راهب ابو غضب
بقلم زهراء الحسناوي
،،،،،،،،،،،،،،،
مدلي ايدك
لخلي ابليس يخجل
من مشي اشفافي اعله زيجك
.......................
راهب،،العصر واگف بالمحطه مال البانزين وانتبهت للسيارة البصفي شفتها لارا گاعدة بالسدر نزل رجال جبير من السيارة حتئ يفول بانزين عرفته هذا جلال الچلب نفس البصورة بس شكله هسه كبران كلش عمرة ب 63سنه تقريبا
احس عيوني صارت براسي دمي فار اتمنيت اسحله وادير علئ راسه بانزين واحرگه
شايل علي حقد بس الله يعلم بي
اتمنئ اشوفه واطبق علي كل انواع التعذيب
بس لا اول مااطبقهن علئ بنته حتئ احرگ گلبه بيها اريده يموت الف موته باليوم من يشوفها متعذبه يمي
وبعدين يالله افكر اخذ ثاري منه شخصيا
رجعت وبوجهي علئ بيت سعديه اتلگتني هي وغزل
اخذت غزل ودخلت للغرفة وكالعادة بعد مااتقرب منها اكره نفسي والجاي اسوي بس تعودت ع الغلط ومااعرف اشلون اخلص نفسي منه
طلعت وبديت اشرب وهي يمي حاضنه ايدي وسعديه تشرب نرگيله
بقيت اشرب الحد ماثگلت كلش
باوعت للساعه حيييل اني من العصر يمهن وراسي انتفخ من المشروب
ردت اطلع اخذت النطاق لبسته بس اتفاجئت مسدسي ماكو بالگراب مالته
صحت بصوت خلاهن يطافرن اثنينهن
سعديه،،خ خيير ابوو غضب شبيك تصيح?
راهب،،المسدس ويين?
غزل،،يمي
راهب،،وليش اخذتي?
غزل،،مااريدك اتروح اريد اتبات اهنا
راهب،،اتگربت منها لويت ايدها وره ضهرها
غزل،،اااخ ماانطي اذا مااتبات يمي
راهب،،وروح ابوي اذا ماجبتي اهد البيت علئ راسج فااهمه
شفت سعديه راحت تركض الغرفة غزل شويه وجابته
تركتها بقوة دفعتها اخذته خليته بالگراب وطلعت واسمع بس صوت بجيها
غزل من اتقربت منها اول مرة اتفاجئت بيها بعدها ابنيه وبلحظتها انصدمت
بيومها قاسم گال سعديه جابتلك بنية بزونة مغمضة بس عبالي يقصد حلوة موبعدها عذراء
كل ضني هلشي عادي وراح تفقد عذريتها وياي لوويه غيري
لان هاي شغلتهن ببيوت الليل
طلعت گوة اشوف مسطور ماادري اشلون وصلت للشقه دخلت بوجهي للحمام سبحت حتئ اصحصح
طلعت بس بعدني الساني ثگيل مالگيت روحي غير اتصلت بيها والقهرني اهواي اتصلت وماجاوبتني وانه اريدها كون بس من اول دگه تفتح خط
شويه يالله جاوبت
لارا،،عدلت گعدتي بس كلش ضجت لان غلط علئ بابا مااحب هذا الشي بالرجال انو يغلط
جاوبته بحدة وعصبيه
ممكن اعرف ليش تغلط علئ بابا??
راهب،،لان قهرتيني
لارا،،ومن اقهرك تغلط ??
راهب،،من اضوج بعد مااشوف بعيوني
لارا،،وعليمن اتضوج?
