رواية اقدار الفصل السادس والعشرون 26 - بقلم امي احمد

"سبحان الله وبحمده عدد خلقه ورضا نفسه وزنة عرشه ومداد كلماته "
**
***
***

دخل بخطوات هاديه رزينه بإتجاه الصالة عقد حواجبه من الأصوات المرتفعه !
دخل عليهم وهو يتفحص الموجودين وبهدوء رد السلام !
ام سالم وقفت وماسكه نفسها لآخر لحظه : وعليكم السلام !
عقد حواجبه : وش فيها أصواتكم مرتفعه عسى خير
سلوى بلقافه : أي خير
أعطاها نظره أخرستها : لما أكلم الكبار الصغار ما يتكلمون !
سلوى همست لفاطمه : أعوذ بالله من هالنظرات خرعني ت !
أعطاها نظره وهي تتهامس قطعت كلامها وسكتت !
إلتفت على أمه بهدوء : خير إن شاء الله !
ام سالم مدت له البطاقه بغبن : شوف الخير بنفسك !
تناول منها البطاقه تأمل غلافها الخارجي وهو رافع حاجب !
فتحها وتأملها لثواني وبعدها طالع أمه : كيف وصلت لكم ؟!
ام سالم بقهر : يعني كيف وصلت ؟!
وقسم بالله إلا تقهرني
قاطعها وهو يناظر الموجودين : ما هو وقته هالكلام يمه !
فاطمه بلقافه : عمي قول لجدتي توافق نروح للصالون ونحضر
بلعت كلامها لما كلمها بحده : فاطمه !
أم سالم بغبن : والحل الحين ؟!!!
وش هالمسخره ؟!
بالنسبه لي ولا أحد منا يحضر الزواج وخلها تتفشل مع أختها المغروره قدام المعازيم
ويقولون ولا أحد من أهل العريس يحضر الزواج !
رد بهدوء : ومين قال إنكم رح تحضرون هالمسخره !
أم وسيم باعتراض: ما يصير لازم نحضر
قاطعها بحده : يا ويل إلي أسمع إنها رجلها تعدت باب البيت !
طالعهم بتوعد وطلع برا البيت !
ام وسيم طالعت أم سالم : اففف حرام نحضر هالعرس ونطقطق شوي !
سلوى مدت بوزها : عاد نفسي ارقص
وش هالتسلط بذي العائله !
ام سالم بحده : انكتمي انت بالذات... ما ذبحك إلا الرقص والفياعه !
خلينا نخلص من هالزفته إلي بلانا فيها ..يكفي إلي سمعناها عنها .....ما رح اسكت على هالمهزله !
**
**
**
اميره بغضب أشرت على رأسها : انت عقلك ضارب !
ما فيك عقل ؟!
كيف توزعين بطاقات زواج لك !
ربطت شعرها ساره ذيل حصان وبهدوء تكلمت : وش فيها ؟!
أميره بحده : تراها حركه سخيفه !
ترى أهل زوجي بقمة غضبهم على هالحركه !
حتى أبو ليث الهادي بينهم مولع من حركتك !
من متى العروس تعزم وتحجز قاعه بدون علم أهل العريس
وترسلين لهم بطاقات دعوه !
وكأنه الموضوع ما يخصهم !
جلست مقابل لأميره على السرير وبابتسامه : لأنه فعلا الموضوع ما يخصهم !
اميره أخذت نفس تطول بالها : اوكي ...ما يخصهم !
طيب المعازيم بالحفله رح يسألون عن أهل العريس !
وينهم ؟!
وش نقول لهم ؟!!
وبعد الزفه وين العريس إلي ييجي ويقلعك لبيتك يا غبيه يا عبيطه !
تبغين الناس تضحك علينا ؟!
وقسم بالله أول من يتشمت فيك أمي !
وقفت أميره بقهر : وين عمار الزفت ؟!
كيف يوافق على حركاتك السخيفه ما أدري !
ساره بضحكه مكتومه غمضت عيونها بحالميه : تخيلي وأنا لابسه الفستان الأبيض وانزف وسوار على يميني وحور على شمالي !
وكل وحده فينا تحمل باقة
قاطعتها اميره وهي تهزها من كتوفها : اصحي يا حلوه !
اي زفه وبناتك معك !
اصحي من هالخرابيط !
الظاهر إنك شاربه وما انت صاحيه !
توسعت ابتسامه ساره على شكل اميره : علامك شابه كذا ؟!!
بدل ما تحجزين لي كوافيره تجملني !
توجهت اميره لخارج الغرفه : جملك القرد إن شاء الله !
طلعت من الغرفه معصبه وحست الشخص المناسب قدامها تطلع غضبها فيه : وأخيراً شرفت !
عمار عقد حواجبه : اللهم سكنهم مساكنهم !
علامك هبيتي فيني كذا ؟!
اميره بغضب : انت كيف تطاوع هالبزر وتحجز لها قاعه وهالخرابيط !
أشر على نفسه باستنكار : أنا ؟!
أميره بغضب : ايه انت !
طالع ساره من خلف اميره تؤشر له بس ما فهم عليها : هذي علامها مثل الخرسان تؤشر !
إلتفتت اميره لساره بغضب !
ضحكت ساره من قلبها على أميره ...عمار طالع عمته : صدقتيها تراها كذابه والله ما حجزت لا قاعه ولا هذي الخرابيط !
تراني بعقلي وما هو ناقصنا كلام يكفي إلي جانا !
اميره عقدت حواجبها وطالعت ساره : وش سالفة البطاقات !
ساره وهي تأخذ نفس عدلت ملامحها للجديه وبهدوء : كذا مزاج وزعتها لأهل زوجك !
اميره فتحت عيونها باستنكار : وقسم بالله ما فيك عقل ؟!!
وش هالحركه السخيفه ؟!
اعتدلت ساره بوقفتها بفخر : احم احم حتى كل أهله يعرفون بوجودي قبل وصولي !
مو ادخل عليهم ويطالعوني باستنكار مين هذي ؟!
ويجلس زوجي الموقر يرقع السالفه
قاطعتها اميره وهي تكش عليها : لا تخافين ..ترى الكل عرف بوجودك حتى البيبي إلي بالسرير !
ومن الحين اطمئن قلبك يا حلوتي
ترى حماتي المزيونه قالبه البيت فوق تحت وخاصه بعد هالبطاقات !
كان بغيتي تكحليها تراك عمتيها !!
عمار طالعهم وأثار التعب واضحه من الشغل : اروح أنام أفضل لي !
صدق سخيفه وما عندك سالفه !
اميره باستغراب تحقق مع ساره : كيف أرسلتي البطاقات لأهل زوجي ومتى أصلا جهزتيهم ؟!
