_وشاء الحب_
( بقلم بسمة البياتي)
_البارت الثلاثون _
كلام ايات لعب گلبي
شنو قصدها وعلى شنو ناوية
صعدت الغرفتي جيت هزيت شاهر من جتفوا
شاهر فتح عينو
شنو نايم
... لا يابة يانوم گاضب رأس الدبجة وجاعد العب جوبي
... ابد مو وكت شقاك افتح عينك عدل وصحصح عندي سالفة وياك
.... بنيتي تعاي نامي والصبح سولفيلي
... سحبني الحضنو. ورجع غمض
يمعود أسمعني هاي ايات مدري شگاعد تخطط
... هم ردينا السيرة أيات ول يابة شحجينا مو گلنا تحمليها لحد ما يردون اهلي ويخلونها تروح البيت عالية
.... گبل شوي سمعتها تحجي بالتلفون ويا مدري منو اتگول خربت الخطة جيت لگيت العگربة بالبيت
شاهر شال راسو من رگبتي ودحج علية
... منو العگربة
... أكيد تقصدني
... شلون بلوة هاي بنيتي حتى لو انتي المقصودة اذا واجهناها راح تنكر خما اتگول اي قصدتها خليها تروح من هين بدون مشاكل
... وشنو الفايدة تظل عشر تيام ( أيام) يم عالية ومن يرد زلمتها من الدوام ترجع هين هم تظل عشر تيام
... ماكو غير حل نتحملها هالشهرين بين ماتخلص وترد الأهلها
... ما اريدها تبقى راخ اموت من الغيرة.
تقبل اتگول علية عگربة
... تروحلج فدوة خلي توصل الحلاتج وهذا لسانج العسل هذاك الوكت عود خلي تحجي
.... ضميت راسي بصدرو
حبيبي الله عليك لاتحجي وياها واذا انطتك شي لاتأخذوا منها والمكان التگعد بي ايات لاتظل بي بين ما تولي روحة بلا ردة
... صار يبعد حبيبج تدللين
بروح ابوي ما ابدل اظفرج بالف وحدة مثلها
فيروزتي تارسة عيني وگلبي تعلعلت وعيني جافاها النوم والتفكير جتلني الحد ما حصلتج شلون تتصورين اكدر ابدلج بغير وحدة ناقص عقل اذا سويتها
....ااووف شكثر احبك لاتلومني اذا غرت عليك اهجسك ملكي خبي الك تعده حدود العقل هساع اني مجنونة بيك
... اعشگج يبعد العافية شايفة هذا حبج الي مايجي ذرة من الحب الشايلو بگلبي الج
.. كل ليلة يغمرني بحبو وحنانو سعادتي ويا ماكو كلمة توصفها واتمنى انظل هيج الحد اخر نفس بينا
ثاني يوم حدرنا جوة أيات ماموجودة
بالدوام
الظهر من رجعت عينها علينا تريد اطك لان شاهر حتى للشغل مايطلع
أيات... شعجب شاهر باقي بالبيت
... شنو شعجب غير ظال وياي خما يعوفني الحالي
.. هااا اي خوش يلا افوت انام شوي
.... مو طايقتها بودي املخها
العصر شاهر بدل تا يطلع
من كل عقلك تريد تتركني الحالي وياها من هساع أكولك اذا سمعت بيها بمستشفى الكسور لاتجي تلومني
....ههههههه انعل بليسج ول يابة عجل وين الانوثة ادري شمزوج فاندام
... رفعت حاجبي ليش عندك شك بأنوثتي عجل منو هذا الكل شوي يتغزل بية
باسني من رگبتي وگال
الله يكافئ العبد المؤمن بالجنة بحورية
واني كافئني بالدنيا گبل الأخرة انتي حوريتي بالدنيا
... حضنتة قوووي اغديلك سبع فدوات
هساع گولي شلون تتركني ويا الحية
. هساع تجي هبة يمكم ادري اذا تركتكم الحالكم يصير مكافش من الرؤوس
.... يوم المنى انتف عطوبها بس شسوي متحملة وساكتة الخاطرك
...هههههه يلا رايح اذا اظل منا الدقيقة جدامج ابطل ما اطلع واخذج للفراش
