رواية عشقت قاتل ابي الفصل التاسع 9 - بقلم صباح غمري

الظابط: مطلوب القبض علي مدام مها. يوسف: ليه؟ إيه اللي حصل؟ الظابط: بصفتها زوجة هاني الشناوي، ومطلوب التحقيق معاها. هنا بصدمة: زوجة مين؟ بابا مش متجوز غير واحدة، أنت غلطان. دي حماتي. الظابط: أنا مش غلطان، تم التأكد من صحة الكلام. هنا قربت من مها: ماما، ولا أقولك مدام مها، الكلام ده صح؟ مها نزلت راسها للأرض: هنا، أنتِ مش فاهمة. هنا بصوت عالي: مش فاهمة إيه؟

أنا عايشة وسط شياطين. أنتوا مش بني آدمين، لا أنتِ ولا ابنك. أنا همشي من البيت ده فوراً. وطلعت تجري على فوق. يوسف بص للظابط: أنا هجيب لك أمي لحد عندك، بس ملوش لازمة تاخدوها بالطريقة دي. أمي ملهاش ذنب. الظابط: آسف، لازم ناخدها بنفسنا. دي أوامر. مها: خلاص يا يوسف. يوسف بحزن حقيقي قرب منها وحضنها: متخافيش، أنا هاجي دلوقتي وراكي وهفهم كل حاجة. أنا معاكي. مها بفرحة ودموع: ربنا يخليك ليا. أنا متأكدة أن ابني من جوه لسه كويس.

*** هنا كانت بتلم هدومها فوق وبتعيط. هنا: بابا يعمل كدا إزاي؟ هو اتجنن؟ أكيد كدب. بابا مستحيل يعمل كدا. يوسف: لأ، يعمل. باباكي كان بيحب أمي، وكان بيحبك أكتر منها، عشان كدا مقدرش يحكي. هنا: أنت اخرس. بابا عمره ما يخون ماما. يوسف: وهي تخونه عادي؟ هنا: أنا مسمحلكش تتكلم عنها. ماما عمرها ما خانته. يوسف: عمر ما الخيانة يا هنا بتقتصر على الراجل والست. الخيانة هي الغدر، الطمع أوقات، اللعب بالناس.

هنا: ماما ولا حاجة من دول. هو غلط في حقها أوي وفي حقّي أنا كمان. يوسف مد لها إيده: تعالي معايا المشوار، هحكيلك كل حاجة وهسيبك وهروح لأمي. وبعدها عاوزة تمشي، امشي يا هنا. *** ثرية بتوتر: الو، الو. أنت يا زفت. بقالي ساعة برن. محمد بتناكة: خير. ثرية: قبضوا على مها. عرفوا أنها مراته. محمد: عرفتي منين؟ وإيه المشكلة؟ ثرية: إيه المشكلة؟ أنا خايفة. حاسة إن فيه حاجة غريبة هتحصل قريب. يوسف خرج براءة، وهما بيدوروا على القاتل.

محمد: وإنتي خايفة ليه؟ وهو فيه دليل؟ ثرية افتكرت السكينة اللي اتقتل بيها، خبّتها في ضهر الجنينة: لا، مفيش. كل حاجة اتحرقت. محمد: طيب، متقلقيش. وبعدين مها مراته التانية. القت*لته عشان فلوسه بعد ما عرفت إنها حامل منه. إيه رأيك؟ ثرية بفرحة: دماغك سم. عجبتني. أنا مستنياك بالليل تجيلي. محمد: أحبك أنا كدا. *** "عند المقابر" هنا بخنقة: إيه اللي جابنا هنا؟ ناوي تخلص عليا؟ يوسف: هحكيلك كل حاجة قدامه. أنا عاوزك تواجهي الحقيقة.

