وصيه أخي الفصل التاسع عشر 19 - بقلم فاطمه

جنت كاعده وحدي بالغرفه بعد ما طلع علي لاصدقائه يردون من عنده شغله مثل ما كال

كعدت اكلب بالفون وشفت رقم صديقتي فاطمه الي من دهوك فرأسلتها و بين ما أني منتظره جوابها اجت افكار هواي برأسي من اول ذكرياتي الى الان

تسألات ليش احمد حب سجى ... شلون بلقيس كدرت تتخلص من حبها لعلي .. ليش هيثم عمره نهايه العشرين وما مرتبط .. ليش حسن رفضوه اهل حبيبته وليش و ليش وليش

هواي افكار وهواي ذكريات مرن علي واني صافنه وافكر حسيت مثل السمعت صوت بلقيس وهي تكول : ما بيوم توقعت راح اخلص من حبي اله بس جنت غلطانه لان اني الي تمسكت بشخص مو الي وتركت الشخص الي يريدني الي هو حلالي وزوجي جان كلشيء غلط وردت اسوي كلشيء حتى اتطلق وارجع بعد ما عشت ايام صعبه اول زواجي بس فكرت بيها عدل وقررت اتقبل حبه لزوجي و بدل ما يكون هو دائما الطرف المبادر واني ارفضه خل اجرب اغير هالشيء

وقتها جانت دتحجي قبل لا تروح للسويد وجانت فرحانه بحياتها الجديده بس شنو الي خلاني هاي المره افكر بجديه بكلامها فسئلت نفسي : اني شنو اريد

اذا كلت اني ما اريد علي فـ ليش .. صح جبرني بس بالنهايه اذا ضليت هيج رافضته ماراح استفاد شيء وما راح يكون نهايه غير خراب لعلاقتنه

اكيد راح يمل مني بيوم وراح يتركني او حتى يتزوج الي تحبه وتنطي حقوقه وساعتها اني شنو مصيري

راح ارجع لبيت بيبي كـ طليقته و راح يرجع هو يصرف عليه كطليقه اله او كوصيه لبنت عمه

زين لنفرض ان اني تقبلت مشاعره شنو الشيء الي لازم اسويه حتى احسسه بهذا الشيء هـ ....

قطعت افكاري صوت رساله من فاطمه فكعدت اسولف وياها ومتونسه فـ بالاخير سولفتلها عن كلشيء صار وعن افكاري الحاليه فصارت تنصحني

ان ما ابين اله تقبلي بهاي السرعه وان بس ألمح اله بهذا شيء عن طريق اهتمامي بنفسي و تبديلي وعطري من يكون وياي

بالبدايه جنت رافضه بحجه خجلي بس قنعتني وكعدت تنصحني و تنصح وبالاخير كالت بضحكه: اي والله يا داده انطيتج نصائح متزوجين واني عزابيه

ضحكت و فجأه تخيلتها ويه هيثم لو ما ادري بهيثم ابو نسوان جان رهمتهم سوه

واني افكر ومبتسمه دخل علي ومستغرب ابتسامتي وخصوصا جاي ابتسم للموبايل فكال : شكو

هزيت كتفي وكتله : ما صاير شيء

فدزيت لفاطمه رساله وكتله : اجه ... يلا بدت خطتنه خيه ههههههههه

وسديت الموبايل واباوعله يباوعلي بأاستغراب وسئل : ويامن جنتي تحجين

- فاطمه

- يا فاطمه هاي ... هاااا الي بدهوك عرفتها

سئلته : تتعشى اسوي شيء

- لا ماجوعان

- تمام ... لعد اني راح اروح اسبح

هز رأسه وكعد على الجربايه واتصل بواحد من جماعته

رحت للكنتور و خليت ببالي كلام فاطمه وصرت اكلب بالملابس احاول الكه شيء يجذب الانتباه بس بشكل مو مبالغ

