رواية احبه و لكن الفصل السابع 7 - بقلم مروان فرج

بعد ما وصلنا لقيت مرت عمي تراجي فينا ومعبية دوه. طبعاً هوا قالي متقوليش وين كنا، قولي كنا ندهورو وخلاص. قولته تمام. خشيت، ركب هوا فوق ل داره، قالي بندوش. واني وقفت على مرت عمي، قلتلي وينك من بكري نتصل بيك ماترديش. قوتلها والله طلعت من الجامعة ونسيته صامت لي توا. قالتلي وين كنتو؟ قلتلها ندهورو. قالتلي أيوا. أحني أخيراً. قلتلها وأخيراً. قالتلي شني حسيتي؟ خالد استريحلك؟ قوتلها في خاطري استريحلي بس.

هوا قوتلها أي وبدي كويس معاي و قالي هلبا كلام ريحني. قالتلي باهي شن هوا؟ قوتلها كلام وخلاص. قالتلي تعرفي متقوليش نزعل راه. نبي نعرف كلام زي شني ترا. حب؟ قوتلها أيوا حب. قالتلي باهي وقلتي عادي؟ قلتلها نتحشم. قالتلي باهي اركبي فوق استريحي أكيدة تاعبة. قوتلها تمام. ركبت فوق، لقيت مروى في الدروج. قالتلي مش راخياتك راه، قوليلي كل شي. قوتلها غير ندوش، تاعبة في حوايجي من الصبح وبعدين ساهل.

خشيت نحيت حوايجي وريحتهم كلها خالد. كان لقيت معاش نحيتهم نشم بس مهانش عليا نغسلهم. حطيتهم على سريري وخشيت دوشت، ولبست توتة لونها رصاصي في الأبيض حلوة. كانت تلاوته هادي تهبل، وسرحت شعري وتعطرت. حسيت أنا بيجيني لي داري. طلعت مشيت لي مروي، هدرزنا شوية. معطيتهاش تفاصيل من فوق بس فوق وخلاص. المهم فهمت أنا خالد بدي يحبني وفرحت الحق. وحضنتني وقالتلي انتي أحلا وخيه.

فجاء تليفوني شرين، لقيته بوي. قعد يهدرز عليا شوية وقالي استحشتك. واني قلق نبي نروح. أمك متقعدش معانا بكل، ديمة مشغولة من الجامعة للمصحات. وقتها كله لي خدمتها. المهم بوي تاعب وقالق واني زعلت عليه الحق. قولت لي مروي بنمشي لي داري نقرا شوية، غدوه عندي امتحان. وان شاء الله نقدر نحفظ حتا كلمتين نحطهم في الورقة. قالتلي تمام.

طلعت لقيته كيف طالع من داره. واني كان واضح عليا متأثرة من كلام بوي، وجعني الحق لانا هوا الشخص الوحيد الي فكر فيا. قالي خيرك؟ قلتله شي. قالي مش شي. خيرك من زعل حبيبة قلبي؟ قلتله بوي كلمني وهكي. قالي وهكي؟ قالي قالي اهاا. باهي بري خشي دارك ننزل يبيني بوي شوية وبعدين نتصل بيك. قوتله تمام.

خشيت داري، فتحت كتباتي على أساس بنقرا. واني من جيهة نفكر في كلام بوي، ومن جيهة تانية نفكر في شن صار معاي أنا وخالد اليوم. كان أول مرة يبوسني ويقرب مني هكي. قعدت حايسة في روحي لين طقطق الباب. قلت خشي. نحسبه مروى. فتح الباب خالد. يضحك. قالي حبيبتي الصغيرونة تقرا؟ قوتلها أي عندي امتحان غدوه ومش عارفة نركز بكل.

قالي عادي. من زيه بوك قاعد بإيطاليا. ياريتنا أحني غير يقولك هكي مايبيش يحسسك. وتقولي مستريحين. واني بروحي أهني مش مدوريني. تو معقولة عايش غادي معاها مرته ومش مستريحين؟ وقعد يقولي في كلام يبي يريحني. وفعلاً استريحت. قالي تعشيتي؟ قوتلها معنديش نية. قالي عينك نوضي ناكلو أنا وأيك شن رأيك؟ قوتلها والله ما خاطري. قالي باهي أنا جعان. وكان انتي ماتبيش تاكلي حتا أنا مش واكل. سايريني بس. قوتلها باهي.

