رواية عشقت مغتصبة (2 الفصل الخامس 5 - بقلم حنين هاني

يوم جديد يحمل الكثير من الشغف والمفاجآت وأحداث كثيرة. فالأكل جهز وقسموا أنفسهم وفي طريقهم للغردقة. ليل: يااه البيت هادي يا غيث من غيرهم. غيث: ياشيخة باحسن علشان أعرف أقولك إزاي إني بحبك. وحشتيني. ليل: وأنا كمان بحبك أوي. غيث: خشي بقا أعملي فطار حلو زيك وأنا هعملك أحلى كوباية قهوة ونفطر في البرندا. وبعد شوية. غيث: يااه قد إيه وحشتني القعدة دي معاكي. كنا لسه متعرفين على بعض واتجوزنا، ودلوقتي ولادنا على وش جواز.

ليل: كنتِ أجمل اختيار اخترته في حياتي كلها. هتفضل العوض طول عمرك عوضي الجميل. ليالي: مارو أنا جعانة، انزلي يلا هات لنا حاجة. مراد: ماشي. دراين: الجو حر أوي، شغلي التكييف ده. ليالي: نوو حضرتك، الهوا الطبيعي أحلى. دراين: دي عشان عربيتك صح؟ ليالي: سيبك من كل ده، بقالنا فترة مش بنتكلم. دراين: حقيقي، ومستنية تحكيلي. ليالي باستغراب: أحكيلك على إيه؟ ده أنا شايفة إنك متغيره. دراين: عنك أنت وسيف. ليالي: أنا وسيف مالنا؟

دراين: يعني مش أنتوا يعني بتحبوا بعض؟ ليالي: إنتي عبيطة؟ يعني لو بحبوا مش هعرفك مثلاً؟ أو هنخبي ليه؟ دراين: أصل هو دايماً قريب منك، وأنتم بتتكلموا وتضحكوا. ويوم الموضوع قعدتي جنبه ونغزتيه في رجله. ليالي: الله الله، ده إنتي مركزة بقا. دراين: هركز مع إيه يا ليلي؟ هي كل حاجة باينة يعني. ليالي: سيف طول عمره أخويا وبست فريند مش أكتر. دراين: طيب أومال ليه دايماً بيتجنب الكلام معايا؟

ليالي: لأنك مثلاً مش مدية فرصة لحد يتكلم معاكي. بصي خلينا مقتنعين إنك تنكة ومغرورة، يعني مش بالساهل في أي قعدة تتكلمي وتهزري. على طول بتحبي يترد عليكي حاجة، متدخليش فيها الكبار، يا تقعدي تتفرجي ومتكلميش، فهي دي الفكرة. دراين: أنا كده طيب، أنا بقا هثبت له إني مش كده. ليالي: وأنا قولتلك سيف بس اللي شايفك كده. دراين: لا يعني قصدي كلكوا. هو مراد اتأخر ليه؟ ليالي: زمانه جاي.

وابتسمت في نفسها كده، كل توقعاتها صح. دراين متجنبة سيف بسبب إنها فاكرة إن فيه بينا حاجة. اممم أنا أصلاً مش مرتاحة لهم كده تمام. يوسف: يا شوية أوباش اتلموا، صدعتوني. يارا: أخواتك مش راضيين يسكتوك. كرم: ملكيش دعوة بينا، أنا وهي بنهرج. سيف: طيب ينفع نهدا شوية؟ أنا غلطان إني خدتكم معايا، كان المفروض تجوا مع يوسف في العربية. يوسف: إيه يا عم، إنت عايز تلبسني أي حاجة وخلاص. سيف: ادينا لبسنا أنا وإنت سكتهم بقا.

يوسف: ما خلاص، هو أنتوا عيال صغيرة؟ أي عندي فكرة، ناموا، نوم الظالم عبادة. كرم: غريبة، طيب إنت لسه صاحي ليه؟ كارما: ودييي يا كرملة. يوسف: جتلك على التبطابة، يختي. كارما: طبعاً ده قلبي. نوح: كان إيه لازمتها يعني يا حور نروح؟ حور: تغير، كنت عايز تسبني لوحدي. نوح: ياحبيبتي إنتِ عارفة إن ماليش في السفر والكلام ده. حور: ليه يا نوح؟ ليه دايماً قافل على نفسك؟ نوح: عشان ده طبعي. حور: متأكد إن ده السبب؟

ما أنت من فترة قولتلي هنسافر مصيف ونقضي أسبوع، ماهو إيه اللي غير رأيك بقا؟ نوح: عادي عادي، نامي بقا. وعقبال ما نوصل، وهو تفكيره في اللي حور قالته. هو فعلاً كان عايز يسافر، يمكن مش راضي عشان ندى لما قالها زعلت وإزاي هتعد أسبوع مقفول عليها، فهو خايف عليها وخايف تهرب. هو أصلاً مش عارف هو مقعدها لغاية دلوقتي ليه، ومش عارف هو هيعمل إيه معاها. أحمد: تشربوا إيه؟ خديجة: قهوة. سيلا: آيس كوفي.

