رواية عهد الضبع الفصل التاسع 9 - بقلم نور محمد

خرج ضبع بكل برود وقفل الباب خلفه. سمع صوتهم وهما بيصرخوا برعب من المكان. قال بضيق: عالم كلاب بصحيح وعاوزين الحرق كلهم. توجه للقصر تاني والشمس كانت خلاص طلعت. دخل القصر بهدوء لقى المكان هادئ جدا. قرر يطلع يرتاح شويه فوق في غرفته لأنه تعبان أوي. فجأه وقف على صوت ضحك عالي من المطبخ. فتوجه بسرعه للمطبخ ودخل. كانت هنا الصدمة بجد. وقف بصدمة والدم غلي في عروقه من الغيرة.

لقى عهد قاعدة على رخامة المطبخ وقدامها حازم بيقطع الخضار وبيهزر معاها. وهي منسجمة أوي معاه وبتضحك من قلبها عليه. حازم قريب أوي منها بطريقة خلت عروق ضبع برزت من شدة الغضب والغيرة. ضم ايده بتوعد لحازم وقرب منهم. شد حازم بقوة بعيد عن عهد وقال بغضب وغيره: الله الله ايه الرومانسية دي كلها يا أستاذ حازم؟ حازم بلع ريقه برعب من ضبع وقال: ضبع اوعى تفهم غلط أنا كنت بساعدها في تحضير الفطار بس صدقني.

ضبع بص عليه بضيق ووجه نظره لعهد بغضب. نزلت عهد بسرعة عن رخامة المطبخ وقالت: فعلاً هو كان بيساعدني في تحضير الفطار. بس ياضبع بيه. ضبع بص عليها بتوعد وتوجه لخارج المطبخ وقال: تمام خمس دقايق بالعدد يكون الفطار قدامي على السفرة بره مفهوم. عهد بخوف: مفهوم ياضبع بيه. خرج ضبع من المطبخ وحازم قرب من عهد وقال: متقلقيش أنا هساعدك في تحضير الفطار وهنخلص بسرعة. قاطعه صوت ضبع الغاضب: حازم تعال هنا فوراً عاوزك.

بلع حازم ريقه بخوف وقال: آسف بس لازم أخرج أشوفه دلوقتي وهبعت الدادة تساعدك تمام. عهد ببسمة: تمام وخد بالك من نفسك كويس. حازم بخوف ومرح: ربنا يسترها معايا يا أختي. من يوم ما دخلتي القصر ده وضبع عاوز ياكلني من الغيرة. ضحكت عليه عهد وحازم سابها وخرج لضبع. لقاه على السفرة وهو بيضغط على ايديه بقوة. بلع ريقه بخوف وقال في نفسه: يانهارك الأسود يا حازم ده باين إنه متعصب وهيطلع عفاريته عليا أنا. ربنا يستر.

وفق قدامه بتوتر وخوف وقال: نعم ياضبع انت ناديت عليا. أشار له ضبع على المقعد جنبه وقال بحده: اقعد جنبي عاوز أتكلم معاك. قعد حازم وهو لسه خايف من ضبع وقال: اتفضل عاوز تقول إيه ياضبع. ضبع بضيق: أنا كام مرة قولتلك تبعد عن عهد. حصل كلامي ده أو لا. حازم بخوف: أيوه حصل بس أنا. قاطعه ضبع بحده: انت إيه ضربتك المرة اللي فاتت وبرضه متعلمتش الدرس. أعمل فيك إيه تاني علشان تفهم.

حازم بتوتر: أفهم إيه ياضبع أنا معملتش معاها حاجة غلط. أنا بس عرضت عليها الجواز وهي وافقة. قاطعه ضربة ضبع القوية للسفرة بغضب وقال: وده أكبر غلط عندي. انت عارف إن أكتر حاجة بتجنني هي إن حد يقرب من شيء ملكي وانت أكتر شخص عارف طبعي ده. حازم بخوف منه: أيوه عارف طبعك كويس أوي. بس عهد مش ملك حد ياضبع دي إنسانة زينا كمان ومن حقها تختار شريك حياتها و. قال ضبع بغضب رهيب وغيره: ده على جثتي أو جثتها الكلام ده.

عهد من يوم ما دخلت القصر بقت ملكي أنا ياحازم. ملكي أنا وبس. هنا قبل ما حازم يرد عليه وصلت عهد بالفطار وحطته قدامهم بسرعة وقالت: تأمر بحاجة تاني ياضبع بيه. ضبع ببرود: اقعدي كلي معانا الأول وبعدها حضري ليا القهوة بتاعتي. عهد باحراج: شكراً أنا مش جعانة دلوقتي هروح أحضرلك القهوة فوراً. قاطعها حازم ببسمة: معلش ياعهد اقعدي كلي معانا حتى تفتحي نفسنا على الأكل الجميل ده تسلم إيدك. عهد اتكسفت من كلام حازم

ومقدرتش تكسفه فقالت بكسوف: حاضر ياحازم. ضبع بص عليها بغيظ كبير لأنها سمعت كلام حازم علطول عكس كلامه هو اللي كسفته عليه. وبص على حازم بغضب وغيره. عهد قربت علشان تقعد جنب حازم. اللي سحب لها الكرسي جنبه بسرعة. بس وقفت على صوت ضبع اللي قال بغيرة: اقفي عندك متقعديش هناك تعالي اقعدي هنا جنبي. عهد توترت أوي منه وبصت على حازم بخوف. بس حازم هز رأسه لها بهدوء إنها تسمع كلام ضبع. وفعلاً قعدت جنب ضبع بتوتر وخوف. وضبع قدم