ساره ابتسمت : تراهم كم بطاقه يعني ما يبغون وقت وأرسلتهم مع سواق أمك بعد ما أعطيته دبل
قاطعتها وهي عافسه ملامحها بقهر :
على فكره صدق إنك غبيه !
أحد يكتب على البطاقه اسم العريس « ابو فهد » بس !
ابتسمت ساره : ما أعرف إلا كذا أبو فهد !
غمضت عيونها اميره بقهر : وقسم بالله بتصرفاتك هذي فشلتيني قدامهم !
وما كان لي وجه أطالعهم !
الكل هناك استنكر حركتك البايخه هذي !
أنا ما يهمني حماتي خلها تطق بقهرها وتنجلط !
بس أنا ما ابغى تسوء علاقتك بزوجك من البدايه !
رن جوالها ناظرت الشاشه وعفست ملامحها : لو ذاكر مليون أحسن لي !
ساره بتردد : المجنون !
خزتها اميره : مجنون بعينك !
وقسم بالله لو يسمعك الا يتوطأ ببطنك !
ساره بسخريه : يمه خفت !
اميره فتحت خط وردت بهدوء : الو
وعفست ملامحها من ساره إلي لزقت أذنها بالسماعه !
أشرت لها تبعد بس ساره ملتصقه بقوه !
زمت شفتها وتكلمت بهدوء : هلا أبو فهد !
رد بهدوء : هلا ام ليث ! عساك بخير !
ردت باختناق من ساره وهي تحاول تدفها عنها : الله يسلمك ! وش أخباركم !
رد بجمود بخير : الحمد لله !
ام ليث ابغى اسألك عن اخوك ابو خالد !
ردت باستغراب : وش فيه ؟!
تكلم بهدوء : موجود بالبيت الحين والا طالع ؟!!
ام ليث رفعت حاجب : لا مو بالبيت الحين ..عسى ما شر ... فيه شيء !
رد بهدوء : أبغاه بموضوع ..اتصلي فيه وتأكدي يمكن رجع
قاطعته بهدوء،: انا عند أهلي وما هو موجود !
ساره متأكده يبغى يتكلم عن القاعه والحفله !
أبعدت رأسها عن أميره وبصوت يوصل له : يلااا يا ام ليث تأخرنا على الكوافيره
طالعتها أميره بتوعد ورجعت تتكلم وعفست ملامحها من ساره إلي رجعت إلتصقت فيها : إذا رجع للبيت وأنا موجوده أكلمك !
تكلم وهو صاك على سنونه : قولي للي عندك لو عتبت رجلها باب البيت يا ويلها !
ساره بعناد نادت على اميره : يلا اميره انا انتظرك بالسياره !
ورجعت اذنها تسمع رد فعله !
تكلم بحده : أنا أعطيتك خبر وصلي كلامي حتى تتحمل النتائج !
اميره بقوه ما تحب أحد يستقوي على أختها : ابو فهد وبعدين ؟!
تراها للحين في بيت اهلي _وبنغزه حتى تقهره _ متى ما أخذتها من القاعه وقتها يصير خير
قاطعها بغضب : جعل ربي يأخذ روحي إن دخلت القاعه وانزفت وأنا موجود !
وأنهى الاتصال : تبغين شيء يا أم ليث !
اميره مطت شفتها :وش أبغى يعني ؟! بس انتبه لا يطق لك عرق !
سلام !،
قفلت الخط وطالعت ساره بغضب: دوبني اقولك ضبطي أمورك معه !
انت ما تفهمين الكلام ؟!
ساره بروقان : ما أدري عندي طاقه داخليه وحابه افرغها بقهر الناس !
تنهدت أميره وطالعتها : أول مره انتبه على الشامه إلي على رقبتك !
مسحت ساره على مكان الشامه : يمكن لأني طول وقتي لابسه !
اميره هزت كتوفها : يمكن !
الحين أنا راجعه للبيت أجهز نفسي أبغى أزور صديقتي !
عفست ساره ملامحها :-يا كثر صديقاتك !-
اميره تعدل شيلتها : ماني مثلك ما أعرف أحد ولا لي صديقات !
المفروض تكونين منفتحه بالمجتمع ويكون لك صديقات وبينكم زيارات !
ساره ابتسمت بغمزه : أنا ما عندي إلا اصدقاء !
خزتها اميره : عز الله لو يسمعك زوجك إلا اليوم جنازتك !

**
**
**
**
مها بقهر جالسه بالحديقه : عمي انت من عقلك متزوجها ؟!
ما لقيت إلا الا هذي تتزوج ؟!
رفع حاجب : حسب معلوماتي إنها خالتك ؟!!
مطت شفتها بقرف : يعوووووو
وقسم بالله ما تناسبك أبد !
كانت تشتغل بالمستشفى بالتنظيف !
عقد حواجبه : نعم !
ابتسمت بخبث لما شافت استنكاره : ايه كانت تشتغل كذا بالمستشفى !
وقسم بالله لو تعرف حركاتها إلا تطحنها بأسنانك !
ادري إنه ما يعجبك لبسي ومظهري
لكن أنا الحمد لله محترمه ومؤدبه وما عندي حركات تفشل !
اسأل وليد ابن خالي ابو وليد عن حركاتها بالمستشفى !
وبدأت تسرد كل شيء له !
طالعته لتأكيد كلامها إذا مو مصدقني إسال بالمستشفى ترى فصلوها لسوء أخلاقها وتعاملها !
تضحك بصوت عالي وما تحترم إنه مكان عام وتراكض وقسم بالله شيء يفشل !
وش هالأخلاق إلي عليها وكأنها جايه من الشارع !
اسمعني زين صحيح إنها خالتي
بس انت عمي وتهمني مصلحتك أكثر لأنها ما تهمني أبدا !
وما أرضى أحد من اعمامي يأخذ وحده مثلها !
طالعها بهدوء : طيب أخلاقها كيف ؟!
يعني عندها حركات مو زينه ؟ !
هزت رأسها بالرفض : أخلاقها من هذي الناحيه حرام ما عمري شفت عليها الشينه أو تكلم رجال بطريقه مو مضبوطه !
بس انسانه همجيه وما عندها أسلوب بالتعامل !
تنهد بهدوء : يصير خير !
طالعته بأمل : يعني بتطلقها ؟!
وقف بهدوء : مها لا تتدخلين بأمور ما تخصك !
وحتى كلامك المفروض ما أعطيتني علم فيه كونها خالتك !!!
وتركها بدون ما يناظرها !
عفست ملامحها بكره : يا كرهي لها !
**
**
**
**
عدلت العبايه وهي تتكلم بالجوال : دقيقه واكون عندك يا عائشه ...ان شاء الله ...سلام !
قفلت الخط وطالعت محمد إلي دخل بهدوء :،ساره !
حست عنده مصيبه قلبها رجف : وش فيه !
