رواية احببت طفولته الفصل السابع عشر 17 - بقلم منار العتال

خالد اتعصب ومسك كل حاجة في شقته رماها على الأرض. ...... يوسف صحى من نومه بابتسامة أظهرت غمازاته وقام من سريره، خد شاور وسره شعره ولبس كاجوال لأول مرة مش بدلة زي العادة وابتسم لنفسه برضا في المرايا ورش البرفيوم بتاعه اللي كانت ريحته خيالية. ناهد بابتسامة: -الله الله أنا شايفة تغيير غير الأيام اللي فاتوا، ده تسلم اللي كان السبب. يوسف: -ومين السبب في رايك؟ ناهد: -هتعمل عبيط يولا مين غيرها مريمتك. يوسف ضحك:

-حلوة مريمتك دي، وأنا طالع دلوقتي بقى لمريمتي أخطفها كده في مشوار، وكمل بجدية: وياريت يا ماما تعزمي كل قرايبنا وتعرفيهم ميعاد الفرح. ناهد: -طب وإنتوا حددتوا ميعاد؟ يوسف: -لا لسه، هسأل مريم الأول وهعرفك، بس الأهم كلمي قرايبنا عرفيهم إن اتكتب كتابي، أنا عاوز الدنيا كلها تعرف إن مريم بقت ملكي. ناهد هزت راسها بتمام وابتسمت لفرحة ابنها والسعادة اللي مالية وشه. يوسف بضحك:

-عن إذنك بقى أطلع لمريمتي، تصدقي حلوة مريمتي دي بجد، مريمة يوسف. ناهد ضحكت: -امشي يواد أنت من هنا اتجننت. يوسف اتنهد بحب وباس إيد ناهد وطلع لمريم اللي كانت نايمة وفضل يخبط لحد ما فتحت الباب وكانت بتدعك في عينيها بنعاس، ويوسف ضحك على شكلها. مريم بتتاوب: -في إيه يا يوسف، في حد يصحي بدري كده؟ يوسف: -بدري إيه يا كسلانة، الساعة ٢ الضهر. مريم عينيها وسعت بصدمة: -أنت قولت كام؟! إزاي تسيبوني نايمة للوقت ده؟ يوسف بضحك:

-الحمد لله دلوقتي فوقتي، الساعة مش ٢ الساعة ٨ الصبح وإنتي صدقتي. مريم ضيقت عينيها بغيظ: -طب اقفل في وشك الباب وأطردك دلوقتي ولا أعمل إيه، وبعدها بصتله بتركيز اعجبت بلبسه الكاجوال وتغيير تسريحة شعره وفضلت بصاله كتير. يوسف بخبث: -أنا عارف إني حلو النهاردة بس مش للدرجة اللي تخليكي فاتحة بوقك كده. مريم فاقت من سرحانها فيه ويوسف فضل يضحك وقال وهو بينهج من الضحك: -تعرفي يا مريم؟

أنا عمري ما بضحك ولا ضحكت كده من قلبي غير معاكي، هو إنتي عملتي فيا إيه! مريم وشها أحمر بخجل: -امشي اطلع برا. يوسف: -بتطردي جوزك؟! ده اسمه كلام؟ مريم بإحراج: -عاوزة أغير هدومي ممكن!! يوسف بغمزة: -مش عاوزاني أساعدك؟ مريم عينيها وسعت بصدمة وخجل: -امشي اطلع برا يا يوسف. يوسف: -والله بهزر معاكي، إنتي قموصة ليه؟ و... حاضر ياستي هخرج اهو وإنتي جهزي يلا علشان هاخدك في كام مشوار يا مريمة يوسف. مريم باستغراب:

-إيه مريمة يوسف دي؟ يوسف بابتسامة جذابة: -ماما الصبح بتقولي مريمتك، فإني جاتلي الفكرة من هنا. مريم وشها أحمر: -حلو الاسم. يوسف خرج ومريم لبست وركبت معاه العربية، وفي الطريق... يوسف: -تحبي نحدد ميعاد الفرح إمتى؟ مريم: -أنا مش عاوزة نستعجل يعني نخليه كمان شهرين كده. يوسف بصدمة: -شهرين ليه، حرام عليكي يا شيخة. مريم بضحك:

-يا يوسف أنا محتاجة أعرفك أكتر وكتب كتابنا جه بسرعة فلازم يعني منستعجلش، أنا أه حبيتك بس نعمل فرح كده على طول؟ يوسف فهمها: -ماشي اللي تحبيه يا حبيبتي. مريم ابتسمت بحب وكملت بجدية: -هو إحنا رايحين فين، مش قولتلي رايحين نشتري شوية حاجات، ليه رايح طريق الشركة؟ يوسف: -في كام حاجة كده لازم أعملها يعني وعملاء من شركات محتاجين يقابلوني، فهنروح ساعة بس مش هنتأخر هناك. مريم: -ماشي. وصلوا الشركة...

وكل الموظفين بيبصوا لهم باستغراب. يوسف وقف وأمر إن كل الموظفين تتجمع، وكانت ريم من وسطهم اللي كانت مستغربة. يوسف قال بفرحة: -أحب أعرفكم إني أخيرا لقيت حب عمري ونصي التاني اللي هكمل معاها حياتي كلها إن شاء الله، وهي مريم، كتب كتابها كان إمبارح، أنا عارف إنه جه بسرعة بس ده لظروف، وإن شاء الله في الفرح كلكم معزومين.

الموظفين فرحوا ليوسف وباركوله هو ومريم، ومريم كانت مستغربة تصرف يوسف ده بس ابتسمت بحب إنه حب يعرف الكل إنها ملكه. ريم نزل عليها الخبر زي الصعقة وقربت من يوسف وقالت بصوت مخنوق: -مبروك يا بشمهندس. يوسف: -الله يبارك فيكي. ريم بصت لمريم: -ألف مبروك. مريم: -الله يبارك فيكي. ريم مشت من وسطهم دخلت الحمام في الشركة وقفلت على نفسها وانهارت (حين كانت القلوب ترقص من الفرح كانت هناك قلوب تتألم أيضا من الوجع)

فجأة دخل خالد عليهم الشركة ولابس زي العسكري ومعاه ظباط تانيين. مريم بصدمة بصت ليوسف اللي كان مستغرب زيها وجوده. يوسف قرب منه: -خير يا خالد في إيه؟! خالد بتكبر: -اسمي حضرت الظابط خالد الزيني، وكمل بجدية: أنت مطلوب القبض عليك. يوسف بص لمريم بصدمة والأتنين قالوا في نفس الوقت: -إيييييييه!!