رواية عشقتها بلا اختيار الفصل الثاني 2 - بقلم نجلاء عبد الظاهر

ادهم ابتسم لها: أنا أدهم السيوفي وهبقى جوزك بعد موافقتك. فيروز بابتسامة طفولية: موافقة. سامح بحب: اتفضلوا في البلكونة اتعرفوا على بعض. ادهم هز رأسه واتحرك للبلكونة هو وفيروز. ادهم بهدوء: بصي يا فيروز أنا عايز أقولك حاجة. فيروز باستغراب: في إيه؟ ادهم بتفهم: أنا متجوز يا فيروز. فيروز بصدمة: إيه؟ بس لأ مش هينفع أتجوزك عشان كده مراتك هتزعل وممكن تأذيني. ادهم ضحك على برائتها: لأ يا فيروز هتزعل إيه دي؟

هي اللي قالت لي اتجوز أصلاً. فيروز فتحت عينها على الآخر ومصدومة وادهم ضحك على شكلها. فيروز اتكسفت ووشها احمر: في إيه؟ ادهم بضحك: أصل شكلك مسخرة وإنتي مصدومة كده. المهم اسمعي ياستي.. أنا متجوز من خمس سنين وللأسف مراتي مش عايزة تخلف ومبتحبنيش وأنا مبحبهاش. فجيت أتجوزك إنتي يا قمر. فيروز بتساؤل: طب وليه مراتك مش عايزة تخلف واتجوزتها لي وإنت مش بتحبها؟

ادهم بهدوء: كنت بحبها بس هي مكنتش تستاهل ده، وهي مبتحبنيش أنا، هي بتحب فلوسي. فيروز طبطبت على كتفه بحنية وادهم ابتسم لها وحس إنه مبسوط جداً. ادهم: هنتجوز الأسبوع الجاي. فيروز بموافقة: تمام ماشي. ادهم دخل للعيلة وقال: فرحنا أول الأسبوع الجاي على فيروز. الكل بارك لهم بفرحة وصبري كان فرحان جداً لأنه عارف إن فيروز تقدر تغير أدهم وتخليه يثق في البنات تاني. ادهم روح هو وأبوه.

ريم كانت قاعدة بتتعشى: أهلاً يا أدهم، إزيك يا عمي؟ صبري بلامبالاة: كويس.. أنا داخل أنام يا أدهم. تصبح على خير. ادهم: وإنت من أهله يا بابا. ريم قربت من أدهم وباست خده: كنت فين يا أدهم؟ ادهم بقرف: كنت بتقدم للعروسة الجديدة. ريم بخبث: والله؟ بس اعمل حسابك بقى متصرفش عليها زيي، لأنك متعرفش هي جاية منين.

ادهم بسخرية: هي أساساً مش هاممها الفلوس، وحتى متكلمتش على شبكة ولا أي حاجة، مش زيك أول ما جيت أتقدم لك أبوكي وإنتي طلبتوا مني مليون جنيه مهر. وغير الشبكة. ريم بتكبر: وهو إنت كنت جاي تاخد أي واحدة كده وخلاص؟ إنت جيت تتقدم لـ ريم العامري. ادهم ضحك بسخرية: آه طبعاً، اللي اتغنت بفلوسي صح؟ واللي أبوها شغله كله معايا وعلى حسابي.

ريم بغرور: طيب يا أدهم، المهم أنا دلوقتي ريم العامري ومرات عمدة الصعيد بعد أبوه. يلا تصبح على خير، هنام. ادهم بص عليها بقرف وخذلان ودخل ينام، بس كان بيفتكر فيروز قد إيه هي بريئة وطفلة في نفسها وحاسس بإعجاب ليها. ونام وهو مبتسم. تاني يوم صحي أدهم لبس ونزل تحت، كان والده وريم قاعدين. بص أدهم على ريم بضيق. ادهم بابتسامة لأبوه: صباح الخير. صبري بحب: صباح النور، اقعد افطر. ادهم ابتسم وقعد ياكل.

