رواية احببت حبك لي الفصل الثالث عشر 13 - بقلم ريهام رفاعي

اليوم خلص واليوم اللي بعده جه. لبسوا وراحوا الجامعة ف سلام ومن غير أي خناق، وكل واحد راح يشوف حاله. ريم لأصحابها: صباح الخير، عاملين إيه يا شباب؟ نور: روحي، إنتي اللي عاملة إيه؟ ريم: تمام أوي أوي الحمد لله. نور: أنا حاسة بانبساط وضحكة غريبة، عارفاها كويس. أنا الضحكة دي. ريم: يا ستي مفيش حاجة، بضحك عادي زي أي يوم. نور: يا راااجل! والنعمة لأعرف فيه إيه. ريم: خلاص بقى، هبقى أحكيلك. واحدة من صحابها: إيه ده إيه ده؟

فيه حاجات بتستخبي عننا بقا؟ ريم: يا بنتي مفيش حاجة، بجد أنا بهديها بس. ملك: إشطا يا عم، هصدقك وأكذب عنيا حاضر. ريم: سيبكوا مني، تيجوا نبقى نخرج نقعد ف أي كافيه بعد المحاضرة أو حتى الكافتيريا بتاعت الجامعة. نور: ياريت جدا، بقالنا فترة أصلا مشربناش كوباية شاي حتى. وافقوا أصحابها كمان، والمحاضرة خلصت ورايحين يشربوا القهوة ف الكافتيريا. وهما رايحين، ريم شافت خالد واقف مع دكتورة ياسمين وبيضحكوا.

ريم: ثواني يا شباب، معلش اسبقوني انتوا. نور: رايحة فين يا ست؟ هتعملي إيه؟ ريم: مش هعمل حاجة، هروح أسلم على دكتورة ياسمين بس. نور: ااااه، طب يا شباب اسبقونا انتوا واحنا جايين. أصحابها: إشطا، متتاخرووووش. ريم: مروحتيش معاهم ليه؟ نور: معرفش، بس عشان عارفك هبلة وممكن تعملي مشكلة لو اتسابتي لوحدك. ريم: ليه يابنتي؟ هو أنا عيلة صغيرة؟ نور: لا لا، استغفر الله. متقوليش كده.

ريم: هتخانق معاكي بعدين، بس لما أشوف الحوار اللي هناك ده. راحوا عند خالد وياسمين. ريم قامت ماسكة ف إيد خالد. ريم: حبيبي، عامل إيه دلوقتي أحسن؟ خالد بتوتر شوية: آه يا حبيبي، أنا زي الفل متقلقيش. مش هتسلمي على دكتورة ياسمين؟ ريم: إيه ده؟ آسفة جدا يا دكتورة، مأخدتش بالي. إزي حضرتك؟ وأولاد حضرتك عاملين إيه؟ ياسمين بغيظ: أنا تمام الحمد لله، بس أنا معنديش أولاد لأني متجوزتش أصلا. ريم: إيه ده بجد؟

أنا آسفة جدا، أنا كنت فاكرة حضرتك كبيرة ومتجوزة يعني. ياسمين وهي متضايقة جدا: أنا 29 سنة، و متجوزتش لحد دلوقتي عشان لسه ملقتش الشخص المناسب. نور وهي بتحاول تلحق الموقف: طب يلا ياريم نمشي عشان العيال مستنيانا. ريم: عادي، ممكن تتأخر شوية، مش حوار. خالد: إيه ده؟ إنتوا هتروحوا فين؟ ريم: هنقعد ف كافتيريا الجامعة شوية. خالد: طب يلا روحي الحقي اقعدي معاهم شوية، عقبال ما أعمل حاجة وهعدي آخدك ونمشي.

ريم: تمام يا حبيبي، متتأخرش. مشيوا، وريم عمالة تبص عليه. نور: يا بنتي اخلصي، أمشي بقى. ريم: ما أنا ماشية أهه. راحوا وقعدوا مع أصحابهم، وكل واحد طلب اللي هو عايزه. نور: إيه بقى اللي إنتي عملتيه ده؟ ملك: إيه ده؟ هو فيه إيه اللي حصل بسرعة؟ نور لريم: احكي؟ ريم: احكي اللي إنتي عايزاه، أنا معملتش حاجة، إنتي اللي أوفر. نور حكتلهم كل اللي حصل. ملك: إيه ده إيه ده؟ عملتي كده ليه ياريم؟ أكيد زعلت.

ريم: أنا معملتش حاجة، أنا مكنتش أعرف فعلا إنها مش متجوزة. نور: ياسلااام يا بنتي، ما إحنا عارفين من زمان، هي قالت قبل كده إنها متجوزتش. ريم: عادي، يبقى نسيت. ملك: اطلعي من الشويتين دول يا ريم. ريم: وهي كان حد قالها تقف مع جوزي وتقعد تهزر معاه؟ ملك: اوعااا! ده إنتي الغيرة هتموتك. ريم: غيرة إيه؟ مفيش حاجة زي كده. خالد جه، وريم كانت قاعدة وضهرها ناحية الباب، فاتسحب براحة وشاور لهم عشان يكملوا. نور: يعني إنتي مبتحبهوش؟

ريم قعدت تفكر شوية. ريم: لا مبحبوش، أنا بس اتضايقت إزاي تقف مع جوزي كده يعني. ملك: بصراحة، حقك تغيري عليه، هو عسول، أنا قولتلِك قبل كده. ريم: وأنا قولتلِك قبل كده اتلمي، صح؟ ملك: الله! مش قولتي مش بتحبيه خلاص؟ بقى متعصبة ليه؟ ريم: يا ستي أنا بحبه، تمام؟ هديتي كده، أو بدأت أحبه يعني. خالد راح مرة واحدة وب*سها من خدها. خالد: وأنا كمان بحبك أوي والله العظيم.