... لا يمعود اريد احدر انظف
.. ماشي يبعد عمري
... راح شاهر وره شوي جتي هبة
لتهيت وياها وويا بنتها
هبة... خابرونا كالوا باجر ان شاء الله يجون
.. اي ادري ماما گالتلي
لازم انظف البيت صارلي جم يوم ما منظفتو
ايات... اي غددددي واني اگول شنو هاي ريحة العفونة والخمخمة الوسخ والتراب ماكل البيت
هبة. ... ياريحة البيت مثل الوردة ونظيف. لا بي جاهل يوسخ ولا هوسة
... الي يفوت من برا يحس بيها البيت لأزم يومية يتنظف
.....ظلت تتجادل هي وهبة واني بالگوة گاضبة اعصابي
حجيت بدلع شسوي قابل بيدي ومانظفتو
شاهر مايقبل يتركني حتى للشغل ما يطلع يريدني ليل ونهار ويا بالغرفة بس وكت الي نجوع نروح نجيب أكل ونرجع
هبة...هههههه عامر گال خالي شاف البيت فارغ حب يستغل الفرصة ويسوي شهر عسل جديد
... هههههه اي صارلو جم يوم مامقصر منا الهين ما يقبل اتركو يريدني اظل بحضنو
هبة.... حگو يولي العندو هالخلقة وهالنزاكة بعد شيريد من الدنيا
الله يرزقكم بالوليد الصالح ان شاء الله
.... الله يسلمج حبيبتي يوم التخاوين حنونة
... ديلا دام نامت حنين خلي نگوم انظف
... شاهر كال باجر غدة الكل هين راح يجيب سمج مسگوف ومشاوي وباقي الطبخ اكيد عليج واني اساعدج ههههه
أيات. باجر جمعة ما عندي دوام اني اطبخ
هههههه شاهر شمستفاد منح كلشي ماتعرفين تسووين
.. دحجت عليها بطرف عيني هه لأتخافين مستفاد جثير وداعتج
وثاني شي شاهر ما ماخذ خدامة بس شغلها تكنس وتمسح وتطبخ
.... ماقصدت خدامة التتجوز لأزم تعرف كلشي خما تظل العمر كلة تجيب من المطعم لو الناس يطبخولها
.. مصيري اتعلم الطبخ مايردلو شي ودوم اگف اساعد ماما الشغلة مو صعبة
....اذا تريدين اغلمج شاهر جم نوبة اكل من طبخي وعجبو
.... تسلمين عيوني ماتقصرين احب اتعلم من ماما
ادري بشاهر مايستلذ بالأكل غير من ايدها ونوبات يجامل الناس ويگول طيب تا مايفشلهم
ايات الوجه انگلب هههههه
للمغرب يلا كملنا شغل
جوي شاهر وعامر متسوگين
كعدنا نعزل المسواك ونرتب المطبخ
وره العشا راحوا عامر وهبة گالوا باجر من الصبح نجي
هبة رادت تأخذ أيات وياها ما قبلت تروح لاطشة على گلوبنا
ثاني يوم گعدنا من الصبح
جتي هبة من وكت عجنت تا تخبز
وبلشنا بالتحضيرات
ايات تشتغل ويانة
بهدوء ساكتة ماتحجي شي
ساعة ١١ فاتو للبيت
ياربي شكثر مشتاگتلهم
أصيل... يولي عبالك صارلي دهر مفارگتج
شلونج خما ضجتي
... لا ماضجت بس مشتاگتلكم
سلمت على جدة وخالاتي
والبنات
اجة دور نجوى اوويلي شكثر شكلها ذبلان ظليت حاضنتها
نجوى... بعد ما اتحرك من هين بدونج اهجس حالي مضيعة شي بلياج
... ياعمري اتي ما اقبل بعد تعوفوني
.... دحجت ايات واكفة دغيت فيروز
يولي هاي شجابها
.... من أول بارحة جتي عود بعدين احجيلج
طبينا جوة اجة شاهر جايب الأكل
خلاهن بالمطبخ وفات سلم عليهم وبارك القادر
البيت مخبوص ماعندي مجال اخذ نجوى ونبقى الحالنة صبينا الأكل
تغدوا وشربوا جاي وراحوا لبيوتهم
خالة ابتسام ورنا وعالية گبل لايطلعن گضبني