حاول يكون الموضوع طبيعي ابتسم : علامك تجمدت كذا !
المهم جهزي أغراضك وأغراض البنات زوجك ينتظرك بالسياره !
عفست ملامحها بالرفض : نعم !
محمد عقد حواجبه : اتوقع أعطيتيني الموافقه لرجوعك معه !
خلاص اذا ما تبغين الحين اقول له يتوكل !
بس البنات معه بالسياره وجالس ينتظرك !
انتفخ وجهها من القهر : بس حنا اتفقنا نهاية الاسبوع !
محمد بضجر : لا تطولينها وهي قصيره !
ترى باكر نهايه الأسبوع !
وش ردك الحين ؟!
ما ردت وكبتت بداخلها حتى ما تنفجر بمحمد !
ضربت الأرض بقوة وتوجهت للغرفه تجهز الأغراض !
تركت بعض الملابس لأنها متأكده من رجوعها !
**
**
**
ناظر ساعته جالس ينتظر اكثر من نص ساعه !
ومحمد يتحجج إنها تجهز الأغراض !
مط شفته بقرف وبداخله : من زين هالملابس !
سوار بفرح : وين نروح الحين ؟!
على بيتنا ؟!
حلو البيت وإلا لا ؟!
رد بابتسامة من قلبه بالرغم من كثر اسئلة سوار لكنه يشعر بالسعاده !
شعور جميل وجود عائله !
لكن بداخله يتمنى لو كانوا توأم اولاد !
رد بطول بال : ايه على بيتنا !
حور باعتراض: أنا ما أروح إلا مع ماما صح سوار !
سوار بتأييد : ايه مع ماما !
وطالعته باستفسار : الحين دوم نقول بابا لك!
هز رأسه بتأكيد وهو يتأمل الشبه الكبير بين التوأم للحين ما يفرق بينهم !
يحس يشبهون أمه كثير !
ما يدري إذا يشبهون ساره أو لا... لأنه ما يتذكرها
إذا حاول يتذكر الماضي ما يشوف الا خيالات !
رفع رآسه وشد قبضة يده وهو يشوفها طالعه وكاشفه !
وش هالتناقض ؟!
لما زارها كانت متغطيه !
والحين طالعه للشارع وكاشفه !
سوار بفرح : ماما
نزل من السياره وبهمس : مالت على هالأم !
أشر لها تركب السياره وتوجه لأغراضهم حطهم بالسياره بمساعدة محمد !
توجه لباب السياره بضجر من محمد وتوصياته !
أول ما ركب السياره حرك بدون ما يطالعها وبنبره أخافتها : غطي وجهك !
ساره للحين وصايا محمد بإذنها.....وبدون نفس غطت وجهها ...ما تدري استجابت تأثر بوصايا محمد وإلا خوف من نبرة صوته !
رجحت الثانيه ...
ما تدري نبرته هذي ترعب قلبها !!
تحس بداخلها كلام لازم تفرغه ..بس خايفه تندم !
تبغى تسكت وتشوف نهايه هالمسخره !
سوار بفرح : ماما أنا فرحانه كثير !
عندي اب حلو !
ابتسم وهو يشوفها من المرايه مبسوطه بطريقه مبالغ فيها !
أو شعور الأطفال بوجود الأب غير !
وإلي المستغربه أكثر تقبلهم له بسرعه !
ألقى نظره سريعه على ساره تناظر من الشباك ولا كأنه أحد حولها !
تنهد وحل الصمت بالسياره !!!
بعد وقت وصلوا البيت !
إلتفت على التوأم بهدوء : يلا بابا انزلوا
فتحت ساره الباب تنزل بس وقفها لما مسكها من يدها وبنبره تحذير متوعده : كلمه زايده قدام أهلي ما أبغى أسمع !
تسلمين بإحترام وانتهينا !
حركات اختك ام ليث مع أمي ما أبغى اسمعها !
لأني مو مثل أخوي اغض الطرف عن الغلط !
اتفقنا !
سحبت يدها منه بقوه ونزلت وهي تهمس بصوت وصل لمسمعه : ناقصني مجانين !
نزل خلفها وبنبره حاده : عيدي هالكلمه وشوفي وش رح يصير !

**
**
**
فاطمه باعتراض:،يمه وبعدين !
أقولك ضروري انزل للسوق !-
وسيم برفض : وقسم بالله لو تموتين ما أخذك !
فاطمه بقهر : أنا أختك الكبيره يا زفت !
ام وسيم : وبعدين !
ام سالم خزت فاطمه : اتركي أخوك !
ترى صدعتي رأسي !
دخلت سلوى تركض وانفاسها مقطوعه ؛ إلحقوا إلحقو ا !
ام سالم عقدت حواجبها بفزع : وش صاير ؟! خرعتينا !!
سلوى بفرح وكأنها تملك الدنيا بهذا الخبر الطازج : عمي جاء !
وسيم بغضب : صدق إنك ما تستحين على وجهك !
وين السالفه بالموضوع ؟!
ام سالم طالعتها بغضب : متى تركدين ؟!
وتتركين حركاتك !
سلوى انتكست : اففف منكم ما تتركون احد يتكلم !
اقولكم عمي عمي
وقسم بالله نسيت اسمه بسببكم !
فاطمه باستعباط : قصدك عمي ابو الحريم ؟!
ام وسيم خزتها : وش هالكلام ؟!
سلوى مطت شفتها : ما أسمح لك تتكلمين على بابا كذا !
وبعدين يا غبيه انا قلت عمي جاء مو بابا !
فاطمه ضربت جبهتها : صادقه !
مين عمي المحكوم ؟!
ام سالم بغضب : صدق إنكم ما تستحون على وجيهكم !
دواكم ابو فهد اذا جاء يتصرف معكم !
سلوى بطريقه عبيطه : هذا هو هذا هو !
تذكرت اسمه
ام وسيم: انت وش تخربطين !
سلوى بابتسامة عبيطه: عمي ابو فهد جاء !!
فاطمه وقفت : وش نعمل نرقص له !
قاطعها وهو يدخل بنبره غاضبه : ايه ارقصي علشان اكسر العصا على جنبك !
فاطمه وقفت بإحراج وبتبرير : يا عمي والله امزح !
طالعها بتوعد مو وقته الحين !
ام سالم تناظر إلي مع ولدها بتمعن وبعد لحظات من التأمل تكلمت بسخريه : اشوفك مستعجل !
وين الحجز والقاعه ؟!!
تجاهل الكلام واشر للتوأم : هذي الجده يلا نسلم عليها !
تحولت أنظار التوأم لساره وكأنهم ينتظرون منها الموافقه !
طالع ساره إلي مو باين منها شيء وبعدها سحب التوأم برفق : يمه ذول بناتي !
طالعتهم بتقييم وبعدها قبلت كل وحده على رأسها ببرود !
