رواية احبتني رغم اعاقتي الفصل الخامس 5 - بقلم محمد شرف

وبعد ما رنت عليّ، هي كانت خايفة أصلاً تقول: "هيرد مش هيرد؟ " كانت متوترة أوي وقتها. طلعت في البلكونة ورنت عليّ. أنا مكنتش عايز أرد عشان كل اللي حصلي دا بعد ما كرامتي اتهانت، عايزاني أرد عليها؟ بس أنا برضه كنت عايز أعرف مين دا وبيعمل معاها كدا ليه. في الآخر رديت عليها، عملت نفسي بقى زعلان، قولتلها: "عايزة إيه دلوقت؟ هتبعتيلي بلطجية يضربوني في البيت ولا إيه؟ قالتلي:

"والله أنا مش عارفة أقولك إيه. كلمة آسفة مش كفاية على اللي حصلك عشاني. أنا آسفة يا مهند، والله أنا معرفش مين اللي عرف الشخص دا مكاني أصلاً، مش عارفة هو بيراقبني ولا إيه." قولتلها: "قوليلي بقى مين دا؟ عايز أعرف أخوكي ولا مين؟ قالتلي:

"لا، دا واحد كدا مشارك بابا في شغل وعندُه مصانع وكدا، وهو عايز يرتبط بيا وأنا مش موافقة، بس بابا موافق عليه، وكل شوية يخليني أخرج معاه ويجيبلي كل الشغل بتاعي معاه عشان أبقى قريبة منه. وأنا أصلاً مش بحبه ولا طيقاه أصلاً، عيل بارد ودمه يلطش، دا اللي مسميه ظلم الاسم معاه، اسمه أمير، دا بذمتك شكل واحد أمير؟ قولتلها: "الصراحة لا." قالتلي: "أعملك إيه بقى عشان أصالحك؟

ما أنت لازم متبقاش زعلان مني، وخصوصًا كمان بعد الموقف اللي عملته عشاني دا لما أمير كان عايز يضربني بالقلم على وشي بس أنت مسكت إيده، كبرت في نظري أوي يا مهند ومش عايزاك تزعل مني أو تشيل في نفسك حتى." قولتلها: "أنتِ مكنتيش حاسة باللي أنا حسيته لما وقعت على الأرض ومش عارف أقوم تاني، والناس هي اللي قومّتني، وقولت مش هكلمك تاني خالص، هقطع معاكي خالص، أما أنا لسه عارفك وحصلي كدا، أمال كمان شوية هيحصلي إيه؟ الطيب أحسن."

قالتلي: "أوعدك مفيش حاجة تانية هتحصلك. أنت تعرف أول لما رجعت وقولت لبابا على اللي حصل، جاب أمير دا وقعد يزعقله وكان هيضربه وكان بيفض الشراكة اللي بينهم، بس أنا اللي قولتله بلاش، الشغل مالوش علاقة وكان متغاظ مني أوي. بص يا مهند، مش أنت رايح النادي بكرة؟ قولتلها: "لا بكرة مبروحش النادي، بكرة بروح أنا وصاحبتي ضحى عشان كورس العلاج بتاعي جنب النادي كدا." قالتلي: "علاج إيه؟

مش الدكتور قال إنك آسفة يعني مش هتعرف تمشي تاني على رجلك؟ قولتلها: "عارف، بس أنا مفقدتش الأمل إني أرجع أمشي تاني على رجلي وواثق أن ربنا هيجبر بخاطري وإن شاء الله هرجع أمشي تاني على رجلي وأعيش حياتي زي بقيت الناس. أنا دلوقتي مش زعلان على اللي أنا فيه، أنا بحمد ربنا كل يوم، في ناس تانية مش بتتحرك خالص." قالتلي: "طب ينفع أجي معاك لو معندكش مانع يعني؟ قولتلها: "لا معنديش مانع خالص." قالتلي: "وضحى؟ قولتلها:

"أنا هكلمها أقولها متجيش بقى عشان أنتي جاية معايا." قالتلي: "طب هتروح بكرة أمتي عشان أجيلك عند البيت أخدك؟ قولتلها: "على الساعة عشرة الصبح كدا." قالتلي: "ماشي اتفقنا يا هوندا." قولتلها: "هوندا مين يا بنتي؟ أنا اسمي مهند." قالتلي: "بدلعك أهو، زعلان كمان؟ قولتلها: "لا أزعل إزاي؟ دا أحلى دلع سمعته في حياتي." قالتلي: "هقفل بقى عشان بابا شكله بينادي عليّ، سلام بقى هكلمك الصبح ماشي." قولتلها: "سلام."

وقومت كلمت البت ضحى أحكيلها وقولتلها بقى على كل اللي حصل. قولتلها: "دي بتدلعني يا بت." قالتلي: "يا عم الصنارة شكلها غمزت ولا إيه؟ قولتلها: "معتقدش يعني، ممكن تكون بتجبر بخاطري يعني، مش لازم حب يعني، بدري أوي على موضوع الحب دا." قالتلي: "اسكت أنت، أنا عارفها هي مش بتاخد على حد بسرعة كدا." قولتلها: "أه صحيح، أنتي مش هتيجي معايا بكرة عند الدكتور، نامي بقى يا عم مريحك أهو، هاخد شهد معايا." قالتلي:

"يا واطي بعتني على طول كدا، أبقى خليها بقى تنفعك يا خويا، خدها معاك كل مرة، أنت أصلاً بتمرمطني معاك أصلاً، أبقى شوف بقى هي هتستحمل معاك إزاي يا حبيب." قولتلها: "مالكيش دعوة أنتي." قالتلي: "غور ياض روح كلم الهانم بتاعتك." ونمت وصحيت تاني يوم على المكالمة بتاعت شهد، وأنا كنت لسه نايم. قالتلي: "إيه يا عم لسه نايم لحد دلوقت؟ يلا عشان ميعاد الجلسة بتاعتك عند الدكتور." قولتلها:

"خمس دقايق وهنزلك حالاً، هاخد دش على السريع وأنزل على طول مش هغيب عليكي." قالتلي: "وماله يا عم مهند اتأخر براحتك، ما أنا لازم أستحملك عشان أنا اللي عايزة أصالحك." قولتلها: "ماشي يسطا نازل أهو يلا سلام." وخلصت ونزلت، وهركب العربية. قولتلها: "أنتي مالك واقفة حاطة إيدك في جنبك ليه؟ تعالي ساعديني شيلي الكرسي حطيه في شنطة العربية، فينك يا ضحى كانت من غير ما أتكلم." قالتلي: "يا عم خلاص أهو شيلته، اسكت بقى."

وركبنا العربية ومشينا. قولتلها: "شغلي أي حاجة كدا، احنا مش قاعدين في عزا." قالتلي: "بتحب تسمع مين؟ قولتلها: "أنا مش بسمع أغاني أصلاً بس أي حاجة وخلاص." لاقتها مشغلة أغاني إنجليزي وأنا مش فاهم حاجة أصلاً بس بسمع وخلاص أمري لله. قالتلي: "إيه رأيك في الأغنية دي؟ قولتلها: "جميلة خالص أحلى أغنية بحبها وأنا مش فاهم أي حاجة أصلاً."