وصيه أخي الفصل الثالث 3 - بقلم فاطمه

شكدد عييب غطيت نفسي وطلعت بعد ما صرت حمره من الخجل

على طاري الخجل رحت حجيت ويه بيبي دأقنعها اخذ الغرفه الي مسوينها مخزن اسويها الي استحي انام جوه يم بيبي لان كلساع احد داخل واني من انام اتكشف وفوكاها يكعدون من الفجر وماكدر انام فكالت : والله يا بيبي شوفي ابو نجم شيكول لان هي يرادلها تأسيس كهرباء اساسا وصبغ فشوفي ابو نجم شيكول وبعدين يا بيبي هاي الغرفه بصف غرفه ابو نجم خاف يصير حجي

كتلها : اي يا بيبي وبصفها غرفه اخواته شنو قابل شيصير

- والله انه مادري احجي ويه ابو نجم ويصير الي يريده هوه

شكد صعبت عليه حسيت داتوسل علمود غرفه بس شسوي هذا الي كاتبه الله

رحت للمطبخ شفته خلص غده فأاخذت الماعين اغسلهن و خليتله الجاي على نار هادئه وسئلته : علي اريد فدشيء

- وشنو هذا الفدشيء

- الغرفه الفوك الي مسوينها مخزن اريد اسويها غرفه الي ما مرتاحه بنومتي جوه كلساع احد داخل للغرفه وكلسـ ....

قبل ما اكمل كال :
ان شاء الله باجر جمعه وماافتح العياده واسويلج اياها تتدللين

ابتسمتله وكتله : شكد ما تكلف اسحب من الفلوس مال بيتنا الي بالبنك و سويها

- ان شاء الله

استغربت توقعت يكول خليها عليه ميصير شيء اشو بسرعه قبل ياخذ شكد جحف

قطع افكاري صوته من كال :الجاي راح يحترك !!

-هااا ... اي هسه اصبلك

صبيتله جاي و ردت اطلع فصاحني كال : اكلج بويه علمود سالفتج مال جامعه

اني من سمعت السالفه بيها جامعه كعدت بسرعه حتى اسمع وكتله : اي شبيها

-شسمه ... يعني لازم تكملين تردين

عقدت حواجبي من جهه اكول هذا شبي شنو لازم ومن جهه عصبت فكتله : وليش مو لازم دكتور علي اني هذا حلمي تعبت ووصلتله لو من تيتمت بعد لازم مااحلم حرررام موووو !!!

قابل اعصابي بأاعصاب وهو يكول : حسج كصري لا اكص لسانج

خليت وكمت من عده فطفر لزم ايدي وهو يشمر كوب الجاي : من اكلج روحي يلا تولين من انه احجي متكومين لا رجلج اكسرها

على صوته العالي وصوت الكلاص اجت بيبي و هي تسأله : يااا يمه شجاك دعوفها للبنيه

حاولت اسحب ايدي منه واني اباوع بعيونه حتى ابين اله عكس الحقيقه ان اني ما خايفه منه بس هالشيء زاد من اعصابه فلزم ايدي اقوه وهو يعيط : جامعه ماكو اكسري رجلج وكعدي بالبيت انه مو مكرن واخليج ترحين ويه الولد ببناطيرج عبالج كاعده بالشمال

شمر ايدي واخذ جكايره و موبايله وطلع بعصبيه

حضنتني بيبي وهي تهدي بيه : شسويتيله يا جده وعصبتي هذا اعصابه ما تنحمل وانتي فوكاها تباعين بعيونه بصلافه

ضليت ابجي بحضنها واني اتمنى لو ميته ويه اهلي ولا هاي العيشه كلشي هنا مو مثل عيشتي بس مجبوره اعيش هنا والا منو الي يلفيني خوالي الي حتى بفاتحه امي مااجوا لان مااتزوجت على ذوقهم واخذت ابوي .

