وصيه أخي الفصل الخامس عشر 15 - بقلم فاطمه

مرت اربع اشهر خلالها نفسيتي كلش تعبت لان راحت سنه ثانيه عليه بالجامعه

علاقتي بمرام انقطعت من بعد الي سوته حاولت تتعذر بس شيفيد بسبب فعلتها راحت سنه ثانيه عليه

احمد و سجى أنخطبوا و ديتحضرون للعرس .. اما علي فـ الشغل الي دخل بي الي هو تجاره بالادوات الطبيه جان كلش زين ورفع من حالته الماديه هواي لذا اشتره بيت ١٠٠م بنفس منطقتنه وكاعد هالفتره يرمم بي و انطه غرفته لاحمد لان اكبر وترهم يكعد بيها هو وسجى .

بلقيس اخر شهرين تحسنت علاقتي وياها و ويه البنات لان كدرت تتخلص من حب علي من كلبها وكالتلي فد كلمه ظلت بعقلي : اني الي جنت مسوده عيشتي من تعلقت برجل خلاص مو الي هو ورفضت الشخص الي يحبني ويدور محبتي الي هو زوجي بس من بديت اتقبل حبه شفت ان اني تلقائيا صرت احبه وانسى غيره اساسا انسى الدنيا وياه احنه الي بيدنه نسعد حياتنه و وبيدنه نخربها .. و اخذيها قاعده اخذي الي يحبج مو الي تحبي .

حاليا بلقيس و زوجها بلسويد راحوا يجربون العيشه هناك اذا رهمتلهم يبقون واذا لا فيرجعون .

بيوم جنت كاعده بالمطبخ وصافنه واني حاطه رأسي بين رجليه

جنت بيومها كلش مخنوكه وجاي افكر بكلشيء صار وبمصيري شنو ممكن يصير بيه بعد

لا اني الي قابله علي ومتزوجته ومحصله دراستي على الاقل و لا اني الي متزوجه غيره

حست الدنيا دتضغط عليه من كل الجهات لدرجه صرت ماكدر اتنفس

دموعي صارت تنزل واني دافكر سمعت صوت احد دخل للمطبخ .. مسحت عيوني وشفته حسن ابن عمي باقر

لحمني دأبجي فكعد بصفي وكال : كواج الله

ابتسمتله بدون ما اجاوب فسئلني : شبيج بويه ليش تبجين

ضحكت ونزلت دموعي غصب عني وكتله : ليش ما ابجي مثلا الدنيا جبرتني على كومه اشياء و هم راح تجبرني اتزوج شخص ماريده

تأفف وكال : اني لو بس اعرف ليش متردي لأبو نجم جان ارتاحيت .. يا بنيه تره ابو نجم نص بنات المنطقه و العشيره ذابات ارواحتهن عليه بس هو راغبج انتي ودخلتي كلبه انتي

- لا يرغبني ولا هم يحزنون خل يروح للذابات نفسهن عليه اني ما اريده ما اتحمله لهذا الانسان

خليت وكمت وكتله : ماكو داعي نكمل حجينه لان اساسا بدون معنه وبالنهايه ما راح يصير بس الي هو يريده اني لا حول ولا قوه محد الي ومحد راح يأخذ برأيي

كام وراي وكال : تعاي وين يمعوده خل نحجي

ما جاوبته وردت اصعد بس اجه وراي وكال : اني مو وياهم ... عمي دام كلبج ما هأوي وانتي ما تردي هذا هو يصير الي تردينه

باوعتله بأاستغراب وكتله : شنو يعني

- يعني ما مجبوره تتزوجين الي متردي كافي الي انجبرت و راحت من أديه .. خلاص دامج ما تردينه هذا هو خليها عليه .

كتله : بس شراح تسوي

- يمعوده كتلج خليها عليه

وخله وطلع .. حسيت بشويه أمل يدخل لكلبي بس ما جنت متطمنه من الي راح يصير

الي سمعته من سجى ان حسن حب وحده ثلاث سنوات بس بالنهايه انجبرت تاخذ الي اهلها راغبينه رغم هو تقدم لخطبتها هواي بس ماقبلوا الا تاخذ ابن عمتها .

المغرب جنت جاي اصلي ويه بيبتي و عمي ومرته بنفس الغرفه

ونهى وسهى جانوا ويه سجى يحضرون بالغرفه مال علي .

تونه خلصنه صلاة و نسمع صوت الباب الخارجي يندفع بقوه وصوت علي و حسن وهم يتعاركون هز البيت هز

ركضنا كلنه واني بعدني بجادر الصلاة واشوفهم متلازمين واحد بهدوم الثاني

علي : انتتتت منو وجاي تفرض كلمتك عليه ... أيه بنت عمي ولو اعرف انهي عليها وما اخليها لـ ...