ريم بمطالبة: أدهم متنساش تسبلي فلوس عشان هدومي كلها قدمت وعايزة أجيب. ادهم بص لأبوه بضيق وقال: تمام، وياريت كفاية مصاريف على هبل ده، ياريت تصرفيهم في حاجة مفيدة. ريم بتأفف: والله أنا مراتك وده حقي عليك إني آخد يا أدهم. ادهم بخنقة: لو هنتكلم في الحقوق فـ أنا ليا حقوق كتير ومخدتهاش.. أنا ماشي، سلام يا بابا. صبري: سلام. وقام من على السفرة. ريم بتكبر: يارب تكون عرفت تنقي لابنك عروسة بنت ناس مش بنت شوارع.

صبري بحدة: إنتي لما تتكلمي معايا أنا تتكلمي بأدب واحترام، فاهمة؟ وبعدين ملكيش دعوة، ده ابني وأنا اللي ليا حق عليه وأنا اللي أنقله اللي في مزاجي. ريحي نفسك، إنتي مش بتاخدي اللي عايزاه، ويلا روحي هاتي لك اللبس اللي حضرتك هتموتي عليه. ريم نفخت من تعاملهم وراحت تجيب تشكيلة كبيرة فعلاً من الفساتين. ادهم راح الشغل وكان في شغله ودخل الأرض يراقب على العاملين ويشوف ويراجع الحسابات. عند فيروز في أوضتها.

فاطمة بحنان: فيروز يا حبيبتي إنتي كبرتي دلوقتي وهتبقي متجوزة، وطبعاً لازم تبقي قد المسؤولية، يعني ربنا رزقك بمولود تبقي قد مسؤوليته هو وأبوه. فيروز بتفهم: أه يا ماما، أكيد. فاطمة بحب: يعنى يا فيروز، علاقتك مع أدهم على حب في الجواز، بلاش تحسسيه إنه فيزا وقت ما تعوزي فلوس تاخدي. وأنا عارفاكي إنك مش كده، دي مراته الأولانية هي اللي كده. فيروز بصدمة: إنتي تعرفي يا ماما إنه متجوز؟

فاطمة بضحك: طبعاً يا بت، بس أبوكي ميعرفش. لو عرف مش هيوافق بشدة. فيروز بتفهم: ليه يا ماما مش هيوافق؟ فاطمة: لأنك إنتي بنت بنوت وهو متجوز، فـ مش هيوافق لأنه هيبقى عايزك تاخدي شاب لسه متجوز زيك. فيروز برفض: لأ يا ماما، أنا استريحت لأدهم ومش مشكلة متجوز أو لأ. منا ممكن أتجوز واحد مش متجوز ولا مرة بس مش مرتاحة معاه، مش هبقى مبسوطة. فاطمة: بالظبط يا حبيبتي، وإنتي يا فيروز ما شاء الله ذكية وبتفهمي.

وفجأة الباب خبط وسامح كان في الشغل، راحت فاطمة تفتح الباب بس اتصدمت بأدهم. فاطمة بصدمة: أدهم بيه. ادهم بابتسامة: سلام عليكم. فاطمة بترحيب: وعليكم السلام، اتفضل. ادهم دخل وقال: أومال فين عم سامح؟ فاطمة: في الشغل يا بني.. هنديلك فيروز. ادهم هز رأسه وقعد. شوية وفيروز طلعت. ادهم بابتسامة: عاملة إيه؟ فيروز: كويسة.. أنا بصراحة يا أدهم مش عاجبني إني أخطفك من مراتك.

ادهم مسك إيدها بهدوء: بصي يا فيروز، أنا مراتي مبتحبنيش وزي ما قولتلك بتحب فلوسي، يعني لو اديتلها شوية فلوس هتهدى. فيروز بتساؤل: وإنت ليه صابر عليها كده؟ ادهم بتنهيدة: لأنها مراتي يا فيروز، من خمس سنين متجوزين، بعمل حساب العشرة والعيش والملح وأي حاجة كانت بينا. فيروز: إمم.. وطبعاً متجوزني عشان تخلف مني. ادهم بارتباك: منكرش إني متجوزك عشان كده، بس أكيد لما تعامليني كويس وتبقي زوجة بجد، هحبك.

فيروز: وأنا مش طالبة منك تحبني عادي. ادهم: أومال إنتي موافقة تتجوزيني لي؟ فيروز بتعب: عشان أقلل الحمل على ماما فاطمة وبابا سامح. وهتجوزك، وطبعاً إنت هتبقى عايز ولاد وأنا هعملك ده يا أدهم. ادهم بص لها بحيرة: يعني إنتي مش عايزة تحبيني؟! فيروز سكتت شوية وبعدها ردت: الحب مش بإيدينا يا أدهم، وأكيد الأيام اللي لينا مع بعض هتثبت إذا كنت عايزة أحبك ولا لأ.

