رواية على امل ان يعود الفصل السابع 7 - بقلم دينا عبدالله

بعدين سابهم وطلع على أوضته. بص صلاح لزينة وقال بمكر: شفتي قدرت تلعب بعقله تاني وخدته منك. وبكرة هتخليه ميسمعش كلامك وهتقلبه ضدك. دلوقتي تشوفي. لعب بعقلها وسابها ومشي. بصت زينة على أوضة رحيم وقالت بغضب: مش هسمح لها تاخد ابني مني. أنا هعرف إزاي أتصرف معاها. في أوضة رحيم. قعد رحيم جنب نجمة اللي باين عليها الحزن. بصتله وقالت: هيا أمك دي صح؟ هز رحيم راسه بهدوء. فقالت بدموع: هيا كانت تقصد إيه بكلامها؟ تقصدني أنا بالنصابة؟

رحيم بحب: إنسي أي حاجة قالتها. انتي ارتاحي بس دلوقتي ونتكلم بعدين. نجمة: بس عايزة أفهم وأعرف دلوقتي. أنا حصل معايا إيه؟ رحيم: معرفش حصل معاكي إيه. نجمة: إزاي؟ مش إنت جوزي يعني من المفروض تعرف عني كل حاجة وتعرف حصل معايا إيه؟ رحيم بحزن: دا المفروض بقى. نجمة بعدم فهم: إنت قصدك أنا مبقتش فاهمة حاجة؟ رحيم بعتاب:

إنتي هربتي يوم فرحنا يا نجمة. ومن يوم فرحنا لحد اللحظة دي وأنا مش عارف كنتي فين ولا حصل معاكي إيه. دورت عليكي كتير أوي وفي كل مكان بس مقدرتش أعرف أي حاجة عنك. اختفيتي فجأة ومعرفتش أوصلك. انتي بس اللي تعرفي كنتي فين وبتعملي إيه وكنتي بتفكري في إيه. بصتله نجمة بدهشة ودموع مش مصدقة إنها عملت كده. سكتت وهيا بتحاول تفتكر أي حاجة بس راسها وجعتها أوي وحست بصداع جامد. ضمها رحيم ليه وقال بحنان:

ارتاحي دلوقتي ومتحاوليش تفتكري أي حاجة. ارتاحي بس. دفنت وشها في صدره وهيا حاسة بالأمان والدفء وهيا جنبه. *** خد رحيم نجمة للأماكن اللي كانو بيروحوها دايماً مع بعض قبل الجواز عشان تستعيد ذاكرتها أسرع. خدها على البحر المكان اللي اتقابله فيه أول مرة وإزاي وقع في حبها من أول ما شافها. وعلى البحر برضه لما طلبها للجواز بطريقة رومانسية. انحني على ركبته وطلع علبة قطيفة فيها خاتم جميل وقال بحب: نجمة تتجوزيني؟

حطت نجمة إيديها على بؤها بفرحة ودموع ومكنتش مصدقة وهزت راسها بالموافقة. طلع الخاتم ولبسهولها بعدين شالها وبدأ يلف بيها وهو مبسوط أوي. خدها على الكافتيريا اللي كانو بيتقابلو فيها دايماً مع بعض وليهم لحظات كتير جميلة في المكان ده. رجعها على البيت وباس إيديها برقة وقال بابتسامة: مش هتأخر عليكي. نجمة بقلق: رحيم متسبنيش هنا لوحدي. أنا خايفة أبقى لوحدي هنا من غيرك. رحيم بحب:

حبيبتي متخافيش. ماما وصلاح معاكي وأنا مش هتأخر. في حالة طارئة في المستشفى وأنا لازم أمشي. هزت راسها بابتسامة وخوف. سابها وركب عربيته وطلع على المستشفى. طلعت زينة من أوضتها وبصت على نجمة اللي كانت بتبصلها بقلق وخوف. قربت زينة منها وقالت بضيق: كنتو فين من صباح ربنا؟ نجمة: مفيش كنا بنغير جو شوية. زينة بغضب:

