رواية احفاد الصياد الفصل الرابع 4 - بقلم سلمى السيد

مالك راح بسرعة ناحية شقتهم و كان بيحاول يكسر الباب و قال بصوت عالي و خوف عليها: سما. سما بعياط و صريخ: ألحقني يا مالك.

مالك دفع الباب جامد و كسره و جري علي سما و شدها من إيد أسر و أداله بالدماغ في مناخيره، مناخير أسر نزفت و مالك زق سما بعيد عنهم و نزل ضرب في أسر، أسر صد ضربة مالك الأخيرة و قام من تحت إيده دخل المطبخ و جاب السكينة و كل دا حصل بسرعة جداً، و رفع السكينة علي مالك و سما كانت بتعيط و بتصوت، مالك كان ماسك إيد أسر و عمال يخبط في إيده عشان السكينة تقع منه، لكن في اللحظة دي يوسف دخل البيت و جري عليهم و خد السكينة من إيد أسر.

الاتنين بعدوا عن بعض و مالك و يوسف كانوا واقفين و سما وراهم و أسر قال بعصبية و شر و صوت عالي جداً: أقسم بالله ما هسيبك يا مالك، و أنتي حسابك معايا مش دلوقتي، و أبقي وريني حبيب القلب القديم هياخدك من إيدي ازاي. يوسف راح ل أسر و زقه و هو بيقول بزعيق: أطلع برا، و متفكرش إنك تأذي حد فينا عشان ساعتها أنت عارف النهاية اي. أسر خرج و هو عامل زي البركان الي أنفجر و ركب عربيته و مشي، و سما كانت قاعدة عمالة تعيط.

مالك قرب منها و قال: هو عملك حاجة؟ سما بعياط و شهقات: لاء. يوسف حاول يهديها و قال: خلاص محصلش حاجة متخافيش يا سما أحنا موجودين، أهدي عشان خاطري. مالك كان واقف هادي رغم النار الي جواه و فجأة شدها من إيديها و قال: قومي معايا هنرفع قضية خلع عليه. يوسف: استني بس يا مالك هو هـ. مالك بعصبية: طول ما هي مراته هيقدر يعمل أي حاجة و محدش هيقدر يمنعه لكن لما تبقي طليقته مش هيقدر يلمسها و لو لمسها هسجنه.

خرج ب سما و ركبها العربية و يوسف خرج معاهم و راحوا لمحامي العيلة، سما كانت خايفة جداً لكن وجود مالك و يوسف معاها طمنها. بعد ساعة وصلوا للمحامي و المحامي بدأ يتكلم مع سما في التفاصيل و سما كانت بتجاوبه، فضلوا قاعدين مع المحامي ساعة و نص و في أخر الكلام المحامي قال:

متقلقيش يا أستاذة سما، النطق بالحكم مش هياخد وقت لأن في علامات ضرب في وشك و الأثر واضح، و دا هيفيدنا جدآ في القضية دي، و كل الي أنتي قولتي دا أسباب كافية جدآ إنك تخلعي نفسك منه، و أوعدك في أقل من ٣ شهور هتكوني طليقة أسر النجار. سما هزت راسها بالإيجاب و هي بتقول بصوت مبحوح: إن شاء الله.

في المكان الي محمد خد سلمي فيه. كان عبارة عن بيت صغير لكن شكله جميل اوي و متحاوط بحراسه كتير جداً، محمد شال سلمي و دخل بيها و حطها في أوضة و خرج و قفل الباب، أحمد كان في البيت دا من قبل ما محمد يجي بنص ساعة، قعد مع محمد و قاله: علي فكرة أنا مش مرشح خطف سلمي خالص. محمد ببرود: مين قالك إني خاطفها!!! ، أنا بستضيفها عندي بس بطريقة تانية، و قرصة ودن لأبوها، و إن مسبش صفقة الأسلحة هحرقله قلبه علي بنته. أحمد بتنهد:

