وصيه أخي الفصل الرابع عشر 14 - بقلم فاطمه

جنت اباوعله وبس دموعي تجاوب كلامه ردت احجي بس ما سمعني خله وطلع من البيت

بقيت وحدي بالبيت و افكاري تحاوطني من كل جهه ساعه انقهر عليه وساعه على نفسي ساعه اكول يحبني وميعرف يعبر عن نفسه صح ولازم احاول احبه وساعه اكول مو هو الانسان الي اريده ويناسبني

احسه معاكس الي بكلشي بس نسيت ان المتعاكسات يتجاذبا دائما .

صرت احاول اطلع من التفكير الي ماعرف شنو نهايته واشغل نفسي بالتنظيف .. شوي واجت بيبي الي جانت ويه بيت عمي باقر يم قرايب النه اما عمه شيماء و بناتها فـ علي منطيهم مصرف وكايللهم يرحون للسوك .. وبالنسبه لاحمد فـ بشغله .

احمد بعد ما خلص دراسه السادس دخل قانون اما نهى فعلي بطلها من الدراسه بصف الخامس لان شايف عليها شيء ما عاجبه ومبطلها من الدراسه.. اما سهى فرسبت سنتين بالثالث وبطلت هي و نهى دائما مزاجهم مو بالدراسه و مايردن يكملن اساسا لذلك ما يلحن حتى يكملن دراسه .

بعد الغده غسلت الماعين و صعدت فوك طبعا كل هالوقت علي ما اجه للغده حتى ... جنت كاعده بغرفتي واندك الباب ودخلت سهى

باوعتلها وكتلها : صاير شيء

هز راسها بنفي وكالت : لا بس اليوم اشتريت كم شغله مكياج و اني ونهى تعرفين منخلي مكياج تجين تعلميني عليهن

كمت وياها وكتلها : اي اكيد تدللين

رحت وياها للغرفه ونهى بالبدايه جانت بس كاعده متريد تبين حماسها ويايه بس شوي شوي واني اشرحلهن على المكياج صارت تسئل وتتفاعل وياينه

خلصت شرح الهن و كعدت اخلي مكياج خفيف لسهى وطلعت كلش حلوه فكالتي : حبابه تسرحيلي شعري نهى تشلع راسي من تسرحه

ضربتها نهى بالمخده ورجعت تكلب بفونها واني جاوبتها : يلا تعاي

جنت اريد اي شيء ألهي نفسي بي وهذا اجه بوقته

خلصت شعرها فصحت نهى حتى اسويلها هم بالبدايه رفضت بس بالنهايه اقتنعت و هم سرحت شعرها ومكيجتها خفيف وفرحانات وصرنه ناخذ صور شوي ونسولف

فكالت سهى : تعرفين تلعبين بلي ستيشن

كتلها : اي جنت العب ويه محمد الله يرحمه

كالت : عدنه بلي ستيشن مال احمد نطلعه بالهول نكعد نلعب ونجيب حلويات و نباوع فلم بعدها حبابات

اني وافقت فضلت هي تقنع بنهى الى ان وافقت هم

نهى جانت تحاول تخلي مسافه او عداوه بينه بس من بعد زواج بلقيس هي شوي صارت احسن وياي

نزلنه جوه حضرنه الكعده وطلعنه البلي ستيشن وكعدنه نلعب ومتونسين شوي واجه احمد و هيثم وهم صاروا يلعبون و صياحهم واصل لسابع جار

احمد جان قوي باللعب وهيثم عكسه بس ميقبل يكول خسرت لا يكول الجوستك خربانه لو احمد يغش

واحمد يستفزه ويكله : يلا يلا لتبجي راح العب مال مبتدائين مثلك

واحنه ميتات ضحك على عركهم .

بالاخير هيثم ذب الجوستك وكال بعد والله مالعب وكعد ياكل بالحلويات ويانه واني رحت اخذت الجوستك وكلت لاحمد بتحدي : الي يخسر يسوي للفايز الي يريده

كعدت ومحضره نفسي حتى افوز فكال احمد : شوي وارجع اختاري شخصيه الج

جاي اختار واجه كعد بصفي فكتله : يلا اختار

- اختاريت بويه

باوعت شفته علي كاعد بصفي ويحرك حواجبه ويضحك

واحمد كاعد ويه البنات و هيثم وياكلون ويباوعون علينه

كمت وكلت الهم : تصبحون على خير اني نعست

صاحوا الكل ماعدا علي : لاااااا اخر مره بس هاللعبه

كتلهم : لا نعست كافي

كال علي وهو يختار شخصيته باللعبه : عوفوها يول جا غير خافت و انهزمت بجلدها

وزيد فوكاها احمد : اي والله وسفه وهضيمه و عيب يا أيوشه هيج تشردين

باوعتلهم وحسيت دمي كام يحكني من كميه الاستفزاز رجعت كعدت وكتله : راح تندم

ضحك وكال : شحلاته الندم اذا يجي منج

دخلنه للعبه واني مركزه بكل حواسي باللعبه وهو ياكل ويسولف و يضحك عليه وفوكاها سابقني باللعب

