رواية اقدار الفصل العشرون 20 - بقلم امي احمد

"مع مرور الزمن ندرك أن خروج بعض البشر من حياتنا كان نعمة من الله عز وجل، وليس نقمة كما كنا نتصور"
**
**
**
**

تنهدت بضيق ام راكان والغصه بحلقها
والدموع تنذر بالنزول : تعالي يمه عند الحريم !
هزت رأسها بدون نفس بس وقفها الكلام : أنا أبغى ساره تجلس عندي
وبعدين تروح عند الحريم !
زمان ما شفتها !
ام راكان عفست ملامحها ما لها خلقه : سلمان لو تنكتم يكون أفضل
تعالي يا ساره ندخل للحريم !
ام محمد طالعت ساره بتعليم : لا تفشلينا
عند الحريم
قطعت كلامها بفشيله وهي تشوف ساره تركتها وراحت للداخل مو معبره كلامها !
لحقتها وقلبها نار بعد ما شافت ماجد وسلمان إلي كتموا ضحكتهم !
ابو الوليد وهو يرتشف من فنجان القهوة براحه : يا حلاة الصلح !
»«»
«»«
«»«
'»«
دخلت وسلمت على الحريم بهدوء
وطنشت بعض النظرات
متأكده وجودها ما هو مرحب فيه
جلست عند ام خالد بملل !
ام راكان بابتسامه للتوأم : تعالي إلعبي انت وأختك مع البزران
وأشرت على صاله صغيره كلها بزران يلعبون !
سرعان ما ارتفعت أنظار التوأم لساره
وكأنهم يسألونها عن رأيها
اعطتهم نظره بمعنى لا !
دخلت أسيل ما كانت موجوده لما دخلت ساره : هلا والله بخالتي سوير !
وقفت أمامها تسلم
مدت ساره يدها وهي جالسه
سرعان ما سحبتها اسيل : ايوه كذا وقفي!
اسيل بمرح : لو تركتك جالسه أفضل
رقبتي عورتني وأنا أطالع لفوق !
تابعت أسيل كلامها بابتسامة : يا عيني ذول بناتك ؟!
وبحركه سريعه بعثرت شعر التوأم : ليه الكشره يا حلوات !
سوار بانزعاج وهي تعدل شعرها بيدينها الصغيره وبدلع : ماما شوفيها !
خربطت شعراتي!
اسيل تبغى تعضها :تجنننن
أبغى اعضها !
أم راكان سحبت أسيل : اتركي البنات واجلسي !
رجعت جلست ساره مكانها وتسمع لأم خالد إلي تكلمها بصوت أقرب للهمس !
شروق همست لنوره وهي ماسكه نفسها والغيره ذابحيتها : أكيد شافها !
وش أعمل يا نوره أحلى مني بكثير !
اخخخ يا قهري !
بموت يا نوره لو عرفت إنه ناظرها حتى لو لمحه !
نوره بذات الهمس لكن بنبره واثقه هاديه : انت ليه ما تسمعين الكلام !
الجمال مو كل شيء بالزواج !
وانت ما شاء الله عليك !
خليك واثقه من نفسك ..شوفيها
حتى ما كلفت نفسها تناظرك
الوضع عادي عندها
بالرغم إنك أخذت خطيبها منها !
لو وحده ثانيه كانت عملت عمايلها!
شوفيها مو مهتمه لك أبدا !
الظاهر اهتمامها منحصر في بناتها
حتى سمعت انها متعلقه بالمجنون بشكل جنوني !
ورفضت الطلاق واضطرت تسكن عند عمار حتى ما يرفع قضيه طلاق !
ارتاحي من جهة ساره لأني متأكده
مو داريه عن هوى داره !
تنهدت شروق : إن شاء الله كلامك يكون مضبوط وما ترجع تلفت انتباه عبدالله !
نوره مسكت يدها وشدت عليها : انتبهي على زوجك وعيالك ولا تخلين
أي شيء تافه يخرب بيتك !
ولما ترجعين لجناحك ما تفتحين مع عبدالله سيرتها نهائيا !
لا تضعفي وانت طول وقتك محاضرات للناس عن الثقه وتطوير الذات
وعند أول لقاء تضعفين !
شروق هزت رأسها : إن شاء الله !
~
~
قريب من نوره وأختها  ..كانت جالسه ... وتناظر ساره بكره
وتضرب أخماس بأسداس !
وش رح تعمل لو فكر أبو تالا يرجع يخطبها !
طردت الفكره وهي تونس عمرها
تراها متزوجه متزوجه !
~
~
جودي همست لأختها : رافعه خشومها للسماء !
ليان بتأييد : صادقه ما أدري على وش شايفه نفسها !
جودي : شفت كيف سلمت علينا وعلى أمي ؟!
ليان مطت شفتها بترفع : إحترام للموجودين
والا كان تصرفت معها تصرف ثاني !
جودي : حزنت على عمار وهو يطلب مني ما أعمل مشاكل ويمشي الصلح على خير !
وبجديه اكبر اقتربت من اختها : تدرين ابغى اقول لعمار يسألها
وش الدايت إلي تعمله !
ليان هزت رأسها بتأييد : يا ليت والله
شوفي كرشتي ما هي راضيه تختفي من بعد الولاده !
جودي تأففت بقرف : اففف من الحمل والولاده
تخريب للجسم !
شوفي جدتي ام راكان كيف تكلم ساره ومهتمه فيها وكأنها كائن فضائي نازل من السماء وأول مره تشوفها !
ليان ابتسمت على جنب : شوفي نظرات جدتي ام محمد
شوي تقوم وتأكل ساره !
جودي رفعت حاجب : شوفي زوجة عمي محمد للحين مهتمه بنفسها !
امي تقول جايه تتشمت فيها !،
ليان بحق: امي من يومها ما تحبها
مع إني ما شفت منها شيء
ابتسمت جودي بنعومه : تتوقعين وش رد فعل خالي عبدالله بعد ما شافها ؟!!
ليان : شوفي وجه شروق كيف مخطوف
وتهمس لنوره من قهرها من لما شافت ساره !
جودي بهمس وهي تترقب ما تبغى أحد يسمعها : اقولك بيني وبينك
تستاهل هالشروق
أحسها رافعه خشومها إنها شيء كثير !
تذكرين لما كنت أنا وانت بالجامعه كيف كانت ؟!
ليان بتأييد : كل بنات خالي ابو الوليد مغرورات ونافشات ريشهم !
نوره تبط كبدي وكأنه ما في احد بالعالم بجمالها !
وإلي بط كبدي حضرت عزام لبسها نقاب حتى ما أحد يشوف جمالها من الرجال !،
يغار عليها !
مالت عليه !
جودي : حتى أم ماجد مع انها حرمه كبيره
بس شايفه نفسها كثير !،
وتقهرني لما تجلس تثني على خطيبة ماجد !
إلهي خطيبة ماجد تحط المر بحلقهم !
يقهروني وكأنه ما احد ذكي ودرس تخصصات الطب غيرهم !
وبقهر الله يسامحك يبه
قاطعتها ليان بحقد : الله لا يسامحه
جودي بضيق : والله تصدف أبغى ادعي عليه بس أتراجع أخاف من الاثم
وأتذكر إنه أبوي !
حرمنا من كل شيء حلو بصغرنا
اليتيم كان حاله أفضل من حالنا !.
سكتت وهي تشوف ساره وقفت
**
**
***
**
وقفت بعبوس مع ام خالد !
ام الوليد بإعتراض : وين رايحه
دوبك جيتي !
ام خالد باعتذار : البنات مو متعودات على السهر !
واشرت على التوأم !
ام راكان : بس
ام محمد بكره : ابوك يالكذب
طول الليل ما ارقد من التوآم
للساعه 2 حتى يندفس
ام وليد قاطعتها حتى ما تصير مشاكل : على راحتكم !
ولا تنسوا العشاء باكر !
ام خالد بابتسامة : إن شاء الله
~~
~~
~~
«ساره»
طلعت وانا أشوف نظرات التوأم على البزران
جربت الطفوله واحساس الصداقه واللعب
مزروع بداخل الأطفال
ومشاركه اللعب مع البزران إلي بعمرهم !
أحس بتأنيب الضمير تجاه التوأم
بمنعهم من الاختلاط بأحد !
خاصة ذول البزران ما أبغى التوأم يختلطون فيهم !
صحيح وافقت على الصلح
لأسباب عده
وبنفس الوقت رح يكون مجرد صلح
سطحي
سلام من بعيد وانتهينا !
خلاص الزمن تغير عندي هدف اكمل دراستي
وألاقي خلف !
زفرت بقهر من ذكرى خلف !
ما أدري لمتى أشباح الماضي تلاحقني ؟!!
ما أدري قلبي ما حن لأيام عمي أبو راكان !
ما توقعت قلبي حقود واسود لهذي الدرجه ؟!
ما أدري كلما بغى قلبي يحن له
يتصور قدامي موقفه لما طردني ورماني للخارج وزوج عبدالله....بدون ما يكترث لمشاعري !
