رواية احكي غياباً مزق الوجدان الفصل الثالث والعشرون 23 - بقلم ضاقت أنفاسي

تحس احد يمشي خلفها لكن مطنشه السالفه بكيفها !
عقدت حواجبها وهي تسمع نفس الصوت وهو يقول : الجازي لو سمحت دقيقة
هذا الصوت تعرفه وكرهته قبل ما تشوف صورة هالشخص ...وش يبغى فيها لاحقها لمكان عملها ...لهنا كافي رح تخبر عمتها بحركاته.. وإلا يمكن جاي يقنعها بعريس جديد مصدي مثله !
الحين رح تعرفه قدره...لفت وجهها وبهجوم غاضب :انت وش تبغى مني لاحقني لمكان عملي !
ما تستحي على وجهك !
لكن كل حركاتك هذه رح اخبر عمتي نجوى فيها...خليها تعرف ولد أختها وش يعمل من خلفها !
ولا تفكر تطلع نفسك من السالفه ... لأني رح أخبر أبوي بحركاتك هذه صدق ما عاد فيه حياء ولا احترام لأعراض الناس !
انصدم من هذا الهجوم عليه ..هذه البنت ما يدري مين مسلطها عليه!
وبطبعه الهادي تكلم وبيده بعض الأوراق : ما لحقتك ولا شيء بس هذا مكان شغلي
رفعت حاجب بحده : ومكان عملك بيطلب منك إنك تلاحقني !
اها لا تكون مثل عيال الأقارب إلي يجلسون كاميرات مراقبه عليهم ويرصدون كل تحركاتهم !-
اسمعني زين وخليها حلقه بإذنك أنا عيالي لو ربي حفظهم لي كانوا طولي الحين فاحترم نفسك ولا تظن أبوي مو هنا تقول ألعب على البنت ما لها والي !
تراك غلطان لأني اكرهكم يا جنس الرجال !
فاحترم نفسك و انقلع من هنا قبل ما اجمع عليك الموظفين!
ناظر حوله ما في أحد زم شفته ما عجبه كلامها وتصرفها..للحين ماسك نفسه ..يعني لأنه خطبها ورفضته تعمل نفسها شيء كثير وتشوف نفسها عليه بهذا الشكل !
تنهد بهدوء وبعدها نطق : خالي وليد يعرف إنك تشتغلين هنا ؟!
رفعت حاجب وللحين ما ناظرته .. أصلاً لو بغت تناظره رح تنكسر رقبتها وهي رافعيتها حتى تشوفه ..كلامه ضايقها وش يقصد إذا أبوها يعرف بشغلها أو لا ؟!
مطت شفتها وردت بثقه : هو إلي توسط لي ووظفني بعد !
رجاء لا تتدخل بحياتي حتى ما أغلط عليك
رفع حاجب بسخريه : يعني للحين ما غلطتي !،
على كل حال أشوفك بالإدارة ف
قاطعته بغضب : لا تظن إنك إذا كنت صاحب المدير تقلب الحق على كيفك الحين انا طالعه للمدير حتى يتفاهم مع الموظفين عنده ..تركت المكان بخطوات مسرعه!
ناظر الأوراق بيده كل إلي كان يبغاه يعطيها الورق إلي سقطوا منها وهي تمشي ..ما توقع تأكله بقشوره !
مط شفته بسخريه وهو يقلدصوتها «كان عيالي طولي»
فعلا هالبنت غريبة أطوار تظنه من الشباب إلي يلاحقوها !
وليش يلاحقونها أصلا يمكن يظنونها بزر مضيعه الرضاعه ويبغون يعطونها حلاوة !
استغرب لما شافها بالنقاب ونازله من سيارة سعود فعلاً صدقت خالته ساعه تلبس وساعه ترميه ..إلي يلفت الانتباه فيها النظارات مع النقاب ...عرفها وهو طالع من الكافيتيريا وانتبه على الأوراق إلي سقطت منها !
لكن يصير خير ما هو بزر إلي تصرخ عليه!
طلع الجوال بهدوء وأجرى مكالمه قصيره وبعدها توجه لمكتبه !
•*
**
***
جلست بمكتبها وتفكر أكيد ولد عمتها خاف من تهديدها ...كلما تتذكر إنه رفضها يزيد كرهه بداخلها بدون ما تعرف شكله !
نسرين بهمس لسحر : اقولك شفتها بعيوني واقفه مع المدير ...اخخخ لو أعرف وش يبغى منها !
سحر بانفعال هامس: والكلبه هذه ما رح تخبرني بالسبب !
تنهدت الجازي وهي مطنشه همساتهم ..لازم تكمل الحين الشغل إلي عليها وبعدين رح تخبر عمتها تطلب من ولد أختها يبتعد عنها !
عقدت حواجبها وهي تبحث عن الأوراق ...تعوذت من الشيطان وهي تدور مثل المجنونه ....
لحظه كانوا معها قبل شوي ...وقفت على حيلها معقول نسيتهم بالكافيتيريا ...توجهت للخارج بخوف هذه الأوراق لازم تكون جاهزة خلال هاليومين ...لا حول ولا قوة إلا بالله !
وش هاليوم هذا !
توجهت تبحث وتدور بكل مكان مرت فيه !
معقول عمال التنظيف رموها بالزبالة !
توجهت وهي عافسه ملامحها بقرف وهي تدور بالقمامه بس ما في أوراق !
حست الدنيا قفلت بوجهها كيف تتصرف الحين !
رجعت ادراجها لمكتبها ترجع تبحث مره ثانيه لعل وعسى ما انتبهت زين !
وما انتبهت للي واقف يناظرها من شباك مكتبه باستمتاع !
مسك جواله واتصل على أبو محمد !
دخلت المكتب وكله حوسه فوق بعضه !
ناظرت البنات : شفتم أوراق
قاطعتها نسرين وهي منشغله : ما شفنا شيء !
ناظرتها الجازي بقهر من ردها ...وش رح تعمل الحين !
ما هو ناقصها هذه السالفة !
كملت عليها لما دخل ابو محمد بعد ما استأذن : الجازي لا تنسين اوراق الصفقة المدير طالبهم اليوم!
وقفت على حيلها بصدمه : اليوم!
ابو محمد بشك : وش فيك ؟!
ردت وهي تحاول تخفي ارتباكها : ها لا ولا شيء !
بس انت قلت يومين للحين ما جهزتهم
ابو محمد هز رأسه بتفهم : خلاص أشوف المدير وأرد لك خبر ..بس انت احتياطا جهزيهم الليله !
مطت شفتها الجازي بسخريه وبداخلها «اذا لقيتهم»
جلست بعد ما انهد حيلها وهي تفكر بحل لهذه الورطه!
**
**
*
تأخرت بالشركه وهي للحين تحوس وتبحث عن الأوراق !
ما خلت عامل نظافه إلا سألته عن الأوراق وما أحد معه خبر !
رن جوالها اتصلت وكانت نجوى ...ردت الجازي بضيق ...هلا عمتي ...لا لا تنتظريني ...عندي شغل بالشركه ورح أتأخر ....ايه إن شاء الله !
قفلت الخط وتوجهت للشارع العام ...ما تبغى ترجع للبيت ..خلقها ضايق من الأوراق ومن كل شيء !
تمشي بضياع بالطريق حتى وصلت لنقطه الافتراق ..هنا فارقت بناتها !،
للحين هذا المكان معلق بذاكرتها ..ولازم تمر عليه وتجلس لفترات طويله ...لمجرد الأمل الي بداخلها إنها تلقى بناتها هنا !
معقول ما يحن عليها الخاطف !