ممنوع تتجاوز على ابوية لو مهما يكون مرة الثانية اطلعك من كل حياتي لان والدي خط احمر
راهب،، واني خط مولدة مثلاً؟؟
لارا،، سكتت ماحجيت
راهب،،الخوينسة من مااسمع صوتج اتخبل
لارا مااصدك شوكت اجيبج يمي صدك تحجين انتي
وانه اليوم بدونج گوة يمر بالتعلعل
لارا،،نسيت الغلط وابتسمت وارتخه گلبي علئ سوالفه
گتلة ومنو مانعك
راهب،،احترگ جدج ولج لاتتماوعين ترة هسه تلگيني يمج وساعتها اصخم الشرايع كلها ويااج
لارا،،عزاااااا رااااهب
وبسرعه سديته بوجها وايدي وجسمي كله يختض
شنووو من بشررر ماعندة ريمونت تحكم ع السانه
سمعت صوت رساله اجتني فتحتها كاتب هاي ثالث نقطه عليج عرفت ضاج لان سديته بوجها
بقيت بفراشي بس افكر بكلامه مااعرف شنو مشاعري
يمكن احبه لالا مويمكن اكيد احبه
من اشوفه روحي اطير للسما ابقئ مبتسمه افرح من اشوف ابتسامته اتمنئ اگابله واگعد
صرت من اروح للكليه احس ماكو طلاب بيها لان عيني مااتشوف غير راهب رجال وبس
اتعجب علئ حالي شوكت لحگت احبه واتعلق بي الهاي الدرجه واحنه صارلنه اربع اشهر سوة وبس
ماادري شوكت غفيت گعدت الصبح من وكت سبحت وطلعت جففت شعري وبدلت لبست فستان رصاصي وحذا افلات لون ابيض لفيت حجابي بعد ماخليت مكياج بس اليوم طوخت اشويه
اجه الخط ونزلت اول ماصعدت اتلكتني ساندرا من شافتني اطلقت صفارة متفاجئه
ساندرا،،اليوم شطالعه خفي يمعودة ترة الشباب گلوبهم رهيفه مايتحملون هيج جمال
لارا،،هههههه مايهمني غير راهب يشوفني حلوة
ساندرا،،اليوم استاذ راهب يگابلج ويگعد هههههه
لارا،،ههههه فديت عيونه ونبض گلبه
ساندرا،،اگلج صدك بس شراح اتسوين ويه استاذ عمار اذا خطبج راهب وانتي من رجعتيله الخبر گتيله مامفكرة بالزواج حاليا
لارا،،ساندرا ترة كلشي قسمه ونصيب يمكن الله مسجل بگصتي اسم راهب مو عمار
صدكيني ماراح يصير غير الكاتبه الله وبعدين استاذ عمار بنات الجامعه كلهن يتمنن احجايه منه اني متاكدة راح يلگه شريكة حياته التسعدة
ساندرا،،ماادري بعد بس احس انتي ضلمتي واستعجلتي بعلاقتج ويه النقيب خاف تتندمين بعدين
لارا،،انتي بس بطلي تفاولين بالشر واني كلشي ماعليه
ساندرا، ،عابت موصوجج
لارا،،وصلنه للجامعة دخلنه اول محاضرة كانت من نصيب دكتورة غيداء
بعدها طلعنه للنادي نتريگ ميته جوع
عصام،،واني اگول منو هاي الحاته الصاكه من بعيد
بويه ترة قلبي الصغير لايتحمل
لارا،،هههههه ترة خجليت
عصام،،فديت الخجلان اگلج انتي وساندرا مالله يهديجن وتحجن ويه صديقتجن تضبطنها الي
ساندرا،،متروح اتضبط النفسك احنه شكو
عصام،،وجه الطاوة نبصتي من يمج غير اخواتي انتن
ساندرا،،شنو نبصتي??
عصام، ،هاي المفردات عدنه موعدكم معليج بيها
لارا،،غير انته تنطق حتئ الابنيه توصلها مشاعرك
بس انته وابو الهول نفس النسخه اثنينكم صنم
عصام،،ده الحب بهدله
ساندرا،،دگوم عيني رشدي ابازه لحگ البنيه قبل لايجي تيم الحسن ياخذها
لارا،،بقينه انصنف علئ عصام خطيه متردد وخايف بسمه اترفضه
اخر شي اجاني اتصال باوعت المتصل راهب
عصام اترخص وراح واني ماصدكت اجاوبه
الو
راهب،،توني ردت روحي اشلونج بنيتي
لارا،،بسرعه الضحكه شگت الحلگ كتله موزينه
راهب،،ان اخوووك ليش يبعد گلبي اشبيج
لارا،،لان ماشفتك اليوم حجيتها بدلع
راهب،،اشتعلل عمي بناار ونفط ولج لاتتماوعين ترة هسه اجي
لارا،،ضحكت اممم وشتسوي جاي
راهب،،حتئ اشوف الگمر مالتي
لارا،،ليش مااجيت اليوم?
