رواية عشقت ابن المارد الفصل العاشر 10 - بقلم مارينا عبود

جورى اتصدمت لما شافت حسام واقف وراها وبيبتسم. جورى بخوف: انت عاوز إيه؟ حسام بتمثيل الحزن: بصراحة أنا جيت عشان أعتذرلك على أسلوبي معاكي والموقف اللي حصلك امبارح. أنا وتميم صحاب، بس هو شكله فهم غلط. أنا ماكنتش أقصد أضايقك، صدقيني. أنا كنت بس حابب أسألك عن مكان الكافتيريا وأنا بعتذرلك على أسلوبي معاكي. جورى: حصل خير، وأنا كمان بعتذرلك على اللي حصل من تميم. حسام بخبث: على إيه؟

ماحصلش حاجة. وبعدين تميم صديقي وعمري ما أزعل منه. جورى: تمام. حسام: إنتي مستنية تميم، مش كده؟ جورى: آه. حسام: طيب إيه رأيك ندخل الكافتيريا نشرب حاجة لحد ما يجي؟ جورى: تمام، مفيش مشكلة. حسام: اتفضلي. حسام أخد جورى وقعدوا في الكافتيريا. *** في فيلا مراد الجارحي روان كانت قاعدة في الأوضة وفجأة الباب خبط. روان قامت وفتحت، لقت فريدة. روان: إنتي مامت مراد، مش كده؟ فريدة بحب: آه يا بنتي، ممكن أدخل أتكلم معاكي شوية؟

روان: طبعًا، اتفضلي. فريدة دخلت وروان قفلت الباب وقعدت جنبها. فريدة بحزن: أنا بعتذرلك يا بنتي على اللي عمله مراد ابني معاكي. روان بحزن: مفيش داعي حضرتك تعتذري، ده مش غلطك. فريدة: صدقيني يا بنتي، مراد طيب أوي ومافيش أطيب منه. بس من بعد موت خطيبته بقى قاسي واتغير أوي، وحتى ساب شغله وبقى يشرب ويسهر. صدقيني يا بنتي هو ماكنش قصده يعمل فيكي كده. اللي حصل لمراد صعب أي حد يتحمله. روان: طنط، هو خطيبته ماتت إزاي؟

فريدة بحزن: هي بصراحة... وفجأة الباب اتفتح ومراد دخل. مراد: ماما، إنتي بتعملي إيه هنا؟ فريدة: كنت بتعرف على البنت القمر دي. مراد: طيب انزلي وجهزي نفسك انتي وبابا عشان أسر هيتجوز النهارده. فريدة بصدمة: هيتجوز إيه؟ القرار المفاجأة ده وليه بسرعة كده؟ مراد: عادي بقى. وبعدين إحنا ما صدقنا إنه هيتجوز. يلا روحي جهزي عشان كلنا لازم نكون معاه. فريدة بحب: خلاص يا ابني، أنا هروح لأبويا وأقوله ونجهز ونروحوا. مراد: تمام.

فريدة طلعت ومراد قفل الباب. مراد: روان، يلا عشان نشتريلك هدوم وكمان عاوزك تختاري فستان شيك كده عشان عندي ليكي مفاجأة محصلتش. روان بخوف ودموع: لا لا، مفاجأة تاني؟ لا ارجوك، أنا مش حمل صدمات تاني، كفاية. مراد زعل أوي لأنه وصلها للحالة دي. قعد جنبها وأخدها في حضنه. مراد: هششش، اهدى. مفيش صدمات ولا حاجة، دي مفاجأة حلوة وهتعجبك وكمان هتفرحي أوي. متخفيش. روان مسحت دموعها: ماشي، بس انت قولتلي إنك لما ترجع هتحكيلي الحقيقة.

مراد بتنهيدة: حاضر، لما نرجع. ممكن؟ روان: تمام. مراد: بس بشرط. روان: قول. مراد: لو قدرت أثبتلك إنه أبوكي مجرم، هتساعديني نمسكه. روان بحزن ودموع: تمام. لو قدرت تثبتلي إنه كلامك صادق وإنه بابا فعلًا، وأكملت بدموع وصوت شهقاتها بتعلى: وقتل خطيبتك وقتل ماما، أوعدك أنا اللي هسلمه للشرطة بنفسي وهخليك تاخد حق خطيبتك، رغم إني مش مصدقاك. مراد