اختاريت دشداشه مخصره تصير وبيها جاكه وكلش حلوه

اخذتها ودخلت سبحت ولبستها وطلعت وهو كاعد بس يكلب بفونه

نشفت شعري ومشطته واني واكفه على الميز تواليت طلعت مخمريه ودهنت شعري و اخذت مخمريه ثانيه دهنت ركبتي

طلعت كحل وحطيت بشكل بسيط و دورت بين المكياج الي مشتري ألي على حمره خفيفه

جنت مندمجه واني ادور حسيت بي واكف وراي رفعت عيوني للمرايه وشفته واكف وراي ومكتف ايديه ويبتسم

رفعت حاجبي وسئلته : شكو

باوع بعيوني بالمرايه وكال: سلامتج بويه .. جاي اتامل الجمال

ضحكت وكتله : هاي عليه

ضحك اكثر وكال : لا بويه مو عليج .. على رواحي هاي مو جاي اباوع بالمرايه

رفعت حاجبي وضحكت وكتله : اي واضح

تقرب مني ولزم شامه خدي وابتسم وكال : حلوه هاي الشامه

سحبت شعري على صفحه وبنيه صافيه والله اشرتله على مكان بركبتي وكتله : ايي شوف هذي بعد احلى

بالبدايه جان منصدم من الي سويته رغم مو قصدي شيء بس ابتسم وقرب رأسه اخذ نفس واشتم ريحتي وطبع بوسه خفيفه على شامة ركبتي وصعد لخدي وباس الشامه الثانيه وهو مبتسم وقريب من شفتي كال : حلوات جنهن شذر هالشامات

بقربه حسيت نفسي نسيت شلون اتنفس فسحبت نفسي بسرعه ورحت للكنتور سويت روحي أدور على شيء .. وصرت اكلب بالهدوم هيج بدون سبب بس حتى اشغل نفسي

اما هو فظل واكف يم الميز تواليت ومبتسم ومكتف ايده وكال : يول لا تدورين ما تلكينه

باوعتله وسئلته : شنو الي ما الكاه

- كلبج ... انه اخذته

ضحكت حتى استفزه بس هو الي أستفزني من كال : خل يكثر عنادج بس تاليتج تحبيني

طلعت بسرعه من الغرفه ونزلت للمطبخ واحس وجهي مشتعل نار من الخجل .

رحت غسلت وشربت مي بارد واخذت نفس ورجعت صعدت حتى ابينله ان الي صار ما أثر عليه

•°•°•°علي•°•°•°•

اتصلت بيه السكرتيره الي وياي بالعياده حتى تثبت حجز لمريض بشكل سريع لان جان متضرر

فـ وانه احجي وياها و انطيها تعليمات دخلت أيه وهي تدور بالغرفه على شيء

ما سئلتني وضلت تدور وانه عيوني تلاحك طولها

صح كصيره بالنسبه الي بس طولها حلو ويه العسل متخاوي

بعد ما سديت المكالمه سئلتني : منو هاي ؟

فهمتها بس سئلتها : منو قصدج

- الي جنت تحاجيها

- ليش تسئلين ؟

- هيج ... انته مو سئلتني من جنت احجي ويه صديقتي

ضحكت وكتلها : وحده

سوت روحها ما ضاجت وكالت: هاا الله يزيد ويبارك .. شتريد منك لازم ماتدري بيك تزوجت

سويت روحي مقهور وكتلها : لا يول تدري وجاي تتوسل حتى ما اعوفها

- هااا .. اي خطيه لا تعوفها

تنهدت وكتلها : لا بويه جا غير انه لخاطرج كاسر كلب نسوان

دارت وجها حتى تضم ضحكتها عني ماتدري هالضحكه ترد روحي

اندارت وسئلتني : كماشه شعري ضيعتها ملكيتها ؟

كتلها : لا ماشايفها ابد

وانه جذب ضميتها

هيج الشعر مفتوح يجنن عليها

ضلت تدور وما لكتها فكعدت على الجربايه وسئلتها حتى الهيها : شنهو سر الكحله الترتيبات اليوم .. طالعه عروس