دفعه حسن وهو يكوله : انت رجال وانهي عليها وشوف شسوي

ضربت صدري واني اشوف مرت عمي باقر تعيط وتتوسل بحسن يسكت .. وعمي و احمد يحاولون يفاككوهم

كام علي على حسن وضربه وهو يصيح بي : لككك عااار انت تشوفني والا الله اخذها واكسر راسك وراسها واشوفك النسوان شتجيب .. تالي وكت زعطوط يجي يهددني

مرت عمي ضربت خدها وهي تصيح : يمه ابني ... يمه وليدي لا تتدخل اذا يصيرلك شيء انه ربحي بيمن .. يمه حسن اكعد لا تموتني

صرت ابجي واني بس واكفه واباوع عليهم

حسن صح عمرهه بس ٢٢ بس كلش ضخم ف عمي باقر لازمه و ميكدرله كلساع يسحب نفسه ويروح يريد يضرب علي الي احمد لازمه

وصاروا جنهم ديوجه يتعاركون على دجاجه

حسن يصيح : البنيه ما تريدك ما تخاف الله انته شلون تقبلها على نفسك

وعمي يصيح بي : ولك لا تتدخل منهو الكالك متريده .. أيه بنت عمه وهو أولى بيها

علي يغلط ويريد يضربه وحسن هم ما يسكت راد يكحلها نوب صخمها وعماها

اجت عمه شيماء تركض عليه وتهز بجتافي وتكولي : أيه يمه كوليله انتي تردين ابو نجم .. تجفي الشر يا يمه ولا تخلين العداوه تدخل للبيت

بس دموعي تنزل وماكدر اجاوب و حسن يصيح عليه : أيه لا تكولين معليج بيهم محد يجبرج على الي ما تردي .. لا تحجين شيء

وطفر علي عليه ويضرب بي : ولك كـ ***** ****** جاي تطلع عضلاتك عليه ما اخذت الي تريدها هسه جاي ***** لك لو بيك خير جان *****

حسن تخبل من علي هيج حجه وكام ويضربه بوكس وكعه وصار يضرب بي وعبالك فاقد

ركضت الزم ايده ودفعني حيل وكعت .. كام علي تخبل عليه وهو يصيح : اليوم ما اخليك عايش حيووووان

والثاني يجاوبه : انت مو زلمه لو خليتني عايش اساسا

وتضاربوا رحت ركضت لزمت علي لا يرتكب جريمه و انه ابجي باوعت لحسن وكتله : خلاص لا تتدخل انه رايدته لابو نجم .. خلاص كافي حرام عليكم الي تسونه حرااااام

عمي باقر سحب حسن الي ضل يحجي ويصيح وعمي باقر يكله : لا تتدخل هي رايدته شدخلك انت بعد

اباوع على علي يخزرني بعصبيه .. حسيت الدنيا اسودت بعيني و دخت وكعت بالكاع ما حسيت بعدهت بشيء .

▪▪▪▪

مر أسبوع واني ملتزمه الصمت ومتقبله واقعي .. اتزوجه و ارجع لدراستي على الاقل ماعندي غير حل

واني افكر دخلت عليه نهى وكالت : يردونج جوه

نزلت وجانت بيبيتي و عمه شيماء وعلي كاعدين .. اجيت كعدت بسد بيبي فسألتني : يمه متاكده ما تريدين عرس

- اي بيبي متاكده

حجت عمه شيماء : يا يمه يا أيه هي مره بالعمر و هذا علي الجبير مالتي واريد افرح بعرسه ليش هيج تردينها سكتاوي وبعدين اذا تكولين بعدني حزنانه فيا يمه حتى السنه مال اهلج طلعت شمنتظره بعد

علي كاعد ويكلب بفونه وما علق بشيء فكلت : اي عمه افرحي اني شدخلني اذا تردون رأيي اني ماريد عرس واذا جاين هم تجبروني هم مااحجي شيء اني الي تردونه سوه

خليت وردت اكوم فكالي : حضري نفسج باجر نعقد بالمحكمه و من نرجع نعقد شيخ

صعدت لغرفتي نمت على الجربايه و احس روحي فارغه لان حتى دموعي متنزل صارت تعبت كلش

نمت وكعدت الصبح على صوت سهى و نهى يدخلن لغرفتي .. فتحن البردات ويصيحن : يلا عروس كومي سبحي وراج محكمه نوب ترجعين حتى تتحضرين بالليل نسوي حفله زغيره ويه عقد السيد

ما حجيت وكمت سبحت وطلعت ملابس سود لبستهن واشوف الكل مخبوص منا تحضيرات لعرس سجى و حفله اليوم الي تعتبر عرسي

رحت نزلت جوه وراحت ويانه بيبي واحمد وعلي

وصلنه المحكمه وعلي ما باوعلي ولا حجه كلمه وياي حتى ... دخلنه وحسيت راح ادخل غرفه اعدام مو راح اعقد

كاعدين ننتظر دورنه فباوعت على علي الي واكف بصفي وكتله : راح تخليني اكمل دراستي

باوع عليه وشاف عيوني يلمعن بالدموع وكال : ان شاء الله .. الله كريم

كتله : علي اريد جواب اكـ ...

ما كملت كلامي لان سمعت يصيحون علينه فكال : يلا امشي

كمت واحس كلبي يريد يطلع من صدري من الخوف والشعور الغريب الي مريت بي

لزمت ايد بيبي حتى اخذ شوي قوه و سميت بأاسم الله ودخلت حتى اكون رسيما زوجه علي .

●○●○●
لا تنسون التصويت و كتابه رأيكم ☆