وصيه أخي الفصل العاشر 10 - بقلم فاطمه

علي و العيون حمر وعصبي خزرني وهو يحجي من بين اسنانه : انتي عميه لو ثوله

- علي اترك أيدي أذيتني

- صارلي ساعه منتظرج وانتي الخاتون هنا واكفه شمنتظره بالله

- شدتحجي انته اني صارلي ساعه واكفتلك هنا انت الي اتاخرت وتذبها براسي

- لججج انتي عقلج وين شهل ثول انه مو كتلج يم الامانات مال موبايلات

اشرتله على الامانات وكتله : واني وين واكفه لعد

شفته سكت فعبالي عرف خطأه بس شد على أيدي اكثر وكال : شوفي انتي وين واكفه ... الثول ماكل رأسج

باوعت وهسه يلا انتبهت ان أني واكفه يم الكشوانيه بدل الامانات بس شسوي هي ازدحام وما انتبهت

سحبت ايدي منه وكتله : ما اسمحلك تكلمني بهالطريقه

- أيه اتجفي شري و سدي حلكج لا ابتلي بيج لا تجاوبيني وانه بهيج حاله

سكتت منه ماردت اسوي مشكله بنص الشارع بس عفته وصرت امشي قبله للكراج

اسمعه يستغفر الله و يكول : اللهم صبر اللهم طولج يا روح

عفته وزيدت بمشيتي سمعته يصيح عليه وغلست

رجع لزم ايدي بعصبيه وكال: فوك ما عميه انطرشتي مو اصيح عليج

دفعت ايده وكتله : انت شلون تسمح لنفسك تلزمني أياك بعد تعيدها

رجع لزمني بقوه من زندي وكال : انتي منو وتحاجيني هيج ... امشي امشي كدامي انه اعرف شسوي وياج

صار يسحلني سحل بسرعه وفتح السياره ودفعني

متت من الخوف محد متعامل وياي قبل هيج و كميه التحول المخيفه الي شفتها بشخصيته قبل ساعات و هسه زادت خوفي اكثر

بالسياره التزمت بالصمت وهو ظل يضرب بالستيرن ويغلط ويهدد ويرجع يستغفر الله و يسكت ويرجع يضرب بالسياره بعصبيه

يطلع جكايره ويدخن وحده وره الثانيه

ويحجي ويه نفسه ويتمتم اني سكتت وما حجيت ابد بس لو ضاغط عليه بعد شوي اضل اعيط وابجي

بس الحمد لله وصلنه الشقه اجيت انزل صاح عليه : أيه

دروت وجهي وكل عقلي راح يعتذرلي فكلت ابيع ثكل فكتله بنتر : هاا

هو ضاج بالزايد وكال : وعلااا اخذي المفتاح ودخلي يلا

انطاني مفتاح الشقه وشخط السياره وطلع مدري وين

اني دخلت بالشقه واضرب واخرب بالفراش واعيط من الاعصاب الى ان كعدت بالكاع وصرت ابجي ابجي الى ان فرغت شوي وكمت غسلت وعدلت المكان ورحت اريد انام لان احس راسي صدع و جسمي ميت برد وفوك هذا جوعانه

رحت للثلاجه فارغه مابيها بس مي معقم

سديتها ورحت نمت .

•°•°•علي•°•°•

حاولت ماابقى وياها بالشقه حتى لا أذيها لان هواي نرفزتني و شعلت اعصابي

فرحت جبت شيء ينوكل لان ما اتغدت هي بس لكمتين و ما متعشين فأاخذت لفات و حلويات و بقيت شوي بالشارع حتى اهدأ

من هدأت تندمت على تعاملي وياها يعني هي من جهه تعبانه ومن جهه ثانيه ما تندل بالكاظميه و الاماكن متشابهه بالنسبه الها اكيد تضيع

فضليت الوم بنفسي وكلت ارجع واحجي وياها

من رجعت فتحت الباب بالمفتاح الثاني وشفت الشقه هدوء وباب غرفتها مفتوح وهي نايمه ومتكشفه شوي

