وصيه أخي الفصل التاسع 9 - بقلم فاطمه

•°•°•علي•°•°•

شفتها غفت والسياره صارت هدوء مزعج بعد ما جانت اصوات ضحكاتنه ماليه السياره

ردت اكعدها حتى نسولف شوي ماعرف شنو الحسيته بوقتها بس ما ردتها تسكت جنت مستعد استمع لأي شيء تكوله حتى لو جان تافهه

ففكرت ان الزم بريك فجأه حتى تكعد و سويتها بس قهرتني من حسيتها فزت خايفه فسئلت : شصار ؟!!

سويت روحي تعبان وكتلها : غفيت شويه يمعوده الحمدلله على سلامتنه

- يااا لعد اذا تعبان اخذلك غفوه شوي و نكمل

- لا ماكو داعي .. ما ظل وقت تأخرنه هواي و وراي دوام وعياده مثل متعرفين

- يااا لعد تريد تدعمنه

ضحكت وقلدتها وكلت : يااا چا انه متقصد

انتبهت لنفسها وضحكت وكالت : هسه شنو

- هسه بويه لا تنامين ما شبعتي نوم و ضلي سولفي وياي حتى ما انعس

- هـ...هاا .. شسولف مثلا

- بكيفج مثلا أي شيء يخطر على بالج

ضحكت وكملت : مثلا قصه النبي يوسف

ضحكت بقوه وهي تكول : ولد ضاع و لكوه اهله

ضحكت وياها و شكد قديمه النكته بس من سمعتها منها حسيت عبالك اول مره اضحك من صدك على هذه النكته

بعد هدوء لثواني كتلها : اي بويه سولفي تره نعست

- ياااا علي شسولف ... زين اسئلني واني اجاوب

- خوش اوكفي خل افكر شسئلج

-اوكي عيني فكر

باوعتلها بضحكه وكتلها بعد ما فكرت لدقايق وما لكيت شيء اسئله بالعاده هواي يجيني فضول تجاهه بس هسه وبهاي اللحظه طار من عقلي كل شيء وهي تباوعلي منتظر السؤال فكتلها : صديقتج شخبارهه

- ههههههههههههههههههههه شدخل الموضوع بس عموما تسلم عليك

- ههههههههههه الله يسلمها بويه سلميلنه عليها وكوليلها ابن عمي يسلم عليج چثير و تره هو بعده اعزب وطاكه الجفاف

باوعتلي شوي وكالت وضحكت وكالت : ليش طاكك الجفاف معقوله ماكو وحده بحياتك

باوعتلها صفح وذبيت حسره وكتلها : اكو وحده بس متحس

سئلت بفضول : منو هي اعرفها

- اي تعرفيها

-بلقيس ؟!!

هزيت رأسي بـ لا

فكالت بنفس الفضول : منو لعد

- تعرفيها بعدين من يصير وقتها

- لااا حباب كول منو

- يول كتلج بعدين ستري عليه كوه لازم لساني

- حباب ... حباب ... حباب ... كولي شبيك

ضحكت على طفولتها وكتلها : يول شنهي شمس متسوي سوالفج

- زين شوكت تكولي

- يابه وعد بس يصير شيء انتي اول وحده تعرفين بعد شتردين

- اوكي ولو اريد اعرف هسه بس راح احترم خصوصيتك ومتاكده هي بلقيس

ضحكت عليها وكتلها : لا تسمعج بلقيس وشيفكنه عاد

باوعت شوي وكالت : ليش متكوللها زين

- منو ؟!

- بلقيس ؟

-شكوللها ؟!

- ان انت تحبها

- يوول كتلج مو هي بالقران

هزت اكتافها بعناد وكالت : لعد دكولي منو

- لا

- زين انت ليش متحب بلقيس اشو حلوه وبنت عمك وتعرفها وتعرف تربيتها وعايشين سوه تقريبا وتره هي تحبك مبين

تضايقت من هذا الموضوع بس كلت أملي فضولها فجاوبتها : هو هنا المشكله بلقيس خوش بنيه الله شاهد وما شفت عليها شيء مو زين بس انه احسبها مثل نهى و سهى يعني احسها اختي مااكدر اتقبلها كزوجه .. وبعدين الكلب يهوه جتاله واني وحده ظالمه اخذت كلبي وما تدري شسوت بيه

