رواية عشقي انت الفصل السابع 7 - بقلم سولييه نصار

طلاق... قولتها وأنا حاسس الدنيا بتلف بيا. مكنتش مصدق، كنت ببصلها بصدمة وبقول: طلاق إيه يا رشا؟ بصتلي ببرود وقالت: أنا عايزة أتطلق منك يا آسر. إيه اللي مش مفهوم في كلامي؟ ليه؟ قولتها وأنا حاسس قلبي بينكسر. بصتلي بسخرية وهي بتمرر عينيها على وشي وقالت: هو أنت مش شايف السبب يعني؟ أنا مش هكمل حياتي مع واحد مشوه. دموعي نزلت وأنا ببصلها. فقالت: أنا نهيت آخر رابط ما بينا. أنا أجهضت البيبي وعايزة أتحرر منك.

كلماتها قتلتني، حسيت بألم أصعب من ألم الحروق. بصراحة مجادلتش كتير وطلقتها. كنت مصدوم من قدرتها أنها تتخلى عني في المرحلة دي. وبدل ما كنت بقاوم، استسلمت لجروحي. استسلمت وبطلت أقوم. رفضت أرجع شغلي واتقفلت عيادتي وفضلت حابس نفسي في البيت. لحد ما مهرا ظهرت في حياتي بشكل واضح. هي اللي حاولت تخرجني من اللي أنا فيه. خليت أصحابي كل يوم يجوا ويقعدوا معايا. كانت بتعمل المستحيل عشان تطلعني من اللي أنا فيه.

واحدة واحدة بدأت أستجيب معاها وأرجع لحياتي وشغلي. كان هدفي كله أني أوري رشا إني عايش حياتي عادي وإني اتخطيتها. ومُهرا كانت مناسبة جداً عشان أوري رشا إني خلاص نسيتها. خطبت مُهرا. كنت قاصد إني أوصل الخبر لرشا اللي اتضايقت واتصلت تبارك وهي مخبية غيظها مني. وقتها استغليت مُهرا بطريقة أسوأ. كنت بسكت ضميري في كل مرة حاول فيها يعارضني. لحد ما حصل اللي مكنتش أتوقعه. حبيت مُهرا. كنت مرعوب وأنا بتعلق بيها يوم بعد يوم.

كانت خطتي بتبوظ. أنا عايز رشا ترجعلي مش أحب مُهرا. ووقتها روحت لرشا. عايز إيه مني؟ مش خلاص خطبت، سيبني في حالي بقى. قالتها رشا لما روحتلها بيتها. فضلت أبصلها وأنا بدور على المشاعر القوية اللي كانت في قلبي ليها. مكنتش لاقي. كانت مُهرا مسيطرة على عقلي وقلبي. كان لازم أتخلص من تأثيرها. فضلت أقنع نفسي إني مبحبش إلا رشا. أنا عايز أرجعلك. قولتها وأنا بنهت. رفعت حواجبها وقالت: الله، أنت مش خاطب؟

أنا مش بحبها، أنا عايزك أنتِ. أنا خطبتها عشان أغيظك بس. ارجعلي يا رشا أبوس إيديكي. طلعت من أفكاري على رنة تليفوني. مسكت التليفون لقيتها رشا. فصلت في وشها وعملتلها بلوك وأنا بحط إيديا على وشي. هي اللي ضيعت مني حب حياتي. وأنا السبب. قلبي كان واجعني أوي وأنا بفكر في طريقة أرجعها بيها. أنا مش هقدر أعيش من غيرها. مش هقدر. تاني يوم روحت للدكتور بتاعي وقلبي بيدق جامد من الخطوة اللي هعملها. وقفت قدامه وقولت:

أنا عايز أعمل عملية التجميل.