عفت الاكل ورحت غطيتها واستغفر الله حتى ما تجي عيني عليها وهي بهيج حاله

من غطيتها ايدي اجت على وجهها فحسيت وجها نار او ماعرف يمكن اني النار بداخلي

فرجعت تحسست وجنتها وجانت البنيه مشتعله من الصخونه

صحت عليها : أيه .. أيو بويه اصحي

ما تجاوب بس تون بخفه : رحت جبتلها مي ونزلت للصيدليه القريبه علينه أخذتلها علاج ورجعت لكيتها على حطه ايدي نايمه

هزيت كتفها وخرتني وحضنت مخدتها ورجعت كملت نومتها

حاولت اصحيها ما فاد فأاخذت شوي مي ومسحت وجهها يلا صحت وهي ترجف من البرد

باوعتلي وعيونها حمر واضح باجيه وكالت : شتريد

-كعدي بويه شصاير بيج مصخنه كومي غسلي واكليلج لكمه حتى تصحين

رجعت تغطت بعناد وكالت : وشعليك انته عوفني و روح

استغفر الله لازم تشعل اعصابي يلا ترتاح ضليت استغفر الله حتى هدأت شوي ورحت جبتلها علاجها واجيت

حطيتهن على الميز وكتلها : كعدي شربي علاجج بابا

من جوه الغطه جاوبتني : ما اشرب ما اريد

- يول لعد شلون تصيرين زينه ... اكعدي بلا عناد لا توكعين على رأسي ومابيه حيل

كامت وتباوعلي بأانزعاج و شربت علاجها وكالت : شربت لا تخاف ما يصير بيه شيء و مااوكع براسك .. حقك مالك خلك ناس مريضه

رجعت تغطت ونامت

طلعت من الغرفه وانه صاير نار من اعصابي .. كلمه منها تعصبني ونظره تهدأني

رحت فرشت فراشي ونمت حتى اكل ما اكلت .

كعدت ساعه بال٢ على صوت طكطه بالمطبخ رحت وشفت أيه مطلعه الحلويات و واكفه تاكل وتحاول متطلع صوت

ضحكت ووكفت مكتف أديه وكتلها : بويه اكعدي واكلي مو تكرطين مثل الفاره

فزت من صوتي وباوعتلي وسوت نفسها ما مهتمه وتكمل اكل

رحت يمها اخذت اللفات الي جبتهن وشغلت المايكرويف وحطيتهن حتى ناكل لان انه هم جوعان

سئلتها : شلون صرتي

جاوبتني بجفاف : زينه

- خلصي وشربي علاجج

هزت رأسها بهدوء

رجعت سئلتها : شنو تحسين شنو الي يأذيج ... بلاعيمج لو رأسج لو مصخنه شبيج

باوعتلي بطرف عينها وشعلت شيب عشيرتي وكالت : لا تهتم ما اتمرض و اوكع براسك

تحركت ورادت تطلع من المطبخ فلزمت ايدها حتى اوكفها

باوعت لايدي الي لازمه ايدها ورجعت باوعتلي بعصبيه فعفتها وكتلها : مو قصدي

رفعت تك حاجبك وهي تكول : شنو الي مو قصدك الي سويته هسه لو الرزاله الي وكلتني اياها هناك

- الاثنين ... ما كان قصدي أاذيج ولا بقصدي اجرحج بكلمه او تصرف .. بالساعه الي اتفقنه بيها ان نلتقي يم الامانات وما لكيتج متعرفين شكد خفت عليج خاف ضعتي او احد تعرضلج او صارلج شيء

وفوك ما انه خايف عليج اجاني اتصال شعل ابو اعصابي و وكعت عصبيتي وخوفي برأسج .. ما جان قصدي

باوعتلي لثواني بدون ما تجاوب وبعدها راحت طفت المايكرويف وطلعت لفتها وقوطيه بيبسي و وكفت تاكل

اما بخصوص الجريده الي حجيتها ما جاوبت ولا نطقت بشيء

انه هم سكتت ما ردت اضغط عليها فطلعتلي قوطيه بيبسي و صرت اكل وياها على الواهس

خلصت اكلها ورتبت المكان ورجعت نامت

انه انتضرت الصلاه و صليت ونمت و ضبطت المنبهه بالسته حتى نطلع للبصره .

