رواية اقدار الفصل السادس عشر 16 - بقلم امي احمد

مو مصدقه شيء !
خلف طلق ام عمار ؟!
ليه ومتى ؟!
والحين خلاص عبدالله طلقها بدون ذنب،!!
ليه يعاقبوها بفعل خلف !
نزلت نظرها للارض وهي تردد
وقلبها ينفطر
«اليوم الزواج »
وقفت وهي تحس بطعم الإهانة ضربها وطلقها وطردها !
بدون ذنب !
بدون ذنب!!!
حضنت يدها وهي عافسه ملامحها من الألم لما رماها عمها اصطدمت بالأرض !
أخذت نفس عميق وهي تناظر السماء بزرقتها !
وقفت وهي محتاره وين تروح ؟!!!
ضاقت الدنيا بعيونها ...كلما تقول زانت حياتها تخرب !!!
تحس كل الابواب تقفلت بوجهها!!
بالنهاية  استقر فيها الحال  تجلس على عتبة بيت ام محمد وهي تجهل الحاضر والمستقبل !
***
***
***
ابو راكان بغضب  ومنظر ام عمار ما يروح من بين عيونه : وقسم بالله إلا أدفعه الثمن غالي !!!
الحين يا ابو ماجد تشوف عمال أبغى ابني سور بيننا
وأبغاه اليوم يبدأ العمل وبأقصى سرعه ينتهي !
ابو ماجد بهدوء : ان شاء الله !
وبنبره لوم  نطق :قلت لكم من قبل نخلص من هالعلقه !!
وناظر عبدالله بتساؤل : ناوي ترجعها لذمتك
قاطعه عبدالله وللحين النار بقلبه وصوره ام عمار بذهنه : تخسى !
لو تخلص الحريم ما رجعتها لذمتي !
ام عزام بين نارين وإلي موجعها ساره ما لها ذنب وبصوت مخنوق تكلمت : ساره وش ذنبها ؟!!
عبدالله والشرار يطلع من عيونه: ذنبها إنها أخته ومثل ما طلق أختي نطلق أخته !!
سلمان بملامح جامده ما عجبه تصرفهم وش علاقة ساره  بخلف .. نطق بضيق: والعرس ؟!
ابو راكان بحزم : ما في عرس ولا زفت !
خلاص نلغي كل شيء !
وناظر عبدالله : لا تهتم بس تطلع أختك من المستشفى رح أزوجك إلي تسواهم كلهم !
ام راكان قلبها قارصها على أم عمار : خذوني لها !
ابو تالا بهدوء : يا يمه الدكتور قال انها بخير ما له داعي هالقلق !
الاهم الحين نلاقي الكلب
قاطعتهم وهي تدخل وتردح بعد ما خبرها خلف بالسالفه : ما أحد كلب إلا انت وإخوانك !
ابو راكان وقف بغضب : صدقيني رح ييجي يوم و يتمنى الموت هالخلف !
ام راكان بغضب وحقد  : الله يحرق قلبك على خلف ..مثل ما حرق  قلوبنا!
الله يأخذه الله
قاطعتها ام محمد بصراخ : قفلي حلقك يا ******
روحي شوفي ابنتك وش مهببه وبعدها تعالي تكلمي ليه عمل فيها كذا ؟!
عبدالله بصراخ غاضب: أختي أشرف منكم كلكم !
ما أسمح لك تفتحي فمك عليها بحرف !
والله والله لنحرق قلبك عليه !
ام محمد بانفعال : جعلك بالنار إلي تحرقك !
يا ليته صابك فال ساره وارتحنا منك !
ام راكان وهي تدفها حتى تطلع من البيت : انقلعي لا بارك الله فيك !
الحمد لله ولدي تخلص من هالبومه وطلقها وارتحنا منكم كلكم !
ام محمد بذهول وهي تناظر عبدالله  ما عندها علم: طلقتها ؟!!!
ابو راكان طالعها بكره : العين بالعين والبادي اظلم !
مثل ما ولدك طلق ام عمار طلقنا ساره!
ام محمد بلعت صدمتها وعدلت ملامحها وهي تبتسم باستفزاز : على بالك كذا تقهر خلف لما تطلق ساره ؟!!!
مسكين ترى المويه تمشي من تحتك وانت مو داري ؟!
ومين قال لك إنه خلف ناوي يزوجك إياها ؟!
مخطط للطلاق من قبل بس وفرت عليه الخطط !
سحب الفلوس إلي يبغاها منك واكتفى !
وحط في بالك الجوالات والشبكه والفلوس إلي أعطيتهم لساره أخذهم خلف !
كانت ترسلك تبغى فلوس وخلف جنبها يضحكون عليك !!
غبي إذا ظنيت ساره مهتمه لك
تراها اليد اليمنى لخلف وكانت تضحك عليك وعلى أهلك
قاطعها ابو تالا بغضب : تراني محترمك لآخر لحظه لأنك خالتي بلا
قاطعته بسخريه وتبث سمومها : مين قدك الحين بعد ما طلقها عبدالله
فضيت لك الساحه !
وتقدر تراكض خلف ساره مثل المراهقين !
عقد عبدالله حواجبه باستنكار لهذا الكلام !
ام محمد مستمره وهي تبث سمومها : تراها تضحك عليك مثل ما ضحكت على هزاع وخلته يراكض خلفها !
وحتى مناف ما خلص من ألاعيبها
سحبته
قاطعها ابو راكان بصراخ : بس
الله يجيرنا من شرك ومن
قاطعته وهي متوجه للخارج : ما كذبت بكلمه وهذي ام تالا معها خبر بذي السوالف وكم مره وصلت للطلاق بينهم بسببها
ولا تنكر ترى ابو تالا خطبها من خلف
أعطتهم نظره كره وطلعت وهي تشتم فيهم !!!
***
***
***
***
بهتت ملامحه وجلس على اقرب كنبه مو مصدق هالكلام !
معقول ساره لعوب !
لذي الدرجه كان مغمض عيونه وما يشوف ألاعيبها ؟!!!
إخوانه كانوا يبغونها !
ما رح يكذب خالته لو كانت كذابه كانت انكرت ام تالا السوالف !
وابو تالا وجهه صار أسود من كلامها !
يتمنى أمنية وحده تكون قدامه
ويطلع كل حرته فيها !!،
اصعب شعور لما تكون مغفل !!!
ام راكان جلست جنبه وحطت يدها على كتفه : لا تسمع كلامها !
ترى اخوك
ابعد يدها عن كتفه بهدوء وكأن حمل الجبال على صدره : لا تبرري يا يمه !!!
ما عادت تهمني او تعنيني !
الحمد لله إلي فكنا من شرهم !
اخذ نفس وتركهم وتوجه لغرفته !
وبداخله نار ما يدري وش يطفيها !!!!!!
***
***
***

شافتها جالسه على عتبة البيت ومتكوره على نفسها : أحلى أحلى
أشوفك هنا ؟!
هذا إلي ناقصني أرملة ومطلقه !
الله يعيذنا من حظك النحس يا وجه البوم !
ابعدي خليني أفتح الزفت !
ناظرتها ساره بصمت وابتعدت عن الباب بهدوء !!
فتحت الباب وبغضب : ادخلي نشوف وش آخر هالمهزله !
جلست على الكنبه بغضب لولا تنبيه خلف عليها انها ما تفرط بساره
كان طردتها يقول اذا لزم الأمر يعطي ساره كم طراق ويأخذها للمستشفى ويشتكي على عبدالله إنه ضاربها !
تنهدت من أفكار خلف المجنونه !
ناظرتها وهي جالسه بهدوء وبشماته: اشوف العاشق الولهان طلقك يوم الزواج !!!
ناظرتها ساره بملامحه جامده وما ردت ولا كأنه أحد يكلمها !
تابعت بشماته : تدري تمنيت يطلقك بالزفه !
الله لا يبلانا !
لا تناظريني كذا مثل الغبيه !
وش هالبنت المتخلفه ؟!
ما ادري كيف عبدالله خطبك ؟!
متأكده انه حس نفسه تورط واستغل فرصة طلاق خلف ... وطلقك حتى يخلص نفسه من هالورطه !
استلقت على الكنبه وهي تضحك بشماته: الصراحه تكسرين الخاطر
اتبعت كلامها بضحكات متتابعة وبخبث تكلمت : مسكينه بعدك ما شفت شيء !!!
طالعتها ساره بقلب ميت وتوجهت لغرفتها بهدوء
وكأنها بصدمه ما تدري متى تصحى منها !!!
***
***
***
عقدت حواجبها باستنكار من كلام ابوها : كيف ما في زواج ؟!
أبو سعود : اقولك الزواج إلتغى وعم ماجد طلقها !
ردت بصوت هامس : طلقها !!
وش السبب ؟!
ابو سعود هز كتوفه بنرفزه : انا وش عرفني ليه طلقها !
هذا إلي عرفته الزواج انلغى !
ام سعود بخفوت : الله يستر على بنات الناس !
ابو سعود عقد حواجبه : وش قصدك ؟!
ام سعود بتفكير : طلقها يوم الزواج اكيد في شيء كايد !
لا تنسى تراها ابنة عمه !
استغفرت عائشه بداخلها وهي تتذكر علاقة ماجد بهذي البنت !
معقول كان بينهم ش
قطعت افكارها وهي تستغفر بصوت مسموع !
تعوذت من الشيطان وقعها بالاثم !!!
ناظرت امها : يمكن اختلفوا على امور ماديه وعصب وطلقها !
