رواية عائلة جميلة الفصل الثالث 3 - بقلم زينب محروس

حبيبة: عشان ماما ضربتني وقالتلي أنا أمك إنما هي مرات عمك ومش بتحبك... وقالت كمان إني لو قلتلك كدا تاني هتلسعني بالنار. قبل ما أرد عليها فجأة البنت صرخت وملقتهاش على رجلي... بسبب إيد سمر اللي شدتها بغباء. قمت وقفت وقلت: إيه يا سمر في إيه؟ مردتش عليا وبصتلي بقرف وبعدين ضربت بنتها بالكف وقعتها على الأرض... وقومتها تاني بغباء وبتزعقلها وتقول: أنا كلامي مبيتسمعش ليه؟ مش قولتلك تبعدي عنها...

وراحت رافعة إيدها وضربتها كف تاني والمرة دي قلبي أنا اتنفض لما حبيبة وقعت واتخبطت في الشجرة والدم بدأ ينزل من أنف حبيبة... ومقدرتش أسكت أكتر من كدا وأخدت حبيبة منها وزعقت لها وقولت: إنتي إنسانة مريضة. شيلت حبيبة وسيبتها ودخلت جوا. كانت حماتي صحيت على الزعيق... حاولت أوقف النزيف وحماتي قاعدة تلف ورايا وقلقانة...

بعد شوية وقف نزيف الدم وكانت حبيبة بتتنفض وبتعيط بهيستريا. حاولت أهديها بس منفعتش. اتصلت على محمود ولما جيه وشاف حالتها شالها عشان يوديها المستشفى. وقبل ما نخرج من البيت حبيبة فقدت الوعي... وصلنا المستشفى والدكتور دخل يكشف عليها. وحماتي قاعدة تدعي عليا وتقولي إنتي السبب عملتي في البت إيه... وتحسبن عليا...

وأنا بعيط ومش قادرة أرد ولا حتى أقول إن سمر هي السبب. سمر جت المستشفى بعدينا وبتعيط ولا كإنها السبب في اللي حصل. وجت جري حماتي تسألها عن حبيبة... وحماتي تهدّي فيها وتبصلي بكره وغضب... وقالت: لو حبيبة حصلها حاجة هموتك بإيدي يا جميلة. بعد شوية الدكتور خرج، جرينا كلنا عليه. محمود: ها إيه دكتور طمنا. الدكتور: الطفلة عندها انهيار عصبي. وفيقة: إيه؟ يعني إيه؟ الدكتورة: الطفلة اتعرضت لضغط نفسي.. هي دلوقتي نايمة شوية وهتفوق.

الدكتور سابنا ومشي بعد ما أتمنالها الشفاء... وحماتي قربت عليا وضربتني بالكف... محمود: إيه يا أمي بتضربيها ليه؟ وفيقة: عشان هي السبب. محمود: لأ أكيد مش هي السبب صح يا جميلة. أنا بعيط وباهز راسي بس... وسمر واقفة بتضحك بخبث وكأنها نسيت موضوع بنتها... قبل ما أتكلم كان ماجد جاي يجري علينا وهو بيسأل إيه اللي حصل. سمر بحزن مصطنع: بنتنا عندها انهيار عصبي يا ماجد وكله بسبب جميلة مش عارفة عملت في بنتي إيه.

استغربت جداً لما ماجد بصلي بزعل بس حسيت إنه مش مني، دا زعل عليا... لأن نظراته ليها كانت بغضب وتوعد... ممكن فسرت نظراته غلط. المهم هو متكلمش. دخلنا كلنا عند حبيبة وطبعاً حماتي عايزة تولع فيا... شوية وحبيبة فاقت وسمر هي اللي كانت قاعدة جنبها... أول ما شافتها بدأت تعيط تاني وتبعد في سمر وتقول: ماما وحشة، جميلة حلوة، أنا عايزة جميلة...