تعرضت لمواقف كثيره بحياتي
خلتني اكره حياتي وكل من حولي !
ما أشوف شيء بالحياه جميل !
قلبي الميت ما أدري رح يحيى من جديد ؟!!!
مستحيل اسامح كل من شارك بدفن قلبي بعز شبابه !
**
***
***
***
مرحبا انا اسمي عائشه !!!
ادري انكم تعرفوني بس اتغشمر ><
ذكرت اسمي اخاف نسيتوني بعد تحيز الكاتبه لبعض الشخصيات
والظاهر نسيتني !
ما علينا من هالسيره !
احس بهموم الكون فوق رأسي بعد رجوع ماجد !
طول الفتره إلي مضت وأنا حياتي ما فيها أحداث تذكر نفس الروتين
انسانه منهمكه بالدراسه والتفوق
وحصول أعلى الدرجات !
وإذا عندي خطيب ما ادري عنه < يقال ثقيله
خايفه من اللقاء !
بابا يقول إنه اليوم يبغى يزورني ماجد !
الله يستر من هالزياره !
مشكلتي لما أشوفه ما أقدر أمسك أعصابي !
أدري ذاك الوقت لما خطبني كنت صغيره ومراهقه
اما الحين أنا كبيره وفاهمه إني يمكن غلطت بإسلوبي بالتعامل معه من البدايه !
بس هو بعد يرفع الضغط !
معقول تغير وصار إنسان راكز وعاقل ؟!
زفرت بضيق وش أبغى بعقله وركازته
الاهم وش يبغى مني ؟؟؟؟؟
ما أبغى أي توقعات لأني
_ عائشه ماجد وصل !
احس دقات قلبي وصلت للالف وكأني رح أقابل شخص أول مره أشوفه بحياتي!!
حاولت أهدي دقات قلبي ورديت على ماما : هذا أنا جايه !
طالعت نفسي بالمرايه عدلت الشيله مضبوط !
لا تناظروني كذا !
أدري إنه خطيبي بس أنا للحين مصره ما أتكشف عنده حتى أتأكد من وضعنا المتأرجح !
أخذت نفس عميق وطلعت من الغرفه
وأنا حاطه يدي على قلبي إلي يدق بقوه !
طرقت الباب بهدوء يقال إني ذربه !
وفتحته بهدوء وأنا ارد السلام وللحين قلبي يدق حشى وكأنه يشتغل طقاقه !
المهم ما عليكم من قلبي !
رفعت نظري أتأكد وأنا أسمع الصوت الرجولي البحت يمكن إني مخربطه
واو هذا بعلي ما أصدق !
متغير كثير كثير !
لحظه !
لحظه!
لا تصدقون حسبي الله على عدوه
وكأنه متعمد يقهرني بالسلسه إلي برقبته !
والسيجاره بيده !
وشعره للحين مسكين صايبه إلتماس كهربائي !
رد السلام بروقان بعد ما شفط نفس من السم إلي معه : هلا وعليكم السلام !
جلست مقابل له وما سلمت عليه باليد
بصراحه استحيت أسلم عليه وبابتسامه مجامله والا لو يطلع بيدي من شوشته رميته خارج البيت : كيف حالك ؟!
اعتدل بجلسته وطالعني بتقييم : انت للحين تلبسين شيله ؟!
اخاف مزوجيني صلعه ؟!!
ناظرته وفتحت عيوني باستنكار يقول عني صلعه !
مالت عليك يا أبو كشه !
تابع كلامه لما ما شاف مني رد : وإلا بعدك على أفكارك تنتظرين ورقه الطلاق ؟!
طالعني يشوف رد فعلي بعد كلامه
بس تظاهرت بالبرود وأنا انتظر يمد لي بورقة الطلاق !
يقال ميته عليه بقلعته أصلا يوم المنى يطلقني وارتاح من خشته !
تابع كلامه بتعالي : اسمعي يا
سكت والظاهر يحاول يتذكر اسمي : تدرين نسيت اسمك ؟!
عالية ؟؟!
وطالعني أصحح له إذا اسمي كذا أو لا !
مسكت نفسي ورديت ببرود : ايه عالية !
طالعني باستنكار : متى غيرت اسمك ؟
اذكر اسمك عائشه !
يا عالم شفتم اوقح من كذا ؟؟؟!
رديت بهدوء وللحين ماسكه نفسي : دامك تعرف اسم
قاطعني وحسسني بسخافة كلامي : ما علينا !
جيت هنا أخبرك عن موعد الزواج !
بعد الامتحانات
وبعدها وقف : اذا احتجت شيء كلمي أمي لأني مشغول وماني فاضي !
لا لا يا شيخ تراني أموت حتى أكلمك !
مسكت نفسي للأخير ...قبل ما اتفل بوجهه وما رديت لأني ما أضمن نفسي !
متأكده خلفه شيء ...كان مصر على الطلاق !
والحين جاي يتمم الزواج !
معقول يبغى يطلقني يوم الزواج ؟!
ما استبعد عنه شيء
عمه عملها من قبل طلق ابنة عمه يوم الزواج وما اهتم إنها ابنة عمه
كيف حالي أنا الغريبه وما رح يهمه أمري !!
ما أدري وش الحل ؟!!
كيف أتصرف وأنا مكبله؟!
بابا مستحيل يبقبل بالطلاق بعد طول هالسنين !
ضاق صدري بزياده !
يا ليته ما جاء ولا شفته !
ما لي إلا الاستغفار
«استغفرالله العظيم و اتوب إليه »
***
***
***
***
***
ام راكان بوجع :،شفت يا ابو راكان كيف جارت السنين على ساره !
حسبي الله على خلف كيف ضيعها !
قلبي قطعني وأنا اشوف النحف إلي وصلت له !!
تتذكر يا ابو راكان خدودها
قاطعها ابو راكان بنفس نبره الوجع : شفت يا ام راكان !
ام راكان بنبره حزينه : طالبك يا أبو راكان ترجع مثل قبل لها وتهتم فيها
وعوضها عن الحرمان إلي تذوقته!
تراها كانت تحبك
قاطعها بعد ما  مط شفته بسخريه:
تحبني ؟؟!!!
علامك ما شفتي نظراتها لي !
وكأني أكلت حلالها !
ام راكان بتحليل : وكاد إنها مظلومه !
من الكلام إلي قالته يدل إنها مظلومه ؟!
المفروض يا ابو راكان تأكدت من سالفة الأوراق قبل ما تظلمها !
أبو راكان بهدوء : خلاص إلي فات مات !
والحين ما عادت صغيره نطبطب على ظهرها !
وأنا عندي عيالي وما أقدر ارجعها هنا واخرب بيت عبدالله من هنا !
انت ما شفت نظرات شروق كيف كانت لعبدالله بعد ما دخلنا !
تراها غيوره وما نبغى مشاكل !
وأخاف ابو تالا يرجع يطنطن حولها !
لأني مستحيل أقبل ... أول مره سكتت لأنه ما عنده عيال !
لكن الحين خلاص ما له حجه !
ام راكان طالعته : تراها متزوجه !
ابو راكان تنرفز : اي زواج ؟!
انا طلبت من محمد يطلقها بآسرع وقت مو ناقصنا كلام !
والحين قفلي السالفه
وأشر بعيونه على عبدالله المتوجه لهم !
**
**
**
**
في بيت عمار بالصاله
سلمان بمرح : ما هقيتها منك يا ساره !
عبد الرحمن وهو يكتم ضحكته : شوف كيف تناظرك بحقد وأشر على سوار !
ساره مسحت على شعر سوار : سوار روحي عند حور إلعبي هناك !
سوار بطفوله قبل ما تروح : ماما ما ابغى اتزوج هذا
ابغى اتزوج هذا
واشرت على عمار لما دخل البيت !
انسدح سلمان من الضحك على أسلوب سوار وعلى شكل عمار المنحرج !
عمار ابتسم بحرج واقترب وقرصها بخدها قبل ما يجلس : راحت عليك يا حلوه باكر ملكتي !
ساره طالعت سوار بحده : انا وش قلت هذا الكلام عيب !
سوار عبست ملامحها وتركتهم وراحت تلعب !
عبدالرحمن : الاخت مو عاجبها كلامك !
حرام تحرميها من الزواج !.
وبمرح : اين حقوق الاطفال ؟!!
سلمان يصطنع الجديه : الحين لما تكبر هالسوار وتبغين تزوجينها
مين ولي امر ؟!
كونه أبوها مجنون !
طالعته ساره كلامه مثل إلي يحط ملح على الجرح !!
عبدالرحمن : اكيد لهم اعمام !
صح ساره ؟!!!
طالعته ساره لثواني وردت بحده : ما يخصك موضوع البنات انشغل بنفسك وانتهينا !
طالعوا بعض باستغراب من رد فعلها !