للبيوت اسرار !
ام سعود هوت راسها : الله اعلم وش صار بينهم؟!!!!
اتصلي بماجد وشوفي سبب هالطلاق !
دفعها الفضول لمعرفه السبب لكن لاخر لحظه تذكرت الحديث «من حسن اسلام المرء ترك ما لا يعنيه »
شيء ما يخصها ليه تتدخل بخصوصيات الناس !!!!
وبصوت هادي : الله يصلح بينهم !
وبعدين يمه افرضي طلقني ماجد
لازم يكون على شيء مو زين ؟!
قاطعها ابو سعود بغضب : وش هالكلام ؟!
وليه يطلقك ؟!
بلعت ريقها وبتبرير : انا اقول افرض قصدي بس أعطي مثال !
ابو سعود بغضب : لعنبووو هالأمثله !
هالسيره ما أبغى اسمعها أبدا !
فاهمه ؟!
هزت رأسها بطاعه : إن شاء الله
تنهدت عائشه لو يدري عن اتفاقها مع ماجد على الطلاق وش رح يقول ؟!!
الله يستر من القادم !!!
***
***
***
ام راكان وهي تحضن ابنتها ودموعها على خدودها : جعل يده للكسر !!
حسبي الله عليه هالهمجي !
ام عمار وهي تبلع ريقها بصعوبه وكل شيء بجسمها يوجعها وكأنها سقطت من أعلى الجبل !
ناظرت أبوها إلي مسح دمعه نزلت من عينه غصب عنه وبصوت ضعيف تكلمت : كله منها !
ام راكان حطت يدها على شعرها : لا تتعبي نفسك ارتاحي الحين !
ام عمار ودموعها تنزل :،شعري يوجعني !
ابعدت أم راكان يدها عن شعرها : حسبي الله عليه !
جودي جالسه على الكرسي وجهها منتفخ من كثر البكاء على حال أمها
اوجعها ملامح وجهها مو باينه من الكدمات غير الكسور إلي سببها أبوها !
عمرها ما شافت إنسان بوحشيته !
ليه يعمل فيها كذا ؟!!!
تكره أبوها من كل قلبها عمرها ما حست إنه أبوها دائما يعاملهم بقسوه وعنف !!
زفرت بضيق وناظرت أختها ليان إلي ما كان حالها يختلف عنها !
ناظرت ام عمار بناتها : انا بخير يا ماما لا تخافون !
طلعت من ليان شهقه غصب عنها
وين الخير وهي تشوف حال أمها كذا !!!
***
***
***
***
ساره
فتحت عيونها بصعوبه وناظرت حولها باستغراب !
نهضت نفسها وجلست على السرير !
تنهدت براحه وهي تردد : الحمد لله حلم !!
ناظرت الساعه على الحائط 10:15ص
تذكرت الصلاه وبسرعه قفزت تصلي الفجر فاتتها الصلاه !
غسلت بصعوبه يدها توجعها اذا حركتها !
عقدت حواجبها باستغراب : وش سبب هالوجع !
فرشت السجاده ....اكملت صلاتها
وعقلها يستذكر الاحداث !
هزت رأسها بالرفض حلم ليه تحس إنه واقع ؟!
توجهت للشباك تناظر بيت عبدالله حتى تريح نفسها انه حلم وتخلص من هواجيسه !
رجعت للخلف خطوه بصدمه وهي تشوف عمال يشتغلون ببناء سور يفصل بينهم وبين بيت عمها !
طلعت تركض من الغرفه مو مصدقه !
ليه هذا الجدار بينهم ؟!!
وقفتها ام محمد : وجع !
علامك تراكضين مثل الناقه ؟! تظنين نفسك صغيره ؟!
قاطعهم دخول عزام بدون استئذان
وخلفه عبدالله وبنات خلف !
استغربت تواجدهم ؟!
تحس عقلها مشوش وضايعه بين الواقع والحلم ؟!!!
ام محمد بغضب : نعم مدرعمين بدون احم ولا دستور !
واشرت على عبدالله : تراك طلقتها اذا ناسي وما يجوز تشوفها !!
رجعت خطوه للخلف بصدمة مستحيييييل !
ما كانت تحلم ؟!!
هربت للنوم من البارحه حتى ترتاح من الواقع المر !
لكن الواقع واقع ومستحيل الاحلام تمحيه !
مرت أحداث الأمس قدامها مثل لمح البصر !
عمرها ما توقعت عبدالله يعمل فيها كذا ؟!
توقعت جاي يعتذر عن تصرفه !
ويعترف بذنبه لأنها ما لها ذنب !!
بس ملامح وجهه ما تقول كذا!!
عزام بجمود ناظر جدته : كلمتين وطالعين !
وطالع ساره بملامحه الجامده : سؤال ويا ليت تجاوبين بكل صدق وبدون لف ودوران !
عبدالله تقدم خطوه وملامحه غامضه ما فهمتها ساره : عزام أنا إلي أبغى أسألها !
ام محمد بحقد : لا تفكر اني اوافق ترجعها لذمتك
قاطعها بسخريه : تراني ميت حتى أرجعها !
انقبض قلبها من كلامه ..وكانهم استبدلوه ..هذا مو عبدالله الي تعرفه!!
تابع كلامه  بعبوس:كل شيء بيننا انتهى !
لكن أبغى اسألك وأتأكد حتى ما أظلمك
قاطعته ساره ولأول مره قررت تتكلم وما تسكت ...تكلمت بمراره بعد ما تيقنت إنها مو بحلم : وطلاقك مو ظلم لي بدون ذنب ؟!
طالعها بجمود : هذا الموضوع انتهيت منه !
ام محمد ذبحها الفضول تعرف السؤال: خلصنا اسألها و انقلع من هنا ؟!
طالعها للحظات وبعدها ناظر ساره ولأول مره يشوفها كذا بدون حجاب شعرها طويل أسود .... أخذ نفس وسألها : انت أعطيتي خلف الأوراق ؟!
ناظرتهم الكل ينتظر الاجابه سكتت للحظات وبعدها نطقت باستغراب من سؤاله : ايه انا ...ك
قطعت كلامها بعد الكف إلي حصلته
من عبدالله ...والشرار يطلع من عيونه وهو يصرخ : اانكتمي الله يأخذك!!
ابتسمت بألم طول فتره الخطوبه يشجعها تبدي رأيها وتبرر موقفها
ومن هذي السخافات !
ولما جاءت تبرر له الموقف سكتها بكف !
عزام مسك يد عبدالله بإحكام : اتركها يا عمي !
لا توسخ يدك فيها !
ناظرها عزام بتحسف : عمر ذيل الكلب ما انعدل !
عبدالله يحاول يفلت يده من عزام : الكلبه طلاق وقليل عليها !!..اتركني اطلع قهري فيها ذي الحقيره!!
جودي تقدمت منها بكره : ليه تطعنين امي بظهرها؟!!
كذا تعاملي إلي استقبلوك بطيبه !
ليان ناظرتها بكره : حقيره !
خلي خلف ينفعك !
ام محمد بغضب : صدق قليله أدب هذا أبوك يا قليلة التربيه !
وأكيد خلف رح ينفعها احسن من هالزفته
عبدالله ناظر خالته بقرف : ما رح اوسخ لساني فيك ورح احترم شيباتك !
عزام مقهور من ساره وقبل ما يطلع ناظرها : ممكن اعرف ليه عملتي كذا ؟!!
قولي إنه خلف غصبك وأجبرك ؟!
حتى لو أجبرك تعملين كذا؟!  ليه ما علمتي أحد فينا حتى نتصرف معه !
جاوبيني ؟!
طالعته لثواني بصمت وتحركت تبغى ترجع لغرفتها ببرود كبرود الثلج !!...حطموها بقوة ويبغون منها الحين تبرير!!
عزام شد قبضة يده يبغى يكسرها وهو ينطق بغضب: وقفي يا زفته تراني أكلمك !
تراني ماسك نفسي عليك بالغصب
تقدم منها وسحبها من شعرها بقوه لما تجاهلته ولا كأنه  يكلمها: أنا أكلم الجدار ؟!
ترى دور المسكينه مو لايق عليك وانكشفت حقيقتك !
نطقت من الالم : اترك شعري !
مو قادر يغفر لها هالتصرف عمره ما شاف انذل
منها...ما قدر يمسك نفسه وبدون وعي نزل فيها طق
ما صدر منها إلا صرخات مكتومه من الألم !
يضرب فيها بدون رحمه وبدون ذنب !
ما في احد يحامي عنها ويدافع !
من شدة الوجع صرخت بسم شخص الحين تحس بمعنى فقدانه : يباااااااااااااااه
رفعت نظرها لما توقف الطق
شافت عبدالله يمسك يد عزام !
معقول تحرك قلبه وحن عليها !
تكره ضعف شخصيتها لمتى هالحال ؟!
ناظرتهم واقفين فوق رأسها يناظرونها بحده !
وجودي وليان واقفات... ناظرتهم بحسافه..الكل وقف ضدها بدون ذنب ..
تتمنى تقدر تهرب تهج وتختفي من هالدنيا !
مسحت دموعها إلي نزلت غصب عنها
تشكي من ضيم الدنيا
عبدالله بتوعد : هذي اعتبريها قرصة اذن !
يا ويلك إذا اقتربت من أهلي !
لأني ما رح أرحمك!
عزام ناظرها بحسافه : تمنيت اجي ويكون إلي سمعته كذب !
