وصيه أخي الفصل الثاني والعشرون 22 - بقلم فاطمه

ضحكت واباوعلها عبالي تتشاقى بس ملامحها الجديه طبعت الرعب بكلبي

حطيت ايدي على حلكي و نزلت دموعي بصدمه

عمه شيماء سئلتها : دكتوره فدوه لكلبج كولي غيرها

الدكتوره : ماما اني ما جايبه الحجي من جيبي هاي فحوصاتها هيج تكول .. وكتلج لازم ناخذ نسيج من الرحم ونحلله هم بس راح يأثر على غشائها فـ انتي تردين تخسرين غشائج بالعمليه او ويه زوجج هاي راجعتلج

بس لازم منا ليومين تجين للمستشفى واسويلج الفحص حتى اذا بعدج بمرحلة متقدمه نعالجح كيماوي او اذا متقدم نستأصل الرحم قبل لا ينتشر اكثر

هي تحجي بشكل طبيعي واني دموعي تنزل بحركه وعمتي تباوع عليه وتبجي

الدكتوره: لا تخافين ماما .. انتي لا اول وحده ولا اخر وحده يصير بيها هيج.. وهذا امتحان من ربج لا ترسبين بأامتحانج

امتحان كم امتحان لازم بعد يصير بيه .. امي ، ابوي ، اخوي ، دراستي ، حريتي كلهن امتحانات وهسه صحتي هم و مو بس هيج مو بس صحتي لا أمومتي الي راح تروح

طلعت من الغرفه مال دكتوره و نزلت جوه للمكان الي جان ينتظرنه بي علي

اني شفته وركضت اله بس ما شالتني رجليه حتى احضنه وابجي حتى حيلي خاني كعدت بالكاع واني ابجي

هو شافني هيج وركض سألني : بويه أيه شصاير .. ابويه انتي كومي احجيلي شصاير

اني اسمعه يحجي ويزيدن دموعي وشهكاتي

كومني ودخلني للسياره ويسأل بيه : امي وين .. وشنو صار شكالت الدكتوره

ما جاوبته و ضليت ابجي .. الى ان اجت عمتي صعدت ويانه وهي هم دموعها تنزل

صاح بيها : يمه فهميني شنو اكو .. أيه بيها شيء

هزت رأسها وتبجي وتكوله : شبيها اكثر من هيج .. هذا الي ما حاسبين احسابه

صاح بخوف : يرحم اهلج كليلي شبيهااااا

صحت بي : سرطان .. بيه سرطان بالرحم

باوعت لوجهه مصدوم فبسرعه حضني وزدت بالبجي وهو يكولي : خل تولي هاي متفهم .. سرطان شنو منين اجاج

ول يابه لا تبجبن هسه اوديج لغير دكتوره

ورحنه لغير دكتوره ودفع للسكرتيره وقدمت سرانه دخلت ويه عمتي وشوفناها الفحوصات مال دكتوره الاول ورجعت عادت الفحوصات والسونار ونفس الحجي

احتمال جبير سرطان ونكدر نثبت هالشيء بس بفحص جزء من نسيج الرحم و بهاي الحاله البنت تخسر بكارتها لازم

كتبتلي علاج للوجع الي يجيني فجأه ونصحتني ان ما اتعالج هنا ولا انتظر حتى علاجي هنا وكالت بوجهج لتركيا او لبنان هناك تعالجي ونقذي نفسج .

وانظم هذا اليوم لاصعب ايام حياتي .. اليوم الي خسرت بي صحتي .

وصلنه عمتي للبيت وهي الطريق كله توصي علي بأان ياخذني حتى نستعجل بفحص النسيج

نفسيتي جانت تعبانه و كلبي مليان خوف فما اتحملت خوف التفكير بليله الدخله لذلك اول ما وصلت شربت منوم ونمت حتى ما حجيت أي شيء .

كعدت الصبح وشفت الساعه ب٩ و مكان علي فارغ فكلت اكيد رايح لدوامه

حطيت رأسي بين رجليه وصفنت فتره حتى اصحصح .. بعدها باوعت لوجهي بالمرايه وجانت عيوني مورمه من البجي و وجهي فاهي ما بي لون

خليت حمره خفيفه وايدي ترجف ودموعي تنزل .. حسيت ان اريد احس بأانوثتي لمرات أخيره قبل ما افقدها ويه العلاج

حطيت مسكاره وكحل و مشطت شعري واباوع على روحي صح ملامحي حلوه بس التعب و الخوف ماخذ نصيبه من ملامحي .

نزلت دمعتي ومسحتها بسرعه واني ابتسم واكول لنفسي : اني قويه .. اني كدها لذلك الله اختبرني بيها

وصرت احاول اثبت لنفسي ان اني قويه .

سمعت صوت خطوات احد جاي يصعد فباوعت وشفت علي وبيده صينيه الريوك .

ابتسمت اله و حاولت ما اضعف كدامه و كدام نفسي وسئلته : شعجب مو بالدوام

كذب وكال : ما بيه حيل دوام تعبان فكلت ابقى يم زوجتي الحلوه

اتصنعت الابتسامه لان احس كلبي مقبوض وماكدر ابتسم فكتله : اي زين سويت

اخذت الصينيه من ايده وخليتها على الجربايه حتى نكعد نتريك

كعد مقابيلي و شافني صافنه فصار يسويلي لفات زغيره ويوكلني .