ضحكت ورفعت الحاجب وكالت : مو شغله عروس وكذا بس اني تجيني فتره اهتم بنفسي مثل العروس واكثر وبدون سبب فحاليا اني بهاي الفتره

- هههههه .. الله يطولهة لهاي الفتره

- صدك علي على طاري الفترات .. هيثم ليش ما متزوك لهسه

باوعتلها بصدمه وكتلها : صدك تحجين

ملامحها جانت مستغربه سؤالي فكالت : اي ليش

ضحكت وكتلها : ول يابه ماكو هيج شيء .. انتي مو بهذا العالم الظاهر

- ياااا .. شكو غير اعرف

- وج ابويه انتي جا هو هيثم مو تزوج و توفت زوجته بعد شهرين

فتحت عيونها بوسعهن وشفت لون نهر دجله بجمال عيونها

سئلتني : والله .. صدك تحجي

- اي والله .. لعد مو اجيتوا للفاتحه بوقتها

- شوكت هذا الحجي؟

- قبل اربع سنوات ... هااا لا ما اجيتي انتي و والدتج وقتها ما كدرتوا تجون

- والله هسه سمعتها منك مادري بي متزوج وفوكاها متوفيه زوجته

- حقج يابه هو انتي غير جنتي حتى من نجي خطار ما تطلعين من غرفتج عازله روحج عن البشر

- لا مو شغله عازله روحي عن البشر بس مااحب الخطار .. يعني قبل ما جنت اعرفك زين وماعندي فكره عن شخصيتك اوك اعرف ابن عمي بس ماعرف شيء عنك فـ من تجي مااحب انزل اسلم واسوي روحي اعرفك واجامل وهيج

هاي مشكلتي ماعرف اجامل فجنت اعرف سهى ونهى وبشكل سطحي ومن تجون اضل كاعده بس يمهن ماادخل اسلم عليك

- هااا .. زين تكولين قبل ما اعرفك .. هسه شتغير شنو الي عرفتي عليه بالله

ضحكت وكالت :ههههههه مادري يعني انت من النوع الي قاسي من الخارج ولين من الداخل

قاطعتها وانه اضحك وكتلها : ومقرمش من الجوانب ويكثرولج عليه كتشب ... بويه شنهي دتوصفيني لو تطلبين اكل

- هههههههههههههههههه.. لا والله قصدي يعني انت صح عصبي بس بداخلك كلب طيب ومع ذلك مااعتبر نفسي اعرفك زين

-شنو تردين تعرفين اسئلي وانه اجاوبج

فكرت شوي وسئلتني : لو ما صرت دكتور عيون شنو الي جنت تريد تصيره .. يعني هذا حلمك

- لا انه جنت رايد طب جراحه بس من شفت معدلي عالي دخلت طب عيون ... الحمدلله على كل حال ومثل ما يكولون الخير فيما اختاره الله لنا

- اممم .. شنو اكثر شيء تحبه بنفسك

-ول شهل سؤال

- هيج مجرد سؤال

سكتت شوي وكتلها : خوش لعد خل افكر

جاوبتها بأابتسامه وكلت : الي احبه بنفسي ان الي اريده اخذه لو من سنون الفهد

- هااا ... يعني مثلي قصدك

ضحكت وما جاوبتها وكتلها : انه جنت حالف لو انتي الي تكملين ديني لو انتي

رادت تكوم من شفتها خجلت فكتلها : يول وين كلساع طافره من خجلج .. چا شلون ما نتغزل احنه

