وصيه أخي الفصل الثاني عشر 12 - بقلم فاطمه

مرت ثلاث اشهر و خلال هاي الثلاث اشهر تزوجت بلقيس بحفل كان مخطط ان يكون بسيط كلش بأاعتبار حزنانين على اهلي بس بعد ما حجيت ويه بيبي كتلها تقنعهم يحتفلون بحفل حلو مثل ما تتمنى مو من حقنه نحرمها من يوم مميز مثل هذا وبعد كلام وحجي اقتنعوا وتزوجت بلقيس بس مع هذا ما تركت تعلقها بعلي وهذا الشيء الي اشوفه غباء منها و وممكن يدمر حياتها

اما عائله عمي باقر ابو هيثم فرجعوا لبيتهم قبل شهرين بعد ما خلصوا تصليحه

علي سافر قبل شهر لتركيا بموضوع شغل و حسب الي فهمته راح يصير يشتري ويصدر بالاجهزه الطبيه

بديت أداوم جامعه هاي السنه ويه سجى تعرفت على بنيه تصير اخت صديقه سجى وتداوم وياي قسم هندسه و صرنه صديقات و طلعاتنه و كعداتنه تكون ويه سجى و صديقتها مريم و صديقتي مرام الي هي اخت مريم ومن خلالهم تعرفت على خالد الي هو ابن خاله مرام و مريم

تطورت علاقتنه من الزماله الى الاعجاب وطبعا بدون علم سجى و مريم جانت مرام الوحيده الي تعرف وهي الي توصلي كلامه و تعبرلي عن اعجابه

جان خالد بي كل شيء اتمناه برجل حياتي

الهدوء .. سيطرته على اعصابه .. مواقفه حلوه بالجامعه .. مقارب لعمري و تفكيري .. ثكيل .. خلوق .. ميدخن .. يعرف يعبر عن حبه بطريقه حلوه وبالاضافه لشكله الوسيم

كانت بينا مراسلات على الفيس بدأت بحجه مساعدتي بالدراسه و وصلت الى ان نتطمن على بعضنه كل يوم .

بيوم من الايام كملت محاضراتي و طلعت انتظر نائل يجي ياخذني و اتاخر اتصلت على سجى حتى اكوللها فكالت ان هو اتصل وسيارته عطلانه راح يجي واحد من الولد ياخذنه اتوقعت ان اما هيثم او حسن يجون ياخذونه لان احمد ببغداد ويه جماعته و علي بدوامه .

فأانتظرت بالمكان الي دائما نتتظر بي شوي واجه خالد وكف بصفي بس مسوي نفسه ديقرأ بالملزمه حتى ميجذب انتباه النه فكال : شنو متاخره اليوم

-اي نائل تعطلت سيارته وما يكدر ياخذنه

- اوصلج بطريقي ؟!

- لا ماكو داعي هسه يجي واحد من اولاد عمي يوصلنه اني وسجى

- اوكي براحتج ديري بالج على نفسج ومن توصلين فكري بكلامي الي كلته اليوم و صدكيني اني نيتي مو لعب وياج لان انتي شفت بيج الزوجه الي اريدها

ابتسمت وكتله : ان شاء الله بس شـ ...

قبل ما اكمل كلامي شفت سياره علي و كفت كدامي وعلي نزل الجامه و أشرلي حتى اصعد

طفرت من مكاني بخوف خفت لا يكون انتبه لخالد فرحت صعدت وكتله : شعجب انته اجيت

ما جاوب واتصل بسجى وكاللها : اتصلي بهيثم يجي ياخذج اني راح اخذ أيه ... لا تتدخلين و سوي الي كتلج عليه !

صاح بيها بالنهايه فوكع كلبي بيدي وعرفت ان صاير شيء

سئلته بخوف : علي صاير شيء؟

باوع عليه بعصبيه ورجع يسوق بسرعه فشفت ان طريقنه مو للبيت سئلته : وين رايحين

صاح بيه : أيييه لا تسمعيني صوتج

وصلنه لعيادته الي جانت مغلقه ففتح الباب وكالي : دخلي لشوف تاليها وياج

بقيت واكفه وكتله : اريد ارجع للبيت فدوه

لزمني من زندي ودفعني جوه بعصبيه وسد الباب ودخل

دموعي نزلت واني اباوعله يفتر بعصبيه وتوتر و ما يحجي

- ليش اجينه هنا

صاح بيه : ابويه سدي حلكج سدي لا تجيبين نهايتج بيدج

عاد اني هم من خوفي وتوتري صحت عليه : غير اعرف شصاير شكو متوليني رزيايل وتكفخ على الاقل اعرف شمسويه اني

لزمني من شعري وكال : تردين تعرفين شمسويه مو .. شوفي شمسويه

شمرلي موبايله وشفت احد رأسله محادثات على الاساس مالاتي و مال شخص ثاني و جانت المحادثات كلش منحطه وعديمه اخلاق من قريتهن متت بخجلي

عفت الموبايل على صفحه وكتله : وروح ابـ ...

