رواية عودة الماضي الفصل السادس 6 - بقلم مني الصاوي

للأسف لازم المرافق يجيد اللغة الألمانية علشان يعرف يتعامل. أنا… ينظر محمود وسمر إلى شروق بتعجب دون أي كلام. أنا أقصد يعني محمود يكون معانا أو أنت يا سمر وأنا هكون معاكم كمترجمة. والله أنا مش عارفة أعمل إيه. امتحانات الأولاد بدايتها الأسبوع الجاي إن شاء الله ومش عارفة أعمل إيه. ولا حاجة. الأولاد محتاجينك يا سمر مش هينفع خالص موضوع السفر بالنسبة لك.

بس ده واجبي يا محمود ده واجبي. أنا مراته. ولو ماما تقدر تخلي بالها من الأولاد أنا لازم أسافر. لا طبعاً. الأولاد لو راح عليهم الامتحان السنة هتضيع يا جماعة. أنا مش طفل وأكيد هلاقي اللي يساعدني هنا. خلاص مفيش كلام. أنا اللي هسافر معاك يا فريد مفيش كلام هيتقال بعد الكلام ده. وهاخد شروق معايا هي معاها حق لازم تكون موجودة علشان تعرف تتعامل في المستشفى.

يذهب محمود لسؤال الطبيب لمعرفة معلومات السفر بعد أن تواصل الطبيب مع المستشفى في ألمانيا. كويس أوي يا أستاذ محمود. قدرنا نحدد أقرب ميعاد للعملية وهتكون بعد أسبوع بالظبط. لازم تجهز الإجراءات علشان السفر في أقرب وقت. تاني يوم تذهب شروق إلى عملها وهي سعيدة أنها هتقدر تكون بجانب فريد في رحلة علاجه.

صراحة يا شروق أنا خايفة عليكي. خايفة محمود يشوف اهتمامك الزيادة ده بأخوه يا حبيبتي. إنت مش شايفة نفسك بتتصرفي إزاي. ده لو جوزك مش هتعملي كدا. اهدي شوية بلاش تخربي بيتك. جوزك راجل محترم وأهله ناس كويسين حافظي عليه يا شروق وانسى على. وإلا فريد. تخيلي أنا بقيت أتخبط من كتر كلامك على أنه على.

مش قادرة يا مي. مش عارفة أفصل بينهم. على حلمي اللي مكملش. حسيته رجع تاني قدامي ويتنفس. وفجأة كل ده يطلع كابوس وإنه ممكن يضيع مني تاني. يا حبيبتي انت حالتك أتأخرت أوي. أنا رأيي ترجعي للدكتور اللي كان بيعالجك. دكتور إيه يا مي. شيفاني مجنونة. يا قلبي لا مش قصدي. إنت بس أعصابك تعبانة شوية. ماهو اللي حصل مش قليل. مفيهاش حاجة لو ترجعي للدكتور.

أنا مش هرد عليكي. يا دوب أدخل للمدير أمضي الإجازة وأروح أشوف محمود عمل إيه في الإجراءات. شروق. عايزة أقولك حاجة واحدة. إنت كده بتلعبي بالنار. وأحب أفكرك إن جوزك اللي مسافر معاكي. وأنا حاسة إنه مستغرب من تصرفاتك الأوفر دي. أنا تعبت. مش عارفة أعمل إيه. مش هقدر أقعد وأحط إيدي على خدي وأستنى وأنا بدعي إنه يرجع بالسلامة. متقلقيش عليا أنا هاخد بالي. بس إنت ادعيله يا مي. مش علشاني. علشانه.

هقول إيه. ربنا يشفيه وربنا يستر من اللي جاي. وبالفعل تذهب شروق إلى المدير وتتم إجراءات الإجازة وتتوجه إلى المنزل. إيه ده محمود. إنت هنا. إيه خلصت جواز السفر بتاعك وباقي الإجراءات. أنا مش عارف أعمل إيه. جواز السفر بتاعي هياخد وقت وفريد لازم يسافر في أسرع وقت. العملية بعد أسبوع ولازم يتحضر للعملية قبلها بيومين على الأقل. جوازك تجديده ما خدش وقت. إنت وفريد. أعمل إيه مش عارف.

والعمل هتعمل إيه. هو ينفع العملية تتأجل فترة بسيطة. للأسف الدكتور بيأكد بما إنه خلص إجراءات فريد لازم السفر يكون خلال يومين. حيرتني معاك. هنعمل إيه. للأسف يا شروق مفيش قدامنا غير إنك تسافري معاه. وأنا أول ما أوراقي تخلص هحصلكم. أنا معنديش مانع. بس ماما وسمر وفريد كمان هيقولوا إيه.

