وصيه أخي الفصل السابع عشر 17 - بقلم فاطمه

•°•°•°علي•°•°•°•

بعد ما عبرت عن اللخبطه الي صايره بمشاعرها وبعد ما طلعت الي بكلبها وقرأت وصيه المرحوم محمد حسيت بيها نامت وهي بين أحضاني

غطيتها ورحت سبحت وصليت وفرشت بالكاع يمها ونمت .

كعدت الصبح على صوت المنبهه جنت ناسي اطفيه و اني ماخذ اجازه فرجعت اريد انام بس جسمي متكسر من الكاع

فكمت ونمت على طرف الجربايه وعيني على أيه

هذا الي جنت رايده اني انام واكعد وهي يمي بس مو بهاي الطريقه .. جنت رايدها تحبني مثل ما انه احبها مو تشوفني انسان مهوس بحبها لا بالعكس تحبني كثر ما انه احبها

بس صار الي صار .. أذتني بكلامها وخطاطيبها كثروا وكلام عمي الي جان يكولي : لشوكت تصرف عليها وشلون راح تبقى كاعده ببيت كله زلم لازم واحد يستر عليها

جان يريد يحجي ويه جدتي و يخلي هيثم او حسن يتزوجوها بس انه رفضت وكتله البنت بأامانتي وما يصيرلها شيء

رفضت ياخذها احد مني بس من اجت وكالت انه تقدملي واحد واريد اتزوجه ساعتها انه مدري شصار بيه

بس سكتت وما جنت احجي صدك من كتلها اجبرج بس من اجه هذا الخسيس الي وياها بالجامعه وهددني بأن يتزوجها غصب عني هنا ما تحملت والي زاد الطـ ...

شفتها تحركت وطلعتني من تفكيري ركزت بملامحها وجانت تعبانه هواي تعبت هالبنيه

و وعد على نفسي وعد والله الشاهد شكد ما اكدر راح اخفف عليها تعبها

لو اعرف اخذ من تعبها واضيفه لتعبي بس المهم هي تصير بخير .

ضليت مخلي ايدي جوه راسي وادحك عليها فتحت عيونها ببطئ وابتسمت وكالت : صباح الخير يأاسمر يا حلو

فتحت عيوني بصدمه وكوه لازم روحي حتى ما اضحك واخليها تصحصح فكتلها : صباح النور يكيمر يحلو

تقربت وحضنت ايدي بأاثنين اديها ونامت دقيقه وفزت من مكانها

تباوعلي بصدمه و وجها احمر من الخجل فطفرت من الجربايه ودخلت الحمام وسدته عليها

صرت اضحك عليها بسكوت حتى ما تخجل اكثر وكمت حتى اغير ملابسي

سمعت موبايلي يدك فشفته احمد جاوبته وكال : ابو نجم انه بالباب الاهل دزولكم الريوك

سديته منه ونزلت اجيب الريوك منه

فتحتله الباب فأابتسم وكال : ها خويه شلونه العشك

ضحكت وكتله : يول مو زين أمس بالليل كوه نمت

•°•°•أيه•°•°•

بس ما صحيت على نفسي شفت روحي حاضنه ايده ومصخمه بالحجي فطفرت من خجلي وللحمام

يربي شكد اكرهه روحي من اجفص بوجه الي يكعدني من النوم

غسلت وجهي واريد ابجي من فشلتي و حتى ردت ابقى بالحمام لو ما دك الباب علي وكال : ول بويه ما ناويه تطلعين شنهي تره جعت ومنتظرج على الريوك

جاوبته وحاولت امسح نبره الخجل من صوتي وكتله : اي جايه

انتبهت لملابسي بعدني بنفس الفستان مال بارحه

فطلعت وشفته كاعد على الجربايه وصينيه الريوك بالكاع وكال : ما تغيرين ملابسج

كتله : اي هسه اغيرهن

رحت للكنتور وادور شيء البسه ..كلبت بالملابس كلهن قصار وضيقات وهيج فأاخذت القطعه الاحسن بيهن الي هي دشداشه طويله وبيها فتحه من الجانب وربع ردن

فأاخذتها واخذت شال فوكاها ودخلت للحمام غيرت ملابسي وطلعت

كعدت يمه على الصينيه وكعدت اكل و الشال الي لابسته ضوجني كلساع يوكع واعدله يوكع واعدله سوه الريوك زقنبوت عليه فكالي علي : بويه نزعي تره انتي حلالي بعد شكو هالشال

ما جاوبته فمد ايده ونزل الشال من شعري وكال : اي هيج عوفيني اتمعن بهالجمال .. سبحان الخالق

بلكوه صرت ابلع اللكمه من خجلي فضحك وكال : يول هسه مستحيه و مساعه تتغزلين بولد الناس مو عيب