وكله تأليف من خلف
قاطعته ام محمد بغضب : والله إلي رفع سبع سموات ما غصبها ولا جبرها خلف !!
لا تحطون كل شيء برقبة ولدي !
والحين انقلعوا من هنا قبل ما اتصل بالشرطه !
عبدالله بقرف: طالعين لكن بشري ولدك ما رح يتهنى !
عزام بتوعد : والله لندوسه تحت رجولنا !
ام محمد بغضب :برا برا يا******
وخلال ثواني عم الصمت المكان
طلعت ام محمد تتصل بخلف تخبره بآخر المستجدات !!!
***
***
***
***
ام عمار بكره : حسبي الله عليها وانا ظنيتها مسكينه وعلى نياتها !
ابو راكان  يكتم قهره بداخله ما توقعها تكون كذا  : اخذت عقابها ...طلاقها من عبدالله بيوم الزواج أكبر عقاب !
وش يخلصها من لسان الناس !!
ابو الوليد بنغزه : احمد ربك تخلصت من هالنسب !
ابو راكان براحه : الحمد لله !!
وان شاء الله تقوم أم عمار بالسلامه وهذا أهم شيء !
ام راكان بتعجب : وأنا استغرب من سناعتها كل شيء تدخله وتنظفه
طلعت هالناقه حية !
بس كيف نلقى هالخلف ؟!
ملح وذاب ؟!!
ام عمار بكره : عساه للموت ونرتاح من شره !
وخالتي ام محمد وش وضعها ؟!
ام راكان وهي تشبر بيدينها : أعوذ بالله منها ما خلصنا منها كل شوي تطلع وتردح لنا وصوتها طالع بالشارع !
ابو الوليد : ليه ما اتصلت بمحمد وتخبره عن سواد وجه اخوه ؟!
ابو راكان بكره : لما أقول لك عيال أخوي ما فيهم فائده صدقني !
قليل الخاتمه خبرته بالموضوع يقول أنا رافع يدي عن خلف وما لي علاقه فيه !
مو بزر أركض خلفه وأحل مشاكله !
بصراحه استفزني وثقلت عليه الكلام
وقفلت الخط بوجهه من حرتي !
ابو الوليد هز رأسه : يعين الله !!
**
*•
•••
قفلت الخط ودخلت الصاله شافتها مكانها متكوره على نفسها كلمتها بأمر : قومي للمستشفى !
قومي بسرعه !
ناظرتها بضعف وهزت رأسها بالرفض
ام محمد بإصرار :-الحين اجيب لك العبايه !
مو قادره تحرك نفسها تحس جسمها تكسر !
متأكده يدها انكسرت ضربها عزام على نفس المكان لما رماها  عمها أبو راكان على الأرض !!
لاول مره تساعدها ام محمد
ركبت السياره بمساعدتها
وطالعت السواق : بسرعه حرك للمستشفى !
***
****
ابو راكان بغضب يناظر عزام : انا قلت لكم لا تروحون لها
ابو ماجد بغضب مشابه لأبوه : متهورين مو قلنا اتركوها
خلصوا أنفسكم الحين !
ابو راكان عض على شفته : أنا الغبي إلي ظنيتها هبله وعلى نياتها ؟!
والحين فوق سوادها تشتكي على ولدي !
دخل ماجد غرفة ام عمار بفزع : إلحقوا اشتبك عمي عبدالله مع خالتي ام محمد !
وقف بفزع ابو راكان : لا حول ولا قوه الا بالله !
ام عمار بكره : حسبي الله ونعم الوكيل
!!!
**
***
***
ام محمد بردح : إذا ما نمت اليوم بالسجن
قاطعها عبدالله بغضب : أنام بعد ما أذبحها هالخاينه !
سلمان مسكه بقوه : وين وين تبغى تدخل ؟!!
عبدالله يحاول يفك نفسه : اتركني اذبحها !
ام محمد بخبث : الحين الشرطي يحقق معها !
وبعدها يجركم الاثنين للسجن
مثل
قاطعها أبو راكان بغضب : بس !
فضحتونا لا بارك الله فيك ولا بعيالك !
وين هي الزفته ساره !
طالت وشمخت وصارت تشتكي !
عبدالله وبداخله بركان من ساره وإخوانها : والله لأذبحها
**
**
**
**
ام راكان تبكي بعد ما اخذوا عبدالله وعزام للتوقيف : الله يأخذك يا ساره !!
جعلك بالساحق الماحق
قاطعتها ام عزام بصوت مخنوق على ولدها : طول وقتها تناديه عمي والحين ساحبيته للسجن !
اسيل بغضب : كله من تحت رأس جدتي !
والحل الحين ؟!!!

***
**
**
***
***

مرت الأيام... الصمت فقط يغلفها كل يوم تطلع وتجلس أمام السور تناظره وكأنها تتأمل لوحه فنيه أبدع الرسام بأبعادها..مثل ما أبدع الجدار بحجب الرؤيه عنها !!!
تحس هالجدار شطر قلبها من النص !
تبغى تصرخ بأعلى صوتها وتنادي عمها : احبك يا عمي !
مشكلتها حبهم عشعش بقلبها كيف تنساهم بذي السهوله وتنقطع عنهم ؟!
وما تقدر تستغني عنهم !
والجدار ابعدهم عنها !
تبغى تشوفهم لو من بعيد !
حتى عبدالله
قطعت افكارها وهي تتنهد بألم ....
متأكده أيام وتنصلح كل الأمور
وترجع المياه لمجاريها !
لحظة غضب ورح يبان كل شيء ويرجعون لها !
عمها يحبها ومستحيل يظلمها او يطردها من حياته للأبد!!
ناظرت يدها ما زال لون الازرق يحيط ببعضها !
حمدت ربها انها ما انكسرت يدها
جسمها للحين يعورها من طق عزام !
اخر ما توقعته عزام يضربها كذا ؟!
حتى جودي وليان يشوفونها تنضرب بقوه وبدون رحمه وما يدافعون عنها ؟!
لذي الدرجه كارهينها ؟!!!
زفرت بضيق وهي تسمع خالتها تنادي عليها !
تحس لسانها معقود مو قادره تنطق حرف واحد !
الصمت هو جوابها !
من بعد الحادث ما نطقت بحرف واحد !
قلبها ميت وبداخله نبضة امل ترجع الأمور لمجراها !
دخلت بهدوء وهي تواجه غضب ام محمد : وبعدين مع خبالك يا مخبوله ؟!
24 ساعه مقابله هالسور ؟!
اكيد عقلك ضارب ؟!
والا تشمي ريحه الحبايب ؟!!
جلست وهي تكمل كلامها بشماته : ترى وضعك يكسر الخاطر !
ترى إلي تنتظرينه يرجعك اليوم زواجه !
وناظرت ساعتها : تراهم على وصول الزواج انتهى قبل نصف ساعه !
بهتت ملامح ساره من هالخبر إلي نزل عليها مثل الصاعقه !
مستحيل !
اكيد تكذب حتى تقهرها !
مستحيل عبدالله وعمها يتخلو عنها !!
وبسرعه توجهت لخارج البيت حتى تتأكد بنفسها !!
فتحت البوابه الرئيسية ووقفت بالشارع وتحس بضيق وقلبها يدق بقوه !
سرعان ما رجعت خطوه للخلف بعدم تصديق وهي تشوف السيارات المتوجهه لبيت ابو راكان !
تزوج !
وانتهى الزواج !!
هي آخر من تعلم !!
لذي الدرجه تكن لها بالكره خالتها اخفت عنها الأمر لوقت رجوعهم
حتى تقهرها !
ما تذكر إنها زعلتها بشيء حتى تكرهها لذي الدرجه !!
رجعت خطوات خائبه للبيت بعد ما قررت الرجوع لبيت نادر !
وش الفائده من جلوسها هنا ؟!
تحملت خالتها وكلامها على أمل يتصلح الموضوع ويعرفون إنهم ظلموها ....
خابت ظنونها !
تحس الضيق والقهر خنقها والغصه بحلقها !
ما اذنبت حتى تلقى هذا الجزاء !!!
دخلت وهي تحاول ما تظهر قدام خالتها ضيقها !
ام محمد بشماته : اكيد صدقتي لما شفتي بعيونك !
تمنيت تشوفينه بالبشت وتكحلين عينك بشوفته !
ضحكت بطريقه مستفزه : عاد الحين عبدالله بأفخم الفنادق !
تدرين هذا الصح لازم من زمان طلقك تراك مو من مستواهم !
والحين اخذ وحده يتباها فيها
جمال وأدب وأخلاق وتعليم!
تدرين من تزوج ؟!!!!
تزوج شروق ابنة ابو الوليد إلي يكون اخوي !
اخت نورة زوجة عزام !
تدرين أخوي وش يقول عنك ؟!!
وبطريقه مستفزه : وإلا بلاها أحطها بوجهك !
ساره تناظرها بصمت ...نفسها تعرف من أي طينه خلقت خالتها؟!
لذي الدرجه الاحساس معدوم عندها ؟!
وش إلي تبغى توصل له بالضبط ؟!!
يوم ضربها عزام وألزمت تأخذها للمستشفى ظنت إنها تغيرت و رق قلبها لها ...بس تفاجأت أصرت عليها تروح للمستشفى حتى تشتكي على عبدالله وعزام !
كله علشان خلف !
ما تنازلوا عن عزام وعبدالله حتى اضطر ابو راكان يتنازل عن خلف !!
