رواية عانيت لاحبك الفصل الخامس 5 - بقلم فاطمة محمود

خلصت محاضراتهم واتجمعوا عشان يروحوا مع سلمى. آية بضحك: يلا بينا يا عصابة. شهد بضحك: يلا يا زعيم. سلمى باستغراب: هو انتوا قلبتوا عصابة بجد ولا إيه؟ شهد: طيب وفيها إيه يا جدعان، دا حتى بنات الكلية تخاف مننا. نور بضحك: انتي لوحدك عصابة يا شوشو. سلمى بضحك: في دي معاكي حق. شهد بغيظ: دا أنا عايزة أعمل لكم قيمة، بس نقول إيه "خيراً تعمل شراً تلقى". سلمى حضنت شهد. سلمى بابتسامة: واحنا نقدر على زعلك يا قلبي.

شهد بزعل مصطنع: لا أوعى كدا، أنا سحلانة. سلمى بضحك: ونبي ما تسحلي. آية بابتسامة: تعالي يا شوشو وأنا أصالّحك بالبشاميل. سلمى بضحك: امم، دي نقطة ضعفها بقى. شهد حضنت آية وقالت: شهد: تزعليني انتي وتوتا تصالحني بأكتر حاجة بحبها. نور: طيب يلا بينا ولا هنقضيها رغي هنا؟ آية: البت دي متحمسة أكتر مننا يا جدعان. نور بضحك: أوي. وبعدين البنات مشيوا بالعربية اللي بعتلهم فارس. *** عند فارس، كان بيشتغل على التصاميم.

التليفون رن وكانت السكرتيرة. ندى: صباح الخير يا فندم. فارس: صباح الخير يا ندى. ندى: أستاذ حسام جاه وحابب يقابلك. فارس: خليه يتفضل. ندى: تمام يا فندم. ندى قفلت مع فارس وبصت لحسام. ندى: اتفضل يا فندم، فارس بيه منتظرك جوا. حسام: تمام. حسام خبط ودخل وسلم على فارس. حسام: صباح الخير يا بشمهندس فارس. فارس: صباح الخير يا حسام بيه. حسام: ليكون عطلتك عن الشغل يا بشمهندس؟

فارس: لا أبداً، كنت بخلص آخر تفاصيل. ولا حابب تغير فيها حاجة؟ حسام: بالظبط، كنت جاي أقولك على تغييرات بسيطة. فارس: تمام يا حسام بيه. حسام شرح التفاصيل اللي حابب يغيرها. *** عند البنات، وصلوا قدام العمارة. سلمى: يلا يا بنات. البنات بحماس: يلا. وبعدين البنات كانوا طالعين وشافوا شروق. شروق: إزيكم يا بنات؟ البنات: أهلاً. شروق بصت على نور. شروق: مين دي يا سلمى؟ أول مرة أشوفها. آية: واحدة صحبتنا. شروق: إزيك؟ نور: الحمدلله.

وبعدين البنات مشيوا وسابوها، وخبطوا وفتحت لهم زينب. زينب: أهلاً أهلاً بالقمرات. سلمى: أهلاً يا زوزا قلبي. آية: أهلاً يا زوزا يا قمر. شهد فتحت إيديها. شهد: بالحضن يا زوزا. زينب ابتسمت وحضنت شهد. وبعدين شافت نور واقفة. زينب: مين القمر دي؟ نور: تسلميلي يا طنط. سلمى قربت من نور وحضنتها. سلمى: دي نور يا ماما اللي خرجنا سوا وقضينا اليوم برا. زينب: أهلاً بيكي يا حبيبتي. نور: أهلاً بيكي يا طنط.

زينب: لا طنط إيه، انتي تقوليلي يا زوزا زي البنات. آية بصت على نور. آية بابتسامة: هي مكسوفة شوية، بس يا زوزا استني شوية كدا وهتلاقيها خدت راحتها. نور بابتسامة: لا والله. آية: بحاول أنكشك بس. نور: طيب يلا. شهد: روحوا انتوا، ولما تخلصوا قولولي، هقعد مع زوزا شوية عشان وحشاني. سلمى مسكت شهد من قفاها. سلمى: يلا يا بت. شهد وهي بتعدل هدومها: شهد: شايفه يا زوزا قلة القيمة اللي بناتك بيعملوها فيا.