للحين تعيش على آمال وأحلام ...ما زادتها إلا انكسار وخذلان !،
تعبت من الوقوف وجلست على الارض وهي سانده ظهرها على العمود وتناظر السماء بسرحان !
متأكدة إنها على حافة الجنون ما بقى على جنونها إلا شعره !
تحس كل شيء بالدنيا ضدها !
**
**
بنفس الوقت اتصلت عليه أمه بعدم راحه : الجازي اتصلت معك ...تقول عندها شغل متراكم بالشركه..بالله يا ولدي اتصل فيها وارجعها الحين ماني مرتاح لجلستها هناك !-
قفل الخط بهدوء بدون ما ينطق حرف ..على عكس إلي جالس جنبه بعد ما تعطلت سيارته مر عليه سعود يأخذه!
عقله بدوامه يفكر اي دوام للحين !
الشركه نظامها ل 3 وبتقفل وحتى الحريم يصرفونهم قبل... أعطاهم قرار النساء الدوام ينتهي 2
هذه وين طست وتكذب إنها بالشركه!
معقوله للحين جالسه تبحث عن الأوراق!
عقد حواجبه وناظر سعود: طريق الشركه من هنا ليه لفيت
قاطعه سعود وابتسم بسخريه : ومين قالك اني رايح للشركة !
عقد حواجبه باستغراب من هالابتسامه ...ولا عباله ولا اهتم لغياب ابنة خاله!
تنهد وما تكلم يشوف وش آخر هالمهزله !
التفت على سعود لما وقف جنب الطريق ..طلع جواله واتصل بضجر ما أحد يرد عليه !
بدا يضرب هرن ورجع يتصل مره ثانيه
استغرب من موقفه وقبل ما ينطق تكلم سعود بضجر وهو يفتح باب السياره : لازم تغلبني وتنزلني!
اخخخ لو اشتغل بالبلديه إلا اقلع هالعامود
زادت تعقيد حواجب فياض من كلامه ...ما فهم شيء ... راقب خطوات سعود ..لما توجه لمتسوله جالسه عند عامود ...زفر بضجر من سعود وقت هالمتسوله الحين !
لمح ملامح سعود الغاضبه ....يمكن اول مره يشوفه كذا دوم مروق !-
مط شفته بلامبالاه ما يخصه حتى يتدخل فيه !
لحظات قامت وسعود يتكلم بصوت وصل لمسامعه لما اقترب من السياره : كيف ما تبغين ترجعين للبيت !-
تراك خلاص مسخت السالفة أنا اليوم رح أكلم خالي!
تنهد سعود من حالة الغضب إلي اعترته ..وبندم نطق: أنا آسف !
ما ردت عليه ...فتحت السياره وركبت بهدوء بدون ما تناظر أحد !
قفل الباب سعود وحرك السياره بهدوء ..انتبه على نظرات فياض وكأنه ما هو عاجبه شيء !
ابتسم بلعانه وتكلم :عسى جمعتي غله ممتاز اليوم يا الجازي !
اذا تبغين أحطك بالشارع الثاني عليه حركه أكثر هههههه
ناظر فياض سعود و من كلامه إلي متاكد إنه سخريه لكن ما استلطف هذا الكلام!
ما يدري ليه جالسه هنا؟
وسعود كأنه حافظ الدرس وعارف مكانها،!
غريبه هالبنت بكل تصرفاتها !
انصت سمعه لما تكلمت الجوال بصوت هادي : هلا ...الله يسلمك ...بس انت قلت يومين .....طيب طيب احاول ...ان شاء الله...قفلت الخط بضجر من ابو محمد الي استلمها يبغى الأوراق !
من وين تجيب هالأوراق !
تكلمت بهدوء مع سعود : سعود خذني بطريقك لبيت ياسمين
سعود بضجر،: يا كرهي لذي الصديقه!
الجازي بنفس الهدوء:ما تبغى براحتك نزلني الحين آخذ سيارة أجره
قاطعها سعود بقهر : انت ما تتوبين من سيارات الزفت !
ردت بعقلانية: أصابعك ما هي مثل بعض ..نزلني عندك
قاطعها بضجر : انكتمي الحين اقلعك عندهابس من الحين اقولك ما رح ارجعك عندي طلعه مع ربعي !
ردت بنفس الهدوء : إن شاء الله !
يسمع الكلام بهدوء فعلاً هذه البنت لا سائل ولا مسؤول طالعه داخله على رأسها !
وفوق هذا صغيره كيف خاله تاركها على هواها !
لا والمشكله الخبل إلي جنبه ماشي معها على كيفها !
ما له كلمه عليها وما يقدر يتدخل دام أبوها وأمها راضيين منطقيا ما له دخل .. إذا اليوم بس قال لو سمحتي مسحت فيه الارض !
لكن رح يداويها على ذي السالفه وكيف تكلم الناس باحترام !
دخلت عند ياسمين تبحث لها عن حل للورطه إلي دخلت نفسها فيها !

**
***
**
في اليوم الثاني
طلعت من الدوام مباشره لبيتهم بعد ما خبرتها عمتها إنه ابوها رجع وموجود حاليا في بيتهم ...انقهرت من عمتها ليه ما خبرتها كان كنسلت هالدوام إلي طول اليوم تتهرب من ابو محمد !
دخلت البيت بابتسامة مشتاقة لأبوها حيل ...اصواتهم بالمطبخ ما زالت الابتسامه مرسومه على شفتها ..سرعان ما انمحت وفتحت عيونها بصدمه للكلام !
وليد بعقلانيه: اعتبري نفسك ما عرفت انه مريم نفسها ابنة الجازي !
حنين باستنكار : كيف !
انت انجنيت !
رد بقهر : انت فكري بعقل ليه أهلك دسوا هالسالفة للحين !
بعد ما وعيت هالبنت وصارت تفهم صدقيني ما رح تتقبل الجازي يبغون يكسرونها للجازي مره ثانيه !
لكن أنا مستحيل اسمح لهذا الشيء يصير !
الجازي أنا من باكر رح احجز لها ولك وفرح واحمد ونسافر !
وهناك رح تنسى كل شيء !
قاطعته الجازي وهي تدخل ودموعها تنزل بصمت: تمزحون صح !
ناظرت أمها بشتات : من متى تعرفين ؟!
حنين بأسف : ما صار لي يومين وأبوك نبه علي ما أخبرك هو يتصرف !
ناظرت الجازي أبوها بقهر من تصرفه : دوم أشوفك العاقل ورأيك هو الصواب بس الحين لا
سنين وأنا انتظر بناتي والحين تبغى أتركهم
قاطعها وليد بإقناع : يا أبوي ما جابوا السيره الحين إلا البنت عايفيتك !
وحتى لو تقبلتك ما رح يسمحون لك تأخذينها ..يمنون عليك بيوم بالأسبوع او بالشهر !
ويتقطع قلبك بزياده لما تتعلقين فيها!
ولا تقولين حضانه لأنه وقتها رح يثبتون إنك مب قد المسؤولية ولو فرضنا رح تكسبين القضيه ما استبعد عن جواد يأخذ البنت ويهج من الدنيا !
أنا أبغى مصلحتك !
هزت رأسها بالرفض وعيونها تنذر بالدموع: مستحيل أتخلى عنها !
البنت هذه تحبني دوم تيجي عندي وألاعبها بس ماتخيلت لو لحظه تكون ابنتي !،
و بتذكر نطقت بجنون: سالم وينه هالزفت !
وليد ناظر نجوى وسميه ومعهم سالم واقفين يناظرون الموقف بصمت !،
لفت تطلع تبغى تكلم سالم ...وقفت لما شافت سالم يناظرها بهدوء ...نطقت بقهر : انت قلت شفت البنات ماتوا وحضرت الدفن !
ليه تكذب علي !