كل الناس مصالح !
تنرفزت من خالتها للحين ما سكتت وتقرقر فوق رأسها
خلاص ما تقدر تتحمل كلامها أكثر من كذا...بداخلها تراكمات وصلت أقصاها  وما تقدر تكتمها أكثر ...وبدون وعي صرخت : خلاااتتتص قفلي حلقك !
تفاجأت ام محمد من  رد ساره....ناظرتها وهي فاتحه عيونها بعدم تصديق
ساره تكلمها كذا ؟!!!
ساره وتتنفس بغضب :دودودودو حشى بالعه راديو ؟!!
على بالك تبغين تقهريني بقرقرتك ؟!
تراني مو سائله عن الدنيا كلها !!!
ام محمد وللحين مستوعبه إنها تكلمها كذا : انت تكلميني !
ساره بقرف من هالحياه : لا الجدار إلي خلفك !،
تركتها تحت دهشتها وتوجهت للغرفه اخذت حقيبة اليد...وطلعت بدون ما تناظر أم محمد إلي جالسه وفاتحه فمها بعدم تصديق !
ولما استوعبت إنها ساره طالعه ومعها حقيبتها صرخت بغضب : يا الحيوانه وين طالعه بهذا الوقت ؟!
طنشتها ساره وطلعت وهي تحس بداخلها سكين تطعن فيها وسالفة زواج عبدالله مو قادره تنساها !
وقفت بالشارع ما تنكر خروجها بهذا الوقت غلط لوحدها بس ما تقدر تجلس دقيقه عند خالتها !
تبغى تطلع وتفرغ الكبت إلي بداخلها بعيد عنها !!
نقزت بخوف لما حست باليد إلي مسكتها : ادخلي لا بارك الله فيك !
تبغين تفضحينا !
نفضت ساره يدها بغضب وبصوت عالي : اتركيني !
ام محمد تناظر حولها : لا تفضحينا بعد سواد وجهك !
والحين طالعه بآخر الليل !
ساره بقوه ما تدري من وين حصلتها
يمكن زواج عبدالله طلعها من طورها : مو جالسه عندك دقيقه وحده !
ام محمد برجاء : تعالي نتفاهم بالداخل !
ساره بعناد ونبره غاضبه : مو داخله تفهمين والا لا ؟!!!
ام محمد شافت بعض السيارات تمر وتناظرهم : فضحتينا ادخلي للصبح وباكر انقلعي وين ما بغيتي !
ساره رفعت بتهديد : وقسم بالله لو تفتحين فمك بالسالفه الا
قاطعتها ام محمد بقرف : مو فاتحه حلقي بس ادخلي !
لو بقيت منكتمه أحسن لنا !
ما أدري من وين طلعلك هاللسان ؟!
ساره بسخريه وهي تدخل : طلع من حلقي !
ام محمد بكره وهي عافسه ملامحها من خلفها : يا سخفك !
كل هالغضب لانه تزوج وحده ثانيه ؟!
وبشماته :ذوقي إلي ذوقتني إياه أمك ..
طنشتها ساره ودخلت وهي تحمد ربها انه خالتها رجعتها!
فكره مجنونه تطلع بهذا الوقت ؟!!!
دخلت الغرفه واستلقت على السرير بملابسها تحس رجع أصابها البرود !
تناظر السقف لدقائق وبعدها حست بدموعها الدافئه تأخذ مجراها على خديها !
مو قادره تستوعب انه عبدالله خلاص
صفحه وانطوت من حياتها !
لو غلطت كان ما زعلت ..بس ما عملت لهم شيء ..كذا يجازوها ..زمت شفتها بقهر ..عمها ابو راكان دوم يقول لها إنها مثل ابنته ..كذاب علشان ابنته طلقوها وما اهتموا لروحها الي ذبحوها بدم بارد ....
عقلها ما هو قادر يستوعب إنه عبدالله تزوج ..خلاااص ...كانت امنيتها يرجع ويعتذر منها بعد ما يعرف إنه ظلمها!!
شدت على شفتهامن الغباء الي فيها ..وش تبغى فيه وهو تركها عند أول مشكله وتخلى عنها بدون ذنب ... وجالسه طول الفتره تنتظر رجوعه ...شدت على قبضة يدها من القهر ...غبيه وطول عمرها رح تبقى غبيه ....

***
***
***
***
في الصباح
جالسين ينتظرون عبدالله وعروسته !
ام راكان بفرح : الحمد لله ربنا عوض عبدالله بشروق !
ابو ماجد بحماس: نفسي اعرف رد فعل خلف لما يدري ؟!
عزام ابتسم : لو يدري انها ابنة عمي ابو الوليد العروس الا ينجلط !
ابو راكان بابتسامه : يمكن اكثر شيء يكره خلف خاله ابو الوليد !
ام راكان مطت شفتها: ام محمد متصله بابو الوليد ويقول مسحت فيه الارض انه وقف معي وصف ضدها !
ابو عزام بضيق من سيرتها : الله يجيرنا من شرها ؟!
ساره تدري انه تزوج ؟!!
ابو ماجد بتآكيد : اكيد معها خبر !
على بالها يجلس على ذكراها !
ام ماجد بثقه : أختي رح تنسيه كل الحريم !
وبعدين عبدالله احسه كل حبه لها طار وتحول لكره بعد سواد وجهها !
ام عزام ما تدري بالرغم من توقيف عزام بالسجن بسببها بس للحين كاسره خاطرها
وتتمنى لو تقدر تأخذها تعيش عندها !
متأكده مستقبلها ضاع وخاصة بعد الكلام إلي طلع عليها بعد طلاق عبدالله لها !
البارحه كان اغلب كلام الحريم بالصالة عنها !
حتى شرفها انطعن فيه والسبب عبدالله !
حتى لو اخطأت ساره ما يصل عقابها لذي الدرجه !!
حرام عليه يطلقها بيوم الزواج !
بعمر الزهور ارمله ومطلقه !
ما تدري كيف رح تتحمل ساره كل هذا ؟!
تكلمت بغصه والدموع تلمع بعيونها : حرام عليكم تراكم ظلمتوها اكث..
قاطعتها ام عمار بكره : ظلمناها ؟!
كله من تحت راسها
ام عزام بقهر : حتى لو غلطت ما توصل لذي الدرجه يطلقها بيوم الزواج ؟!
16 سنه تترمل وتتطلق !
تراها طفله !
نسرين بعمرها افكارها طفوليه وللحين اعاملها وكأنها طفله !
بس وقفوا مع الحق تراها صغيره ما تستحق كل هالعقاب !
كل الحريم البارحه يطعنون بشرفها !!
حرام عليكم دمرتوا حياتها ومستقبلها !
نوره بسخريه لوت بوزها : هالمستقبل المبهر إلي ينتظرها ؟!!!
ابو ماجد بسخريه : لا تخافين باكر خلف يدبر لها عريس !
ابو راكان بتأييد : صادق !
لا تخافين على هالمستقبل الزاهر !
ابو عزام بهدوء : خلاص يا ام عزام !
موضوع انتهى !
صدت بضيق ليه ما احد يوقف مع الحق؟!!
قاطعهم دخول عبدالله ومعه العروس
والابتسامه شاقه الحلق !
طالعه عزام بهدوء ما يدري هالابتسامه من قلب او يمثل الراحه والفرح !
معقول كل التعلق إلي يحمله لساره اختفى بلمح البصر ؟!!!
وما عاد له اثر ؟!
***
***
***
***
تمر الايام..........
و بالرغم من التغيرات و الظروف إلي يواجهها الانسان من خير او شر
يحتم علينا الزمن التأقلم على الوضع
ونسيان الماضي او تجاهله !
حطت الفطور بروتين يومي ...
نادر ناظرها وابتسم بالرغم من تغيرها البسيط صار طبعها حاد شوي...وفقدت أهم شيء كانت تزين فيه ثغرها بس الظروف إلي مرت افقدتها
«الابتسامه »
انطفت ابتسامتها !!!!!
تميل للهدوء وقلة الكلام !
وخاصه بعد الكلام إلي انتشر بين الجيران عنها !
ما يدري من نشر هالكلام عنها ؟!
قرر الرحيل حتى ما يوجع قلبها بالكلام من حولها
لكنها رفضت الرحيل وهي تتكلم ببرود «إلي نشر الكلام عني حتى لو هجيت لآخر العالم رح يلحقني ويتكلم فيني خلينا هنا أفضل
واخرها الناس تقفل حلقها »
مسكينه ان ظنت الناس ينسون الماضي !
مها بهدوء وبطنها بارز  : غريبه للحين خلف مختفي !
نادر بسخريه ابتسم : ما عنده الشجاعه يقابل عيال عمه عارف رح يدوسونه !
والسالفه بعدها ما ماتت !
ارتشفت من كوب الشاهي وهي تتمنى يختفي خلف للأبد !
ما تتوقع تمتلك قوه لمواجهة خلف حتى تمسح فيه الارض على أفعاله !
دمر مستقبلها !!
اي مستقبل ينتظرها الحين ؟!
تحتاج وقفه تعيد ترتيب حياتها من جديد !
ابتعدت عن أهل عمها ابو راكان وانقطعت أخبارهم عنها !
تحس بالبرود جهتم مع الأيام !
هزت رأسها بالرفض ما تشعر لجهتهم بالبرود فقط !
تحس قلبها كره كل بيت عمها !