هنا: مش هقدر. مش عاوزة. أنت ليك عين تيجي هنا؟ يوسف شدها من إيديها ووداها لمكانه. يوسف: أنا يا هنا، من أول ما كبرت وأنا كل يوم بتألم من صريخ أمي وأبويا ليل ونهار. لحد ما عرفت. عرفت إن الراجل ده كان يبقي حب والدتي زمان، وإنه السبب في كل حاجة. لأن ماما مقدرتش تحب أبويا زي ما حبها. أبويا مات بقهرته بسببه هو، بسبب إنه حاول كتير، وهي عمرها ما قدرت. ومسافة ما مات... "ف الماضي"

مها بتكلم في التليفون: أنا كمان لسه بحبك. بكرة هشوفك في بيتنا. طيب، خلاص، خلاص. متقلقش. لأ، يوسف هيكون في الشغل، وبعدين مش بيسألني. اطمن. كان واقف يسمع كل حاجة من ورا الباب. "ف الحاضر" يوسف بدموع: لما روحت شوفتها دخلت الشقة معاه. متخيلتش إن أمي توصل للمرحلة دي. لحد ما عافرت وعرفت هو مين. وقررت إني لازم أنتقم منه. قررت إني لازم آخد كل أملاكه، ولازم أذله زي ما خلي أبويا يعاني زمان. هنا: ووالدتك ملهاش ذنب، بريئة.

يوسف: ليها ذنب زيه زيها بالظبط. لحد ما إنتي دخلتي. مكنتش عاوز انتقم منك، صدقيني. بس كان فرصة ذهبية إني أتجوّز بنته بكل حب وأخدعه. وكان سببي الأول لما شفتك. إنتي شبهها يا هنا. مقدرتش تفارق عيني كل السنين دي. بعترف إن ممكن أكون مش بحبها، بس الكسرة اللي سبتهالي لسه معلمة فيا لحد دلوقتي. وشاور يوسف على قلبه: هنا، قلبي بيوجعني كل لحظة بشوفك فيها. بتوجعيني. بحس إنك دايماً هتسبيني وتمشي زيها.

هنا بدموع: حرام عليك. ضيعت سنتين من عمري. ظلمتني وقتلت أبويا. يا شيخ أقولك إيه بس. ومطلوب مني أصدقك. يوسف: هنا، أنا والله العظيم ما قتلته. هنا: برضه بتحلف؟ كان قدامي. قدامي. يوسف: أنا كنت قايل لمحمد إنه لما يتصل بيك هيكون تهديد. معرفش محمد راح ليه ولا نفذ ليه. وكمان محمد معاهوش غير سلاح. أبوكي مات بطعنات بالسكينة. صدقيني أنا حاسس إن فيه حاجة غلط. ساعديني. هنا بدموع: كداب. عاوز تضحك عليا تاني.

يوسف مسكها من إيديها جامد: بصيلي. بصي لعيني. فيه نظرة كدب واحدة شيفاها؟ بصيلي. هنا بصتله بدموع: أنا تعبانة يا يوسف، زي ما أنت حاسس إنك مكسور من جوه. أنا حاسة إن حد خد قلبي قطعة ورماه على الأرض قصادي. أنا لو عليا أقتلك، بس طول عمري ضعيفة ومبعرفش أعمل حاجة. يوسف ضمها بالعافية: أنا هحاول أصلح كل حاجة. بس لازم أعرف هاني اتقتل إزاي. لازم. هنا وهي بتحاول تبعد: عرفتها إزاي... "ف الماضي" ياسمين: هتخرس ولا أديك بالشبشب.

الجرسون: هو أنا اتكلمت. ياسمين: وهو أنت كدا متكلمتش لما تعاكس الزباين؟ ده أنا جاية أشرب قهوة وشيشة وقاعدة في حالي. الجرسون: أنا آسف. ياسمين: ولا آسف ولا بتاع. غور في داهية. أنا ماشية. وجاية تمشي اتخبطت في يوسف. ياسمين: مش تحاسب يا متخلف أنت. يوسف: أنا برضه اللي متخلف؟ واحترمي نفسك. لسانك الطويل ده تعمليه مع كله. أنا لأ. ياسمين: كنت مين يعني؟ يوسف: تحبي أعرفك أنا مين؟ ياسمين: معنديش وقت ليك. وسابته ومشيت. "ف الحاضر"

يوسف: عجبتني. عرفت اتصاحبنا. وقفت جمبها. عرفت إنها عايشة لوحدها من غير أهل. بس عرفت إنها مدمنة، وإن حياتها بايظة. حبيتها أكتر بكتير لما عرفت بالعكس، مكرهتهاش. قررت إني لازم أحاول بكل الطرق عشان تبقي البنت اللي عاوزها. هنا: وهي حبيتك؟ يوسف: للأسف لأ. كانت معتبراني أخ. بس أنا مكنتش أعرف، ولا عمرها صارحتني. لما حد ما... جه اليوم ده. هنا: يوم إيه؟ يوسف: ...