زينب بضحك: معلش يا شوشو، حقك عليا أنا. شهد: أنا إيه اللي مخليني مستحملاهم غيرك يا زوزا؟ سلمى: لا والله. آية: دا إحنا هنشويها جوا. شهد: استهدوا بالله يا جماعة، محدش يعرف يهزر معاكم. آية: طيب يلا قدامنا يا ختي. سلمى: على المطبخ يا بت. البنات دخلوا المطبخ. شهد: إحنا هنعمل أكل إيه؟ سلمى: نعمل بشاميل. آية: وبانيه. شهد ونور: طيب يلا نبدأ. آية: بصوا يا بنات، أنا ونور هنعمل البشاميل، وانتوا يا سلمى انتي وشهد البانيه.

سلمى: مش هنعمل حاجة حلوة؟ آية: هنعمل كيك سوا لما نخلص. شهد: اشطاا. البنات بدأوا يعملوا الأكل، ونور قالت: نور: هي مين البنت اللي شفناها تحت دي؟ آية: دي ساكنة هنا في العمارة، جيراننا. وكملت بضحك: وبتكرش على فارس كمان. نور بضحك: والله؟ سلمى: أمال انتي فاكرة إيه يا بنتي، دا نص بنات إسكندرية هتموت على فروستي. شهد بضحك: بس هو مش مديلها وش. نور بضحك: اشمعنى؟ سلمى بضحك: مش بيطيقها من عند ربنا.

البنات ضحكوا وفضلوا يتكلموا ويعملوا في الأكل. *** عند يوسف وسيف، كانوا منتظرين اللواء أيمن في غرفة الاجتماعات بخصوص القضية. وكانوا قاعدين ودخل اللواء أيمن. اللواء أيمن: أهلاً بأبطال مصر. يوسف وسيف: أهلاً بحضرتك. اللواء أيمن: اتفضلوا اقعدوا. يوسف وسيف قعدوا. اللواء أيمن: طبعاً انتوا من أكفأ الظباط اللي هنا، وعشان كده كلفتكم بالقضية دي. يوسف: شرف لينا يا سيادة اللواء. سيف: واحنا إن شاء الله هنكون قدها.

اللواء أيمن: وأنا واثق من كده. وفضلوا يتناقشوا بخصوص القضية. اللواء أيمن: أي سؤال تاني يا شباب؟ يوسف: لا، تمام يا فندم. اللواء أيمن: بالتوفيق يا شباب. والشباب خرجوا وراحوا على مكتب يوسف. يوسف: إحنا لازم نروح بكرة شقة القتيلة. سيف: أكيد.. طيب يلا بينا نجيب نور ونروح. يوسف: يلا. وبعدين خرجوا من المكتب وركبوا عربية يوسف. *** عند فارس، كان خلص شغل وخرج من المكتب عشان يشوف باباه خلص ولا لأ.

فارس وصل عند مكتب باباه وراح للسكرتيرة. فارس: حد عند محمد بيه جوا يا أسماء؟ أسماء: لا يا فندم. فارس اتوجه لمكتب باباه وخبط ومحمد سمح له بالدخول. فارس: خلصت شغل يا بابا عشان نروح؟ محمد: أيوا خلصت يا فارس. فارس: طيب يلا بينا. محمد قام وطلع هو وفارس برا المكتب وبرا الشركة. ومشيوا في طريقهم للبيت. *** عند البنات، كانوا خلصوا الأكل وبيعملوا الكيك. آية: إيه الإنجاز ده يا جدعان، دا إحنا طلعنا ستات بيت.

شهد: طبعاً يا بنتي، إحنا قدها وقدود. سلمى بهزار: انتي عملتي حاجة أصلاً. شهد: أمال هو مين اللي مموت روحه معايا في المطبخ من الصبح؟ نور بضحك: حرام عليكم يا بنات، دي أكتر واحدة اشتغلت فينا. شهد: قلبي يا نوري. آية: طيب كفاية حب يا ختي انتي وهي، وخلونا نخلص الكيك ده وبعدين نطلع نقعد برا مع زوزا. وبعدين البنات خلصوا الكيك وحطوها بالفرن وخرجوا يقعدوا مع زوزا. زينب كانت قاعدة في الريسبشن. البنات خرجوا وقعدوا مع زينب.