... بشري يولي صار البالنة لو لا؟
... وشنو البالكم
رنا.. اوويلي من تغشم حالها
لاتلعبين ويانة تم زواجكم لو لا
... بعدكم الهساع تفكرون بالسالفة ادري اذا يتم او مايتم شنو تستفادون
ابتسام.. نستفاد جثير اشوف اخوية مستقر وجهالو مالين البيت
عالية... من شكلها مبين خالي ما گاعد عاقل
هبة... هو ليش خالكم طلع من البيت الله وكيلكم بس اول يومين وراها محد شافهم
رنا... اااي وأخيراً على الخير حبي شدي حيلج وجيبي اخ النجوى
... عزززا طلعت اخجل وجهي غدى دم
بوسني وراحن ماما جانت واكفة وسمعت الكلام
نصيت راسي خجلانة
الحمدلله راحن وماما فاتت ترتاح
دورت نجوى لكيتها نايمة من جت تتهرب مني ماتظل وياي بمكان وحدنا
همممم بسيطة وين تروحين مني
صعدت فوك شاهر مجتف ايدو ومخليها على عينو وغافي
انجضعت بسدو
ورة عشر دقايق صد علية راد يحضني دفعتو
... شنو طبگن طربيني شبلاج وعليش طنگرتي
... لاتغشم حالك تعرف شبية
.... اذا انتي كل شوي زعلانة منين راح اعرف
.. مو وعدتني من يجون تحجي وياهم تا يخلون ايات تروح تظل يم عالية
... بعدهم بسم الله مصارلهم ساعات من اجوي
والبيت مگلوب خما جدام الكل افتح السيرة يولي كبري عقلج شوي لاتظلين اتفكرين مثل الجهال وكل شوية گالبة الخلقة وزعلانة
.. موبيدي ما احب ايات اتمنى اليوم گبل باجر تطلع من هين وأخلص منها
... كافي لا دوخيني باليل احاجي أمي اخليها تحجي وياها
... خووش شورانا ننتظر لليل
شاهر هز ايدو انطاني ظهروا ونام
اخذتني النومة حلمت شاهر ازوج ايات
حب وغرام بينهم وهي تحرك بگلبي وتسويلي حركات تا تقهرني
بالحلم ماتحملت گضبتها من شعرها اجة شاهر خلاها وره ظهروا وجتلني
كمت ابجي وادعي عليهم فزيت
شاهر بسدي الحمدلله هذا حلم گلبي يدك سريع والدموع كامن يجرن
شاهر گعد من سمع حس البجي
...لا أله الا الله ول يابة شبلاج الخاطر الكائنات ارحميني كلما اصد اطلعيلج سالفة
الله معافيني من الأمراض بس بزودج عن قريب يشكل عندي الضغط والسكر
... ما أكدر اجاوب الشهكة شكت صدري
اخذني الحضنو يمسح على شعري
... انعل ساس اهلج كافي من احدر احجي ويا امي لاتظلين تبجين
....حجيت بشهكة انت مزوجها علية موو اعترف أي أكيد مزوجها ماكو اهل يرضون بنية شابة تظل هالكثر عد گرابتهم
... هههههه هاي اسطوانة جديدة عفية عقلج خوش يألف
...لا مو تاليف يلا معلية اعترف
... امة الأسلام شعترف
... لا تزكح گول مزوجها علية هساع حلمت مزوجها وهي تغير بية وانت تحبها وخايف عليه حتى جتلتني علمودها
.. هههههههههه الحمدلله الذي لا يحمد على مكروه سواه بين ما يكبر عقلج اني نايم بالگبر وشابع بخور ومي ورد
.... ضربتة قووي اسم الله عليش هيج تحجي وتحرك گلبي
.... من سوالفج التعبانة الله اكبر حلم يولو حلم جاعدة تحاسبيني وتبجين بسببو
... غير احبك واغار عليك لو الغيرة هم ممنوعة
.... غاري براحتج بس مو تتخبلين وتخبليني وياج
.... خشيت بحضنو ميخالف اعقل بس خلي ايات تروح من هين
