وصيه أخي الفصل السادس عشر 16 - بقلم فاطمه

بعد ما عقدت بالمحكمه رجعنه للبيت والكل كام يهنيته ويباركلنه وكأن كلشيء اعتيادي

البنات وعمه شيماء محضرات مثل الحفله بالبيت وجايباتلي فستان ابيض و مشغلين اغاني بس من دخلت طفوهن

وبين ما منتظرين السيد اخذني البنات رتبلي شعري وسرحنه و خليت مكياج بسيط ولبست الفستان الابيض واني احس نفسي مسلوبه الاراده طول عمري حلمت بعرس فخم و بدله فخمه و تحضيرات عرسي كلهن اني اهتم بيهن وبالنهايه هذا واقعي .

اجوا جوه ناس من كرايبنه وبالشارع الولد مسوين حفله و فرقه مسيقيه

ومحتفلين الولد ويه علي بأاحسن شكل .. طلعوا محضرين طباخ وعشه وكذا واني ما ادري

يعني العرس من ناحيه الولد عرس حسب الاصول

بس حفله البنات جانت بسيطه حتى قليل الي جاين

للتسعه بالليل صاح احمد :اجه السيد تحضروا

دخلني لغرفه وخليت شال على رأسي و وكعدت

اجه الشيخ وسئل علي : علي عصام موسى هل تقبل بأيه فلاح موسى زوجه لك

جاوبه : نعم اقبل

من بعد جوابه حسيت فقدت تركيزي وماكمت اسمع شيحجون حتى

حسيت ببيتي تندهني فزيت وكتلها :هاا شكو

بيبي :السيد يسألج جاوبي

كتلها : شجاوب

رجع السيد سئلني فجاوبته والعبره تخنكني ودموعي تنزل : قبلت وانت وكيلي

شهدوا الشهود وطلع السيد فدخل علي عليه وهو يبتسم وكال : مبروك

طلعوا الكل وعافونه شوي عود وحدنه فكتله واني ابتسم متجاهله دموعي وكتله : مبروك الك ... انت فزت وصار الي تريده

مسحت دموعي ورجعت اباوعله متصنعه القوه وداخلي يبجي وكتله : حتى لو صرتلي زوج بس تحلم اصيرلك مره دأمك جبرتني

ابتسملي بأاستفزاز و طلع .

للعشره كالولي يلا تحضري

سئلتهن :على شنو

اجت بيبي بوستني وتوصي بيه وكالت : تحضري يجده راح ترحون للبيت مال علي

سئلتها بأاستغراب: ليش شوكت خلص البيت

- يا يجده ما تدرين جا عقلج وين .. خلصه من ذاك اليوم واشتره اثاث يلا هسه تحضري راح يجي ياخذج بسيارته .

رحت خليت مثل الوشاح على جسمي لان الفستان كيبور من فوك و شال على شعري واجت بيبي لزمت ايدي وصعدتني بسياره علي وكامت تبجي وتوصي بي واني على بجيها هم كمت ابجي بكل قوتي

صعد علي وكام يسوق ويباوع عليه شوي وللطريق شوي

رغم بيت علي بنفس منطقه بيت جدي بس حسيت ماريد الطريق يخلص واوصل لسجني الجديد

صرت افكر بأاسوء انواع الافكار ودموعي تنزل وامسحها والكحله تخربطت باوعلي وهو يضحك : يمعوده صرتي باندا دكافي على شنو البجي

مسحت عيوني واني اكوله بأانزعاج : هاهاها شكد ظريف حضرتك

لزم ايدي بس هالمره بدون قسوه وكال : ماكو داعي للبجي ما تغير شيء بالنسبه الج ولا تخافين انتي بصوب وانه بصوب ولا اتقرب الج ولا اتدنالج دامج ما تردين

سحبت ايدي من عنده ودرت وجهي للجامه الى ان وصلنه للبيت فكال : ابقي بالسياره افتح الباب مال بيت نوب انزلي

ما جاوبته ونزل فتح الباب مال بيت ورجع فتحلي الباب مال سياره ونزلت

دخل للبيت ودخلت بعده فقفل البيبان ودخلنه

البيت كلش تصميمه حلو ومرتب ومحضر بشكل أنيق فضليت اباوع بالبيت الى ان كالي :

صعدي فوك ارتاحي وملابسج بالكنتور الي بالوسط سهى خلتهن

هزيت رأسي وصعدت اباوع الغرفه خشب ابيض و الفرشه بيضه و عليها ورود طبيعي

باوعت على الورد وطكيتها بضحكه من كل كلبي صرت مااكدر اوكف من كثر ما ضحكت

دخل علي وكال : شبيج .. ول يابه تخبلت الحرمه

اباوع عليه وكتله : هههههههههههههه شوف هههههه شنو مخلين ههههههههههههههههه

باوع على الجربايه ورجع باوعلي وكال : شبيج يول شنو الي يضحك

سكتت شوي ورجعت اباوع على الجربايه واني اضحك وكتله : خطيه منو هذا الي مسويهن

رحت سحبت الفرشه وكعتها على الكاع ورجعت رجعتها بدون الورد الي عليها وهو يباوع عليه