ام محمد جالسه وتناظرهم بهدوء بعد كلام ساره تكلمت : الله يستر علينا
الله اعلم وش مخبيه
كلما نجيب سيرة مجنونك أو نادر وخلف ومها ينقلب وجهك !
انا الحين ابغى أعرف ولدي نادر كيف مات ؟!
اذكر حرمته حامل وين راح ضناه ؟!!
والزفته مها وين طست واختفت ؟!!
ليه ما تجاوبين على ذي الأسئله ؟!!!
ساره طالعتها بسخريه: انتظري أجيب لك ثوب القاضي حتى تكتمل المحاكمه والتحقيق، !
ضحك سلمان وهو يضرب كفه بكف عبدالرحمن : حلوه هذي !
انا ابغى اكون المحامي لساره !
ام محمد اغتاضت من سخريتهم : سلمان يا زفته تتمسخر علي !
لكن انا اعرف أتصرف معك يا ساره اذا ما رحت للمحكمه ورفعت عليك قضية سرقه واختطاف لولد نادر
قاطعتها ساره بلامبالاه : ذيك المحكمه روحي لها
تراهم جالسين ينتظرونك !
وضربت جبهتها بتمثيل ساخر : اوووووه المحكمه غيروا مكانها
تعرفين دوار «.......» تلاقينها هناك !
وإذا تبغين أجره الطريق أنا أعطيك الاجره صدقه لوجه الله !
ام محمد احتقن وجهها من الغضب : أنا أنا أم محمد انت المنتفه تتصدقين علي ؟!!
لكن العتب مو عليك العتب على أحفادي إلي يسمعون إهانتي وساكتين !
عمار كتم ضحكته وتكلم بجديه : مجهزه نفسك يا جدتي للعزيمه اليوم ؟!!
ام محمد بغضب : انت انكتم ما ابغى اسمع صوتك
واقف بصف هالكلبه !
وبنبره حزينه تابعت الموال : وأنا الضعيفه ما لي لا ولد ولا بنت ولا زوج يجلسون عندي ويدافعون عني !
والحين تدافع عن هذي ؟ !!
وقفت ساره وهمت بالمغادره بضجر : بدأت موشحات الكذب والدجل !
***
***
**
***
بمكتب نائب المدير
عبدالله بضجر من وليد : وبعدين معك ؟!!
قسم بالله انكم ترفعون الضغط !
الكل يسأل نفس السؤال ؟!!
وليد مط شفته بإحباط : علامك عصبت كذا !
تدري أفكر اخصم الربع من راتبك على أسلوبك الخايس معي !
عبدالله ابتسم بدون نفس : تبغى تذلني لأنك نائب المدير ؟!!!
الحين اروح لخالي وأخبره بسوالفك الماصخه !
وليد وذبحه الفضول : يا اخي وش يضرك لو تقول وش احساسك لما شفتها !
عبدالله رفع حاجب بتشكيك : ترى اخبارك وصلتني ماجد يقول إنك راسم عليها
قاطعه وليد بنفي : أنا ؟!
ترى هالماجد كذاب !
ما ادري من وين يجيب الكلام ؟!
لكن دواه عندي !
بس انا للحين ماني مصدق إنها نفسها إلي كانت تشتغل عندنا !
عبدالله تنهد بضيق : احس بتأنيب الضمير ما ادري
كلمتها
«حق المظلوم»
ترن بإذني أخاف أكون ظلمتها ويأخذ ربي حقها من عيالي !
وليد بجديه تكلم : اسمع يا عبدالله
ايام راحت وهذي مجرد سوالف مزح
إلي قاعد اكلمك فيها !
لكن لو نويت مجرد نيه
تجرح شروق بكلمه أو ب
قاطعه عبدالله بقرف : يا حبك للفلسفه !
وليد كمل بدون اهتمام لكلامه : أنا وأبوي وسعود ما رح نسكت لك !
وإذا فكرت ترجعها لذمتك تأكد وقتها ترسل ورقةالطلاق لشروق !
عبدالله عقد جواجبه بنرفزه :اشوفك تهدد ؟!!
وليد بحزم : اعتبره مثل ما تبغى!
وقف عبدالله بعد ما مط شفته بسخريه : يقال إني خفت !
تحرك خارج المكتب وهو يحس نفسه مكبل ...ومشاعره وكل شيء بداخله مخربط وما هو قادر يرسي على بر..يظهر اللامبالاة ومن داخله في شعور بأقصى جهده يحاول يطمسه!!!
**
**
**
**
**
ابو سعود وهو كاتم غضبه للحين : كيف ما تبغين تزوجينها ؟!
ام سعود بحده : سالفه نهى واسماء ماني مستعده اكررها مع عائشة !
تراه الكتاب باين من عنوانه !
انا مو مرتاحه لماجد ابدا !
وش يضمن يتزوجها اسبوع وينقلع يسافر ويتركها سنين ؟!
قاطعها بتحقير لكلامها : تظنين الدنيا سايبه ؟!
كيف يتركها ويسافر؟!
وبعدين ابو ماجد قال انه خلاص استقر هنا !
ام سعود بنبره حاقده : يا كرهي لابو ماجد !
يشور ويمون علينا وما تقدر تفتح
حلقك بكلمه قدامه !!
الله يأخذ الفلوس إلي تذلنا !
ابو سعود بدأ يفقد اعصابه : اقصري الشر !
وخلي عائشه تجهز للزواج بدون شوشره لأنها
خلاص واصله لطرف خشمي !
ام سعود بقهر : والله ؟!
ابو سعود بتهديد : حطيها حلقه بإذنك
عائشه تتطلق من هنا صدقيني الا
قاطعته  عائشه وهي كاتمه قهرها وتتظاهر بالهدوء
ما تبغى يخرب بيت أهلها بسببها: صلوا على النبي !
يا ماما خلاص أنا ما أبغى اتطلق
لا تنسي كلام الناس ما يرحم
بابا استانس بكلامي : شفتي ابنتك اعقل منك !
الله يتمم عليك عقلك يا ابنتي !
ابتسمت مجامله وبداخلي أبغى أصرخ
انت خليت فيها عقل ؟!
**
**
**
***

مرت الايام وسافر محمد وعياله
والايام نفس الروتين
ما زالت العلاقه سطيحه بيني وبين بيت عمي أبو راكان
اجتمع وألتقي فيهم بس بدون احتكاك او نبش صفحات الماضي !
طلعت للحديقه وجلست بهدوء اطقطق بجوالي
رفعت نظري بدون ما أحرك رأسي
وأنا أشوف سعود يوزع على البزران مشتريات من البقاله !
مسكين لو ظن انه البنات يكسرون كلمتي ويأخذون منه !
نبهت على بناتي ما يأخذون من أحد شيء باستثناء عمار بس !
شفت نظراته الحاده علي لأنه يعرف إني مانعهم !
ما أنكر انه سعود ووليد
يعاملون التوأم مثل باقي البزران
بس أبو الوليد احسه مو بالعني وما هو طايقني !
بقلعته !
ما ادري وش السبب يمكن من حش خالتي ام محمد فيني !
ما تركت شيء شين إلا حطته فيني !
او الظاهر خايف أسرق اوراق أو شيء منه !
وإلي زاد الطين بله شروق لما تيجي تبكي عنده
خايفه على زوجها مني !
أو يمكن خايف اسرق قلب واحد من عياله !
يا سخف عقله !
يظن إني اطالع وليد الملقوف وإلا الجماد سعود !
احسه مثل ابوه يطالعني بنظرات كره بالبدايه استغربت !
مع الايام عرفت السبب
طلع الاخ ما يطيق احد من إخواني
وأنا من ضمنهم طبعا !
يقال ميتين عليه !
مطيت شفتي بقرف..مالت عليه هالمعقد!!
افففف قرب الدوام
وزواج ماجد هذا الاسبوع !
المفروض يكون قبل من كذا
بس ما أدري وش صار بالضبط
حتى تأجل لهذا الوقت !
وخاصه ما بقى وقت على الدوام !
تنهدت وانا اردد بداخلي
«عائشه»
صديقة الطفوله. !
ابتسمت لا شعوريا وأنا أتخيل شكلها
بأيام الطفوله !
ما تقدر تتذكر صورتها بالضبط ...
وش حالها الحين ؟!
معقول تغيرت ؟!!
كيف شكلها ؟!
بعدها حلوه ومزيونه ؟!
والأهم من ذاك معقول للحين
«تتذكرني»
زفرت بإحباط اكيد نسيت كل طفولتنا
ضحكنا ولعبنا أيام مرت بسرعه !
رح تبقى ذكريات بعقلي مستحيل انساها !!!
قطعت سرحان سوار وهي ماده بوزها بضيق: ماما !
طالعتها بعد ما مسحت على شعرها بحنيه : نعم !
جلست جنبي متربعه مثل الكبار : ماما ليه ترفضين نأخذ من العم سعود ووليد ؟!
كل البزران يأخذون !
ليه حنا لا ؟!