.... اذا ما راحت اني اشتري الراحة الراسي اخذج ونطلع من هين بين ماتخلص هالشهرين
... ضحكت خوش فكرة
العصر حدرنا جوة طبيت للمطبخ اسوي جاي وشاهر فات للربعة گعد ويا جدة وماما
من طلع استلمني
اصيل.. يولي شصاير خما رجعتي تكاونتي ويا ايات
.... هااا لا مامتكاونين كلشي ماكو
نعيمة... عجل شاهر عليش يريدني. احاجي عالية تا تأخذ ايات البيتها
..عليش گاعدت تسألوني جان سألتوا
نعيمة... ادري بيج ساس البله
ياعيبة العيبة يعني ماگدرتو تتحملون هالجم يوم
اصيل... بنيتي ماظل شي للعطلة يعني صبرنا عليها كل هالحزة نجي هساع نحقر ونطلع جدام بالوجة الأسود
... والله حلوة هاي هساع اني شعلية گاعدين تحاسبوني يجي شاهر وگولولو نفس الكلام
نعيمة... حجيت ويا مافاد
... ماما وجدة ظلن زن زن برأسي تالي ماگدرت اعتراض گوتلهن خلي تبقى واني احاجي شاهر
على عمى عيني بقيتها بس اوووف منهن
نجوى... طبيت للربعة افرك بعيوني
گضبتني فيروز من ايدي وسحلتني وراها
يولي شبلاج
... اششش ولا كلمة صارلي ساعة انتظر تگعدين امشي نصعد ونحجي فوك
صعدتها الغرفتي وسديت الباب
خليتها تگعد وگعدت جدامها
يلا غردي اريد اسمع كلشي
... شتسمعين شبلاج فيروز ليش شكو تا احجي
.... صيرت عليج جثير اريد اعرف شضامة علية
... هااا كلشي ما ضامة انتي متوهمة
.. مبين ناوية تشلعين كلبي
نجوى جذب ما اريد تجذبين عليش وافقتي على قادر وبعدين رفضتي شنو الغيرج
ومخليج صبح وليل تجرين حسرات
وعليش انقهرتي من خطب كل هاي الأسئلة اريدلهن جواب
... اتمنى احجي واطلع البگلبي بس الكلام عاصي بزردومي سالفتي مو عادية تا اكعد احجيها بفخر حملي ثگيل ويكسر الظهر ويا حالي اخاف احجي وصوتي يعلى واحد يسمعني والكي حالي مذبوخة مثل النعجة
ماعندي غير السكوت
... هااا راح تظلين صافنة بوجهي مثل الفزاعة
... نترت بقهر گاعد اكوووولج ماكو شششي الخاطر الله لاتلحين
بيوم البجيت جنت متكاونة ويا جدة كافي فيروز تركيني ما اريد قادر خما گوة.
... فكيت عيني من نبرتها وعصبيتها اول نوبة نجوى تعلي حسها علية
هذا هو براحتج ومن هالحزة معد الج حجي وياي
اطلعي من غرفتي
تندمت بگد شعر راسي هاي شخربطت ردت اراضيها واحضنها دفعتني وكامت هي تركت الغرفة وحدرت
من اليوم فيروز حاربتني ماتقبل تحاجيني اهجس زغرت الدنيا بعيني وانسدت جميع الأبواب بوجهي وماظلي غير باب رب العالمين التزمت بالصلاة حتى صلاة الليل ما افوتها ودعائي الوحيد اطلب الستر من الله
... وره العشا اجة أبن عم شاهر
گعدو بالأستقبال وقادر وياهم
ظليت گاعدة بالربعة ويا جدة وماما
نجوى من يجي قادر تفوت للغرفة وبعد ما تطلع
قادر... گومي صبيلي استكان جاي رأسي غدى هالكبرو عفية زلمة بالع مسجل مايسكت أبد
... گبل شوي مو صبيتلكم قابل طلابة
... يولي گومي بلا حجي زايد
فلاح مابقى سالفة ماحجى بيها مدري شلون گدرت افلت من الأستقبال
... رحت صبيتلو جاي وانطيتو
فات نزار سلم وگعد
نزار... هاج هاي الغراض الطلبتيهن مني