أخدها في حضنه وبدأ يهديها: أنا عارف إنه صعب عليكي اللي حصل وإنك تصدقي إنه أبوكي عمل كده، بس صدقيني دي الحقيقة. روان بدموع: تمام، وأنا وعدتك إنك لو قدرت تثبت كلامك وتجبلي دليل، أنا بنفسي هسلمه للشرطة. مراد: ماشي يا ستي، قومي يلا عشان نروح نجيبلك هدوم وأخدك عشان تشوفي المفاجأة. روان: تمام، يلا. مراد أخد روان ونزلوا وطلعوا من الفيلا، ركبوا العربية وراحوا مول كبير عشان يجيبوا هدوم لروان. *** بعد وقت في المول

مراد أخد روان ونزلوا ودخلوا المول واشتروا هدوم كتير لروان وكانت جميلة. روان: احم، يلا كفاية كده. مراد: لا، الأول ادخلي شوفي الفستان ده. كان فستان أحمر طويل بكم قصير. روان: تمام. روان دخلت ولبست الفستان وكان مظبوط عليها. روان غيرت الفستان وطلعت. مراد: إيه، عجبك؟ روان: آه، حلو أوي. مراد: تمام، يلا بينا. هاخدك الفيلا تشيلي هدومك وتجهزي تمام. مراد وروان طلعوا من المول وراحوا الفيلا. *** في مكان آخر

الحارس: أيوه يا باشا، هما طلعوا دلوقتي من المول. المجهول بشر: تمام، خلي عيونك عليهم، إنت فاهم. الحارس: أوامرك يا باشا. وقفل الفون. المجهول بحقد: قريب أوي يا ابن الجارحي هتكون نهايتك. *** في الكلية تميم وصل الكلية ونزل يدور على جورى بس ملقهاش. سأل عليها وأصحابها قالوا له إنهم شافوها رايحة الكافتيريا. تميم راح الكافتيريا واتصدم لما شاف جورى قاعدة مع حسام وبيضحكوا. تميم كور إيده بعصبية ورحلهم.

مسك حسام من لياقة قميصه: أنا مش قولتلك يابن الـ... متقربش منها تاني. جورى بعصبية: تميم، لو سمحت سيبه. مفيش داعي تعمل كده، هو معملش حاجة. تميم انعصب وبص لجورى وعينيه بتطق شرار. ساب حسام ومسك إيد جورى وطلع من الكافتيريا وهو شاددها وراه. حسام بضحكة خبيثة: ههههه، دي البداية بس يا ابن الأسيوطي. الخطوة الجاية هتصدمك أوي. *** خارج الكلية جورى بعصبية ووجع: تميم، سبني بقى! بتوجعني.

تميم بعصبية: اخرسي، حسابك معايا لما نوصل البيت. جورى فلتت إيده بقوة وعصبية: انت ملكش حكم عليا، إنت فاهم؟ ملكش دعوة بيا. وافهم بقى، أنا بكرهك! عارف يعني إيه بكرهك؟ ابعد عني بقى، انت مبتحسش. وإياك تدخل في حاجة تخصني بعد كده. تميم بص له بغضب ووجع واتكلم بحدة: جورى، اركبي العربية. جورى: لا. تميم بصوت جهوري: جووووري، اركبي العربية بدل ما أفقد أعصابي وأعمل حاجة متعجبكيش. اركبي. جورى خافت منه وركبت العربية.

تميم ركب العربية وساق بسرعة، وبعد مرور ربع ساعة وصلوا الفيلا. تميم بغضب: انزلي. جورى بحزن: طب وانت؟ تميم بعصبية وزعق: قولتلك انزلي. جورى نزلت وهو ساق بسرعة كبيرة. جورى دخلت الفيلا سلمت على الكل وراحت أوضتها وفضلت تعيط. وندمت إنها اتكلمت معاه بالطريقة دي، فدي أول مرة تعلي صوتها على تميم وتكلمه بالشكل ده. *** في فيلا مراد الجارحي روان لبست الفستان وحطت ميكب خفيف وفردت شعرها ونزلت.

مراد سرح في جمالها ولون عيونها السماوية. روان بإحراج: احم، مش يلا؟ مراد بابتسامة: يلا. مراد أخدها وراحوا فيلا السيوفي. *** في فيلا السيوفي البنات وصلوا وبدأوا يجهزوا. حور بس كانت حزينة لأنه محدش معاها من أهلها وحست إنها وحيدة. في الخارج مراد وصل وركن عربيته. روان باستغراب: إحنا إيه جابنا هنا؟ مراد بابتسامة: مش عاوزة تحضري فرح صديقتك المقربة؟ روان بعدم فهم: قصدك مين؟

مراد: حور، صحبتك وصديقتك المقربة هتتجوز صاحبي أسر السيوفي. وأسر طلب مني إني أجيبك ليها لأنها ملهاش حد من بعد موت جدتها فيروز. روان بفرحة: عااا، بجد؟ مراد بابتسامة: آه، ويلا بقى انزلي ادخلي لها عشان أنا كمان هروح لـ أسر ونتقابل بليل. روان بفرحة: تمام. روان نزلت ودخلت الفيلا. نبيلة: مين حضرتك يا هانم؟ روان: أنا صديقة حور ومرات مراد الجارحي، صديق أسر. ممكن أشوف حور؟ نبيلة: طبعًا يا بنتي، اتفضلي معايا.