تنهدت بضيق الزمن يعيد نفسه : يا ماما حنا مو فقراء نأخذ من الناس !
خزانتك كلها أشياء لذيذه
مو بحاجه صدقه من احد !
سوار هزت رأسها بعدم رضى وراحت تركض تكمل لعب مع البزران !
ناظرت بشبح ابتسامه وانا اشوف ندى وحموده عيال عبدالله
سبحان الله إلي كتب لكل واحد طريق !
ومرت الايام
وعيالنا الحين يلعبون مع بعض !
احيانا أمنع التوأم من اللعب معهم .. وأحياناً اتساهل ما ابغى أضيق على التوام ويتعقدون !
**
**
**
**
دخل وهو متجهم وجلس بعد ما زفر بقهر من ساره
ام وليد عقدت حواجبها : وش فيك يمه ؟!
سعود بقهر : انا ما يقهرني الا الزفته اخت الزفت !
عامله حالها نفسها عزيزه
وأخوها النصاب والمتسول ما تركوا أحد بحاله !
ام وليد تخفف من حدته تعرف ولدها لما يعصب : هدي يمه !
وش تبغى فيها ؟!!
سعود زم شفته بقهر: يكسر خاطري هالبنات لما أعطي البزران أشياء من البقاله
ويناظرون ونفسهم بهذا الشيء!
ذول أطفال حرام تعمل كذا !
لو تشوفي نظراتهم يمه تنقهرين من هالزفته !
ام وليد بترقيع :،يا يمه انسى هي طبعها
كذا !
خلينا الحين فيك !
متى اشوف عيالك يا يمه ؟!
وتوزع عليهم مع البزران !
سعود هز راسه بحيره : ما أدري يمه !
ام وليد بإقناع : بزواج ماجد
رح نبحث لك وحده مزيونه وإن شاء الله تعجبك !
سعود هز رأسه : يصير خير !
مع اني ماني متحمس للسالفه
أبغى اختار بنفسي زوجتي !
ام الوليد : يا يمه كثير بنات محترمات
ومؤدبات مو كل أصابع يدك واحد !
سعود هز رأسه بتفهم : من الحين يمه أقولك أبغاها لما تطلع ما يبان منها شيء
حتى لو ظفرها !
ام وليد رفعت حاجب ما عجبها كلامه : يا يمه هذي أخواتك كاشفات والكل يمدح بأخلاقهم!
اعمل مثل عزام بعد ما تزوجها طلب منها
سعود بعدم اقتناع : يا يمه مثل ما قلت لك !
ابغى الكل يمدح بأخلاقها !
والاهم عمرها فوق 23
ام وليد بحماس : ان شاء الله يمه
الحمد لله مو طالع لعزام ووليد يحطون شروط تعجيزيه !
تدري متحمسه اخطب لك
الله اعلم من صاحبة النصيب إلي حتشوفها
للمره الاولى !
لا تعمل مثل وليد اول عروس شافها طق الميانه معها
ولما طلعنا قال الله يوفقها مع غيري !
سعود عبس ملامحه بجمود : تشوفيني مثل الوليد ؟!
ام الوليد ضحكت : في هذي صدقت
وليد ما شاء الله مرح مع الكل
اما انت الله يهداك ما ينمزح معك
كل شيء عندك جد !
**
**
**
**
ام ماجد بحماس للتجهيزات قفلت الخط وطالعت أم راكان : باكر راما توصل إن شاء الله !
ما بغى زوجها يجيبها !
ام راكان مطت شفتها : من لما تزوجت ما شفتها الا كم مره !
وش هالزوج المتحكم؟!!
الله يسامحك يا عزام !
طالعتها نوره بمعنى «خير»
انقلب وجه أم راكان ما كانت منتبه لوجود نوره !
ام ماجد ما قدرت تعلق راما ابنتها ونوره اختها !
صحيح كانت تتمنى عزام يخطب راما
ولمحت قدام أم عزام بدون فائده !
ما تنكر زوج راما طيب مع ابنتها
بس ذابحيتها الغربه ما تشوفها إلا بالمناسبات !
نوره للحين وجهها منتفخ !
ام راكان بترقيع : علامك قلبتي كذا !
الله يسامح عزام مدح زوجها
وطلع ما هو كفو !
ابتسمت ام ماجد على الترقيعه
وطالعت نوره تغير الموضوع: وش صار على فستانك ؟!!
نوره بدون نفس :باكر ان شاء الله يكون جاهز !
ام راكان وقفت ببطئ لكبر سنها : اروح اشوف ساره واطمئن عليها
واجلس مع اختي وأم الوليد
الحين ألقاهم جالسات بالحديقه
يا زين الجلسه برا !
مين ترافقني ؟!
نوره بدون نفس : اذا سوير ما هي جالسه
اتصلي فيني !
ام راكان طالعتها : الله يهديك يا نوره !
نوره عفست ملامحها بقرف : ما ادري طول وقتها تتميلح عند أمي
الظاهر ترسم على إخواني !
هذي الأشكال ينخاف منها
قطعت كلامها بعد صرخته : نوره !
طالعته وهي رافعه حاجب :نعم !
تقدم منها ورفع يده بتهديد : كلمه على ساره يا ويلك تفهمين ؟!
احترمي ألفاظك !
تراها متزوجه ولا تنسي ترى أمك هي كل يوم تروح تجلس معها مع جدتي
ما هي راميه نفسها عليكم !
نوره انقهرت من أسلوبه بس ما ردت حتى ما تكبر المشكله !
ام راكان عجبها رد عزام : صادق يا وليدي
ترى حنا إلي نروح لها
ويا ليت تعطينا وجه !
ما غير هالجوال تطقطق فيه !
وش رأيك ترافقني يا عزام نجلس معهم !
هز راسه بالموافقه بدون ما يناظر نوره !
***
***
**
ام وليد بابتسامه : على خير ان شاء يتم الزواج !
وسألت ساره بعفويه : تعرفين خطيبة ماجد ؟!!
ام محمد قاطعت عليها : من وين تعرف خطيبة ماجد هذي ؟!
وأشرت على ساره !
تابعت بمكر : خطيبة ماجد ذوق وأخلاق
قاطعتها ام الوليد وهي تتذكر عائشه : يا حليلها خطيبة ماجد !
لسانها حلو وكلها ذوق !
وفوق هذا حلوه !
والله افكر اسألها اذا تعرف احد مثلها لسعود !
ناظرت ام راكان متوجه لنا ومعها عزام !
ركزت نظري على أم راكان وأنا اسمع ام وليد تتكلم عن المواصفات لعروس سعود !
حسيت بالألم بداخلي !
تبغى وحده مثل عائشه ما ادري ليه اجتاحني هالشعور !
«الغيره»
**
**
**
**
**
زواج ماجد

طالعت صاحبة الصالون لما اشرت لي إنها انهت شغلها !
ابتسمت بإعجاب بالتوأم !
بالميك اب والتسريحات والفستان الأبيض
يأخذون العقل
اقتربت وحصنتهم من العين
عيون الناس ما ترحم !
حور بحماس : ماما أنا عروس !
سوار مسكت يدها : وأنا عروس،!
احس بفرح يداعب روحي وانا اشوف فرحتهم !
احاول كل شيء انحرمت منه بطفولتي اعمله للتوأم !
ما انسى كانت امنيتي بطفولتي
أعمل تسريحه وألبس فستان وأكون مثل العروس !
تنهدت ايام مرت وما تعود
اتذكر لماكانت عائشه تقولي لما تتزوج رح تخليني اجلس على الكوشه عندها !
طردت ذكريات الماضي
واتصلت بسلمان يوصلني للقاعه بما إنه تبرع بهذي المهمه !
وبعدها وقفت اعدل الشيله قبل وصوله !
مر وقت الانتظار وانا اناظر سوار وحور !
وعقلي بعالم اخر
احاول اتصور صوره عائشه
كيف حيكون شكلها !
متردده أروح لها وأبارك لها !
كيف حيكون الوضع بالقاعه ؟!
وقفت لما اتصل سلمان ينتظرني بالخارج !
ركبت السياره من الأمام وألقيت السلام بهدوء
رد سلمان بروقان : هلا والله !
حاس نفسي سائق سياره العروس !
واشر بيده للخلف على التوآم !
وبجديه تكلم : ترى العين حق
حصنيهم !
وبمرح كلم التوأم : مين العروس ؟!!
سوار بحماس : أنا العروس !
حور بنفس الحماس: ماما قالت أنا عروس !.
سلمان ابتسم : وين العريس ما اشوفه ؟!
سوار بتفكير : ما نبغى عريس
ماما تقول عريس عيب !
بس نلعب عروس بدون عريس
صح ماما ؟!
طالعني سلمان وضحك : وش هالكلام ؟!
تتذكرين لما عملنا زواج وحنا صغار
وحضرتك فتنتي
قاطعته بتهكم : انا ما فتنت على احد !
طالعني وضحك : ايام راحت وما ترجع !
اكلنا طق بسببك !