.. اي كفوووو والله گبل جم يوم اشكد دورت بالسوك على هذا الشامبو والمكيف مالكيت منهن
... دللي يابة
عجل وين نجوى
.... قادر من سمع أسم نجوى رفع راسو
هاا بغرفتها
...صيحيها
... راحت رغد تصيحها
قادر گلب الوجه مو عاجبتو الوضعية
نجوى...هلا نزار
... هلا يابة عليش خاتلة بالغرفة بعد وكت على النوم
... مو نايمة جنت گاعدة ارتب غرفتي
صادة راسي تا ما أشوف قادر ويبين علية القهر
نزار...هاي الج
... شنو بالعلاگة
.. نفس الغراض الطلبتهن فيروز
.... هااا بس اني ما ردت
.... ميخالف اخذيهن يفيدنج
. مشكور أشكد سعرهن
... هاي اهانة بنت خالي أخذيهن وانتي ساكتة بالعافية عليج
فيروز... عيني تفتر بين قادر ونزار ونجوى وانتظر شوكت تگب العيطة
قادر...جاعد اتكولك اشكد الفلوس احجي مو مال تگعد تبخشش عليهن وانت شنو فاتح صيدلية لو كماليات
.... خلي تعتبرهن هدية عليش تسمي بخشيش وعادي الصيدليات بيهن كلشي
نجوى... ما عجبني كلام قادر حجة بنترة وعصبية هذا شيريد مني مو خطب وعرسة عن قريب
مشكور نزار هديتك مقبولة
... بالعافية يابة
... الله يعافيك
... سنة التجي اكملين لو لا
.... أكيد اكمل ماكو شي اهم من دراستي
... عفية عليج اياج تفكرين تتركيها. شهادتج سلاحج لاتصيرين مثل فيروزة خبصتني اكمل واكمل وتالي غلست
... هااا خير شو گلبت عليه جنت ناوية اكمل بس هساع ما اكدر
.... هو انتي من البداية ما هاويتها
... ما احبها موبيدي
.. نجوى اي مساعدة تحتاجين گوليلي ان شاء الله ما اقصر وياج
قادر... بشنو تساعدها ندري بيك عندك شهادة كافي لاتخبصنا
نزار... شبلاك شو جاعدلي على الكلمة
واذا ساعدتها عادي ابن عمتها مو غريب
... قادر ما جاوبة عاف الربعة وطلع
صاح علية فيروز تعالي
كمت من مكاني نجوى عينها علية ونزار ضايج
اما جدة مگابلة الشاشة ادحج مسلسل فاصلة مو ويانة
طلعت للمطبخ قادر ماكو لكيتو گاعد بالحوش
هااا يول شبلاك صاير بارود وحطيت قهرك بنزار
.. عليشش هالكثر مهتم بيها دحجتي شلون عينو عليها بالحرام لو ما الگرابة البينا أكوم افگس عيونو
... جيت گعدت قريب منو
اول شي نصي حسك لا يسمع شاهر وتصير سالفة
ثاني شي نزار تصرف بحسن نية حتى اني ما اخذ مني فلوسهن
ودوم يجي يسألنة شمحتاجات الولد كريم وايدو مو الو
تدري بي ثگيل ماغندو سوالف عوجة
بس الظاهر انت غيرتك عاميتك
قادر انساها هساع اتت خاطب لا تأملها وتأمل حالك
.... بهالسهولة انسى
عشت عمري اتانيها تكبر
بيوم صار شقى بيني وبين شاهر رادني اتزوج
گتلو اتاني بنتك تكبر وأناسبك
گال واني منطيك
وكلام الله السالفة جانت شقى
وره حزة صفنتلها اي شكو بيها اتانيها واخذها
سنين جدامي تكبر مانظرتلها نظرة وسخة ولا دحجت عليها بعين مالحة
مايوم بينت مشاعري جدامها
ومن كبرت وجيت خطبتها وافقت هجست حالي ملكت الدنيا والي بيها
مالحكت افرح انهد الحلم فوك راسي رفضتني بدون سبب
صبرت وانتظرت بلجي تغير رايها وتقتنع طال الأنتظار و ماكو فايدة
يولي أشوف الحب بعيونها بس لسانها اوووف من لسانها ينطق الكلمة التحزني من رگبتي وتكول ما اريدك