حرام عليك عيشتني بكذب طول هالسنين !
قاطعها بضيق : أنا ما كذبت لما وصلت المستشفى شفت البنت الاولى محروقه بالثلاجة قلبي ما طاوعني اشوف الثانيه وطلعت من المكان وما حضرت وقت الدفن عزيتهم بعد ما دفنوا !
عضت على شفتها من النار إلي تحرق جوفها ....ابنتها قدامها طول الوقت وما معها خبر !
نطقت بقهر : والله ما أسامحك !
قاطعها وليد بحزم : الجازي !
ما لنا بالماضي ...نبغى الحين
قاطعته بإصرار : الحين تأخذني عند ابنتي !
يبه لا تلومني نار بقلبي من ذاك اليوم وما تنطفي الا بشوفتها !
زفر بضيق وليد وأشر للأمام: امشي نشوف اخر هالسالفة !
**
**
**
واقفه بمجلس جدها وقلبها يدق بقوة ...اخذت نفس تحاول تهدي نبضات قلبها ...عيونها على الباب فقط ...ما تبغى من الدنيا إلا تضم ابنتها وتدخلها داخل ضلوعها !
ناظرت أبوها إلي وقف جنبها وشد على يدها حتى تتماسك !،
رفعت بيدها النحيله ومسحت الدموع إلي بدأت تتساقط من عيونها !
وليد بصوته الحاني : الجازي!
هزت رأسها بخفه وكأنها تقول له ما في شيء !
كل شيء تمام !
بداخلها المشاعر تبعثرت اول ما فتح جواد الباب ودخل المجلس ويمسك بيد مريم بملامح هاديه ومن خلفه الجازي ما هو باين منها شيء !
تقدم جواد وسلم على وليد بنظرات واثقه ...لكن وليد شاف بعيونه خبث ومكر ثعلب !
نزل نظره على طفله بشعر متوسط الطول يزينه طوق عليه شكل ارنب !
ما يشوفها تشبه الجازي أبدا ويمكن هذا إلي ساعده يمشي خطته الخبيثه !
الجد تقدم بهدوء وناظر مريم : تعالي يا مريم سلمي على أمك هذه ماما !
ابتسمت الجازي لها لكن سرعان ما انخرست كل فرحه بداخلها وهي تشوف مريم تبعد وتتعلق بجواد وعيونها كلها خوف !
تناظر لما  مريم بدأت تبكي بقوة لما حملها جواد وتقدم فيها ناحيه الجازي !
كانت تصرخ وكأنه رح يلقيها عن ظهر البرج .. أو إنها تشوف وحش كبير بعيونها !،
انصدمت من رد فعل مريم !
الجد باهتمام وقف عند جواد وهو يسمي على البنت ويذكر الله !
مريم وهي مستمره بالبكاء : أبغى ماما
وأشرت على الجازي 2
حست الجازي كأنها بمكان مرتفع وبلمح البصر ارتطمت بالأرض !
تحس نفسها تكسرت وتحولت لفتات ... وهي تشوفها بحضن زوجة جواد وتحتضنها مريم بقوة وخايفه من كل شيء وكأنه حضن زوجة جواد هو الأمان لها !
عقلها ما قدر يستوعب وما قبل الانهزام !
ما رح تستسلم أبدا !
هذه ابنتها ومستحيل تتخلى عنها !
فتحت حقيبتها بيد مرتجفه ..اخرجت قطعة حلاوة منها وبصوت مرتجف تقدمت كم خطوة من مريم : جبت لك حلاوة تعالي
صرخت مريم بخوف لما توجهت الجازي ناحيتها ...بمخيلتها الطفوليه رسمت للجازي صوره مخيفه من وصف أبوها ...عقلها الطفولي ما يعرف إلا إنه أمها الثانيه شريره وحش ورح تذبحها !
وقفت خطواتها الجازي وهي تشوف جواد يتقدم من زوجته ويحمل مريم وبنبره حاده تكلم وهو يناظرهم :مب مستعد اخسر ابنتي وتنجن عشان هالأمومة المتأخرة ...خلها تشوف لها أرمل
قطع كلامه وسكت لما استوعب كلامه ...تنهد ونطق : السموحه عمي ابو بندر ...حمل مريم وخرج وزوجته خلفه ......
تحس بباب كبير قفل بوجهها بعد خروجهم !
ما في اي كلمه توصف احساسها او مشاعرها !
ما انتبهت على كلام جواد ولا سمعته !
ناظرت جدتها بضياع وهي تواسيها : لا تهتمي يوم يومين وتتعود عليك
ما ردت بحرف واحد ..توجهت للخارج بخطوات تائهة بعد ما نطقت بغصه،: مشينا يبه !
وكأنه حاسة السمع وقفت عندها ...تسمع ثرثره جدها وصوت ابوها الغاضب المتوعد وصوت جدتها الحاني!
بس ما اهتمت لكل هذا ... لأنه الوجع والألم إلي تجرعته الحين يفوق كل شيء كل شيء !
وقفت بالخارج ...ناظرت السماء مكتضه بالغيوم وأجواء بارده ....ليت إلي بداخلها يبرد مثل هالأجواء الباردة ....حبست نفسها بقوقعة الحزن على ذكرى البنات وبنهاية المشوار ابنتها ضناها ترفضها !
ومب اي رفض !
حست بيد حانية على كتفها وبنبره مواساه: الجازي
بدأ جسمها يهتز من فعل البكاء ...وكأنه ابوها ضغط الزر للبكاء .....ضمها له بقوة لو يطلع بيده تعيش سعيده طول حياتها ...لكن هالشيء ما هو بيده ...للحين بقلبه نار تغلي من كلمة جواد !
مسك نفسه لآخر لحظه ما يكسر رأسه ..لكن ما هو وليد الي يرد بطريقة همجيه ..رح يقهره وهو جالس !
اخذ نفس وبعدها نطق: الجازي أدري الحاله الي كنت فيها كانت نتيجة شعورك بالذنب انه البنات ماتوا بسببك ...والحين البنت عايشة ومبسوطه عند أبوها !
متى ناويه تنتبهين على نفسك وتعيشين حياتك من جديد !
نفسك هذه لها حق عليك !
متى يا الجازي نتجاوز هذه الازمة ؟!
رفعت نظرها لأبوها بشتات ما عادت تعرف وش تبغى من هذه الحياه !
**
**
**
•*

نجوى تمسح دموعها بعد ما خبرهم وليد بالسالفه : حسبي الله عليه !
حط المر بحلق الجازي !
حنين بقهر وهي تبكي : ليته من هالحال واردى جعله يكون نهايته السجون من القروض. إلي فوق رأسه !
يظن حوبة الجازي رح تتركه !،
قلبي يوجعني لما شفتها دخلت وكل أحزان العالم تحيط فيها ..على بالي جواد رفض إنها تاخذ ابنتها !
ما توقعت إنها البنت رفضتها!
نجوى وقفت بضيق ،: ربك رح يفرجها ...واخر البنت مردها لأمها طال الزمن وإلا قصر !
والحين راجعه لأني تأخرت على البيت !
حنين بنبره حزينه : نامي هنا
نجوى هزت رأسها برفض : حرام اترك ولد اختي بدون عشاء
هزت رأسها حنين بتفهم وبعدها جلست تفكر كيف تطلع الجازي من هالأجواء والانكسارات !
**
••
**
ابو ناصر بغضب: كلامك ناقص وما له داعي !
والله اني شعرت نفسي بحجم النمله. قدام وليد !
جواد بإصرار : وانا صادق تدور لها ارمل
قاطعه ابو ناصر بقهر: مهما إلي صار بيننا كلامك هذا عيب بحق وليد ..تراه رجال له احترامه بين الرجال!
