابي منا تعب الحمل والنساوة ومنا قهر گلبي
ولوعتو
گرابتنا من سمعوا ماستغربو لان يدرون الفضيحة السوتها ايات مايلمها غير الزواج

حسيت على بوسات شاهرعلى وجهي فكيت عيني
... صباح الخير يبعد العافية
.. صباح النور. صديت راسي وانطيتو ظهري
حضني وخلى راسو برگبتي.

.. عليش ضايجة وغاثة حالج
... لا سلامتك يمعود اصلآ شكو تا اغث حالي
اليوم زلمتي جدام الناس راح تجي عروستو
عادي مابيها شي

... هاي انتي گولتيها جدام الناس وبس
قابل صدك مجوزها

... حتى لو ما عاقد عليها مگاعد اكدر اتحمل راح اطك واموت من القهر شلون اتحمل سنة كاملة اگابلها.

...اعتبريها مو موجودة حالها حال غراض البيت
نبهت على الكل ما يختلطون بيها بلجي تحس على حالها وتولي من هين

... اووووف
.. فيروز ما مرتاح بعمري الفات
بگد راحتي وياج
السعادة عرفتها بوجودج
راحتي أنتي
عافيتي انتي
الضحكة التطلع من ثمي  بسببج رديت اردود العمرالعشرين من صرتي بحضني
حياتي خلصتها شغل وتعب وضيم مصايب تجيني من كل ناحية  صبرت وتحملت وتالي صبري أنتي
طفلة زغيرة ربت على أيدي شلتها وهي بالگماط الله زرع حبها بگلبي وصارت تصعد وتنزل ويا النفس

كبرتي شوية مليتي علينا البيت  جنت من أرد من الشغل الگيج واكفة بالباب تاتلگيني
إخذج الحضني وتگعدين تسولفين بحجيج المكسر  تشكيلي اذا احد ضوجج

كبرتي اكثر زادت وكاحتج 
كل فاينة تسويها شكبرها  ومن تريدين تختلين مكانج ورة ظهري لان متأكدة شاهر الدرع اليحميج

بين يوم وليلة تحول حبي الج من أب البنتو
الحب رجال لبنية كاملة والكمال لله
لا موبس حبيتج عشگتج دخت بتفاصيلج
ومثل ما ربيتج هساع راح اربي جاهلي منج
وهاي اذا الله كتبلي عمر

فيروزتي بعد بيتي وعافيتي البيني وبينج بنيان عالي وأساسو قوي شما مرت علية ريح وعواصف ماتكدر تهدو بسهولة

تدرين بنيتي شنو الشي الوحيد الي يخوفني من يمشي بينا العمر خاف يجي يوم تتندمين على هالحب وعلى فرق العمر البيني وبينج

... بسرعة صديت علية خليت ايدي على حلگو سكتو.
هساع انت گولتها البينا بنيان اساسو قوي
ماكو شي اسمو ندم بقاموسي ماكو شي اسمو فرق عمر

اتندم لو ماحابتك
اتندم لو ما ماخذتك
اتندم لوما دمي مختلط بدمك وشايلة بذرة منك

شاهر دنيتي ضواها انت بلياك نهاري ليل والسواد مخيم علية
بعدين تعال هين ابو فرق العمر دحج حالك شباب اكثر مني ادري من غيرتي وضيمي اني اعجز گبلك لوبيك شي ينعاب ماجان عديمة الشرف تصلخت جدامك

حضني قوي وهو يضحك
باسني من شفايفي
طول بالبوسة باللحظة الأكون ويا انسى اكبر هم عندي شاهر
عافيتي وضحكتي وراحتي اذا اخسرو معناها خسرت حياتي

عامر اخذ جدة وخالاتي وراحو تا يجيبون مگصوفة الرگبة أيات

شاهر ورة الظهر طلع ويا بابا
اني ظليت بالغرفة 

نجوى... انصدمنا بجيت عمات ايات وبنواتهن ونسوان عمامها وخالاتها
البيت امتلى هاي شگاعد يصير

عمتها گالت عرفنا هساع تجي العروس جينا نستقبلها
عجل عليش ماكو احد من گرابتكم هين

امنة... مو تدرون مانسوي عرس

... اي بس لأزم الناس تجي ايات لهساعها بنية ميصير تجيبوها بسكوت

اصيل... احتارينا بيهم فيروز اذا شافتهم تتخبل ظليت عين عليهم وعين على الدرج
مهمها جان ذولة ضيوفنا بسرعة خابرنا شاهر تا يدز مسواك

ورة شوي جوي الفيلق الثاني
ايات وامها وحرمة ابوها وخواتها ونسوان اخوانها
والجتلني لابسة ثوب ابيض مال مناسبات ومبينا رايحة صالون
والنسوان من شافنها خبصن البيت بالهلاهل
مانعرف شلون نسكتهن

