رواية احببت طبيبي الفصل الثاني 2 - بقلم آية هلال

سعاد: لا بقا شكلك هتسهريني وأنا عايزة أنام. عندك الكارت اهو بتاعه. أنا هنام. كارمة: ماشي ياستي. -أي ده كريييم. يا خبر يعني كريم يطلع الدكتور اللي سعاد بتروحله. طب أقولها إزاي. أما صدفة غريبة. يا ترى سعاد هتوافق على كريم ولا هيبقى فيه حساسية بينهم. سعاد: إيه يا كارمة، مبلمة ليه كده قدام الكارت؟ كارمة: لا أبداً، كنت سرحانة في حاجة. الأ صحيح هتبدأي في مشروع التخرج امتى؟

سعاد: ده انتي تاخدي جايزة نوبل في تغيير المواضيع. اتفضلي خشي جوا نامي، وراكي جامعة. كارمة: حاضر. سعاد: استني. كريمة سألت عليكي وعايزاكي في حاجة، ومقلتليش هيا إيه. انتوا مخبيين حاجة عليا؟ كارمة بتوتر: إيه لا أبداً. أنا هاروح لها أقعد معاها شوية، ممكن؟ سعاد: متتأخريش يا ست الحسن والجمال. خرجت كارمة. سعاد: وبعدين بقا يا كارمة، أنا مش حمل تعب نفسي تاني. يارب متكونيش مخبية مصيبة.

دخلت نمت وأنا بتخيل المشهد المرة الجاية وأنا عند الدكتور هقول إيه وهحكي الموضوع إزاي. كارمة وهي داخلة عند كريمة مبلمة. كارمة: مش هتصدقي يا كريمة إيه اللي حصل. كريمة: في إيه؟ اتحفيني. كارمة: كريم طلع الدكتور النفسي بتاع سعاد أختي. كريمة وهي بتقف: أهو ده الموضوع اللي كنت عايزاكي فيه. اكتشفت ده إنهاردة. كارمة: وعرفتي إزاي؟ كريمة: خطيبي إبراهيم بيشتغل هناك، وكنت بزوره في الشغل وشفت اسم أختك في الكشف.

كارمة: أنا مش عارفة أفتح سعاد إزاي في الموضوع ده. وهل هو يعرف إننا أخوات أصلاً؟ ولا بيلعب بيا؟ كريمة: مش عارفة، بس روحي دلوقتي ونشوف ده بعدين. كارمة: ماشي. تاني يوم ويوم جديد. الساعة 7 صباحاً. سعاد: رايحة فين يا ست كارمة؟ كارمة: ها، رايحة الجامعة. سعاد: بدري كده؟ مش المحاضرة الساعة 9؟ كارمة: يا سوسو، هفطر مع كريمة وهنروح، هتكون الساعة بقت تسعة. وإنتي عاملة إيه مع الدكتور بتاعك؟

سعاد: هكون عاملة إيه يعني، هو مجرد دكتور لا غير. ثم شايفة إيه شاغلة بالك بيه ليه؟ كارمة: طيب يا أختي، أنا هتأخر. سلام يا سوسو. سعاد: خلي بالك من نفسك. كارمة: حاضر حاضر. كلمت الدكتور كريم أعتذر له إنهاردة. حقيقي مش عارفة أرتب كلامي وإزاي هقول أنا بشكي من إيه. سعاد: الو. دكتور كريم. كريم: أهلاً وسهلاً يا سعاد. في حاجة خير؟ سعاد: الحقيقة أنا باتكلم عشان ألغي معاد النهاردة. كريم: إيه السبب؟ سعاد: .......

كريم: سعاد، انتي معايا؟ سعاد: أيوه، عشان بعمل حاجة لأختي مهمة ومشغولة وكده. كريم: يعني مش بتتهربي مثلاً من إنك تحكي؟ سعاد: لا، وهتهرب ليه؟ كريم: اممم عشان مثلاً قولتيلي المرة اللي فاتت إنك مش اجتماعية، ولما بتقابلي ناس جديدة بتتلخبطي في الكلام. فبالتالي انتي خايفة تيجي ومتعرفيش تتكلمي كلمتين على بعض. سعاد: الحقيقة أنا ذات نفسي معرفش. وعشان كده جيت لحضرتك. أنا حاسة إني تايهة ومعرفش حتى أنا بعاني من إيه.

كريم: وعشان نعرف لازم تيجي ونتكلم، حتى أعرف بتعاني من إيه. معادنا إنهاردة زي ما هو متغيرش. مع السلامة. قفل. الو الو. يعني إيه هتضطر أروح. طب هقول إيه. أظاهر مفيش غير إني أروح وأحكي، ممكن أبقى كويسة. دخلت أوضتي ولبست وروحت للعيادة. سعاد: أهلاً يا إبراهيم، ازيك؟ ادخل للدكتور، هو موجود. إبراهيم: الحمدلله يا أستاذة سعاد. أيوا الدكتور منتظرك جوا. سعاد: تمام، متشكرة.

كريم: أخيراً جيتي. اتأخرتي ليه على معادك ساعة كاملة. انتي متعودة تتأخري على المواعيد بشكل عام. سعاد قعدت. سعاد: لا أبداً، كنت باصة في الأرض. كريم: سعاد، انتي متخوّفة. في حاجة جواكي بتقولك متتكلميش. بس لازم هتتكلمي عشان ترجعي لنفسك ونفسيتك تتحسن.