الجده بقهر: ما توقعتك حقود لذي الدرجه تخلي البنت تكره أمها !
و ش عملت الجازي حتى تكرهها كذا !،
ناظر جدته بسخريه : وش عملت ؟!
سلامتك ولا عملت شيء وأنا الغلطان !
وبقهر تابع كلامه : جدتي انت تشوفين الحق وتحيدين عنه وفوق هذا مقاطعيتني !
أنا وش عملت ؟!
ابو ناصر بهدوء : اسمع اليوم اتصلت حنين تبكي وانت تعرفني كل شيء ولا زعل حنين !
تقول إذا ما استقبلت البنت الجازي رح تهج من الديره كلها !
فاختصر السالفه واترك البنت تستقبل أمها !
خلاص انسى الماضي وحنا عيال اليوم !
جواد بقهر من جده إلي خايف على زعل حنين : انا وش دخلني إذا البنت ما هي طايقيتها
ابو ناصر قاطعه بحزم : كلنا نعرف إنك ربيت البنت على كره أمها
قاطعته أم ناصر وهي تخزه : على أساس ما تعرف بالسالفه!
الجد تورط وبتلعثم : ءءء انا لا
قاطعته الجده بقهر : انت الرأس المدبر !،
لا حول ولا قوة إلا بالله !
الجد طنشها وناظر جواد بتأكيد : بأسرع وقت تحبب البنت بأمها يكفي حرمان طول هذا الوقت!
اتوقع انحرق قلبها زياده بعد !-
ناظرتهم الجده بقهر نطقت وهي خارجه :" الرجل الشرير مثل الفحمة إذا ما حرقتك سودتك.

*•
**
**
**
ناظرت عمتها بقهر : عمتي لا تقهريني !
ترى ما لي خلق أقابل أحد أنا رايحه لبيتكم أفضل
نجوى مسكتها وجرتها للكرسي : أقول اجلسي إذا أنا جايه هنا أقابلهم يعني ما لك مفر !
حتى أخواتك برضو رح يتواجدون !
وبعدين هذا بيتكم!
الجازي بضيق : وليه ما استقبلتي في بيتك!
ليه في بيتنا !
نجوى هزت كتوفها : أبوك أصر نستقبلهم هنا !
الجازي بضيق : عمتي اقولك ما لي خلق اشوف احد ! أصلاً ما يعرفوني رح اروح أنام ولا أحد يجيب سيرتي وانتهينا !
نجو زفرت بغضب : طبب بلاه تجلسين على الأقل ساعديني !
امك قربت ترجع من السوق!
الجازي للحين متاثره من رفض مريم لها لكن ما تبغى تظهر لكل من حولها إنها انكسرت ..رح تحاول ترجع الحياه طبيعيه وتدفن حزنها بقلبها وبنفس الوقت تفكر كيف تسترد ابنتها إلي متأكدة إنه كله من جواد لعب بعقل هالطفله ...تنهدت ونطقت بهدوء :عمتي خلاص اجلسي وانا أجهز كل شيء !
وقبل ما تعترض نجوى حلفت الجازي عليها تطلع !
بدأت تجهز بالعشاء والضيافة ...وعقلها سارح بعالم ما فيه أحد ..بمكان فاضي ما تفكر بشيء !
خلاص مل قلبها من التفكير !
بعد مرور ساعات جهزت كل شيء على دخول نجوى الي نطقت : غلبتك يا الجازي معنا!
هزت رأسها الجازي بالنفي : لو خدمتك طول حياتي ما وفيت جمايلك علي !
نجوى بابتسامه محبه : الله يرضى عليك !
وش رأيك تغيرين
قاطعتها الجازي برفض : عمتي اتركيني على راحتي !
استأذنت وطلعت لغرفتها قفلتها بالمفتاح حتى ما أحد يقطع خلوتها !
تناولت منوم وحطت رأسها على المخده... غمضت عيونها وبعد وقت قصير كانت بعالم الأحلام !
**
****
**
حنين تسلم على أم فياض بابتسامة: يا هلا والله نور البيت !
ام فياض بابتسامه عريضه هذه ثاني مره تشوف حنين شافتها بزواج وليد والحين بس !
تبادل الجميع السلام بابتسامات دافئه !
نجوى بعتاب: وينك مع هالغربه مرت السنين وما شفناك !
ام فياض : وكأنك ما تعرفين طبيعة شغل أبو فياض :!
سميه بابتسامة: ماعرفتينا يا عمتي على إلي معك !
ام فياض بابتسامة : خليني أعرفك بالأول
نجوى ابتسمت: هذه سميه بنت وليد زوجة سالم !
هزت أم فياض رأسها بإعجاب : ما شاء الله عليك
سميه كبر رأسها : تسلمي يا عمتي !
وين سالم والقزمه يسمعون هالكلااام العسل !
ضحكت ام فياض على كلام سميه ..تابعت سميه كلامها : وهذه البطه السوداء أختي دانا
دانا فتحت عيونها باستنكار:سوداء بعينك يا برميل !
اصلا الكل يتمنى سماري
ام فياض بابتسامة: ايه صادقه سمارها حلو وملامحها حلوة ربي يحفظها !
دانا ضربت سميه بكوعها وهي تحرك حواجبها : سمعتي !
سميه مطت شفتها : ما علينا وهذه فرح مخطوبة لسعود
ام فياض : ما شاء الله يا نجوى اخذت بنات وليد وما تركت لغيرك !
نجوى بابتسامة باهته : النصيب
سميه بلقافه : والحين دورك يا عمتي عرفينا
ام فياض بنفس الملامح المريحه : هذه الله يسلمك ابنتي ليان اصغروحده بإخوانها !
وهذه أختها شمس متزوجه صار لها 8 اشهر !
حنين هزت رأسها ؛ ربي يحفظهم لك !
وبدأت سوالف الحريم من سالفه لسالفه !
والشيء الوحيد إلي ما انذكر الجازي بتحريص من نجوى حتى ما ينحرجوا لأنها رفضت تنزل !
**
**
**
صحيت الصبح ونزلت من الدرج وهي تثاوب بكسل ....البيت هادي ...
يمكن عمتها نجوى رجعت لبيتها مع عمتها ام فياض !
أحسن شيء ما لها خلق لأحد!
ما هي طايقه ابنهم حتى تطيق أهله!
تحس بصداع يضرب برأسها ...لازم تشرب دواء الصداع.... بالغرفة خلص الدواء رح تشوف بالمطبخ !
تمشي ببطء وبروح ميته !
تحاول تتناسى الأحداث لكنها ترجع وتنتكس ويتلبسها البرود !
جالسات بالصاله بهدوء ...استغربوا من الكائن الصغير إلي نزل ومر من امام الصاله وما ناظرتهم حتى !
شمس ناظرت أمها بهمس: اتوقع إنها شغالتهم !
ليان وهي تكتم ضحكتها : شفت شعرها يا دافع البلاء وكأنها أصابه التماس كهربائي !
ههههههههههه بطني هههههههه
ام فياض ما اهتمت لهذا الكائن ظنت إنها الشغاله لأنه  كل بنات أخوها شافتهم البارحه وهذه النسخه ما شافتها !
دخلت الجازي المطبخ وناظرت أمها جالسه تحوس بالمطبخ : صباح الخير !
حنين ناظرتها بفجعه : يا فضحيتي سلمتي على عمتك بهذا المنظر !
رفعت الجازي الحاجب بعدم استيعاب: عمتي !،
مين عمتي !
حنين بصوت منخفض : عمتك ام فياض جالسه بالصاله مع بناتها لا تقولي ما سلمت عليهم !
الجازي وبعدين معك لو سلمت وش ينقصك !
الحين يقولون شايفه نفسها !