امنة... ابتسام شجاعد يصير هين

... اسكتي وخليها مگصوفة العمر مصدگة حالها والبارحة أهلها عامليلها حنة ودك ورگص
والقهر اخوها ضايج يگول عليش ما شاهر هو اجة تا ياخذها
ابوها العار جاوبو شاهر خابرني استأذن مني ماكدر يجي لان مضيع هويتو

اصيل... يولي بنيتي اذا حدرت ولجحتهم اطك بقهرها

نجوى... رايحة يمها تا اشغلها وما اخليها تنزل
صعدت لكيت فيروز تفتر وتعض بصبعها

... جيت وكقت جدام نجوى شنو هاي الهوسة والهلاهل جابوا العار مو

... هااا اي جتي
... ومصدگة حالها وهلاهل وهوسة

... اهدي يولي قابل صدك خلي شتسوي تسوي
... ششلون اهدء  گاعد اموت من القهر گلبي مو متحمل

.. اسم الله عليج تروحلج فدوة
... جيت نجضعت اريد اهدء نجوى گعدت شوي بعدين حدرت
وره المغرب ماكدرت اتحمل رجعت افتر بالغرفة  مثل الخبلة لا معد اكدر اتحمل
حسهم وضحكهم
عدلت حالي طوخت عيوني بالكحل تا مايبين علية البجي
جريت نفس وحدرت جوة

بعدني على الدرج صارت نجوى جدامي.

... عليش حدرتي يولي رجعي ولاتعكرين مزاجج بشوفتهم

... هه على اساس هساع شلونو مزاجي
ول يرحم اهلج تركيني
تركتها وطبيت للربعة الحبايب مجتمعات وبنصهم گاعدة العروس
وكفت جدامهم كلهن صدن علية.

ام ايات... هلا يمة شلونج عليش واكفة هين فوتي

.  هلا بيج عيني
أكيد افوت هو مخصوص جيت أبارك الأم الحمامات

.. عيب بنتي شنو هالحجي مامقبولة منج

... ههههه غثتكم الكلمة قابل مجذبة بنتج مو عرت حالها تا يفوت عليها وتتكربس براسو

ايات... الزمي حدود مجاعد اجاوبج حترام للموجودين

... صلوات على النبي. هاي منو الگاعد تحجي بالأحترام  ليش المثلج هم يعرفون الأحترام

احلام... بنتي گصري الشر وامشي

... لا.والله ما افوت والبيها زود تجاوبني

منال. ضبي لسانج مو دحجتينا ساكتين عبالج خايفين منج لاتخلينا نحجي شي مايعجبج

... هاي منو الحجت حية التبن الأخرى
يولي لا انتي ولا هاي الس.. ماتهزون شعرة من راسي

نعيمة. فاينة الحظ ول كافي

ام ايات... نعيمة بنتكم زودتها ماخلت احترام النة

.. گاعد تحجين بالأحترام وانتي تربية ماعرفتي تربين بنتج
مرخصة حالها وتعرض بجسمها للزلم
اذا هلكد مفلفة على الزواج جان حجيتي بلا هالفلم الاباحي جنا راح نتلحگج وندوراج زلمة

ايات بدموع اني اشرف من الشرف انگص لسان اليعيب تربيتي الصار مو ذنبي

منال. يولي لاتبجين هي ادحج حالها مفلفة وما صدكت تجوزت عبالها الكل مثلها

... ههههههه صدك ضحكتيني ليش يمة خشيت بالعمرين لو نزعت اهدومي وخليتو يفوت علية وتورط بية
شگولتي الحالج من تصلختي جدامو هساع لو بيج شوفة جان بيها مجال سبحان الله لا خلقة والا اخلاق خلف الله على المكياج ساتر عليج

نجوى. كبت العيطة والصياح صار بفلس ماما وعماتي يسكتن بفيروز ماكو فايدة

    ايات تبجي گامت تركض تريد تروح للغرفة فيروز اعترضت طريقها وگضبتها من شعرها
تعجبت ايات ابد مارفعت ايدها ودافعت عن حالها بس تحاول تفك شعرها من ايد فيروز

النسوان گامن تا يفكن بينهن

فيروز... بنت الكلب انتي الجنيتي على حالج والله لسود عيشتج واخليج تنعلين الساعة الطبيتي بيها هين

گاضبتها من شعرها ملختها ماما وخالاتي يجرت بية
اخير شي جتني دفعة قوية من منال
اختل توازي ووگعت على ظهري بالگاع
من الوجع اهجس ظهري انكسر بالنص......

يتبع