رواية عشق للأبد الفصل الخامس 5 - بقلم سولييه نصار

-الجزء الخامس كنت مادد ايدي، ببصلها برجاء إنها تمسك ايدي، تبكي معايا، بس هي كانت واقفة مصدومة وهي بتبصلي. بعدين بصت لجدي وأمها بتوتر وبعدين بصتلي وهي بتقول بصوت مهزوز: -لا مش هروح حتة معاك. انت متجوز خليك مع مراتك. وشي شحب وأنا ببصلها. حسيت نفسي انكسرت لما رفضتني. شوفت الشماتة في عيون زهرة وابتسمت بتريقة عليا. كنت حاسس بالصدمة، لسه مادد ايدي. الدموع حرقت عينيا وأنا ببصلها بصدمة كبيرة. جدي رفع راسه وقال:

-أظنك سمعت أهو. مرام قررت تحترم نفسها وعرفت إنك رجل متجوز، يا رب عقبالك ما تحترم نفسك وتعرف إنك راجل متجوز وتحترم مراتك اللي انت مش عاملها أي اعتبار ودايمًا تكسر فيها! بقلب مكسور روحت لبيتي الجديد أنا وزهرة. قعدت زهرة على السرير وهي بتهز رجليها وبتبتسم وقالت: -غريب إن مرام جبانة ومعندهاش نفس الشجاعة اللي عندك. أنا لو منها استغل الفرصة وامسك ايديك وميهمنيش أي حد. بس متزعلش يا بيبي، هي كسرت قلبك وأنا هصلحه.

كنت معمي من الغضب محستش بنفسي غير وأنا بقرب منها وبخنقها جامد. زقتها ناحية السرير وأنا خانقها بغل. كانت بصالي بصدمة وعينيها مدمعة. الغريبة إنها مكانتش بتقاوم، حسيت إنها انفصلت عن الواقع. بعدت ايدي عنها وأنا ببصلها بحيرة، حسيتها لسه منفصلة عن الواقع، مكانتش معايا خالص. -زهرة!!

قولتها بحيرة بس مردتش عليا. كنت أول مرة أكون قريب منها بالشكل ده. وشي كان قريب من وشها. أول مرة أشوف إنها جميلة بالشكل ده، ملامحها كانت أجمل ملامح أشوفها في حياتي. من غير ما أحس لمست وشها وقربت منها. فجأة كان وعيها رجع، زقتني وهي بتصرخ لحد ما وقعتني على الأرض: -لا متعملش كده. أبوس ايديك متعملش كده.

كنت ببصلها بصدمة وأنا على الأرض فهي حطت ايديها على وشها وقعدت تعيط. فضلت تعيط لدقيقتين تقريبًا، وأنا في مكاني مستغرب. فجأة بطلت عياط وقامت قعدت على السرير وهي بتبصلي بخوف: -متعملش كده تاني. قالتها وقامت بهدوء وجريت على الحمام. قومت وأنا متضايق وطلعت برا البيت وأنا بسأل نفسي ايه العبط اللي عملته ده!! مر يومين. وقدرت أقنع مرام أخيرًا تقابلني. كنا قاعدين في الكافتيريا بتاعتنا وببصلها بلوم وبقول:

-انتي كسرتيني يا مرام. كسرتيني لما رفضتي تمسكي ايدي. أنا كنت مستعد أتخلى عن الكل عشان خاطرك. كل الفلوس والعز اللي أنا فيه. -عايزهم يقولوا عني خطافة رجالة!!! -الكل عارف إن الوحيدة اللي خطافة رجالة هي زهرة مش انتي خالص. خروجنا مع بعض من بين العيلة واعتمادنا على نفسنا هيثبتلهم ده وأنا وقتها هقول كل الحقيقة ومش هيهمني جده ولا غيره. بس أنا محتاجك عشان أعمل كده. محتاج ايديك تكون في أيدي!

-ماشي بس بشرط نثبت الأول براءتك من اللي اتهمتك بيه زهرة عشان وقتها جدي يطردها ونفضل احنا. -أنا مش مهتم أثبت حاجة لحد احنا هنسيبلهم البيت ونمشي ومش عايزين حاجة منهم! -عايزانا نمشي من البيت ونسيب ثروة هاشم بيه لزهرة!!! قالتها مرام بهدوء.