مطت الجازي شفتها من كلام أمها الغير مفهوم ...ما في أحد بالصاله وليه أصلاً يكونوا عندنا من صباح ربنا !
أخذت حبتين من الباندول وقبل ما تشربهم سحبتهم حنين بقوة : ما في دواء !
انت مجنونه تشربين ادويه بلا وعي !
الجازي بضعف : يمه رأسي يوجعني بس آخر مره !
حنين ناظرتها : افطري بالأول وبعدين تشربين حبة وحده بس !
هزت رأسها بطاعه أهم شيء الصداع يخف !
تناولت الفطور بسرعه حتى تحصل على الدواء ...بعد ما أخذت الدواء ناظرت أمها ببرود : أنا أنظف المطبخ انت ارتاحي !،
حنين هزت رأسها : الحين اخلي فرح تصحى وتنزل تساعدك!
الجازي برفض : اتركيها نايمه !
حنين بتساؤل : ودوامك
الجازي بنفس البرود : الوقت طويل !
حنين عقدت حواجبها : ومين قال الوقت طويل ترى الساعه8:10
فتحت عيونها باستنكار تأخرت على الدوام : يمه خلي فرح تنزل. تنظفه أنا تاخرت
وتوجهت كم خطوة سرعان ما سحبتها حنين : اطلعي من هذا الباب لا أحد يشوفك واطلعي للدوام من الباب الثاني بسرعه !
عفست ملامحها من أفكار أمها اكيد شافوها ليه هالحركات !
**
**
**

جالسه بالمكتب وهي تفكر بحل للأوراق اعتمدت على ياسمين تلقى لها حل وفي الأخير انتهت المهله وبعدها ما لقت الحل !
وقفت وهي تعدل النقاب بعد ما اتصل أبو محمد فيها وطلب منها تمر لمكتبه !
دخلت ببرود بعد ما ردت السلام!
ابو محمد بضيق: وبعدين يا الجازي المدير ملزم على الأوراق وش صار عليهم !
أخذت نفس وبعدها نطقت ببرود : الأوراق ضاعوا وما أدري من وين اجيبهم
عقد حواجبها باستنكار : نعم !
ضاعوا!
يا برود أعصابك وتقولينها بكل برود !
الحين وش أقول للمدير !
على الأقل لو أعطيتيني خبر كان قدرت احل المشكلة !
عض على شفته بتفكير !
تذكر صديق له خبره بهذه السوالف يقدر يحل له هالسالفه !
وقبل ما يتكلم لمح بعقله فكره بعد ما وصلته اخبار عن حالة الجازي الاجتماعيه مطلقه : اسمعيني زين هذه الأوراق مهمه رح نروح بستين داهيه إذا ما دبرنا السالفه !
يمكن تخسر الشركه ملايين والسبب اهمالك !
ترى حنا واقعين بسالفة ما هي هينه !
اسمعيني زين لي صديق يقدر يحل الموضوع لكن في هناك مقابل بدل هالخدمه !
وش قلت !
رفعت حاجب باستغراب..وبملل نطقت : وش هالمقابل !
تكلم بأريحية: شوفي أنا رجال أخاف الله ...وما أقرب دروب الحرام ... وأنا طالب يدك بالحلال ...اذا وافقت الحين أكلم زميلي ويدبر السالفة وإن رفضت تحملي نتائج اهمالك !
**
**
**
**

جالس في مكتبه يكلم بالجوال ومبتسم على كلام أخته إلي للحين تضحك على شكل شغالة بيت خاله !
قفل الخط وهو يحس بالضيق وهو يتذكر الحوار بينه وبين وليد ...غمض عيونه وهو يستذكر الأحداث "ناظر خاله بصدمة من الكلام : اخطب الجازي !
وليد بهدوء : أنا ما أجبرك عليها..المثل يقول اخطب لابنتك قبل ابنك ....انت تشوف البنت وتجلس معها وإن عجبتك ربنا يتمم وإن ما صار بينكم توافق ربي يوفق كل واحد بطريقه !
ولا تظن إني بايع ابنتي بذي الطريقة لكن أبغى رجال اكون مرتاح إنها الجازي معه !
وبتاكيد: مثل ما قلت لك خطبها رجال غريب وأنا بصراحه أبغى أعطيها لرجال يصونها ا..لغريب ما نضمنه !
ناظر خاله بهدوء ظاهري : أنا يا خالي نسبك يشرفني وربي يشهد إني سعيت له ولي الفخر إنك تكون جد عيالي!
لكن أنا رجال إذا انرفضت مره ما أرجع مره ثانيه حتى لو كانت ملك نازل من السماء .. وأنا خطبت الجازي ورفضتني
قاطعه بصدمه: متى هالكلام ؟
ما عندي خبر به !
فياض بهدوء : أنا كلمت خالتي نجوى تحس نبض البنت إذا موافقه أتقدم لها رسمي لكن بعد يوم وصلني ردها رافضيتني بقوة وانا بصراحه ما اجبر نفسي على شخص ما يبيني !
السموحه منك يا خالي وربنا يوفقها مع الزوج الصالح !
نفض هالسالفه من رأسه وهو يفكر معقول خاله يزعل؟!
قطع افكاره دخول حمد بعد ما طرق الباب وهو يضحك !
رفع فياض حاجب باستغراب : وش فيك تضحك؟!
حمد بضحكه : الحين حضرت خطوبه !
عقد حواجبه باستغراب : خطوبه !
ما فهمت ؟!
حمد ابتسامه مريحه :هذا يا طويل العمر في موظف هنا ابو محمد كنت ابغى ادخل اخذ من عنده الأوراق وإلا عنده موظفه المسكينة مضيعه اوراق مهمه للشركة وابو محمد استغل هالنقطه وعرض عليها الزواج مقابل إنه يحل سالفه الأوراق !
ناظره بعدم تصديق وبخفوت نطق : وش صار ؟!
ضحك حمد: المسكينه أعطته رقم أبوها !
لا النكته يقولها انت مطلقه وانا ارمل متعادلين!
نطق بصدمه اكبر : مطلقه !
سأل وكأنه يبغى يتأكد : وش اسم هالموظفه !،
حمد وهو يمط شفته : ومين غيرها المتجعرفه الجازي !
دخلت الشركه بواسطه من أبوها صديق المدير !،
تدري أنا ابو محمد من زمان أشك بأمره لازم كل يوم يناديها على مكتبه!
بالمقابل ولا مره طلب زميلاتها !
دوم الجازي !
فياض يحس بداخله انفجار من إلي يسمعه ...لهنا وكافي !
تذكر لما كانت تتكلم مع ابو محمد بالجوال !
وحتى لما كان مع سعود كانت تتكلم مع رجال ..لحظه قالت له يومين !
اكيد إنه ابتزها بسالفه الأوراق !
لكن يصير خير !
ناظر حمد الي يكلمه وعقله ما هو مستوعب كلامه !
يفكر ب مطلقه !
الجازي مطلقه !
اول مره يسمع هالسالفه !
خالته ولا مره جابت له السيره حتى لما خطبها ما خبرته بشيء!
لحظه !
بدأ عقله يربط بالأحداث ...لما كانت بالمطبخ مع خالته اكيد الي كانت تقصده نجوى هو طليقها للجازي!
معقول للحين تحبه!
بس ما يدري طلاق من خطوبة وإلا زواج
بهتت ملامحه وهو يتذكر البنت إلي عرضتها عليه خالته نجوى ...معقول كانت تقصد الجازي !
عقله الحين تشوش وما هو قادر يوصل لنتيجه !
هز رأسه بتسليك لما استأذن حمد وطلع !

**
**
**
**
سكتوا لما دخل ابو محمد بعد ما استاذن وناظر الجازي بتشكيك : المدير طالبك باسمك الحين !