كالت بتوتر : هااا ... لا ردت اكوم انام نعست

- وين كايمه مو جاي نسولف و شحلاتنه

- نعست

كالت وراحت للحمام تغسل اسنانها حتى تنام

°•°•°•أيه°•°•°•°

غسلت اسناني ومن طلعت لكيته منتظرني حتى يدخل وراي يغسل

شفت بالكاع فارش فراشه فرحت تمددت على الجربايه ومن طلع كتله : شسمه ... اذا تريد لا تنام على الكاع

باوعلي وكال : منهو كلج انه نايم على الكاع

اشرتله على الفراش وكتله : لعد مو فرشت

- لا بويه ماكو هيج حجي ... البارحه انه نمت على الكاع اليوم انتي

واجه سحبني وكومني من الجربايه وشمر روحه عليها

باوعتله وبعدني بصدمه وكتله : والله

- اي والله شنهي چا غير انتن النسوان تردن المساواه هاي هي لعد تحملي نومه الكاع

كعدت مطنكره على الفراش وكتله : بس اني متعوده على الجربايه

ضحك وطفه الضوه وكال : تصبحين على خير

شمرت الكوشه عليه وكتله : اجمعين

تمددت على الفراش وابد مو مريح .. صرت اتكلب يمنه و يسره وما مرتاحه واسمعه هو يضم بضحكته بالكوه

فكعدت وكتله : علي

- هممم

- مو اني من انام بالكاع اتحلم احلام مو زينه ومن اتحلم احلام مو زينه اكعد الصبح مطنكره واذا كعدت الصبح مطنكره اضل اليوم كله مطنكره ومن اطنكر اليوم كله انام مطنكره وهم تنعاد نفس السالفه وحياتي كلها تصير تطنكر تقبلها

كعد وضحك بصوت عالي وكال : ههههههههههههههههه كسرتي كلبي و خرمشتي مشاعري انطيني كلينكس وج بجيت على حالتج

صحت بي : ياااا علي حباب

- يااا حباب شتردين ابويه انتي

- تعال انت هنا وخل ارجع للجربايه اني

هز راسه وكال : حلم أبليس بالجنه ... بس اذا تردين تعاي نامي يمي عادي ما اكول لا

هزيت جتفي وكتله : مشكور متقصر

ضحك وكال : براحتج ... يلا لا تسوين صوت بعد حبابه وراي دوام باجر

رجعت اريد انام وماكدرت فخليت وكمت شغلت الضوه

فتح عيونه وكال : هاااا شتسوين

- تزحزح جايه يمك

سوالي مكان على الجربايه وكال وهو يضحك : بس تره من هسه اكلج انه من انام نوبات احضن اليمي نوبات ادفر نوبات اكرص حسب حلمي

ضحكت وكتله : جرب وشوف شسويلك

اجيت ونمت بصفه وخليت مسافه بينه وره ساعه ونص بعد ما حسيته نام اختفت هاي المسافه وصرت حاطه رأسي على ظهره ونمت لاول مره بأامان من بعد وفاة اهلي .

كعدت الصبح على صوت طكطه بالغرفه فتحت عيوني بصعوبه وشفت علي جاي يلبس بملابسه حتى يطلع للدوام

شافني كعدت فباوع وكال : صباح الخير

اني حالتي الصبح حاله ومادري شحجي فظليت ساكته واباوع عليه

هو يباوع وكوه لازم ضحكته فكتله بعد ما شفته صار حلو بزياده : لا تكشخ هلكد

باوعلي ورافع حاجبه وكال : ليش بالله

رجعت نمت واني اهمسله : خاف يتحارشن بيك البنات

ضحك واجه باس راسي وطلع واني كملت نومتي .

كعدت ساعه ٩ فكمت تمغطت وبديت اشتغل بالبيت وأحضر غده الى ان سمعت الباب يندك

من وره الباب صحت: منووو

سمعت صوت بجي مره وهي تكولي : اني امج يمه فتحي ....

●○●○●
لا تنسون التصويت و كتابه رأيكم ☆