وصيه أخي الفصل الحادي عشر 11 - بقلم فاطمه

انتبهتلي نهى ان اني واكفه اجت وسدت الباب بوجهي انصدمت من الي سوته وكلش حزت بنفسي بس كلت ميخالف يمكن بشكل من الاشكال اني ضوجتهن رغم ما احس اني مسويه شيء يزعجهن .

خليت ونزلت جوه يم بيبي بس جانت نايمه فضليت بس كاعده يمها اما عمه شيماء و ام هيثم جانن بالمطبخ يحضرن الاكل و يستعدن علمود الناس الي جاين علمود بلقيس .

طلعت شوي للحديقه وكعدت على المرجوحه واجه يمي احمد وكال : شلون صرتي كالوا مريضه

-لا الحمد لله زينه

-الحمد لله ... شعجب كاعده هنا مو يم البنات

هزيت جتفي وكتله : مااعرف .. احس نفسي ممرغوبه بينهن

- لاا شنو هالحجي بـ ...

قبل لا يكمل كلامه كتله : اني مسويه شيء غلط

باوعلي بأاستغراب وكال : لا ليش

-مادري هنه يحسسني اني مسويه شيء ولذلك منزعجات

تنهد وكال : بلقيس من زغرها تحب علي

هزيت رأسي وكتله : اعرف بس شنو دخلني اني

- لا تهتمين هي شغله غيره عبالها ان علي رافضها علمودج

ضحكت وكتله : شهل غباء هو اني وين وعلي وين

باوعلي وهو عاقد حواجبه وكال : ها ولج شتقصدين

كتله : لا مااقصد شيء بس يعني فرق جبير بينه من ناحيه العمر و التفكير والشخصيات و كل شيء

هز رأسه وهو يبتسم وكال : الله كريم

سئلته بفضول : اسئلك شيء

- كولي

- انت تحب سجى ؟

ضحك وكال : شلون عرفتي

ابتسمتله واني احرك حواجبي وكتله : يول جا غير نظراتكم فاضحتكم

ضحك وكال : هلا هلا بقيتي كم يوم ويه ابو نجم صرتي تحجين نفسه كله جا و يول بعد كم يوم تكولين بويه

- هههههههههههههههههه لا مو لهاي الدرجه عاد

سمعنه صوت الباب مال شارع انفتح ودخلوا هيثم ونائل و حسن و عمو باقر الي جانوا ويه العمال يساعدون حتى يخلصون تصليح البيت

وكف احمد وكال : هاا الله يساعدهم

كعد عمي باقر على الكرسي وكال : ها شو هنا كاعدين

جاوبه احمد : هيج دنسولف

جر هيثم كرسي وكعد وكال : اي يابه سولفولنه وياكم

كام عمو باقر وكال : انه اروح ارتاح قبل لا يجون الجماعه

نائل وحسن هم كعدوا ويانه بالحديقه بس على الكراسي وضلوا يكلبون بموبايلاتهم

سئلني هيثم : اي مادام جبتي اوراقج نكدر هسه نكول بيا جامعه راح تنقلين

- ويه جامعه سجى

باوع نائل وكال : هلا والله هلا بالرزق

باوعت بأاستغراب فضحك احمد وكال : كلن على همه سرى

سئلته: شكو

جاوبني حسن وهو يأشر على نائل: شايفه هذا .. هذا ياخذ نص بنات المنطقه خط للجامعه فهسه انتي حضري جيبج للقطه

جاوبته بشقه : لا يمه شنو جا غير هو ابن عمي الحلو الي مياخذ مني فلوس اساسا انتوا متعرفونه لنائل مثل ما اني اعرفه

هيثم: هالحجي يفيدج هي سجى ويوكفلها بباب الغرفه اذا ما تنطي الفلوس براس الشهر

ضحكت وكتلهم : معليكم انتم اني ونائل نتفاهم هو يوصلني واني اضبطله اموره هناك

نائل : اووويلي يابه اذا هيج اخذج وارجعج مرتين باليوم

ضحكت وكتله : ههههههههههههههه تره هو خط مو حب وجع رأس

باوعلي حسن وكال : لا أيوشه اني اوصلها احسن الها من ما تضل تفتر وياك بالخط اني اخذها ببلاش وفوكاها غداها عليه بس لو تحجيلي ويه فد وحده هناك

ضحكت وكتله : هههههههههههههههه بعد منو يزود

راد هيثم يحجي بس سمعنه صوت الباب يندك فكال احمد: دخلي بويه اجو الناس

دخلت بسرعه و دخلهم احمد وهيثم و الولد دخلوا الناس بالاستقبال واني اباوع من المطبخ ويه شمس وعمه شيماء نريد نلمح العريس

واخيرا شفناه وشكله ينحب والله و مبين عليه خوش ولد وحتى عمره مقارب لعمر بلقيس يعني لا ينعاب ولا ناقصه شيء بس اذا هو بكلبها غير شخص فهنا المشكله .

