وصيه أخي الفصل العشرون 20 - بقلم فاطمه

كعدت الصبح على صوت طكطه بالغرفه فتحت عيوني بصعوبه وشفت علي جاي يلبس بملابسه حتى يطلع للدوام

شافني كعدت فباوع وكال : صباح الخير

اني حالتي الصبح حاله ومادري شحجي فظليت ساكته واباوع عليه

هو يباوع وكوه لازم ضحكته فكتله بعد ما شفته صار حلو بزياده : لا تكشخ هلكد

باوعلي ورافع حاجبه وكال : ليش بالله

رجعت نمت واني اهمسله : خاف يتحارشن بيك البنات

ضحك واجه باس راسي وطلع واني كملت نومتي .

كعدت ساعه ٩ فكمت تمغطت وبديت اشتغل بالبيت وأحضر غده الى ان سمعت الباب يندك

من وره الباب صحت: منووو

سمعت صوت بجي مره وهي تكولي : اني امج يمه فتحي

حسيت كلبي وكع من الخوف وشعوري مستحيل اكدر افسره بذيج اللحظه ركضت فتحتت الباب

وجان اشوف مريه جبيره بالعمر تبجي وتباوع عليه وتكول : يمه يا سمر ليش هيج سويتي بيه

جانت تبجي بحركه وماكدرت اعوفها بالشارع فسحبتها للبيت وكتلها : حجيه منو رايده اني مو سمر

- لا يمه لا تكولين هيج .. ليش موتي روحج وموتيني وراج يا يمه

- حجيه والله انتي غلطانه .. اني مو سمر

وكعدت تبجي وتكول : انتي مو سمر .. دخيلج صيحيلي سمر

ماعرفت شسوي منا مقهوره عليها ومنا خايفه

رحت جبتلها مي وهي على حالها كاعده بالحوش وتبجي وتحجي وياي عبالها اني سمر

من دخلت اجيب المي اتصل بيه علي فجاوبته وجان صوته كلش غريب كال : راح يجن امي و سهى روحي وياهن واخذيلي كم قطعه ملابس

- ليش شصاير ؟

- من يجن يفهمنج

وسد الخط ورحت اني كعدت يم الحجيه منتظره عمه شيماء وسهى يجن ويشوفن حل وياها

حاولت اسكتها جان تكولي : يمه سمر فدوه بس استكان جاي من ايديج الحلوات

كمت اجيبلها جاي و طفيت النار على الجدر وصعدت احضر ملابس الي ولعلي مثل ما كال

نزلت للحجيه جانت بمكانها وكاعدات يمها سهى و عمه شيماء

سلمت عليهم وجاوبوا عاد كامت سهى ودخلتني جوه سئلتني : هاي ليش مدخلتها يمج

- مااعرفها دخلت وتبجي ماكدرت اطردها .. بيها شيء ؟

- اي خطيه زوجها توفه وبنتها انتحرت وره ابوها وهي هاي حالها تخبلت وتفتر بالبيوت تشرب جاي وتسئل على سمر بتها

- يااا خطيه ... زين اكلج علي شصاير وياه وليش كالي اروح وياكم

تنهدت وكالت : اوووف شكولج

سئلتها بخوف : يا ستار شنو شصاير .. علي بي شيء

- لا مو ابو نجم انما مازن .. اتوقع شفتي مره انتي

- اي شايفته بس منو هو مااعرف

- هذا صديق ابو نجم من الطفوله وعلاقتهم كلش قويه يعني حاله حال احمد بالنسبه لعلي

- اي وشبي

- اليوم طالع الصبح وما راجع خاطفينه وهو منا عنده عداوه ويه عشيره

- اي

- اي .. وهاي العشيره يمكن خطفته و ابو نجم راح هددهم وتعارك هو واخوان مازن فكال نجيبج خاف يسون شيء

- ياااا .. علي خوما علي شيء

- لا ماعلي شيء .. هسه يلا امشي خل نروح

- وهاي الحجيه

- امي راحت وصلتها لبيت ابنها .. استعجلي انتي

رحت ولبست صايتي وشال واخذت موبايلي والجنطه وطلعت ويه عمه وسهى .