راهب،،عمي اطلب السموحه منج اليوم لان طالع واجب بغير محافظه يومين وارجع
لارا،،ضجت من گال يومين مااجي احس من هسه اشتاقيتله
راهب،،يالله ولج ام خشم خل اروح اتاخرت
لارا،،عااا هاي اني ام خشم??
راهب،،احلئ خشم چنه فستقه بس ارجع اله اعضه
لارا،،هههههه يالله روح وخلي بالك من نفسك
راهب،،نفسي وروحي بقن يمج انتي ديري بالج عليهم
لارا،،نهئ الاتصال واني مبتسمة ياربي شگد احبه ويوم المااشوفه احس مضيعه شي غالي
راهب،،صار وكت نزولي للبيت ماردت اگلها تحسبا للمستقبل مااريد تعرف بيت ابوي بالنجف لان اكو خطة راسمها الهم
جنت مشتاق ل امي واخواتي صار اسبوعين مانازل مجاز
قبل يوم اتصلت ب اخواتي احلام وزهرة طلبت منهن يجن حتئ اشوفهن لان مشتاقلهن وفعلا اول ماوصلت اتلگاني ضرغام ابن احلام
فديته بعد خاله صاير زلمه مشورب عمرة 18سنه
كل جيه يجي بيها اشوفه كبران اكثر من الجيه القبلها لان اخواتي يتاخرن يالله يجن كل كم شهر يجيبوهن ارجولتهن
ضرغام،،هله خاال اشلونك??
راهب،،حضنته هله بيك بعد خالك بويه صاير بطولي ماتگلي شيوكلوك ?
ضرغام،،ههههههه اصلا ماابين من اوگف يمك وين الجبل من التله
راهب،،هههههههههاي خوش مثل بس انته جبل من گاعك مو تله
دخلت للبيت اتلگتني احلام
احلام،،هله بالبذات المايگول عندي اخوات اخابر اسأل عليهن
راهب،،والله ياخويه اليسمعج مايگول قبل يومين اتصلت بيج وتدرين واجب واسبوعين صار مانازل
زهرة،،هله بحزام الظهر توه نور الحوش
راهب،،جريتها بست راسها عميي اهنااا الحجي الذهب
ام احلام،،هله بيك يمه اتلگنك وانته تعبان
راهب،،شوفتكم راحه يالغاليه
دنگت بست ايدها وراسها امي كبرت كلش والقهر اخذ من عمرها وشبابها ععمرها 60بس اليشوفها يگول 90 الكبر بين عليها من وكت
ضرغام،،بالخير خاالي انشاءالله يوم اليشدولك التاج
راهب،،الله يسمع منك بعد عيون خالك ونذر علي مصاريف زواجك كلها يمي
احلام،،اريدك طيب وتفرح بي
راهب،،اگلج صدگ ليش ماانقل دوامه اهنا لو انتظر بس يكمل سادس بالبصرة واخلي يدرس كليه اهنا
لان تدرين امي وفاطمه وحدهن وانتي الله يسلم ابو واخوته موجودين
عاد يفيد بيبيته وخالته اهنا وثانيا من اروح اامن اكو زلمه بالبيت بمچاني
احلام،،والله ياخويه لااني ولاابو نمنعه واصلا من زمان. ابو الرجال اقترح علي هلشي وهذا هو گدامك واسأله
ضرغام،،هذا هو خالي بس اكمل امتحانات انتقل نهاية السنه اعتبرني لميت اچوالاتي واجيت
راهب،،ههههههه هله بيك
گمت بدلت وسبحت شويه ارتاحيت. لان الطريق طويل ومزعج
رحت اشتريت سمج خليتهم ينضفو يله جبته
سويت چانون مال نار بالحديقه عدنه تنور مال غاز قديم مشمور ماتريدة امي رادت تذبه كتلها جيبي ماكو شغله ماتفيد حتئ لوجانت سكراب حفرتله بالگاع للشوي مال السمج
گعدن امي والبنات اللمه ماينشبع منها اتمنيت ابوي عايش وگاعد بنصنه اتمنيت اشوفه مرة بحياتي
اكثر شي يعذبني ماشفته ولاشميت ريحته ولاگلت كلمة بويه
كملنه شوي وگعدنه نتعشئ وفاطمه بس اتوزع ابتسامات صافنه كلامها قليل انعزاليه كلش
انتهئ العشه وگمت دخلت الغرفتي
لگيت رساله منها
فتحتها شفتها ماخذة صورة الها بنت الذين الشفه بارزة ويه الحمرة والعيون كذالك مااعرف ليش ضجت لو يمي اله اكتلها
مالگيت روحي غير اتصلت بيها
لارا،،اخذت صورتين بالكليه جنت مرتبه روحي كلش ردت اخلي يشوفني احب نظراته واحب اصير حلوة بعينه اكثر بليل ورة العشه دزيتله صورة منهن شويه واجاني صوته يرعد
راهب،،بلوووة الله هاي اليوم هيييج رايحه للدوووام ??