كرهتهم وخاصه
«عبدالله »
كل يوم قلبها يحقد عليه اكثر بعد ما استلمت ورقة الطلاق !
تناظرها كل فتره بتأمل وهي تفكر بالذنب العظيم الذي اقترفته حتى يعاقبها بهذا الشكل !!!
ما رح تسامحه بيوم من الأيام...
مرتاحه حالياً من خالتها ام محمد من بعد ما وصلتها لبيت نادر ما شافتها ولا تبغى تشوفها ..خلاص اكتفت من كل شيء حولها !
تنهدت وناظرت مها إلي تكلمها
تغصب نفسها تتكلم وتكون طبيعيه
بس من الداخل نار تكويها !...ما تظري وش يطفيها!!
***
***
**
عبدالله
ناظر امه بفرح وهو يدخل الصاله : الحمد لله شروق حامل !
ما احد بسعادتي رح أكون أب !
أم راكان أطلقت زغروده : مبروك يا ولدي !
الحمد لله !
عبدالله بابتسامه بعد ما جلس : ان شاء الله تكون بنت !!
ماجد وهو مستلقي على الكنبه ويطقطق بالجوال : وتسميها ساره !
طالعه عبدالله بصدمه ما توقع يتكلم ماجد كذا !
ام راكان عفست ملامحها بقرف: تخسى ...هذا الناقص حفيدتي تكون على اسمها !
ما صدقنا نرتاح منها ومن سيرتها !
ماجد نزل الجوال وطالع عمه وهو رافع حاجب : تبغى تقنعني إنك مو ندمان على طلاقها ؟!
عبدالله بملامح غامضه : ندمان اني طلقتها والا المفروض اخليها معلقه
حتى ما يستفيد خلف منها فلس واحد !
ماجد بتلاعب جاد : يعني ساره مو بقلبك الحين ؟!
عبدالله : يا سخفك !
عندي إلي تسوى العالم وما فيها
وش ابغى بوحده همجيه وعبيطه وبنفس الوقت خبيثه !!!
ماجد اعتدل جلسته بسخريه : من لما خطبتها وحنا نقول لك تراها عبيطه وغبيه وتقول عاجبيتني والحين صارت كذا ؟!
عبدالله تنرفز منه : انت مين سلطك علي ؟!!
وش تبغى بالضبط مني ؟!!!
ماجد طالعه بتحدي : أبغى أخطب ساره
شهقت أم راكان وهي تضرب يدها على صدرها !!!
دخل ابو ماجد على اخر جمله : خطبك القرد يا قليل الحياء !!!
ماجد صار وجهه ألوان ما توقع تواجد أبوه بهذي اللحظه وبسرعه نطق بتبرير : والله اطقطق على عمي عبدالله !
ناظر عمه : صح يا عمي ؟!
طالعه عبدالله بنظرات حاول تكون طبيعيه : اذا لقيت خلف روح اخطبها !
وبعدها وقف وهو يكمل كلامها : تراها طلعت من هنا
واشر على راسه : وعافها الخاطر !
وتركهم وطلع !
ابو ماجد جلس وهو يناظر ماجد بغضب : وقسم بالله لو اسمع هالكلام مره ثانيه انه
قاطعه ماجد : وقسم بالله امزح معه !
ام راكان بغضب : هذا الكلام ما فيه مزح !
ثمن كلامك قبل ما تتكلم !
ماجد مط شفته وهو طالع يهرب من نظرات أبوه : ان شاء الله
**
**
**
**
**
مها رافعه حاجب ما عجبها كلام اميره : الحمد لله غيرنا مو لاقي خيمه يسكن فيها !
اميره بتحسف : كان معكم بس بسفاهتكم ضيعتو
قاطعها نادر بضجر : ليه دوم لما تشوفوني لازم تسمعوني هالاسطوانه؟ !!
والحين وش سبب هالزياره ؟!
اميره بهدوء: يعني لما أزورك لازم يكون فيه سبب ؟!
نادر رفع حاجب : والله ما عمري شفتك زرتيني فأكيد فيه سبب لزيارتك !!
اميره بنغزه : ليه من قبل كنا نعرف أراضيك ؟!
كل يوم كنت بديره !
مها تنهي هالموضوع : وهذا حنا استقرينا هنا !
اميره طالعت ساره بضيق وبعدها تكلمت : أنا سمعت بالأحداث إلي صارت !
ترى أمي ما خبرتني بطلاقك إلا قبل فتره بسيطه !
قالت لي الزواج تكنسل لأنه أم عمار تعبت !
ما كنت أدري عن شيء وبعدها سافرت
نادر يقاطعها : والحين رجعتي !!!
طنشت مداخلته وهي تناظر ساره : ان شاء الله ربنا يعوضك !
وبعدها ناظرت نادر : تدري إنه محمد باع بيته وأمي وخلف كمان !!!
شهقت ساره بعدم تصديق : وش تقولين ؟!
اميره بتأكيد لكلامها : مثل ما اقول لك
نادر وهو عاقد حواجبه: مو تقولون خلف مختفي ؟!
اميره هزت رأسها : ايه مختفي بس تواصل معه خالي ابو الوليد واتفق معه يبيع البيت وينقلع ولا يشوفونه بعدها أو رح يطلعونه من تحت الأرض ووقتها رح يكون الموت أرحم له !
تقول أمي انه خلف رفض بالبدايه
بس اتصل عليه اخوي محمد واقنعه يبيع البيت ويبعد عنهم لانه بكلا الحالتين ما رح يقدر يرجع للبيت وبيت عمي متحلفين فيه !
وحتى خالي ابو الوليد قال له اذا ما تنازلت رح يرفع عليه قضيه تزوير
هزت كتوفها اميره : ما أدري بالضبط وش قضية التزوير هذي ....لانه عليه قضايا بلى تزوير ونصب
نادر ما اهتم لبيع البيوت : وبعدين وش صار ؟!
اميره بهدوء : اضطر يوافق خلف غصب عنه
وقبل اسبوع تمت عملية البيع !!
وبعدها اختفى خلف!
ومحمد رجع باع بيته وبعدها سافر
نادر بتساؤل : وأمي وين الحين ؟!
اميره  بهدوء: جالسه عندي
قاطعتها مها باندماج: مين اشترى البيوت؟!
اميره بهدوء : خالي ابو الوليد
نادر عفس ملامحه بكره : يا كرهي لهذا الخال !
رافع خشومه للسماء !
خالي صالح الله يرحمه كنت اهضمه اكثر منه !
ساره زادت ضيقتها بعد خبر البيع !
ما تدري وش السبب يمكن تحن لمكان عاشت فيه لسنوات او
قاطعت افكارها اميره وهي تناظرها : والحين جيت لساره.. في ابنة صديقتي عندها حفلة تخرج
وأبغى تحضرين معي !
ساره ما لها نفس تشوف أحد و برفض : ما أبغى
قاطعتها اميره بتشجيع : لازم تغيرين نفسك وما تحبسي نفسك بين هالجدران !
لا أول وحده ولا آخر وحده طلقها ولد عمها !
بعدك صغيره عيشي حياتك وانسي الماضي !
مها بتأييد : صادقة اميره لا تنكدي على نفسك
إلي باعك بيعه روحي مع أميره تغيرين جو
اميره بابتسامه ظهرت منها بعض التجاعيد : انا مو طالعه بدونها !
فكرت ساره للحظات ليه تدفن نفسها على ذكرى ناس باعوها بدون ذنب !
ناظرت اميره  بروح خاويه: متى طالعين ؟!
اميره بابتسامه : الحين نطلع ونلف لوقت الحفله !

***
***
***
جلست على احدى الطاولات بهدوء
وتناظر القاعه بفخامتها
كل هذا علشان حفلة تخرج ؟!!!
مطت شفتها بسخريه !
اميره تكلمها بجديه : وش رأيك بالحفله والمكان؟!
ساره تعبر عن رأيها ما عاد يهمها إذا الشخص المقابل أعجبه ردها أو لا
أو يزعل من ردها !
كل التحفظات الماضيه رمتها وتحس نفسها صارت تتكلم وما يهمها شيءوما عادت تستحي بإبداء رأيها زواج عبدالله قلب حالها
ناظرت حولها بتأمل : مبالغ فيها !
ليه كل هالتكلف ؟!!!
اميره بابتسامة : يعني ما عجبتك ؟!!
ساره بعبوس: ما أحب هالأماكن
أو ما اعتدت دخولها !
اميره تبغى تشجعها : تدري وش قصه صاحبة هالحفله ؟!
هزت رأسها بعدم المعرفه !
تابعت اميره كلامها بهدوء : هذي البنت
خطبها ولد خالها من لما كان عمرها
18 سنه !
وشرط عليهم ما يبغاها تكمل تعليمها ! وافقوا على شرطه
وجلست بالبيت حالها حال اي بنت بدون دراسه
بالرغم من عشقها للدراسه !
المهم ولد خالها قرر يكمل دراسات عليا برا !
وفعلا سافر وتركها ودوم ويتواصل مع اهله
وهي تنتظره بشوق متى يرجع !
تدرين بعد غياب 10 سنوات
ساره عقدت حواجبها : 10 سنوات دراسه ؟!
اميره وهي تشبك يدينها ببعض : طبعا لا
اكمل دراسته وقرر يأخذ خبره من هناك وتوظف !
ولما رجع هنا فسخ الخطوبه يقول يبغاها بنت صغيره ومتعلمه وحلوه !
فتحت عيونها بصدمه ساره من هالقصه !
