وصيه أخي الفصل الثامن عشر 18 - بقلم فاطمه

ضليت ساكته وماعرفت اجاوب فكال : كولي الي بكلبج لا تخافين

هزيت رأسي بـ لا وكتله : ما احبك

باوعت لوجهه وجان يباوع بأابتسامه استغربتها فكملت جوابي : ما احبك .. بس مااكرهك بنفس الوقت يعني هيج ماعندي مشاعر تجاهك مشاعري ما متحركه يعني

رجع سئلني : وهل بيوم مشاعرج راح تتحرك

جاوبته بسؤال : ليش تسألني بدل ما تجاوب سؤالي

رفع خصله من شعري وره أذاني ومشه ابهامه على خدي وكال : شسويتي بيه

ضليت اباوعله بدون كلام فكمل : انتي ما تعرفين انه شكد أناني بمشاعري ومستحيل اعبر عن مشاعري لاحد .. بس كدامج ماعرف شيصير بيه .. اصير مثل طالب شاطر و المدرس طلب منه يكتب انشاء

فأاصير بس اريد اعبر الج .. اعرف ذاك اليوم بالعياده خوفتج و حجيت و عبرت عن مشاعري بشكل يخوف وما ممكن وحده تتقبل مشاعري بس جنت احس بنفس الشعور من توفى والدي وانه ما نزلت ولا دمعه بوفاته تعرفين ليش

هزيت رأسي ب لا فكمل : لان انه زلمه البيت.. انه ما جان مسموحلي اضعف .. جنت لازم ابقى قوي علمود أقوي امي وخواتي واحمد من يضعفون

انه جنت ضعيف وخايف وموجوع كلبي على والدي بس جان لازم انطي القوه و ابعد الخوف والوجع عن كلوب اهلي .. بس بعد ما الكل رجع قوي انه وكتها انعزلت وكدرت اعبر عن حزني من حررت دموعي الي جنت كاتمها لايام

جنت اروح لمكان فارغ واضل ابجي واصرخ حتى أفرغ وجعي ومن اخلص اكون مرتاح .. لان هم تخلصت من همي وهم محد شاف ضعفي

ونفس الشعور حسيت بي من اول يوم شفتج

- يعني شلون ؟ وشوكت ؟

- يعني ماكو هذا الحزن والهم الي جان تارس كلبي وبس اريد اطلعه .. هيج انه جنت بس جان حبج ألتارس كلبي ويضغط عليه من يوم جان عمرج ١٣ وانه شفتج اول مره تلعبين ويه سهى من يومها حبيتج وكرهت نفسي لان حبيت طفله بس ماكدرت امنع نفسي .. مو لكل بشر غلطه عمر وانتي غلطه عمري من حبيتج وانتي مو شايفتني

ابتسم شوي وكال : عاد والله بيومها من اخذتج للعياده طلعت الي ضامه من سنين بكلبي

شايفه الجرح من يلتهب ويلتهب ويلتهب وانتي هاملته يصير يوجع و يأذي وحتى شكله وريحته تصير مو حلوه .. انه هذا الشيء اشبهه بطريقه كلامي ذاك اليوم

حبج جان مثل الجرح الملتهب ومن فجأه شوفتج اياه ما تحملتي شكله

ما جان عندي جواب لكلامه بس باوعت بعيونه وكتله : اني هم اسفه

- ليش ؟

- لان أذيت كلبك هيج

ضحك وكال : لا تهتمين .. كلشيء يجي منج حلو سواء أذيه او لا .

بالبدايه ما اتقبلت مشاعره صح و للان ما متقبلتها بس على الاقل فهمت سبب طريقه اعترافه العنيفه

فكرت أساله سؤال بس اندك موبايله وكام حتى يجاوب

ظليت كاعده واحس عقلي ديسترجع بكلامه الى ان اجه علي وجايب وياه صينيه الغده فضحك وكال : تعاي بويه تغدي .. هذا احمد متحلفلي يكولي سويتوني دلفري من اتزوج اسبوع اكلي انتوا توصلونه

ضحكت وكتله : صدك هو العرس شوكت

- ان شاء الله الخميس الي يجي

- حفله يسوي غير

- اي .. خطيه صارله سنين يتحضر هو وسجى فأاكيد حفله يريد

- اي حقهم كل بنيه تحلم بحفله حلوه ويه الي تحبه

باوع عليه بدون ميحجي وحسيت كلامي جرحه فكتله : بس يمعود عليمن حفله و خساره فلوس وذنوب الواحد يجمع فلوس الحفله ويسافرون بيها لتركيا لسويد للبنان

ضحك وكال : اي قنعيني بعد قنعيني

ضحكت من كل كلبي وكتله : عاد لبنان يعني فدشيء وخصوصا للناس الي ما تونسوا بعرسم وكذا