يا محمد بلاش تأذي البنت هي ملهاش ذنب، حط سلسبيل أختك مكانها. محمد ولع سيجارته و قال و هو بينفخ دخانها: متقلقش مش هأذيها، أنا راجل مافيا اه لكن عندي قلب بردو. أحمد ضحك و قال: يا راجل!!!! ، طب هتعمل اي معاها؟ محمد بثقة: عارف يا أحمد!! ، رغم إن إبراهيم عبد الرحيم راجل كبير وسط الماڤيا و ليه كلمته و مبيخافش من حد بس لما يعرف إن بنته الوحيدة في إيد محمد الصياد هيترعب و دا الي أنا عاوزه. أحمد بص في الفراغ و قال:

تعرف إني ساعات بندم علي دخولنا الدوامة دي!! ، أحنا عندنا أخوات بنات و بنات عم و الي بنحبهم دا غير أهالينا يا محمد، يعني وارد بنسبة كبيرة جداً إنهم يتأذوا في أي لحظة. محمد: و هيتأذوا ازاي و أحنا مأمنيين عليهم!!! أحمد: بس الدنيا غدارة و يوم ليك و يوم عليك. محمد: متقلقش مفيش حاجة هتحصل. في المستشفي. إياد كان بدأ يفوق و يفتح عيونه، نجلاء أمه أول واحدة لاحظت دا و راحت ناحيته بلهفة و هي بتقول بفرحه:

إياد يا حبيبي، أنت كويس؟؟؟ إياد بص ل مامته بتعب و قال: سما يا ماما. عفاف ببهجة: سما كويسة يا حبيبي متخافش، المهم دلوقتي صحتك. توفيق بإبتسامة: حمد لله على سلامتك يا حبيبي. سعد الدين بإبتسامة: رعبتنا عليك يا إياد. إياد بإبتسامة تعب: الله يسلمك يا عمو، الحمد لله. ديما بدموع و إبتسامة: حمد لله على سلامتك، أنا كنت خايفة عليك أوي. إياد بإبتسامة: الله يسلمك يا حبيبتي أنا كويس. سلسبيل بتريقة:

الله يسلمك يا حبيبتي أنا كويس، علي فكرة أبوها و عمها واقفين ها. نجلاء و بتضربها بخفة علي كتفها: و أنتي مالك أنتي يا باردة الله، ما تسبيهم و لا أنتي عشان سنجل بائس مش لاقيه حتي بوبي يبقي مخلص ليكي. سلسبيل بإصطناع الذهول: بوبي!!!! ، أخس عليكي يا طنط و أنا الي بقول أنا مليش غير طنط نجلاء. كلهم ضحكوا و كانت اللحظة دي في داخلة زين النجار من باب الأوضة، دخل و قال: سلام عليكم. الكل: و عليكم السلام. زين بإبتسامة:

حمد لله على سلامتك يا إياد. إياد بهدوء: الله يسلمك. زين مكنش عارف يقول اي و لا يبدأ الكلام معاهم ازاي لكن جمع كلامه و قال: أنا مش عارف أقولك اي علي الي حصل دا بس و الله كانت لحظة شيطان. إياد بجمود: و لحظة الشيطان دي كانت هتروح فيها حياتي كلها، و دا ليه تمنه. زين أتنهد بهدوء و قال:

عارف، أنا عارف إن وجودي مش مرغوب فيه هنا بس و الله أنا فعلاً مش راضي عن أي حاجة أسر أخويا كان بيعملها و عملها و ما زال بيعملها، حتي طريقته مع سما كنت دايمآ بقف في صفها و بحاول علي أد ما أقدر إني أخليه بعيد عنها، و مجيتي هنا دي عشان أطمن عليك، أنا و الله فعلاً كنت قلقان عليك ليحصلك حاجة. سلسبيل بإنفعال: كنت قلقان ليحصله حاجة عشانه هو و لا كنت قلقان ليموت لحسن أخوك يتسجن و يتعدم؟؟ توفيق بصوت عالي: سلسبيل، مسمعش نفسك.