اميره تنهدت : ضيع عمرها ودراستها وبالاخير تركها !
والحين عمرها 32سنه وتخرجت من الجامعه !
وناويه تكمل دراسات عليا !
بعد ما فسخ الخطوبه ما اعتزلت او دفنت نفسها
بالعكس على طول قدمت للجامعه
واكملت دراستها وقررت تصنع نفسها بنفسها وما تسمح لأحد يحطمها !
تابعت ساره بنظراتها البنت إلي تتكلم عنها اميره
كيف الابتسامه ما فارقتها وتنتقل بالقاعه مثل الفراشه!!!
وقفت اميره : الحين راجعه بس اسلم على صديقتي وراجعه لك !
مطت ساره شفتها أختها اميره لها صديقات ومعارف كثير عكسها !
حست قلبها يدق بقوه لما شافت أم عمار تجلس على طاوله قريبه منها مقابل لها
ومعها جودي وشروق !
نزلت نظرها ما تبغى تشوفهم
ما قدرت تسيطر على نظراتها
وحست بوجع بقلبها لما شافت
ام راكان ونوره !
ذبحها الحنين لأم راكان وام عمار
وبنفس الوقت كرهتهم كلهم !
مشاعر متضاربه بداخلها !
نزلت نظرها وهي تفكر بمستقبلها
لازم تنسى كل الماضي والأشخاص إلي كانوا فيه !
رح تبدأ بحياه جديده تصنعها بنفسها !
وما تسمح للظروف تقهرها !!
طلعت الجوال إلي اعطاها اياه عبدالله
كان اخر هديه منه
بعد ما كسر خلف جوالها !
اشغلت نفسها بالجوال حتى ما تناظرهم !
**
***
**

ام عمار بعدم تصديق :،شوفوا ذي ساره!
وش جابها هنا ؟!!
جودي بكره بعد الحادثه كرهتها : الله يأخذها !
ام راكان تناظرها بهدوء ما تكلمت
نوره بجعرفه : وش عرفها بذي الحفلات ؟!
حدها المطبخ !
شروق طالعتها بغيره بس ما تكلمت !
ام عمار وقفت بخبث : مين تيجي معي ؟!
واشرت بعيونها على ساره !
ام راكان بحزم : اجلسي واتركيها بحالها !
ام عمار بتوعد : مستحيل افرط بذي الفرصه !
لازم اطلع حرتي فيها !
وطالعت شروق وغمزت لها تيجي معها !
جودي تحمست وقفت وتوجهت مع أمها وشروق !
وقفت قدام الطاوله وبسخريه نطقت: يقال مشغوله بالجوال ؟!
ساره استمرت بالانشغال بالجوال وكأنه ما أحد يمها !
تابعت ام عمار بسخريه : الحمد لله انه عبدالله علمك كيف تستخدمين الجوال
كسب فيك اجر !
رفعت نظرها ببرود وردت وكأنها قالب من الثلج : نعم ؟!
ام عمار باستفزاز : حبيت اطمئن عليك بعد الطلاق ؟!
مطت ساره شفتها بسخريه وهي تشوف كميه الحقد والكره إلي بعيون ام عمار لها ... نطقت بسخريه مشابهه: فيك الخير اكثر مني !
نسيت اطمئن عليك بعد طلاقك انت الثانيه !
ترى وضعك أصعب مني
مو حلوه بالمجتمع عندها احفاد وتتطلق بعد ما طقها زوجها وطردها !
قاطعتها ام عمار بانفعال : انكتمي ولا كلمه !
روحي شوفي لك شايب تقبرينه ويكون الثالث !
ردت ساره بلامبالاه: تراه الشايب لك
مو لي !
تراني صغيره مو مثلك
قاطعتها جودي بغضب: تدرين إنك قليله حياء!
اصلا مين رح يطالع بوجهك بعد سواد وجهك !
الحمد لله ربنا خلص خالي عبدالله منك باللحظه الاخيره !
ساره بقرف : عاد من زين خالك !
ام عمار تقهرها أشرت لشروق : اجلسي يا شروق تراك حامل مو زين لك الوقفه!
حست ساره بطعنه بصدرها حضرته تزوج وزوجته حامل !
عايش حياته !
وهي رماها لكلام الناس إلي ما رحمتها !
جودي تغيضها : شوفي ربنا عوضه بالقمر !
ساره بطفش ناظرت ام عمار : وش المطلوب جايه لعندي ؟!
تبغين اتوسطلك عند خلف علشان يرجعك !
قاطعتها ام عمار بغضب وصوت مرتفع شوي: تخسين !
ناظرت ساره حولها وبعض الحريم يناظرون تكلمت وهي توقف : اجل بلاه هالتلزق تراك لو تموتين ما ارجعك خلف لذمته !
بسببك عاف الحريم،!
بصراحه معه حق !
وتركتهم وغادرت تبحث بعيونها عن اميره !....قهروها فوق ما ظلموها وطلقوها بدون ذنب ..ما تركوها بحالها !!....
**
***
***
***
**
رجعت جلست ام عمار وهي مفوره من العصبيه : الكلبه وصار لها لسان !
ام راكان تلوم فيها : قلت لك لا تروحين لها !
وش عليك فيها !
خلاص كل واحد راح بحال سبيله !!!
ام عمار بغضب : لا ما انتهينا !
أجل أنا أتلزق فيها علشان تتوسط لي عند خلف يرجعني ؟!!
نوره وهي تبحث بعيونها عن ساره : يا ابنة الحلال طنشيها !
الحين تلاقينها ميته بحرتها بعد ما طلقها عبدالله !
وخاصه انه طلقها بدون ذنب
جودي باعتراض :،كيف بدون ذنب والأوراق
قاطعتها نوره : تراه خالك طلقها قبل ما يدرون بسالفة الاوراق !
ام عمار بتأكيد : ايه لما طلقها عبدالله ما كنت مخبر أحد بسالفة الأوراق !
ام راكان : انا ما تهمني سالفة الأوراق الاهم عندي انه ولدي ترك هالبومه وانتهينا !
ابتسمت نوره على تفكير أم راكان !
وركزت نظرها على ساره إلي جالسه بهدوء وكأنها بعالم آخر !
ما انتبهت على سوالفهم وكان كل تركيزها على ملامح ساره !
سلطت انظارها على اميره إلي اقتربت من ساره
كلمتها وجلست عندها !
تكلمت نوره ونظرها ما زال مركز عليها : احس انها تغيرت كثير !
من اول الحفله والهدوء مخيم عليها
حتى شبح ابتسامه ما صدر منها
بالرغم انها اميره عندها تضحك وهي تكلمها !
ناظروا جهة ساره يراقبون ملامحها
إلي اكتساها الحزن !
ام راكان تنهدت بوجع : والله الواحد ما عاد يعرف الصح من الغلط !
والله إلي رفع السموات لولا حظها النحس
ما سمحت لعبدالله يطلقها !
طالعتها شروق وما عجبها كلامها
نوره رفعت حاجب : ومين قال لك انه عبدالله يقبل تكون على ذمته ؟!
ام راكان هزت راسها وبنفسها تقول «بلاك ما شفت شكله لما قال له ماجد يبغى يخطبها»
ام عمار : حتى لو عبدالله ما طلقها ابوي مستحيل يقبل تبقى على ذمة عبدالله !
نوره بتأكيد : عمي ابو راكان شجعه على الطلاق قبل ما يعرف بسالفه الاوراق!
ام راكان تنهدت : الله يهدي النفوس !!!!

***
**
**
***
***
وقفت برا مع اميره للرجوع واستغربت الضيق على وجه اميره وهي تتكلم بالجوال !
قفلت الخط وناظرت ساره : السواق يقول السياره
بنشر عجلها !
ساره بهدوء: والحين ؟!
اميره هزت كتوفها : والله ما أدري !
خليني أشوف سياره أجرة أو أي شيء !
وتركتها وراحت !
تنهدت بلامبالاه وتكتفت وهي تناظر للبعيد !
ما توقعت تشوفهم اليوم بالحفله ! تفاجأت بنظرات الحقد والكره منهم
كل هذا علشان الأوراق ؟!
للحين ما تدري وش سالفة هالاوراق إلي عملوا عليها بلبله وفضايح !!!
استغربت من الصوت إلي يكلمها !!
لحظه هالصوت تعرفه ؟!
كيف ما تعرفه وللحين صوته يرن بإذنها «انت طالق»
إلتفتت له وهي عابسه ملامحها
وش يبغى واقف عندها !!
عبدالله بسخريه : اووووه سوري ظنيتك شغاله هنا كنت ابغ
قطع كلامه لما تركته وابتعدت عنه !
تبعها ووقف وتكلم بجديه فيها نبره غاضبه : وش تعملين هنا وحدك ؟!!
طالعته بنظرات كره ...عمرها ما كرهت انسان مثله ...كل ذرة محبه حملتها له تحولت لكره !
والحين جاي يتدخل فيها ؟!
ردت بحده : ما يخصك !!
وانقلع من هنا قبل ما ألم عليك الناس !
عبدالله ضحك بسخريه : لا لا ما أصدق هذي ساره ؟!
الظاهر الدوره إلي سجلتي فيها استفدتي منها وصار لك لسان ؟!
او انكشفت حقيقتك !!
أعطاها نظرات ناريه لما شافها مطنشيته أكره ما عليه أحد يطنشه ..نطق بغضب : تراني اكلمك وش تعملين هنا ؟!