الكل استغرب تصرفها. يعني المفروض زي ما حماتي بتقول أنا السبب في اللي حصل مع حبيبة، بس رغم كدا بتقول إن سمر وحشة وأنا حلوة... قمت من مكاني عشان أروح لها. حماتي مسكتني... وقالت: إيه مش كفاية اللي عملتيه فيها. ماجد: سيبيها يا أمي. يعني لسة مقتنعة إن بعد ما حبيبة قالت إنها عايزاها... مقتنعة برده إنها السبب. سابتني حماتي وقربت من حبيبة اللي اترمت في حضني على طول... تعيط وتقول: مش عايزة ماما سمر...

دي مش بتحبني، مش عايزاها. الكل بص لسمر بشك... اللي طبعاً عشان تخرج من الموقف ده أصطنعت العياط... بالليل حبيبة روحت البيت. كان المفروض تروح مع أمها وأبوها... بس ماجد رفض لما لقاها متمسكة بيا وطلب مني أخليها عندي. وطبعاً أخدتها أنا ومحمود عندنا... وماجد جاب لها شوية هدوم إنها هتفضل معانا لحد ما تبقى كويسة. مر أسبوع وسمر حتى مبتسألش على بنتها... ولا حتى مهتمية بيها إلا لما تكون حماتي موجودة...

وحبيبة مبتسيبنيش حتى وأنا في المطبخ... وسمر ماسكة ودان حماتي... وتقولها إني عاملة سحر لبنتها عشان تكرهها وتحبني بدالها عشان أنا غيرانة منها. في يوم قاعدين نلعب أنا وحبيبة وفرح بنحاول نخرجها من اللي هي فيه... واتفقنا إن الخسران يعمل اللي الاتنين الكسبانين يطلبوه منه... وفرح هي اللي خسرت. أنا: إيه رأيك يا حبيبة نطلب منها تعملنا حاجة نشربها. حبيبة: آه تعملنا عصير مانجة. أنا: فكرة حلوة، أنا بحب عصير المانجة كتير.

فرح: ماشي يا أختي إنتي وهى اطلبوا وأنا أعلمكم... ماشي دا أنا هوريكم. أنا: (صورة: 😂) (صورة: 😂) كلمي يا حبيبة دي مفكرة إننا هنخسر. حبيبة: ماما جميلة مش بتخسر يا فرح. فرح: ماشي اخلصوا عايزين إيه؟ حبيبة: مش قولنالك الله هو إنتي بتنسي ليه... ما قولنا عايزين مانجووووو. فرح: ماشي يا بتاع المانجووووو، هقوم أعملكم. حبيبة: ماشي بسرعة. دخلت المطبخ عشان أديلها المانجة بس سمعنا حبيبة بتصرخ...

خرجنا إحنا الاتنين ورا بعض جري من المطبخ... كانت سمر واقفة جنبها وحماتي وحمايا جم على صريخ حبيبة... جريت عليها أنا وفرح وحضنتها وبقولها: في إيه؟ إهدي يا حبيبتي، إهدي. اتكلمت حبيبة وهي بتشاور على سمر: كانت عايزة تلسعني. الكل اتفاجئ... وأنا اديت حبيبة لفرح وقمت لسمر وضربتها بالقلم وقولت: إيه يا شيخة مبترحميش... دي بنتك يا شيخة، فين قلب الأم اللي عندك ولا إنتي معندكيش قلب أصلاً. حماتي (وفيقة) : جميلة...

إنتي اتجننتي إزاي تمدي إيدك على سمر. متكلمتش وروحت أخدت حبيبة من فرح وكشفت ضهرها اللي كله حروق... وقولت: إيه رأيك يا حماتي؟ إيه رأيك في بنت اختك... بتعذب طفلة وتعمل فيها كدا تفتكري يبقى عندها قلب؟ والله أنا شفقانة عليكي يا سمر إنتي مريضة نفسياً، مريضة يا سمر... حماتي قربت عليا وشالت حبيبة مني وبصت على ضهرها... وعنيها احمرت من الغضب... وبصت لسمر وفجأة... متوقعتش صراحة إنها...