وصيه أخي الفصل الحادي والعشرون 21 - بقلم فاطمه

مرن يومين الفاتحه واني ما شفت علي ولا حاجيته بس ألمحه من بعيد مخبوص بالفاتحه وبسعد وجكارته ما تنزل من ايده

جان يمشي ويوزع قوه للكل يسكت الكل من سعد لاخوان مازن وحتى ام مازن يروح يمها و يواسيها لو يكعد يمها وتشم بريحته وتكعد تلوليله وتكله بيك ريحت المرحوم

يكعد يمها يبوس براسها ويهدي بيها وهي تبجي وتنعي:
يمه لو يرد ليه والوليه و لو ليله يا يمه ياابني وين رحت وفاركتني و يمه كون كل الدنيا تعزل راح الجان شايل البيت يا مازن ياااا يمه

ويكابلها سعد ويحضنها ويبجي .

واني كاعده اسمعهلها وابجي وياهم واباوع على علي ما نزلت دمعته و ضال يهدي بيهم ويذكرهم بأايات من القران حتى لا يجزعون

سمعت بيبي تصيحلي فكمت حتى اروحلها و ويه كومتي حسيت الدنيا افترت بيها و وكعت .

•°•°•°علي•°•°•°•

سمعت جدتي تصيح لأيه وهي كامت شفتها داخت و وكعت .. ركضت الها وشلتها وصحت لسهى : جيبي عبايتها ركض

راحت سهى تركض جابت عبايتها حطيتها على رأسها وركضت بيها للسياره وكبل للمستشفى

بالطريق حاولت اكعدها وما كعدت شممتها عطر وذبيت مي على وجها وماتكعد

وصلنه للمستشفى صحت على الممرضه تشوفها

فكالت : دخلها هنا وهسه اصيح الدكتوره المناوبه

دخلتها وشوي واجت الدكتوره .. فحصتها وقاست ضغطها ما شافت شيء ضغطها اعتيادي فكالت : يمكن تعبانه راح احطلها مغذي وخليها ترتاح شوي وتصحه

شكلت الها مغذي وطلعت

كعدت يمها ولزمت ايدها بأايدي وحطيت رأسي على ايدها

•°•°•°أيه•°•°•°•

فتحت عيوني وحسيت بشيء على ايدي

باوعت لكيت علي حاط رأسه على أيدي .. رفعت ايدي الثانيه ومسحت على شعره

رفع رأسه وابتسملي بتعب وكال : شلون صرتي

- الحمد لله

كام وكال : خل اروح اجيبلج شيء تشربي

وقبل لا يسحب ايده لزمته ما خليته يروح .. باوع لعيوني وكتله : اكعد شوي

سئلني بخوف : ليش يوجعج شيء اصيح الدكتوره

هزيت رأسي وأشرتله يكعد بصفي

كعد يمي ومديت ايدي على خده وكتله : ما تعبت

- من شنو؟

ما جاوبت و كملت : من ان تتظاهر بالقوه ..اعرف بيك تعبان .. من ايام وانت تسكت الكل و تمسح على جروحهم وتقويهم

ما مجبور ولا اكو داعي تخفي ضعفك عليه .. ابجي .. كسر .. اضرب .. اصرخ بس ريح كلبك .. الي مات جرحه مو قليل الي تركه بكلبك

راد يكوم مني من حسيت دموعه راح تنزل

بدل ما اتركه يبجي بوحده فتحت ايديه وحضنت رأسه و انمزجت دموعي بدموعه

ظل يبجي بدون ما ينطق كلمه .. لعشر دقايق تقريبا هو يبجي مثل الطفل بحضني وبعدها مسح دموعه وكام باس رأسي وطلع

شكد يكابر رغم جرحه ورغم اعرف بي جان يبجي بس بالنهايه ما خلاني اشوف دمعته تنزل .

كعدت ابجي بوجع عليه وكأن دابجي حصته وحصتي ان اتشوف الشخص القوي و الي مايهزه ريح بيوم هيج تعبان و يبجي بوجع هنا تحس شكد الدنيا غريبه.

