وصيه أخي الفصل الثالث عشر 13 - بقلم فاطمه

ضربته على صدره لان جان يتقرب مني وكتله : مااسمحلك هيج تحاجيني .. اني شفته انسان مناسب الي و جان رأيدني بالحلال و كتله ارجعلك جوابي باجر فأاعتبرتك ولي امري واجيت اكولك وبالمقابل هيج تجاوبني

باوعلي وعيونه حسيتها تطلع نار من عصبيته وكال : باجر ترجعيله جواب مو .. اي سهله هيج احنه بناتنه تايهات يرجعن اجوبه بكيفهن

- علي اني ما مسويه شيء غلط

صاح بيه و عروقه صارت تبين من الاعصاب : الا غلط ونص .. اساسا تفكيرج بغيري غلط انتي الي فاهمه شنو يعني .. انتي لو الي لو للتراب لو انه اخذج لو الله ياخذج

حسيت كلبي فز بكلامه ومثل واحد صافن وضربوه على وجهه

اتقرب وابتعدت منه بخوف فلزم وجهي بأايده وهو يكول : ممنوع تصيرين لغيري ممنوع هاي العيون تصير لاحد ثاني

اشر على كلبي وكال : هذا ما ياخذه غيري .. انه احبج ما كايلها قبل لا الج ولا لغيرج أيه انه احبج من اول مره شفتج بيها من جنتي طفله وانه ما اتقرب لوحده ولا اباوع لوحده اذا ما اقارنها بيج

حرام عليج تعبت .. عقلي تعب من التفكير بيج و كلبي تعب من حبج ارحميني .. ليش هيج تكرهيني ليش ما ترديني

اني اسمع كلامه ودموعي تنزل واشهك من البجي

كعدني على كرسي وكعد ولزم ايدي وكال : مستعد اسوي كلشيء علمودج انه تعبت وياج وهيج تاليها تجين تردين موافقتي حتى ازفج لغيري لو اعرف اموته لليريدج و اموتج و اموت نفسي و ما اخلي غيري يلمسج

تقرب مني و مسح دموعي وقرب شفته من شفتي وباسني حسيت كأن كهرباء ضربتني

دفعته و من خوفي ضربته راجدي

فتح عيونه بعصبيه و كام وكسر كلشيء بالعياده صار يضرب بميز كزاز بيده الى ان ملئ الدم المكان واني ساده عيوني وابجي من الخوف

اني الي طول حياتي احلم بفارس احلام رومانسي و يخاف عليه من كلشي بالنهايه أكون بهيج موقف واشوف انهيار علي كدامي من اعصابه

ماعرف شصار بيه وقتها الخوف اخذ مساحه جبيره من عقلي و قلبي ماجنت اكدر افكر بشيء

فسديت أذاني وصرخت بي : كافي ... كااااافي الله يخليك كااافي اريد اروح

من سمع صياحي هدأ شوي بعد ما كسر المكان كله

فتح الباب وطلع كدامي شغل السياره وصعدت وياه واني كلبي اذا وكف من الخوف ما استغرب .

جان يسوق وكل شوي يمسح ايده الي اتجرحت بملابسه حتى يلزم الستيرن عدل

الدم ترس المكان و ملابسه رغم خوفي بس اخذت ايده من الستيرن و لفيت الوشاح عليها عدل حتى يخف النزف

شفته يباوعلي وعيونه اول مره اشوفها حمر لهاي الدرجه

تجاهلت نظراته وكملت لف ايده وكتله : انتبهه للطريق ما محتاجه حوادث اكثر اليوم

رجع يباوع للطريق وما رجع حجه شيء وياي

وصلنه للبيت وجان الكل منتظرنه من جهه متاخرين ومن جهه رفض ياخذ سجى واخذني بس وفوك هذا كله رجع و ملابسه كله دم و حالتنه حاله

بس دخلنه وكفت امه بسرعه وهي تصيح : يمه وليدي ... يمه شصاير وياك يمه سوده عليه

هيثم و سجى يباوعون عليه مره وعلى علي مره

احمد الي راجع من بغداد شافني مخطوف لوني فكال : اكعدي بابا شصاير وياكم

اجيت اكعد صاح بيه علي : روحي لغرفتج .. وانتوا كافي تتسئلون صار حادث و انسد الموضوع هاي هيه

بيبي تكوله : يجده حادثيش البنيه مصوفره وانته مدمه شنو من حادث هذا

- حجيه يرحم والديج عوفيني ارتاح ولا تسئلون شيء

كامت سجى جابت الجنطه مال اسعافات وكالتله اكعد خل اشوف شبيك خاف مكصوص الوريد

راد يعترض وكال : لا مابـ ...