- يا يا ياا شنو هالتطور يابه طلعت رومانسي ابو نجم وانه مادري

- شعبالج يابه غير انه ما مشوفكم

ضحكت وكالت : صدك ليش يصيحولك ابو نجم

- شوفي هو لقب و للاحترام يصيحولي بأابو نجم مو بأسمي مثل البعض هههههه

-ههههههه شنو يعني قابل اذا صحتلك علي اقلل احترامك لا بس اني احب لفظ اسم علي احس اسهل باللسان

- عمي كلشيء يجي منج حلو و قابلين بي

ابتسمت وكالت : تدري محمد جان شيصيحلي

ضحكت وكتلها : اي دكمه

ضحكت من كل كلبها وكالت : ههههههههههههههههه شعرفك يااااا

-بويه جا انه تنضم عليه شغله كلشيء ادري

- اي سبحان الله .. تدري ليش هيج يصيحلي

رغم جنت اعرف بس ردتها تسولف فكتلها : لا ليش

ابتسمت بحماس وهي تكول : اول ما ولدتني ماما جنت اول ايام ماافتح عيوني ابد مثل الخايفه و اول مره فتحتهن من محمد شالني لاول مره وجان زغير وشايف عيوني شلون خضر وزغار وضال يصيح لماما "جنها دكمه ماما شوفيها جنها دكمه"

ومن يومها وهو يصيحلي الدكمه

ضحكت وياها بس شفت الدموع بعيونها وهي تحجي عن اهلها فـ كتلها : يلا بويه نزلي

باوعتلي بأاستفهام وكالت : شنو

اشرتلها بحاجبي على الجامه باوعت وشافت ان وصلنه للشقه مال صديقي

- ياااا هاي وصلنه

- ايي يلا استعجلي خل ننزل الجنط و نرتاح ساعه ونروح المغرب للكاظميه لليل ونرجع

هزت رأسها ونزلت وانه نزلت الجنط وصعدت وراها

دخلت الغرفه و كالت : اني راح اسبح واتحضر

- خوش انه راح انام من تخلصين كعديني

هزت رأسها ودخلت الحمام .

•°•°•أيه•°•°•

سبحت و توضيت بعدها ولبست جواريب و بنطرون و جاكيت طويل لان ما جايبه عبايه فكلت مناك من الكاظميه اشتري عبايه

خلصت ورحت كعدت علي بس صحتله مرتين فز خطيه هواي تعب بالسياقه

غسل وجهه وتوضى وباوع عليه وكال : ماجايبه عبايه

هزيت رأسي بـ لا

فكال : يلا سهله مناك نشتري

طلعنه من الشقه و اول ما نزلت ضربني الهوه البارد فكتله : علي بس ألبس ملابس اكثر وارجع اشو بارده واني شعري مبلل

- يول عجل ما نشفتي شعرج هسه تتمرضين

-ماكو سشوار بيمن انشفه وهو طويل مينشف وحده .. هسه البس ملابس واجي بسرعه

هز رأسه وراح للسياره ينتظرني

صعدت لبست تيشيرتين جوه الجاكيت و غيرت شالي لان تبلل ورجعت ركض للسياره

شغل على تدفئه خفيفه وكال : والله صدك اجه الشته

- اي بدت تبرد الدنيا

مديت ايدي وشغلت المسجل على القرآن و صرت اسمع واني اتابع الطريق

بعد ٤٥ دقيقه تقريبا وصلنه

دخلنه التفتيش الاول و صاحني علي وكال: تعاي يول خل نشتريلج عبايه

رحت يمه واشتريت عبايه ايرانيه وكوه امشي بيها ما متعوده ابد عليها

وهو يضحك على مشيتي كل شوي وردت اوكع .

اتفقنه نرجع نلتقي يم امانات الموبايلات بعد صلاة العشاء

ودخلت زرت وصليت الي و لـ أهلي وقريتلهم قرآن وكعدت فرغت الي بداخلي للامام الى ان صارت صلاة الجماعه صليت وطلعت انتظر يم المكان الي كال عليه و انتظر وانتظر بالساعه وعلي ماكو زين الرقم مال أمانات عنده حتى مااكدر اخذ تلفوني واتصل بي

ظليت ادور عليه شوي وحسيت بواحد لزم ايدي بعصبيه باوعت عليه و ....

●○●○●
لا تنسون التصويت ☆