عقدت حواجبها باستغراب المدير وش يبغى منها !
ابو محمد يحثها :-قومي يا بنت الحلال المدير مشغول وعنده اجتماع بعد
قاطعته الجازي وهي توقف ببرود ....
توجهت لغرفة المدير وهي مستغربه للحين وش يبغى منها ..ناظرت السكرتير بهدوء : المدير طالبني !
السكرتير بمهنية: انت الجازي!
هزت راسها بهدوء ..اشر لها بالدخول
طرقت الباب بخفة ...فتحت الباب بعد ماقال لها السكرتير تدخل
تحس قلبها طبول ..تركت الباب مفتوح وهي تتحاشى النظر للمدير المنشغل بأوراق قدامه !
ردت السلام بهدوء ..وحست بسهم اخترق قلبها لما التقت عينها بعينه ..نزلت نظرها وجلست لما اشر لها بالجلوس !-
استغفرت ربها ...وقلبها يدق طبول ...ما تدري ليه يناظرها بحده كذا !
بعد وقت قصير استغربت طالبها ومادخل بالموضوع حتى ما رد السلام عليها أول ما دخلت !
صدق إنه نفسية ...ما تدري قلبها الغبي ليه يدق كذا ..اخذت نفس وبعدها نطقت بهدوء وبصوتها رجفه بسيطه : لو سمحت خبروني إنك طالبني .. إذا مشغول ارجع
قاطعها وهو يتكلم بمهنيه والأوراق بيده: الجازي عليك انذارين من قبل مسجلين بملفك ..والحين انذار ثالث يعني كذا تكوني مفصوله من الشركه !
اشر على أوراق بيده : هذه الاوراق سقطت منك وانت خارجه من الكافيتيريا ذيك المره ...بغيت أعطيك إياهم بس ما تركت لي فرصه ..إلي يبغى يشتغل بشركه محترمه المفروض يحافظ على أوراقها وسريتها !
مد لها بأوراق :وهذه أوراق فصلك من الشركه !
تعالي باكر أو اليوم اذا في وقت تعملين اجراءات الفصل و تأخذين مستحقاتك كامله !
بعد ما تناولت الاوراق نطق بنبره اعتبرتها الجازي مستفزة لها : تقدرين تتفضلين الحين عندنا اجتماع !
مسكت أوراقها بصدمه وكأنها بحلم ...هذا ولد عمتها وش يعمل بغرفة المدير ..ويصدر القرارات على كيفه !
مصدق نفسه الأخ !
وفوق هذا معطيها انذار ما له حق ابدا بهذا التصرف ...قاطع افكارها وهو يكلمها : لو سمحت بعد 5 دقائق عندنا اجتماع
السكون وحده يغلفها لثواني ...اخذت نفس وبعدها تكلمت بهدوء :ما يحق لك تأخذ قرارات عن المدير وين المدير أبغى اقابله !
ابتسم وهو يحس بنبره القهر بصوتها بالرغم إنها تحاول تتكلم عادي : انا والمدير واحد ما في فرق !
بعد جملته تأكدت إنه صديق المدير المقرب علشان كذا يتكلم بثقة !
ما رح تستفيد شيء !
لفت وجهها وبنبره متوعده بدون ما تناظره: وقسم بالله إلا تندم على هذا الفصل !
وما رح اسكت !
لا تفكر إنك تقطع رزقي ترى كل الشركات تتذابح حتى اتوظف عندهم !
سحبت نفسها وطلعت بغضب من المكان !
وسط ابتسامة فياض إنه قهرها ورفع ضغطها !
هذه آخرتها تتزوج بالشركه !
وش هالسمعة الحلوة بعد ما ينشر حمد هالسالفه !
افضل قرار اتخذه إنه فصلها ويبعدها عن ابو محمد حتى ما يضغط عليها بالزواج وتكون على معرفه انه الاوراق انحلت وما في مجال أحد يضغط عليها !
*•
**
**
رجعت من الدوام وما قابلت أحد ...توجهت لغرفتها وبدأت تبكي وهي تحس بموجه قهر وذل بعد ما طردها فياض من الشركه!
ما رح تسكت لهم ورح تشتكي عليهم !
توجهت للحمام بدلت وجهزت نفسها للصلاه !
اسندت ظهرها على السرير وهي جالسه على الارض بعد ما كملت الصلاه ...ما تدري ليه كل شيء ضدها !
ابنتها رفضتها
فياض رفضها
والحين الشركه طردتها !
وش هالحظ إلي عليها !
مسحت دموعها بخفه لما دخلت امها غرفتها : اليوم راجعه بكير !-
هزت رأسها الجازي بدون ماتنطق بحرف واحد !
حنين  بعتب: يا يمه ما يصير عمتك من البارحه عندنا لازم تنزلين وتسلمين عليها !
الجازي بقلب ميت : يا يمه هي ما تدري إذا موجوده على سطح الارض !
وإذا عرفت بوجودي قولي لها اني في بيت جدي وانتهينا !،
حنين باعتراض :،بس أبوك
الجازي بقرف من هالحياه: خلاص يمه ترى ما لي خلق أشوف أحد ولا أكلم أحد !،
خلاااص !
ابوس يدك اعفيني من المجاملات !
إلي فيني مكفيني !
ما ابغى اشوف أحد ولا اتعرف على أحد !
قاطعها صوت وليد الحاد إلي ماسك نفسه بالقوة عنها بعد ما رفضت فياض على الاقل تعطيه خبر تستشيره ما هو ترفض من رأسها !
نطق بنبره حاده: ما في احترام لأهلي !
وش هالتصرفات البزرانيه!
الجازي أنا للحين ساكت عن هالتصرفات لعل وعسى تصحين على نفسك وعلى الوهم إلي عايشيته لكن ما في فائده !
الحين تنزلين وتسلمين على عمتك وبناتها بدون نقاش !
أعطاها نظره قويه وغادر المكان ..ناظرت أمها بعد ما تقوست شفتها دليل على البكاء : ليه ما تحسون فيني !،
حنين بوجع : ما نحس فيك !
انت متى تحسين فينا وترحمينا !
قومي جهزي نفسك قبل ما يزعل أبوك !
رتبي نفسك أخواتك على الطريق، وما بقى وقت على الغداء!
هزت رأسها بدون نفس ...وقفت بملل من هالمجاملات ...وش تلبس !
ناظرت البيجاما إلي لابسيتها تكاسلت تبدل !
رمت ثوب الصلاه على السرير وتوجهت خارج غرفتها !
يقولون إلي يبغونه ما عاد يهم !
سميه وهي داخله جو مع عماتها وبناتهم ..وقع نظرها على الجازي نازله ببيجاما النوم وسيعه عليها باللون الاسود ..شعرها كالعاده متطاير بالهواء ....حول عيونها اسود ..تحس عيونها متورمات من البكاء ...وجهها شاحب ما في حياة !
الناس تكبر والجازي بعيونها كل يوم تصغر ..مين يصدق إنها اكبر وحده فيهم!،
حاولت سميه بمحاولات فاشله تؤشر للجازي تنقلع تبدل بس الغبيه ولا كأنها تؤشر لها !،
ليان باستغراب : علامك تعملين حركات هبل !،
سميه باحراج : ولا شيء !
ناظرت الجازي بتوعد وهي تشوفها تتقدم تبغى تسلم ...سميه باحراج من منظر الجازي : ههههه هذه شغالتنا الجديدة تبغى تسلم عليكم !
ريتا سلمي على عمتي أم فياض !
ناظرتها الجازي بقلب ميت وش يفيد الكشخه والترتيب إذا مات القلب !،
ليان بابتسامه متواضعه :،شفناها الصبح !
