وصيه أخي الفصل الثالث والعشرون 23 - بقلم فاطمه

واني بالسياره جنت حيل متوتره و أكلت شفتي كلها من التوتر و ما جنت منتبهه لعلي الي جان منتبه لكل حركاتي

فلزم ايدي حتى يخفف توتري وكال : الله و يانه اعتمدي عليه مهما صار وما راح يخذلج

هزيت رأسي واني اباوعله بخوف فلزم ايدي وباسها

حسيت الطريق كلش قصير يمكن لان ما جنت اريده يخلص واعرف نتيجه الخزعه .

بعد ما وصلنه دخلت اني و علي لازمني ويمشي بيه لان بالي ابد مو هنا وما جاي اكدر اجمع تركيزي لدرجه ان جنت امشيء واسمع علي يسأل ببمرضين وهيج واني بس اباوع بعيوني بفراغ الى ان وصلنه للدكتوره

دخلنه غرفتها .. اخذت نفس قوي وحاولت ابتسم بشجاعه بس ماكدرت

دخلنه وكعد علي يسألها على النتيجه فكالت : مثل ما جنت متوقعه .. الخزعه اثبتت ان عدها سرطان الرحم للاسف بس اكيد اله علاج مثل الكيماوي بس نصيحه اخت اخذها للخارج العلاج اضبط هناك

صار علي يسألها مره ويباوع عليه مره يشوف رده فعلي

اما اني ماعرف من وين أجاني الهدوء .. هيج ظليت ساكته وبس اباوع يعني شغله عجيبه قبل شوي جنت ميته خوف قبل لا اعرف النتيجه بس هسه مشاعري هادئه تماما

لدرجه ان علي انتبه لهذا الشيء وسئلني : شلونج

هزيتله راسي وكتله : الحمد لله

بعدها صار علي يسأل الدكتوره عن العلاج وغيرها وياخذ نصائحها وهيج شيء .

ماعرف شنو جنت احسها بوكتها بس الله ذب السكينه بكلبي صح خايفه بس مستسلمه .. مرن عشره ايام وعلي سوده عليه ما يندل رأسه من رجليه

باع قطعه كاع عنده و باع عيادته و تحضرنه نروح للبنان اتعالج

اني بدون ما يدري علي سحبت من الفلوس مال ورث اهلي و اخذتهن احتياط .

البيت فرغناه و أجرناه لوادم يعرفهم ابو نجم لان كال نتاخر واحسن ما يبقى فارغ .

ودعنه اهلنه وطلعنه للبنان و رحنه هناك هم فحوصات و سولي ناظور مهبلي حتى يتاكدون .

بعدها تقرر ان اخذ جرعتين كيمياوي وبعدها يسئصلون الرحم

وهنا جانت مصيبه ثاني حسيتها توكع على رأسي .. لان كل الي ببالي ان بالكيمياوي ينتهي كلشيء ما جنت حاطه برأسي ان يستأصلون الرحم من صدك .

رفضت وكتله ماريد .. اخذ الكيمياوي اي بس أستصال لا

عاد هو هم ظل يومين يقنع بيه ويهديني .

اجه موعد الكيمياوي مالتي وساعتها حسيت بخوف جبير .

جان لازم انام وارتاح حتى الصبح نروح للمستشفى علمود الكيمياوي

بس ماكدرت عيوني تشوف النوم ومن العصر واني الخوف ياكل بكلبي رغم علي طلعني وافترينه حتى يغيرلي جو بس الحزن بكلبي ومايروح بالطلعات والفرات .

بليل جان علي متمدد على الجربايه ويخابر بعمه يطمنها ومن خلص شافني كاعده واباوع عليه فسئلني

- بويه محتاجه شيء

هزيت رأسي وكتله : اطلب طلب ؟

- عيوني الج .. اعتبري تم بس كولي شتردين

تقربت عليه وكتله : خايفه .. عادي تحضني وانام

فتح ايده وكال : عجل بويه شمنتظره .. حضني وانه كلني الج .. كربي ليه يا وجع كلبي

تقربت ونمت بحضنه وصارت دموعي تنزل .. كام يقره على رأسي قران ويعيد عليه قول تعالى : وقل لن يصيبنا الا ما كتب الله لنا

من كثر ما عادها نمت واني ارددها .

▪▪▪▪

واجه الصباح و لا هلا بجيته تمنيت ميته قبل لا يجي من الخوف

اباوع بصفي علي مو يمي بس سمعت صوت بالحمام فأاكيد هو .

تحضرنه وطلعت ويه علي واني ماعندي فكره شلون راح يكون العلاج ما تجرأت اسأل .

بعد ثلاث ساعات جنت كاعده على السرير بالمستشفى و الدكتور بصفي يضحك ويتشاقى ويايه واني حاولت اندمج وياه حتى اخفف توتري .

نمت واجه حطلي مغذي و ضربوا كم ابره بالمحلول واني عادي مااحس بشيء .

علي بصفي لازم ايدي وطلبت منه يقرالي قرآن وهو ماكال لا

خلص المغذي الاول والفرحه جانت بكلبي ان خلاص خلصت بدون وجع ولا شيء

فكلت لعلي : يلا خلص نروح

باوعلي بأابتسامه حزينه وكال : بعد بويه اصبري بعد ما خلص

اجت الممرضه وركب الي كيس مغذي ثاني و بعدها ثالث و بعدها رابع و خامس و بعدها السادس و ضربولي بي انواع الابر

وهذا السادس هو جان دماري .

حسيت الدم بجسمي كله صار نار و الي يمشيء بأاوردتي مو مغذي لا نفط او كاز

صرت ابجي من الوجع واريد اضغط على ايد علي من وجعي والتعب حتى ماكدرت

وهو خطيه يمسح بدوموعي ومستمر يقرالي قرأن و يطمئن بيه.