وطالعت ساره بتقييم : والعروس مو ناويه تسلم !
ابو فهد بهدوء : كيف مو ناويه تسلم :؟!
تقدمت ساره بخطوات هاديه سلمت عليها ببرود وعلى الموجودين بهدوء !
وطالعت وسيم بهدوء هامس : كيف حالك ؟!
وسيم انحرج : الله يسلمك !!
ام وسيم بترحيب : يا هلا بأم سوار !
اجلسي تفضلي حياك !
تحس كل الأنظار عليها !
وهذي الأجواء ما تحبها ومع ذلك جلست مجامله بهدوء !
ام سالم صدت بوجهها وما تكلمت !
وفاطمه وسلوى يتهامسوا !
تكلم وهو يناظر ساعته : أنا طالع يمه يمكن ساعه وارجع !
تبغين شيء ؟!
أم سالم بدون نفس : سلامتك !
اقترب من التوأم وبابتسامه : يلا بابا نروح !
طالعتهم ساره برعب ووقفت على حيلها !
سرعان ما حست بالفشيله لما تكلم : اجلسي مع أهلي ما رح أطول رايحين للبقاله !
جلست بقهر وتكتفت من هالجو الممل !
ناظرت ام سالم لما وقفت وغادرت المكان بهدوء !
وبعدها وسيم استأذن وطلع !
ام وسيم باستغراب : غريبه متغطيه يقولون انك تكشفين !
فاطمه بضحكه : أكيد عمي نزل غطاها غصب عنها !
رفعت ساره حاجب بقهر من كلامها وردت : والله انا بمزاجي ساعه أغطي وساعه اكشف بمزاجي !
سلوى : طيب اكشفي نشوف جمالك الفتان !
ام وسيم خزتهم : اتركوها !
وبعدها وقفت : أنا رايحه أصلي المغرب !
وحتى تضمن فاطمه وسلوى ما يستفردون بساره كلمتهم بأمر : قدامي كل وحده على غرفتها تصلي !
تنهدت ساره بعد خروجهم وش هالاستقبال البارد إلي مثل وجههم !
حتى ما سألوها اذا بغت تصلي او لا ؟!
يا ثقل طينتهم !
تأملت المكان من تحت الغطاء
البيت كبير كثير !
ما تدري من يسكن فيه بالضبط !
مر الوقت وما أحد رجع يجلس معها !!
وش هالناس عديمة الإحساس ؟!
كذا يستقبلون ضيوفهم ؟!
ما تلوم أميره فيهم !
طالعت ساعتها بضجر : مر أكثر من ساعه !
وين طس هالمجنون ؟!
قلبها قرصها البنات معه !
معقول أخذهم وهرب !
فزت على حيلها من الاحتمال هذا !
تحركت ما تدري وين تروح !!
قررت تطلع من المكان إلي دخلت منه !
تفاجأت بوجود ام سالم معطيتها ظهرها وبنبره غضب : وين راح ولدك ببناتي !!!
قبل ما ترد دخل وأعطاها نظرات غاضبه : خطفتهم وارجعتهم !
عندك مانع ؟!
ام سالم عفست ملامحها : خذها لغرفتها
عز الله أختها أفضل منها بألف مره !
طنشت ساره كلامها وعيونها على التوأم تتأكد إنهم بخير !
تقدمها بهدوء : تعالي !
ساره بغضب : انا مو خروف عندك ساحبني هنا وهنا !
إلتفتت ام سالم عليها وهي ناويه تمسح فيها الارض
حست لسانها عجز عن النطق واشرت بإصبع مرتجف وصوت متقطع : م م ها !
طالع أمه وعقد حواجبه : وش فيك يمه ؟!
وطالع ساره بحده : غطي وجهك إلي ما حلاه ربي !
بلاه يدخل أحد من العيال !
ساره بعناد ورفض : ما أبغى اتغطي بكيفي !
والحين رجعني لمحمد أنا ما رح
سكتت لما تكلمت أم سالم وهي تمسك يد ولدها : هذي مها ؟!
ساره قفلت معها الشاطر يقول نفس مها بنت اميره وبصرخه : الله يأخذ مها !
ما بقى إلا حفيدتك تشبه
قطعت كلامها لما مسكها من فكها بقوه وبفحيح ارعبها : ارفعي صوتك بوجودي مره ثانيه حتى امسحك من الوجود !
وبقرف: امشي قدامي أرجعك لأخوك !
بلعت ريقها بخوف وهي تشوف ملامحه المرعبه !
متأكده رح يدفنها بقلب بارد !
بيد مرتجفه أبعدته عنها !،
أم سالم وللحين ما هي مستوعبه : مين هذي ؟!-
طالع أمه وتنهد : حنا وش نقول من الصبح يمه !
هذي زوجتي !
وطالع ساره بحده : غطي وجهك
ام سالم تنهدت وطالعت ولدها : هدي اعصابك يمه !
وبنبره هاديه : خذها لغرفتك يمه وخليها ترتاح !
وبعدها تعال أبغاك !
تقدم ناحية ساره ومد يده سرعان ما حضنت وجهها بيدينها قبل ما يطقها
رفعت رأسها واستغربت لما غطى وجهها بشيلتها وبنبره صارمه :تعالي معي !

***
***
**

تقلب الجوال بملل حطها بالجناح وبعدها ما شافت وجهه !
تعبت من التحقيق مع التوأم وش قال و ش عمل !
بس سوار الزفته متكتمه شوي !
الحين ناموا لكن باكر ما رح تتركهم حتى يقولون كل شيء !
وقفت بضيق تتأمل الجناح ...توجهت لغرفة النوم فتحتها بهدوء وهي تتأملها
بهدوء !
نظيفه ومرتبه ولا كأنه أحد ساكن فيها !
عفست ملامحها يمكن ساكن عند زوجته الأولى !
مطت شفتها بغيره الحين مجنونها المزيون تشاركها فيه حرمه ثانيه !
ضربت رأسها من الغباء إلي معشش بعقلها وتهمس «وش ابغى فيه »
توجهت للمرايه طالعت نفسها عدلت شيلتها وهي تقلده بسخريه «غطي وجهك إلي ما حلاه ربي »
مالت عليك يالمجنون !
حطت يدها على قلبها ارعبها هالمجنون بنظراته !
عليه نظرات مرعبه أكثر من خلف !
نزلت نظرها على برواز فيه صورته !
رفعتها تبغى تتأملها
سرعان ما إلتفتت للباب برعب لما دخل !
شتمت نفسها ألف مره على هذا التصرف !
نزلت الصوره لما شافت عيونه على الصوره وما لقت ترقيعه لتصرفها !
نزلت عيونها بإحراج وقررت تطلع من المكان !
بخطوات متردده توجهت للباب بدون ما تناظره !
