_وشاء الحب_
( بقلم بسمة البياتي)
_البارت العاشر _
من بدن البنات يتهيرن للحفلة مدري شصار، بية
لا ابد ما اكدر اروح واورط نفسي
جريت نجوى من ايدها طلعنا من الغرفة
... يولي شبلاج عليش گاعد تسحليني
.... نجوى يطلت ما أريد أروح ما أكدر والله ما أكدر
... عجل شحجيت شكلت تبن بس اخ من عنادج
لاتخافين رايحة احجي ويا ماما
... اي عفية كوليلها فيروز تستحي تروح من الاثر البوجها
... ماشي رايحة
....رجعت للغرفة اتگرضم الصخونة ولعبان النفس زادن عندي بالگوة گاضبة روحي حتى ما اكع جدامهم
اصيل... يولي شنو هالسالفة وين رايدة تظلين
.. هين يعني وين
... لا ماكو هيج حجي كومي تهيري ولاتعلين گلبي واذا على الزراك البوجهج اخلي عالية تخفي الج
نجوى... اني أظل وياها مو وحدها
.. انجعمي انتي الاخرى مخبلة واعوفجن وحدجن هين
فيروز.... گضبت ايدها اتوسل ماما الله. عليج ما اريد اروح دايخة الظاهر الوكعة الهساعها مأثرة براسي ومسويتلي دوخة لاتضغطين علية
... كلمة ورد غطاها تهيرن بدون لغوة زايدة ماكو بقية وحدجن هين
.نجوى...انقهرت على حال فيروز الدموع بطرف عينها والمرض مذبلها
توسلت بماما ماقبلت طلعت ادور بابا مالگيتوا
ماكو مهرب لأزم نروح
لبسنا فساتين مناسبات ماما جايبتهن النة
عالية... شو تعالي كعدي جدامي خلي اوخر هالخريطة البوجهج
... گاعدة جدامها مثل الصنم
.. يولي مصگوعة وجهج غادي نار شنو مصخنة
... هااا لا جنت واكفة بالطارمة والحر جتلني
غطت الاثر البوجهي وخلتلي شوية كحل ومرطب شفة
كملنا وكعدنا ننتظر السيارات
بهالحزة ابشع احساس گاعد احسوا هم مرض وهم قهر
... يلا امشوا جن السيارات
.. طلعنا جايبين سيارة جبيرة حتى تكفي النسوان اليگول عرس مو مشية
صعدت جت نجوى كعدت بسدي وگضبت ايدي
... فيروز انتي مثلي الاعلى ودوم اشوفج قوية واخذ القوة منج ديربالج تگعين اهناك وتخلين احد يحس بيج تحملي الخاطري
.. يولي منين اجيب القوة واني المرض گاعد يأكل بية لعبان النفس جتلني جتل
... الله يقويج ويعدي هاليوم على خير
... عجل ابوج وين شو ماشفتوا
... من صعدنا بالسيارة شفتوا گاعد بسيارتوا
.... ممممم ماشي
وصلنا البيتهم الحوش متروس جهال
دخلن النسوان للربعة والزلم للاستقبال
تهاني كاعدة بالنص مسويلها كوشة وخواتها بسدها العيون تلمع من الفرح حقها ما الومها الأخذتوا يستاهل تفرح بي
لابسة فستان مهر حلو وهي حلوة اجذب اذا اكول ما حلوة
ورة نص ساعة طلبوا منها تخلي شي على راسها وتوكف يم باب الاستقبال تا الشيخ يگطعلهم مهر
كلشي گاعد يصير جدامي واني مجبورة ابلع غصتي واسكت نجوى بسدي ماتركتني
كطعوا المهر وعلت صوت الهوسات والهلال
شعلوا الديجي والبنات يرگصن وتهاني بنصهن
جدة الفراذحة ماسايعتها تهوس بعبايتها وتهلهل
نجوى... الگاعد يصير مو بس أذى فيروز اذاني بابا دوم بس النة هساع اجت التأخذوا منه
التترس حضنوا بالجهال مو بعيد يصيرون هما الكل بالكل
مختنگة والحسرة بصدري اريد ابجي محد يفهم احساسي غير المجرب هاللوعة
جت اخت تهاني تتمايل گضبتني من ايدي تريدني اكوم ارگص واني لو بيدي اصرخ من القهر
بعدت ايدها عني گوتلها ما اعرف اركص
اشو هاي عوجت حلگها وراحت
نعيمة... يولن طفن المسجل وتسترن راح يفوت شاهر يلبس حرمتوا الذهب