ثاني يوم سمعت اصوات هوسه اكثر من هوسه كل يوم فكعدت سئلت بيبي الي جانت تقرأ قران يمي

- شنو بيبي شصاير؟

-ابو نجم جاب الكهربائي و الصباغ حتى يسون الج الغرفه

طبعا بعد الي صار البارحه مااتوقعت منه ان يسويها بس طلع كد كلمته

ابتسمت ورجعت اكمل نومتي لان اساسا مااكدر اطلع من الغرفه و الرجاجيل بره

توني جاي اغفه اندك الباب و دخل علي

لبست حجابي وكعدت فسألني : يالون تردين الصبغ

بدون ماافكر جاوبته : الحيطان بيض و السقف سمائي حتى نفس غرفتي القديمه

بدون ميعلق طلع و مبين بعده ضايج مني .. اي وضوجتهم شسويتله اني قابل .

للعصر خلصوا الغرفه فصعدت اشوفها بعد ما راحوا الرجاجيل

ابتسمت لان جانت مثل مااريدها و الاحلى بيها جان الشباك الجبير الي متوسط الغرفه و يطل على الشارع

دخل علي وراي وكال : حضري نفسج نروح انه وياج و
سهى نشتري الاثاث

نزلت لبست بنطلون اسود وجاكيت اسود فوكاه ولفيت شالي و رحتله

اخذله نظره من الطول للطول ومن شاف ملابسي مابيهن أي شيء مفضوح او بارز للجسم دار وجهه وصاح على سهى تستعجل .

▪▪▪▪▪

وصلنه لشارع مال اثاث فطبك سيارته ونزلنه هو يمشي كدامنه وكلساع صايح بيه نزلي راسج عدلي حجابج سرعي مشيتج ثولني ثول

افترينه شوي واخذنه لمحل واحد صاحبه اخذنه من عنده الغرفه ومرايه طويله اخذت و فراشات و دفع علي ورجعنه بعد مااتفق وياهم يجيبوهن المغرب

ثاني يوم رتبت الغرفه و اغراضي وصرت جاهزه حتى اكعد بيها

سديت الباب وفتحت الجامه اباوع على الشارع والجو جان حلو مطر وهوه بارد

بعدني ما مستمتعه باللحظه الا وعلي دك الباب وكال : سدي الشباك بويه لا يلمحج احد شيكولون علينه بنات الحجي عصام يبصبصن من الشبابيك

ماعرف شلون عرف اني فاتحه الشباك فسديته ونزلت جوه حتى اساعد بالعشه لان اليوم بيت عمي باقر يتعشون ويانه و هوسه واذا مااساعد البنات يكومن يستنحسن مني وخصوصا مهى من اجيت الى الان ولا مره حجت وياي بطريقه حلوه خشمها يابس جنها اخوها

بالرغم اتذكر قبل من جانن يجن زياره يمنه هي و اختها سهى و حتى بنات عمو باقر جانت علاقتنه حلوه ونسولف ونضحك ونباوع افلام سوه بس من كبرنه تغير الوضع وصرت دائما احسهن ميحبني ويضوجن مني .

نزلت بيبتي جانت دتقره قران تريد تختمه لروح ابوي تكول البجي ميفيد هاي الاعمال تفيدهم رغم هواي اشوفها تبجي على اهلي بس متبين الي حتى ماابجي وياها

دخلت للمطبخ عمتي ام علي و ام هيثم جانن يسولفن وهن يسون بالزلاطه و المقبلات و سهى و نهى و بنات عمه شيماء (ام علي) .... بلقيس و سجى بنات عمو باقر جاي يحضرن بالاكل

سألتهم:بشنو اساعدكم ؟

مهى بأاستهزاء جاوبتني : لا يتكسرن اظافيرج عيني اكعدي استريحي

ضحكت بلقيس لان هي الثانيه هم مدري شلونها وياي بس سهى هددتهن وكالت : هااا تره اكول لابو نجم والله

سكتن فكالت سجى بنت عمو باقر

سجى: ايو حبيبتي سوي عصير برتقال ابو نجم راد ومن تخلصين خلي يبرد بين ما يخلص العشه

هزيت راسي وسويت و كعدت اساعدهن نوب شوي واجه هيثم و علي و نائل اخو هيثم جانوا بشغل بره فدخلوا بعد ما سلموا وراحوا كعدوا يم عمي باقر وبيبي.

اجت شمس بنت عمو باقر وكالت : عمو ابو نجم كال حضروا الاستقبال اليوم يجون جماعته يتابعون اللعبه

تافف الكل وماعرفت السبب الا لمن اجو .