غصيت باللكمه فصار يضحك وانطاني مي وكال : شربي بويه شربي منحجي بعد يلا

سكت وهو كوه ضام ضحكته فردت اغير الموضوع وسئلته : متداوم اليوم

- لا غير عود على الاساس عريس شلون اداوم

-يعني راح تبقى هنا

- بويه زاعجج بشيء

- لا مقصدي بس شراح نسوي كاعدين هنا ليش ما نروح لبيت جدو

- لا مترهم ... خليني مرتاح هيج اليوم

سكتت وكمت اشيل الصينيه فكال : عوفيها انه انزلها الدرج عالي لتوكعين وشيخلصنه

كتله : لا عادي اني انزلها

-يول لا تعاندين انه انزلها وانتي غسلي الماعين عود

كتله : خوش لعد

كام نزل الصينيه ونزلت وراه فرغت الماعين و وكفت اغسل بيهم وهو واكف وراي وساكت

انداريتله فكتله : اكو شيء

هز رأسه وكال : لا

رجعت اغسل وبعده واكف فسألته مره ثانيه : اكو شيء

- لااا

-لعد ليش واكف هنا

- واكف يمج بيها شيء

هزيت رأسي ب لا وكملت غسل فنشفت أيدي وسئلته : شنو تريد احضر غده

- لا تحضرين امي كالت تدزلنه

- خوش ... هسه شنو

هز اكتافه وكال : شنو

كتله : شنو راح تسوي

-ما اسوي شيء

- هااا .. اني لعد راح اروح للغرفه اتابع شيء بالتلفزيون

كال : خوش روحي انه شوي واصعد

- ليش تصعد

ضحك وكال : بويه بيج شيء مدري شلونج

هزيت رأسي ب لا وصعدت اكلب بالتلفزيون بملل الى ان اجه وكعد بصفي وهو يكلب بتلفونه فسألته : عندك انترنت

فكال : انه مكنك على الجيران بين ما باجر اروح اجيب راوتر

كتله : شنو الرمز اني هم اريد

- ماعرفه الولد خلالي الرمز وما سئلته

-هاا زين

سكتت واني احاول اتفرج على التلفزيون بس الملل جان يذبح .. شفته يراسل احد و صار عندي فضول اعرف منو فسئلته

- جاي تحاجيها

باوعلي باستغراب وكال : منو هي

- ذيج الي ببغداد

ضحك وكال : لا بويه الحرمه راحت بحال سبيلها انهيت الي بينه

كلت مسويه نفسي مااهتم : مدخلني اني بس ليش انهيته يعني تبقى رجال والك احتياجاتك

- تغير الوضع هسه انه رجال متزوج

عدلت كعدتي وكتله : شنو تقصد

ضحك وكال: ما اقصد شيء بويه رجعي نامي احسن الج

ما نمت وسئلته واني ميته ملل : ليش ما نروح لبيت بيبي والله ضوجه هنا

- يول جا انتي تردين تفضحينه مو اكولج ما ترهم بويه ماترهم .. الوادم ما يكولون عرسان شعدهم جاين يمنه

ضحكت وكتله : اي صح عرسان .. وشلون عرسان

كمت ونزلت جوه افتر بالبيت هيج بدون ما اسوي شيء بس فجأه وطفت الكهرباء واني منا شلون اكرهه الظلمه والجو جان مغيم والبيت صار اظلم كلش عبالك دنيا ليل فعيطت بخوف وصحت : علييي ... الله عليك تعال ما اشوف

صاح عليه : جايج جايج

وكفت بمكاني واتخيل الشياطين والجن داير مدايري وصرت ارجف ورجعت صحت : علييي وينك

- ابويه انتي بس اوكفي خل اشوف موبايلي وين واجيج

- عوف الموبايل بربك تعال والله اخاف

نزل الدرج وهو يتلمس وصاح : وينج شو خنستي

- هنا .. هنا تعال

تقدمت وحسيته واكف كدامي فلزمت ملابسه وكتله : ليش تاخرت

- يول شتأخرت .. غير نزلتلج بالظلمه فوكاها .. تره هسه اصعد واعوفج

- لا دخيلك والله اخاف منهم

ضحك وكال : منو

- الجن

- يمعوده همه يخافون من عدنه مو انتي تخافين منهم

- اي صحيح همه يخافون مو احنه جنانوه

ضحك وكال : ول يابه شتخربطين كمتي

-شمدريني هو اعرف شحجي من خوفي

ضحك ولزم ايدي وصعدنه الدرج للغرفه فسألته : ليش ما اجت الكهرباء لهسه

- مادري ... هسه تجي لتخافين

- خل نروح لبيت بيبي عدهم كهرباء هسه حباب

- والله عاد لطشتي ببيبي يمعوده دعوفي المريه ترتاح منج .. وبعدين همه هم ماعدهم كهرباء هسه لان ساحبين من نفس المولده

واحنه جاي نمشي حسيت بشيء طخ رجلي فعيطت وطفرت من مكاني وردت اوكع واوكع علي وياي وهو خرب من الضحك واني ميته من الخوف واضرب بي : لتضحك والله اكو شيء لزمني من رجلي

- ماكو شيء والله .. شو اكعدي على الجربايه

- وينننن رايح ؟!