نزلت معاه. لقيت عمي ومرت عمي ومروي مقعمزين يهدرزو لوطه. قالهم خالد تعشيتو؟ قالوله تغدينا امخر قريب والله ما خطرنا. كل واحد يقول معنديش نية. قالي خلاص تعالي ناكلو أنا وأياك. مشينا الكوجينة، وتينا العشي حاجات خفيفة. كلينا. ياكل ويشبحلي. قالي اتصدقي تفتحي النفس انتي. قوتلها وانتة لما نقعد نشبحلك قداش مانستريح وننسى وجعي. المهم كملنا. ضميت الماعين وركبت لي داري. قالي تبي تقري؟ قلتلها أي حتا شوية.

قالي تمام. رغم اني مش هاين عليا نخليك. لكن على خاطر قرايتك الله غالب. قوتلها تمام. قالي أوعديني لو كملتي قرايتك ومجاكش نوم تكلميني. قوتلها وعد. قالي تمام. خدي مني بوسة من خدي ومشي.

خشيت أنا درت روحي بنقرا. والله ما قريت فيها حاجة. صورته قدام وجهي، ضحكته، كلامه الحلو كله مسيطر عليا. قعدت لي الساعة واحد تقريباً، وفي إيدي تليفوني نبي نتصل بيه. وفي نفس الوقت مانبيش نبيه يرقد يستريح. واني نفس الشي النوم في عيوني غير أنك برا. قعدت شوية خداني النوم. ممكن نص ساعة. فقت لقيته فوق مقعمز على حاشية السرير. قلتله شن في؟ قالي مافي شي ارقدي. قلتله ساعة قداش توا؟ قالي منعرفش كيف جيتك أنا. امتى رقدتي انتي؟

شبحت الساعة لقيتها الاتنين. قلتله كيف رقدت مالياش هلبا. قالي باهي نرقد جنبك. قلتله خالد اطلع تربح معاش يصير منا النوم وبعدين يشوفنا حد. قالي من بيشوفنا. كلهم رقدو. درت دورة أنا الدنيا مهفّة. والصبح أول ما نوض نطلع طول. يا خالد أس إس. زيدي غادي. خالد قتلك أس. أعطيني شوية من البطانية. وأخديتها كلها هك. باهي يا همي وخلاص. قالي تعالي ارقدي هني انتي على حضني. مكانك. حطيت راسي ومشيت في عالم تاني. قالي نحكيلك قصة.

قوتله قصة شني؟ قالي مرة في بنت صغيرونة اسمها حياة. حلوة زي القمر، بريئة، خوافة. لكن أطيب وحدة في الدنيا كله. حبت واحد. وهوا مكانش يحبها لانا غبي ومعمي على عيونه ومش عارف قدرها. وبعد ما فاق من الكابوس الي هوا فيه. وله يحبها ويموت فيها ومش متخيل حياته من دونها. أني خلاص معاش ندري على روحي. لقيت روحي راقدة ومعاش حسيت بشي. لين المنبه يرن الساعة تمانية.

حليت عيوني. لقيته راقد جنبي زي الملاك. في عز نومه واضح عليه مستريح. خديت منا بوسة من خده. ولي أول مرة نتجرأ ونبوسه بروحي. فتح عيونه. قالي عاودي شن درتي ترا؟ قلتله صباح الورد. قالي يا صباح العسل والشهد يا أحلى صباح في الدنيا هادي كله. لكن مش نايض لين تتعاودي شن درتي؟ قلتله ياسرك من غير طمع. نوض قبل ما يشوفك حد. قالي مانبيش بوسة قبل. ياحليلي وخلاص. باهي هي. قربت عليه. كيف نبي نبوسه. تفتح مروي الباب.

حي عليا. آسفة آسفة. سكرت الباب طول. قلتلك اني نوض هي. باهي هكي شن موقفي توا أني. حي عليا. قالي باهي شن بندير. هي هبلتيني في جرتك. وبعدين هيا كيف تفتح الباب من غير ما تخبط؟ تو نوريها. قلتله شن نوريها. عادي بيني وبينها هيا. نوض اطلع. قالي باهي والبوسة. خالد بتهبلني انت. نوض ومافيش بوسة. باهي. باهي اني نايض. تعالي خدي هاك. شن بناخد؟ جبدني باسني. وقالي لما نقول مانبيش نطلع لين ناخدها معناها مانبيش نطلع لين ناخدها. تمام.

