رواية عالم النت الفصل الخامس 5 - بقلم أميرة جمال

فى بيت فيروز خلصوا الأكل وقعدوا مع بعض كلهم مستنين الموضوع اللى والد فيروز عايزهم فيه. فهمى: بصوا، أنا قررت أفتح مكتبة أشتغل فيها بعد ما أخلص شغلى فى الأزهر، وانتوا عارفين أنا بحب القراءة قد إيه. يعنى هتبقى دخل وتسالية بالنسبالى. فاطمة: لكن إحنا دخلنا الحمد لله كويس وعايشين كويس، ليه تتعب نفسك؟ فيروز: وكمان يابابا، حضرتك بتيجى من الشغل متأخر جدا بعد العصر، يبقى ليه ده كله وتضغط على نفسك؟

فهمى: أنا هنقل شغل الأزهر لفترة صباحية، يعنى هاجى بعد الضهر وهارتاح فى البيت لبعد العصر، وبعديها أفتح المكتبة. وكمان مش موضوع دخل بس، الأهم عندى القراءة ومتعتى بيها. فاطمة: خلاص يافهمى، اللى يريحك طالما أنت كده مبسوط، يبقى خلاص. فهمى: تمام، نستعين بالله وأبدأ أجهز المحل اللى كان بتاع والدى الله يرحمه، وهنزل أجيب الكتب وأفتحه من بكرة إن شاء الله. فيروز: مبروك يابابا.

فهمى: الله يبارك فيكى ياحبيبتى. وانت إيه رأيك يافارس؟ ساكت ليه كده؟ فارس: ابداً يابابا، طالما حضرتك مبسوط بده، يبقى على خيره الله. قام فهمى يرتاح شوية، ولسه فارس هيقوم، والدته شاورتله إنه يقعد. فيروز: وبعدين معاك يافارس، كل شوية كورة كده ومش بتذاكر وبترجع مرهق كده. فارس: مالكيش دعوة بيا يافيروز، خليكى فى كليتك ونفسك. فاطمة: فارس! (بزعيق) إزاى تكلم أختك كده؟

وبعدين إحنا خايفين على مصلحتك، عايزينك تبقى كويس علشان تحقق حلمك وتبقى مهندس زى ما بتمنى ياحبيبى. فارس: آسف ياماما، حاضر. أنا بذاكر، لكن إحنا لسه فى أول سنة فما أخدناش غير حاجات بسيطة أوى. لما ندخل فى المنهج هشد أكتر من كده. فاطمة: طيب يافارس، مستقبلك وانت حر فيه. ادخل ارتاح شوية علشان تصحى تذاكر. فارس: حاضر ياماما، عن إذنكم. ودخل فارس أوضته. فيروز: ربنا يهديه، وإحنا لازم نتابعه برضه ياماما.

فاطمة: أكيد ياحبيبتى، مش هنسيبه يعنى. وروحى ذاكرى بقا محاضرتك. فيروز: حاضر ياماما، عن إذنك. فى فيلا حازم دخل حازم وسلم على الخدم اللى فى بيته. حازم: (محبوب جداً علشان أخلاقه وتواضعه وكمان دمه خفيف جداً، بس لما بيقلب بيخوف) طلع أوضته يرتاح من تعب السفر، وصحى بعدها لقى فهيمة الدادة بتاعته بتحضر العشاء وبتنادى عليهم كلهم علشان ينزلوا. نزل حازم واجتمع معاهم على العشاء. خديجة: ناوي على إيه ياحازم؟

هتمسك شركة باباك ولا إيه؟ حازم: ماما، حضرتك عارفة. أنا المفروض أرجع لشغلى فى الجامعة. (حازم معيد فى الجامعة) . وشغل بابا عمو رأفت بيتابع كل حاجة ودراع بابا اليمين الله يرحمه. وكمان روان بقا ناويه على هندسة إن شاء الله، وساعتها تقدر تتابع شغل بابا وتمسك كل حاجة بإذن الله. خديجة: تمام ياحبيبى، اللى يريحك. فى بيت فهمى فيروز خبطت على الباب ودخلت عند باباها. فهمى: تعالى ياروز، خير؟ محتاجة حاجة؟

فيروز: أه يابابا، حاجات تبع الكلية. فهمى: خير؟ فيروز: محتاجة باقة وفلوس أجيب بيها أدوات للتشريح، ومحتاجة نت علشان أتابع جروب الكلية علشان بينزل عليه أي محاضرات ومواعيدها. فهمى: تمام ياحبيبتى، هعملك باقة، وبكرة إن شاء الله هنجيب الراوتر ونشوف حد يركبهولك، واستخدميه براحتك. فيروز: شكراً يابابا، ماتحرمش منك. فى الصباح فى الفيلا حازم: صحى من نومه، أخد دش ونزل فطر مع والدته وروان بعد ماصبح عليهم.

خديجة: يعنى لابس كده ياحازم؟ أنت خارج ولا إيه؟ حازم: أه ياماما، هروح الجامعة. هشوف لو فيه ورق مطلوب أو حاجة علشان أرجع شغلى. خديجة: ومالك مستعجل ليه كده؟ ماترتاح يومين كده، ده أنت لسه واصل. حازم: معلش ياماما، عايز أخلص وأرجع لشغلى بقا، وحشنى جدا. قعدتلى سنتين. خديجة: ماشى ياحبيبى، ربنا يكرمك. حازم: يارب ياماما. وابقى اعزمى طنط سماح علشان أشوف موضوع العروسة اللى كانت بتقولى عليها دى.

خديجة: ماشى يازومة، امتى أفرح بيك بقا؟ حازم: قريب إن شاء الله ياماما. روان: وأنا ماحدش عايز يفرح بيا ولا إيه؟ ولا أنا طيشة فى البيت ده يعنى؟ ضحكوا حازم وخديجة على روان. حازم: أه بصراحة طيشة. روان: شوفى ابنك ياماما. خديجة: بطلوا انتوا الاتنين، إيه مابتتعبوش؟ الاتنين فى صوت واحد: لا! وضحكوا. حازم: روان، عايزك تهتمى بدروسك ونبعد عن النت ده، مش وقته خالص. روان: حاضر يازومة، هقلل منه.

حازم: بنص عين، طيب لما نشوف. واستأذن منهم وطلع بره، أخد عربيته وراح الجامعة. عند بيت فيروز صحت، اتوضت، صلت، وفطرت معاهم، واستنت أسيل علشان يروحوا مع بعض الجامعة. وصلوا الجامعة واحد خبط فى فيروز ووقع لها شنطتها. بص لها، اعتذر منها، لكن اتسحر بجمالها، وهى حسّت إنه مميز لدرجة ما أخدتش بالها من الشنطة اللى وقعت. أسيل تخرجهم من حالتهم: حصل خير، مش مشكلة. وتجيب لـ روز شنطتها من على الأرض.

وفاقوا على صوت أسيل، الشاب مشى، وأسيل بتغمز لـ روز، وفيروز ضربتها بإيدها وضحكوا مع بعض، وراحوا يشوفوا المدرج اللى هياخدوا فيه المحاضرة.