رواية احببت طفولته الفصل السابع 7 - بقلم منار العتال

يوسف ابتسم وخرج. تانى يوم يوسف أخد مريم في عربيته ووصلها للعماره بتاعته. مريم بصت على العماره من شباك العربيه واتصدمت بشكل العماره. كانت العماره في غاية الجمال وكبيره زي الأهرامات. مريم كانت فاتحه بوقها من جمالها. يوسف ضحك على شكلها. يوسف: هتفضلي قاعده كده؟ مريم: هي دي عمارتك!! يوسف: أيوه وتعالى يلا أوريكى شقتك اللي هتعيشي فيها.

مريم كانت محرجه تقوله إنها مش هتقدر تدوس على رجلها، بس قررت إنها تنزل وتحاول تمشي ومتقولوش. مريم نزلت من العربيه وأول ما داست على رجلها صرخت من الألم وكانت هتقع، بس يوسف لحقها وفضل باصص لعيونها شويه وسرح في لون عيونها البني. بس أتراجع وفاق وقال بصوت متوتر إلى حد ما: مش تقولي إنك مش قادرة تدوسي عليها؟ بتكابري ليه؟ مريم باحراج ووشها احمر: ما هو لو كنت قلت لك هتعمل إيه؟ هتشيلني يعني! يوسف: طالما مضطرين يبقى خلاص.

مريم مفهمتش هو هيعمل إيه واتصدمت فجأة لما لقيته شالها فعلاً ودخل بيها العماره وقابل مامته اللي اتصدمت أول ما شافته شايل مريم. أم يوسف "ناهد": إيه ده يا يوسف؟! مين دي؟ مريم قالت ليوسف ينزلها. كانت حاسة إن قلبها هيقف من الاحراج. ويوسف قالها تسكت. يوسف رد على مامته إنه هيفهمها بعدين كل حاجة. ناهد استغربت من رد يوسف. يوسف كمل طريقه وركب الأسانسير. مريم بتوتر: طب نزلني هنا. يوسف: لو نزلتك هتقعي. بطلي تقاوحي بقى.

مريم بصوت متقطع: ما هو ما مينفعش كده بصراحة. يوسف: مينفعش إيه؟ مريم: مينفعش تشيلني. أنت من محارمى يعني لا أخويا ولا أبويا ولا عمي ولا جوزي. يوسف ابتسم على طريقة تفكيرها. يوسف: يا ستي أنا عارف كده كويس، بس ده شيء ضروري. كنت مضطر أشيلك وإلا كنتي هتطلعي إزاي. وأوعدك دي آخر مرة. مريم كانت مدايقة ومردتش وسكتت. الأسانسير وقف ووصل لباب الشقه وفتح الباب ودخل وقعد مريم على كنبه مريحه.

مريم كانت مذهولة من شكل الشقه ووسعها ولون حيطانها. كانت زي الفيلا، ميتقالش عليها شقه أبداً. يوسف: طب بصي بقى هبعت لك واحدة هتخدمك وتساعدك لحد ما تتعافي. مش عاوزك تتعبي نفسك. مريم بصتله بتكشيرة: ممكن أسألك سؤال؟ يوسف: اتفضل. مريم: أنت بتعمل معايا كده ليه؟ يوسف باستغراب من سؤالها ده: بتسألي السؤال ده ليه؟ مريم: أصل بصراحة مفيش حد بيعمل مع بنت ميěعرفهاش اللي أنت بتعمله ده.

يوسف اتنهد: أولاً أنا فاهم دماغك وعارف إنتي بتفكري في إيه. بس أنا بعمل معاكي كده علشان أولاً أنا السبب في اللي إنتي فيه وأنا اللي خبطك وضميري مكنش هيرتاح لو معملتش كده. وكمان إنتي قلتي لي إنك ملكيش حد ومن الصدفة إنك مهندسة زيي يعني من الطبيعي إنك تشتغلي معايا في الشركه. مريم سكتت. يوسف: نسيتني كنت هقول لك إيه. وطلع موبايل وعطوهالها. يوسف: خدي ده. مريم: إيه ده؟

يوسف: موبايل علشان لو احتاجتي حاجة تكلميني وهتلاقي رقمي متسجل عليه. مريم باحراج: بس كده كتير يا بشمهندس. يوسف: ولا كتير ولا حاجة. وسلام بقى علشان أمي تحت وشكلها كده هتعمل مني كفته لو منزلتش وفهمتها الموضوع. مريم ضحكت غصب عنها ويوسف سرح في ضحكتها بس نزل بسرعة وقال الباب وراه. ... كان خالد قاعد مش مبسوط وليلي بدأت تبعد عنه. خالد: انتي بتبعدي عني ليه؟ ليلي ببرود: مشغولة شوية.

خالد: مشغولة في إيه وليه معاملتك اتغيرت ليا كده لما طلقت مريم؟ ليلي: خالد أنت من وقت ما طلقتها وانت بصراحة بقيت خنيق. انت مش شايف منظرك عامل إزاي؟ انت مش خالد اللي كنت أعرفه زمان. انت دايماً مكتئب ومش بتكلم حد حتى مامتك. وجاي تقولي دلوقتي بتبعدي ليه؟ خالد بصدمة: أنا خنيق؟ ليلي: أيوه وبصراحة كده أنا عايزة ناخد استراحة من بعض. خالد: يعني إيه؟ ليلي: يعني نبعد فترة عن بعض لحد ما ترجع لحالتك الطبيعية.

خالد: انتي بتبعدي عني في وقت أنا محتاجك فيه؟ انتي كده بتثبتي إنك عاوزاني دايماً بضحك ومبسوط وفي أحسن حالاتي. أما لو كنت مش كويس تبعدي. انتي كده مش بتحبيني يا ليلي! ده مش حب. الحب إنك تقابليني في أسوأ حالاتي. ليلي ببرود: خالد أنا مش عايزة أسمع محاضرة عن الحب بيكون إزاي. ويا ريت نبعد بقى. خالد بصلها باستحقار: تمام. بس أنا لو مشيت دلوقتي مش راجع تاني. سلام.

خالد حس إن فعلاً ممكن يكون ظلم مريم. مستحيل إن ليلي تكون معاه وقت ما كان تعبان. وكان لازم يصدقها. بس هو مش فاكر أي حاجة ومش فاكر حتى عرف مريم إزاي. خالد مشي وراح للدكتور اللي كان عامل عنده العملية. الدكتور: أهلاً أهلاً خالد باشا. اتفضل. خالد سلم عليه وقعد. خالد: أنا كنت جاي أسألك سؤال يا دكتور. الدكتور: اتفضل أنا تحت أمرك. خالد: هو أنا مستحيل افتكر الفترة اللي كنت تعبان فيها؟ ده بجد يعني مفيش أمل؟!

الدكتور اتوتر وذيبه ما يكون مخبي حاجة عليه. وخالد لاحظ ده. خالد: في إيه يا دكتور؟ الدكتور: بصراحة يا خالد باشا هو فيه علاج بيخليك تسترجع الفترة اللي عيشتها وتفتكرها عادي جداً بس... خالد: بس إيه؟ وطالما فيه علاج ليه مقلتش عليه من الأول؟ الدكتور: بصراحة والدتك هي اللي قالت لي إنها مش عايزة إياك تفتكر الفترة دي. خالد بصدمة: ماما؟!!! هي اللي عملت كده. انت بتقول إيه؟ وليه تعمل حاجة زي كده فيا!!