لارا،،بقيت امتمت گتله بصوت واضح علي الخوف ا اي ا اصلا عا عادي البنات كلهن يسون هيج
راهب،،داحت.......البنات نروووح نديح........وياهن
لارا،،فتحت عيوني علئ وسعهن مامصدكه الاسمعه احس راسي دخن من الفشله والعصبيه
گتله بحدة منووو سمحلك تحجي هيج وياااي ??
ااانته واحد مااتستحي
راهب،،هذا انه المااستحي?
لارا،،سكتت بس روحي شايطه لان حجة بهاي الطريقه
راهب،،صفحتج انملت اغلاط وصدگيني راح اطلعهن وياج وحدة وحدة
لارا،،سد الموبايل بوجهي بس جسمي كله يرجف
إنسان مستفز فوگ شينه گواة عينه فوگ مايعدل السانه واسلوبه جاي يحسب عليه اغلاط
نمت بفراشي واني ادردم ليش مااگدر اكرها
ليش احس روحي حفرت حبه بگلبي حفر ونقشته مثل النقش ع الحجر
ماگدرت انام لان اول مرة انام زعلانين
راهب،،بنت الكلب والله بس اجيبج يمي لطلع كل كلمه من خشمج
بقيت احش بالجگاير من تغلط وياي اتمناها يمي يمكن اذبحها واشرب من دمها
مرت ثلاث ايام واني من يوم الي اتجاوزت حظرتها من كل مواقع الاتصال
مااريد احجي وياها لان خاف تفلت اعصابي اكثر وبعدها اضيع الاول والتالي
انتها الاسبوع مال اجازتي ورجعت للدوام وبهل اثناء دخل قاسم
قاسم،،ياهلا بسيادة النقيب واخيرا شرفت
راهب،،هلا بيك قويسم ليش اكو شي وجهك مبين وراه مصيبه
قاسم،،الولد الي خليته يراقب جلال اجه وجايب وياه خبر اله بشدة
راهب،،انطيني الزبدة
قاسم،،دومك مستعجل بس يالله المهم الاخبار مفرحه
سالفة المطعم جلال اقتنع بيها بعد ماشاف كم واحد ايدو حتئ يشتري
واليوم دزيت الجماعة واتكاتبو وياه وصار المطعم ب اسمه
وغير هذا اليوم اشترة بيت طابقين بحي راقي
علمود يبيعه ويستفاد من الربح
راهب،،خوش حجي توة بدة اللعب
قاسم،،اذا خوش حجي ومن وراه راح اترجع حقك
چا بعد شعندك ويه بنته اترك الابنيه بحال سبيلها وافلوسك ان شاء الله عن قريب ترجعلك
راهب،،افلوسي ارجعهن لان هذا حگي وحگ امي واخواتي
بس بنته راح تكون عقاب لبوها وخل يعتبر هذا الشي تعويض عن اسنين الضيم العشناهن بسببه
قاسم،،صرت مااعرفك لان الحقد والقسوة عاميتك
راهب،،تركني وراح بقيت افكر بسالفة المطعم لان اني الخليت الفكرة گدام جلال ردته يشتري حتئ اخسرة الوراه والگدامه
صاحب المطعم اجا بلاغ من الحكومه بان لازم يترك المطعم لان الدوله تريد تهدمه وتبني بمكانه محطه لتعبة الوقود
طبعا الحكومه انطت تعويض الصاحب المطعم
رحت للرجال واتفقت وياه يقترح الفكرة مال البيع علئ جلال لان همه واحد يعرف الثاني وبينهم صداقه
ولصالحي طلع صاحب المطعم نفس نسخة جلال انسان جشع ويحب الفلوس
اعرفت انو الاخ اليغدر ب اخو الخاطر وصخ دنيه
ماكو اسهل منها من يغدرة صاحبه لان كما تدين تدان
لارا،،صار كم يوم مايحجي وياي زعلان والله حتئ بواجي بجيت
ليش اصير ضعيفه بدونه ?