زينب: كلمي فارس يا آية، شوفي هيوصل امتى. آية: حاضر. وقامت آية رنت على فارس. آية: أيوا يا فروستي. فارس: إيه يا توتا؟ آية: قربت توصل. فارس: خلاص قربنا نوصل يا حبيبتي. آية: تيجي بالسلامة يا حبيبي. وآية قفلت مع فارس. آية: قوموا يلا يا بنات نجهز السفرة لحد ما بابا وفارس يجوا. زينب: طيب استنوا يا بنات، أساعدكم. سلمى: لا اقعدي انتي يا ست الكل، إحنا هنعمل كل حاجة. زينب: طيب يا حبيبتي.

والبنات دخلوا المطبخ، وآية وسلمى بيغرفوا الأكل، ونور وشهد بيطلعوا على السفرة. *** يوسف وسيف وصلوا قدام الكلية، ويوسف رن على نور. يوسف: إيه يا حبيبتي، خلصتي؟ نور: أنا مع سلمى يا جو، خلصت وروحت معاهم البيت. مرنتش عليك عشان معطلكش، بس قلت لمامي. يوسف: خلاص ماشي يا حبيبتي، لما تخلصي قعدتكم رن عليا وأجيلك. نور: ماشي يا حبيبي. يوسف قفل مع نور ومشي بالعربية. سيف: إيه؟ يوسف: راحت مع البنات. سيف باستغراب: بنات مين؟

يوسف: سلمى وآية وشهد. سيف بهزار: مش كان المفروض نروح؟ يوسف بضحك: نروح فين؟ الله يخرب بيتك. سيف بغمزة: مش أختك راحت عند البنات، كنا المفروض إحنا نروح عند فارس. يوسف بضحك: قول إنك عايز تشوف المزة. سيف: بصراحة آه. يوسف: هو انت حبيتها؟ سيف: مش عارف، بس فيه إحساس جوايا ليها، مش عارف إعجاب ولا حب. يوسف: اتأكد من إحساسك الأول وبعدين صارحها. سيف: أكيد يا صاحبي. وكمل كلامه بغمزة: وانت إيه نظامك؟ يوسف باستغراب: نظام إيه؟

سيف: نظراتك لـ سلمى. يوسف: مش عارف، بحس إحساس غريب لما بشوفها. سيف: شكلي مش وقعت لوحدي يا جو. يوسف بضحك: شكلها كده. *** فارس ومحمد وصلوا ونزلوا، ومحمد طلع وفارس ركن العربية. وطلعوا سوا. محمد خبط وفتحت له شهد. شهد: والله الشقة نورت. محمد بابتسامة: والله هي منورة بوجودك. شهد: حبيبي يا عمو. محمد شاف نور. شهد: دي نور يا عمو. محمد: إزيك يا حبيبتي. نور: الحمدلله يا عمو. زينب جات عليه. شهد: لسه بيسأل عليكي يا زوزا.

زينب بابتسامة: حمد الله على سلامتك يا حبيبي. محمد: الله يسلمك يا حبيبتي. زينب: أمال فارس فين؟ محمد: طالع ورايا أهو. زينب: طيب تعال غير هدومك يلا. ومحمد وزينب دخلوا أوضتهم. وشهد دخلت المطبخ. نور كانت واقفة وفارس دخل. فارس شاف نور. فارس في سره: هو أنا بدأت أتخيلها ولا إيه؟ نور بصت وراها، لقت فارس واقف، اتحرجت وفارس اتكلم. فارس: إزيك يا نور؟ نور: الحمدلله، وانت؟ فارس: بخير الحمدلله. البنات طلعوا من المطبخ.

سلمى: حمد الله على سلامتك يا فروستي. فارس: الله يسلمك يا حبيبتي. شهد: طيب يلا غير هدومك واغسل وتعال عشان ناكل سوا. فارس: ماشي. فارس دخل أوضته غير هدومه وطلع. كانوا البنات قاعدين ومحمد وزينب. كلهم بدأوا ياكلوا، وآية بصت على فارس. آية: ها، الأكل عجبك؟ فارس: حلو، تسلم إيديكم. سلمى بثقة: يا بني، إحنا ولا أجدع شيف في إسكندرية. شهد: مش لوحدكم على فكرة، أنا ونور كمان عملنا معاكم. نور بضحك: أهم حاجة الأكل عجبكم.

