_وشاء الحب_
( بقلم بسمة البياتي)
_البارت السادس و العشرون _
ثاني يوم وكت رجعة الطلاب من المدرسة اني وماما بالمطبخ
فاتت رغد تركض وتصرخ
دحجنا ردانات قميصها كلهن دم
اصيل... بسم الله يولي بس سكتي منو ضربج وششششنو هالدم
رغد..... مو مني ماما نجوى
فيروز... گلبي يريد يوگف گضبتها قوي وصرخت احجي شششبيها نجوى
.... هذا دمها نجوى اندعمت
...ماما صرخت وطلعت تركض
لحكتها وصلنا للباب فات صلاح ابن عم شاهر منعنا نطلع
.... اگفووو وين رايحات مابيها شي الولد اخذوها للمشتسفى وخابرنا شاهر راحلها
أصيل... مابقى بيه حيل گعدت الطم
احجي الصدك بنيتي شبيها من الصبح گلبي مامرتاح
بداعة جهالك گولي شصار بنجوى
.... يولي والله عايشة بس شوية جسمها متأذي من الضربة الحمدلله ولدنا يم الشارع وشايفينها من اندعمت تلاحگوها واخذوها للمستشفى
فيروز...فرفحنا عليها نريد نطلع مايخلينا جت جدة والجيران كلهم التموا
اذا يصيبها شي بالحرام اموت
خالاتي والگرايب من سمعو جوي
أصيل... ما أكدر اظل هين اخذوني الها
احلام... كومي اني هم اجي وياج
فيروز... جدة وماما وخالاتي كلهن راحن
ردت اروح ماقبلوا
ظليت ويا البنوات ياهو الأخابرة يگول مابيها شي
بس شيطمن گلبي اذا ما ادحجها بعيني ما أرتاح
عالية... رغد سولفيلنا شلون اندعمت
.... السايق صارلوا يومين ما يجي علينا.
من حلينا نجوى واكفة تنتظرني
رجعنا اني وياها وصلنا للشارع
السيارات قريبات نجوى مدري شبلاها رادت تعبر بسرعة
مشينا سريع
جان تجي السيارة
نجوى دفعتني تا ما تدعمني والضربة جت بيها
لو ادحجوها شلون طارت ووگعت بالگاع الحد هساع حس الضربة بأذني
.فيروز..حضنت رغد وبجينا اثنينا معناتو نجوى متأذية جثير مو ضربة عادية
أصيل... اخذنا صلاح للمستشفى
طبينا ندورلهم لجحنا الولد كلهم اهناك
ركضت گضبت شاهر
خوية بنتي وين شششبيها بروح ابوك لاتگولي صايبها مكروه ماتحمل بالحرام ما اتحمل
شاهر... خيتي داعيلها رجلها مكسورة والعظم طالع دخلوها عملية
... لطمت على خدودي سودة علية
بنيتي بية الوجع ولا بيج
نافع... ليش جبتوها وجيتوا ماتشوفون المستشفى مگلوبة
نعيمة... شلون تريدنا نظل وگلوبنا غادية عطاب من الخوف عليها
... اخذوني گعدنا على جهة ننتظر جتي جدتها وجدها وخالها
جدتها گضبت شاهر وتزگح
اي شي يصيرها انت المسؤول
منا شاهر متخل على بنيتو ومنا هاي خبصت الأمة
شاهر گال الأبنها اخذ امك من هين گبل لا أحرك الأخضر واليابس احنا بيا حال وأمك جاعد ادور كونة
ابنها وزلمتها اخذوها وگعدو بعيد
طلعت نجوى من العملية خالين بلاتين الرجلها
حالتها بالضيم ايدها هم مكسورة ومجبسينها من غير الرضوص البجسمها
الولد الشايفين الحادث. يحلفون يگولون الله رحم بحالها وطلعها سلامات على الضربة النضربتها گلنا ماتعيش
الرجال الداعمها گاضبينو الشرطة
الزلمة والناس الحاضرين وكت الحادث گالوا نجوى رادت تعبر سريع رغم سبارات اكو
والسايق من واصل يمها مگادر يخفف السرعة ويگف
شاهر گال دام بنتي طلعت منها سلامات ما اشتكي علية