نجوى... گبل صديت الفيروز گضبت ايدها
جسمها نار والعيون ذبلت
فيروز... نجوى كافي مگاعد اتحمل اريد اطلع من هين
... يولي بس تحملي شوية
... ما أكدر اريد ارد من معدتي راح اذب من راسي هين
من كثر لعبان النفس العندي حتى مانتبهت الدخلت شاهر
انداريت لكيتوا گاعد بسدها قبل لا يلجحني النسوان وكفن جداموا وصارت هوسة
نجوى.... كومي وياي
.... وين
... ادورلج الحمام
طلعنا ندور سألت جاهل من گرابتهم اشرلي يم الحديقة
دحجت شباب يم الباب بس مايبنون لان الحمام بالزاوية
دخلت فيروز وظلت ترد من معدتها
من التعب غدت ماي العرگ يقطر من وجها
غسلتها وطلعنا كعدتها قريب من الحمام
وكفت ادور احد من ولدنا شفت ابن ابتسام الزغير
يول يوسف روح شاور قادر باذنو گولو نجوى تريدك
فات يركض
اجة قادر مستغرب
... هاي شسون هين والشباب طابين طالعين
.... فيروز مريضة تكدر ترجعنا للبيت
... شبيها فيروز وعليش گاعدة هالگعدة
.... اكولو مريضة يكولي عليش گاعدة هالگعدة
.. امج تدري بيها
.. لا هساع افوت اكوللها وانت اخذ فيروز للسيارة
شاهر.... ليش واكفين هين
... اول مرة بابا يحجي وياي ومابودي اجاوبوا
قادر... فيروز مريضة تريد اخذها للبيت
.... مو كلت لاتجي شنو هالعناد
نجوى.. مو كيفها ماما جبرتنا نجي
.... روحي سايحة وعلى لحظة افقد الوعي من سمعت صوتوا اختنكت
واكفين يحجون واني گاعد اموت
رجع لعبان النفس عندي كمت بسرعة اريد افوت للحمام مالحت وكفت يم طارف الحديقة وتقيئت
جة شاهر گضبني تخبلت
نفضت جتفي من ايدوا
وخررررررر ديربالك تكضبني فهمت لو لا رووووووح من جدامي ما اريد اشوفك
... نصي حسسج لا ابتلي بيج
نجوى.. قادر فاتح عينيو ومستغرب من طريقة كلام فيروزة ويا بابا
جيت اخذتها للحمام تا تغسل
شاهر... امشوا اني ارجعكم
قادر... من كل عقلك تريد تترك خطبتك امشي يم الزلم. ولاتفشلنا اني ارجعهن
فيروز... يلا قادر ما اكدر اكف لاتظل تسولف اصلا ما اروح ويا احد غيرك
شاهر... استغفر الله
ماشي وديهن واني احجي ويا اصيل
واذا خابرت لاتكول فيروز مريضة كلها
نجوى ضاجت وراح ارجعها للبيت
.... خوش يلا امشن
... طلعنا ويا قادر اسحل برجلي بالكوة فاتحة عيني
الزلم كل شوية يصيحون شاهو وهو مغلس وصلنا للسيارة مطايقتة ولا اريد المح طيفة
صعدنا ورة خليت راسي على جتف نجوى وغمضت
... بابا ظل واكف ويا قادر مدري شيحجي ويا
جة صعد وطلعنا
مشى مسافة وردت نفس فيروز تلعب وخلتة يوكف السيارة بنص الطريق اهجسها هلكت هي بس الماي تشربوا وزتتو كلوا
أكل صارلها جم يوم ماتقبل تأكل ادري بيها جدامنا تگعد بس تخط بالاكل حتى لحد يگلها عليش ما أكلتي
دك تلفون قادر ماما اتصلت طلبت تحجي وياي
... يولي عليش ما جيتي علية وگولتي ضايجة جان اني بنفسي رجعتج
... ادري بيج فرحانة ما ردت أخرب فرحتج
.... انجعمي هساع اخلي واحد من الولد يجيبني
.. لا لاتجين مابية شي وفيروز يمي
قادر جر التلفون من ايدي وحجة وياها
... شبلاج وين جاية اني باقي يمهن لاتخافي
من كل عقلج خايفة على العصابة لأزم احنا انخاف منهن
اي اطمني الله وياج
... راح تجي
.. لا
... خوش اكولك هذا مو طريق البيت وين ماخذنا
... للمستشفى
فيروز... بالكوة فتحت عيني وهمست بتعب
وال يرحم اهلك رجعني للبيت ما اروح الاي مكان