ادهم بص لها بعمق وقام: طيب تمام، أنا بقى جهزت كل حاجة عشان خلاص فاضل يومين ع الفرح. فيروز بهدوء: تمام ماشي. وعدت الأيام وجه يوم الفرح. كان القصر مليان بالأغاني والدبايح. صبري كان قاعد في الصالون وريم قاعدة قدامه. ريم بزهق: وبعدين بقى؟ أنا صدعت من الأغاني دي، أوف. صبري بخبث: ليه كده مالك؟ أي غيرانة؟ ريم بتكبر: أغير إيه؟ كده كده أدهم ليا يا صبري بيه. ادهم كان نازل من أوضة النوم وقعد جنب أبوه.

صبري بمكر: أنا قررت إن أدهم يكتب نص الأرض باسم فيروز. ريم بزعيق: نعم؟! إنت بتقول إيه؟ لأ طبعاً. ياريت تركز إنت بتقول إيه، بلاش الكبر يأثر عليك كده. ادهم نزل بكف إيده على وشها. ادهم بغضب أعمى: إنتي لما تتكلمي مع أبويا تتكلمي باحترام، ولا إنتي ناسيه إنك قاعدة في خيره؟ صبري قام بخضة: خلاص يا ابني بلاش مشاكل في يوم فرحك. ريم بصدمة: إنت بتضربني يا أدهم؟ وبصت لأبوه وقالت: طبعاً تلاقيَك فرحان إنه ضربني وأخد بحقك.

ادهم اتعصب جامد لدرجة إن عروقه بانت ومسك دراعها بعنف واتكلم بغضب جحيمي: آخر تحذير ليكي يا ريم، إنتي عارفة إني ممكن أرميكي في الشارع، ولا إنتي ناسيه كنتي مين يا ريم؟ وأبويا اللي بتتكلمي معاه كده ده، إنتي قاعدة في بيته وفي ملكه. ريم بضيق: لأ ده بيتك إنت، وإنت اللي تعبت مش هو.

ادهم مسك شعرها: أنا مش عايز أشوف وشك النهاردة، واوعي تتكلمي مع أبويا أو تتخطي حدودك معاه، يا أطلقك وأرجعك مطرح ما جبتك منه، لأني قرفت واتخنقت منك. وسابها وطلع أوضته يلبس. صبري بص لها بتعب وراح يشوف العاملين. ريم دخلت لأدهم: إنت نازل؟ ادهم وهو بيلبس: يهمك في إيه؟ ريم: يهمني، أنا مراتك.

ادهم بقرف: وأنا خلاص مبقتش بعتبرك مراتي يا ريم، بقيت بعتبرك بت بعطف عليها. كل الفلوس اللي بتاخديها دي بمزاجي، والكريدت كارت اللي معاكي أقدر أسحبه، بس سايبهالك. ريم بخبث: طب إيه رأيك تقدمي معايا الليلة النهاردة؟ ادهم بقرف: لأ، وأصلاً فرحي النهاردة وهقضي حياتي مع مراتي الجديدة. ريم بعصبية: بس أنا ليا حق عليك. ادهم: وأنا عشان مكونش ظالم، هتاخدي يوم واحد بس أبقى معاكي فيه، لأني أصلاً بقرف منك ومش طايقك. ريم بفرحة: ماشي.

عند فيروز كانت بتجهز حاجتها للفرح، وكل حاجة. لقت جرس الباب بيرن. ادهم: عاملة إيه؟ فيروز بابتسامة: تمام. ادهم: البسي عشان هاخدك إنتي ومامتك ع القصر عشان الفرح بليل. فيروز بهدوء: ماشي. وفيروز جهزت حاجتها وأخدتها ومشيت من البيت، وفاطمة كلمت سامح إنها هتروح ووافق. فيروز وصلت بيت أدهم ونزلت بإعجاب للبيت. ادهم بابتسامة: عجبك البيت؟ فيروز: أه جميل جداً. ودخلوا. ريم أول ما شافتها اتصدمت.

ريم بقرف: هو إنتي بقا العروسة الندامة؟ فيروز بصتلها بصدمة.