رجع بعد شويه وشافني ابجي فكعد يمي ومسح دموعي وكال : اششش .. لا تتعبين نفسج

انطاني مي اشرب وكال : سئلت الدكتوره وكالت نكدر نطلع وما بيج شيء من التعب هيج صار .

هزيت رأسي وكمت لبست الصايه و عدلت حجابي و طلعت وياه .

من رجعنه جانوا شايلين الجادر مال فاتحه ولامين كلشيء .. علي دخلني جوه وكال : معليج بأي شيء روحي نامي وارتاحي

و راح هو يشوف سعد واعمامه شنو بيهم .

دخلت اني وسلمت على بيبي الي جانت تصلي وبصفها نايم احمد خطيه من التعب و على جهه نايمه شمس و نهى وسهى وبنات من كرايبنه .

دخلت وشفتلي زاويه وره سهى وخليتلي مخده وتمددت .

حاولت انام وما كدرت بطني جانت تأذيني كلش ..

باوعت للموبايل شفت تاريخ شهريتي فايت من يومين بس ليش داتوجع هيج مادري .. وهاي اول مره تصير وياي

ظليت بالساعه احاول انام وماكدر بالاخير سمعت صوت الباب انفتح ودخل علي فكالتله بيبي : كواك الله يمه .. تعال اكعد ارتاح يا بعد عمري تعبت انته

تنهد وراح حط رأسه على رجليها ونام .

الصبح حسيت احد يندهني ويهمس بأاسمي

فتحت عيوني واشوف علي يكول : المفتاح مال بيت وينه

باوعتله وصفنت بوجهه وكتله : خل يولي نام

- ههههههههه ... استغفر الله ، ول بويه صحصحي ورايه عمليات اليوم .. اريد المفتاح خل اروح اغير ملابسي بالبيت

صحصحت شوي بعد ما اخذت صفنه تذكرت بيها وين خليت المفتاح فكمت ورحت لغرفه البنات حتى اجيب المفتاح و اني على الدرج اسمع سجى تحجي ويه احمد وتبجي : احمد اعرف بس اني شنو ذنبي من سنين منتظره هذا اليوم وهسه تكولي نأجل العرس عيب من الجوارين

كحيت حتى ينتبهولي وصعدت : صباح الخير

جاوبوني : صباح النور

دخلت واخذت المفتاح ونزلته لعلي وكلتله : اجي وياك للبيت اريد اسبح اغير ملابسي

- مو انه مناك وطالع للعياده منو يرجعج هنا

- ما ارجع ابقى هناك ما ترجع انت اليوم للبيت .. ارتاح شوي صارلك ايام ما نايم عدل

تأفف وكال : ما يجي النوم لعيوني وداعت عيونج

- لتسوي بنفسك هيج

- شنو مسوي

اخذت جكارته من ايده وذبيتها وكلتله : لا نايم ولا مرتاح وما تذب الجكاير من ايدك .. ميصير هيج اذا ما تخاف على نفسك خاف علينه .. اني وامك وخواتك
تريد تيتمني من جديد .. من بعدك اني منو الي

باوع لعيوني وباس رأسي وكال : يلا لعد امشيء وياي للبيت انتي هم ارتاحي ومن اخلص شغل انه اجي وارتاح ان شاء الله

هزيت رأسي واني مبتسمتله وصعدت لبست صايتي والشال ورجعت اله .