.... وال يابة دحجي حالج راح تموتين شاهر گال وديها المستشفى
نجوى... معليك بيها احسن خلي نروح نطمن عليها
وصلنا للمستشفى هم زين لأبسات عبايات اسلامية فوك ملابسنا
دخلنا جوة جة الطبيب سأل شبيها وقاس الضغط
تخبل ظل يحجي على قادر يگول شلون هيج تهملوها
سوالها طبلة لآزم تدخل مستشفى
شكلولها مغذي وضربوا بي ابر جثير
فيروز تون تريد تطلع ماتقبل تبقى
قادر زكح بيها وسكتت
قادر... راح اطلع برا ديربالج عليها بين مايخلص المغذي
... ماشي
طلع قادر واني گاعدة بسدها
.... اهجس على ساعة وروحي تطلع اون ما اعرف شنو اليوجعني عيني شكلت اريد افتحها ما اكدر
اريد بس اطلع ما احب جو المستشفيات
.... خلص المغذي طلعت صحت قادر جاب الدكتور قاس الضغط بعدوا نازل
رجع كتبلها بطلين مغذي
فيروز انجنت تريد تشلع الكانونة من ايدها وبالتواسيل شوية ركدت وسكتت
صار المغرب واحنا بعدنا هين
قادر... شاهر جاي بالطريق
... خلصت الحفلة
... اي هساع طالعين
... عليش يجي خلي جان بقى يتعلل يم اهل الخاتون
...شبلاجن اشو ما ظال احترام انتي بجهة والأخرى تزكح علية بجهة
.... دحجتلوا بطرف عيني
هساع ماما اذا ما لكتنا بالبيت شراح تكول
... حجيت وياها گتلها اخذتجن تتعشن برا
.. ممممم عجل خوش
فيروز غافية من خلص المغذي ورادوا يشكلولها الثالث فزت
... لا كافي اريد اطلع والله ما ابقى هين
... اني و قادر والممرض حجينا ويا ماكو فايدة
الممرض كال اذا تطلع على مسؤوليتكم
من عنادها ما كدرنا نبقيها وقعنا وطلعنا
تلكانة بابا بالباب
... شلون صارت
قادر... ماقبلت تظل
... ليش بكيفها انت شلون تسمع كلامها
.... هو منو اليكدرلها
فيروز.... اني تعبانة وهذولة گاعدين يتناقشون
قااادر يلا جيب السيارة شلون يعني انظل هين اليوم
شاهر.... امشوا وياي بسيارتي
.... كعدت على الرصيف حيل مابية اكف
قادر مو گاعد احجي وياك امشي جيب السيارة
شاهر.. فيروز كومي صعدي السيارتي ولاتعصبيني
... دحجتلوا بحقد من هالحزة اني وياك مايجمعنا مكان واحد مو انت الگولت بعد ما اريد اشوفج هساع اني راح آكولك ما اريد اشوفك وياريت لو تفك ياخة منا وتخلينا نطلع من بيتك
نجوى... عيون بابا غدن نار سديت حلك فيروز اريدها تسكت
قادر سحب بابا من ايدوا
.... امشي شاهر اني ارجعهن متشوفها مريضة وگاعد تخربط بالحجي
... بابا من عصبيتوا صعد للسيارة وضرب الباب حيل شخطها وطلع بسرعة جفلنا من الصوت
متت من الخوف عفية قادر خابروا لايسوق سريع انوب يسوي حادث لا سامح الله
.. انعل امو وابو الفاهم شي حاس حالي مثل الاطرش بالزفة
خلي اجيب السيارة والله كريم
.... صعدت للسيارة دموعي تجري دفنت راسي بجتف نجوى واشهك خفت علية لايصيبوا شي
قادر... هساع اريد وحدة منجن تفهمني الگاعد يصير
نجوى.. شنفهمك ماكو شي سلامتك
.. هالملاعيب مو علية احجي فيروز شبيها
... اسآل بابا مو هو صديقك ومايضم. عليك شي
.. ماشي ادري ما اخذ منكم لاحگ ولا باطل
...بالبيت اذا سألوا شبيها فيروز گلهم بسبب الوكعة راسها يوجع ودايخة اخذتها سوت اشعة حتى نطمن عليها
...بالحرام وراكم سالفة جبيرة
... وصلنا للبيت مسحت دموع فيروز كافي لاتبجين هساع اذا شافوج يفتحون تحقيق
... مسحت دموعي ونزلت وصدك من شافوا حالتي والكانونة بيدي تخبلوا
اصيل... وال قادر شبيها بنتي