▪▪▪▪

دك المنبهه فكمت دكيت الباب على أيه وانطيتها خبر حتى تتحضر

بعد ما رتبنه الشقه اخذنه الجنط و صعدنه بالسياره

أيه جانت نايمه من اول ما صعدنه السياره فصارت ساعه تسعه اتصلت بصديقي صاحب الشقه و اتشكرت منه .

سديت الموبايل و اول ما خليته على الشحن رجع دك

باوعت على الرقم وتأففت فتركته يدك وما جاوبت

دك مره و مرتين وبالثالثه جاوبت بعد ما اتاكدت ان أيه بعدها نايمه .

•°•°•أيه•°•°•

طول الطريق سويت نفسي نايمه و جنت اغفه شوي وارجع اكعد بس اسوي نفسي نايمه سمعته خابر صديقه وتشكره وبعدها اجاه اتصال واضح انه انزعج منه و ماجاوب الا لمن المتصل ألح بالاتصال فجاوب بنتر : شتردين ؟!!

سويت نفسي نايمه واني اسمع ومستغربه ويه منو يحجي بهل انزعاج و فوكاها ويه بنت مو شاب .

-انه كم مره كتلج لا تتصلين بعد ، يا بنت الناس افهمي انه سويت الي عليه وانطيتج حقوقج كامله وطلقتج بعد شتردين .. خلصن فلوسج ... خوش بس هاي اخر مره .. ميصرفلي هالحجي الي بينه انتهى شوفي حياتج لان انه هم جاي اشوف حياتي واريد استقر
.. اي عود انه ادزلج .. لا تتصلين مره ثانيه .. الله كريم ومع السلامه

بعد ما انهه اتصاله ضليت مصدومه شنو طلقتج وشنو حقوقج كامله ليش هو شوكت متزوج زين اذا متزوج ولنفرض بالسر ليش سولفلي على الي يحبها وهو متزوج .. ما فهمت الموضوع بس الي فهمته ان اني انزعجت منه لان شلون متزوج ويحب بنفس الوقت شنو الصدك والجذب ماعرف

ضليت افكر الى ان غفيت شوي وما كعدت الا لمن حسيت بأايد على وجهي .. جفلت من لمسته فباوعتله بأازعاج وقبل ما احجي كال : رجعتي صخنتي راح ننزل نتغده هسه حتى تشربين علاجج

هزيت رأسي و ما جاوبته الى ان وصلنه لمطعم فأاتغدينه وشربت علاجي ورجعنه لطريقنه .

الطريق جان كلش مزعج يعني من الشمال للجنوب وحتى لو قسمنه الطريق لايام بس احس جسمي متكسر من الكعده ما صدكت وصلنه البصره حتى اروح لغرفتي وارتاح .

دخلنه للبيت ورحت سلمت على بيبتي وكعدت يمهم شوي واجن سهى ونهى وبلقيس ... الي ٢٤ ساعه يم نهى من قبل لا يحترك بيتهم هم سلمت عليهن و سلمن على علي وكعدن يسولفن وياه ويسألنه على بيت خالهن .

اجت بعدها عمتي شيماء و كمت سلمت عليها بس ماعرف ليش جانت مثكله وياي ومو نفس طبعها ونفس الحال ويه نهى و بلقيس الي اساسا احسهن ما يحبني بس هسه حسيت لا يكرهني وليش ما اعرف .

كعدت ساعه تقريبا و الكل جان يسولف ويه علي واني لو بيبي تسألني سؤال و سؤالين لو محد يحجي وياي حسيت نفسي منبوذه ومحد رأيدني هنا هواي حسيت بالوحده رغم الكل كاعد يمي

اترخصت وكلت الهم اروح انام تعبانه .

توني جاي اصعد وسمعت صوت عمي باقر وعائلته توهم دخلوا لان حسب ما عرفت جانوا عند عائله مرت عمي .

فغلست وصعدت بسرعه حتى ما اسلم ولازم هم اكعد يمهم فالاحسن اصعد انام .