أول حاجة لازم نعرف سبب المرض النفسي اللي إحنا منعرفوش، بس لما تحكيلي عن حكايتك بالتفصيل الممل عن أي حاجة حصلتلك، زعلتك، فرحتك، صدمتك. عشان أعرف أحلل وأحدد نوع المشكلة. فاهمني؟ سعاد: أيوه فاهمة. أنا بس مش عارفة أبدأ منين وإزاي. كريم: -طيب أنا هساعدك. إيه أكتر شئ بتحبيه وإيه أكتر شئ بتكرهيه؟ سعاد: الشئ ده شخص ولا إحساس ولا زمن ولا مشاعر؟ كريم: طيب هناخدها واحدة واحدة. ابدأي بالشخص.

سعاد: عارف لما تبقي ملهوفة على حاجة ومنتظرة شيء في خيالك وتلاقي حاجة تانية خالص. اللي اسمه الخذلان ده. آه أنا أخدت الخذلان ده من أكتر شخص المفروض أحس معاه بالأمان. هو بيأذيك وهو متهني وانت متكتف مش عارف تعمل حاجة. أنا حاسة إني تهت من الخذلان ده، حاسة بعدم الشغف ناحية أي حاجة. كريم كان مركز معاها أوي ومنتبه لكلامها. كريم: مين الشخص اللي أذاكي كده؟ هل قريبك أو صديقك؟ سعاد: أسفة مش هقدر أقولك. كريم: ليه؟

إحنا اتفقنا محدش هيعرف حاجة ومفيش كلمة هتطلع برا الأوضة دي. سعاد: طيب ممكن نرجع لأول حاجة قولتها المرة اللي فاتت. لأن الحقيقة دي مشكلة تانية. بص أنا مشاكلي كتير ونفسيتي تعبت. كريم: والله ما تخافي، أنا هفضل سامعك كده حتى لو قلتي 100 مشكلة. أي هي بقا؟ سعاد: اللي هو أنا مبعرفش أتعامل مع الناس وكده. كريم: قبل ما نحكي، أول طريق العلاج إنك تشتغلي. سعاد: إيه! أشتغل؟ مستحيل. كريم: ليه بقا مستحيل؟

مفيش حاجة مستحيلة. وعشان أعرف أعالجك مش بس فضفضة وخلاص، لازم ده وكمان تبقي في أرض الواقع. هتنزلي تشتغلي وتتعاملي مع الناس وتجيلي تتكلمي عملتي إيه في أول يوم شغل. وهقولك كمان إزاي متخافيش منهم. سعاد: طيب هو انت عرفت اسمه إيه اللي عندي؟ كريم: والله المصطلحات كتير لمشكلتك، بس أنا أقدر أسميها عدم ثقة بالنفس، أو الخوف من الآخرين والتعامل معاهم. سعاد: وهتعالج وأبقى كويسة؟ كريم بابتسامة: إن شاء الله. سعاد: ممكن أمشي؟

كريم: آه، كده مش هينفع. لو استمريتي كده مش هينفع. بتقعدي نص ساعة وتمشي. بعد كده المعاد هيبقى من ساعتين لتلاتة. سعاد: اوكي، متشكرة. أنا آسفة. كريم: انتي أول حد أتعامل معاه بالسلاسة دي، يعني كل اللي بيجيولي بيبقوا معقدين وبيطلع عيني لما أخليهم ينطقوا. سعاد: انت قولتلي إنك كنت مريض نفسي صح؟ كريم: انتي ليه فاكرة؟

هبقى أقولك لما تيجي المرة الجاية. آه وتغيري اللبس الأسود ده، النفسية بتفرق كتير جداً. البسي ألوان وكمان بيتك يبقى فيه ألوان. سعاد: شكراً جداً. أنا ارتحت شوية. متشكرة. مع السلامة. كريم: مع السلامة. خرجت. كريم: حلو اسم سعاد. رقيق. خرجت وأنا مستريحة شوية. سعاد: مع السلامة يا إبراهيم. إيه ده كريمة بتعملي إيه هنا؟ كريمة: ها، انتي متعرفيش ولا إيه؟ هي كارمة مقلتلكيش. أنا مخطوبة لإبراهيم وعاملالها على الضيق يعني.

سعاد: بجد صدفة غريبة. ألف مبروك يا إبراهيم انت وكريمة. إبراهيم وكريمة: الله يبارك فيكي يا سعاد. على العموم كارمة روحت البيت ولا لسه؟ كريمة: مش عارفة. أنا سبتها. كانت طالبة أوبر، معرفش بقا راحت فين. إبراهيم: حضرتك كنتي ماشية ولا في إيه؟ مالك واقفة متنحة؟ سعاد: ها، معلش. عن إذنكم ثانية واحدة. راحت سعاد على جنب واتصلت على أختها. سعاد: انتي فين يا كارمة؟ روحتي البيت؟ كارمة سكتت شوية: آه في الطريق. انتي فين؟

سعاد: أنا كمان مروحة. أروح البيت ألاقيكي هناك، انتي سامعة؟ كارمة: حاضر. مع السلامة. خرج كريم من الأوضة. كريم: إيه ده انتي لسه هنا؟ سعاد: أيوا أنا كنت لسة هنزل دلوقتي. كريم: اوكي، أوصلك في طريقي. كريم بيكلم إبراهيم: مع السلامة يا إبراهيم. قفل بقا العيادة. جالي مشوار ملوش لازمة رايح أقابل واحدة اسمها كارمة، رزيلة بشكل.