إنتي فاكرة يا بت إنك هتقدري تضحكي عليا زي ما قدرتي تضحكي على ابني. أنا عارفاكي نصابة وبت حرام. اطلعي بالدهب اللي خدتيه وهربتي. نجمة بدهشة ودموع: دهب إيه؟ أنا ماخدتش حاجة ومعرفش انتي بتتكلمي عن إيه أصلاً. مسكتها زينة من طرحتها وشعرها بقوة وقالت وسط صراخ نجمة: متعمليش نفسك بريئة ومعرفاش حاجة. اطلعي بالدهب أحسن لك وإلا أقسم بالله العظيم هتشوفي أيام أسود من سواد الليل. جي صلاح واتظاهر إنه اتفاجأ وجري

بعد زينة عن نجمة وقال: إيه يا ماما اللي انتي بتعمليه ده؟ بص على نجمة وقال: اطلعي انتي يا مرات أخويا فوق وأنا هتكلم معاها وأهديها. هزت نجمة راسها بدموعها وطلعت جري على أوضتها. بصتله زينة وقالت بغضب: إنتي بعدتيني ليه عنها؟ صلاح بمكر: مش كده يا ست الغالية. رحيم لو عرف اللي انتي عملتيه هيزعل منك وإحنا عايزين رحيم يبقى في صفك انتي مش هيا. زينة بغضب: أومال عايزني أعمل إيه يعني؟ صلاح بمكر: سيبي الموضوع عليا أنا. ***

رانيا تعبت أوي فطلب أخوها الدكتور ليها. فحصها الدكتور وقال بابتسامة: مبروك. محمد أخوها باستغراب: مبروك على إيه؟ الدكتور: المدام حامل. بص محمد على أخته بصدمة كبيرة وهيا كانت بتبصله بدموع وهيا كانت مصدومة. سابهم الدكتور ومشي. قرب منها محمد وشدها من شعرها بقوة وقال وسط صراخها: حامل؟ انتي بعتي نفسك وبعتي شرفك يا بت الكلب. وبدأ يضربها بكل قوته وهيا بتترجاه يسامحها ويسيبها. مسكها تاني من شعرها بقوة أكبر وكانت بتنزف

من بؤها من شدة الضرب وقال: مين الكلب اللي يبقى أبوه؟ انطقي. رانيا وهي بتعيط جامد وخوف: صلاح. صلاح رجب. محمد بغضب وتوعد: ورحمة أبويا وأمي مش هسيبه. وانتي هقتلك وأغسل عارك بإيدي وأرتاح منك يا سافلة واللي متربتيش. وضرب راسها في السرير جامد وطلع. قعدت رانيا تعيط جامد وهيا بتتمتم وندمانة على اللي عملته وخايفة من اللي أخوها هيعمله. ***

نامت نجمة بعد ما فضلت مستنية رحيم لحد ما اتصل بيها وقالها إنه هيتأخر في الرجعة على البيت ويمكن يقعد للصبح في المستشفى. صحت نجمة بفزع لما حست بإيد بتلف حول خصرها. بصت وانصدمت لما لقت صلاح نايم جنبها وبيحاول يقرب منها. قامت بسرعة وقالت بغضب: إنت اتجننت! إنت بتعمل إيه هنا؟ قام صلاح وقال وهو بيبصلها برغبة: وطي صوتك. إيه هوا انتي نسيتي ولا إيه؟ نجمة بعدم فهم: نسيت إيه؟ صلاح وهو بيقرب منها: يبقى نسيتي.

رجعت نجمة لورا لحد ما وصلت للحائط. حاصرها بإيديه وهمس لها وقال: نسيتي إن كان فيه علاقة بينا أنا وانتي ومحدش يعرفها غيرنا. بصتله نجمة وهيا مبحلقة عينيها بصدمة كبيرة.