رديت بدون ما اناظره : تستاهل !،
طالعني وكأنه تذكر شيء ابتسم وهو يغمز : عمي مناف يسأل عنك !
اليوم وصل
قاطعته بلا مبالاة: وش يخصني فيه ؟!
تكلم بجديه : تدرين للحين متفشل كلما اشوفه اتذكر السروال إلي كنت لابسيته
لما صار مع عزام حادث
قاطعته بضجر من هالذكريات : سلمان رأسي مصدع ...فكني من هالذكريات !
رفع حاجب وهو يسترق النظر لي : اوكي ننسى الماضي !
وخلينا بالحاضر غريبه ما اشوف ألوان الطيف بوجهك ؟!
لا تقولين ما رح تحضرين ؟!
نطقت بهدوء : أكيد رح أحضر الحفله !
عقد حواجبه : أجل ليه مو متزينه ؟!!
طالعته بتعجب : يعني لازم بالزواج كل وحده تدهن وجهها بجميع الألوان ؟!!
وال
قاطعني باستغراب : أنا إلي أعرفه لزوم تطرشين وجهك بكل أنواع الدهانات
قصدي بالمكياج !
حتى تكون مميزه بالحفله !
رديت بثقة ظاهره : وأنا مميزه بالحفله بدون هالخرابيط !
صفر سلمان : اموت على الواثق !
وبجديه كمل : تدرين انك عاقله وتفهمين !
لو تشوفين نسرين ما تعرفينها
ملامحها مطموسه !
وعزام مسح فيها الارض وغصب عنها خففت من المكياج !
لو تشوفينها تموتين من الضحك على شكلها !
عفست ملامحي من تسلط عزام !
انسب لقب يناسبه «متسلط»
يظن كل الناس تمشي بأمره وحسب مزاجه !
نزلت من السياره بعد ما وقف سلمان السياره !
نزلت التوأم مع بعض تنبيهات خفيفه لهم!
سلمان وقف جنبي : ماني قادر أستوعب إنك أم مثاليه ؟!،-
امم المفروض لما نعرض صورك القديمه
يكون شكل عيالك
بشعر منفوش !
واشر على انفه بطريقه مضحكه : ومن هنا شلالات بعدة الوان ابيض اخضر
قاطعته وأنا عافسه ملامحي بقرف : مقرف !
رفعت حاجب وأنا أشوف ضحكته !
تنهدت بنرفزه : صدق سخيف !
حور تسحب يدي : ماما بسرعه الحين ينتهي الزواج !
سوار بتأييد : بسرعه ماما الحين العريس يهرب !
سلمان بضحكه : من وين يهرب
وعمي ابو ماجد ساحبه خلفه مثل الخروف !
استغربت كلامه وسألت بشك : ليه ماجد مغص
قاطعني صوت من خلفي : سلمان انا ادورك واتصل فيك وحضرتك طاقها سوالف !
ما إلتفت لاني عرفت الشخص من صوته !
تقدم وجلس على مستوى التوأم : بسم الله ما شاء الله ربي يحفظهم !
سوار بابتسامه : عمي مين أحلى أنا وإلا حور ؟!!
سعود بضحكه قصيره : والله ما ادري مين حور ومين سوار !
عفست ملامحي بكره لهذا الشخص
رافع خشومه للسماء
مالت عليك وانت هالنظارات !
ابو 44 عين !
مشيت خطوتين بأمر : يلا يا حور ،سوار !
وتوجهت لداخل القاعه بخطوات هاديه !
قررت اتوجه لغرفة العروس
ما ادري
قلبي دق طبول ما أدري وش السبب !!
معقول من رهبة لقاء عائشه بعد سنين طويله مضت !!!

***
***
***
***
ام سعود بصرخه : انكتمي !
فتحت عيوني باستنكار ما احد محترمني وهذا وأنا عروس : تراها مو حلوه منك يا ماما تكلميني كذا وأنا عروس !
ام سعود انضغطت من عائشه وطلباتها : عائشه ترى هذا عقوق
غثتيني بطلباتك يايمه !
عائشه بندم : اسفه ماما والله مو قصدي !
اسماء خزتها : تراك عروس
لا تفضحينا إذا دخل أحد من أهل العريس !
مطيت شفتي بانزعاج من هالزواج ومراسيمه بس بنفس الوقت احس بفرحه اني عروس: تبغون تذلوني لاني مربطه بهذا الفستان ؟!
وزفرت بملل !
رفعت حاجب وانا اشوف حماتي داخله وخلفها بنت طويله ومعهم بنوتين نفس الشكل !
ام ماجد سلمت علي والفرح يتراقص بعيونها !
استغربت البنت إلي معها احسها متوتره ومتردده بالسلام علي !
ام ماجد أشرت عليها بتعريف : هذي ابنة عم ابو ماجد !
امي تعذرت : والله ما أعرفها من قبل !
ام ماجد بتأكيد : الا تعرفينها
اذكر كنتم عندنا ودخلت وسلمت عليكم في بيت عمي ابو راكان !
بس يمكن مستغربين كانت امتن من كذا !
طالعتها وهي تناظر ام ماجد والظاهر ما عجبها كلامها عنها!
بس لحظه لحظه كأني تذكرتها !
هذي حبيبة ماجد ؟!
إلا هي !
وأنا أقول ليه تناظرني ومتردده تسلم علي !!
مديت يدي لما اقتربت تسلم علي
وباركت لي وكأنها مجبوره !
وش قصتها معي ؟ !
ما أحد جبرها تيجي لغرفه العروس وتبارك لي !
اكيد عندها سالفه !
يمكن تبغى تشوف عروس ماجد إلي هي انا عن قرب !
ما ادري قلبي ما ارتاح لها وماني طايقها
وبسرعه سحبت يدي منها وتشاغلت مع اعختي اسماء !
شفتها وهي طالعه من الغرفه بهدوء
حتى ما سلمت على أمي وأخواتي ؟!
وش هالنفسيه هذي ؟!
افففف غثيثه !
معقول اغار منها لأنه ماجد يبغاها !
ما أنكر جمالها الرباني
طول وخصرها باين بالرغم من العبايه الواسعه !
إلتفت على امي إلي تتكلم مع حماتي : ما تذكرتها !
ام ماجد ردت : تراها كانت خطيبة عبدالله سلفي وطلقها !
فتحت أمي فمها بتذكر : ايه ايه تذكرتها !
ذول بناتها ؟!
ام ماجد : ايه بناتها تراها متزوجه واحد مجنون !
اسماء اختي انفعلت : كل هالجمال لواحد مجنون !
ابتسمت على انفعال اسماء المبالغ فيه !
ليه لازم كل وحده حلوه تأخذ انسان عاقل !
هذي انا حلوه ومزيونه ومتزوجه واحد متخلف !
المجنون ارحم منه !
اتركوني من هالبنت وخلوني بهمي
«ماجد »
هذا أكبر هم بالحياه !
تدرون نسيت اشتري صبر يمكن يزيد قوة الصبر عندي !
ادري اني سخيفه بس من التوتر كلما اتذكر قرب موعد الزفه !
_علشان ييجي ماجد ويتصور !
لقطت اذني هذي الجمله !
نعم يتصور ؟!
ما بقى الا المتخلف يتصور معي!
وبسرعه طالعت حماتي وطار كل التوتر والخوف وهذي الخرابيط : لا تتصلين بأحد أنا ما أبغى صور !
شفت أمي تؤشر لي بعيونها بمعنى «انكتمي»
طنشتها وطالعت ام ماجد المتفاجئة من كلامي : بس حنا اتفقنا مع المصوره !
رديت بكل برود : عادي نلغي الحجز ما في اي مشكله !
ام ماجد صار وجهها بالألوان والظاهر ما عجبها كلامي : ليه ما تبغين ؟!
ترى حلو الصور للتذكار !
مطيت شفتي امحق ذكرى والعريس ولدك ومع ذلك حاولت اتصنع الذوق بالرد : الذكريات الحلوه ما هي بحاجه للصور
بالاتفاق والمحبه نكرر كل لحظه حلوه !
وبداخلي اعزي نفسي على هذا الزواج !
امي تكلمت وقهرتني بكلامها : ما عليك منها خلهم يتصورون
قاطعتها بنرفزه : ماما !
طالعتني ونظراتها تقول «نعامه ترفسك»
ترى حنا نفهم معنى النظرات بدون الكلام !
تابعت كلامي متجاهل نظراتها : وقسم بالله اذا دخلت المصوره من هنا ما اجلس ولا دقيقه !
اسماء تستخف دمها : خلاص نقول لها تدخل من هنا !
واشرت على باب ثاني !
ام ماجد وجهها احمر من القهر بس اضطرت تمشي الموضوع حتى يتم الزواج على خير : خلاص على راحتك !
تنهدت براحه ايوه كذا !
ابتسمت على نظرات امي المتحلفه لي
وانشغلت مع اسماء إلي تتأكد من شكلي قبل وقت الزفه !