وطلع. ياحليلي منا وخلاص. يهبل. يعطيه دعوة. ودارلي غمزة. متفهم شي. طلع. خشيت للحمام ولبست حوايجي وطلعت. لقيتهم يفطرو لوطه. ومروي تضحك هيا ومرت عمي. شني زعما؟ قلتلها حي على مروي نقتلها بعدين. صباح الورد. صباح الورد والياسمين. حيوة. ومروي تشبحلي وتضحك. نزلت خالد. شبح لي مروي عادي ولا كانا داير حاجة. الثقة الي عنده حسدته عليها. شخصية. خليني ساكتة وخلاص. قال هيا واتية؟ قولته أي. قالي فطرتي؟

قلتلها معنديش نية توا. بعدين تو نفطر في الكافتيريا. قالي تمام. طلعت أنا ومروي. مروي قعدت من تالي وقالتلي اقعدي انتي من قدام. ومن غير جو. قلتلها تمام. قعدت من قدام وقعدنا ساكتين طول الطريق لين وصلنا للجامعة. نزلت. قالي رد بالك على روحك. ولما قريب تطلعي كلميني. قلتلها تمام. ومروي. أيوا أحني من امتى ان شاء الله تباتو مع بعض؟ صح وجهك. امس أول مرة. ومن دري عليه لين لقيته جنبي. قالتلي أي واضح صدقتك.

باهي على راحتك. متصدقيش. وكل وحدة مشت لي محاضراتها. وروحنا. وخالد حطنا وقال تو نجي. قلتله وين؟ قالي شوية ونجي نقولك. قلتله باهي. خشينا لي الحوش. قلتلهم اني بنرقد ناقصة نوم. قالتلي مرت عمي تمام. لما يطيب الغدي نوضك. قلتلها لالا تغدو تو نتغذى حتا بعدين. قالتلي تمام. ركبت غيرت حوايجي ورقدت. معاش ندري على روحي للمغرب. نوضت تقول واكلة طريحة متهتكة وصايرة فيا حالة. خدت التليفون اتصلت بـ خالد. رد عليا.

شوية ونكلمك وصكر. استغربت. نزلت لي مرت عمي. قالتلي مزال مروحش؟ نحطلك تتغدى؟ قلتلها لالا. ركبت وقعدت نفكر. زعما خيره شن في؟ غريبة من الضهر لي توا مروحش. شن صاير معاه؟ زعما. طلعت لي جنان شوية وخشيت. بعد ساعة اتصل بيا. أيوا حبيبة قلبي انتي. قلتلها وينك؟ قالي اني قريب نوصل تو نحكيلك. قلتلها تمام. قعدت نراجي فيه لين وصل. سمعت صوت سيارته في الجنان. طلعت. قلتلها شن في؟ قالي مافي شي. خيرك خايفة؟

قلتلها معقولة نرقد ونوض وانتة مزال مروحتش؟ قالي اتصلت بيا اكرام. حبيبته الأولى طبعاً. وقالتلي ضروري نتلاقى نبي نتفاهم معاك. قلتلها امشيتلها؟ قالي أي. قلبي طلع من مكانه. حي عليا. كان دارتله حاجة؟ قلتلها شن تبي؟ قالي تعرف علاش اني تغيرت عليها فجاء وتبي نرجعو زي قبل؟ قلتلها وانت شن؟ قوتلها قالي قوتلها أي تمام نرجعو. والله راس أمك ترجعو على كيفك انتة. هوا امتى ما تبي ترجع ترجع. وامتى ما نبي تجيني تجيني.

قالي أي. الله غالب القلب ومايرداها. باهي تمام. كيف بنمشي؟ قالي تعالي أهني يا مهبولة. أقسم بالله تهبلي لما تغاري. عسسل. ووو كم منها يا ناس تهبل مرتي الصغيرة. قلتلها تتسهوك انت. تي. قالي شن نرجعو هادي. هزبتها وقوتلها كل حد يمشي في طريقه. معاش نبيك. قلتلها الله الوقت هادا كله على الكلمتين هادو. قالي تبي حتا التفصيل انتي؟ قلتلها أي كل شي. قالي مش مهم. المهم ادوي. بعدين في الليل. لا مش في الليل توا. آتي خيرلك راه.