هناك واشوف علي واكف ويه جماعه بالباب فأاشرلي بحاجبه ان انزل رأسي وامشي للبيت بسرعه

عاد اني صرت وره عمه ودخلت بسرعه .. رحت جوه وسلمت على بيبي ونهى و ام هيثم

وجانت اكو نسوان ثنين هم كاعدات ويبجن وحده ام مازن و وحده زوجته

وبناتها ثنين بحظنها وابنها جبير عمره بال١٥ واكف ويه اعمامه و علي

خطيه يكسرن الخاطر يبجن ويدعن والبنات كلساع يردن ابوهن واكوم اخذهن العبهن والهيهن ويه شمس حتى ما يضوجن امهن

لليل وما اجه خبر ... الشرطه تدخلت ويدورون وراحوا حققوا ويه العشيره الثانيه بس ماكو شيء

صار الليل وكلنه كاعدين على نار .. اجه ابن مازن الجبير واخذ بيبيته وامه وخواته للبيت واعمامهم يباتون يمهم

علي ضل واكف بره ويه جماعه يسولفون و يقسمون المنطقه حتى بس تطلع الشمس يرجعون يدورن بالمنطقه

لـ ٣ بالليل جنت كاعده بالمطبخ اباوع لعلي الجكاره ما نزلت من ايده .. شوي ودخل شافني بالمطبخ كال : ليش ما نايمه ابويه انتي

- ماكدرت انام

هز رأسه وكال : بس استكان جاي من ايدج

كمت اسويله وكتله : تدلل هسه اسويلك

بين ما مخليه الجاي على النار كتله : شراح تسون هسه

- شوي ونطلع ندور من جديد

- ان شاء الله تلكونه سالم يارب ... بس فدوه دير بالك على نفسك

هز راسه وكعد على الكرسي ويفرك برأسه من الوجع

صبيتله جاي و وكفت وراه اسويله مساج لرأسه

توه شرب شوي جاي و اتصلوا عليه وطلع .. من طلع اجتني نهى وكعدت بصفي وساكته

سئلتها : ما تعرفين ليش انخطف الرجال

- ليش ما تدرين

- لا والله

- هذا ابنه الي دخل صاح على امه حتى تطلع شفتي ؟

سئلتني وهزيت رأسي حتى تكمل فكالت : اي قبل فتره متعلم سياقه بدون ما يدري ابوه .. جماعته معلمينه وهو بالليل من نايم ابوه ليش ما ياخذ السويج ويطلع يجرب السياقه وادعملك واحد واكتله

- يااااا ... اي

- اي .. فـ هو مخلي ومتصل بأابوه .. ابوه من اجه ما خلاه يكول هو الي دعمه كايل انه دعمته حتى يحمي ابنه

بعدين سوها كعده عشاير و هم طلع ابنهم المات سكران وهو شامر روحه على السياره فحلوا الشغله بالفصل بس بقوا اخوان الولد المات و جماعته ما يقبلون بالفصل وضلوا يهددون لو يكتلونه لو ينطيهم فصليه

عاد هو ما ساكت مازن رايح ومتعارك وياهم هو واخوه وابو نجم وهاي هسه كدامج مبينه همه الي خطفوه

- ياا الله يساعد كلبهم .. وخصوصا كلب ابنه خطيه هسه تلكين الندم ياكل بي

كالت وهي ضايجه : دخل يولي كله خلك مراهق تبوك سياره ابوك وتديح بنص الليل ليش حيوان

و احنه نسولف وسمعنه صوت شخطه سياره قوي وشوي وصار صوت صياح وعياط

طفرنه اني و نهى للشارع ونشوف الزلم ملتمه على كونيه و سعد ابن مازن شابك الكونيه ويصرخ

من بعيد اجه علي واخوان مازن وياه وركضوا للكونيه ويفتحونها ومنشوف الا ايدين مازن وراسه كاطعيهن عن جسمه وشامرينه

اخوانه كعدوا بالكاع ويدكون على روسهم و علي يوخر بسعد ويهدي بي خطيه راد يموت فوك رأس ابوه

يشيل بروحها ويركعها بالكاع ... هيج صار يبجي مثل المره واسوء

و عمتي و ام هيثم ونسون كاعدات ويلطمن ويسكتن بمرت مازن وامه

اني ركضت لبنته الزغيره اخذتها لا تشوف ابوهة هيج

دموعي تنزل بحركه واسمع مرته تصرخ بنص الشارع ومحد كدر يطببها : يا يمه ياماااازن وين عفتني ويتمت بنااااااتك يااا يمه شلون اعيش بدونك اني

وامه تلطم على رأسها وتصرخ : يا وليدي ياااااااا يمه يا مازن يا يمه وين رحت عنه

بلكوه كدرن النسوان يدخلنهن جوه ام مازن سمعت تخربطت واخذوها للمستشفى واني ظليت انوم بالطفله

علي ظل ويه سعد يخاف لا يسوي شيء بروحه لان جان منهار كلش

وكلها تتباجه وتلطم بجهه .

ثاني يوم نصبوا الجادر مال فاتحه ومن الصبح راحوا دفنوه بالنجف ورجعوا

اني مكابله بنته الزغيره واشوف نفسي بيها حسيتها مثلي هم تيتمت وما شافت ابوها

تعلكت روحي بيها وبس حاظنتها وابجي بسكوت عنها حتى ما تبجي ويايه

●○●○●○
لا تنسون التصويت و كتابه رأيكم ☆