لكن
توقفت وناظرته لما تكلم بهدوء : تعالي نجلس ابغى أتكلم معك !
أشر على الصاله الصغيره !
أعطاها ظهره وتوجه للصاله وهي تناظر زوله بقهر يبغى يفرض تسلطه عليها !
لازم تجلس معه وتحط النقاط على الحروف !
مستحيل تقبل يفرض تسلطه عليها...
توجهت خلفه بثقه وجلست مقابل له !
طالعته وهي تشجع نفسها تكون قويه وتثبت شخصيتها مثل أميره وبكل قوه نطقت :اسمع انا
حست نفسها انتكست لما قاطعها : أتوقع من الأدب أنا أبدأ بالحديث وخاصه إني طلبت أتكلم معك !
حست وجهها قلب طماطم من الإحراج والقهر وما ترك لها فرصه ترد
بدأ كلامه بهدوء واثق : أتمنى تسمعين كلامي زين !
لأني ما أحب أعيد شيء تكلمت فيه !
بالبدايه رح نفتح صفحه من الحين ...والماضي ما له علاقه بحياتنا الحالية ..بغض النظر عنها !
بالبدايه أول نقطه نضعها «الاحترام »
أهم أساس نبدأ فيه
قطع كلامه وناظرها بقوه وهو يشوفها تكتم ضحكتها بيدها وبحده نطق: انا جالس انكت !
ساره تحاول تعدل ملامحها بس مو قادره الضحك تسلط عليها
وفلتت منها ضحكه عاليه ما لها داعي بهذا الموقف !
هزت رأسها بتبرير : آسفه بس ههه ما أدري ههه أسلوبك تتكلم وكأنك ههههه دكتور ما كأنك مجنون
بلعت آخر كلمه وهي تشوف ملامحه إلي تحولت لغضب مخيف بلعت ريقها : ءءانا
قاطعها بغضب : ولا كلمه !
توقعت نفسي أكلم انسانه فاهمه عاقله راشده مو بزر !
الحق علي أنا ...ما هو عليك !
عموما كم نقطة احفظيهم مثل اسمك!!
اول شيء
اي شيء أقوله يتنفذ بالحرف
وكلمتي ما تنعاد
ثاني شيء
اهلي تحترمينهم وما أبغى أسمع أي شكوى عنك !
ثالث شيء
ممنوع تكشفين مثل أختك وابنتها !
هذي الحركات ما هي عندي !
اخر شيء تمشين بنظام البيت تأكلين معهم وتشربين معهم وتعيشين وكأنك فرد من أفرادهم !
حركات التحيز والأحزاب ما أبغى أشوفها أو أسمعها !
تعايشي معنا وكأنك عايشه هنا من سنين !
طالعها يشوف رد فعلها : اتفقنا ؟!
تناظر الارض بتفكير ....إما توافق وتكمل حياتها هنا
أو ترفض وترجع
سرحت عند نقطة الرجوع ....ترجع عند عمار ؟!
ما بقى عليه شيء ويتزوج ويبدأ حياة جديده ..واكيد زوجته ما تقبل بوجودها !
ترجع عند محمد وتسافر وتترك المكان إلي عاشت كل سنينها فيه ؟!
وبناتها لو رجعت محمد اكيد المجنون ما رح يقبل تأخذهم ؟!
ولعمها ابو راكان مستحيل ترجع !
لمتى تعيش مشرده هنا وهنا ؟!
حانت اللحظة إلي تستقر فيها وتعيش بجو أسري تصنعه بنفسه !
اخذت نفس وقلبها يدق بقوة ....طالعته بتوتر لما شافته يتأملها ...تكلمت تقطع تأمله : اتفقنا
بس عندي سؤال ؟!
هز رأسه بتفهم وأشر لها تتكلم : تفضلي وش سؤالك ؟!!
ساره بتردد وهي منزله عيونها : ءء انت كيف وصلت لخلف ؟!
قصدي كيف تزوجتني
قطعت كلامها لما رفعت رأسها و شافت تحول ملامحه شتمت نفسها على لقافتها !
وقف وهو يحاول يمسك أعصابه وبنبره حازمه تكلم : اضيفي هذي النقطه «ما احب اللقافه والحرمه الثرثاره ونقل الكلام »
مطت شفتها وبنفسها «مالت عليك يا متخلف ! »
**
**
**
**
اميره فتحت عيونها باستنكار وعدلت جلستها : الحين أختي ساره تكون ابنة عمتك ؟!
كيف ؟!
أول مره اسمع بذي السالفه ؟!
هز رأسه يشرح لها السالفه : أنا ما كنت أدري عن شيء !
اليوم كلمتني أمي بالموضوع !
لما شافت ساره ظنتها «مها» ام ساره !
اميره عقدت حواجبها بعدم فهم : كيف أنا اول مره اسمع بعمتك ذي ؟!
علشان كذا اخترت اسم ابنتك عليها ؟!
وش قصتها بالضبط ؟!
تنهد وهو يتذكر كلام أمه : جدي الله يرحمه تزوج جدتي إلي تكون ابنة عمه وربنا رزقهم بعيال وعاشوا حياتهم مثل أي زوجين !
بس جدي الله يرحمه كان يحب وحده من عائله ثانيه ومنطقه ثانيه!
وأهله رفضوا زواجه منها !
يقولون بعد سنين حن جدي لذي البنت ورجع خطبها بعد ما مات أبوه وما أحد يمنعه !
وقتها صك عمرها البنت 40 كبيره
قاطعته باندماج : يعني ما تزوجت وهي تنتظره ؟!
هز كتوفه بعدم معرفه : والله ما ادري ولا خطر في بالي أسأل هذا السؤال !
انتم الحريم عليكم لقافه بالاسئله !
مطت شفتها : طيب كمل وبعدين انتقد الحريم !
تنهد بهدوء : المهم الأغلب وقف بوجهه حتى ما يتزوجها وخاصه إنها كبيره بالسن ومن هذا الكلام !
بس جدي صمم وتزوجها وكانت منبوذه من كل العائله !
بعد زواجه سبحان حملت والكل يتكلم انه رح يطلع إلي في بطنها منغولي !
بس جدي رمى كلامهم بعرض الحائط وما اهتم !
المهم خلفت زوجة جدي بنت وكان اسمها «مها »
كان جدي مهتم فيها كثير وكأنه ما انجب طفل غيرها !
وسحب على عياله كلهم وأحفاده وصب كل اهتمامه ب «مها »
كانت زوجة جدي ام سعيد تعيش في شقه لوحدها مع مها واغلب الأيام جدي معهم !
وهجر جدتي ولا يسأل عنها !
هنا تولد الحقد لأم سعيد ومها من إلي حولها !
اميره بمقاطعه : انت تعرفها عمتك مها ؟!