راح تنازل عن الزلمة وطلعوا
طبيت على نجوى تا اشوفها سودة علية شغادي حالها جسمها ملفلف تلفلف ومنومينها بالمسكنات
من الهبطة والخوف والقهر ما ظل بية حيل لشتي الهساع ترجف
فيروز... للعصر جوي جدة وخالة احلام
وبابا من المستشفى
من حجولي عن حالها شبعت بجي
كون روحي ترفرف وتروحلها محد يقبل يأخذني الها
احلام... يمة دحجتي سوالف جدتها الناس بيا حال وهي جاية هدادة وتريدلها زلة على شاهر
... فان حظها وحظ زلمتها وولدها شايشة على العالم ومحد يگدر يحجي وياها من يوم يومها وكحة
... اقبال الله يرحمها و نجوى ما طالعات عليها فقيرات
فيروز...عجل الولد وينهم اريد احد ياخذني اشوفها
.... يولي گعدي وين تروحين هساع حجيت ويا ابتسام راح تقنع أصيل ترجع لان من الخوف وضعها تعبان وبلجي يقنعونشاهر هم يرد
عامر اخذ عالية تا تظل ويا ابتسام اهناك
... قادر وينو خلي هو يوديني
.. بعدوا ويا شاهر بالمستشفى
بنيتي ظلي هين زلمتج هساع يرد تعبان
ومن الصبح ما ماكل شي ظلي يمو داري وخففي عنو
... سكتت ظليت كل شوي اتصل ويطمنوني
لليل يلا رجعوا
شاهر وماما وقادر
وجوهم تعبانة بالگوة واكفين على حيلهم
ماما الهساع تبجي خالة احلام ظلت تحجي عليها وسكتتها
شاهر تعبان صعد فوك
جيت للغرفة ماموجود بالحمام
نزلت صبيت اكلت وصعدتة
لكيتوا طالع من الحمام مبدل ومجضوع على الجرباية صافن والجگارة بيدو
خلبت الأكل على الميز وجيت بسدو
طفى الجگارة ودحج علية
.. لو صايبها شي شجان سويت الهساع منظر رجلها جدامي وحس بجيها ووجعها يضربن بگلبي
... خليت ايدي على وجهي وبجيت
لو صايبها شي اني الأموت
... الحمدلله على كل حال لاتبجين المهم هساع هي بخير
.... حضنتة وظليت أبجي عود اني جيت اشجعو واواسي تالي گعد هو يواسبني
وره وين يلا خليتو يأكل شوي
جبرني اتعشى ويا يدري بية على ريوك الصبح
ثاني يوم گعد من الصبح تا يروح المستشفى
جبلت بي ابجي واتوسل
تا ياخذني اشوفها بالبداية عاند ماقبل
من دحجني مفرفحة من البجي گال يلا امشي
رحت للمستشفى وشفت اختي وصديقتي وتوأم روحي حالتها تصعب على الكافر
من يزول مفعول المسكن تظل تلوب من الوجع
اريد احضنها اريد ابوسها ما اكدر اخاف تتأذى من الرضوض البيها
الدكتور ماقبل تطلع گال لأزم تبقى اليوم هم
ردت ابات يمها شاهر ما قبل
ثلاث ايام ظلت بالمستشفى باليوم الرابع يلا طلعوها
لاتكدر تمشي واقل حركة تتوجع من غير ايدها المجبسينها
شاهر وبابا جابوا ذبايح ذبحوا على سلامتها
اخذناها للغرفة متحسسة من وضعها وتبجي حتى الحمام ماتقبل تفوتو لأن لأزم نساعدها بالگومة والگعدة
نجوى... طلعنا من المدرسة وكفت انتظر رغد تجي تا نرجع
من بعيد لجحت سيارة عمران
متت بدمي شراح يوصلني للبيت ما ادري
جت رغد گضبت ايدها وامشي سربع من بين الطالبات
... راح اكع شبيج مستعجلة خلي نمشي يواش تعبت
.. انجعمي امشي وانتي ساكتة تا نصل للبيت بسرعة
نريد نعبر الشارع سيارة عمران جت من بعيد