الجازي بملل وكأنها تؤدي واجب عليها سلمت بيدها ما هي طايقه فياض ولا أهله !
وتوجهت مباشره للمطبخ بدون أي كلمه !
شمس ناظرت أختها وبعدها أمها بعدم تصديق : انا شفتها الصبح بس ما انتبهت على ملامحها !،
تشبهك يمه !
ليان رفعت حاجب : وش جاب لجاب هذه وكأنها طالعه من القبر !
متأكدين إنكم تطعمونها !
سميه باحراج : ايه ايه
ام فياض سكتت وما علقت على السالفه وهي منشغله بجوالها وما انتبهت للجازي اصلا !
واقفه بالمطبخ تجهز مع أمها الغداء وسميه ودانا وفرح جالسات بالصاله وصوت ضحكهم طالع وهم يتكلمون باندماج مع بنات عمتها !
ناظرت أمها وهي تحس ظهرها تصلب من الوقوف ...اليوم بذلت جهد نفسي وجسدي فوق طاقتها !
من لما دخلت المطبخ ما طلعت منه : احط فلفل على السلطه
حنين وهي تحرك الأكل: اعملي قسمين واحد بفلفل والثاني لا !
هزت رأسها بطاعه ...متى ينتهي الغداء على خير !
حنين بهدوء : نرتب الأكل بصالة الأكل أفضل !
وبصوت مرتفع : يا فرح يا فررررح !
دخلت فرح المطبخ بضجر وعقلها مع السالفه إلي تتكلم فيها شمس تبغى تسمعها : نعم
حنين بعصبيه : نعامه ترفسك مب شايفه مشغولين بالتجهيز
فرح بضجر : طيب ليه سميه ودانا جالسات
قاطعتها حنين بقهر من كسل بناتها : ذول ضيوف شرف ما يصلح يشتغلون !
بسرعه ساعدي الجازي !
هزت رأسها وبوزها شبرين وبدأت ترتب الاطباق على سفرة الأكل مع الجازي !
تنهدت الجازي وهي تحس ظهرها طق ما تتحمل وجعها أكثر من كذا !
تكلمت مع أمها : كل شيء جاهز !
أبوي وينه ؟!
حنين :ابوك اسمع صوته بالصاله ما سمعتيه!،
هزت رأسها بالنفي وبدأت تنظف المطبخ ..مسكت يدها حنين : اتركي عنك وتعالي للأكل !
فكت يد أمها بشويش : اتركيني يمه آكل هنا براحتي !
ناظرت حنين بعيون الجازي اللامعه وما حبت تضغط عليها وخاصه مع الدموع إلي اوشكت تنزل من عيونها !
بدأت تنظف بالمطبخ تبغى تجهز كل شيء بسرعه وترجع لغرفتهاترتاح !
وقفت تنظيف لما وقف ابوها على باب المطبخ : تعالي للغداء واترك الشغل فرح بعد الغداء تكمل تنظيف !
الجازي برفض : يبه
وليد بحزم وبصوت هامس : اختي ما هي من مقامك حتى ما تجلسين معها
قاطعته بضيق : لا تفسر الكلام انا
زفر بضيق وهو يشوف الدموع بدت تنزل ..كيف يقدر يخليها تتجاوز هالأزمه ما يعرف كيف !
تركها وطلع ما هو ناقصه فضايح قدام أخته تشوفها وهي تبكي !
مسحت الجازي دموعها ورجعت ترتب بالمطبخ !
بعد وقت دخلت سميه ومعها أطباق فارغه : انت يا قزمه وش هاللبس إلي لابسيته !
فضحتينا قدام عمتي!
طنشتها الجازي وأخذت منها الأطباق بصمت مطبق !
سميه تحاول تغير مود الجازي:ريتا وبعدين معك !
ابنه سميه بسرعه تقدمت: ماما أبغى الحمام
سميه بضجر : هو وقتك الحين !
أخذتها وطلعت من المطبخ !
دخلت المطبخ فرح بضجر : يا كرهي للشغل !
امي تقول أساعدك !
رح اقول لها إنك رفضتي أساعدك !
نطقت الجازي وهي ضاغطه على اسنانها بقوة من الالم : نظفي مكان سفره الأكل وأنا أكمل هنا !
بعد عناء جهزت المطبخ ...وبعدها توجهت مباشره لغرفتها بدون ما تأكل ....بس تبغى سريرها !
**
**
•*
ام فياض تناظر نجوى: ايه كان عندهم اجتماع وما تغدى معنا !
نجوى بابتسامه : يقول ينحرج لما ييجي هنا ما يحب يضايق على أحد
ليان ابتسمت: بنات خالي متزوجات ما في غير الدبه هذه !
فرح فتحت عيونها ،: انا دبه !
سميه بضحكه : إلا قولي بقره!
ما أدري اهلي يطعمونك برسيم
فرح مطت شفتها : نفس البرسيم إلي يطعمك منه سالم !
سميه باستنكار: أنا أختك الكبيره يا حماره !
ام فياض بابتسامة لسميه: الي بيته من قزاز لا يرمي بيوت الناس بحجاره !
سميه مطت شفتها : قصدك إني دبه !
هذا وأنا جايه أسلم عليكم قبل ما نرجع
شمس باهتمام :كل أسبوع تنزلين عند أهلك وأهله!-
نجوى بضيق من بعد سالم عنها : لا والله أحياناً يجلسون شهر وما ينزلون واضطر أنا أروح اشوفهم
سميه خزتها : بس زمان ما زرتينا يا عمتي !
نجوى بتعذر : ما أقدر اترك سعد وسعود كثير !
دخل وليد بابتسامه ..وجلس مع أخواته يتكلمون ...
ناظر ام فياض وهو مبسوط فيها أخته الكبيره ولها معزه بالرغم ما كان يشوفها كثير :-أنا حلفت إلا تجلسين عندي لوقت ما ينزل ابو فياض وترتبون اموركم هنا !
ام فياض بابتسامة : ليتك سالم يا اخوي !
وليد بابتسامة : ما قلت لي كيف هالبنات معك
سميه بثقه : اكيد أنا أحسن وحده بأخواتي صح يا عمتي !
نجوى ضربتها على رأسها : يا واثقه !
ام فياض ابتسمت : سميه ما شاء الله عليها جلستها ما تمل منها وخاصه بوجود دانا وحتى فرح مثلهم تتونس بالجلسه معهم ربي يحفظهم !
عقد حواجبه باستغراب دوم يميل للجازي ويحب يكون المديح كله لها بالرغم إنه زعلان منها الحين على رفض فياض بدون ما تستشيره لكن تبقى الجازي غير عن كل إخوانها..بس استغرب اخته ما جابت سيرتها ..نطق باستغراب: والجازي !
ام فياض رفعت حاجب : الجازي !
ومين هذه !
وليد ارتخت ملامحه معقول كسرت كلمته وما سلمت على اخته : ابنتي !
ام فياض بصدق : والله ما شفتها !
حنين تستدرك: الا شف
قاطعها وليد وهو يكلم فرح :،روحي نادي الجازي بسرعه !
فزت فرح بسرعه متوجه لغرفة الجازي تنادي عليها !
سميه تحس نفسها تورطت قدام أبوها إذا عرف إنها قالت عن الجازي إنها الشغاله والظاهر عمتها وبناتها صدقوا !
قررت تهرب قبل وصول الجازي !
استأذنت وتحججت إنه سالم مستعجل أخذت عيالها وطلعت من البيت بسرعه !
رجعت فرح وهي تقول : الحين تنزل!
الجازي تحس بنغزه بقلبها من طريقة فرح لما ايقظتها...أفزعتها بقوة ..وكأنه ما ينقصها إلا فرح وثقل دمها!