أحمد: آيس كوفي. عيشي عيشة أهلك ياما. وإنتي يا جوري، وغمزلها. جوري: أي عصير فريش. أحمد: عنيا. ودخل الكافيه. سيلا: هنزل أجيب تسالي وراجعة. خديجة: جوري، هو إيه الحكاية بينك وبين أحمد؟ جوري: عادي يعني، مفيش حاجة. خديجة: وإيه عادي إنه يغمزلك طيب؟ عادي يا جوري، ما إحنا ماشيين، باصص عليكي في المراية. طيب عادي أسلوبه معاكي؟ أول مرة أعرف إنك بتكذبي يا جوري. جوري بدموع: مش قصدي بس.

خديجة: مبصش، يكون في علمك الكلام ده هيوصل لبابا وماما، وده مش عشان حاجة، ده عشان خوفاً عليكي. جوري بدموع: لا عشان خاطري، أنا هحكيلك بس مش هتقولي حاجة صح؟ خديجة: أنا واحمد بنحب بعض من سنة، وهو قالي أول ما أجمع فلوس هنتخطب على طول. والله هو مش بيضحك عليا. حتى قالي من يومين، جمعت الفلوس وهيكلم بابا على طول. خديجة: وإنتي شايفة اللي إنتي بتعمليه ده صح إنك تخبي؟ وبعدين من امتى وإنتي بتخبي عليا حاجة؟

بصي يا جوري، عشان منفعلش من بعض، طول ما إحنا في السفرية مش عايزة اختلاط بينك وبينه، وحتة مترديش، اتحججي بأي حاجة لغاية ما نرجع ونشوف حل. جوري بدموع: حاضر، أنا أسفة. خديجة: ملوش لازمة الأسف، امسحي دموعك عشان جايين. سيلا: جبت حاجات كتيرة وخربت بيت أحمد. أحمد: اللهي يتطمر. سيلا: بصي يا جوري، إيه ده؟ مالك معيطة ليه؟ جوري: لا مفيش، ده تراب دخل عيني من الهوا.

بصلها أحمد وهي بصت قدامها وعملت نفسها نايمة، وهو استغرب وبص على خديجة لقاها عادي مفيش أي حاجة. وبعد فترة وصلوا كلهم أخيراً. ليالي: واوووو تحفة. فلتـبدأ المغامرة. مراد: اهد يا وحش الكون، مش من أوله. ليالي: ابعدوا عندي، أنا مكبوتة، مفيش وقت خالص. ضحكوا كلهم على ليالي وهي وقفت بشموخ. ليالي: أنا عايزة أقولكم إني أنا وسيف أكبر اتنين في الرحلة دي، فالكلمة لازم تتنفذ. لا هي لا، فاهمين؟

نوح: سامعين الدبانة اللي بتتكلم، وأنا اللي بيتهيألي. يوسف: لا سامعين فعلاً. عارف المشمش هنا بقا. يلا يا شباب سيبكم منها، دي هتطلع علينا عمايل عمي غيث. ضحكوا كلهم، وهي خدت حاجاتها وطلعت. ماشي يا شوية عيال، أنا هوريكم. رحيم: أعمل إيه؟ معنديش حل غير ده. نور ناقصها حاجات كتيرة ومش عارف أجيب منين. إمام: تقوم تقولي تبيع الورشة؟ طيب وبعد ما تبيعها هتعمل إيه وهتشتغل فين؟

رحيم: هجوزها وأشوفلي أي ورشة أشتغل فيها، أعمل إيه يعني؟ بعد ما بعتها وفتحتها مفيش شغل خالص. إمام: طيب إيه رأيك تعمل إعلان؟ رحيم: إعلان إيه بس اللي أعمله؟ هيكلف كتير أوي. إمام: ولا كتير ولا حاجة، أعرف واحد صاحبي شغال في شركة كبيرة بتاعت تجارة وكده، وفاتحين بردو فرع سوشيال ميديا وبيعملوا إعلانات لشركات والكلام ده. بص أنا هقولك، وسمعت كمان بيقسطوا لو لسه في أول الطريق. رحيم: مش فاهم.

إمام: يعني هتمضي مثلاً معاهم عقد على مدار سنة. السنة دي بقا هيعملوا إعلانات طول السنة، والي عليك طول السنة نسبة كل شهر من الأرباح اللي هتدخلك، ودي طبعاً لأنها شركة كبيرة، فا الشغل هيمشي وساعتها كمان مش هتعرف تلاحق عليه. رحيم: فكرة حلوة، اسمها إيه الشركة دي؟ إمام: اسمها LSR للتجارة والبيزنس. رحيم بتفكير: ماشي، أنا هعمل اللي قولته وهروح.