من خوفي ما افكر عدل كل الي يدور براسي هساع بس يصل يمي يصعدني بسيارتو غصب ويأخذني
مانتبهت على السيارات جريت رغد وعبرت من دك الهورن صديت سيارة جت سريع تصنمت من الخوف كل الگدرت افكر بي بهالحزة هي رغد دفعتها من جدام السيارة والضربة جت بية
اهجس انشاليت وانرگعت بالگاع
وجع بكل مكان بجسمي واكثر شي برجلي
بدت عيوني تغوش اسمع حس رغد تبجي وتهز بية وحس ناس جثير بعدها غبت عن الوعي
من صحيت لكيت حالي بالمستشفى
بداخلي عاتبت ربي عليش ماموتني وخلصني من عيشتي
طلعت من المستشفى حالتي بس الله يعلم بيها لا أكدر اتحرك ولا اكدر اعين حالي
استخطيت نفسي وانقهرت عليها
فيروز...انتي اكبر جذابة وحقيرة تدرين لو لا
... هاا ليش يولي
... دوم اتكولين اني وفيروز روح وحدة ماكو فرق بينا
بس هساع ثبتي العكس
... مگاعد افهم شبلاج ليش هالكلام
.. عليش ماتقبلين اهتم بيج وأساعدج هاي لو اني بمكانج تتركيني
... أسم الله عليج بعيد الشر عنج
لا طبعآ شلون اعوفج
.... عجل هذا الگاعد تسوينو شنو اسمو
حمام ماترضين تروحين لا اني ولا ماما تقبلين نأخذج
ترى ما نظل وياج بس ناخذج ونطلع
الحمدلله ايدج الثانية مابيها شي
.... فيروزة والنبي كارهة حالي لشوكت راح اظل هيج مصارلي يوم وضجت
... ميخالف شدة وتزول يولي المهم انتي بخير
الله عليج دحجي حال ماما وابوج وجدة وحتى قادر
الزاد بالگوة يخلونة بحلوگهم
ومن يشوفونج بهذا الوضع ينقهرون بالزايد
... شتريدين اسوي؟!
... شگولج لا تكولين لا وشنطيج تاخذين اكل حليب فواكه وتخليني أساعدج بالگومة والگعدة
.... ههههههه ماشي امرج حرمة ابوي بعد عندج اوامر اخرى
... فدوة الهالضحكة لا هساع تمام من اذكر بعد اكولج
حرمة أبوج راح تظل على گلبج بعد ما اصعد فوك الحد ما اطيبين
وبقت يمج تلتزمين بالعلاج واطيبين بسرعة لو تستختين وتشلعين گلبي
..... هاي شنو وشعندج تظلين هين
بس وكت الأحتاجج اكولج
... ماكو ابد على گلبج والله
يولي هو أبوج شمستفاد مني شو حالنة حال الأخوان
... جتلتي حالج علية وهو خبص الدنيا بغيرتو تالي هذا وضعكم
... من سكتنا فاتت آيات للغرفة
تعابير وجها مدري شلونهم يمكن سامعة شي
طلعت من غرفة نجوى الربعة جدامي
محد بيها بس قادر مجضوع من شافني گعد واشرلي
جيت گعدت قريب منو
... شلونها
.. الحمدلله احسن
... قبلت تساعدونها لو لساعها معاندة
... بنت شاهر شلت حالي يلا رضت راسها يابس مثل ابوها
... ههههه ادري
ديربالج عليها وانطيها العلاج بوكتو واي شي تحتاج بس دزيلي رسالة اني اجيبو الها
... اووويلي على الحب
انت هم ارتاح وجهك تعبان
... كل التعب يهون المهم هي بخير
لوبيدي اشيل الوجع بدالها
...هالكثر تحبها
سكت مجاوبني وتحسر
الله يجعلها من نصيبك انت طيب وماكو منك وهي فقيرة وبلسم على الجرح
... كلشي قسمة المهم هي مرتاحة وبخير هالشي كافيني
... فاتت آيات مدري شبلاها اليوم تفتر ورأية ونظرتها تبخ حقارة
... عليش هيج ادحج علينا
... مدري
... شوكت تروح وتفضها بالحرام ولا اخذ راحتي من اجي هين
... الظاهر راح تحمض على گلوبنا