لها طبق الأكل ببسمة وقال: اتفضلي كلي ياعهد. أو لسه متوترة مني وعاوزاني آكلك بنفسي زي المرة اللي فاتت فاكرة. خلص جملته وغمر لها بخبث. و عهد اتكسفت منه وقالت: احم لا أنا هاكل لوحدي شكراً. ابتسم ضبع على كسوفها منه ووجهها اللي بقى لونه أحمر. وبعد وقت قالت عهد بخبث: ها يا حازم فكرت في كلامي وقررت امتى نعمل الخطوبة بتاعتنا. حازم سمعها وشرق في الأكل. وهي جرت عليه بخوف وقالت: سلامتك انت كويس كل براحة ليحصلك حاجة.

حازم بص عليها بتوتر وضبع مسك كوباية المايه جنبه بقوة. وهو بيبص عليهم بغيرة كبيرة. وفجأة الكوباية اتكسرت في ايده من شدة ضغطه عليها. وحازم وعهد اتخضوا منه. وقال حازم بقلق: ضبع انت كويس ايدك بتنزف قوم معايا نضمض الجرح بسرعة. ضبع بص عليه بضيق وغضب وقال: متشلش همي ياحازم أنا متعود على كده. وقبل ما يكمل جملته لقى عهد جرت عليه بلهفة وخوف

ومسكت ايده بصدمة وقالت: إيه ده ايدك جرحها كبير أوي قوم معايا نروح لمستشفى فوراً نخيط الجرح بسرعة. ضبع انصدم من تصرفها ده. حتى حازم بص عليها بصدمة وعدم فهم. و عهد مهتمتش لنظراتهم دي من شدة قلقها على ضبع وقالت: ضبع بقولك قوم معايا ايدك بتنزف أوي ياله بسرعة. ضبع توتر أوي من قلقها وخوفها الواضح عليه. وسحب ايده منها وقال: احم اهدي ياعهد ده جرح سطحي وأنا متعود على الجروح دي.

هروح أضمه في غرفتي دلوقتي وهبقى تمام متقلقيش عليا. عهد بصت عليه باعتراض وكانت هترد عليه. بس قاطعها حازم بسرعة وقال: هو عنده حق ياعهد سيبه على راحته أحسن. عهد فهمت قصد حازم إيه من نظرته. وضبع بص على حازم بغضب لأنه فاكر حازم قال كده من غيرته على عهد. فتنهد بضيق كبير وسابهم وطلع غرفته بسرعة. وبعد رحيل ضبع حازم قرب من عهد بضيق وقال: انتي ليه عملتي كده خطتنا كانت هتفشل كلها بسببك دلوقتي.

عهد بتوتر وتشتت: أنا آسفة معرفش عملت كده ليه صدقني يمكن لآني بتوتر من شكل الدم قدامي. حازم بتفهم: تمام خلاص اهدي حصل خير. المهم روحي نامي دلوقتي علشان عندنا شغل مهم أوي بكرة الصبح. عهد بقلق: حاضر بس تفتكر ضبع هيعمل فينا إيه بعد ما يعرف. حازم بخوف من الفكرة: هيقتلنا طبعاً بكرة الصبح بس لازم نعمل كده ونكمل خطتنا علشان ننقذ ليلى. عهد بلعت ريقها وحطت ايدها

على رقبتها بخوف وقالت: عندك حق ربنا يستر علينا منه بقى بكرة الصبح. عند ضبع كان على سريره بيضمض جرحه. وفجأة ابتسم بسعادة لما افتكر خوف ولهفة عهد عليه. كان فعلاً سعيد أوي من قربها وقلقها وخوفها عليه وقال: أنا اتأكدت دلوقتي بعد ما شفت بعيني خوفك ولهفتك عليا ياعهد إنك بدأتي تحبيني زي ما أنا كمان قلبي حبك أوي وبجنون. خلص تضميض جرحه ونام بسعادة كبيرة وهو بيردد: قريب هتبقي ملكي ومراتي أنا ياعهد أوعدك.

في الصباح اليوم التالي استيقظ ضبع على صوت عالي في القصر. تحت فقام بانزعاج ونزل تحت بغضب وهو بيتوعد بالهلاك للي صحاه دلوقتي من حلمه الجميل مع عهد حبيبته. وفجأة وقف مكانه بزهول وعنيه وسعت بعدم تصديق وصدمة. لما لقى في عمال كتير في القصر بتجهز لمناسبة كبيرة وفي زينة متعلقة في كل مكان بشكل جميل أوي وأنيق جداً. نزل ضبع وهو بيبص حواليه بزهول وصدمة. ومسك

عامل من العمال وسأله بحده: إيه اللي بيحصل هنا انتو بتعملوا إيه هنا في القصر بتاعي. بلع العامل ريقه بخوف من نظرة ضبع المرعبة وقال: مفيش يافندم إحنا بنحضر لمناسبة خطوبة البشمهندس حازم أخ حضرتك. ضبع سمعه بصدمة كبيرة بعد ما فهم قصده إيه. ونادى بغضب رهيب: حاااااااااازم تعال هنا حالا و.