رفعت نظري على دخول اخوات العريس
انا ما عرفتهم بس لما كلمتهم ام
ماجد عرفت انهم اخوات ماجد !
_ ما بقى شيء على الزفه اتصلي بماجد يا يمه !
طالعتها وانا رافعه حاجب : نعم ؟!
حولت نظرها علي لما سمعت صوتي وواضح اني اكلمها !
بس ناظرتني وكأنها تتأكد : فيه شيء ؟ !
خففت شوي من حدتي وحاولت اكون لبقه شوي : ايوه فيه شيء !
انا ما ابغى العريس يدخل !
بغيت اضحك لما سمعت ردها انقلبت الايه لما قالت : نعم ؟؟!
كيف العريس ما يدخل ؟!!
ام ماجد ما عجبتها هالنقطه تكلمت بإعتراض : تبغين الناس تتكلم علينا !
ماجد اكيد رح ينزف تراه مومطلق ولا ارمل
حتى يتزوج كذا،!
انا سكتت عن الصور احترام لرغبتك
بس إنه ما ينزف ما أقبل !
وطالعت امي : وش رأيك يا ام سعود !
ابتسمت أمي مجامله لها : ايه أكيد رح ينزف !
اخت العريس_:وبعدين وش سالفه الصور ؟! للحين ما تصو
قاطعتها ام ماجد : خلاص يا راما انسي سالفه الصور !
وخلينا بالزفه !
ما عجبني نظرات راما لي وكأني حشره قدامها
بس مو انا عائشه إلي اسمح لها تناظرني كذا !
وبجزم تكلمت وانا أمط بالكلام أغيظها : الزفه وماجد معي لاااا
ما أدري ليه أبغى أغيضها مع إني ما أعرفها من قبل !
راما بغضب : والله هذا زواجنا ونعمله مثل ما نبغى !
وماجد رح ينزف غصب عن الراضي والزعلان !
طالعتها ببرود اقهرها : ذيك الطريق روحي زفيه الله يسهل دربكم !
انا انتظركم هنا !
ردت علي بحده والظاهر إنها تبغى المشاكل : مو بكيفك !
طالعتها بتحدي ونسيت اني عروس !
ما أدري ليه لما اشوف أحد من اهل ماجد أو ماجد اتنرفز وأفقد صبري : اشوف كيف رح تجبريني ؟!!!
اقتربت امي وقرصتني بخفه بدون أحد يلاحظ : اختصري المشاكل
وامشي مثل ما يبغون اهل زوجك !
هزيت راسي بعناد وطالعت حماتي : يا خالتي هذا زواجي ابغى يكون مثل ما رسمت له !
يا ليت ما تضغطون علي !
ردت حماتي ووجهها منتفخ من الغضب بس ما اظهرت وردت بهدوء: خلاص بكيفك !
شفت نظرات بناتها شوي ويذبحوني بس ما اهتميت اهم شيء نفذت كلامي !!!!
ما ادري ليه اتصرف كذا؟!!!
يمكن لانه بظني إنها خاربه خاربه
ومتأكده ماجد حيعمل حركة نذاله
ورح أرجع مع أهلي اليوم
حدسي يقول كذا !
**
**
**
**
**
***
***
***
جلست على احدى الطاولات بضيق
وأنا للحين مو مستوعبه نظرات عيشه لي ؟!
نفس البنت لما كنت في بيت عمي أبو راكان !
نفسها «عائشه »
وقتها حسيت شكل ام سعود مألوف لي !
وما خاب ظني !
تنهدت بعمق وقلبي انجرح من نظراتها لي !
المره الثانيه اقابلها وتناظرني بنفس النظرات !
وش سبب هالنظرات !
عضيت على شفتي بقهر من غبائي المتفاقم
راز وجهي عندها !
خابت ظنوني فيها وانكسر آخر جسر للصداقه !
غمضت عيوني واحس بحقد وكره يتولد بداخلي
لشيء اسمه
«عائشه»
ليه الناس بطبعها الغدر !!!
ليه كلمة الوفاء محذوفه من قاموس الصداقه ؟ !!
ناظرت شروق لابسه فستان سكري طويل بأكمام شيفون جسمها ممتلئ شوي !
اقل وصف لها
«عاديه»
هذي إلي فضلها عبدالله وطلقني علشانها !
هذي المتعلمه الفهمانه المتحضره !
وانا
الغبيه الجاهله الأميه المتخلفه !
عضيت بشفتي وأنا أتوعد
رح تشوفون ساره
إلي الكل تمسخر عليها !
رح ابدع بمجال الدراسه وبنفس الوقت ابذل اقصى جهدي بتربية التوأم !
وأثبت لهم إنه الزواج بالحياه مو كل شيء!!!
خلاص طابت نفسي من هالأمور !
واكتفيت من حظي السيء !
حولت نظري لنوره واقفه مع شروق
والغرور يشع منها !
ما ادري على وش شايفه نفسها ؟!!
ما احد صار دكتوره غيرها ؟!
انغثيت من شوفتهم وابعدت نظري
للجهة الثانيه وانا أشوف ابغض وجه بالنسبه لي !
عفست ملامحي هذي وش جابها لهنا ؟!
وش تقرب لهم ؟؟؟؟
استغربت جلوسها مع خالتي ام محمد ومندمجه معها بالسوالف !
وخالتي ماده للبوزه والظاهر زعلانه من شيء وهذي تبرر لها !
افففف وش هالحفله كل الوجوه تغث !
جلست عندي مريم بابتسامه : متى وصلتي ؟!
رديت عليها بهدوء : قبل شوي !
تكلمت وعيونها على التوام : ربي يحفظهم !
علامك مو متزينه ؟!
طالعتها بكامل زينتها ما شاء الله عليها
حلوه واللون الخمري عاكس على بشرتها
يمكن مريم اكثر شخص استلطفته في بيت ابو الوليد !
طنشت سؤالها ورديت بسؤال : متى الزفة ؟!
هزت كتوفها : ما أدري المفروض انزفت
بس ما ادري حاسه في مشاكل بس ما احد متكلم !
ما ادري بداخلي رددت «من هالحال و اردى»
صايره شريره اتمنى الشر لغيري !
ما ادري اتمنى شيء يخرب هالزواج
حتى ينكسر خشم ابو ماجد
ما ادري على وش شايف نفسه !
افففف ما ينبلع
«يا ارض اشتدي ما عليك أحد قدي »
باءت امنيتي بالفشل لما تكلمت مريم بحماس : الحين الزفه !
هزيت راسي وانا اتابع بصمت !
***
***
***
***
***
انزفيت على انشوده ألف الصلاه والسلام عليك يا حبيب الله محمد !
اول ما وصلت الكوشه
بدات الأغاني تعج بالمكان !
وقفت وانا أكلم امي : وش هذا ؟!
أمي متورطه ما تدري وش تعمل : خلاص مشيها يمه !
رديت بحزم : لا !
قولي لهم يغيرونه الحين !
هزت امي راسها ؛ انا اتصرف الحين !
بس انت انكتمي فضحتينا !
لا تناظروني كذا !
هذا زواجي وأنا أعمله مثل ما أبغى !
الظاهر وصل الكلام لراما
تقدمت نحوي وما هي ناويه على خير : وهذا تبغين تتحكمين فيه بعد ؟!
لكن حامض على بوزك !
رديت بنبره هاديه : بس هذا شرطنا
واتوقع أعطيتكم خبر من قبل !
ام ماجد احسها رح تنفجر فيني : خلاص مشيها يا عائشه !
راما ردت بثقه : أصلا ماجد كسر اشرطتك !
قاطعتها بغضب وفقدت اعصابي خلاص أبغى أخرب هالزواج وارتاح من هالكابوس : كسر يكسر يدينه !
تقدمت راما وهي تردح : احترمي نفسك أحسن لك !
أنا أول مره أشوف عروس وقحه كذا !
ردي كان بنبره اعلى : ما رح ارد عليك وانزل مستواي لك !
واشبعي بالعرس انت واخوك !
وتحركت خلاص ناويه اغادر
ابغى ارجع بيتنا وأهرب بأي طريقه !
عقلي توقف عن التفكير
الفكره إلي تجول بخاطري
ارجع لغرفتي وانام على سريري !
ما ابغى اتزوج !
وقفتني امي : عائشه !
راما بقرف : بقلعتها !
ام ماجد تلم الموضوع : خلاص فضحتونا !
ام راكان سحبت عائشه : ارجعي مكانك ولا تخربين يوم زواجك !
رديت بحده : ينطفى الزفت
قاطعتني اخت ماجد ما أدري وش اسمها : اتركيها ..وش هالتخلف !
كبرت المشكله طبعا بتدخل نهى إلي كانت ساكته طول الوقت وما لها اي نشاط بالحفله !
والظاهر رح تطلع كل كبت زوجها واهلها الحين !
بصراحه كنت ابغى اضحك وانا اشوف
الاحذيه تتطاير بالاجواء
الله يستر لو ييجي على راس احد إلا يكسر رأسه وخاصه مع هالكعب وكأنه مسمار !