فارس بص على نور. فارس: بس الأكل يجنن. شهد شافت نظرات فارس لنور. شهد بغمزة: الأكل برضه؟ فارس: امال إيه يا ست شهد؟ شهد: ماشي. وخلصوا أكل، والبنات شالوا الأطباق. آية: ها، تشربوا إيه؟ محمد: قهوة. آية: وانت يا فارس؟ فارس: قهوة. سلمى: هنعملك آيس كوفي معانا يا ماما. زينب: ماشي يا حبيبتي. البنات دخلوا المطبخ يعملوا قهوة وآيس كوفي. وبعد شوية خرجوا، وآية كانت بالقهوة، وسلمي الآيس كوفي، وشهد الكيك، ونور الأطباق.

آية: اتفضل يا بابا. محمد: ماشي يا حبيبتي. آية: اتفضل يا فارس. فارس: تسلمي يا توتا. قعدوا البنات ووزعوا كيك على الكل. سلمى: إيه رأيكم؟ فارس: لا، تحفة. محمد: حلوة يا حبايبي. زينب: حلوة أوي. أكلوا البنات الكيك مع الآيس كوفي وعجبتهم. نور: طيب يا بنات، أنا اتأخرت أوي، هرن على يوسف ياخدني. سلمى: لا استني، هيوصلك فارس. نور: بلاش أتعبوا، أنا هرن على يوسف. آية: يا بنتي، هيوصلك فارس انتي وشهد، ولا إيه يا فارس؟

فارس: أكيد طبعاً. شهد بغمزة: اعتبريه يوسف برضه. محمد وزينب والبنات ضحكوا. محمد: خليه يوصلك يا بنتي بدل ما تتعبي أخوكي. شهد: وأهو هيوصل شهد ويوصلك معاها. نور: حاضر. *** عند يوسف، قام من النوم وقعد على السرير ثواني عشان يفوق ورن على نور يشوفها. يوسف: الو. نور: أيوا يا حبيبي. يوسف: انتي لسه برا؟ نور: أيوا. يوسف: طيب أنا هاجي آخدك. نور: لا يا حبيبي، فارس أخو سلمى هيوصلني. يوسف: إزاي يعني مش فاهم؟

نور: متقلقش، سلمى والبنات هيكونوا معايا. يوسف: ماشي. نور: ماشي، سلام. يوسف قام أخد شاور ولبس قميص أسود وفتح أول زرارين من القميص وبنطلون أسود ونضارة ورش برفان وخرج. يوسف: ماما ماما. هناء كانت في المطبخ وخرجت. هناء: إيه يا حبيبي؟ يوسف: أنا خارج يا حبيبتي، عايزة حاجة؟ هناء: لا يا حبيبي، تكون بخير بس. يوسف باس إيديها كلمته. يوسف: تسلميلي يا ست الكل، يلا مع السلامة. هناء: ربنا يحرسك ويشيل من عليك العين يا حبيبي.

يوسف: يارب يا حبيبتي. وخرج يوسف من الشقة ونزل. *** فارس وصل شهد وبعدين وصل قدام عمارة نور، ونور سلمت على البنات ولسه هتدخل العمارة، لقيت يوسف خارج. نور: رايح فين كدا بالشياكة دي؟ يوسف بابتسامة: رايح عند سيف. سلمى تاهت في ضحكته، قد إيه جميل ووسيم وشيك أوي. نور: اممم، ماشي يا عم. يوسف: طيب، أوعى كدا، خليني أسلم على فارس. ويوسف راح لفارس اللي نزل، وسلموا على بعض بالحضن. وبص على البنات. يوسف بابتسامة: إزيكم يا بنات؟

آية وسلمى: الحمدلله بخير. يوسف: طيب، اتفضل يا فارس، دي أول مرة تيجي. فارس: مرة تانية إن شاء الله. يوسف: طيب يا فارس، أشوفك مرة تانية. فارس: أكيد يا حبيبي. يوسف: يلا، سلام. فارس: سلام. نور شاورت للبنات وطلعت. ويوسف ركب عربيته ومشي. وفارس كمان هو والبنات مشيوا. وبعد شوية وصلوا والبنات نزلوا وفارس ركن عربيته وطلعوا سوا.