صعدت غيرت ملابسي و نمت نومه اهل الكهف وما حسيت الا على شمس بنت عمو باقر تحجي وياي تكولي: أيه جسمج حار و عمو ابو نجم يكول خل تنزل تتعشه

جنت كلش مصخنه و جسمي نحلان ورغم جوعي مابيه حيل انزل فكتلها : مااريد ماجوعانه

-مو عمو ابو نجم كال

تأففت وكتلها : اي حبيبتي كليله مجوعانه ونايمه

نزلت فتغطيت زين ورجعت نمت وره شوي دخلت شمس و شغلت الضوه و دخلتلي صينيه زغيره بيها أكل وكالت : عمو ابو نجم يكول اكلي حتى تشربين علاج

جنت جوعانه والله بس كتلها : مو كتلج ما اريد يعمري ليش صعدتي لهنا

اجاني الجواب من وره باب الغرفه : بويه اكلي حتى تشربين علاجج مو زين تضلين بس نايمه

اخذت الصينيه منها و طلعت فسمعت علي يكوللها : انطيها هذا الحبوب خل تشربها

اجت تركض تنطيني اياهن وتريد تكرر كلامه فكتلها : سمعته

ابتسمت وطلعت وسدت الباب .. اكلت و شربت علاجي واخذت فوني أكلب شوي وما حسيت على الوقت الا ساعه ب ١٢ فنزلت حتى انزل الصينيه وجان البيت هدوء كلهم نايمين او بغرفهم .

غسلت الاماعين و طلعت للحديقه شوي اتنفست هوه نظيف ورجعت جاي اصعد للطابق الثاني شفت ضوه غرفه نهى وسهى مشتغل و بنفس الوقت ضوه غرفه علي مشتغل واسمعه ديحجي بهدوء وي شخص .

حاولت اتحكم بفضولي وادخل لغرفتي وجنت راح انجح بهذا الشيء لو ما سمعت صوت علي وهو يصيح بهمس : يول انتي تردين تخبليني أيه شنو دخلها بالموضوع

من سمعت اسمي حسيت ان من حقي اعرف شديصير فبقيت واكفه وسمعت صوت بلقيس تكوله : بسببها متريدني مو

- يبنت الناس أيه عوفيها بره الموضوع وفهميني انتي شرايده مني

- انه رايدتك علي .. من انه وصغيره رايدتك ليش متحس بيه

- يول شلون احس بيج وانه اشوفج بمثابه سهى و نهى انتي حالج من حال خواتي لا تخبليني وشيلي الفكره من رأسج .. انه وانتي ما النه مصير سوه

- يعني ما راح تسوي شيء ... راح يزوجوني وانت ما تعترض مو ؟

- ليش اعترض .. اذا انتي رافضه الزواج من اصله و جايه تكليلي يا ابن عمي يردون يجبروني و الخالق محد يكدر يجبرج .. بس اذا تردين ترفضين علمود أمالج و احلامج هاي فـ انه اكولج لا تدمرين مستقبلج

سمعت صوت بجيها وهي تكوله : حرام عليك

واتقربت خطواتها من الباب فدخلت بسرعه لغرفتي وبعدها بديت اسمع صوتها وهي تحجي لسهى ونهى و سجى اختها وهن يسكتن بيها اما علي فسمعته يطلع للسطح بعصبيه

طلعت وراه وشفته واكف ويدخن ... رجعت لغرفتي و رأسي مصدع من الافكار .

ثاني يوم ما شفت علي ابد لان جان ديعوض الايام الي ترك بيها الشغل فشغله متراكم عليه .

اما بخصوص موضوع بلقيس فسمعت من بيبتي ان صديق احمد اخ علي خاطبها من ابوها و ابوها قابل و جان منتظر موافقتها و اليوم كايله لبيبي ان تكول لابوها ان هي موافقه .

احس كلش انقهرت عليها بس ما بيدي شيء هي تحبه وهو يعتبرها اخته .

اليوم كله ما رجع علي و للعصر اجو الناس على بلقيس يشوفوها

اباوع عليها نهى وسجى يمكيجنها و المكياج يخرب من دموعها واني واكفه بالباب اباوع عليها ودموعي تنزل وياها

●○●○

لا تنسون التصويت ☆