خسرت اول مباراه فصار يضحك وهو يكولي : هااا هااا ما ندمتيني يحلوه

اخذت حجه هيثم من فشلتي وكتله : الجوستك خربانه مدخلني

كام وانطاني الجوستك مالته وكال : بعد شنو حجتج يلا نلعب بعد مره

ولعبت بعد مره وياريت لو كايمه نايمه احسن الي لان رسميا انسحلت باللعبه

وكلهم خربانين ضحك عليه وعلى عصبيتي

خليت وكمت وكتلهم : يلا واذا خسرت قابل خلصت الدنيا .. اروح انام احسن الي

صاح بيه علي : وين وين يمعوده و بالنسبه لموضوع الخسران يسوي الي يريده الفايز .. وانه فزت مرتين مو مره

اني هنا حسيت اريد اذبح نفسي من الفشله فكتله : لا عيني احنه اتفقنه على ان تفوز مره وحده واساسا اني اتفقت ويه احمد مدخلني اذا انت فزت

وخليت وصعدت ركض للغرفه ... حضرت ملابسي لثاني يوم بالجامعه ونمت .

صار الصباح وكعدت غيرت ملابسي وعدلت ونزلت انتظر سجى تتصل عليه من تخلص حتى اطلع بالباب

و لان خلصت من وكت فطلعت بالحديقه انتظر سجى و نائل وما حسيت الا واحد واكف يم باب المطبخ ويشرب جاي وكال : يول بعدج ما رايحه

باوعتله جان علي فسألته : شعجب بعدك هنا

- اليوم عندي اجازه فما اروح للمستشفى

هزيت رأسي وكتله : منتظره سجى ونائل ونوب اروح

كال : خوش لعد ديري بالج على نفسج

- ان شاء الله

جاوبته وسمعت صوت موبايلي دك فشفت سجى تتصل فكتله : يلا مع السلامه

وطلعت بعد ما سمعته كال : الله و ياج

محاضراتي اليوم جانت قليله فـ بالطلعه جان لازم انتظر سجى بالكافتريا نص ساعه الى ان يجي نائل ونرجع .

كعدت اني ومرام بالكافتريا فكامت وكالت : اروح للحمامات شوي واجي

كتله: ماشي وكعدت اكمل أكلي

واني مندمجه حسيت بواحد كعد يمي رفعت رأسي وشفته خالد

كمت بسرعه وطلعت من الكافتريا واني أسب بمرام على سوايتها هاي اكيد هي متفقه وياه

طلعت بسرعه واني اتصل على سجى وهي ترفضني واتصل وترفض لان بالمحاضره

خالد وراي يصيح : أيه بس نحجي كلمتين .. بس اسمعيني

أهتز موبايلي فشفت رساله واصلتني مكتوب بيها : انه راح اجي اخذجن شوي واوصل اطلعيلي بره

وكفت لخالد وكتله : رجاءا سد الموضوع ابن عمي وصل واذا شافك ميصير خير

كملت مشي بسرعه وصلت للكراج واجه خالد وراي وكال : ما اعوفج الا تسمعيني .. مو من حقج تنهين كل شيء بدون ما اعرف السبب

صرت اتلفت يمنى و يسرى خاف يجي نائل ويشوفه

واكوله : خالد رجاءا روح منا بعدين نحجي مو هسه ومو هنا خصوصا

ما قبل و ضل واكف لزم ايدي حتى يخليني انتبهله وهو يكول : أيه ليش هيج تسوين انه غلطان بشيء وياج سامعه شيء ضوجتج بشيء

سحبت ايدي منه واني مصدومه من جرئته شلون يلزم ايدي

وما حسيت الا و واحد لازم خالد من قميصه و وكعه بالكاع وفلش وجهه بوكسيات

ركضت اله واني اسحبه واكوله : نائل لتسوي هيج مـ ...