خلص المغذي الاكشر هذا و رجعنه للبيت طبعا مااكدر احرك طرف مني

من الوجع نمت واني احس معدتي نار و جسمي نار ونفسي لعبانه واذا احرك اصبع مني يرادلي الف حيل .

خلص يومين واليوم الرابع اجه واني بعدني احس بأالام غريبه وحتى مااكدر ارفع الخاشوكه واكل كله علي يوكلني .

وهذا بعيد عن ان كل يوم ألكه كومه من شعري واكع على المخده و مرات اذا اتاخر بالنومه ما الكه شعر لان علي يلمه كله قبل لا اكعد واشوفه وانقهر .

مرت اول عشر ايام واني ضعفت لدرجه جبيره وكل هذا وعلي يسولف ويضحك وياي ويطلعني بالليل نكعد بحديقه ويسولف وياي .

تحسنت شوي رغم الوجع بعده بأايدي الي ضربوني بيها بس احسن من اول .

كدرت اتحرك و اسبح وحدي .. باليوم الي قبل الجلسه الثانيه سبحت ومنتظره علي يجي ويمشط شعري لان ما يقبل اني امشطه .

انتظرته بس تاخر لان راح يجيب غده فكلت اني امشط وساعتها عرفت ليش ما يقبل ان امشط .

صرت امشط و الشعر يوكع خصل .. خصل كبار مو قليلات نص شعري يمكن وكع بحضني ومنا هو طويل ترس حضني شعر .

صارت دموعي تنزل واشهك بالبجي ما تحملت هيج كل يوم اخسره و فوكاها وراي جرعه ثانيه اكيد يوكع كله .

كمت للحمام واباوع على شعري وابجي .. شفت مكينه الحلاقه مال علي .. فشغلتها وسديت عيوني واني اكول : يارب صبرني .. يارب قويني

ورفعتها لرأسي وزينت شعري كله .

فكرت بساعتها ان اخلص منه مره وحده احسن من ما اشوفه يخلص كدامي ويخلص حيلي وياه .

رجع علي فتح الباب ودخل .. شافني بالحمام و الشعر داير مدايري تارس الكاع

ظل يباوع بصدمه فركضت سديت الباب ماريد يشوفني هيج وحطيت شال على رأسي وظليت ابجي

دك الباب وما جاوبته وبس ابجي .. صاح : ول بويه راح ادخل

- علي الله عليك عوفني وحدي

ما جاوب ودخل .. جنت كاعده بالكاع فأاتقرب يمي وكال : يتعوض والله يتعوض .. كلشيء يتعوض اهم شيء سلامتج

هزيت رأسي ب لا وكتله : بعدك تحبني حتى واني هيج ؟

ضحك بوجهي وكال : انه عمري ما بطلت احبج من يوم ما شفت خلقتج

تقرب وباس شفتي وهمس ألي : اريد اشمنج من المكان الي بي ترد رويحتي

وشمني من ركبتي وباس شامه ركبتي

ما رفضته رغم هالفتره كلها اني ما اقبل يتقربلي ما الي خلك بس اليوم جنت محتاجه قربه

تكرب وشالني للسرير و صار يشمني من ركبتي ويبوس بيه بحنيه ويهمس : الله من خلقج مدري بلوه لكلبي مدري بلسم لجروحي

♡♡♡

جنت كاعده واني اراقب المغذي الخامس يخلص واتمنيت ما يخلص لان دائما السادس هو الي يكون يأذي كلش

علي بصفي يحاول يلهيني حتى ما اركز بالوجع بس ميفيد جنت خايفه

لزم ايدي وهو يشوف الدكتوره تشيل المغذي الخامس وتبدله بالسادس .

اول ما حسيت بي يدخل لشرايني نزلت دموعي بوجع وخوف رغم ان هذا المره ما جان يأذي مثل اول مره بس لان مركزه بي .. فدرت رأسي لعلي وكتله : احجيلي شيء

هز رأسه ولزم ايدي بأايديه وكال : شتردين تسمعين

- الي يعجبك

- اذا الي يعجبني فـ انه انتي الي تعجبيني .. شون هيج لازم اسولف عليج

ضحكت بقهر وكتله : شتسولف عليه .. لا بقت صحه ولا جمال

-الصحه ترجع والجمال موجود .. انتي عميه لو ثوله ما تشوفين هاي العيون شحلاها جنها شواطي البصره و الا الشفه الي ربتلي عله من جمالها .. والخصر والطول العسل شحجي وشكول خليني ساكت

ضحكت وكتله : هيج تحبني وتشوفني حلوه واني بهيج حاله

- والعباس احبنج حب ابو لبنته .. حب اخو لاخته و حب حبيب لحبيبته .. مو كافي تسألين هيج حبج ما واضح بوجهي

ابتسمت وبست أيده الي لازمه أيدي .

شفت الممرضه تدخل وتشيل المغذي و اني ما جنت منتبهه اله خلص

بس تبقى الايام الي بعد الكيمياوي صعبه خصوصا اول ١٠ ايام خلالها اتعب لدرجه مو طبيعيه وانام بكثره واصير ما احرك ايد ولا رجل من تعبي وكلشيء برأس علي يطيح .

بعد الجرعه الثانيه سويت سونار و فحص وكانت نتيجته ان السرطان متقلص بس يحتاج يسئصلون الرحم .

وقتها انهاريت وتعبت نفسيا لان جنت رافضه وعلي شكد حاول وياي ورفضت الى ان كتله

- خوش اسويها بس بشرط

- اشرطي بويه عيوني الج

- تطلكني....

●○●○●
لا تنسون التصويت و كتابه رأيكم ☆