فات شاهر سآلني على نجوى گوتلو نامت
كال عجل اني هم رايح انام شوي
صعدت وره بعدو گاعد وبيدو التلفون يخابر
جيت گعدت على رجلو
دحج علية وابتسم كمل حجي وسدو
... شو جاعد تتحارشين يولو
.. عاا بيمن متحارشة شو گاعدة وساكتة
حضني من خصري
... هاي حركاتج جاعد تشعل شيب أهلي
... طوقت رگبتو بيدي
ترى والله فقيرة وهاي حركاتي مو جديدة
.... گبل شي وهساع شي ثاني اقل حركة منج بقصد او بدون قصد تأثر بية
..... يمعود شبلاك طيرت الكلام الجنت اريد اكولو الك
... اي بنيتي تفضلي گولي
.... شهوري حبيبي
مامكملة الجملة جرني من اذني
.... انعل ساس اهلج شهوري شنو نعلتي ابو الأسم رجال شكبرني وشگدي تصيحني شهوري بالحرام اذا احد سمع اتخزى
... هههههههه غير حرمتك واريد ادلعك بعدين منو اكو هين محد يسمعني
... ول يرحم اهلج لاتعيدينو
سوة عندي جالي هالدلع
.... ماشي شوهير على گولت جدة بعد ما ادلعك
كفخني على كيف
... الله موگعني بثم شلون اثنين نعيمة وفيروز
.... لا قصدك نعامة وفيوز
... يولي مو راح ابتلي بيج نعامة شنو عيب بنيتي هالكلام اذا انعاد احاسبج
... اشكد ظالم يعني ما علقت على دلعي بس على دلع نعومة
عادي عندك تصيحني فيوز
... اذا تجين للحگ ماتنلام بيج نوبات صدك تصيرين فيوز.
.... زعلت ردت اكوم ظل محاوط خصري ويضحك
.... هههههه حتى فيوزاتج عسل على گلبي
شردتي تگوليلي گبل شوي
... راح اظل يم نجوى ما اصعد هين الحد ما اطيب وتكدر تگف على حيلها
.... على هالحسبة راح اطولين
... اي ما اكدر اعوفها اخاف تحتاج شي باليل
... الله يحبني ويحب نجوى انطاج النة
.... شعندي غيركم
هاا احجي ويا جدة لان ادري بيها راح تسود عيشتي
.... معليج بيها تركيها عليه
... خلى راسة برگبتي وباسني يواش
وهاي اول نوبة يبوسني منا
ظل دافن رأسة بيها وحجة.
... من يخلص علاج نجوى وتكوملنة بالسلامة وترجعين
اريد يتغير حالنة
... هاا شلون يعني
... اريد يصيرلنة اخ لو اخت النجوى
. ...خجلت ونبلع لساني
هاا يلا خلي اشوف نجوى خما محتاجة شي
... ههههههههه ماشي يبعد شاهر روحي
..... حدرت اركض شاهر صاير وكح
نجوى... بديت اتعود على وضعي والحمد لله فيروز ماتاركتني واني ما اقبل احد بساعدني غيرها وغير ماما
ورة جم يوم جوي جدي وجدتي
جانوا زعلانين ويا بابا من يوم المستشفى
گاعدة بالربعة وفاتو والمصيبة العار عمران وياهم
خالاتي وخوالي هم جايين
جدة گعدت تبوس بية كلامها مدري شلونو كولو بسامير البابا
.. سودة علية جان خسرتج مثل ما خسرت امج
نعيمة.. الحمدلله گامت بسلامة بعد عليش هالحجي.
... الظاهر انتوا هاملينها وابوها اخذ وحدة بگدها ومتونس وناسي بنيتو حتى سيارة مايصخي يأجرلها
شاهر... واكفة بعيني جثير شغلات ما اكدر ارد عليج
اولهن گعدتج ابيتي عيب علية اقلل من احترام ضيوفي وبالمقابل الضيف لأزم يكعد بحترامو
.... الجو تكهرب رادت تجاوب خوالي سكتوها وغيروا الموضوع
بس جدة ماتگدر تسكت
كالت اريد اخذ نجوى عندي بعد ما أمن اخليها هين.