أخدت روان وطلعوا أوضة حور. نبيلة خبطت ودخلت. نبيلة: يا بنتي، في واحدة بتقول إنها صاحبتك وجاية تشوفي. حور باستغراب: طيب، ممكن تدخليها. نبيلة: اتفضلي يا هانم. حور بصدمة: رووووان؟ عااا، مش معقولة. روان بحب دخلت وحضنت حور: حبيبتي، وحشتيني أوي. حور بحزن: وإنتي كمان، بس قوليلي عرفتي مكاني إزاي؟ روان: مراد جابني هنا. حور: مراد؟ إزاي؟ وإيه عرفه إني هنا؟ روان: مراد الجارحي صديق أسر المقرب، وأسر اللي طلب منه إنه يجيبني هنا.

حور: وإيه عرف أسر إنك تعرفي مراد؟ روان بحزن: أنا ومراد اتجوزنا يا حور. حور بصدمة: إييييه؟ إزاي؟ مش فاهمة، وإمتى؟ روان بهدوء: مش مهم دلوقتي، ده موضوع طويل. يلا بقى عشان تجهزي. حور: ماشي، بس وعد هتحكيلي. روان بضحك: وعد. يلا بقى. *** بعد مرور وقت، جاء موعد زواج أسر وحور. أسر كان في أوضته بيلبس بدلته. تميم ومراد فتحوا الباب ودخلوا. مراد وهو بيصفر: أوبا! يخرب بيت الجمدان، إيه يا عم أسر. أسر بضحك: إيه يا اسطى، هتغر كده؟

تميم حضنه: ألف مبروك يا حبيبي. أسر بحب: الله يبارك فيك يا بطل، عقبالك. مراد بحب: مبروك يا صاحبي. أسر بضحك: الله يبارك فيك يا ميرو. تميم انفجر ضحكًا. مراد بغيظ: بتضحك على إيه يا حيوان؟ تميم بضحك: ههههه، أصل اسم ميرو بيضحكني أوي، مش بيلبق بيك خالص. ههههه. أسر بضحك: تميم اتلم، ميرو يزعل، قصدي مراد يزعل، وإحنا مش قد زعله. هههه. مراد: إيه يا جدعان، هي الحفلة عليا ولا إيه؟ تميم بضحك: هههه، لا خالص يا باشا.

أسر: خلاص يا رجالة، المهم أهليكم فين؟ مراد: كله مستنيكم في القاعة، وكمان الصحافة هناك ورعد والحرس مأمنين الدنيا. أسر: تمام، يلا بينا ننزل. أسر ومراد وتميم نزلوا، وأسر طلب من نبيلة تنادي حور وروان من فوق. نبيلة طلعت أوضة حور وطلبت منها تنزل. وبعد مرور دقايق، روان كانت ماسكة حور ونازلة، وحور كانت لابسة فستان الفرح وتاج صغير على رأسها وكانت جميلة أوي. تميم: أوبا! تصدق يا أسر من حقك تتجوزها. مراد: عاش يا أسر، عرفت تختار.

أسر بعصبية: تصدقوا إنكم... وتلتفت ووقف مبرق. مراد بص لتميم وضحكوا لما شافوه واقف مبرق ومش بينطق. أسر ابتسم وانبهر بجمال حور. روان وحور نزلوا. مراد: أسر، يلا. أسر: احم، يلا. مراد أخد روان وتميم وطلعوا. أسر بهمس: احم، طالعة قمر أوي. أول مرة آخد بالي إن مراتي قمر أوي كده. حور ابتسمت ووشها احمر من الخجل. أسر ابتسم ومسك إيد حور وطلعوا من الفيلا وركبوا العربية ومشوا، ووراهم عربية مراد وتميم. *** بعد مرور وقت في القاعة

أسر دخل القاعة وهو ماسك إيد حور وسط فرحة الجميع وعلو الزغاريت والفرحة في القاعة. وبعد دقايق تم الزواج وأصبحت حور زوجة أسر السيوفي. فماذا يخبئ لهم القدر بعد ذلك؟ وفجأة... : كده يا أسر تتجوز من غيري؟ أسر بصدمة.