باوعت لعيونه بعد ما ضليت متظاهره بالقوه لاكثر درجه اكدرها .. بس نظرته كسرت تظاهري حسيته شايف ضعفي رغم قناع القوه الي لابسته .

نزلت دمعتي و اول ما شافها وخر الصينيه وفتح ايديه وحضني صرت ابجي وما طلع من لساني غير كلمه وبصوت يرجف : خـ .. خايفه

انفجرت بحضنه ابجي وهو يمسح على راسي ويحاول يهديني ويكول : صدكيني ما يصيرلج شيء.. لو اعرف اوديج للمريخ وتتعالجين وما اخلي شيء يصير بيج .. انتي قويه اقوه من المرض حتى .. تتوقعين هاي دموعج تهون عليه .. لا فشلون تهون على رب العالمين

البارحه انتي نمتي بس انه ما نمت الليل كله اصلي وادعيلج والله كريم وعظيم ما راح ياخذ مني الشخص الوحيد الي احبه ولا راح ياخذ منج صحتج

ظل يهدأ بيه ويمسح على رأسي ومن هديت بدأ يتقربلي اكثر ويتجرأ اكثر بلمساته فـ استسلمت اله واني احس بلمساته كلها حب وخوف عليه اكثر من رغبه .

اندمجت ويه انفاسه وعشنه ساعه بعيد عن العالم ...

♡♡♡

العصر دخلت سبحت و تحضرت حتى نروح لبيت بيبي مثل ما كال علي حتى اغير جو

فرحنه و رجعنه بعد العشا رغم .. جان الكل مقهور عليه ويباوعلي بشفقه وهذا الي جان يمرد بكلبي وخلاني استعجل علي بالطلعه .

ثاني اجت عمتي و سهى ويانه حتى نروح للمستشفى علمود الخزعه .

وصلنه للمستشفى و بعد شوي عرقلات شفت نفسي لابسه ملابس العمليه و علي حاضني يطمن بيه و يقرأ على رأسي قران بين ما يصيحون عليه

بعدها انطوني تخدير عام و غبت عن الوعي .

•°•°علي•°•°•

اخذت عمليتها تقريبا نص ساعه خلالها جنت انه وامي فارشين سجاداتنه وندعيلها .. اكثر من هذا شنو ممكن اسوي

جنت عاجز على ان اسوي شيء ثاني غير الدعاء

بعد نص ساعه طلعت الدكتوره وكال : خلصنه و ان شاء الله ثلاث ايام وتطلع النتيجه

- ان شاء الله .. بس دكتوره مو اكو احتمال ان يكون مو سرطان لان مثل ما كتلك البنيه قبل أيام فقدت عذريتها

- ان شاء الله يكون مو سرطان بس بنفس الوقت احتمال يكون عدهم وراثه بالعائله فـ بهاي الحاله يصيبها حتى لو كانت باكر .

بعدها طلعوا أيه ودخلوها بغرفه و انطوها مغذي وكعدنه ننتظر البنج يفكها .. اما اني فـ بهذا الوقت جنت متردد بين ان اخذ رقم صديقتها فاطمه حتى اكدر اتواصل ويه خاله أيه واسألها اذا عدهم وراثه .. بس ما سويتها يمكن لان جنت خايف ان تأكدلي كلام الدكتوره ويطلع عدهم وراثه .

•°•°•أيه•°•°•

فتحت عيوني بصعوبه واني اشوف عمتي و سهى وعلي كاعدين يمي فكتلهم : متوجعه

كام علي بسرعه على صوتي و سئلني : حبيبتي .. متوجعه هواي

هزيت رأسي ب لا وكتله : لا بس شوي .

فـ باس رأسي وكال : لا تخافين طبيعي هالشيء وجع خفيف او تشنجات تصيرلج

هزيت رأسي وكتله : شوكت النتيجه تطلع

- بعد ثلاث ايام

هزيت رأسي ورجعت سديت عيوني بتعب واسمع عمتي تكوله : يمه اجيبلها شيء تأكله تشربه

- لا يمه ما يصير هسه تاكل شيء

-اي بس يمـ ....

بدت أصواتهم تختفي تدريجيا واني ادخل بنوم عميق.

مرت الثلاثه ايام هاي بصعوبه لو لا وجود علي الي ما تركني اختلي بنفسي ابد خلال هالايام .. جان شايف ضعفي وخوفي ودموعي الي تنزل بس يغفل عليه شوي

عمتي خطيه هم ما تاركتني و كل يوم تجي وتروح ونوبات اني اروحلهم حتى اسلم على بيبي خطيه متكدر تجي هي .

تحضرت و كعدت منتظره علي يجيب سيارته حتى نروح ناخذ النتائج مال خزعه و اذا احتاجيت لفحص ثاني اسويه ونرجع

سمعت صوت سيارته بالباب و حسيت رجف طولي و فز كلبي .. توكلت على الله وطلعت اله .

○●○●
لا تنسون التصويت و كتابه رأيكم ☆