رواية عالم النت الفصل الثاني 2 - بقلم أميرة جمال

فارس: عااااااا والله لا أوريكِ يا فيروز. فيروز: بتجري بره الأوضة وتروح تقف ورا مامتها وهي هتفطس من الضحك على شكل فارس. فارس: عاجبك كده يا ماما اللي بنتك عملته فيا ده. فاطمة: معلش يا فارس ماهو علشان يصحيكِ برضو. فارس: أنتي كمان بتضحكي يا ماما، هروح أغير هدومي دي وأرجع لها تاني مش هسيبها النهارده. فاطمة: فيروز صليتي ولا لسه؟ فيروز: لسه يا ماما، هروح أتوضى وأصلي الضحى حالاً.

فاطمة: طيب يا حبيبتي يلا علشان ما تتأخريش على محاضرتك في أول يوم ليكي. اجهزي وتعالي افطري معانا وأنا هروح أصحّي باباكِ بقا لا يتأخر على الشغل هو كمان. فيروز دخلت أوضتها واتوضت وصلت وجهزت وقالت أذكار الصباح وحمدت ربنا على نعمة الأهل وفضلت تدعي لأسرتها ربنا يسعدهم دايماً وما يفرقهمش. وطلعت من الأوضة راحت على السفرة لاقيتهم كلهم مستنينها. فهمي: صباح الخير يا روز، استعديتي يا حبيبتي لأول يوم ليكي في الجامعة؟

فيروز: صباح النور يا بابا، أه يا حبيبي أخدت معايا أجندة وقلم وهقابل أسيل نروح مع بعض نشوف جدول المحاضرات ونحضر المحاضرة ونرجع مع بعض. فهمي: طيب يا حبيبتي خلوا بالكم من نفسكم وارجعوا على طول. فيروز: حاضر يا بابا. ضرب جرس الباب تقوم فيروز بسرعة وتقولهم أكيد دي أسيل وتفتح لها ترحب بها. وكادوا أن يخرجوا لولا فاطمة اللي أصرت على أسيل إنها تاكل أي شيء. تدخل أسيل تصبح عليهم كلهم وتفطر معاهم وتنزل هي وفيروز على جامعتهم.

وهما في الطريق. فيروز: أنا قلقانة أوي يا أسيل إنه أول يوم لينا النهارده في الجامعة، حاسة برهبة كده. أسيل: يا بنتي مش مستاهلة كل ده، هنروح نسأل أي حد عن جدول محاضراتنا واللي علينا هنحضره وهتقلقي من إيه أساساً؟ ما إحنا مع بعض أهو. فيروز: ما أنتي عارفة بقا مابحبش الأماكن الجديدة عليا بتقلقني وكمان مابحبش أختلط كتير بالناس.

أسيل: عارفة يا ستي، بس إحنا كبرنا خلاص وبقينا في الجامعة وعموماً بقا أنا هتصرف معاكي راجل ماتقلقيش. فيروز: هههههههه أه كده اطمنت، يلا بينا يا أختي. فارس: أخبارك إيه يا أحمد؟ يعني ما جتش امبارح الماتش؟ أحمد: الحمد لله يا فارس، كان عندي مذاكرة خلصتها ونمت علشان أقدر أصحى النهارده. فارس: إيه يا عم أحمد بادئ جد أوي كده ليه؟ إحنا لسه في الأول وقدامنا السنة كلها.

أحمد: لا يا فارس مش جد يعني ولا حاجة، يدوبك بذاكر اللي عليا وأنت كمان لازم تفوق وتبعد عن رامي وشلته. فارس: أنا مش صغير يا أحمد وعارف بعمل إيه كويس. أحمد: لسه هيرد عليه لقى المدرس دخل وهيشرح فسكت وقال هيكلمه تاني بعدين.

نرجع بقا لفيروز وأسيل في الجامعة لقوا مجموعة من البنات واقفين، سألوهم وعرفوا إنهم زيهم لسه سنة أولى وعرفوا منهم إن فيه طلبة أكبر منهم هييجوا يكلموهم شوية عن الكلية ويرحبوا بيهم وهياخدوهم جولة كده في الكلية.