ما كملت كلامي و صاح بيه : أيه اصعدي فوك مااريد أذيج

- بس شـ ...

صاح بيه بعصبيه : أااااايه كتلج فوك

ضلت دموعي تنزل واني اصعد الدرج واول ما صعدت سمعت صوت كزاز يتكسر و صوته يصيح ويضرب بالجام

نزلت ركض و حجيت كلام ما توقعت يطلع مني : كتله اصرخ عليه اضربني شتسوي سوي ما راح اصعد و أخليك تأذي نفسك هيج

ومشيت بسرعه اخذت وصله ولفيت ايده الي جانت تنزف بقوه لان ضارب الجام بوكس

صرت اضمد بأايده واني اكوله : لا تأذي نفسك و تأذي صحتك علمود شيء جذب و ادري ان انته تدري بهاي الشغلات متطلع مني لان لو جنت شاك بيه اني متأكده مجان سكتت لهسه ومجان اني بعدني عايشه ... اني ما مسويه شيء غلط فلا تأذي نفسك لان اكو ناس تحتاجك بحياتهم

رفعت عيوني واشوف خشمه طاك دم من الاعصاب فأانطيته كلنكس اخذه مني و هو يمسح الدم اجاه اتصال فلزم موبايله بسرعه وكال : وين صرت يمعود

وكمل : زين متكدر تعرف منو الي سواهن .. متأكد من كلامك .. تمام لعد دشوفلي الرقم مال منو وانطيني خبر .. اي انتظرك لا تتاخر

سد الفون وكعد على الكرسي وتنفس براحه .

•°•°•علي•°•°•

اول ما وصلتني المحادثات ردت انفجر من اعصابي وفوكاها الكلام جان قوي ومينسكت عليه فكرت ان انه اخاف عليها من نفسي و هي تطلع هيج تتراسل و تسولف وماخذه راحتها ويه غيري

تركت دوامي ورحتلها للجامعه بعد ما خابرت نائل وعرفت ان هي بعدها ما راجعه ... بطريقي دزيت المحادثات لولد اعرفه وكتله يتأكد منهن اذا مفبركات او لا ورحت اخذت أيه للعياده حتى مكان فارغ واكدر احجي براحتي بدون مااخاف احد يسمعنه ويمس سمعتها بشيء .

بعد ما اتصل الولد وعرفت ان هذه المحادثات مفبركه حسيت مي بارد نزل على كلبي

جنت متاكد ان هاي مو شغلات أيه تسويها بس الشيطان شاطر و اعصابي تلفت فماكدرت افكر عدل .

كعدت على الكرسي وكتلها : اسف

هزت رأسها وهي تمسح بدموعها وكالت : اعرف الوقت مو مناسب بس اريد اكولك شيء

رفعت رأسي الها و ابتسمت حتى اشجعها على الكلام فكالت : اكو شخص متقدملي واني اشوفه مناسب ألي فكلـ ....

صحت بيها : كافي ماريد اسمع

•°•°• أيه •°•°•

بعد موقفي هذا احس تأكدت شكد ان خالد مناسب الي و جنت حاسه بكره لموقفي هذا ووضعي ففكرت اكوله حتى اخلص فكرت ان خالد هو الوحيد الي يكدر يطلعني من مشاعر اليتم هنا ماكدر امنع نفسي من التفكير ان اني يتيمه

علي ما افهمه مره احسه انسان مكروه ومره كلش احبه

وجدتي مدايمتلي مريه جبيره وعلاقتي ببنات عمه شيماء و عمه شيماء مو قويه

عمو باقر محتار بعائلته واني لو مو علي ماعرف شيصير بيه بس خلاص لازم اخلصه من مسؤليتي فأاختاريت اقبل بخالد و اكول لعلي بنفس الوقت

بس تفأجات من صاح بيه : كافي ماريد اسمع

اساسا سبب قبولي الاول هو ان اخلصه من مسؤليتي يعني اليوم على اعصابه هاي الي بسببي لو صاير بي شيء منو يبقه لاهله

توقعته راح يكون قابل بس كمل وهو يقترب مني : ممنوع

عقدت حواجبي وسئلته : ما فهمت شنو قصدك

تتفس بغضب وكال : من هو هذا بالله سمعيني

-شخص وياي بالجامعه

ضحك بأاستهزاء وكال : وانه دازج للجامعه تدورين عرسان لو ادرسين .. لو ادري بيج هيج كاتله روحج على الزواج جان ما سكتت لهسه

●○●○●○
لا تنسون التصويت ☆