▪▪▪▪▪

دخل علي و اخوه احمد و هيثم و اخوانه نائل و حسن و جماعتهم كلهم دخلوا الاستقبال و عاد نوب ضلوا كلساع جاي .. فحم للاركيله ... جاي ... فحم ... جاي مي ... جاي ... شيء ينوكل ... جاي ... جاي ... جاي

وهاي ما عدا الصياح والهوسه اذا صار كول او خسروا كول

واخيرا راح الكل بعد ما خلصت اللعبه وفاز فريقهم الحمدلله والا جان محد تحمل عصبيه علي اذا خسر فريقه

بس من يفوزون احنه بخير

دخل للهول فرحان وبوس راس امه

وكعد يم سهى و مهى يكللهن بعد ما بوسهن : باجر وين تردن نروح

عاد اثنينهن كالن : للمول الله عليك

-خوش بويه تدللن باجر الكل معزوم بالمطعم وبعدين نروح للمول

جان جانب حلو منه اول مره اشوفه حنين و مو عصبي ويضحك بس ما كدرت الزم نفسي من شفته يشاقي اخواته و يسولف وياهن وتذكرت محمد

دمعت عيوني فكمت بسرعه قبل لا احد ينتبهلي

وطلعت للحديقه ابجي بس الظاهر هو انتبه فطلع وراي

وكال: بويه شبيج احد مضوجج صاير شيء؟

باوعت اله وعيوني مدمعه : لا ما صاير شيء

- چا شنو طكت فيوزاتج وتبجين بدون شيء

-علي عوفني مالي خلك

كعد بصفي وهو يباوع عليه بعد ما شافني صدك ضايجه فكال : بس كليلي احد أذاج ضوجج والله انعل والديهم

هزيت رأسي بـ لا

- عجل شصاير سولفيلي بدل متبجين اجيبلج الي تردي والله

ضحكت بأاستهزاء واني بوسط بجيي : اريد اهلي ! تكدر تجيبهم ؟؟

سكت شوي وهمس استغفر الله و رفع صوته وكمل : يول چا انه شنو غريب يا عيني غير انتي وصيه الغالي انه اصيرلج اخ و اب و ام اذا تردين ليش هالدموع وبعدين دموعج هاي تأذيهم انتي ترديهم يتأذون ؟

هزيت رأسي بـ لا

كال : عجل كومي غسلي هالوجهه الحلو وروحي اقريلهم قران صليلهم احسن من البجي

كمت ورحت سويت الي كالي عليه

توضيت وصليت ركعتين لماما و لبابا و لمحمد و كعدت اقرالهم قرآن

دخل علي كعد يمي وابتسم من شافني سويت الي كاله وكعد يكلب بتلفونه دقايق و دخل احمد كاله: اجو جماعتك اطلع شوفهم

هز رأسه وطلع ويه جماعته اني بعد موقفه هذا جنت بحاله صدمه .. لازم يتسجل بالتاريخ علي يحجي وياي بحنيه بشكل رسمي وبدون ما يستهزأ او يضحك عليه .

▪▪▪▪

صارت دنيه ليل فصعدت بغرفتي ارتاح

سمعت سهى و نهى يتعاركن بس ما فهمت ليش فغلست و دخلت لغرفتي

كلت اتمدد شوي بس ما حسيت بروحي الا ساعه بال١٢ كعدت

كمت شغلت الضوه حتى ارتب فراشي بس ما يشتغل حاولت وياه ومااشتغل

رحت لغرفه علي دكيت الباب فتحه وجان بس بالبنطرون

درت وجهي و كتله الضوه مال غرفه ميشتغل بس تكدر تشوفه

- امشي خل اشوفه

- لا اخذ راحتك البس ملابسك وتعال

باوع على نفسه وانتبهه فهز راسه وطلع تيشيرت لبسه واجه وياي للغرفه

دخل فحرك بالشمعه شوي واشتغلت

-شكرا تعبتك

-لا يول قابل شمسوي انه

اجه يريد يطلع فسمع هوسه بغرفه خواته و واضح بعدهم جاي يتعاركن دك الباب ودخل وصاح بيهن .....

●○●○●○

لا تنسون التصويت ♡
+أرأئكم بالشخصيات والقصه الى الان