شن قوتلك اني معاش تناقشيني. وخش للحوش. ركب لي داره. و ركبت أنا لي داري. وأعصابي محروقة. ونبي نعرف شن صار معاه. وبعدين طبحت عليا مرت عمي. حياة تعالي تعشي. حتا الغدي متغدتيش. كيف هكي؟ سمعها هوا. طلع لقاني كيف طالعة من داري. قالي قصدك من الصبح مش آكلة؟ شني؟ انزلي كولي. نزلت كليت وركبت لي داري. ومع الساعة 12 اتصل بيا. قالي تعالي نبيك. طبعاً حياة ضروري تبي تمشي. تبي تعرف شن صار معاهم.

مشييت. خبطت. فتحلي. قالي مرة تانية معاش تخبطي في الجديد. خشي طول. قلتله تمام. شن فيه هيا احكي. قالي وراس أمك حياة فوتي الموضوع. مانبيش نكرر الي قولتهولها. خليني معاك انتي. استحشتك. تعالي في حضني. سكتت وطاوعته. حضنته ورقدت على صدره.

قالي اسمعي. اني معاش نقدر نصبر. نبي ندير العرس ونبدأ مع بعض كل يوم. وتبدي معاي رسمي من غير خوف من حد. لا يشوفني لا يشوفك. اني نحبك حياة. اني نستاحش فيك كل يوم أكتر من الي قبله. ونبي نعيش معاك زي أي اتنين متزوجين. كل شي مع بعض. قلتلها باهي. اني مزال نقرا. قالي وكانا اقري واني معاك لين تكملي قرايتك. شن رأيك؟ قلتلها باهي. كيف نحمل ونجيب ومع القراية صعب والله.

قالي اني نعانيهم. شن دخلك انتي. انتي كملي قرايتك. ومعاش دخلك في شي. غير كوني معاي بس. قلتلها باهي امتى؟ قالي الشهر هادا. قصدك نبي ندير عرس من غير أمي؟ قالي تو غدوه نكلموها ونشوفو لو تقدر تاخد إجازة. قلتلها تمام. خلاص توا ارقدي. والصبح ساهل. قعدت في حضنه لي الصبح. أحلى نومة. تقول في الجنة. وريحته مسيطرة عليا.

أفقت الصبح وهوا مزال راقد. طلعت من الدار. خليته راقد. مشيت وتيت روحي ورجعتله. نوضته على السريع وطلعت. قلت تو نقعد معاش يصير من المشي. وقت عليا. نزلت لي مرت عمي. لقيتها هيا وعمي يهدرزو. قالتلي صباح الورد حيوته. قلتلها صباح الورد والياسمين. نزل خالد. فطر على السريع وطلعنا. مروي ممشتش. معندهاش محاضرات. وفي الطريق كلها وهوا ساكت يفكر. واضح عليه. واني خايفة ليكون اكرام دارتله حاجة.

وبعد ما حطتني في الجامعة. لقيت الدكتور غايب عنده ظرف. شدو فيا البنات نطلعو نفطرو البرا. اتصلت بيه ماردش. ركبت سيارته صحبتي ومشيت وخايفة. حي عليا كان ما يزعل. قالت صحبتي نمشو لي كافي روزا. مشينا. واحنا خاطمين شفت سيارته خالد. وهوا كيف نازل منها. قلت لي صاحبتي اوقفي ترا. وقفت قدام مقهاة تريكو. مقهي معروف. نزلت قعدت نشبح فيه. لقيته مقعمز مع وحدة. حشا خلق ربي. حي حي حي. على حياة. حي. من هادي زعما؟ اكرام؟ شني اندير توا؟

نوريه؟ روحيلها؟ لا. وليت لي صحباتي. ركبت معاهم. ومشينا الكافي. طلبو فطور. واني نسخن ونفكر. نتصل بيه ولا لا؟ كيف هكي؟ من هيا هادي؟ وبعد نص ساعة اتصل بيا.