كعدت على الفرشه واني اباوع عليه يباوعلي مستغرب ابتسمت بوجهه وكتله : شنو بس لا جاي تكول عليه مخبله

ضحكت ورجعت اكوله : والله مسكين يا ابو نجم وكعت براسك وحده مخبله

اتقرب مني ولزم ايدي وكال : أيو بويه .. نامي وارتاحي لا تسوين بروحج هيج

صحت بي : لا تتتتقررررررب مني ... لا تتقرب ماريدك حرام عليك حرام عليكم حرررام تجبروني على كلشيء

وكف ومسح على شواربه وكال : بويه خلص ماكو داعي للي تسوينه صح انتي زوجتي بس ما تصيرلي مره فبعد شنو الي ضارج

كمت على حيلي وكتله : الي ضارني موو ... لا ماضارني شيء بس ضاعت سنه ثانيه من دراستي و انسجنت هنا و ويه شخص مثلك غير هالأشياء كلشيء ما ضارني

كال بهدوء : صح انه احبج و صح دومي تمنيتج و تخيلتج زوجتي وهم صح ان انه ردت اتزوجج بس حتى اكسر خشمج و عنادج بس هذا مو كلشيء أيه
انه تزوجتج حتى احميج من الكل احميج من كلامهم و حجيهم و اتزوجتج حتى انفذ وصيه المرحوم

كمت وسئلته : تحميني من الكل ... هه بس شلون تحميني من نفسك ابو نجم

وكملت : ولا تذبها براس محمد .. اخوي وصاك تحميني مو تكسرني وتجبرني على زواج ما اريده

ما جاوب وراح للكنتور يدور بملابسه فسألته : شنو جاي تسوي

ما جاوب وكمل يدور بملابسه الى ان طلع ورقه وانطانياها وكال : اقري

لزمت الورقه واني اباوعله بأاستغراب ... رجعت باوعت للورقه وشفت مكتوب عليها بخط اخوي محمد

"وصيه محمد فلاح موسى "

تلمست الكتابه بيدي واني ارجف ودموعي تنزل وفتحت الورقه واشوف مكتوب

"بسم الله الرحمن الرحيم والصلاة والسلام على سيد الخلق اجمعين محمد وال بيته الطيبين الطاهرين

قال تعالى : (كل نفس ذائقه الموت )

الى كل من يحبني الى اختي و وحيدتي الى ابن عمي واخي احلفكم بالحق القيوم ان لا تحزنوا بعد رحيلي ولا تبكوا كثيرا على فراقي بل اهدوني أعمالاً صالحه بدل عن ايذاء انفسكم .

و دكمتي الحلوه ايوشه اني اسف كلش لان تركتج بهيح وقت و ماكدر حتى اتخيل حزنج و وحدتج بس لا تخافين و لا تتركين ايمانج بالله العزيز

سامحيني على كلشي سويته قبل و على كل كلمه ضوجتج بيها وسامحيني على الي مريتي بي اليوم

اي اعرف انتي اليوم عروس و ان شاء الله بالرفاه و البنين .. اني الي طلبت من علي ان يدير باله عليج طول عمره واني الي أمنتج عنده واني الي طلبت ان تاخذين هذه الوصيه اليوم تحديدا

اختي الحلوه ثقي بالله لو ان علي انسان ما يستاهلج او بي زله وحده بس ما أطلب منه يتزوجج بس ثقي بالله و بأاخوج ان هذا لمصلحتج

مهما تكونين هسه ضايجه او حزنانه بسببي وبسبب وصيتي بس لخاطرج ولمصلحتج

جان قرار صعب بس جان لازم اخذ هذا القرار الاخير لمصلحتج

اتمنى من الله ان تكونين بخير و ان شاء الله نلتقي بالجنه

استودعكم في حفظ الرحمن "

رجعت قريت الوصيه مرتين و ثلاثه واربعه ودموعي تنزل حضنتها على صدري واني ابجي بصوت عالي واصرخ بدون كلمات بس ااااااخ تطلع من نص كلبي

حسيت ان جبال على كلبي وما راح تنزل من كلبي الا من اصرخ

ضليت اصرخ واصرخ وعلي حاضني و يحاول يهدأني .

حسيت هدأت شوي وعيوني ثكلت فصرت اغمض بعيني الى ان نمت بدون ما احس على نفسي

●○●○●○
لا تنسون التصويت و كتابه رأيكم ☆