رد وهو يحك ذقنه : ايه اعرفها أنا اكبر منها وكان جدي يجيبها عند جدتي !
كبرت مها وهي تشعر بدلالها وجمالها
ولا كأنه احد بالكون مثلها !
مات جدي الله يرحمه وانقطعت العلاقه ما احد يشوف مها وام سعيد !
ليوم جاء خبر انه مها على علاقه مع شاب ومن هذي الخرابيط !
والمعلومه وصلت لأبوي الله يرحمه
اشتط من الغضب وتكتم على الموضوع
ونشر بين قرايبنا انها تزوجت ابن صديقه وسافرت لانه مستعجل يبغى يكمل دراسه !
عقدت حواجبها : طيب كيف مها صارت زوجة ابوي ؟!
تنهد بضيق : امي تقول وقتها ابوي ما خبر احد بالعريس وتكتم على الموضوع
حتى امي ما كان عندها علم بالسالفه !
لكن اليوم لما شافت ساره وشافت الشبه الكبير بمها !
سألت ابو فهد وتأكدت معه من اسم أم ساره
وطلعت نفسها عمتي مها !
اميره بتأثر : كم عمرها ذاك الوقت ؟!
رد بتفكير : ما ادري بالضبط كنا متزوجين ومستقرين بالخارج وقالوا وقتها انها تزوجت
وما هو من زود العلاقه حتى اهتم !
يمكن وقتها كان عمرها بأول العشرين !
تزوجها ابوك يستر على الموضوع !
شهرين وبعدها توفى !
تنهدت وطالعته بجديه : اكيد خالي صالح و ابو الوليد يعرفون بذي السالفه لأنه بعد موت ابوي قالوا انهم راحوا لمها وخلوها تتنازل عن كل شيء بمقابل تبقى البنت معها !
وبنبره باكيه : سبحان الله ماتت وقت الولاده و ما شافت ضناها !
ماتت يمكن وهي مظلومه
ابو ليث مسح على وجهه بضيق : الله يرحمها
اميره مسحت دمعها خانتها : تحرقني ساره ما تدري عن أمها وما تعرفها ولا تدري عن شيء !

**
**
**
**

نزلت معه بتوتر وتنرفزت من سوار وثرثرتها وهي متعلقه بيد أبوها : بابا أنا أحب الفطور !
علشان اصير قويه !
وأضرب البنات إلي يقولون عنك مجنون !
وقف ونزل لمستواها : مين يقول عني مجنون ؟!!
سوار طالعته : ندى عبدالله
وندى عزام ولجين اختها
رفع حاجب : وش قلت لهم لما قالوا لك كذا ؟!
سوار مطت شفتها : قلت لماما !
بس ماما تقول بابا مجنون وأحلى مجنون !
حست وجهها ولع من الاحراج وش هالكلام ؟!
ما تذكر إنها قالت هالكلام !
حتى لو قالت ...
قطعت أفكارها وهو يكلمها : هذا إلي طلع معك !
حور مسكت يد ساره بتملك : أنا اقول لماما وماما تضربهم !
طالعت ساره حور بمحبه تستاهل بوسه مو مثل سوار ام لسان !
سوار بتذكر : احيانا تضربهم وتمنعنا نلعب معهم !
بس عمو سعود يقول لنا إلعبوا مع بعض !
اخذت نفس وهي ماسكه يدها ما تضرب سوار على لسانها المنفلت اليوم وخاصه لما شافت نظراته تحولت للغضب !
تنهدت براحه لما مشى متوجه لصالة الاكل !
حلفت بنفسها إلا تطق سوار على لسانها الطويل !
دخلت الصاله وألقت نظره سريعه على الوجوه الجديده !
وسرعان ما جلست جنب فاطمه بعد ما ردت السلام بصوت خافت !
ام سالم بهدوء : وعليكم السلام !
واشرت لساره : اجلسي عند زوجك انت والبنات !
همست لها فاطمه : هذا النظام !
ردت ساره بتوتر من الأجواء : مرتاحه هنا !
تحاشت النظر لجهة زوجها حتى ما تشوف نظرته المرعبه !
ام سالم بتفهم لاحراجها : المره الجايه تجلسين عند زوجك !
ساره بهدوء : إن شاء الله !
انشغلت بالتوأم وطلباتهم على الفطور !
همست لها فاطمه باستغراب : افطري ما اكلتي شيء !
ساره ما تعرف تأكل وهي متغطيه ردت بمجامله : ملحقه على الفطور الأهم التوأم !
بعد وقت قصير بدأ الأغلب ينسحب من المكان !
ما انتبهت على خروجه من المكان !
تنهدت بعد ما طلعت فاطمه ما أخذت راحتها من وجودها !
حور بهدوء : خلاص ماما شبعت !
مدت اللقمه لسوار هزت رأسها بالرفض : خلاص ماما هنا وصل الأكل !
وأشرت على حلقها !
وقفت تغسل للتوأم وبعدها ترجع تأكل لقمتين !
رجعت لصالة الاكل وتفاجأت بالخدم يرتبون المكان !
عقدت جواجبها وش هالسرعه بالتنظيف ؟!
طلعت بدون اهتمام لأنه الأكل آخر اهتماماتها !
تعودت بالسنين الماضيه على الجوع وقلة الأكل حتى صارت معدتها تكتفي طول اليوم بكم لقمة !
سألت عن مكانهم وتوجهت تجلس معهم حسب الأوامر !
سلوى بابتسامة : سوير تعالي سلمي على أمي وزوجات البابا !
تقدمت بهدوء وسلمت على زوجات ابو نورس
و بنفسها تبتسم بسخريه وهي تتخيل نفسها الرابعه !
سلوى بابتسامة : وهذا بابا !
طالعتها ساره وبنفسها« يا ثقل طينتك مين طلب منها أبغى أسلم على أحد »
وبمجامله بدون ما تناظره سلمت عن بعد وتوجهت لزوجها وجلست
وقلبها يدق ملامحه ما طمنتها وكأنها اقترفت خطأ !
ام سالم بهدوء،: عساك مرتاحه بيننا !
ساره تحس بعدم راحه تحس كل كلمه محاسبه عليها وبنبره هاديه: الحمد لله !
تنهدت براحه لما وقف وهم بالمغادره : تبغين شيء يمه ؟!
ام سالم بمحبه : سلامتك يمه !
سوار وقفت : بابا نروح معك !
ام وسيم بضحكه : هذي تعلمت لك !
رد بابتسامة : كذا الظاهر
قاطعهم دخولها وهي عافسه ملامحها
توسعت ابتسامته بترحيب : هلا بأم فهد !
عقدت ساره حواجبها وبنفسها «هذي زوجته ؟!
مطت شفتها بقهر وغيره وهي تناظره يضحك معها »
ام فهد بضجر : خيانه ما انتظرتوني على الفطور !