هه متأمن تخليني هين واني ابيتهم خسرت اغلى شي عندي تريد تاخذني وتخليني بحلگ الوحش
شاهر.. على اي اساس تأخذيها هذا بيتها واذا الها طلعة منو تطلع البيت زلمتها مو البيتج.
... اني جدتها والي حگ بيها دام انت هاملها تجي يمنا معززة مكرمة
... هههههه خالتي شبلاج شو حجيج مدري شلونو
الزلم ساكتين وانتي جاعد تقررين بكيفج سمعوني حسكم عليش ساكتين
دحجي ام عمار
حتى لو اموت ماتعيش عدكم امي اولة بيها
منكم وتا مانتخارب ونظل اهل سدي السيرة
ابو عمار.. حجيك عين العقل
اعذرنا وليدي احنا انحرمنا من اقبال من وكت ونريد تظل بنتها جدامنا.
واليوم جايين نخطبها العمران
... لعبت نفسي بودي اصرخ واملخ حالي ذولة شگاعد يحجون عندي استعداد انتحر وما اخذوا
شاهر.... بربك مقتنع بالكلام الجاعد تكولو
ام عمار... وشبي كلامو
نجوى ماتلكي احسن من ابن خالها.
...من اول ما گعدتو خبصتوني انت هاملها ومو خايف عليها. وهاي من ريحة المرحومة
وتالي تريدون تأخذوها الزلمة مجوز وتنزل على ضرة هو هذا خوفكم عليها
عمران.... من رخصتكم
واذا مجوز الحمد لله اكدر افتح ببت ثاني
وماراح اقصر وياها بشي وادللها والكل يدري حرمني ماتخلف من حقي اجوز عليها
.... اي يابة من حقك ومحد مانعك
بس اعذرني قسمتك مو هين لو تصوغها من جدمها الراسها بالذهب ما انطيها على ضرة
ويارت السالفة تنسد وماتحجون بيها
... بيت جدي تخبلو شلون يرفض عمران
تكاونو وطلعوا زعلانين
فيروز.... صارلي شهرين اهتم بنجوى
المسكينة راحت عليها هاي السنة الدراسية
ايدها تحسنت بس ظلت رجلها تحتاج تمارين وعلاج طبيعي يلا تكدر ادوس عليها
ايات صايرة صلفة عيني عينك تحوم ورة شاهر
خو اهتمامها بنفسها العروس مو مثلها واني مطحونة طحن من الغيرة
اذا راد شي اول وحدة هي اتكوم تسوي
ومن يجي تگابلو وتگعد
اطلع سوالف من جوة الگاع تا تحجي ويا
نوبات من كل عقلي اريد اطردها
ماما وشاهر يمنعوني
نجوى...صرت احسن من گبل اكدر اكوم وأكعد
خليت فيروز تصعد الغرفتها ما عدت احتاجها
وهي هالأيام وضعها متكهرب بسبب أيات
اليوم جتي عمة احلام طبت الغرفتي وگعدت جدامي
... شلونج بنيتي رجلج شلون صارت.
...الحمدلله جثير احسن من گبل.
.. يستاهل الحمد
عندي سالفة وياج بلجي عسى وعل تريحين افادي وتقبلين
... هاا اي گولي
.... بعدج ماتريدين قادر
.... اوووف ربي هساع شجاوبها.
... نجوى لو ما احبج ما ارجع احجي وياج يولي اتمناج تصيرين الو
بس گولي اي ادللج يولي
قادر، معاد زغير وادري بي عينو منج
واذا على الدراسة وعد تكملين هاا بنيتي شگلتي
.... افرك بيدي ومنصية راسي
بالگوة حابسة دموعي
گلبي اااخ يا گلبي ينزف من الوجع والقهر
... شو سكتي
... عمة لا تزعلين مني ما اريد اتزوج هساع
... هذا اخر كلام عندج
..هزيت راسي اي
...براحتج هذا زواج مو لعب محد يگدر يغصبج
اني جيت وسألتج گبل لا اروح امشيلو ما اكدر أظل مخلية أيدي على خدي واشوف العمر جاعد يمشي بي
... دحجت عليها گلبي عصرني يعني شنو قادر راح يخطب.....
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!