- خل اشوف المولد شبيها

- وين عايفني وحدي .. لا حباب شبيك

- يابه عايفج بصحراء خوما صحراء وبعدين ليش وحدج مو هالوادم كلها يمج

- يا وادم ؟

ضحك وكال : هههههههههه يول الجنانوه

- يااااا علي بربك كافي

كعد بصفي على الجربايه وكال : خل اسولفلج سالفه صارت ويايه فديوم

سئلته بخوف : بس لا بيها جن

- لا بيها طناطل بس

كتله : لا لا لتسولف لعد

- براحتج

سكتت وصار هدوء وبدأ فضولي يأكلني حتى اعرف شنو السالفه فسألته : تخوف هيه

ضحك وكال : شويه

- زين صارت بالليل لو الصبح

- ههههههههههه ... تعاي يول اكعدي بصفي وخل اسولفلج لا تضلين تسألين بالاقصاد

تقربت يمه وكتله : سولف بس لتخوفني حباب

- لا حول الله ... بويه طلعتي بوخه .. شمس متخاف مثلج

- اي ديلا يلا سولف

- اي .. هاي بيوم جنت رايح انه و نائل و احمد لكربلاء فطلعنه بالليل حتى نوصل الفجر فـ نائل جان يسوق وانه نايم وره و احمد عود يوصفله طريق مختصر وانه معتمد عليهم وماخذ راحتي ونايم لان جنت راجع من العياده وكبل طلعنه فما ارتاحيت

- اي

- اي .. انه نايم نوب ما احس الا السياره تهتز و السياره من كل الجهات تنضرب بحجار زغير

فزيت من نومتي واباوع لاحمد ونائل وجوهم صفره خضره سئلتهم .. يابه شكو وين احنه وشصاير

جان يكولولي .. تيهنه وهاي المنطقه مسكونه وكلها طناطل

- يمه ... اسمه الله دخيلك ربي

-ههههههههه خاب انتي لو ويانه وكتها تموتين من خوفج هذا ... اي عموما اباوع المنطقه كلها بس نخل وضلمه بنص الليل و منشوف بس اشياء تتطافر على النخل نوب طريق طويل ميخلص وعلى ساعه الساعه تتكسر الجامات من الحجار الي ينشمر علينه

عاد هذا نائل كام يصيح .. سجين وحديده .. جيبوا السجين والحديده

انه فهمت جاي يسوي هيج حتى يخوفهن لان الطناطل يخافن من السجاجين والحديد بس الضحك صار على احمد كام يدور بكل مكان بالسياره ويصيح... يا سجين ما جايبين سجاجين ويانه

احنه خربنه ضحك عليه و بالف الحمد الله يلا خلص الطريق و رجعنه للطريق الاصلي

- ياااا عود صدك لو تتشاقه

- اي والله صدك

- عزززه الله يساعد كلبك شلون ما خفتوا .. الحمد لله على السلامه

ضحك وكال : ههههههه ... هسه انه اسئلج وانتي سولفيلي

- خوش .. اسئل خل نشوف

حسيت بي تمدد على الجربايه فرجعت وتمددت وبينه مسافه قليله وكال : شنو اسعد لحظه بحياتج

ابتسمت واني اتذكر وكتله : اكو أثنين .. الاولى من طلعت نتيجتي مال سادس وانقبلت هندسه مثل ما اريد

- والثانيه

- الثانيه سر

ضربني خفيف وكال : احجي يول والثانيه ماكو لا سر ولا هم يحزنون

- مااا ... سر مااكول .. هسه اني اسئلك

-يلا اسئلي

-شنو اكثر شيء تخاف منه ؟

سكت شوي يفكر وكال : مااعرف .. بس اعتقد اكثر شيء اخاف منه ان اخسر الشخص الي احبه

سئلني: شنو اكثر شيء تخافين منه غير الظلمه و الجن

فكتله : ماكو شيء بعد

- معقوله

- اي صار اكثر شيء اخاف منه .. الي هو اخسر عائلتي فبعد مااخاف شيء

سكت واني هم سكتت الى ان سئلته : اسئلك شيء بس متعصب

- نشوف

- لا مانشوف .. ايدي راحت من وره عصبيتك كلساع لازمني اذا وعدتني متعصب اسئلك

اجت الكهرباء بهاي اللحظه فردت اكوم ولزم ايدي وكال : هاي الايد الي جنت الزمج بيها

هزيت رأسي ومو فاهمه ليش

فلزم ايدي وباسها وكال : اسف

دنكت رأسي بخجل وصرت اسحب بشعري حتى يغطب وجهي من الخجل ... شعور جدا حلو جان لحظتها

رفع رأسي بأايده وكال : اسئلي وعد ما اعصب

-ليش حبيتني ؟

باوع لعيوني وسئلني : قبل ما اجاوبج .. انتِ تحبيني؟

ضليت ساكته وماعرفت اجاوب فكال : كولي الي بكلبج لا تخافين

هزيت رأسي بـ لا وكتله : ما احبك

●○●○●

لا تنسون التصويت و كتابه رأيكم ☆