صاحت بي امه : يمه دخل تشوف شبيك لا تموتني يا يمه

تافف وكعد وكال : صار يمه صار

باوع عليه وشافني بعدني واكفه وصاح بيه : مو كتلج اصعدي

نزلت دموعي ورحت ركض للغرفه وسديت الباب حتى محد يجي ويسألني اعرف فضولهم

كعدت ابجي ابجي الى ان ارتاحيت شوي وشفت خالد دازلي رساله : حبيبتي وصلتي

قريت الرساله وضليت ابجي وما جاوبته

رجع دزلي وكال : أيه ليش متجاوبين ؟

ودز مره ثانيه : اذا ضجتي لان كتلج حبيبتي فـ اعتذر بس ردت اعرف جوابج شنو

كمت ابجي بالزايد و اني اباوع لرسائله لزمت الموبايل وايدي ترجف وكتبتله : خالد اني اعتذر اني وانت مو مناسبين لبعض فكرت بكلامك واني جدا اعتذر واتمنالك الموفقيه بحياتك و ياريت لو تنساني وتمسحني من حياتك .

قرأ الرساله و ما جاوب

سديت الموبايل وكمت غيرت ملابسي و اباوع على نفسي بالمرايه الشال معوج و ملامحي مخربطه و وجهي مابي قطره دم .. غسلت وجهي ورحت للفراش حتى انام و شفت دازلي رسائله وكاتب : صاير شيء

ما جاوبت و مسحت الرسائل .. شوي وصارت مرام تتصل عليه وما جاوبتها

أصرت هواي بأاتصالها ففتحت خط وكتلها قبل لا اسمع كلامها : مرام صدكيني تعبانه وماكدر احجي و ياريت تكولين لخالد ينساني

سديت الخط و قفلت الموبايل ونمت .

مرن يومين واني ما رحت للجامعه وما طلعت من غرفتي الا للضروره و تجنبت اسئله الكل وتجنبت علي خصوصا لا شفته ولا شافني بهاي اليومين

بعد اليومين هذه رجعت للجامعه وجنت اتعمد ادخل محاضرات هواي حتى ما ألتقي بخالد اما مرام فكل ما تسأل اكوللها : مو مناسبين لبعضنه

يمكن خوف ويمكن مشاعري تغيرت او حتى يمكن صدمه عاطفيه الي صار وياي بس من بعد كلام علي حسيت بتغير جبير بمشاعري و ماعرفت من أي ناحيه .. لا ما حبيت علي بس بنفس الوقت ابتعدت مشاعري عن خالد .

مر أسبوع وخلاله جنت كل ما اسمع بعلي اجه اصعد لغرفتي وما اطلع اسبوع واني ما شايفته او شايفني

جنت اريده يكرهني او ينساني او أي شيء بس المهم ما اتقبلت مشاعره الي جانت تهددني .

▪▪▪

جان يوم جمعه كعدت من النوم متاخره وجان البيت هدوء نزلت وما لكيت احد بالبيت استغربت يعني حتى لو طالعين جان كالولي .. ردت ارجع اصعد سمعت صوت بالمطبخ رحت للمطبخ وشفت علي كاعد يشرب جاي .. اجيت ارجع على كيف واصعد قبل ما ينتبهلي بس فات آلاوان من كالي : صح النوم

تلبكت وماعرفت شسوي بس كلت خل اتصرف بشكل اعتيادي واشوف شراح يصير

صبيتلي كوب جاي وطلعت للحديقه اكعد .. اجه علي وراي وكال : لازم نحجي

-ماعندي شيء احجي وياك .. وبعدين وين راح الكل

- معليج بالكل اني طلعتهم حتى اكدر احجي وياج

من كال هيج كمت حتى ارجع لغرفتي بس لزم أيدي وكال : أيه ضروري نحجي رجاءا لا تجبريني اسوي شيء ماريده

كعدت واني اباوعله بعصبيه وكتله : مريض انت .. كله تهديد و تهديد بالغصب اسمعك يعني لو بالغصب احبك لو شنو

مسح على وجهها بأاعصاب جان يحاول يتملكها وكال : انه اعتذر حاولت الزم اعصابي بيومها لان جنت مثل النار و هدأت هاي النار من تأكدت ان المحادثات مفبركه بس انتي شسويتي ذبيتي نفط على ناري و الي يذب نفط على النار يحترك ويحرك كلشيء وياه