زين بص ل إياد و قال: حمد لله على سلامتك تاني يا إياد، عن إذنكوا. زين خرج و قفل الباب وراه و كان مضايق جدآ من الوضع كله، نزل في جنينة المستشفى قعد فيها و كان بيفكر في عواقب الي حصل دا و اي الي ممكن يحصل بعد كده. قاطع تفكيره سلسبيل و هي معدية ف قام و نده عليها بلهفة و قال: سلسبيل. سلسبيل وقفت و ربعت إيديها و قالت ببرود: نعم. زين بتساؤل و إطمئنان: هي سما كويسة؟؟ سلسبيل بنظرة قرف:

متعملش فيها البطل الحنين يا زين، كلنا عارفين إن دمك دم النجار الي كله حقد و شر، و أوعي تفتكر مجيتك هنا المستشفى دي دخلت في دماغي إنها عشان إياد و لا عشان تسأل علي سما، الله أعلم أنتو بتخططوا ل اي تاني. زين: أنتي بتقولي اي أنا و الله جيت عشان أطمن علي إياد بجد، و علي فكرة أنا مش زي أسر و أسامة. سلسبيل أبتسمت بسخرية و قالت:

أسر بردو ضحك علي سما بالكلمتين دول، بينلها إنه أحن و أطيب راجل في الدنيا، و إنه بيعشقها و ميقدرش يعيش من غيرها، و في الآخر ظهر علي حقيقته و كان بيعذبها معاه، أنت كمان زي أخوك علي فكرة، كلكوا بتتبعوا نفس النظام. زين بصدق:

لاء علي فكرة كل الي أنتي قولتي دا مش صح، اه ماشي أنا بعترف إن أسر أخويا كدب و خان الثقة، بس أنا مش زيه و لا عمري هكون زيه، و مش معني إنه أخويا يبقي طبعي زيه، ياما أخوات كتير جداً أخوات بالدم و الإسم لكن مفيش و لا واحد فيهم يشبه التاني. سلسبيل ببرود: أيوه معلش بردو أنا عاوزة أفهم أنت بتوضحلي كل دا ليه أنا مالي بكل الي أنت بتقوله دا!!!! زين بصلها لحظات في صمت و بعدها قال: عشان أنا حبيت أوضحلك بس مش أكتر.

سلسبيل رفعت حاجبها و هي بتبتسم ببرود و قالت: مكنتش مضطر توضح يا أستاذ زين، عن إذنك. سابته و مشيت و هو واقف مكانه باصص ليها و هي ماشية، و بعدها خد نفس و خرجه بهدوء و لبس نضارته الشمس و خرج من باب المستشفى و ركب عربيته و مشي.

في البيت الي سلمي فيه. أحمد كان ساب محمد و راح ليهم علي المستشفي، و محمد كان قاعد علي الكنبه تحت و فارد جسمه عليها و بيشرب سيجارته الي تقريباً مبيقعدش ساعة علي بعضها من غير ما يدخن، أما سلمي كانت بدأت تفوق و أول ما فتحت عيونها و لقت نفسها في أوضة مقفولة و متعرفش شكلها قامت مفزوعة و هي بتفتكر الي حصلها من بعد ما محمد سابها، قامت بخضة و هي بتخبط علي الباب بعياط و صريخ و بتقول:

أفتحوا الباااااااب، ألحقونيييييييي، باباااااااااا. محمد سمع صوتها ف أبتسم بإنتصار و طفي سيجارته و قام طلع ليها، طلع المفتاح من جيبه و فتح الباب و دخل و قال: صح النوم. سلمي بصدمة و دموع: أنت!!! ، هو أنت عاوز مني اي بالظبط!!! سلمي كان الكحل ساح تحت عيونها من كتر العياط و شعرها أتبهدل بشكل عشوائي علي وشها، محمد بصلها و أبتسم بخبث و قال: مش عاوز منك حاجة أنا عاوز من أبوكي. سلمي عقدت حاجبيها و قالت

برعشة في صوتها من العياط: بابا!!! ، أنت تعرفه!!! محمد: عز المعرفة. سلمي بعياط و خوف: أنا مليش دعوة بأي حاجة بابا بيعملها، أرجوك سبني أمشي من هنا أنا مش هفيدك بأي حاجة. محمد قرب منها و هي رجعت لورا و هي خايفه منه جداً لحد ما خبطت في الدولاب ف دموعها نزلت أكتر لكن كانت ساكته، و محمد وقف قدامها مباشرةً و قال: و مين قالك إنك مش هتفيديني!!! سلمي بخوف و عياط: يا محمد لو في قلبك ذرة رحمه أبعد عني و متقربليش و سبني أمشي.