ودوبها انتبهت على وجود ساره والتوأم : ذول بناتك !
ابتسم : يجننون صح ؟!
ام وسيم : ابوك يالثقه !
مزيونات مثل خالتي ام سالم !
تقدمت ام فهد واشرت على ساره بعدم رضى : وهذي زوجتك ؟!
مدت ام فهد يدها تسلم وتفاجأت لما مدت ساره يدها ببرود وما كلفت نفسها توقف بوجهها !
تعمدت ساره هالحركه بعد ما شافت نظرات عدم الرضى من ام فهد !
هز رأسه بدون كلام وطالع التوأم بتنبيه : لا تبتعدوا عن الماما ..مفهوم !
وطالع ساره : تبغين شيء يا أم فهد ؟!
بلعت ريقها من نظراته وحست إنها ارتكبت غلطه كبيره !
اخذت نفسها تقوي نفسها ما عملت شيء غلط وبهدوء : سلامتك !
ورفعت راسها باستنكار ليه يقول لها أم فهد !
ام سلوى بابتسامه بعد ما طلع : مستعجل على العيال يناديك «ام فهد »
سلوى تكتفت : عمي طول عمره الكل يناديه ابو فهد على اسم جدي !
يا ويل إلي يناديه بإسمه !
ام فهد بابتسامة : عاد انا سبقته وسميت ولدي على اسم ابوي قبله !
محتكر هالاسم لنفسه وهو جالس لا زواج ولا بطيخ !
حتى سمعنا بالصدفه انه متزوج وحنا على بالنا انه عزابي ندور له عروس !
رفعت ساره حاجب وبنفسها «هذي أخته... » ما هي قادره تستوعب إنه ما هو متزوج !
وهي أول حظ له !
بس كيف تزوجها وهو أعزب !
هذا السؤال إلي ما رح تلقى له جواب دام خلف مختفي !
حست سمعها انشل لما تكلمت ام فهد : والبنت إلي خطبناها له ...وش نقول للجماعه ؟!
ابو نورس بتدخل : وش فيها كملوا الموضوع وتكون الثانيه !
طالعته ساره بكره وبنفسها «يا زينك وانت ساكت يا ابو الحريم»
ام فهد : ما رح اكمل حتى أخذ منه الموافقه !
ما رح نتفشل يمكن يهون عن الخطوبه !
وخاصه إذا انحكم مثل ابو ليث !
طالعتها ساره وهي رافعه حاجب علامها داخله فيها بوز ؟!
كل هذا لانها ما وقفت بوجهها !
ام سالم بهدوء : خذيها مني كنسلي الموضوع ...دام زوجته موجودة ليه يتزوج الثانيه ؟!
فاطمه بغمزه : اشوف جدتي بصف سوير !
أعطتها ام سالم نظره بمعنى «انكتمي »
حست بالضجر والاختناق وهي جالسه ومتغطيه
والسيد ابو نورس مبلط بالمكان وما هو ناوي يطلع !
رفعت حاجب باستنكار للصوت النشاز إلي سمعته !
إلتفتت باستنكار لها وهي داخله والدخان يتصاعد من راسها : وينها وينها ام سالم ؟!
اميره من خلفها متفشله :،يمه بعدين معك ؟!
ام محمد بغضب : اتركيني !
وتقدمت والشر يطلع من عيونها : انا تستغفليني طول وقتي !
ساعات أجلس معك يا الخاينه ولا تقولين لي انه ضرتي الحيه
تكون أخت رجلك !
ام سالم بهدوء : اجلسي يا محمد وخلينا نتفاهم !
ام محمد بنبره غاضبه : اي تفاهم وانت مستغفليتني!
الحين ضرتي تكون مها ؟!
مها ما غيرها البزر ؟!!!
وعضت على إصبعها بقهر: اخخخخ يالقهر !
انا يتركني ويتزوج علي بزر !
وينجب منها هالناقة !
ابو نورس طالعها لقلة عقلها : ترى كل إلي تتكلمين عنهم الله يرحمهم !
يعني هالثرثره على الفاضي !
لا زوجك راجع لك
ولا ابنة زوجك مختفيه من الدنيا !
جالت بنظرها تبحث عن ساره وأخيراً استقر نظرها عليها جالسه تطالعهم بعدم فهم !
تقدمت أم محمد منها : حسبي الله عليك وعلى أمك !
تسرقون الرجال من زوجته !
ابو نورس وقف وبحده تكلم : وقسم بالله يا أم محمد كلمة زايده توجهينها لابنة عمتي ما يصير خير !
طالعته ام محمد وخافت من نبرة صوته المتوعده وبصوت فيه رجفه : الحين صارت ابنة عمتك !
دامك مهتم فيها هالكثر ليه رفضتها لما خطبتها ام وسيم لك !
طالعها بلا مبالاه : ما كنت أدري إنها ابنة عمتي مها !
ولو كنت ادري من قبل يمين بالله الا اسحبها تعيش عندنا معززه مكرمه !
ام محمد : ليه احد خبرك إنها مذلوله !
تراها حيه
قاطعها بتحقير لكلامها : دامك زوجة ابوها ما ظنيت شافت الخير منك
والحين تجلسين ضيفه بإحترامك أهلا
وسهلا
كلام زايد مع السلامه والباب يوسع جمل !
اميره طالعته بحده : تكلم مع امي زين
قاطعها بحده اقوى : لما أمك
قاطعتهم ام سالم وهي تسحب ام محمد معها لمجلس الحريم : تعالي يا ام محمد !
استجابت ام محمد لها وطلعت وتبعتهم ام وسيم وزوجات ابو نورس !
اعطت اميره نظره ناريه لابو نورس وطلعت !
مط شفته بقرف : وش هالحريم ذول ؟!!!!
طالع سلوى بتحريص : اذا رجعت ام محمد هنا ..ناديني انا إلي أوقفها عند حدها !
وطالع ساره بإهتمام : خذي راحتك البيت بيتك ...وما عليك منها تراها عجوز مخرفه !
استأذن وطلع بعدها بخطوات ثابته !
تناظر الارض وتحس عقلها بدوامه ما هي فاهمه شيء !
وش يثرثرون فوق رأسها ؟!
يتكلمون عن أمها وإلا تتخيل ؟!
رفعت نظرها على سلوى إلي واقفه تناظرها ومبتسمه !
زفرت بضجر ساره ما لها خلق !
سلوى بسعاده : يا بختك بابا يدافع عنك !
وقبل ما ترد دخلت اميره بخطوات هاديه وتكلمت : سوار وحور اطلعوا للحديقه البزران برا !
وطالعت ساره بحنيه : تعالي معي يا ساره !
ساره طالعتها بضياع : انا مليت !
اميره سحبتها بشويش : تعالي ابغى اجلس معك لوحدنا !