قاطعتهم اميره وهي تقترب وبضيق من رؤية عبدالله : ساره !
التفت عبدالله عليها وكلمها بإحترام يحس اميره غير عن إخوانها مثقفه ولا كأنها أخت لهم : هلا كيف حالك ؟!
اميره بهدوء : بخير الحمد لله !
وطالعت ساره : تعالي
وقفت سياره اجره !
قاطعها عبدالله بنخوه : والله ما تركبون سياره أجره وأنا موجود !
اميره طالعت ساره إلي عبست ملامحها : مشكور
ما نبغى نعطلك
والحين اسمح لنا !
عبدالله بحزم : تراني حلفت !
والله ما أرضى بنت العم تركب بسياره أجره وأنا موجود !
اميره انحرجت منه بس مستحيل تحرج ساره وهي تعرف الوضع : الله يجزيك الخير !
اعذرنا
قاطعها بحزم : قلت والله ما تركبون الا معي!
طالعته ساره بكره ابو النخوه
شهامته ما تسمح له ابنة عمه تركب سياره أجره !
اما هي سمح للي يسوى وما يسوى يتكلم عليها !
وطلقها بيوم الزواج!!
عمرها ما شافت انسان كذاب ومخادع مثله !
طالعت اميره : أنا راجعه بسياره الأجره !
وقفت بعد صرخته : انت ما تستحين على وجهك !
وقسم بالله احترام لاميره والا كان تصرفت معك
قاطعته بغضب : ومين حضرتك حتى تتصرف معي؟!!!
تراك آخذ بنفسك مقلب !
واذا فيك خير قرب من جهتي !
اعطته نظرة حقد وتوجهت للشارع الرئيسي وهي تحس بداخلها بركان وخلفها اميره
تحاول تجاري خطواتها السريعه !!
اول ما وقفت سياره أجره ركبت وجنبها اميره إلي اول ما ركبت ما قدرت تكتم ضحكتها : اخص يالقويه !
زفرت ساره بضيق : من جدك تبغين أركب معه ؟!
اميره بابتسامة : تبغين الصراحه اي!
بغيت تركبين وتمسحين فيه الارض
وتعطيه كم طراق يبرد حرتك فيه !
فتحت ساره عيونها باستنكار : اضربه !!
اميره بحماس : و اكسري رأسه بعد !
بس كخطوه أولى حلو إنك ما سكت له ولا لأهله !
خلاص انسي الماضي وعيشي يومك بدون حزن ونكد !
المشكلة اني مو مستقره هنا كان أخذتك عندي بس
قاطعتها ساره بهدوء : مرتاحه عند نادر !
**
**
**
**
**
جالس بالحديقة متربع على العشب وعابس ملامحه بغضب
تكلم وهو يشد على قبضة يده بقهر : انا تكسر كلامي ؟!
عزام وهو يشرب من العصير : يا عمي ترى ما لك كلمه عليها !
بس أنا مستغرب من كلامكم
معقول ساره إلي تتكلمون عنها ؟!!!
عبدالله هز رأسه بقهر : ايه ساره
اخخخ لو شفتها تناظرني وكأني اكلت حلالها !
يرحم ايام تخجل ترفع عيونها وتناظرني !
والحين تفرعنت !
حتى شروق كلمتني بالأمور إلي صارت بالحفله وكيف كلمت ام عمار !
تصدق تقول عني «من زيني؟!!» تتمسخر علي هالناقه ؟!
والله وصار لها لسان !!
وطلعت على حقيقتها !
وانا الغبي إلي اخترتها على اساس انها بسه مغمضه
طلعت لبوه أعوذ بالله منها هالناقه !!!
ضحك عزام وهو يناظره : الحين صارت ناقه ؟!
يرحم ايام زمان !
تنهد عبدالله بضيق : كنت مغفل !
عزام بهدوء : طلعها يا عمي من رأسك !
خلاص انت تزوجت وزوجتك حامل ما شاء الله عليها مو ناقصها شيء!
عبدالله تنرفز : شايفني طول وقتي افكر فيها ؟!
أصلا إذا موجوده بالعالم مو داري عنها !
وحتى موقف اليوم كلمتها حتى اقهرها وابرد حرتي فيها !
سكت للحظات وبعدها نطق بتردد : ما أدري أحسها حزينه والبشاشه والفرح إلي كان دائما مرسوم بملامحها انطفى !
وكأنه كل هموم الدنيا فوق رأسها ؟!!!
بس تدري أحسن تستاهل ...من هالحال وأردى إن شاء الله !
للحين ما طلعت حرتي فيها !
عزام بابتسامة جانبيه على عبدالله إلي للحين مشاعره متلخبطه
يحسه يحن لها وبنفس الوقت مو طايقها !
مشاعره متضاربه نحوها .......
***
***
***
***
كالعاده اذا كملت الواجبات المدرسيه
تجلس بالصاله وتطالع اي كتاب تقع يدها عليه
تحب المطالعه بمجالات مختلفه
والحين جالسه تطالع كتاب عن البلاغه
تنهدت عقلها مشوش من الخبر إلي سمعته !
كيف يسافر ويتركها بدون ما يرسل ورقة الطلاق ؟!
فاهمه حركته الانتقاميه يغيب كم سنه
وبعدها لما يرجع يطلقها !
بس مو فارقه معها اهم شيء دراستها ويبعد من وجهها !
متأكده من حركته هذي !
كل أوراقه مكشوفه بالنسبة لها!
جلست ام سعود عندها وتكلمت بضيق : ترى ابوك معصب بعد سفر ماجد !!
عائشه عقدت حواجبها وهي تقفل الكتاب : ليه معصب؟!!
ام سعود : يقول مو ولد عمك علشان يملك عليك وينقلع !
عائشه ببرود : ذيك المحكمه يروح ويطلقني واكون له من الشاكرين !
ام سعود بغيض من برودها : انتبهي تتكلمين كذا قدام أبوك تراه واصله معه !
وبعدين خطيبك منقلع كم سنه والله أعلم متى يرجع ؟!
تراني ما ارتاح للرجال إلي يسافرون برا !
عائشه بملل : يعني وش الحل ؟!
نركض خلفه ونرتجيه حتى ما يسافر ويرجع ؟!!!
وقفت ام سعود بغضب: يا برود أعصابك !
حتى ما كلف نفسه ييجي ويودعك قبل ما ينقلع !
على وش شايف نفسه ؟!
ما كذب أبوك ولا بكلمه لما كان يشكي منه !
صدق انه غثيث وما ينبلع !
ورافع خشومه بالسماء،!
لكن هين إذا ما فسخت هالخطوبه ما أكون ام سعود !
ابتسمت بفرح عائشه امها بصفها ضد ماجدوووووو !!!

***
***
***
استغربت من الدق على الباب بقوه
طالعت مها : مين يجينا هالحزه ؟!
مها بنفس الاستغراب : يمكن احد يبغى نادر !
روحي شوفي
هزت رأسها وطلعت وتوجهت للباب وفتحته وهي تقول : مين ؟!
بعد ما فتحت عفست ملامحها وش جابها الحين ؟!
وبدون نفس تكلمت : نعم ؟!!!
بغت تقول لها يا جعل النعامه ترفسك بس مسكت لسانها لآخر لحظه وبتمثيل متقن تكلمت بفزع : ساره إلحقيني
ساره حست قلبها وقع من طريقتها : وش فيه ؟!!!
ام محمد بفزع : ما في وقت تعالي بسرعه
اشرح لك على الطريق !
احتارت ساره بس طريقة خالتها دفعتها تدخل بسرعه تعطي مها خبر انها طالعه مع خالتها !
طلعت تفكر وش إلي صار و افزع خالتها بهذا الشكل ؟!
معقول ابو راكان اصابه شيء ؟!
او خلف او
مو قادره تسألها خايفه تسمع شيء
يكون القاضيه لانها تتوقع ما رح تقدر تستحمل صدمات اكثر من كذا !!!!
استغربت ساره لما وقفت السياره بمنطقه خاليه ناظرت خالتها بعدم فهم !!
ليه هي هنا ؟!!!
ام محمد بخبث : انزلي افهمك السالفه
واشرت على سياره وقفت خلفهم !
نزلت ساره لما شافت خالتها نزلت
عقدت حواجبها لما شافته نزل من السياره !!!
حست قلبها توقف وش جابه الحين ؟!!!
اقترب منهم بهدوء
ام محمد ناظرته : انا انتهت مهمتي
ما عندي وقت طيارتي ما بقى عليها شيء !!!
طالعتها بصدمه مو فاهمه شيء
تبغى تمسك خالتها وتوقفها كيف تتركها هنا وتغادر بكل بساطه !
وليه هي هنا ؟!
بس عجزت الحروف تطلع بحضوره !
ما تدري ليه لسانها ينعقد بوجوده !
تكلم بطيبه مو لايقه عليه ولا تناسبه : تعالي اركبي معي وأفهمك السالفه !
ما ترك لها المجال تعترض وسحبها معه للسياره !
حرك السياره وتكلم بهدوء لا يليق بشخصيته الهمجيه: أنا آسف
أدري وصلك أذى بسببي !
بس لا تتحسفي على ناس عاقبوك بذنب غيرك !
انا من بعد الحادثه انتقلت لقريه اعيش فيها بعيد عن شر عيال عمي !
خلاص نويت ابدأ حياه جديده
بعيده كل البعد عن النصب والاحتيال !
انا تعلمت درس من هالحياه !