كطعت كلامي من انتبهت ان هذا مو نائل انما علي والي ما جنت منتبهتله ان علي الي دزلي الرساله هم مو نائل

للحظه ردت اقرأه الفاتحه على خالد بس الحمد لله تجمعوا الطلاب و وفاككوهم ... اربعه لازمين علي وهو مثل الذيب بس يريد يهجم على خالد ويفترسه

هذا ما عدى الصياح والغلط وهو يغلط ويكوله : ما جابته امه الي يمس ايد حرمتي .. هاي ايدك اكسرها

ويريد يروح يكسر ايده بس لازمينه

وخالد يكوله : أيه مو حرمتك ولا تضل مجلب بيها وهي ما تريدك مثل الهمجي لازك بيها

الي استغربته ان خالد ميعرف ان اني رفضته بسبب علي بس جان يحجي وكأنه يعرف هالشيء

علي دفع الي لازمينه ورجع بوكسيات على وجهه خالد وهو يكوله : انه تكول عليه همجي يا ***** اليوم ****** ******

بلكوه رجعوا لزموه وخالد ضل بالكاع ميكدر حتى يكوم رحت لزمت ايده واكوله : علي بروح ابوك كافي خل نروح كافي عوفه انفضحت بالجامعه

باوعلي واني ابجي فسحبني من ايدي بقوه ودفعني للسياره وطول الطريق هو يغلط ويفشر ويضرب بالستيرن كلت على أي دقيقه نندعم ونروح بيها على عصبيته وسياقته هاي

جنت ساكته واحاول اتجنب عصبيته الى ان صاح بيه : انتي ثوله لو غبيه فهميني شنو نوعج .. شلون تخلين ولد غريب يلزم ايدج

همست : وعلى الاساس انت مو كل ما يعجبك صاير تلزم ايدي

سمعني فصاح بيه : انه ابن عمج وعن قريب اصير زوجج

صحت بي : لا بالله مو اني خرسه ومحد ياخذ رأيي بسرعه مقرر يصير زوجي

وكف السياره على صفحه وصاح بيه : صوتج لا تعلينه لا اكص لسانج ... وغصبا عليج تصيرين زوجتي مو انه مكرن واخليج ترجعين للجامعه وهذا الـ ****** وياج وكأن ما صار شيء .. غصبا عليج تكسرين خشمج و تصيرين زوجتي والا ماكو جامعه

خليت ونزلت من السياره وهو يحجي فنزل وراي وبسرعه لزمني من زندي بقوه وصاح بيه : الا اكسر راسج على هالعناد

صار يسحبني للسياره واني احاول اوخره واصيح بي: عوفني ماللك دخل بيه اموت ومااتزوج واحد مثلك

-اشوفج الي مثلي شيسون

صار يسحبني الى ان تقرب رجال جبير من عدنه وكال : خير بويه على كيفك وياها ... شيصير منج بويه

جاوبه علي بعصبيه : حجي حرمتي هاي لا تتدخل

باوعلي الرجال وكال : اذا مو زوجج كولي بويا لا تخافين هسه اتصل على الشرطه يسحلونه هنا

خفت تصير مشكله اكبر ومنا علي صار نار لو ما رجال جبير جان تعارك وياه فكتله : لا حجي ماكو داعي زوجي هذا

سحبني علي ورجعني للسياره وكال : ياريت لو تتقبلين واقعج بعد .. حتى انتي كلتيها بلسانج

ما بجيت ردت ابينله ان اني قويه وصلنه للبيت و طبيت بسرعه ردت اصعد لغرفتي بس لزمني علي وكال: وين رايحه

حاولت اسحب ايدي واني اسئله : شنو تريد؟

سحبني ودخلني للاستقبال الي جان كاعد بي عمي باقر و زوجته وهيثم و عمه شيماء و بيبي متمدده يمهم

من شافونه وشافوا علي لازم ايدي واني امسح بدموعي بدون ما يشوفني كام عمي باقر وكال : ابو نجم شصاير

بيبي كامت وهي تكوله : يجده شجرالك دعوف البنيه

هيثم كام وكال : شالقصه ابو نجم اكو شيء

كال علي وهو يسحبني حتى اصير بصفه : أيه من اليوم و رايح ممنوع تطلع باب البيت و الجامعه تحلم بيها واذا تريد ترجع للجامعه هي تعرف شتسوي

سحبت ايدي وكتله : منو انت و تسوي بيه هيج .. اني مو جاهله وتريد تحبسني وتحلم اصير زوجتك ياابو نجم

خليت وطلعت بعد ما شفت لا عمي ولا احد وكف بوجهه علي .. عرفت وقتها ما راح يصير الا الي يريده.

●○●○●
لا تنسون التصويت و كتابه رأيكم ☆