- هههههههههه حقج بويه حقج ... ان شاء الله وعد اخذج بس مو هسه

هزيت رأسي وتقربت للصينيه حتى نتغده
اخذ علي جهاز التحكم مال تلفزيون وصار يكلب بالقنوات بين ما ناكل

طلع فلم هندي لشاروخان كلش احبه فكتله : حباب حباب حباب

- هاا يول شبيج

- لا تغير القناة عليك الله

- خوش بويه امرنه لله

صرنه نتابع الفلم وخلصنه غده فركضت للحمام غسلت ونزلت الصينيه بين ما يخلص الاعلان ورجعت تمددت على الجربايه واتابع

علي هم اجه بصفي ويباوع

طلعت لقطه بالفلم بيها سئلوا البطل الي جان يحب من طرف واحد فسئله صديقه : صعب شعور الحب من طرف واحد

ضحك شاروخان وجاوبه : لا ... يمكن هو اصعب شعور ويمكن احلى شعور لان بالحب من طرف واحد ما تضطر تنتظر مبادرات من الطرف الثاني او تنتظر اتصال او تتوقع شيء ويخيب ضنك كل الي يصير ان انت تحب و من كل كلبك

جان يحجيها ودموعه تنزل واني عاد ضليت ابجي وياه وعلي يباوع عليه ويضحك من كل كلبه واضرب بي واكوله: لا تضحك دشوف الرجال شلون متعذب خطيه من وره هاي الي بلا احساس

زاد ضحكه وكال : اي والله ولا تحس

عاد هو ضل الفلم كله كلبه تحشيش مره يتغزل بالبطله ومره يضحك على الاخراج ومره مسوي روحه يعرف اللقطه الجايه شنو بحيث كلب الفلم من درامي الى كوميدي بس حتى ما ابجي .

خلص الفلم وطلعت اللقطه الاخيره البطل يبوس البطله جان يصيح : اوووف ربي اجعلها من نصيبي

باوعتله بصدمه وصحت : شنوووو

ضحك وكال : يول اقصد البطله الله يجعلها من نصيبي ... وين راح بالج

هو سئلني وين راح بالج واني ظليت أذب الوان خاف اجفص بالحجي عاد كتله : أ...أ...اني اروح اتحضر راح يأذن المغرب

وطفرت من الجربايه للحمام غسلت وتوضيت وطلعت شفته جاي يلبس بتيشيرت أبيض عنده دائما يلبسه بالصلاة

فرشت سجادتي بعد ما سئلته على القبله و لبست محرم الصلاه وخليت قرأن كدامي وبين ما هو يتعطر ويتسوك فرشتله سجادته كدامي .. بعد ما خلصنه صلاة جان شعوري كلش غريب وحلو

اول مره نصلي سوه و الصلاة وياه كلش مريحه لان تجويده للقران وترتيله للكلمات كلش مريح للسمع

بعد ما خلص اندارلي وكال : تقبل الله

ابتسمت اله وجاوبته : تقبل اعمالك

رجع يسبح فصحتله : علي .. اطلب طلب حباب

ضحك وكال : بس عوفي حباب على صفحه وطلبي

مديت ايدي واخذت موبايلي من الجربايه وكلتله : ناخذ صوره

باوعلي بأاستغراب و حواجبه متطابقه وكال : صوره ؟!!

- ايي والله بنفسي اخذ صوره بعد الصلاة ويه زوجي مثل ذني الرمزيات وكذا

غمزلي وكال بضحك : هسه انه صرت زوجج وكذا

غطيت وجهي عنه وكتله: ياااا علي بدون تعليق عليك الله ... ناخذ لو لا

-تعاي بويه تعاي ناخذ ليش لا

كمت ثبتت الموبايل وخليت المؤقت ورجعت لمكاني واخذنه اول صوره سوه .

رحت اشوف الصوره فسألني : هااا شلونها

ركزت بالصوره و كبرتها ورجعت اباوعلها واخذت نظره مطوله ودقيقه وابتسمت وكتله: كلش حبيتها.. حلوه هواي

- طبعا يابه غير انه بيها

ضحكت بأاستهزاء وكتله : اي صح

اجه وكف وراي ولزم ايدي الي لازمه الفون حتى يشوف الصوره بس لمسته و انفاسه الي ضربت وجهي حسيتهن مثل المخدرات لمشاعري

اشتم خصله من شعري و انفاسه الي على جسمي ذوبتني وكال : اووف ياريحتج سبت كلبي سبي

ضليت واكفه ومااحس برجليه .. حسيت نفسي ضايعه بأانفاسه بس الحمد لله دك موبايله وابتعد عني

اني هنا حسيت بنفسي ومتت من خجلي فأاحتاريت شسوي .. خليت ورحت انظف بالمطبخ وذيج اللحظه متروح من بالي

●○●○●
لا تنسون التصويت و كتابه رأيكم ☆
+راح انشر بارت ثاني بالليل لان اعرف هذا البارت قصير كلش