.. مابيها شي الظاهر الوكعة ماذيتها ومن الهوسة والديجي صاير وجع براسها شاهر گالي وديها للمستشفى حتى نطمن عليها والحمد لله التحليل نظيفة مابيها شي بس شكلولها مغذي علمود الدوخة تروح
... ماما وبابا خايفين خلوني بنصهم ويسالوني شيوجع وخما بيج شي
.. الله لاينطيني اني السبب كالتلي ما اكدر اروح دايخة ماصدكتها
... اسم الله عليج حبيبتي مابية شي لاتخافين انتي شمدريج هيج راح يصير
نافع... اخذيها تبدل وترتاح باجر ان شاء الله اخذها الطبيب مختص
... ماناقشتهم رحت للغرفة بدلت ونجضعت
نجوى... بابا تاخر وماكو قادر يدك علية ومايجاوب
فيروز سالتني علية كوتلها يم اصدقائوا ما ردت اخوفها نامت
وظليت اني افتر
لليل يلا رجع من دحجت طولوا روحي ردتلي
قادر.. صدك جذب مو گاعد ادك عليك بالمجهوم عليش ماتجاوب
... روحي طافرة لاتظل تزگح يم راسي
... عافنة وصعد الغرفتوا
قادر راح وراه
فتحت باب الغرفة ومديت راسي
بابا مجضوع على الجرباية
وقادر واكف يم ميز التواليت وضارب عكس ويفر بالسبحة
بابا تتعشى اسويلك عشا
.. لا بنيتي ما جوعان روحي يم فيروز عينج عليها واذا تخربطت تعالي كوليلي
... ماشي تصبحون على خير
... وانتي من اهلو
... سديت الباب صديت تا احدر سمعت قادر يحجي ويا الفضول خلاني اكف وتسمع عليهم
قادر... يلا عاد احجي ولاتفت مرارتي
...ولي من جدامي راسي مسطور اريد انخمد
... بالحرام ما اعوفك اذا ما اعرف شنو الضامينوا علية وهاي گاعد هين جدامك وللصبح
... بطل تتصرف مثل الجهال كتلك ماكو شي لاتلح
... الجاهل الي يصدك هذا كلامك
مو زعطوط جدامك واتقشمر، بكلمتين
احجي شبيها فيروز عليش تمرضت بهاليوم بالذات وشبيها متعصبة منك والأثار البوجها انت ضاربها مو واكعة
... يول شحجي اذا اني ما جاعد استوعب اليصير عوفني بضيمي وهمي
احجي يمكن افيدك واساعدك عليش شايل الهم وحدك
... وشلون تساعدني فيروز جاعد تلعب بالنار والمصيبة حركتني وياها خلت لا ليل ليل ولا نهاري نهار من اشوفها بهالحال يشتعل شيب الخلفوني
... حلو الحجي هساع وضحلي شبيها فيروز وشنو الوصلها الهالوضعية
...راح احجي لان ادري ماراح تفك ياخة مني ولان محتاج افضفض عن همومي وانت صديقي واخوي مو بس ابن اختي بس بالحرام الحرام اذا كلمة وحدة طلعت من هذا الباب اخلي طلقة براسك
.... ليش شوكت طلعت اسرارك حتى جاعد توصيني على العموم يلا سولف
...اووووف
... همك جبير
... بس هو الله يعلم بي
يول بنتي الربيتها وكبرتها والتصيحلي خالي تجي توكف جدامي وتكولي احبك اكو اكبر من هالهم
...مراح استغرب توقعت السالفة من مرضها والحرگة البگلبها
هذا السبب وافقت تتجوز موو
..اي حتى تصحى على روحها
... هذا مو حل انت صلحت الغلط بغلط اكبر منو
... عجل شسوي صارلي مدة مامرتاح النظراتها وتصرفاتها ومن تمرضت امي اني مو غشيم ادري بسوالف النسوان وادري هاي لعبة حتى تخليني اتجوز
الي أكد شكي بفيروز من جت وگالت ترى جدة مو مريضة وهاي لعبة حتى تتزوج مجان عندي غير حل وافقت بلجي تنسى وترد الوعيها
... گاعد تشوفها شكثر متعذبة ولاتنسى فيروز مراهقة وهاي المرحلة تخوف عدهم النصيحة والمذمة بنفس الميزان يحسون الدنيا كلها ضدهم وبيهم يوصلون للانتحار
من ابوها طلب يترك البيت عليش ما خليتو يطلع بلجي من تبعد من هالبيت تنسى