معقوله هذا الحب هيج يذل الشخص?
بحيث اتصل بي ومااحصله لان منطيني حظر من كل المواقع اعرفه جاي يعاقبني
اليوم احد بدلت ورحت للدوام بدون نفس
خلصت اليل بالبجي مشتاقتله مشتاقه الكلشي بي صوته عطرة عيونه احس عطشانه علئ سوالفه
بس والله مادام هيج يسوي هو الجابها النفسه
اخر شي اخذت وعد علئ نفسي مستحيل اخلي يهيني ويتجاوز بااسم الحب والغيرة
هو البدة خل يتحمل نتيجة هذا العقاب
وصلت للكلية مالي خلگ احجي شي حتئ ساندرا گالت وجهج تعبان ليش اتسمحيله ياثر عليج هلگد
لتصيرين ضعيفه وتبينين اله انتي هشه بدونه وسهل تدميرج
كلام ساندرا ساعدني حيل حتئ اكون اقوئ مااريد يشوف ضعفي ويتاجاوز اكثر
ابتدت محاضرة التصميم لدكتور عمار جان يشرح
ماصدگت تنتهي واطلع لان اختنگت
انتهت المحاضرة وطلعت الطلاب واني شلت كتبي وجنطتي ردت اطلع سمعت صوته گال
عمار،،دقيقه لارا
لارا،،وكفت گدامه نعم استاذ
عمار،،ليش وجهج تعبان هلگد اكو شي صاير?
لارا،،دنگت بقهر وبداخلي اگول انته انتبهت والشخص الاحبه ماهامه شي
رفعت راسي كتله شكرا لاهتمامك استاذ بس صدگني ماكو شي
انتهئ الدوام ورجعت للبيت اسمع صوت الضحك واصل الباب الحوش
دخلت شفت ابوي وامي وخالي يضحكون ويسولفون
جلال،،هلا بابا تعاي اسمعي الخبر
لارا،،ابتسمت بتعب خير بابا شنو الخبر
سعاد،،ولج ابوج اشترة المطعم وبس يشتغل وتمشي امورة انوب الصيف انخلصه بتركيا ويوميه بدوله
لارا،،ضحكت علئ تفكير امي اي بابا بيها الخير
تفاجئو بردة فعلي عندي عادي لان البيه مكفيني
صعدت للغرفه بدلت ونمت مالي خلگ انزل اتغدة حتئ مااشتهي
للساعه ب 6گعدت علئ صوت الموبايل رفعته شفت رقم راهب كاتبه علي نقيب قلبي
تركته ماجاوبت بعد وكت ذكرني هسه لمن انتهت عقوبته قرر يتنازل ويحجي وياي
انطيت الموبايل صامت ورجعت حطيت راسي ع المخدة
بس عيني ع الموبايل مرتين اتصل بدون مااجاوب
اخر شي دز رساله
راهب،،لتجاوبين سهله
لارا،،بگلبي گلت شتسوي اكثر صارلك اسبوع معاقبني بغيبتك احس روحي مثل الينازع عيني كل شويه ع الجهاز مااعرف اشلون مر هل اسبوع بدون مااشوفه
راهب،،بعد كلامها قررت اعاقبها بالتجاهل ومن اسلوبها ولهفتها وياي عرفت هي تحبني لذالك جنت مسيطر
خليتها اسبوع تستوي عال نار هادئه بس بعدها قررت ارفع عنها الحظر بس الفاجئني ماجاوبت علئ اتصالي وهلشي خلاني احقد عليها اكثر منو تضن نفسها والف وحدة غيرها تتمنئ مكانها وداعت امي اله اشيب راسج بس اجيبج يمي
اله اطلع القضئ والمضئ منج ومن ابوج
ماصدگت شوكت يجي الصبح واروحلها
لارا،،ابتدء يوم جديد گعدت كالعادة غسلت ولبست زي الدوام ونزلت لگيت ابو منذر بعدة ماجاي
انفتح باب بيتنه طلع اخوي محمد هم رايح للمدرسه
محمد،،صباح الخير
لارا،،صباح الخيرات
محمد،،شنو بعدة مااجه الخط?