ما ادري كيف صارت هالحفله حوسه والصراخ والصياح يعم المكان
بصراحه انبسطت خلاص ضمنت رجوعي لاهلي !
وخاصه لما تشادت امي وحريم اعمامي مع ام ماجد وقريباتها !
اندمجت وانا اشوف اسماء مع راما يا كرهي لها
من انفعالي ناديت بصوت عالي : احلى يا أسماااااااء
ما كملت الكلمه الا حسيت بيد قويه تلفني
وكف يعدل ملامحي !
ناظرت متى دخلوا الرجال ما ادري !
الظاهر كنت منفعله زياده !
فتحت عيوني بصدمه بعد الكف
تلقائيا عيوني طافوا بكل القاعه !
والكل جالس يناظر !
والكل يسجل هالحدث التاريخي !
العريس يضرب العروس على الكوشه !
تعلقت الدموع بعيوني
موقف صعب جدا !
تقدم ابو ماجد وناظر ماجد بغضب والظاهر اجل الحسابات وتكلم بحزم : خذ عروستك وروح للفندق وفكونا من المشاكل !
دورت بنظراتي ابحث عن ابوي ييجي يشوف هالمهزله
تقدمت امي بعد ما تغطت : تخسون عائشه تمشي شبر واحد مع ولدك هذا !
ضارب ابنتي و
قاطعها ابو ماجد بغضب مكتوم : كل شيء ينحل بعدين !
سحبتني امي بقوه : امشي يا عائشه معي !
متى ما عرفوا قدرك يدلون بيتك !
بس ابو ماجد سحبني اقوى من يد امي
الله ستر وإلا وقعت على وجهي !
حتى تكمل الصوره !
الشاطر يسحبني لجهته !
تكلم بصوت منخفض يصل لمسمع امي : لا تشوهين سمعة ابنتك بتهورك !
وطالع ماجد بحزم : خذ عروستك يا ماجد !
لحظه لحظه بس أنا أبغى الطلاق من كل عقلي !
كيف فشل المخطط ما أدري !
تكلم ابو ماجد بصوته الجهوري الحاد : ترى ما صار الا خير
سوء فهم وانحل بفضل الله
يا حريم صلوا على النبي
ترى العين حق !
حاوطني ابو ماجد بيده وهمس برجاء : اذا لي خاطر عندك مشي الموضوع وخليك العاقله بينهم !
وما تركوا لي فرصه اتكلم واخذوني وطلعت من القاعه
لتنسدل الستاره على
« زواج فاشل »

***
***
***
ساره
قفلت الخط ورجعت للقاعه واستغربت الحوسه إلي صايره !
طالعت لجهة الكوشه ما في عروس
والوضع هناك ما يطمئن !
إلتفت لصوت حرمه تكلم إلي جنبها : وش هالمسخره؟!
يلغون الحفله علشان العروس واخت العريس تشابكوا !
_ الظاهر العريس مغصوب على العروس
ما شفتيه اول ما دخل ضربها كف على وجهها !
فتحت عيوني بصدمه من الكلام!
تقدمت لبناتي وأول ما شافوني تكلمت سوار بزعل : ماما العروس طلعت !
هزيت رأسي وما رديت وأنا اناظر جهة الكوشه
والظاهر المشكله ما زالت اثارها موجوده !!!
ما ادري داعبت شفتاي ابتسامة شماته
وأنا أناظر أهل أبو راكان كيف متفشلين !
استغربت من البنت إلي تردح للحين لأهل العروس !
قررت ارجع للبيت افضل لي من الجلسه هنا !
اتصلت بسلمان ما يرد ولا حتى عمار ولا عبد الرحمن !
غريبه ما أدري ليه ما يردون !
اقتربت من مريم يمكن معها خبر السالفه : وش صاير ؟!
مريم وهي تؤشر على البنت إلي تردح: تشابكت راما مع العروس !
وكبرت المشكله !
وجاء ماجد واخذ عروسته وراح للفندق اختصار للمشاكل !
سألت باستغراب : العيال ليه ما يردون !
مريم هزت كتوفها ما تعرف !
لفت انتباهي ام عمار تؤشر علي بإصبعها !
عفست ملامحي وأنا اشوفها واقفه مع الدكتوره مها !
هذي للحين بعدها موجوده ؟!!!
يا كرهي لها !
وام عمار ليه تؤشر علي !
لفيت وجهي بقرف وانا اناظر حولي بملل !
اقتربت ام عمار مني وهي تكلمني ببرود : ساره هذي ابنة اميره تبغى تسلم عليك !
رفعت حواجبي بقرف الحين هذي ابنة اميره ؟!!!!
يعني أنا خالتها !!!
الحين عرفت سبب الشبه بيني وبينها!
والميانه إلي مطيحيتها مع د .وليد !
والله مسخره ما بقى إلا ذي أكون خالتها !
رديت بدون نفس : ما عندي وقت للتعارف !!
نطقت مها باستنكار الظاهر عرفتني من صوتي : انت ؟!!!
طالعتها بتقييم وأنا عافسه ملامحي : ايه أنا !
ردت وهي تناظر ام عمار بقهر: متأكده إنها أخت أمي !!!
ام عمار بدون نفس: ايه أخت أمك !
ما تشوفين الشبه بينكم !
وافق صوتي صوت مها بنفس الكلمه: تخسى
طالعتها والطول بيننا متقارب مقارنه بأم عمار..وبقرف نطقت : يا خيبة اميره يوم إنك ابنتها !
وتركتها قبل ما ترد بعد ما قررت الرجوع للبيت !
***
***
***
مها بقهر : الحين انا خالتي تشتغل بالمستشفى بالتنظيف !
يا فشيلتي !
وفوق هذا نفسيه ومتخلفه !
لو مكان امي لأنتحر ولا يكون لي أخت مثلها !
ما بقى إلا هالبزر اناديها خالتي
ام عمار بملل : يعني لو تطقي رأسك بالجدار الف مره ما رح يتغير شيء
تراها خالتك رضيت ولا عمرك رضيتي !
مها متفشله : اهم شيء زوجي ما يعرف عنها شيء وتفشلني
تراه يشتغل معي بنفس المستشفى !
لو يدري انها خالتي يا فضيحتي!
بالله يا ام عمار ما تطلع هالسالفه من هنا !
ام عمار هزت كتوفها بعدم اهتمام : انا وش دخلني فيك وفيها !
**
**
**
**

همس لي حضرة الوالد  بهمسات غاضبه : الله لا يرضى عليك على
قاطعته بفزع : بابا
قطع كلامي بحده : انسي انه لك ابو بالدنيا بعد سواد وجهك !
متى ما بيضت وجهي والكل تكلم بتربيتك وحسن تصرفاتك وقتها افكر
اسامحك !
ما ترك لي فرصه أتكلم أو أبرر موقفي
!
حسيت الدموع تلمع بعيوني من قسوته!
ركبت بالسياره مسيره وعريس الغفله جنبي !
تمنيت أذبحه بيديني لانه السبب بكل شيء !
كانت الاجواء تعم بالهدوء
وعمي ابو ماجد جالس من الامام وما تكلم ولا بحرف !
ما أدري ليه جاي معنا ؟!
تنهدت والضيق ملازمني !
والغصه بحلقي !
نزلت نظري وابتسمت بسخريه وانا أشوف بياض فستاني !
«عروس»
امحق عروسه !
غمضت عيوني استذكر الاحداث
حسيت بغلطي لو تكلمت بإسلوب ثاني
يمكن ما وصلت السالفه لذي الدرجه !
اكيد الكل الحين كارهني بعد هالحفله !
لازم اجلس مع نفسي واعيد
حساباتي وترتيب اوراقي من جديد !
ما ادري كيف فقدت هدوئي ورزانتي
بعد الخطوبه!
احس الهدوء والرزانه والعقل يتطاير بالهواء
لما أشوف ماجد وما أقدر أمسك شيء من أعصابي !
إلتفت وأنا اسمعه يهمس لي :الوعد لما نوصل !
ميلت شفتي بسخرية مالت عليه
إلي يشوفه يهمس لي يظن قاعد يتغزل فيني!
ما يدري انه حضرته يهدد !!
يقال ميته من الخوف منه!
طنشته وناظرت من الجهة الثانيه
لازم امسك لساني الحين
لوقت ترتيب اوراقي وبعدها لكل حادث حديث !
نزلنا الفندق ورافقنا عمي لداخل الجناح !
اشر لي عمي ابو ماجد اجلس ووجهه متجهم !
جلست على كنبه وجلس ماجد مقابل لي !
تنهد عمي وتكلم بقهر : وش هالمهزله هذي ؟!!
تكلم ماجد : ارتاح يبه واجلس !
رد عمي بنبره اعلى غاضبه : لو يهمك راحتي ما فشلتونا قدام المعازيم !
بزران أنتم ؟!!!