نويت استقيم وأرجع كل حقوق الناس إلي أكلتها بدون حق
واولهم انت !!
طالعت الطريق وهي تستمع لكلامه إلي مو قادره تستوعبه !
اكمل برجاء : سامحيني يا ساره
ابغى اعيش وبالي مرتاح ما أحد زعلان علي !
ناظرته مو مصدقه خلف يتغير ؟!!!
وش صاير بالدنيا !
ما تدري رق قلبها غصب عنها !
بس اكتفت بالسكوت !
تابع كلامه : ابغى تسامحيني على شيء ثاني بعد ما اخبرك فيه !
ويا ليت ما تسودي وجهي !
تراني تكلمت بالنيابه عنك
طالعته مو فاهمه شيء !
استرق النظر لها يشوف رد فعلها لكلامه ورجع يركز على الطريق !
لما قارب على الوصول تكلم : بعد ما تبت وجيت هنا
وقررت أبعد عن أهلي وكل معارفي حتى ما أحد يعيرني بالماضي !
عشت براحه هنا من طيبة قلوب هالناس !
كان بالقرية رجال فاقد عقله يدور بالدنيا ما يدري عن نفسه ! يبغى احد يتحمله ويهتم فيه !
كسر خاطري هالرجال !
أمه وأبوه مو عايشين !
امه انجبته وهي كبيره بالعمر ولما ولدته اصابه نقص اكسجين
وطلع عقله ناقص
يعني بين قوسين «مجنون»
بس الشهاده لله تراه طيب وحبوب
بس عقله طاير !
ناظرته بعد ما وقف عند بيت متوسط الحال نطقت بعد ما شجعت نفسها : جايبني من البيت علشان تقول قصة حياته
قاطعها : جبتك لبيت زوجك !
طالعته بصدمه تحس نفسها بحلم
اكيد جالس يمزح معها !!
من بعد عبدالله عافت الرجال و الحياه كلها !
اكمل كلامه متجاهل ملامحها المصدومه : قلت لك كسر خاطري
وبلحظه تسرع كان اهل القريه مجتمعين قلت لهم
اني رح ازوجه لاختي على سنة الله ورسوله ونكسب فيه اجر
قاطعته بغضب لاول مره خلاص فاض المر على المرار وبصراخ : رجعني للبيت!
خلف احتد ملامحه بغضب : لا تتكلمي كذا احسن ما اعدل لك ملامحك !
تفهمين والالا !
والحين انزلي أحسن ما أجرك من شعرك !
ناظرته بتحدي غاضب : ما رح انزل
قطع كلامه وهو ينزل من السياره
ويفتح الباب من جهتها !
حست نفسها رح تعملها على نفسها لما فتح الباب من جهتها !
سحبها بقوه وهو يهمس بفحيح : لا تجبريني ادفنك هنا !
سحبها للبيت واول ما دخل نفضها بقوه : تراني زوجتك وانتهى الموضوع !
كوني هاديه ومطيعه حتى ما اطلع جنوني عليك
طالعته بكره دوبه يروي قصص عن توبته وانه تغير !
صدق المثل عمر الكلب ما انعدل ذيله !
عضت شفتها بقهر من الغباء المطقع إلي هي فيه !
بسرعه رق قلبها وصدقته !
لمتى يفهم قلبها انها هالدنيا ما فيها طيبه !!!
طالعها بأمر : الحين رتبي المكان وجهزي الاكل لزوجك
مسكين تراه داير على رأسه ما يدري عن نفسه !
ساره خلاص ما تقدر تتحمل اكثر من كذا
إلي تشوفه أكبر من طاقة تحملها !
يا شماتة الناس فيها !
تتزوج مجنون !!
غمضت عيونها بقهر وهي تتخيل شكل عبدالله لما يسمع انها تزوجت مجنون وش رد فعله !
هو تزوج مثقفه وحلوه وبنت حسب ونسب !
وهي تتزوج مجنون داير بالشوارع ما يدري عن هوى داره
وبكل غضب اجتمع بداخلها صرخت : مو على كيفك !!
اكيد عند هالمجنون كم ورثه تبغى تبلعهم !!!
خلف بهمس حاد : انكتمي !
وباستفزاز : ايه عنده ارض وابغى استثمرها !
وضحك بصوت عالي وهو يرسم احلام على ذي الارض !!!!!
***
***
***
***

مجتمعين بالمجلس بعد ما سمع عن المشكله و يبغى يصلح الوضع تكلم بهدوء بعد ما وضع فنجان القهوه،: انا دخلت عليكم وان شاء الله ما تردوني خايب !
ابو راكان باستغراب من طلب صديقه وش يبغى منهم : اشرب قهوتك وبإذن الله ما تطلع الا وإنت راضي !
ابو علي ناظر الموجودين : انا سمعت بالمشكله إلي حصلت بينكم !
ووصلني خبر من قريب انه عبدالله طلق زوجته لانه خلف طلق زوجته !
ترى الظلم ظلمات يوم القيامه ...البنت ما لها ذنب بأفعال اخوها وكلنا نعرف خلف وتصرفاته إلي تسود الوجه !
وكثير بنات بهذا المجتمع وقع عليهم الظلم من هذي الناحيه !
طلقت أختي اطلق أختك !
ضربت أختي اضرب أختك !
تصرفات جاهله وما تمد صله للعقل !!
طيب وش ذنب هالأخت؟!
كم حرمه بالمجتمع تطلقت لأنه أخوها طلق اخت زوجها !!!
هنا يقع الظلم ولا بد نرفعه !
وأنا الحين جاي علشان كذا !
أخت خلف ما لها علاقه بالموضوع ليه تتطلق ؟!!!
وتراها ابنة اخوك واكيد ما تقبل عليها الشينه !
ترى الناس ما رحمتها وحطت فيها الشينه !
اتمنى ما تردني يا ابو راكان وترجع هالبنت لذمة عبدالله !
ابو راكان رفض الفكره بطريقه ملتويه :،بس عبدالله تزوج وزوجته الحين حامل !!!
ابو علي ببساطه : وش فيها متزوج ؟!
تراه لا أول واحد ولا آخر واحد عنده زوجتين !!!
اهم شيء يعدل بينهم وانتهى الموضوع !!
ابو ماجد احتقن وجهه مو عاجبه هالكلام : ما اتوقع زوجته تقبل فيها !
ابو علي : من متى الحريم يشورون على الرجال متى ما بغى يتزوج !!!
ابو ماجد اعطى لعبدالله اشاره بعيونه ينهي هالموضوع !
ابو علي ناظر عبدالله بجديه : وش قلت يا عبدالله !
تراها ابنة عمك وانت اولى فيها !
واذا ارجعتها تكف ألسنة الناس عنها !!
دخل وهو يسمع حديثهم ورد السلام بصوت مسموع : السلام عليكم !
سلم على ابو علي وتوجه وجلس جنب ابوه بهدوء ينقل لهم الخبر إلي سمعهم قبل لحظات !!
ابو علي متحمس للصلح : نقول على بركة الله ونرجع البنت لذمتك !
نطق عزام وهو يناظر ابو علي باحترام : جيت متأخر يا عم !
طالعه ابو علي والموجودين بعدم فهم !!
كمل كلامه بهدوء،: تراها البنت تزوجت والبارحه كانت ملكتها !!!!
عم المجلس الصدمه من الخبر !!!
ابو راكان واثار الصدمه مرسومه على ملامحه : تزوجت ؟!
ومن إلي تزوجها ؟!
عزام هز رأسه بالنفي : والله ما ادري بس جدتي اتصلت بعمي ابو الوليد وخبرته !!!
تكلم ابو علي باحراج جاي يرجع البنت وهي متزوجه على ذمة رجال ثاني : الله يوفقها .....واسمحوا لي !
ابو راكان : وين مستعجل
قاطعه ابو علي وهو يهم بالمغادره : عندي شغل لفوق رأسي
مره ثانيه ان شاء الله !
استاذن وطلع !!!
دقائق وعم المكان من ضحكات سلمان المرتفعه : جاي يرجعها !!!
وانسدح على بطنه من الضحك !
ابو راكان طالعه وهو عافس ملامحه : الحمد لله والشكر على نعمة العقل ؟!
على وش يضحك هالغبي !
ابو ماجد بقهر : صار مزوجها هالحيوان !
الله اعلم كم بلع من هالمهر !
ابو عزام بهدوء : وش علينا منهم ؟!
يزوجها يطلقها بستين داهيه !
ابو تالا بقهر : نفسي هالخلف ادوسه تحت رجليني !
طالعه عبدالله بنظرات وكأنه يقول له ما كذبت خالتي لما قالت انك تبغاها !!
وقف ابو تالا بعد نظرات عبدالله وطلع من المجلس،!
ابو ماجد بغبن من عبدالله : وانت ساكت والرجال يتكلم !
بدل ما تقول ما أبغاها وتسكته أشوفك سكتت
وكأنه كلامه جاز لك !
عبدالله وملامحه منتفخه من الغضب : ايه جازت لي وما احد يتدخل بحياتي !
وتركهم وطلع !
ابو ماجد بغضب : انا رح يقهرني هالولد بالغباء إلي معشش بعقله !
متأكد لو يقول له خلف تعال تزوجها الا يركض ويبيعنا كلنا !
ابو راكان بهدوء : اتركه !
رد فعله عادي ..اي واحد لما يسمع انه زوجته تزوجت يصيبه كذا !
خلاص قفل على الموضوع !
وانتهينااااااا
***
***
***