لارا،،اي بعدة بس هسه علئ جيه
محمد،،ها عبالي مايجي گلت اوصلج بدربي
يالله انه رايح باي
لارا،،باي
راح محمد بسيارته للدوام واني بقيت واگفه محمد انسان مايحب المظاهر يتخبل منها ويمكن هذا الخلا بعيد عن اهلي وسبب فجوة بينهم لان امي تحب المظاهر والشكليات تحتقر الفقير بشكل
وماتتقرب من الناس المحتاجه تحسهم عبالك بيهم مرض معدي
مرة اجت بنيه يطلع عمرها بگدي وتجدي بالشارع تفتر ع البيوت عدها طفل معوق تدفع بي بعربانه
مبينه حالتها تعبانه ف دگت بابنه فتحتلها اني انقهرت علئ حالتها وهيه تفتر وطفل وياها
ف دخلتها للمطبخ گتلها ادخلي اسويلج غدة انتي والطفل وارتاحي بيه طبع بسرعه اثق بالناس ماافكر يمكن تطلع حراميه لو نصابه كل الافكر بي انو ادخلها حتئ تاكل لكمه هي والطفل الوياها لان اي شخص غيري يشوفها بهذا وضعها التعبان وملامحهم البريئه راح يسوي نفسي واكثر
دخلت امي وشافتها انصدمت وبسرعه اشرت للبنيه
سعاد،،عزاااا هااي منوو مدخلهم للبيت ياالله ياالله اطلعي براااا
لارا،،غديت ماي من الفشله الابنيه توها مدت ايدها تريد تاكل قبل ماتفوت امي كالتلي رحم الله والديج والله جنه ميتين من الجوع اني واخوي والناس تتصدق علينه بشي بسيط واني الاجمعه اخذ بي علاج الهذا المسكين
مااهون اشتريلي لفه الي اخاف مايكفي الفلوس للعلاج
اول مامدت ايدها دخلت امي وگامت تعد وتصف
اباوع للبنيه الدموع انجمعت بعينها گامت بكل هدوئ جرت العربانه ورادت تطلع وگفت گدامها گتلها بس انتظري خل احطلج الاكل بعلاگه خطيه الطفل جوعان
البنيه،،لاخيتي مشكورة خلي الاكل ل امج خاف يجي يوم وتحتاجه
لارا،،اختنكت بعبرته وامي تمشي وراها وتطرد بيها
راحت الابنيه وتعاركت وياها ورزلتني بيومها حتئ اني مااكلت وبقئ فترة الموقف مايفارگني من اذكر دموع الابنيه ابقئ اندعيلها الله يدزها الناس ترحمها وترحم اخوها
فاطمه الزهراء عليها السلام جان ماعدها اكل لعيالها ومن يجيها الفقير تنطي عشاهم وهيه بت رسول الله
واحنه البشر العاديين ماعدنه رحمه بيناتنه
اجه الخط ورحت للدوام وابتده اليوم بين المحاضرات ولمة الگروب
اخر محاضرة الدكتور اعتذر صار عندة ظرف وطلع
واحنه هم طلعنه حتئ نرجع للبيت
وگفت اباب الكليه انتظر ساندرا دخلت للحمامات
جنت مدنگه وانتظر ابو منذر بين ميوصل تكون ساندرا اجت
مااحس غير سيارة وكفت يمي
رفعت راسي شفته راهب نزل الجامه وگال
راهب،،اصعدي
لارا،،درت وجهي عنه مااريد احجي وياه
راهب،،اتصعدين لو اشلووون
لارا،،ما اصعد وارجوك روح منا عيب كدام الطلاب
راهب،،خوش
لارا،،شفته نزل ودب بجسمي الرعب هذا شبي
گتله ش شتريد
راهب،،هسه افهمج شنو اريد
لارا،،لزمني من ايدي فتح الباب وراد يصعدني
رااهب عوفني بالقران راح اعيط والم الناس عليك
راهب،،بيج حض سويها وشوفي اليجرالج
لارا،،دفعني بالسيارة وسد الباب التفتت للجهة مالته فتحت الباب وردت انزل بس هو اسرع مني صعد ولزمني من ايدي
حرك السيارة وشخطها
يتتتتتتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!