يمكن تعاطفي ويه بلقيس كلش جبير لان قبل سنه وشوي تقريبا جنت بموقف مشابه الها .. حبيت انسان وبعد ما تقدملي بابا جان رافض بحجه ان مو مناسب الج وقتها سئلته ليش و شنو السبب ما جاوب بس بعدها بأاسبوع تقريبا وصلتني صور لنفس الانسان الي حبيته ويه غيري و بوضع حميمي و من وقتها تركته وحاولت اعرف رقم الشخص الي دزلي الصور بس ما عرفته ابد .

طلعت من ذكرياتي من شفت ام الولد و كم وحده من النسوان جايات وياه وراح يدخلن يم بيبي و عمه شيماء و ام هيثم فركضت لبيبي انطيها خبر فكالتلي : اي يبيي انتي روحي لغرفتج ارتاحي وكولي لبلقيس تستعجل حتى تكعد يم النسوان

هزيت رأسي و صعدت دكيت الباب على غرفه البنات وكتلهم : بيبي تكول استعجلوا حتى بلقيس تنزل يم النسوان

هزت رأسها سجى الي فتحتلي الباب ورجعت سدته بوجهي .. خليت وتجاهلتها ودخلت لغرفتي

صرت أكلب بالفون الى ان غفيت من الملل و كعدت ساعه ١٠ تقريبا لان محد مكعدني لا على عشه ولا شيء .. نزلت شربت مي واكلت تفاحه و سمعت صوت الباب الخارجي ينفتح ودخل علي عدلت حجابي و ظليت واكفه و أكل فتح باب المطبخ وكال : السلام عليكم

- وعليكم السلام

دخل جوه و سلم على بيبي وباس راسها و رجع سلم على أمه و كاللها : يمه ميت تعب صعديلي عشه بين مااسبح مابيه انزل جوه

- اي تدلل يمه ... وليدي روح انه ادزلك العشه روح يمه

صعد واجت عمه شيماء للمطبخ تسويله عشه وتحجي : سوده عليه يمه شكد يتعب بشغله

- يمه الحمد لله من الله انطاني هيج زلمه وما خلاني احتاج لاحد ... يمه الف الحمد لله و الشكر على وليدي

ابتسمت واني اسمع كلامها وسئلتها : عمه اساعدج بشيء

- لا بس صيحيلي وحده من البنات تصعدله الصينيه ما بيه اصعد

رحت لغرفه البنات و دكيت الباب محد جاوب فتحته وشفتهن نايمات ما عدا سهى جانت دتسمع اغاني بالسماعه وهي لابسه البرنص و تنشف بشعرها بعد ما سبحت .. من شافتني نزعت السماعات وسئلتني : ها أيه رايده شيء

- بس عمه تكول خل وحده تصعد الاكل لعلي هي متكدر تصعده

باوعتلي وبأابتسامه طلب كالتلي : صعدي انتي فدوه مااكدر انزل هيج

هزيت رأسي وكتلها صار ونزلت لعمه كتلها : كلهن نايمات و سهى دتسبح

فكالت : لعد يمه صعدي انتي

كتله : تدللين عمه

واخذت الصينيه وصعدت

وصلت يم الباب مال غرفته فنزلت الصينيه بالكاع و دكيت الباب سمعته كال: ادخل

فـ شلت الصينيه ودخلت .. جان لابس بس البيجامه ومتمدد على الجربايه من شافني كعد وكال : ايي والله تعيشين

ابتسمتله و اجيت اطلع فسئلني : أيه شصار على سالفه بلقيس اليوم

اندرت اله وهزيت جتفي وكتله : مادري بيبي كالتلي اصعد من اجو الناس فنمت وما دريت شصار

كال : هاا اي زين سويتي

طلعت وسديت الباب وبطلعتي دخلت عليه سهى وسمعتها تكوله : شلونك خويه

- الحمدلله ما دام اختي الحلوه بخير

رجعت كالتله : ابو نجم عندي طلب زغير كلش

- كولي بويه يا ستار من طلباتجن

- صديقتي عزمتني على الغده ببيتهم و ماما تعرفها للبنيه وحتى ما عدهم اخوان بلبيت و بس ابوها رجال جبير عادي اروح

سكت شوي وجاوبها : روحي بويه بس خلي احمد لو نائل يوصلوج انه باجر هم اتاخر بالشغل

هزت رأسها وتشكرته و طلعت ... من طلعت اتفاجات من شافتني بعدني واكفه فسألتني : ليش تبجين

انتبهت على نفسي ومسحت دموعي وكتلها : ماكو شيء

دخلت للغرفه واني من حجيهم تذكرت محمد من جنت اطلع هم اكعد اتوسل واتلوكله و انطي رشوه يلا يوصلني لمكان معين .

لزمت قرآني وكعدت اقره قرآن الى ان رجعت غفيت ونمت

●○●○●
لا تنسون التصويت ☆