... يحجي بحس مخنوك ومكسور انقهرت على حالو
همست بعد هذا الحجي مامنو فايدة هساع انت خاطب وماظل شي العرسك
والي اخذتها بنت خالة صفية تدري بيها شكثر تحبك والكل يحترمها اذا فكرت تترك بنتها الكل يصيرون ضدك اولهم شاهر وجدة
عليش ما صبرت شوي گبل لاتخطب بلكي تغير رايها
... ابوي وامي خلصو گلبي اطب واطلع يحجون بهالسيرة
گالوا نجوى ماتريدك خما گوة استحي على. حالك شكبرك وشكدك رفضتك وانت لهساع رايدها
بحزة غضب مدري شلون طلعت مني وكتلهم روحوا خطبولي
.... عجل ارضى بقسمتك
سالفتك انت ونجوى مو بس صعبة صارت مستحيلة
... وشيقنع گلبي تا ينساها
... حجاها وصوتة اختنك صد للجهة اللإخرى
عزززا هذا بس لا بجة اشري وهو مندار، اروح
تركتو وطبيت القهر عصر گلبي ظليت واكفة بالمطبخ ادحج علية من الشباك
شاهر طلع وصل ابن عمو للباب ورجع
ماشاف قادر لان ماصد على الحديقة
شاهر... عليش واكفة هين
... هااا جنت گاعدة ويا قادر بالحديقة
راد يروح يمو گضبت ايدو
وحضنتو من خصرو
.. ول يابة احنا بالمطبخ شجاعد تسوين
... مامسوية شي من العصر ما حاضنتك اشتاگيتلك
.... واني بكل وكت اشتاگلج
هساع لاتستلوتين وسولفيلي عليش ماتريدين اطلع يم قادر
... فكيت عيني تركت حضنو عززززا اشكد ذكي
هساع شجاوبو
... شو سكتي
...شاهر منطي ظهرو للباب لجحت قادر طلع
ارتاحيت والله اذا يعرف بجى على بنتو تصير كونة شكبرها وصعبة على اثنينهم
... مو جاعد احاجيج
... هااا شكو شنو كفرت حضنتك طلعتلك سالفة هذا قادر روحلو لا دور سوالف
بسرعة سويت حالي زعلت وطبيت للربعة
نزار، ترخص وراح
نجوى... هاا فيوزة راح تظلين زعلانة مني
... صديت ما اريد احجي وياها
... يولي مو گاعد احاجيج كافي الله عليج گلبي راح يطك عليج
... جذابة كلشي مايصيبج حبج الي بس حجي ربيت وياج حاسبتج اقرب الي من روحي وانتي ما تأمنين بية
... اختنكت بعبرتي تركتها وخشيت للغرفة ابجي
من الضغط الگاعد يصير بية حاسة حالي راح اموت
نعيمة.... ول عرمة عليش ماتحاجين نجوى
... خير بس لا جنتي مخلية اذنج يمنا
... احجي لا اكوملج
.... شحجي كونة بنات معليج بينا
... يولي خما صايرة عليها حرمة ابو وگاعد تضوجينها
... اهووو منين تجيبين هالسوالف الخاطر الله
ترررررى نجوى اختتتتتتتي وهالشي ماتغير ابد
شاهر...شبلاكم حسكم طالع للحوش
نعيمة... قابل جديدة عليك ماتدري بوكاحتها يكفر الي يحاجيها كلمة
... هو منو البده اني لو انتي
نعيمة... يمة دحج الجذابة عيني عينك تريد تقشمر الزلمة تا يصدگها
... خلف الله عليج يمة هساع صارت فيروز تقشمرني
.... نجوى جاعدة تتوسل بيها وتبجي تريدها تحاجيها
والمصگوعة مطنگرة عليها
.... صدك هالحجي يولو
شبلاج وياها
... بنات بينا نتزاعل نتراضى هي شعليها
عجل تقبل اتگلي صايرتلها حرمة ابو
نعيمة...هم ياريت لو حرمة بيها خير شنو نص حرمةلا نفع ولا دفع لهساع جاهل ماشلتي تخلين الواحد بالگوة يفك ثمو ويحجي
... هاااا سسمعت هاي خو جدامك
.... انعل ساس اهلو اليظل مجابلجن