سلوى تخصرت : يا سلام .. أنا أبغى ساره اجلس معها واتعرف عليها !
أميره خزتها بدون نفس : ملحقه رح تملي وهي بوجهك !
**
**
**
**
من لما رجعت ما سكتت وهي تبربر وللحين ما طلعت حرتها !
ابو الوليد بضجر : وبعدين ؟!!
ام محمد ضربت على صدرها : اخخخ يا حرقة قلبي وانت مو حاس فيني !
طول هالسنين تعرف مين ضرتي وساكت !
ولا فتحت فمك بحرف !
ابو الوليد بضجر : وهذي انت عرفتي وش صار بالدنيا ؟!!
ام محمد بقهر: أنا ما يقهرني إلا حظها هالساره !
لو شفت كيف مهتمين فيها وكأنها
قاطعتها ام الوليد : الله يوفقها ...انت وش حارق بصلتك !
ام محمد بحقد : هذي شايب وكثير عليها مثل أمها !
وبتذكر أبغى اسألك ابو راكان يدري مين أم ساره ؟!
أبو الوليد بهدوء : ما احد يدري إلا أنا واخوي صالح وفهد الله يرحمه وخلف!
وليد رفع حاجب بانتقاد : واجبرتوها تتنازل عن حقوقها
قاطعه ابو الوليد بتبرير : مو حنا إلي اجبرناها !
لما بغينا نتكلم معها بهذا الموضوع لقينا خلف سبقنا واجبرها تتنازل عن كل شيء !
ام محمد جحظت عيونها : والكلب خلف يدري وما خبرني !
ابو الوليد تنهد : خلاص ماضي وانتهى ليه تفتحين صفحات ماضيه !
ام محمد بغضب : دامك تعرف ماضي ام ساره ليه تخطبها لولدك ؟!!
ما جاك العلم إنها مثل امها وأزفت منها !
نادر أكيد مات من سواد وجهها !
كم جلست تلعب من خلف ظهورنا بحجة زياره زوجها المجنون ؟!
جاوبني !
وليد طالعها بضيق : يا عمة ما يصير تطعني بالعرض !
والميت الله يرحمه !
وساره عمري ما شفت عليها الشينه
لا تتبلي عليها بلاه ربنا يعجل عقوبة هاللسان !
ام وليد بتأكيد : كل شيء ولا الشرف يا ام محمد !
ام محمد وقفت بغطرسه : أنا إلي رح اكون شوكه بحلقها!
**
**
**
تناظر اميره بعد ما انتهت من السرد وبصوت مخنوق : قولي قسم ما اخفيت شيء عني !
اميره بعد إلحاح من ساره أعطتها السالفه بالتفصيل تسمعها منها ولا تسمعها من غيرهاوبنبره صادقه : وقسم بالله هذا كل إلي أعرفه !
زمت شفتها ساره بقوه تحاول تمنع سيل الدموع بعد ما سمعت قصة امها
حاولت تمسك نفسها اكثر بس فشلت وطلعت شهقه منها غصب عنها !
اميره بتأثر : ساره !
ساره وهي تمسح دموعها وبصوت باكي : كانت دوم جدتي ام سعيد توصف لي أمي وكأنها ملاك نازل من السماء !
تدرين ليه ؟!
لأنها متأكده من براءتها !
اكيد ظلموها مثل ما ظلمني خلف !
تدرين أنا اكره ابوي كيف يستغل وضعها ويتزوجها بهذا العمر !
صادقه لما كانت جدتي تذمه !
أنا اكره
قاطعتها اميره وهي تحط يدها فم ساره : اششششش
حرام ما يصير تراه أبونا !
صدقيني لو عشتي مع أبوي رح تحبيه
قاطعتها وهي تبكي : وأمي وش ذنبها ؟!!
اكره خالي فهد لانه ظلمها !
ودمرها !
طالعت اميره وعيونها كلها حقد وهي تتكلم: المجنون يبغى يسمي على اسم أبوه !
لو يموت ما يحمل واحد من عيالي هالاسم !
اميره تخفف عنها : حنا وين وانت وين؟!
وبغمزه : تتكلمين وكأنك حامل !
ترى ما امدا
قاطعتها ساره بحرج والدموع ما زلت تشق طريقها بخدها : اميره !
اميره تنهدت : الماضي راح ...ما في داعي نعيش على أطيافه ... أنا ما كنت أبغى السالفه تطلع بس الزفته مها سمعت كلام أبوها وهو يكلمني
ونقلته لأمي !
حتى خالتي ام سالم تقول بعد موت مها ظهرت الحقيقه إنها مظلومه !
علشان كذا تلاقين كل عيال عمي فهد يحبون مها ولها معزه خاصه لأنها مظلومه !
ساره مطت شفتها بحزن: وش استفادت امي من هالمعزه !
ماتت بقهرها وحسرتها !
اميره حطت يدها على كتف ساره : الله يرحمها !
الميت الحين ما يبغى لا انتقام ولا شيء
الا الدعاء والصدقه الجاريه !
أمك الحين محتاجه الدعاء منك !
دموعك هذي ما رح تفيدك ولا تفيدها
إلا زياده الحزن بقلبك !
قومي يا ساره صلي ركعتين وادعي لأمك وجدتك وأبوي !
***
***
**
**
**
عبدالله بعدم تصديق : الحين فهد خالها ؟!!!
عزام هز راسه بتأكيد : سبحان الله كيف الصدف !
نصيبها تكون مع ابن خالها !
ام راكان بهدوء : سبحان الله صبرت ونالت !
عسى تتهنى باقي عمرها !
ويقدرها ويحترمها زوجها !
الكل يمدح بأخلاقه لولا حبتين الغرور إلي عنده !
عفس عبدالله ملامحه بغيره : شايف نفسه على الفاضي !
ابو راكان خزه : ابو فهد شايف نفسه على الفاضي !
اقول خلاص قفلوا السالفه البنت راحت لزوجها واهل امها !
الله يوفقها !!
طالعته ام راكان بعدم تصديق لاخر جمله !

**
**
**
**
جالسه عند امها بضجر... طالعتها أمها : وش فيك ؟!
عائشة بضيق : ساره من لما رجعت لزوجها سحبت علي !
ام سعود عفست ملامحها : عشتوووو !
الظاهر رح يرجع موال زمان من جديد !
عائشه ابتسمت : أحبها وش أعمل ؟!
ام سعود بلامبالاه : وين زوجك ؟!
عائشه براحه صار أخف من اول اول وحياتهم أفضل بكثير وخاصه بعد حملها : مع ربعه !
ام سعود بحرص : باكر لازم نروح للدكتوره وتفتح لك ملف !
مسحت على بطنها بفرح ما هي مصدقه خلاص كبرت ورح تصير أم : ان شاء الله !
**
**