حطت يدها على قلبها يدق بقوة !
ابوها وش يبغى منها !
حملت نفسها ونزلت وهي ناسيه إنه عمتها عندهم !
تقدمت منهم وردت السلام بخفوت : نعم يبه
نجوى ناظرت الجازي وتحس بالقلق عليها ...حالها ما عجبها اكيد للحين متأثره من موقف ابنتها !
هذا الشحوب والسواد حول عيونها كله بسبب جواد حسبنا الله ونعم الوكيل !
ليان جالسه تناظر الجازي تنزل تبغى تشوف هالمتكبره ليه ما سلمت عليهم للحين !
حاولت تكتم ابتسامتها وهي تشوف شعر هالبنت يضحكها بقوة !
انمحت ابتسامتها لما اقتربت وردت السلام وهي تقول نعم يبه !
هذه الجازي !
وليد بعتب: الجازي ليه ما سلمت على عمتك !
ناظرت عمتها بدون تركيز و للحين تحس بنغزه بصدرها !
شمس بضحكه: الحين هذه الجازي!
سميه قالت لنا إنها الشغاله اسمها ريتا !
وليد ناظرها بصدمه وهو يتوعد بسميه على هالكلام !
مسك الجازي واجلسها جنبه وهو يمسح على رأسها حتى يخفف من شعرها المتطاير بالهواء : وهذه الجازي يا ام فياض !
ام فياض استغربت حال هالبنت شكت إنه أخوها يسيء معاملتها وإلا ليه حالها كذا !
ردت بمجامله : الله يحفظها لك !
ايه هذه شفناها!
نجوى زل لسانها : عاد فياض يقول تشبهك يا ام فياض بقوة
وليد ناظر نجوى وهو رافع حاجب ومانطق بحرف واحد
شمس عقدت حواجبها : وش عرفه فيها !
ام فياض تغير الموضوع : انت بأي صف يا جازي!
ناظرت الجازي أبوها ببرود وكأنها جليد وما نطقت بحرف!
وليد بابتسامة : الله يسامحك يا أم فياض تراها البكر ..هذه أكبر وحده بإخوانها متخرجه وموظفةبعد بشركتكم !
ام فياض ما صدقت : تمزح!
نجوى بابتسامه: وهو صادق !
فرح بضحكه: الكل يظنها اصغر مني !
حنين ما علقت على السالفة واكتفت بالصمت!
ليان  باستغراب: أنا على بالي إنه سميه اكبر وحده !
تسمع سوالفهم لكن عقلها بسالفه جديده كيف تخطف مريم !
ايه لازم تخطفها وتحرق قلب جواد عليها ..وتقر عيونها بشوفتها ..رح تهرب وتعيش بمكان ما احد يعرفه بعيد عن الكل !
بس كيف تخطفها !
لازم تخطط مضبوط للسالفة !
رفعت نظرها باستغراب أبوها ما هو موجود ما تدري متى طلع !
ناظرت ام فياض الي تكلمها : فياض يعرف إنك تشتغلين بالشركة !
الجازي وبداخلها ااااه من هالفياض ..نطقت بنبره أقرب للهمس : اي
ليان بمزح : علامها بطارية صوتك منخفضة كذا !
نجوى أعطت ليان نظره حاده بدون ما تتكلم !
ام فياض مستغربه من البرود إلي يغلف الجازي ..تحسها بعالم غير عالمهم !
نجوى  بضيق على حالها: اطلعي نامي يا جازي وارتاحي!
بدون تردد طلعت لأنه الجلسه بهذا المكان تخنقها !
بعد وقت ما بقى بالصاله إلا نجوى وأم فياض !
ام فياض باستغراب : الجازي طبيعيه وإلا مريضه!
نجوى هزت رأسها بالنفي : وش هالكلام !
الله لا يعلقك مع لسانها هههههه
ام فياض باستغراب : علامها كذا !
نجوى بتكدر: مرت بظروف صعبة للحين ما تجاوزتها !
لا تلومينها !
ام فياض عقدت حواجبها : غريبه أخواتها الأصغر منها تزوجوا قبلها !
نجوى تنهدت: اخخخ يا اختي على حظ هالبنت !
تراها تزوجت وتطلقت
فتحت ام فياض عيونها بعدم تصديق .. بدأت نجوى تحكي قصه الجازي وام فياض منفعله وكل شوي تعطي جواد شتيمه او دعوة !
نجوى تختم كلامها : وهذا إلي صار معها ابنتها رفضتها وإلي مضايق وليد كلام جواد خليها تشوف لها أرمل وكأنه يقصد إنه الجازي ما رح تتزوج إلا شخص متزوج أو كبير أو أرمل
قاطعتها ام فياض بحقن : الله لا يوفقه !
كذا الواحد يعمل في بنات الناس !
نجوى بتردد : وأبغى أقول لك شيء !
ناظرتها ام فياض تحثها على الكلام ..ناظرت نجوى حولها تتأكد ما في أحد احد : بصراحه ولدك فياض خطبها مني بس انا صرفت الموضوع وقلت له إنها رفضت !
ام جواد عقدت حواجبها : فياض!
ما قال ولا جاب سيره لنا !
وانت ليه كنسلت الموضوع !
نجوى تنهدت : ولدك ما يبغى يتزوج فتاه متزوجه من قبله ولما طلب يد الجازي كنسلت الموضوع من عندي خفت يرفضها وتزيد انتكاسة الجازي وما هو ناقصها !
ام فياض قاطعتها : وليه يرفضها !
وش فيها اذا كانت متزوجه من قبل !
يا سخف عقل الرجال !
لكن الحل عندي !
اذا ما فكيت عقدة الجازي ما أكون ام فياض !
البنت بأول عمرها حرام تضيع كذا !
ورح اخلي طليقها وأهله يموتون بغيضهم والزمن بيننا !
**
••
**
ضاق خلقه بعد خطبة ابو محمد ..ناظر فياض وزفر بضيق : وقسم بالله ما يستحي على وجه عمره قريب الستين ومتصل يبغى يخطبها بكل قوة عين !
فياض هز رأسه وبداخله بلاك ما تعرف البلاء من ابنتك معطيته رقمك ...تكلم بهدوء : كثير رجال يستغلون هذه النقطه !
إلا ما قلت لي يا خالي ناوي تستقر برا !
تنهد بضيق : والله يا ولدي ما نويت وما طلعت إلا غصب عني !
هذا بندر رح يطلع الشيب برأسي !
متى يكمل الدراسه وانفك من هذه السالفه !
فياض باهتمام : صاير شيء؟!
مط شفته وليد وش يقول وش يخلي ...والله سالفته ما تنقال ..متحرش ببنت عربيه هناك وأهلها ما خلوا فيه عظمه سليمه فاضطر جلس عنده لوقت يتعافى ...وبتغطيه على الموضوع  نطق:،لا ما في شيء غير الخير .بس انت تعرف هالعيال ومشاكلهم إلي ما تخلص !
قاطعتهم نجوى وأم فياض وهم يجلسون والابتسامه تشع من عيون ام فياض ..بعد الخوض بالكلام ..تكلمت ام فياض بنغزه: تدري مب مصدق وأنا أناظر الجازي سبحان الله تشبهني كثير !
عندي صوره بعمرها كأننا توأم !
نجوى ابتسمت : بس انت أطول منها !
نزل رأسه وهو يسمع أمه تتكلم عن البنت ما يدري وش سبب هالكلام !
رفع رأسه لما تكلمت أمه : والله اني هالبنت دخلت قلبي وما هي طالعه من نفسي !
علشان كذا أنا أخطبها لفياض على سنة الله ورسوله !
وش قلت يا أخوي؟!