وانا طول وقتي اقول عنك يا عائشه عاقله !
طالعته« طول عمري عاقله بس ولدك طير عقلي» وبنبره هاديه رديت : انا ما غلطت على أحد !
وولدك ضربني قدام المعازيم ومع ذلك احترام لك جيت لهنا
قاطعني ماجد بسخريه : بريئه يا حرام !
طالعت عمي نظره بمعنى شوف ولدك !
رد عمي وللحين مقهور من إلي صار : اولا «ولدك » تراه زوجك !
ثانيا ما ابغى اسمع اي شيء صار بالقاعه !
خلاص صفحه قطعناها ورح نبدأ بصفحه جديده !
ثالثا : تراكم كبار مو بزران
وحضرتك يا ماجد سنتين زمان وتدخل الثلاثين وما انت قادر تتفاهم مع زوجتك !
اذا ما انت رجال وما تقدر تقوم ببيت ومسؤوليات وتعطي زوجتك حقوقها
واهمها الاحترام !
ليه تتزوج ؟!
انا ما حتكلم في موضوع عندكم علم فيه اكثر مني !
و انت يا عائشه هذي وانت ابوك دكتور بكلية الشريعه تتصرفين كذا ؟!!!
واكيد تعرفين حقوق الزوج !
والحرمه إلي ينام زوجها غضبان عليها
قاطعه ماجد حضرته يتريق : تلاقينها حافظه بس عند التطبيق تطلع على حقيقتها !
غمض ابو ماجد عيونه بصبر وبعدها طالع ماجد : انا وش قلتلك قبل شوي !
ماجد بإعتذار : السموحه يبه !
وان شاء الله ما تشوف إلا إلي يسرك !
وقف عمي بفقدان امل منا : اتمنى هذا !!
بعد ما طلع عمي دخل ماجد وتوجه للغرفه وهو يردد : ناس تسد النفس !
كشيت عليه بعد ما دخل جعل نفسك تسد عن كل شيء ونخلص منك !
ايه حنا نسد النفس ...يمكن
طليقة عمه تفتح نفسه !،
مالت عليك وعليها !
أكرهها وما اطيقها !
شايفه نفسها وكأنه ما احد طويل غيرها !
وش حلاتها القصيره فرفوره
امووووواه ما أزكاني !
اجنننن!
لحظه الظاهر اني انجنيت اكلم نفسي!
مالت علي !
وبندم «استغفر الله العظيم واتوب إليه »
قاعده اغتاب بالناس !
يا الله كسبت ذنوب اليوم كله بسبب أخت الزفته !
استغفر الله يا رب اغفر لي مو قادره امسك اعصابي !
وبابا زعلان مني !
احس حياتي انقلبت فوق تحت
بعد ما كنت عايشه ومرتاحه !
سبحان الله الانسان ما يحس بالنعمه إلا لما يفقدها !!!!!
***
***
***
***
طلعت برا القاعه وأنا ناويه آخذ سياره أجره
وارجع للبيت
تنرفزت من التوأم يتحلطمون لأنهم ما جلسوا على الكوشه مع العروسه !
قبل ما اطلع للشارع الرئيسي تكلمت بحده : ما ابغى اسمع أي صوت !
خلاص ترى طق كبدي !
سوار برطمت بزعل وبدأت دموعها تسقط مثل حبات اللؤلؤ : كل البنات يجلسون على الكوشه الا حنا !
كل شيء ممنوع !
حور تكمل معها النغمه بالبكاء : ولا سلمنا على العريس !
لو كنت بحياتي الطبيعيه كان انسدحت على الارض من الضحك على جملتها مو لاقيه شيء تبكي عليه !
بس قلبي الميت ما قدر يتحرك ولو بابتسامة صغيره !!!
طنشتهم واول ما طلعت للشارع الرئيسي
استغربت جمهور من الرجال
الظاهر كان في شجار وانفض!
يالطيف كيف هالزواج كله نكد ومشاكل !
ما انكر تضايقت لما عرفت انه ماجد ضرب عائشه !
لو كنت موجوده لحظتها ما ادري وش رح تكون ردة فعلي !
لكن مستحيل اشوف عائشه تنضرب واسكت !
وحنا صغار دافعت عني كثير
طردت عائشه من بالي وانا اشوف سياره
اجره !
اشرت لها وطالعت التوأم إلي للحين يبكون : يلا ماما علشان نروح على الملاهي !
حور وهي تمسح دموعها : ما نبغى الملاهي
أبغى أسلم على العريس !
طالعتهم بحده وانا اشوف سائق السياره واقف ينتظر: يلا سوار !
سوار برفض: نبغى نشوف العريس!
اشرت لسائق سياره الاجره ينتظر دقيقه لما شفته يتحرك
بس اعطاني طاف وغادر المكان !
_ انت متى تستحين على دمك وتحترمين البيت إلي انت فيه ؟!
طالعه بسياره اجره ونازله من سياره الاجره !
وفوق هذا واقفه والرجال قريب منك وانت ما في حياء !
طالعته وتفاجأت من هجومه : انت
قاطعني بحده : ولا كلمه انا سكتت لك كثير !
لحد هنا وكافي !
امشي معي ارجعك للبيت وهناك لي معك تصرف ثاني !
رفعت حاجب بتحقير يتكلم الاخ واثق من نفسه : تدري خفت منك كثير !
عزام للمره الاخيره أقول لك ابعد عن طريقي ولا تتدخل بحياتي يكون افضل !
ولا تكلمني كذا
قاطعني مناف بصوت منخفض هادي ما أدري من وين طلع : ام سوار هدي يا بنت هالحلال !
وانت يا عزام ثاير مثل الثور الهايج
ترى حولنا عالم ما يكفينا فشيله زواج ماجد
تبغون تكملونها هنا !
عزام وهو شاد على اسنانه : طالعه وما هي مهتمه للرجال إلي واقفين هنا !
مناف بهدوء : لا تكبر الموضوع
والرجال الحين تفرقوا وما في احد غريب
واقترب من التوام بتأثر : الحلو ليه يبكي !
تراجع التوأم خلفي وزادت نبرة البكاء !
تنهد عزام وهو يحاول يكتم قهره مني : حور ، سوار تعالوا معي عند لجين !
كانت اجابتهم بزياده صوت النحيب
وإلي يشوف بكاء التوأم يقول
أحد ضاربهم !
عزام بتساؤل ضايقني ؛ وش عامله للبنات ؟!!
طنشته واشرت لسياره اجره ثانيه
قبل ماتوقف السياره حسيت يدي انخلعت من مكانها ونظرات عزام ما تبشر بخير: لهنا كافي !
مناف بنبره زعل : ترى ما هي حلوه بحقنا هالحركه يا ساره !
حنا موجودين وتركبين بسياره اجره !
حاولت اسحب يدي وعيوني ترسل شرار : اترك يدي !
وليد تقدم ويسحب يد عزام :حنا بالشارع يا عزام اختصر !
طالعت وليد الظاهر واقف من زمان ومعه اخوه سعود ما انتبهت على وجودهم !!!
عزام زفر وهو يكتم غضبه: تعالي معي !
رديت وانا اتحسس يدي وبكره : انقلع من وجهي احسن ما اجمع الناس عليك
قاطعني بنبره حاده : ما هي غريبه عنك هالحركات !
قاطعنا وليد : البنات مقطعات حالهم بكي وحضراتكم تتشاجرون!
وتقدم من التوأم إلي وجهم تورم من البكاء وبلهجه حانيه : ليه تبكي يا سوار العسل ؟!!
سوار من بين شهقاتها :ابغى اشوف العريس!!!
رفع وليد حاجب وناظر مناف وسعود وعزام : انا سمعت غلط ؟؟؟!!!
ضحك مناف وهو يقرصها بخدها : الحين كل هالبكاء علشان تشوفين الجوكر ماجد !!!
وانا على بالي عندك سالفه !
صدق بزران !
وليد يمسح دموع التوأم : خلاص باكر اخذكم للعريس مع البزران كلهم اتفقنا ؟!
حور باعتراض وصوتها رايح من البكاء : لا بس انا وسوار !
عزام حزن على التوأم وهو يتخيل عياله يعيشون كذا بدون اهل وعزوه !
وش ذنب هالطفلتين بأبو مجنون
ما يدري عن هوى دارهم !
ما يقدر هالاب يصرف على نفسه كيف يصرف على زوجه وأبناء !
كيف نظره المجتمع للتوام ابوهم مجنون !
حالهن يكسر الخاطر !
وبهدوء تكلم عكس الغضب إلي اجتاحه من دقائق : وقفتنا بالشارع ما هي حلوه !
يلا ساره ارجعك معي !
رفعت نظري برفض : لو تخلص السيارات من العالم ما اركب معك انت بالذات !
وليد بثقه : خلاص تعالي أنا اوصلك !
بدون ما اطالعه ناظرت مناف بهدوء : تقدر توصلني للبيت ؟!!!

***
***
9:03 PM
رد