وصلنه للبيت دخل هو يسبح واني طلعتله ملابسه و منشفه وحضرتله ريوك سريع

خلص سبح وكعد يمي بس بالكوه ياكل الا اني انطي يباوع على الريوك وعلى الجاي ويكلي : هيج مازن جان يحب الجاي .. مهيل و فاتح

تنهدت وكتله : الله يرحمه وياخذ حقه ان شاء الله وحسبي الله على كل ظالم

هز رأسه وكام ما كدر ياكل اكثر وكال : ارتاحي انتي .. انه اخلص وامر على اهلي و على اهل مازن واجي .. تردين شيء اجيبلج

- لا سلامتك .. دير بالك على نفسك

هز رأسه واخذ سويج سيارته وطلع .. اني التهيت بالشغل و طبخت الغده وغسلت الملابس وكويتله كل ملابسه السود ونمت

بس كل هالمده و وجع بطني وظهري موتني .. اول مره موعد الشهريه عندي يتاخر هيج و بس وجعها يجي مادري ليش

رحت اخذت مسكنات و نمت للعصر بدون ما احس .

كعدت وجع بطني رايح بس حسيت اكو شيء مبلل جواي كمت بسرعه واشوف الدم تارس الجربايه

كمت ورتبت المكان و اني ببالي ان الشهريه اجتني

و ساكته ما كلت لاحد للمغرب واشوف ان كميه الدم مو طبيعيه عبالك نزيف و حسيت الوجع بده يرجعلي فكعدت بالكاع ابجي من الوجع

اريد اتصل بعلي حتى يجي واستحي شنو اكوله .. بس الوجع غلب مستحاتي اتصلت بي واني ابجي اول ما دك فتحه وكال : هاا أيه.. انه يم امي شوي واجي

ظليت ابجي مستحيه شنو اكوله فكتله : انطيني عمه بسرعه

عرفني من صوتي جاي ابجي فسألني بخوف : شنو بيج شيء .. أيه صاير شيء جاي انه بالطريق

زدت بجي واني اتوجع كتله: بس انطيني عمه

سمعت عمه تسأله : شنو شبيها

وبعدها سمعت صوتها على الموبايل تسألني : ها أيه يمه شكو

- مادري عمه متوجعه حيل .. بطني تأذيني

- هاا .. يمه خاف الشهريه

- لا عمه اعتقد عندي نزف لان الدم كلش كميه جبيره

ضربت صدرها وكالت : يمه .. بس لا حامل و طرحتي يمعزايه

مدري ابجي مدري اضحك وكتها شنو اكوللها احنه لهسه بعدنه بس بالورق متزوجين

سمعت علي يحجي وياها ويكوللها : لبسي بسرعه وتعاي ويايه

وحاجاني وكال : اتحملي بويه شوي ونجي ناخذج لدكتوره

كمت لبست صايه وشال ولازمه بطني ومنتظرتهم

أنفتح الباب ودخل علي وعمتي قبله اجت تسألني : وج يالثوله صدك بعدكم

صرت اباوعلها مره ولعلي مره والخجل و الوجع ذبحني

عاد علي صاح بيها : يمه هسه وكتها

اجه سندني وصعدنه بالسياره وبالطريق اتصل بصديقه لان ام صديقه تصير دكتوره نسائيه فحتى ندخل اول شيء .

بالسياره حسيت الوجع صار اخف وهو خطيه كل شوي يباوعلي ويسألني : متوجعه حيل

وعمه تحجي علينه : صارلكم شهر ونص متزوجين وانه منتظره حملج وانتوا بعدكم .. شجرالكم يمه

علي بعصبيه : يمه لخاطر دين نبيج كافي

وصلنه للعياده ودخلنه اول شيء اني وعمه للدكتوره

صارت تسألني واجاوبها بعدين سوتلي فحص خارجي وبعدها كالت اخذلج سونار

اخذنه سونار وبين ما منتظرين النتيجه سئلتني : انتي متزوجه

هزيت رأسي بـ اي

فكالت عمتي من يمها : دكتور زواجها بس بالورق يعني

باوعت الدكتوره وكالت : ماما احتاج اسويلج فحص بس ممكن يأثر على غشاء البكاره

سئلتها بخوف : ليش دكتوره شنو بيه

باوعتلي بحزن ولعمتي وكالت : اسفه .. بس اشك عندج سرطان بالرحم

●○●○●○
لا تنسون التصويت و كتابه رأيكم ☆