حتى لو زغيرة ومو واعية صعبة تشوفك تهير الجوازك جدامها وبنفسها تجي للحفلة
... ما اكدر اني كاطع عهد على نفسي ما اتخلى عن اصيل ودوم تبقى تحت جنحي
اصيل صارت النجوى وفيروز ام
ما اكدر ابعدهن عن بعض
... عليش ماتعترف وماتكدر تبعد عن فيروز
.... لا ما انكر يول وحق لا أله الا الله اهجسها هي وروحي سوة
شلون اكدر افوت للبيت وهي مابي حتى وكاحتها مثل العسل على گلبي مرات من تسوي فاينة وتجي تختل ورة ظهري حتى لو ادري بيها هي الغلطانة لأزم ادفعلها
... ليش ماصبرت سنة لو سنتين وتاخذها فيروز مو بنت اختك ومحللة عليك
... الظاهر مگاعد تفهم احبها مثل بنتي مو غير شي شلون اكدر اتقبلها ولاتنسى فرق العمر بيني وبينها
.... تريد الصدك الوحيد المگاعد يفهم بهالغرفة غيرك دشوف حالك غادي عطاب عليها
واذا كملت زواجتك راح تظلم نفسك وتظلم تهاني وفيروز وياك
... محد ينظلم مدة وتنسى هيج حب مايدوم
... بكيفك خوية انت ادرى
نجوى... حدرت جوة فيروزة بعدها نايمة
نجضعت بسدها وحضنتها الله يعينج على الأيام الجاية
فيروز... تحسن وضعي بس وضع گلبي بعدوا مثل ماهو
شاهر ما اشوفوا
من يجي افوت للغرفة ما اطلع منها
لمينا الغراض لازم ننتقل للبيت الماجرينوا راح يهدون هذا البيت ويبنوا من جديد
الشباب نقلوا الغراض الهذاك البيت زتيت روحي على الشغل والترتيب تا اخلص من التفكير
نعيمة... ول شاهر بروح ابوك گول للعمال ياخذون بالهم من الاشجار ولا يخربون كل الحديقة
... لاتخافين وصيتهم ما راح ياخذون منها جثير
احلام.... هههههه كل همج الحديقة
... احلى شي بالبيت الحديقة والزرع العصريات من تنرش ونفرش الجودليات وينصب قوري الجاي گعدة من العمر
.... صدگتي والله
... من طلع شاهر جيت يمهم
ماما دام عطلة خلي نروح للرمادي
... وين نروح ماتشوفين مخبوصين بالشيلة والعمال
.. هذا البيت ترتب ماظل شي مخربط
والعمال بهذاك البيت احنا شعلينا بيهم
نعيمة... اي والله خلي نروح اشتاكيت الامنة والخواني وخواتي جثير صارلي مشايفتهم
احلام....ها يمه مبين انتي هم گلبج مرفرف على الروحة
ابتسام... اذا رحتوا اجي وياكم تاشوف امنة المسكينة حتى بخطوبة شاهر ما كدرت تجي
.... وانتي احلام تجين
... لا ما اكدر خليها الغير نوبة
اصيل... نافع وشاهر اكيد مايجون شلون نعوفهم وحدهم منو يداريهم.
احلام... اذا على الطبخ اني اطبخ وادزلهم
... عجل من يجون نكوللهم
من اجو جدة حجت وياهم وماعتراضوا
تهيرنا وراها بيومين راحنا للرمادي
مشتأگة الجديتي حسنة گلبي غادي نار عليها
وصلنا للرمادي البيت خالة امنة
كيفت بينا
أمنة... والله ما مصدگة انتوا هين
نعيمة... عليش ما جيتي الخطوبة اخوج
... الجهال على حظي تمرضوا ما كدرت اجيبهم واجي خفت يزيد المرض بالطريق ان شاء الله على العرس احضر
.... حسنة وصفية شلونهن
.. خالة حسنة جثير تعبانة وصحتها بالنازل
ايهاب ومرتوا جانوا يدارونها من راحوا التركيا علمود يسون طفل خالة تبهذلت ظلت على رحمة حرمة هادي گلاص المي بالكوة تناوشهيا
فيروز.... تخبلت من سمعت بحالة جدة كل هذا صاير بيها واني ما ادري
جت فكرة براسي اظل هين وما ارجع وياهم هم اخدم جدة واداريها وهم اخلص من شوفة شاهر وابقى بعيد عنوا......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!