اصعد الف راسي وانام اخيرلي
... شاهر تركنا وصعد جدة عوجت حلگها ورجعت تسبح
... اني هم صعدت ظليت زعلانة شوي بعدين تراضينا
أصيل... يولي نجوى خالتج گبل شوي دكت علية اتكول جديتج مريضة وحالها بالضيم دازة عليج تريد تشوفج
... ششبيها گبل يومين حجيت وياها مابيها غير العافية
.... والله مدري اتگول تعبانة ونايمة بالفراش
هو هذا حال بني ادم بنيتي مايدري بيا لحظة يوگع ويتمرض
شوكت تروحين تا اكول الشاهر يوصلج
... هااا وحدي
... حسبة جم ساعة مو جثير تدرين بامي وابوج مايتحاجون وياهم مايكدرون يبقون وياج
...من بعد ما طلبني عمران ما أريد اروح الحالي عفية الگي حل
... من يجي أبوج احاجي وأشوف شيگول اذا ما گدر يروح ادز حسن وياج
... اي فدوة خوش فكرة
من جة بابا من كيفو گال ما اتركها الحالها اخذها تشوفها جدامي وأرجعها
فرحت هم وانزاح من صدري
للعصر تهيرنا تانروح جدة گالت عيب يبقون گرابتنا خلي اجي وياكم اسلم عليها
رحنا ثلاثتنا
وصلنا اهناك خوالي وخالاتي اهناك
من طبينا لجحت عمران بالحوش عاب هالخلقة شوكت اخلص من شوفتو ما ادري
طبينا جوة للربعة الكل اهناك
وجدة بوسطهم گاعدة تشرب جاي كلشي مابيها اليشوفني يگول اني المريضة مو هي
من شافت بابا وجدة نعيمة وجها انگلب خوالي وجدي رحبو بيهم گعدنا كلنا
جدة ماتبطل بساميرها
اتكول حارميني من بنت بنتي الا اتمرض يلا تخلونها تجي ومو الحالها لأزم انتوا وياها
شاهر... ضايجة من جيتنا
... هاا لا مو هذا قصدي
اريدها تجي تبات اريد اشيع منها مو حسبة ساعنين وتروح
... نجوى ماعادت زغيرة مال تبات بغير بيتها انسي السالفة
بيتكم بي شباب مو راهمة ابد
... مو ردنا تاخذها العمران تا مايصير اشكال ابقيتها هين وحضرتك دكيت رجل ورفضت
... ول يسلمج سدي السيرة تا مانرجع نتخارب ويصير زعل بينا
نجوى... السالفة نعادت من جديد ناس تجر بالطول وناس بالعرض جدة اكلت بابا بحسها
عمران وضعو مو طبيعي مثل الموصاحي
وكف بنص الربعة يصيح نجوى الي ماتصير الغيري واخذها غصب عن اليرضى والمايرضى
بنتك تسجلت بأسمي من گبل
اهجس روحي غابت علية عززا بعيني هذا اخر يوم الي بالدنيا راح انفضح وتالي انذبح وانزت بالبلوعة
بابا ماتحمل گام ضرب عمران بوكس خلة يتكوم بالكاع مثل الطوبة خوالي واخوانو وكفو بالنص
حرمة عمران تخبلت وكفت تتگاون ويا عمران واهلو الظاهر ماعدها علم بالسالفة
صياح وهوسة واني واكفة ورة جدة نعيمة وارجف
عمران قلت من ايد اخوانو وركض جوة مدري شراح يسوي حرمتو ركضت وره
ثواني وصراخها ملى البيت
عمران وحرمتو عايشين ويا بيت جدي
الكل ركضو الغرفتهم
سمعنا حس صلية من الرشاشة الصوت رج البيت
صراخ وهوسة واني جامدة بمكاني رجلي ما عادت تشيلني تا اروح اشوف شكو عيني تشخصت على الباب اريد
بابا يفوت تا ادحج طولو وارتاح..........
يتبع
مساء العافية حبايبي
شكراً من كل قلبي الصبركم والسؤالكم عني
ربي يديم عافيتكم
احبكم كووومة...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!