هيقولوا إيه يعني. إنت زي أخته يا حبيبتي. وأكيد هما عارفين ده وشايفين معزته عندك. ده إنت زعلانة عليه أكتر مننا. معلش يا حبيبتي أنا عارف إني بتقل عليكي وكمان هتبقى مسؤولية عليكي. بس أنا عارف إنك قدها. أنا هنزل أفهم ماما وسمر الموقف علشان نلحق الميعاد. وبالفعل ينزل محمود لأمه وزوجة أخيه كي يطلعهم على المشكلة. وهو ينفع يا ابني مراتك تبقى مرافق لأخوك. ده مش هيبقى عبء عليها لوحدها.

يا ماما مش هتبقى لوحدها. هما يومين تلاتة إن شاء الله وأحصلهم. إيه يا سمر. شايفة ساكتة. ما تقولي رأيك. هقول إيه. أنا أساساً لو مكنش الأولاد مكنتش هعرف أتصرف. وإنتوا عارفين تعليمي على قدي ومش بعرف أي لغة. وشروق أختي. وأنا عارفة هتعرف تتصرف أكتر. أنا المهم عندي صحة فريد وإنه يرجع لولاده بالسلامة. خلاص اتفقنا. السفر هيبقى بعد بكرة. يأتي يوم السفر وتروح شروق تودع أمها وتطمئن عليها قبل السفر.

أشوفك على خير يا ماما. مفيش وقت. الطيارة بعد ساعتين. أنا هطلع من هنا على المطار. والله يا بنتي أنا مش عارفة ليه تعملي في نفسك كده وتشيلى مسؤولية مريض. افرضي مات هتعملي إيه. بعد الشر. حرام عليكي يا ماما. ليه كده. إن شاء الله هنرجع وفريد كويس. عموما أنا لازم أمشي. كده هتأخر. مي معايا علشان ترجع بالعربية. ومحمود هو وباقي العيلة هيقابلونا في المطار. ادعيلنا يا ماما.

ربنا يرجعكم مجبورين الخاطر إن شاء الله يا بنتي. مع السلامة. في سيارة شروق. تفتكري يا شروق موضوع سفرك ده كان صح. أنا خايفة عليكي أوي. خايفة من إيه. أنا رايحة مع إنسان مريض هيعمل عملية. إيه الخطر اللي ممكن يواجهني. أنا مش خايفة عليكي منه. أنا خايفة عليكي من نفسك. يا شروق خايفة حبك يخليكي تلعبي بالنار وإنت مش حاسة. لحد ما النار دي تحرقك. يا ساتر عليكي. ده بدل ما تقوليلي ترجعي بالسلامة.

إن شاء الله يا حبيبتي ترجعي بالسلامة. هفضل أدعي لحد ما ترجعي وأطمن. يا خوفي من اللي ممكن يحصل. وبعد ساعات قليلة الجميع في المطار يودعون شروق وفريد. أنا آسف يا شروق تعبتك معايا. لا كده من أولها لازم نتفق. مفيش أسف. مفيش تعبتك. مفيش شكرا. هههههههه. مفيش إيه تاني هفكر وأبقى أقولك. لا على إيه من غير تفكير. أنا هسمع الكلام يا مس شروق. شاطر. ممكن تحاول ترتاح لحد ما نوصل المستشفى.

وبعد ساعات قليلة بيكون فريد في المستشفى وشروق تقوم بالتواصل مع الطبيب المعالج لحالة فريد وتم تحديد العملية بعد يوم واحد. تم تجهيز فريد للعملية في أسرع وقت لخطورة حالته. جاء يوم العملية. شروق تقريباً منهارة. تجلس على سجادة الصلاة تدعي ربها والدموع تجري على خديها. تأتي الممرضة لتخبرها أن المريض يتجه نحو غرفة العمليات. شروق تمسك بيد فريد وهي تبكي. إن شاء الله هتخرج بالسلامة ونروح سوا. إن شاء الله.

يمر الوقت ببطء على شروق الجالسة بانهيار أمام غرفة العمليات. تمضي الساعات وهي متوترة. تأخذ ممر المستشفى ذهابًا وإيابًا. وفجأة يخرج فريد من غرفة العمليات. تجري شروق تجاه فريد تلمس وجهه وهي تبكي وتتكلم مع الطبيب لمعرفة حالته. العملية نجحت والمريض هيدخل العناية المركزة لمدة ٤٨ ساعة تحت الملاحظة. تتصل شروق بمحمود لكي تطمئنه على حالة فريد.

الجميع يدعو له. مر يومين وفريد في العناية وشروق تجلس بجانبه تتحدث معه وتحكي حكايات. تتذكر على. وفي لحظة تتخيل شروق أن النائم أمامها هو على. على يا حبيبي ليه لحد دلوقتي مصحتش. أنا خلاص مش قادرة أتحمل غيابك أكتر من كده. ارجع لي. تقترب شروق من فريد وتلمس وجهه وتلمس شفتاه وتقترب منه وتنزل بشفتيها وتقبله. وفجأة… يفتح فريد عينيه و…