ضحكت وكتله : يعني هسه اني الغلطانه

كمت وكفت وباوعت بعيونه وكتله : انت اكثر انسان اناني شفته .. انت متحبني هذا مجرد وهم انت صنعته حتى تقنع نفسك انت تريد تمتلكني وبس

باوع لعيوني وكال : اي اناني .. و خل أزيدج مستحيل ابطل أنانيه بحبج .. اناني وحتى تتاكدين احب اكولج تتذكرين حسان هذا الي حبيتي بدل عني واجه تقدملج انه الي خليت المرحوم عمي و محمد يرفضونه و انه الي دزيتلج صور خيانته مو لان اكرهج بس ما جان يستاهلج

دفعته وصحت بي : ومنو الي يستاهلني واحد مريض نفسي مثلك

- انه مريض بيج وهالمرض ماله علاج صدكيني حاولت ما ضلت مستشفى ما رحتلها حتى اتخلص من مرضج بس محد عالجني

ضحكت بأاستهزاء ودموعي نزلت واني اسئله : أي مستشفى تقصد ذيج الي ببغداد الي طلكتها وانطيتها حقوقها كامله

لمحت بوجهه الفضول بأن شلون عرفت بس ما سئلني رجع كال : جنت تعبان من كثر ما دورت على الي يشبهنج من اليوم الي شفتج بي تباوعيلي مثل ما تباوعين لأي شخص ثاني و انه جنت اباوعلج و اخاف عليج من عيوني قررت اترك حبج فصرت اروح لكل وحده تشبهج واحاول احبها بس بالنهايه ما حبيت ولا وحده بيهن

سئلت بأاستغراب : بيهن ؟!!

هز رأسه وكال : وانه بعد رجال والي احتياجاتي فجنت اتزوج زواج مؤقت حتى ما ادخل بالحرام جنت اعطيهن حقوقهن كامله بس الشيء الوحيد الي ماكدرت انطي الهن هو هذا

كال واشر على قلبه وكمل : يمكن لان هو مو عندي اساسا

كلت بخوف : علي انت مو طبيعي

ضحك بصوت عالي وكال : ليش لازم أصير طبيعي ... ظلم هذا اذا منتظره من واحد من هو عمره ١٢ جانت عائله شكبرها بركبته ان يصير طبيعي

أيه انه كبرت وانه خايف على خواتي وامي و اخوي كبرت وانه افكر كل يوم شلون راح اجيب الهم لكمه لباجر ... انتي ما جنتي موجوده ما تعرفين ان اني من اول ما فتحت عيني للدنيا و ابوي يصارع حياته

كل يوم جنت اكعد يمه من ارجع من الشغل ساعه ١٠ وقبل لا ابده أدرس دروسي جنت اكعد يمه ساعه كل يوم يوصيني على خواتي وامي .. كل يوم وصاني وكأن باجر راح يموت جان يعلمني بهاي الساعه ان ما أمد ايدي لاحد وان اعتمد على نفسي و اصير قوي لخاطر عائلتي

جنت اتعرض لانواع الضرب و التعنيف انه كبرت و قويت بالشوارع من جانوا يجون الاكبر مني ويضربوني وياخذون تعب شغل يوم كامل ويرحون يشربون بي

جنت استحي ارجع لامي واكوللها ما كدرت اجيب شيء وياي لا علاج ابوي ولا اكل لباجر فأابقى بالشارع انام حتى مارجعلها فارغ

بس يوم على يوم قويت و صاروا الي يضربوني و يخوفوني يخافون مني

كملت دراستي رغم انه ادرس بس بالليل وانام كل يوم بس اربع ساعات حتى الحك اشتغل و ادرس بنفس الوقت

بعد ما توفى والدي بعنه البيت ورحنه لبيت جدي سكنه وياهم واشتريت محل زغير فتحته اسواق وصرت اشتغل بيها وادرس للسادس بنفس الوقت

باليوم الي اخذت بي شهادتي حسيت بعد محد يكدرلي وحسيت ان انه قوي حتى اقوه من لمن ضربت الي ضربوني

صرت اداوم جامعه واشتغل بنفس الوقت و اصرف على نفسي و امي ودراسه اخوي واخواتي

كل هذا مريت بي ومنتظره مني اكون طبيعي .

●○●○●○
لا تنسون التصويت ☆