محمد أبتسم و هو فاهم خوفها منه و قال: متخافيش، و بعدين أنا مش راجل مافيا رومانسي زي ما بتشوفي في الأفلام و المسلسلات، محدش هيلمسك طول ما أنتي هنا، و لحد ما أبوكي ينفذ المطلوب منه هتفضلي مشرفانا هنا شوية. سابها و خرج بعد ما قال الكلمتين دول و قفل الباب تاني بالمفتاح، و سلمي أنفجرت من العياط و هي بتقعد علي الأرض و بتضم رجليها ليها و سندت راسها علي رجلها و فضلت تعيط و هي بتقول:

يارب ساعدني أخرج من هنا، و الله مش هقدر أستحمل كل دا. محمد و هو نازل من علي السلم كان بيلبس البالطو الأسود بتاعه و قال: طلعلها الأكل يا أم كرم و دخلي حارس معاكي و أنتي بتحطي الأكل ليها عشان متخرجش برا الأوضة. أم كرم بتعاطف: حاضر يا محمد بيه، بس البنت دي هتفضل هنا كتير؟؟ ، دي قطعت قلبي عليها من كتر العياط الي عيطته. محمد:

بلاش الطيبة و الحنية الزيادة دي و أسمعي الي بقولك عليه و متتكلميش معاها كتير، و أنا هأكد علي الحارس في دخوله معاكي. أم كرم بتنهد: ماشي يا ابني. في جنينة بيت الصياد. مالك بإبتسامة: الحمد لله إياد فاق، روقي بقا شوية مفيش داعي للخوف تاني. سما أبتسمت بتعب و قالت: الحمد لله، (كملت بقلق و قالت) ، مالك، تفتكر أسر هيسكت علي قضية الخلع!!! مالك:

ميقدرش يعملك حاجة يا سما، و لو عمل و الله العظيم ما حد فينا هيرحمه و خصوصاً أنا، هو جاب آخره معايا، يعني مش كفاية عدائه معانا لاء و كمان بهدلك البهدلة دي، بس الصبر حلو، إن مخلتهوش يكره أيامه و عيشته كلها مبقاش أنا مالك الصياد. سما سكتت شوية و بعدها قالت بدموع: مالك، هو أنا جرحتك؟؟ مالك سكت لحظات و بعدها أبتسم بحزن و قال كلام مكنش حابب يقوله لكن لسانه و قلبه سبق عقله و قال:

تفتكري واحد قضي عمره كله بيحب واحدة و فجأة تقوله أنا مش بحبك و تروح تتجوز عدوه و عدو عيلتها و عيلته كلها دا يبقي اي إحساسه!!! ، تفتكري بعد ما بني أحلامه و حياته كلها في خياله معاها و وقت ما خلاص قرب يحقق الحلم دا هي تهد كل حاجة، دا يبقي اي؟؟؟ سما دموعها نزلت بغزارة و قالت برعشة: مالك أنا كان مضحوك عليا، كنت عايشة في كذبة سنتين و أنا مش واخدة بالي، أنا مكنش قصدي أعمل كده و الله، مكنش قصدي أجرحك و لا أكسر كلام عيلتي.

مالك أضايق من نفسه جدآ إنه قالها كده ف قال: سما أنا أسف أنا مكنش قصدي أفكرك بكده. سما كانت بصاله و دموعها نازلة من عيونها بس كانت ساكته، مالك بصلها لحظات و حس إن حصون قلبه و لسانه هيتفكوا قدام نظرات عيونها الي بتخليه في عالم تاني، ف قام من قدامها بسرعة و هو بيقول: تصبحي علي خير. دخل البيت و طلع شقتهم و دخل أوضته و قفل الباب و هو بيرزعه جامد و بص لنفسه في المرايه و قال:

مش دلوقتي يا مالك هي لسه متجوزة و علي ذمة راجل تاني، ( أتنهد و هو بيغمض عيونه و قال) يارب أرشدني للطريق الصح مش عاوز قلبي ياخد قراراته في الوقت دا، يارب أنت الوحيد الي عالم بلي أنا فيه، ساعدني و خليني أقدر أقاوم. قطع كلامه مع نفسه صوت رنة تليفونه و كان عمرو، مسك التليفون و رد و قال: اي يا عمرو. عمرو: .................... مالك بصدمة: اي!!!! ، أنت بتقول اي؟؟؟